فضفضة تجربة احلام الثراء السريع (1 مشاهد)

[Klein]

النصاب لازمله طماع عشان يشتغل لسه واحددف بلدنا ناصب علي ناس ف ٢٠٠ مليون جنيه وبيقولوا ف واحد تاني ناصب ف ٣٠٠ مليون كمان
المشكله ان الناس اللي اتنصب عليهم حالتهم كويسه جدا ومعاهم ملايين بس عايزين الملايين تزيد من غير مجهود ولا تعب ف الاخر اتنصب عليهم وبيعيطوا

مش معنى أنه حالتهم الماديه كويسه أنهم هيبطلوا يدوروا على الفلوس .. الكل عاوز يغتني باسرع الطرق و اقلها مجهود

 

[Dr. Yousef]

اقولي كام مرة اتعرض عليك انك "تتداول"؟

بص، تعالى اكلمك عن المصيبة والهطل اللي نابع من احلام الثراء السريع واللي بدأ يهل علينا اليومين دول في شكل منصات تداول العملات سواء ورقية او رقمية والبلوجرز اللي مبيعرفوش يفكوا الخط اللي بيروجوا للتداول على قفاك.

المعروف عن البورصة او سوق الاوراق المالية عموما انه معمول عشان يكون وسيلة للتمويل والتجارة، يعني شركة ليها اوراق واصول معروفة بتطرح اسهم والناس تحلل وتشتري بناء على علم كامل وبحث وحاجة اسمها التحليل الفني "خاص بدراسة تطور سعرها واختيار العملة الجيدة او المتوقع رفع سعرها نتيجة لعوامل كتير" والتحليل الاساسي اللي هوا بيدرس الخلل السعري وتسعير السهم وبيساعد على اختيار وقت اتخاذ القرار سواء بالشراء او البيع، فالمنصات بتاعت التداول بقا الغرض منها انشاء شبكة من المتعاملين بالعملات المختلفة بغرض التجارة، او لطرح الاسهم بغرض التمويل، جميل؟

- حاجة كدة لازم تكون دارس عشان تفهم تطور السوق وتاريخ السهم وتحليل الرسم البياني وقصة طويلة يعني.

اللي بيحصل في مصر بقا هو اللعب على الطمع، انهم حولوها لسوق القمار، قايم على الحظ من غير دراسة او تحليل او تجارة او حتى معرفة بالعملة المتاجر بيها، مجرد تحط مبلغ على عملة لمدة معينة وتراقب تصاعد او هبوط العملة دي وانتا مش عارف ايه ده وفاكرها لعبة لو صعدت انتا كسبت ولو هبطت انتا خسرت، نفس اللي بيحصل في القمار بالظبط.

وفوق كل ده ظهر فريق تاني يتم توظيفه بس للتلاعب في الاسواق، بمعنى عمليات شراء يومية مركزة على عملة جديدة معينة ما لرفع سعرها تحت بند العرض والطلب وفي المقابل بتكسب نسبة صغيرة من الارباح في حالة البيع والربح الاكبر بيروح للي وظف الناس دي، وطبعا كل ده بيحصل على تيليجرام بعيد عن العيون، اما عن طريق اشخاص او بوتات وهمية توهمك بالكسب وتجر رجلك.

دا غير الاف المنصات الوهمية اللي بتديك ٦٠ جنية عشان تجر رجلك لمهام شراء ثم تبدأ تزود في السعر والارباح لحد ما يطلب منك مبلغ عشان تعرف تسحب ارباحك وتدفع زي المغفل فا تلاقيه بيطلب تاني لحد ما تكتشف انه اتنصب عليك.

واللي زاد وغطى بقا كمية البلوجرز اللي بيسوحوا الناس ومش فاهمين حاجة في سوق التداول وبيروجوا لفكرة "افتح الفيديو واتفرج انا كسبت ١٠٠ دولار في خمس دقايق"، والناس تطمع وتحط فلوس وتكسب مرة في مرة واخيرا يخسروا كل حاجة وبيوتها تتخرب، لان الموضوع في النهاية مش لعبة، بس هما بيوهموك انها لعبة وسهل تكسب منها.

- حط قصادك القاعدة المهمة دي : اي حد يقنعك انك ممكن تكسب فلوس كتير من بيتك من غير ما تقدم حاجة في المقابل هو حاجة من اتنين، اما نصاب، او داخل في سكة غير شرعية او غير قانونية.

طرحك لقضية هامه ينم عن واعي كامل وسعي للنصيحه

تحياتي يا صديقي ، منتظر منك المزيد

أصحاب الرأي دائما عليهم عبء كبير

 

[Klein]

طرحك لقضية هامه ينم عن واعي كامل وسعي للنصيحه

تحياتي يا صديقي ، منتظر منك المزيد

أصحاب الرأي دائما عليهم عبء كبير

تسلم

 

[الأستاذ. (اللول)]

م

مش معنى أنه حالتهم الماديه كويسه أنهم هيبطلوا يدوروا على الفلوس .. الكل عاوز يغتني باسرع الطرق و اقلها مجهود

حدش بيشبع من الفلوس ولا بيكتفي منها
بس انا الناس دي مش بتصعب عليا ولا بزعل عليهم
بزعل علي الغلابه اللي بتبيع كل اللي حيلتها وتستلف ونفسها تغير حالها وعيشتها للأفضل بس مفيش حاجه اسمها فلوس بالساهل ولا الحدايه بترمي كتاكيت

 

[برلين | BERLIN]

احنا ماشيين ف نفس الاتجاه انا قولت أن التداول في البورصه دراسه وعلم أما في مصر ف تحول لقمار عن جهل من الناس و طمع

ايوه انا بوضح على كلامك عنه ف مصر

قلة ف مصر يعتبر من يستخدموه للنصب والبعض علي درايه به

ولكن الجهل ثم الجهل ثم الجهل هو سبب فشل اي شيء عندنا