مرحبا بكم في رواية القاتل المختل
الجزء الأول من رواية القاتل المختل
الوو روان صباح الخير! معليش متصلة ف زمن م مناسب بس محتاجة ليك؟!
-لالا ولا يهمك ولاء! اصلا انا قمت صليت الصبح وتاني م جاني نوم!! بس طمنيني الحاصل عليك شنو؟!
ولاء بقت تبكي بطريقه بهستريا وقالت ليها انا حأموت!! انا مابقدر انوم م بقدر اكل انا بخاف اغمض عيوني وانا بستحم؟!
-استهدي ب**** مالك ما تخوفيني!! الحاصل شنو؟ انا خليتك كويسة!!
ولاء اتنفست بصوت مسموع وقالت لروان تتزكري الراجل الكان بوصلني الداخلية من شهر تقريبا!! روان خافت؟! وقالت بصوت متقطع مالو!! ولاء بكت تاني وقالت ليها بهددني!! ومحل م امشي بلقاهو ف وشي!! روان زاد خوفها وقالت ليها بخلعة انتي عملتي ليه شنو؟؟
قالت انا بس طلعت ونزلت معاه كم اسبوع ولقيتو ثقيل وم بيعرف يتكلم وفهمو وسخان!! وقال عايز يوديني شقتو وحسيت بيه ناوي علي شر!!
طيب اسمعيني انا ابوي بناديني خليني امشي واجي ونشوف الراجل ده مشكلتَو شنو؟!
قفلت منها ومشت علي ابوها!! وابوها شالكلها لانها بتتكلم بالتلفون ف وقت زي ده!!! وانها ممتحنة بكرة ولازم تقرأ وده م وقت تلفون! وكلام من ده…. وبعد رجعت منه نست ترجع ليها!! وانشغلت مع ماده السايكو!! واليوم عدى سريغ لحدي م اتزكرتها بليل غرابة الساعة ١١م اتصلت عليها!! بس استغربت لانها م ردت عليها!! وابتسمت؟! قالت بتكون زعلانه مني لاني م رجعت ليها!!واستبعدت فكره انها تكون نايمة لانه الامتحان بكره وصعب وقرايتو pdf!! فصمتت التلفون ورجعت لقرايتها وقالت يمكن تتصل وابوها يسمع صوت المكالمة وتاني يحقق معاها!! بس ولاء م رجعت لحدي اليوم التاني روان مشت الجامعة! ولانها جات مع زمن الجلسه م فقدت ولاء!!! بعد خلصت الامتحان طلعت مبسوطة لانه الامتحان جا سااااهل وكل الحاجات الحددتها ليها ولاء جات ف الامتحان!!
طلعت تفتش ليها بين الطلبة!! كانت مشتاقة ليها شدييد وحابة تعتذر منها على موقف امس! وتشكرها علي توقعاتها الدائماً بتصدف!! بس م لقتها!!!وسألت عنها الطلبة بس ماف زول شافها!! لحدي م اتصدمت لم عرفت من واحدة من المراقبات بتعرفهم!!؟ وورتها انه ولاء م جات الامتحان!! ف روان قعدت في الارض من شده الصدمة!! وقالت شنو؟؟ المراقبة اكددت ليها!! وطلعت تلفونها وجسمها بيرجف!!! اتصلت عليها وبعد اربعة محاولات ماف زول برد عليها!!! بقت تبكي!؟ والناس مستغربة! بقولو ليها ف شنو؟؟ بتقول ليهم ولاء حاصل ليها شيء!!
اتصلو علي مشرف الداخلية قال ليهم امس كانت موجودة!!! وسجلت حضورها من ٨ مساء وم طلعت!! بس الصباح م شفتها وما عارفها طلعت متين؟! اتصلو لصحباتها المعاها في الغرفة قالو من الصبح طلعت افتكروها ماشة الجامعة لانها قالت م قارية كويس ومع جوطة بنات الداخلية م قادرة تركز!!! ف روان انهارت وبقت تصرخ!! لمن فقدت الوعي!!! بعد فاقت طلبوها ف الاداره!؟ دخلت لمدير الكلية واستفسر من الدراما الحصلت!!؟ ورتو انها خايفة علي صحبتها وانها امس كانت خايفة ومتوترة!!؟ المدير ب استنكار!! قال ليها خايفة من شنو؟!
سكتت مساااافة وم كلمتو بالكلام القالتَو ليها ولاء!! المدير اعاد السؤال!!؟ بس روان قامت علي حيلها واعتذرت عن انفعالها الحصل وطلعت من مكتب الإدارة؟!؟
اتصلت علي اهل ولاء في النيل الأبيض… واتفاجئو لانها م بترد عليهم وافتكروها دخلت الامتخان وصمتت التلفون والتلفونات بقت تتخابط!! والطلبة وعلي رأسهم روان بفتشو فيها!!؟ واهلها جاين ف الطريق واخوانها بلغو وبقو يفتشو في المستشفيات!!؟ وتلفونها بقي يديهم انه مقفول!! وماف زول من شلتعا قادر يقرأ للماده الحاية!!؟ بالجد كانو مرعوبين عليها!! وروان قربت تكلم الشرطة بموضوع التهديد داك!! وكلمت زميلها!! قال ليها حيجرجروك في الاقسام!! وقلتي ابوك صعب ممكن عادي يمنعك من الجامعة!!؟ فشنو اصبري شوية لحدي م نشوف الموضوع اخرو وين؟! روان بكت واتصلت علي حبيب ولاء وسالتو اذا اتواصلت معاه ولا عرف عنها خبر.؟! بس ماف جديد…!
ولاء مختفية يوم كاااامل واليوم التاني كان الاصعب على الاطلاق!! منزلين صورها في مواقع التواصل ومكرفونات الجوامع وم خلو حته م فتشوها!! لحدي الساعة تسعة مساء الموية حقة العماره الفيها الداخلية حقه ولاء قطعت؟! طلع الغفير اخر طابق عشان يفتح البلف حق السهريج!! شم ريحة م حلوه!! واتجه علي مفتاح اللمبة حقة السطوح!! بس ابت تشتغل شكلها ضااربة!!
ولع فلاش تلفونو ومشي علي الصهريج لقى زول سميين مرمي جنب الصهريج!!!؟
اتخلع وقام جاري بكورك للحارس بتاع الداخلية والناس جمهرت!! وصدف انه ف رجال امن كانو بحققو مع بنات الداخلية بخصوص اختفاء ولاء!! ومع الكواريك الكل طلع فوق!! وكانت الصدمة!!
نواصل بعدين..
يتبع ……….
الجزء الثاني من رواية القاتل المختل
الدنيا قاسية واختباراتها اقسى!! ناس ولا بالغلط م بنفكر اننا ممكن نفقدهم!!! وفي غمضة عين يمشو حتى قبل م يقولو مع السلامة ولا نشبع منهم!! اصلا م بنشبع منهم…بس الدنيا ظالمة شدييييد!
كل الفي البناية اتاسبقو علي السطوح!! الشرطة ابعدتهم بالقوة!! لحدي ما شالو خرطوش موية عادي عملوه حاجز بين الناس والجثة!! وعلى غير العادة في اقل من عشرة دقائق شرطة ولاية الخرطوم كلها كانت مطوقة المكان!!؟
للاسف طلعت دي جثة مقطوعة الرأس!! بس تم التأكيد بعد اخذ الحمض النووي! انها ل ولاء !! وزميلاتها عرفوها من الجلباب اللابساه قبل م نتيجة الفحص تطلع!!! كانت جريمة بشعة بك المقايس!! وهزت المجتمع السوداني!! طالبة جامعية في السنة الثالثة!! م اتجاوزت٢٢سنة!! تتقتل بالطريقة البشعة دي!!؟
اهلها كانو مصدومين و روان اكتر منهم!! لدرجة انها م واصلت امتحاناتها وشالت كل المواد بدائل!!؟ وماف زول عارف القاتل منو ولا سبب القتل شنو؟! بس الافكار الما فارقت روان ولا لحظة كلمات صحبتها الاخيرة!!! ولم غلبها تسكت!؟ كلمت ابوها!! وهي بتبكي…حضنها عليه مسافة!! وقام خلاها!!
اتصل على واحد قريبهم ضابط في الجيش؟! وحكى ليه الحصل!! الاخير قال ليه م تتصرف لحدي م اجي عليكم…! فعلا وفي اقل من ساعة كان معاهم في البيت!! ناقش روان وهي بترجف من شده الخوف!! بعداك قال ليها امشي البسي وارح معاي!!؟ كانت لابسة عباية وطرحة مكرمشة! وكلها دموع ومخاط..! قالت ليه لابسه!! بس حنمشي وين؟! قال ليها م تخافي انا معاك!!! ابوها قال ليه ماشين القسم!! قال ليه لا حنمشي النيابة!! الاب جا طالع معاهم بس النقيب حسام!! رجعو وقال ليه صدقني م حنحتاجك!!! الاب انفعل وقال ليه كيف اخليها تمشي براها!!! جنابو حسام طرف ب احمد والد روان! وقال ليه يا عمي شوفها خايفة كيف؟! مشيتك معاها حتخوفها اكتر!! ويمكن قدامك م تقدر تتكلم!! وصدقني وكيل النيابة يمكن يسألها اي سؤال؟! ونحنا عايزين نضمن مصداقيتها في كل كلمة حتقولها!! خليك مطمئن اخوها معاها!! احمد اتنهد بصعوبة وربت علي ظهر حسام! وقال ليه خير إن شاء ****…وحسام ساق روان!!! وطلع! ركب عربيتو وهي سرحانة بعيييييد وتجدد البكاء كل م تتزكر موقف ليها مع صحبتها!!؟
قال ليها م تخافي ادعي ليها!!! وساعدينا عشان نصل للقاتل!!؟ قالت ليه بس انا م بعرفو!!! شفت العربية بس!!! قال ليها برضو حتدينا رأس خيط ..ولم وصلو النيابة رجولها خدرت وم قدرت تمشي!! مسكها من يدها وقال م تخافي انا معاك!!! قشت دموعها ودخلت!! لقى وكيل النيابة في مرور علي الحراسة!! انتظرو لمدة نصف ساعة!!! وكان بحاول يروقها ويسألها عن دراستها عشان يهدي اعصابها!!؟ لانه شوية كده وكانت حتتشنج؟!؟
لم وكيل النيابة جا فاتح الباب بقوة وماشي يتقدل بالبدلة وصاري وشو!! النقيب حسام سلم عليه!! وكان سلامو بارد!! وسألو خير ان شاءالله عندكم شنو؟! وكان وكيل النيابة برتب ف اوراق قدامو! وبيقرأ ليه في ورقة باليد التانية!! وبعاين للروان بقعر عينو!! حسام قال ليه جاين بخصوص قضية ضحية داخلية الإستقامة!!!؟ وكيل النيابة لمن رمى الورق من يدو!! ووجهه كرسية المتحرك عليهم!! وقال بدهشة! شنو؟! حسام اتنهد وقال ليه صاحبة المغدورة عايزة تدلي بإفادة!!!؟ وكيل النيابة قال لي روان تعالي اقعدي هنا!!! وكانت قاعدة ف الكنبة الجنب الباب!! ناداها تقعد ف الكرسي العلى يمينه!! بصعوبة حتى قدرت تتحرك!! وقعت ف الكرسي كأنه جذبها مغنطيس!!؟ حسام قال ليه روان صاحبه ولاء المغربة ويوم الحادثة!!! مولانا قاطعه وقال ليه!! معليش ي سعادة!! بس خليها تحكي هي!!؟ وسألهم يشربو شنو؟!
طلب قهوة!! وسأل روان قالت م عايزة شي!! شوية كده وجا عسكري داخل ومعاه واحد شايل الضيافة!! شاي لمولانا وجبنة لجنابو حسام وموية لروان!!! مداها ليها بس الكباية كانت بترجف ف يدها وم قدرت تشرب!! مسكها منها حسام…!
مولانا قال ليها م تخافي قولي كل حاجه عارفاها عن الموضوع!! ونوعدك اذا ساعدتينا حنقدر نقبض علي قاتل صحبتك!!! بكت بحرقة وقالت و**** انا م بعرفو بس عايزة اساعد!! ولاء اتخطفت في عز شبابها!! عديم الانسانية قتلها بوحشية!!؟
مولانا قال ليها نبدأ من الاول!!؟ بتعرفي من متين؟! قالت ليه من ثلاثة سنوات!! من سنه اولى جامعه ونحنا مع بعض!! قال ليها علاقتك معاها كيف؟! بكت بحرقة!! قالت ليه كانت اختي التانية!! كانت اكتر من صحبة بالنسبة لي!! كانت البيست فريند لي!! قال ليها اخر مرة شفتيها متين!؟ قالت ليه قبل ثلاثة ايام من اول امتحان!! بعد جدول الامتحانات نزل اتلاقيها وشرحنا المادة!! وهي مشت الداخلية وانا رجعت بيتنا!!؟ قال ليها لاحظتي شنو في سلوكها!!! قالت كيف يعني؟؟ قال ليها تصرفاتها!! قالت ليه طبيعية كانت!! قال ليها اها واصلي!! بعداك حصل شنو؟! قالت ليه كنا بنتواصل ف الفيس بس؟! قال ليه ليه!!؟ قالت ليه لانه اتفقنا لحدي م نخلص الامتحانات ماف واحدة فينا تفعل نت!! فبقينا نخش الفيس المجاني نسلم علي بعض ونطلع سريع لقرايتنا!! قال ليها وبعداك؟! قالت ليه لحدي قبل الامتحان بيومين كنا كويسين ولو ف حاجة غلبتني بتصل عليها وكانت بتشرح لي!!؟ وبقت تبكي!!! م قدرو يسكتوها!! لحدي م كملت بكيتها!! وعيونها ورمت!؟ حسام اداها تشرب موية وكان ماسك ليها الكباية لانها منهارة!!؟ شربت واتنفست بصوت مسموع واستغفرت!! وقال ليها مولانا!! اها نواصل!!؟ اومأت برأسها!! وقالت بعد م شرحت لي الدبرشن!! قفلت بدون م تهزر معاي كعادتها!!؟ وقلت بكون بسبب ضغطة الإمتحانات!! بس هي م من النوع البشيل هم امتحان!! كانت شاطرة ي مولانا!!! وتاني رجعت للبكاء!! قال ليها خليك قويه وكملي اها حصل شنو بعداك!!؟
قالت ليه بعداك نمت!! وقمت الصبح اراجع المادة!! اتصلت علي بعد الصبح!! قال ليها يعني زي الساعه كم؟! قالت ليه خمسة ونص صباحاً!! قال ليها اها وعداك!؟ قالت ليه كانت خااايفة ومرعوبة!! بالجد اول مره احسها خايفه للدرجة دي؟! وقالت لي تتزكري الراجل الكبير الكان بجيني داك!!؟ المهم كانت خايفة شديد وقالت لي انه بتابعها محل م تمشي وانها خايفه وتقريبا بهدد فيها!!؟ بالجد كانت مرعوبة!!! بس انا السبب؟! وروان بقت تصرخ لمن العساكر جو جارين!! ودخلو المكتب؟! مولانا طلعهم!!! حسام جا قعد جنبها وحاول يسكتها!! حضنتو وغمرت؟!
بعد خمس دقائق تقريباً!! فتحت لقت نفسها في الكنبة القعدت فيها اول ما دخلت!!؟ جات قايمة وكان رأسها لسسسه لافي!! اتلفتت يمين شمال م شافت زول؟! قامت علي حيلها رأسها لفه لمن ثبتت ف طرف الكنبة واتركزت علي الباب!؟ فتحت باب المكتب!! لقت شرطي برتبة رقيب!! قاعد ف كاونتر قريب لمكتب وكيل النيابة!! جا عليها وقال!!! خليك جوه!! مولانا مشي يصلي العصر وجاي!؟ قالت ليه وجنابو حسام!! قال ليه معاه!! رجعت قعدت وجابو ليها عصير!!! بس م قربت عليه لحدي م مولانا وجنابو جو داخلين!! سلمو عليها وسألوها اذا واجعها شي!؟ هزت رأسها بمعنى لا!! مولانا مسك قلمه وقال ليها نحنا مقدرين الالم الانتِ فيه!! بس صدقيني كل م استعجلنا في اجراءاتنا حنقبض علي الجاني اسرع!!؟ فبتمنى تساعدينا!! قالت ليهم ان شاءالله…؟!
قال ليها اها الزول ده منو وعرفتو كيف ومتين ومن وين بما انك صاحبتها الانتيم!! اتنهدت وقالت ..من شهر!! كنا طالعين من الجامعة وم لقينا مواصلات !! وانتظرنا لاكتر من ساعتين!!! لم جات مواصلاتي ركبت وقلت ليها!! بدل تقيفي ارح اركبي معاي وانزلي بعد الكبري!! يمكن هناك تلاقي اسرع!!؟ وياريتني م قلت ليها!!؟ مولانا رفع عينو وعاين ليها مسااافة!! وقال ليها كملي!! قالت ليه فعلا ركبت معاي ونزلت جنب النفق!! وانا واصلت!! بقيت اتصل عليها اشوفها ركبت شنو بي م بترد علي!! بعد وصلت البيت اتصلت عليها اشوفها وصلت كيف! ولا حصل معاها شنو؟! ردت مبسوطة وقالت لي متفاخرة أنها لقت زول مرطب وصلها وشال رقمها وقالت لي ممازحة حتخلص باقي الجامعة بدون م تتشحط في لمواصلات تاني!! وعرفت منها انه عرض عليها ترتبط بيه!!؟ وانا حذرتها بس هي م بتخاف!! اصلا م عندها ليه حاجة بس بتهمها بطنها وراحتها!! ولو زهجت منه بتفكو؟!
مولانا قال ليها يعني صحبتك لعوب!! بكت وقالت لا ابدا!!! بس دائما بعجبو بيها الرجال الكبار!! وسبحان **** بكون وضعهم كويس!! الواحد يعزمها مرتين تلاتة وبتفصلها منه!؟ بس م بتتمادى مع واحد فيهم!! ولا ترابط بيهم؟!
مولانا قال ليها اها وبعدين؟
قالت ورتني انه رجل اعمال ولا تاجر م عارفه وعدو عربيه اخر مويل!! وقالت لي ح اعرفك بيه شكلو ظريف؟! بس انا بخاف!! قلت ليها خليه يجي جنب الجامعة اشوفو!! فوافقت!!؟ وبعداك بقت م بتجيب لي سيرتو!! ولا عارفه اذا باللقيهو ولا لا!!؟ لحدي م يوم قالت لي حيجي الجامعة!! طلعت مخصوص عشان اشوفو!! بس الغريبة ابا ينزل العربية كانت مظللة وقالت لي تعالي اركبي!! انا ابيت؟! قالت لي خلاص تعالي سلمي؟! يرضو ابيت!! وقلت في سري مفتري!! بدل هو ينزل يسلم علي!! عايزني امشي ليه انا كمان؟! ومشيت خليتهم!! بس اشرت ليها بيدي نظام مع السلامة!! وتاني م شفتو!! وقالت لي بعد يومين تلاتة انها فصلتها منه!! ضحكت!! لاني عارفة طبعها!! م بتستمر في تعارف اكتر من اسبوع!! وم بتخش في علاقة مهما حصل لانها بتحب واحد من اهلها!!؟ مولانا قال ليها!! طيب ماورتك نوع التهديد شنو؟! قالت ليه كانت عايزة تكلمني بس ابوي ناداني وقلت ليها برجع ليك ونسيت ارجع ليها!! للمساء كده لم اتذكرت!! رجعت ليها بس م بترد!! اتاريها الوقت داك ميتة!!؟ وصدمت تاني!!! حسام نقلها علي المستشفى!! ووكيل النيابة قال ليه كلامها مهم شديد!! لازم نعرف الراجل ده منو؟! وهل هو القتلها ولا سبب التهديد كان شنو؟!! بعد تتحسن شوية حنواصل معاها!! لازم نحصل علي راس خيط!!!؟
في المستشفي اخدت ليها دربين بعداك رجعها البيت بعد المغرب!!!؟ اهلها كانو متوترين!! ولانه م عندها اخو شقيق!؟ ابوها كان متوتر شديد وافكارو تودي وتجيب…وجاتو افكار سيئة شديد!! وانه بنتو الكبيرة ممكن تكون بتعمل شنو من وراهم؟! وتساؤلات كتيرة!!! لحدي م وصلت!! امها اساقبلتهم جنب الباب!! ارتمت في حضن امها وبكت!! ابوها فضل حسام علي الصالون وعرف منه الحصل شنو؟! بس حسام طمئنو أنه مافي شئ!!؟ وروان وصعها مطمئن!!؟ افادتها مهمة شديد!! وانهم قد يحتاجو ليها تحت اي لحظة!!؟ وقال لابوها!! م تخاف ي عمي انا معاك!؟ م بخلي اختي براها!؟ واكيد م يحصل إلا الخير!!؟
وطلع منهم رغم اصرارهم عليه أنه يتعشى معاهم!؟! بس رفض وشكرهم!! وطلع!!
______________________
اما اهل المغدورة كانه حيجينو من بعد سماع الفاجعة دي!!؟ وابوها قرب يعتدي علي رجال الشرطة لم منعوه يتكلم مع الدكتور الشرح الجثة!!؟ واكد ليهم انها م مغتصبة!!؟ وانا لسسسه بكامل بكارتها وم تعرضت لاي اعتداء!؟ طيب من حيستفيد من موتها!!؟ مين قتلها بالطريقة البشعة دي؟! وحتكون عملت ليه شنو؟!
المنظمات المحلية والإقليمية كانت متبنية متابعة الأحداث واصبحت قضية رأي عام…لحدي ما رئيس النيابة الاعلى استدعى روان تاني!! والمره دي ساقوها بدون م يكون جنابو حسام معاها!!؟ وكانو يحققو معاها ثلاثة!! واعادت ليهم نفس القصة الفاتت وكل واحد بتفنن في نوع الاسئلة!! نوع العربية ولوحتها ولونها!! وشكل المشتبه به اذا شافتو؟! ولا لو شافتو ف تلفون صحبتها!!؟ بس اكدت ليهم انها م بتعرفو!! بس كل العارفاه انه كان مقيم لاكثر من ٣٠ سنه خارج البلاد!! وانه ساكن ف ارقى احياء الخرطوم؟! واسمو ناصر تقريباً!! ادتهم شوية امل في انهم ممكن يحصلو علي راس خيط!!
بعد اسبوع من الحادثة وفي جزيرة توتي تحديدا !! واحد من الصيادين وبعد سحب شبكة الصيد حقتو!! طلع معاه كيس؟!! فتحو ملهوف!!؟ وصعق لم لقاه رأس جثة ومعاه قفازات..؟!
نواصل بعدين
يتبع ……….
الجزء الثالث من رواية القاتل المختل
الصياد من الهجمة لمن جدع الكيس من يدو وزحف بإيديه للخلف وهو قاعد على الارض!! وكورك لكم صياد معاه!! جو جارين وكان بأشر ليهم علي الكيس!! واحد ابا يقرب عليه! التاني شال عصاية الصنارة وجراه لبرا شوية من البحر!! لحدي م استلمو ف يدو!! لم فتحو بقي يستعيذ ب****! ويتشهد!؟؟
ختاه ف الارض وقال لواحد معاهم اضرب٩٩٩!!
طوالي طلع تلفونو وقبل م يتصل!! الكان واقف بعيد داك قال ليهم م تجيبو لنفسكم مشاكل!!؟ اسسسه يحرجروكم في المحاكم والاقسام والنيابات!؟ ويقطعو معايشنا!! م ناقصين مصائب نحنا!!؟ ف الأيد كلامه!! بس الصياد اللقى الرأس ومعاه واحد قالو انتو اطلعو منها نحنا حنبلغ؟! يمكن يكون الزول المقتول ده مجهول ولا قلب اهلو مقطوع عليه وم عارفنو وين؟! يمكن يكون **** طلعو قدامنا لحكمة يعلمها هو!! واتصلو للشرطة!! دلاك شالو شباكهم وقالو ليهم اعتبرو نفسكم م شفتونا ومشو!!؟
الشرطة خلال نصف ساعة ملت المكان!! صورو الشباك وموقع الكيس وحتويات الكيس وحققو مع الصياد وخلوه ندم لليوم الاتصل ليهم فيه!! ولانه الرأس متحلل م اتعرف لرجل ولا مرأة وودوه المشرحة!!؟
والقفازات والاكياس الكانت فيها مشت علي الفحص الجنائي!! ولليوم التاني حتى نتيجة الفحص طلعت مطابقة للحمض النووي المغدورة ولاء!؟ وكيل النيابة اتصل علي اهلها وجدد ليهم الآلام! وبعد اكتمال التشريح واخذ العينات سلموهم الرأس لدفنه!!! ف الناس اتألمت من بشاعة الموقف اكتر من دفنها الاول!!! وبعد الدفن مباشرة خالها تاجر! اتصل علي صاحبه مستشار قانوني بوزارة العدل!! كان منهار!! وبقى يشتم ويسئ و متحسر علي الحصل لبنت اخته!! صاحبه هداه شوية وقال ليه تعالني في الوزارة منتطرك؟؟!
فعلا من المقابر مباشرة اتجة على وزارة العدل!! كان المستشار في اجتماع وهو قاعد منتظر في صالة بالقرب من المكتب شافو واحد تاني كان برضو منتظر يقابل مستشار تاني!! عندو مشاكل ادارية متعلقة بمبنى منسوب للوزارة!! المهم اتبادلو اطراف الحديث وخال ولاء اسمه ناجي! حكى ليه القصة الاصللا التاني طلع متابع احداثها في الصحف اليومية وعزاه!! ولمن دخل لناحي افكار عجيبة غريبه وبقي يحلل وينظر!! ويفترض اشياء صعبة الحدوث!! وقال لخال المغدورة صدقني الشرطة م بترجع ليك حق بنت اختك!! حيلفو كدااااا ويجوطو الشغلانة وبعدين يركنو البلاغ ضد مجهول!!؟
انا بقترح عليك توكل محقق خاااااص للقصية دي!!؟ ناجي قال ليه كيف؟
الراجل قال عدل قعدتو وقال ليه في محققين خاصين! ببحثو بطريقتهم الخاصه لحدي م يصلو للجاني ويسلموه للعدالة!! وكان عايز تاخد حقك بيدك دا برجع ليك بعدين!!؟ ناجي اتحمس!! وقال ليه بس القاهم وين وكيف؟!
الراجل همس ليه وقال!! جيبك كان م تقيل م بتقدر تجيبو!! لكن بكشفها ليك يعني بكشفها ليك!! ناجي قال علي الطلاق كان ابيع كليتي! م اخليه يفلت من العقاب!! بس انت دلني علي واحد!! وفعلا الراجل اده ناجي رقم واحد وقال ليه اتواصل معاه!! وان شاء **** حيفيدك!!
اتصل عليه وقتي وقال ليه انا ناجي جايك من طرف فلان!! قصدو الشخص القاعد جنبو!! بس المحقق برضو م قدر يتعرف علي الزول! وسأل ناجي عايز شنو؟ بدا يحكي ليه ف الموصوع وداك بيسمع!! بعداك اختصرو وقال ليه خلاص تمام!! موافق حاشتغلها ليكم!! واكيد حنكشف الجاني!! ناجي اتنفس الصعداء!! وحس بشوية امل.. والمحقق المجهول قال ليه ح ارسل ليك رقم حسابي!! ح ترسل خمس مليون! وبعد ينتهي التحقيق حتدفع الخمسة التانية!! ناجي م اعترض علي المبلغ!! بس احتار من اسلوب المحقق!! لا درس القضية ولا قال نتلاقي ولا حتى اتكلم عن الموضوع!! واول شي طلب خمسة مليار!! بالجد شي يحير!!؟
قال ليه خيير! بعدين بتصل عليك! وقفل منو؟ وقبل م يتناقش مع الراجل المعاه!! جا واحد نده علي ناجي وقال ليه اتفضل مولانا منتظرك!!؟ ودخل معاه علي صاحبه!! سلم عليه وعزاه ف ولاء!! واتكلمو باستفاضة عن الموضوع!! لحدي م ناجي ذكر ليه موضوع المحقق!! المستشار ضحك بقهقهة!! وقال ليه م تكون حولت القروش؟!
ناجي ابتسم وقال ليه لا لكن فكرت ف الموضوع!! المستشار قال ليه و**** القرش السايب يعلم السرقة!! حول لي القريشات دي انا اولى بيها!! وخلا ناجي يضحك وهو ف حالتة السيئة ديك!! المهم قال ليه من قال ليك نحنا شرطتنا م انافعة ولا حتضيع حق بنت اختك!!! صاااح الموضوع بياخد زمن! بس أكيد م حيقصرو وحيقومو بدورهم علي اكمل وجه وان حصل بعض القصور!! ناجي قال ليه يلا انا خايف من القصور ده!!؟
المستشار ضحك وقال ليه اذا مصر عايز محقق خاص حشوف ليك اجعص محقق في السودان والدول المجاورة والغربية كمان!! ناجي عقد حاجبية وقال ليه ده منو كمان!! قال ليه علي الحاج!! الثعلب كما يحلو له!؟ قال ليه طيب اصل ليه كيف!! وصرفو بالدولار م تقول لي!!! المستشار ضحك وقال ليه لالا م بقول ليك عايز ١٠ مليار؟! بس صدقني لو وافق يستلم القضية دي انا ح اساهم معاك ف دفع المبلغ الحيطلبو!! بس صدقني حيطلب حاجة معقولة!! ناجي قال ليه بحماس م مشكلة اي سعر انا موافق بس اتصل لي عليه!!؟
المستشار فتش تلفونو واتصل علي وزير عدل سابق سلم عليه وطلب منو رقم الحاج!! ووصح ليه السبب بس م اتعمق ف التفاصيل!!؟ وفعلا في اقل من خمس دقائق الرقم اترسل!! ناجي قال ليه رقمو عند الوزير!! المستشار ضحك!! وقال بدون مبالغة م تستبعد انه يكون عند مستشار البيت الأبيض الأمريكي!! ناجي ضحك وقال ليه شوقتني اشوفو!!؟
اتصل عليه م رده!! رجعو يتونسو!! وبعد ربع ساعة تاني اتصل!! رده الحاج بخمول!! منو معاي؟!
المستشار ابتسم لم سمع صوت الحاج وقال ليه معاك المستشار محمد هاشم!! وسلم عليه والحاج ساكت!! المستشار قال الووو!!
الحاج قال ليه سامعك عايز شنو!؟ المستشار مندهش من اسلوب الحاج!! سمع انه لئيم بس م قايلو للدرجة دي!! تاني ابتسم وقال ليه عايزك بخصوص القضية الفلانيه!! وقبل م يخش في تفاصيل الحاج!! قاطعو وقال ليه هو وقف الشغل الجنائي وم فاضي واعتذر منو وقفل!!!
المستشار اتنفس بصعوبة وقال لناجي للاسف م وافق قال مشغول!! بس ثواني اشوف واحد يتوسط لينا عندو!! اتصل علي عقيد ف الجيش كان بيحكي ليه عن علي الحاج وانه بعرفو معرفة شخصية!! وكلام من ده!! اتصل وسلمو على بعض وطرح ليه الموضوع!! العقيد قال ليه م اظن حيوافق ولده الكبير ابراهيم اتوفى ف أمريكا!! وهو ف حداد عليه!! ومرات بقول اعتذل العمل وحيسافر يستقر مع حفيدينو ف أمريكا!! بس انا بحاول ليكم معاه!! وقفل منهم!! ناجي شال رقم الحاج من صاحبه وشكرو وطلع!! رجع بيت العزاء لقى الاهل جددو البكاء والنواح تاني وم فضل إلا يفرشو ليها تاني!! دخل علي البيت جوه لقى روان حضنتو وبكاء فيها شديد لانو مرات بوصلها بيتهم لم تجي للمرحومة!! ف اتأثر شديد…!
اتصل على ضابط في الشرطة وسأله اذا في تطور في القضية!! بس الاخير اكد ليه انهم شغالين وتحرياتهم شغالة! وانهم باذلين جهودهم لتحقيق العدالة! وكلام مملق كده م بشفي غل اهل الضحايا!! وكل الطرق مسددة في وجوهمم!! وحتى الادلة الجنائية م اتوصلت لاي بصمات لا ف الجثة ولا ف الرأس والقفازات!! وحصرو تحقيقهم في بيانات هاتف المقدورة الماجات من شركة الاتصال!! وفي وصف روان لعربية المشتبة به! والبينات القدمتها!! لحدي المغرب أذن!! روان قالت راجعة بيتهم!! طلبو منها تبيت بس اعتذرت انه اختها ممتحنة بكرة ماف طريقه تبيت معاهم بس حتجي مره تانية!!
ناجي خال ولاء قال ليها خلاص خلوني اصلي وبوصلكم!! شكرتو ورفضت مبررة بأنهم مضيفوين وانه المواصلات ماشة وحتصل سريع مع اختها!! بس هو نهرها وقال ليها عشان اختك ماتت معانها م اوصلك تاني!! خليني اصلي قلت ليك!! في النهاية وافقت!! بعد الصلاة ركبو معاه هي واختها!! ولم طلعو الشارع الرئيسي شافت عربية شبيهه لحقه الزول الشاكين فيه واقفة ف بداية الشارع!! قلبها ضرب وعربيتهم مشت وهي لسسسسه متلفته بتعاين للعربيه الفضلت واقفة م اتحركت!!؟
جسمها بقي يرجف!! بس قالت بينها وبين نفسها بتكون دي عربية بتشبها ساي م اكتر! ناجي سألها في شنو؟! قالت ليه ماف شي!! وصلهم بيتهم ورجع!! وهي مع انه الموضوع عادي بس الليل كلو مقلقة!! والنوم طار منها!! ولو الشباك ضرب ساي هي بتقوم ناطة؟! م طلعت من بيتهم لكم يوم!! دفعتها خلصت الامتحانات واخدو اجازة صغيييرة حتى ينزلو !! ف الايام جرت سريع والحادثة قربت للشهر وماف اااي جديد!! لحدي م في يوم روان طلعت علي الجامعة عايزة تشوف موضوع البدائل حتمتحنهم متين!! وتشوف حتقدر تسجل للسنة الجديدة ولا لا!! ولم وصلت الجامعة وقطعت الزلط شافت ماشة وراها!! اسرعت ف المشي وخشت تحت ولا شجر ف ممر طويل للجامعة!! وجسمها كلو بيرجف!! لحدي م دخلت الجامعة!! قعدت ف الاستراحة!! وقالت اكيد انا بتوهم!! ماف زول متابعني!!! اصلا انا عملت شنو؟! وبعد ربع ساعة حتى مشت لمسجل الكلية واستفسرت موقفها وخطواتها الجاية حتكون كيف!!؟ ولاقت بعض زملائهم ف الكلية سلمو عليها واتكلمو عن المرحومة وواسوها بالكلمات وعزموها تفطر معاهم بس شكرتهم ومشت!! لم طلعت اتلفتت يمين شمال م شافت العربية!! لمن ابتسمت!! ومن قعطت الزلط وقبل م تصل الجهة التانية ومن حيث لا تدري جات عربية بسرعة فائقة ضربتها ومشت!!؟ خلتها طارت فووووق وارتضمت ب الترتوار!!؟
نواصل بعدين
يتبع ………
الجزء الرابع من رواية القاتل المختل
اخر حاجة شافتها روان دخان العادم حق اللاند كروزر الضربها!! وفقدت الوعي! الناس اتجمهرت واسعفوها براهم م اتصلو للاسعاف!! ولانه الحادثة حصلت قدام الجامعة ف كذا دكتور حصلوها علي المستشفي!!
الحمد*** **** لطف بيها اصيبت بشق في الحوض وكسر ف اليد والترقوة!! بالاضافة للكدمات والخدوش!! والموضوع عمل بلبلة لدى الاهل وحتى رجال الشرطة!! هل الحادث مقصود!! ام حادث عرضي ناتج عن تهور احد السواقين!! في ناس شاهدو البوكس ووصفوه لناس الشرطة!! واكدو ليهم انه م فيهو نمرة!! وكان مظلل؟ فبقت عيونهم مركزه علي روان وشددوا عليها الحراسة ف المستشفى! ومنتظرنها تتحسن شوية حتى يستجوبوها!! لانها ف حالة صدمة لمدة يومين!! وحتى بعد م استعادت الوعي سارحة بعيييد وم بتتكلم مع زول!!؟ قد يكون بسبب الحادث او لشئ تاني؟!
جا زارها ناجي…! اطمئن عليها!! واتذكر بنت اختو م قدر يخبي دموعو!! وقال وكان مفتكر انها كانت شاردة وم انتبهت للعربيه وهي جاية عليها!! وقال ليها اختك وجعتنا كلنا بس ده قدر ****!! كلنا لها! حاولي اتمالكي نفسك وركزي وم تضيعي نفسك من ورا التفكير!! صدقيني صعب علينا نخسر بنتين؟! بقت تبكي معاه وقالت ليه هو العايز يقتلني هو عايزني احصل اختي وصحبتي!!؟ عاين ليها بدهشة!! وقال ليها هو منو؟!
بكت بحرقة وقالت القتل ولاء!! ناجي قام علي حيلو! وقال ليها انتي بتعرفيهو!!؟ قشت دموعها وقالت لا!! بس شاكة انو هو!! لانه يوم دفنتو باقي الجثمان حسيت بأنه ف عربية كانت متابعاني!! وقبيل وانا داخلة علي الجامعة شايفة ف بوكس وراي!! دخلت منو ورا الشجر ومشى عادي من جنبي ودخلت الجامعة مسرعة!!؟ ولمن طلعت ولقيتو ماف لمن فرحت!! بس من قطعت الزلط!! طلع لي من وين م عارفه!!! وتاني م وعيت بشي؟؟ ناحي بقى يتأتي وقال ليها يعني ف زول عايز يقتلك!! عملتو شنو انت وهي؟! كلميني عشان اقدر اساعدك! بقت تبكي وقالت ليه م عملنا شي!!؟ وانهارت!! طلع خلاها ملهوف وماشي مهرول وم عارف يقبل على وين ولا يتصرف كيف؟! وسبحان **** اول زول خطر علي باله علي الحاج!!!
طلع تلفونو ولمن يدو فاقدة توازنها!! واتصل عليه!! وزي كل مره م رده من اول اتصال!!؟ تاني اتصل!! وقبل اخر جرس الحاج رده!! ب انفعال!! من اول محاولة من المفترض تعرف انه ياصاحب التلفون بعيد يا ماعايز يرد!!؟
ناجي اعتذر بأدب وقال ليه انا ناجي اسماعيل… متصل بخصوص قضية المغدورة ولاء ميرغني..! الحاج قاطعه وقال ليه انا وقفت الشغل!! **** يرحمها ويعوض شبابها الجنة!! بس انا ما بقدر استلم القضية دي!! بس ناجي الح عليه وعزاه ف ولده!! الحاج قال ليه انت بتعرف ولدي!! ناجي سكت لوهلة وقرب يقول اااي عشان يكسب وُدّ الحاج!! بس راجع نفسه وقال ليه لا!! بس المستشار الاتصل عليك من كم اسبوع داك كلمني!! الحاج سكت!!
ناجي قال ليه و**** القاتل ده بيلعب بينا!! ومن يومين حاول يقتل صحبة المغدورة!! بس **** نجاها!! بس م معروف اذا كانت كل مره حتنجو!! وغير كده هو منو وعايز شنو نحنا م عارفين!! عليك **** ساعدنا!!؟ الحاج قال ليه م بوعدك بس خلي تلفونك معاي!! ويمكن القى ليك محقق ثقة يشتغلها ليكم!! ناجي احبط بس شكر الحاج! وقال ليه بتمنى تفكر في الموضوع!! وقفل منه…!
____________________________________ اهل ولاء فقدو الامل في انهم يعرفو الجاني!! وده الشئ المُؤلمهم اكتر!! وده كلو حصل لم روان اتعرضتت لهجوم من مجهول!! والمخذي انه الفاعل م اتعرف!! وظهر ف كاميرات المراقبة الفي بداية الشارع بس م قدرو يعرفوه قاصد ولا لا!!؟ في نفس اليوم
وفي الفترة المسائية تحديداً روان طلعت من غرفتها واصابت اهلها بهلع!! قلبو المستشفي كلها مافي ليها أثر!! واكيد الشرطة بقت تمشط في الشوارع المحيطة بالمستشفي وف بعضهم كان براجع ف كاميرات المراقبة!! لحدي م في سستر ناجي موصية علي روان اذا احتاجت حاجة!! بالإضافة لانه يخلي بالو عليها!! المهم اتصل عليه ووراهو الخبر الشين!! ناجي من الخلعة اتصل الحاج في ليلو داك قريب الساعة١٢ مساء!! وقال ليه بلعثمة روان!! روان اتخطفت!!؟ الحاج قال ليه من اي مستشفى!! ناجي وصفه ليه!! الحاج قال ليه مسافة السكة اكون معاك وقفل!!؟
ناجي دور عربيتو وطلع يفتش معاهم!! كلهم اتجمعو ف المستشفى!! لانه الكاميرات لقطتها وهي طالعه ملهوفة!! وخايفة ولمن بتثبت ف طرف الحيطة حتى بتمشي!! بس م كان ف زول وراها!! وكاميرا الباب م لقتطها وهي طالعه!!؟ يعني روان لسسسسسسه ف المستشفي بس وين؟! والحاصل عليها شنو م معروف!!؟ الحاج وصل!! كان لابس طقم رياضي ولابس كاب وكرشتو بتنطط في المشي!! لم دخل ماف زول من اهل روان ولا حتى ناجي!! اتعرف عليه!! كان ظاهر عليه الحزن!! دقت مبعثرة وشعر كثيف بأطراف الكاب!! وحتى ملامح وجهه بقى كأنو ف الثمانين من العمر!!
سلم وقال من فيكم ناجي!!؟ ولا انا داخل غلط!!؟ وقبل م ناجي يرد! كان مستغرب من الزول الصوتو مألوف بس م قدر يتعرف عليه!! لحدي م جا داخل ضابط عليهم وقال ليهم لقيناها!! وكلهم قامو مخلوعين!! ويسألو عن مكانها!! قال ليهم اهدو هي بخير!! وجا طالع!! ولمح الحاج!! انجمد في مكانو! وقال السيد علي الحاج ولا شبه!! الحاج ابتسم!! وناجي اتخلع وقال بعفوية انت الحاج!!! الحاج ضحك بقهقه وقال ليه كنت قايلني شاب ثلاثيني ولا شنو؟! الضابط جا ملهوف بسلم عليه!! وطلعو مع بعض علي مكان روان!! الحاج قال ليه اتلقت وين؟!
الضابط قال ليه في غرفة الرنين المغناطيسي!! الحاج حقد حاجبيه وقال بتعمل في شنو؟! الضابط قال شكلها كانت خايفة من حاجة ولبدت هناك!!؟
مشو عليها!! في مكتب المدير الطبي!! ولقى اكتر من سبعة عساكر معاها!! وفي ملازم اول بتكلم مع المدير الطبي!! كلهم سمعو بالحاج بس قليل منهم الشافو قبل المره والضابط الجا داخل مع الحاج عرفهم بيه!! ورحبو بيه بحفاوه!!؟
الحاج عاين ليها لقاها قاعدة ف كنبة!! قرب عليها وم سلم!! بس قعد قصادها!! وقال ليها كنتي خايفه من شنو؟!
ف عسكري قال ليه كانت حاسه بزول براقبها!! الحاج قال ليه بإزدراء!! انا سألتك انت؟! ولا كنت معاها!! العسكري بقى يعاين للقائد حقو!! الاخير ابتسم يعني مشيها مشيها!!
وعاين لروان!! وقال؟ اها جاوبي ي بنتي!!
قالت ليه بنبره خوف!! كان ف زول براقبني ف الغرفة!! قال ليها معاك في الغرفة!! قالت لا؟ قال ليها طيب في قزاز ف الغرفة بخليك تشوفي الشخص البرا!! قالت لا!! قال ليها طيب كيف عرفتي انو ف زول براغبك؟! قالت ليه جاني ممرض اداني الدواء!! تاني جاني واحد قال عايز يديني الدواء!! وكان شكلو غريب م من الممرضين البدخلو علي في اليوم كذا مره ديل!! فخفت منو!! وقلت ليه نادي لي امي اول ماشة الحمام!! وبعداك ح احد الدواء عشان هو بنوم!! والدرب حركتو بطيئة!! م بقدر انتظرو لمن يخلص!!! كان متردد ومتوتر!! فزاد خوفي منو!! ولم بديت انفعل!! قال لي خلاص تمام حناديها ليك!! ومن طلع من الغرفه انا طلعت وراه ولمن تعبت من المشي وخفت يشوفني ادسيت هنا!! الحاج قال ليها ايوااا!! وسالها عن شكل الممرض!! وصفتو ليه!! لم راجعو كاميرات المراغبة!! فعلا لقوه ده ممرض معاهم!!؟
لم استجوبوه!! اتضح انه فعلا فعلا في كرت متابعة المريض الدكتور كاتب مسكن لروان والممرض كان بقوم بواجبه م اكتر!! بس روان المخليها تخاف وتتهيأ حاجات م حاصلة شنو؟! الحاج طلع بره ولع ليه سيجارة!! وجا عليه ناجي!! اعتذر لانه ازعجو ف وقت زي ده!! وكمان شكرو لحضورو!! وانه قبل يمسك القضية!! الحاج عقد حابيه وقال وقال بإستنكار منو القال ليك مسكت التحقيق فيها!!! ناجي عاين ليه بتعجب!! فالحاج ضحك!! قال ليه بكرة حامشي القسم اشوف الحاصل شنو!! وبيناتنا اتصال؟!
ناجي ضحك من تناقض الحاج!! وقال ليه اوصلك؟! الحاج قال ليه لالا معاي عربيه!! وطلع خلى ناجي واقف بغالط ف نفسه!! ويسأل اسسسسسه الشايب ده بحل القضية!!؟
وفعلا من صباح الرحمن…الحاج مشى القسم!! اتطلع علي الملف وشاف صور المعروضات!! وصور الجثة وركز في كل صور مسرح الجريمة!! وسأل اذا المكان مغلق!! العساكر اكدو ليه انه السطوح قافل للان!!؟ قال ليهم ارح!! ومشو معاه بدون م بجادلو!! لانها اوامر الضابط الاعلى!!
وصلو العمارة ودخل شاف الداخلية! وغرفة المغدورة حتى بعداك!! طلع علي السطوح!! كان كلو حواجز تابعة للشرطة وبقى يتلفت يمين وشمال!! لحدي م شاف بقايا سندوتشات جافة!! شال باقي السندوتش!! وطلع منو اللفافه الورقية ولقاها تابعة لمطعم معروف ف المنطقة!! وطلب من عسكري يعرض ليه الصور!! لحدي م وقفو ف المعروضات الاتلقت مع رأس الجثة!! وقال ليهم الكيس الداخلي الملون ده!!! مش من نفس المطعم!!! كلهم اتخلعو!! وركزو كويس!! لقوه كلامو صاح!!! الحاج ضحك وقال ده شنو القاتل الراقي ده!!! بأكل من افضل المطاعم وبيقتل!!!؟
نواصل بعدين
يتبع ……….
الجزء الخامس من رواية القاتل المختل
الضابط المسئول عن القضية!! استغرب؟ كيف م انتبهو لبقايا الطعام الكانت في حافه البلكونة!! ومع انهم ركزو مع الكيس اكتر وعرفوه من المطعم الفلاني!! بس م عارفين اذا الجاني كان شايلو ولا لقاه ف موقع الجريمة!! وقال للحاج الصراحة كما عهدناك بتنتبه لأتفه التفاصيل!! وصدقني حنستفيد من وجودك معانا كتير بس! للأسف الشديد م حاسمح ليك تواصل معانا في القضية من دون موافقة خطية من السيد مدير عام جهاز الامن الوطني؟! الحاج ابتسم!! وقال!! انا م بشيل اذن من زول! واتصل لرئيسك وقول ليه كلامي ده!!! واضف ليه رفعة الحاجب دي!! ومشى خلا الرائد بيضحك!! رجع القسم واتصل للقائد حقه؟! الأخير ضحك بقهقه وقال ليه ماف زول يتعرض ليه ولا يسالو!! الحاج مرشح ثلاثة مرات لنيل منصب المدير العام لجهاز الأمن والمخابرات الوطني بس بيرفض بدون م يبرر رفضو لزول!! والفي راسو بيعملو!! اتعاونو معاه بس ما تفقدو الشرطة هيبتها قدامو لأنه مستفز أحياناً!! وبقى يضحك وقال ليه عايز رقمو!! الضابط قال ليه م معاي بس بحاول اجيبو من العساكر!! وف أثناء ماهم يتكلمو جا داخل عليهم عسكري وقال للرائد سعادتك!! جنابو الحاج قال عايز يوميات التحري!! الرائد قال للقائد بالتلفون خلاص بدينا مع وجع الرأس!! اتبادلو الضحكات وقفل منه!! قال للعسكري م تدوه اليوميات!! جيبها لي هنا وخليه يجيني؟ شوية كده وجاه الحاج بتمايل من شده السمن!! قعت بقوه على الكنبة ومدد رجولو! وربع يديه وعاين للرائد بإستهتار!! وقال اذا جبت التحريات معاك معناه حتمنعني من اني اطلع عليها!! ولا تكون مفتكر انك أفضل مني!! الرائد استفزاه اسلوب الحاج!! وقال ليه اقعد عديل نحنا م في مصيف!! مكانتك علي راسنا بس ده م يعني انك تتجاوز حدودك!! والقانون فوق الجميع حتى ولو كان اسمك الثعلب!! الحاج ابتسم وقال ليه شكلك جديد!! مبروك عليك الكرسي!! وجا طالع!! في اقل من ربع ساعة جات مكالمة للرائد اللهو رئيس القسم!! بأنه يسلم ملف القضية للحاج ويفصلو ليه مكتب…! الرائد احمد م كان مستبعد حاجة زي دي بس م اتخيل بالسرعة والسهولة دي!! م فضل إلا يقولو ليه اشتغل تحت إمره الحاج!!؟
المهم شال الملف وطلع لقى الحاج رجع البيت!! كلف عساكر ينضفو مكتب المستندات السابق للحاج!! وشال تلفونو منهم واتصل بس الحاج كالعاده برد بالمزاج!!
اليوم التاني جاهو ناجي في البيت وحكى ليه كل القصة!! الحاج قال ليه عايز اطلع علي التحريات عشان اقدر احدد مسار القضية!! وم تدخل لي في شغلي ولا تتصل علي الا انا اطلب حضورك!! وكان جادي شديد!! ناجي ابتسم وقال ليه حاضر سعادتك!! وطلعو مع بعض!! الحاج علي القسم وناجي علي اشغالو!! لم وصل لقى مكتبو جاهز!! قال بسم **** ودخل!! اول ملاحظة قال ليهم غيرو لي الكرسي ده بجيب لي بواسير!! وعايز مكيف!! العسكري حبه يتظارف!! قال ليه ده قسم شرطة م فندق!! الحاج قال ليه تعال انت زولي!! وطلب من العسكري التاني يجيب ليه الملف!! العسكري قال ليه انا ورديتي انتهت حيستلم بدلي فلان!! الحاج قال ليه معقولة وتخليني براي ف الفندق ده!! وجا داخل التاني جايب الملف!! الحاج لبس نظارتو العملاقة ديك وقال للعسكري اقرا لي من بداية اليومية!! احرو مع منو وعددهم كم؟! العسكري قال ليه انا اقرا ليك!!؟ الحاج عاين ليه بفوق النظارة وقال ليه عندك اعتراض!! العسكري اتغاظ!! بس قال بينو وبين نفسه هو الرائد م قدر علي الحاج!! انا ممكن يفصلني عادي!! واتنفس بصوت عالي! وجرا الكرسي التاني ومسك اليومية!! الحاج مسك قلمو وقدامو ورقة! وقال ابدا!! العسكري قال اول زول اتحرينا معاه الخفير بتاع البناية!! الحاج قال ليه هو اللقى الجثة!! العسكري قال ايوااا! الحاج قال ليه اها قال سنو؟! العسكري قال ليه الاتي: ف يوم اكتشاف الجريمة كانت الموية قاطعة من البناية وطلعت السطوح افتح بلف الصهريج ولقيت الضحية مرمية وبالوصف الموضح بالكروكي والصور!! الحاج قال ليه يوم الحادثة كان وين؟ العسكري قلب الصفحات وقال ليه!! قال كنت مع زوجتي ف مناسبة!! الحاج قال ليه وخلا البناية بدون حراسة!؟ العسكري قال للحاج وحتى الرائد سألو نفس السؤال!! الحاج قال كمل اها رده بشنو؟! قال… مرات بستأذن من سيد العمارة وبخلي الحارس بتاع الداخلية يستلم شغلي علي بال م ارجع!!؟ الحاج قال وتاني!! بخصوص الضحية قال شنو!! العسكري زهج من الحاج!! هو عايز يقرا اقوال الخفير دفعة واحدة وبعداك الحاج يحلل بطريقتو!! بس الحاج كل شوية بسالو من شي مختلف الشي البصعب علي العسكري البحث في الاقوال!! المهم بعد خلص تلاوه اقوال الحارث!! الحاح بقى يتثائب!! وقال ليه انا مليت!! دي شنو السخافات البتتكتب دي!! ده منو الكان بتونس معاه ده!! المتحري ده منو!! العسكري قال ليه المساعد شرطة فلان!! الحاج صلح طاقيتو وختى الورقة والقلم ف جيبو وقال ليه هم كم!! العسكري قال منو ي سعادتك!! الحاج قال ركز ي ابني!! اتحريتو مع كم؟! العسكري قال ٢٠ شخص تقريباً صحباتها ٣+ زميلاتها ف السكن١٠+ الخفير والحارس بتاع الداخلية+صاحب الداخلية+اهلها+وبتاع البقاله الجنب العمارة!! الحاج قال ليه طيب اقرا اليومية كلها!! العسكري اتخلع ده كراس عديل!! وبدا يقرأ والحاج بسمع! م كتب ولا ملاحظة واحدة!! العسكري لمن ريقو نشف!! بعد خلص رزع اليومية ف التربيزة!! الحاج ابتسم وقال ليه اها لقيت فندقي كيف!! وبقي يضحك بإستهتار!! العسكري استأذن الحاج وطلع!! الحاج بقى يعاين لليومية!! وبقلب صفحاتها بأني بس م بيقرا فيها!! في نقاط استوقفتو!! وفي إجابات م منطقية!! واتصل علي الرائد!! قال ليه حتعبك معاي بس استحملوني لحدي م القضية تخلص!! الرائد جامل الحاج بالكلمات وسألو اذا عايز حاجة!! الحاج قال عايز الخفير ضروري!! الرائد قال ليه رقمو مسجل ف اليومية!! الحاج قال ليه عارف!! بس عايزكم تجيبوه فجأة بدون م تتصلو عليه!! داهموه وياريت لو أولادك العساكر يرهبوه لي شويه!! في حين انه شكلهم براه بخوف!! وبقي يضحك!! جنابو احمد م ضحك معاه!!! وقال ليه خير ان شاء ****…!
وادى تعليمات لقوه تتحرك علي الخفير!! وفعلا ف اقل من نص ساعة جابوه مخلوع وبتكبكب!! ف شنو وانا عملت شنو؟! دخلوه علي الرائد اول!! قال حيحقق معاك السيد علي الحاج مندوب رئاس جهاز الأمن!! ف حين انه الحاج م ليه اي علاقه بالوظيفة دي بس شينة في حق القسم يقول ليه جاي محقق خاص يحقق معاك تاني!! وغير كده لازم يرهبو عشان يخاف!!؟.
العسكري دخلو للحاج وكان نايم ف الكرسي!! ده نفس العسكري القال ليه الحاج اقرا اليومية!! وعشان ينتقم من الحاج خبط البوت بقوه ف الارض لمن الحاج نطه وقام مخلوع!! وقال ليه وبتحية سعادتك ده الخفير!! الحاج ضحك!! وقال ليه م تلعب معاي انا الثعلب!!!وركز نظرو علي الخفير!! الاخير بقى يعاين للحاج وبقول ف سرو!! ده مسئول ولا مجنون!! اسسسسه الخفير فينا منو؟ وابتسم!! الحاج كانه قرا افكارو!! قال ليه ماشاءالله جاي مبسوط!! اتفضل اتفضل نحنا زاتنا بنبسطك!!؟ الراجل ملامحو اتغيرت!!! وقال ف حاجة سعادتك!! الحاج قرا اسمو ف اليومية!! وقال ليه حسين!! الطالبة الصغييييرة دي فقدت عمرها! ونحنا من واجبنا نحقق ليها العدالة!! فما تصايق مننا كان عصرنا عليك بالأسئلة!! قال ليه ولا يهمك سعادتك نحنا بتسعدنا مساعدتكم!! والمغدورة ف مقام بنتي كانت بت طيبة خلاص!! واتاثر!! الحاج قال ليه كدي احكي لي انت شغال ليك كم سنه!! قال ١٠ او١٥ الفتره طالت!! الحاج قال ليه والداخلية ليها كم سنة!! قال خمسة سنه!! الحاج قال ليه وفي خلال الخمسه سنة دي حصلت اي تجاوزات!! حسين قال زي شنو مثلا!! الحاج قال مثلا بنت طلعت ف زمن متأخر ولا زول دخل البناية ف وقت ممنوعة فيه الزيارة!! حسين قال تقصد شنو؟! الحاج قال ولا شي!! اها يوم الجريمة من الصباح انت كنت وين؟ قال ليه مشيت المغلق اجيب ادوات سباكة ف شقق محتاجة لشغل!! الحاج قال ليه شكلك م فهمتني!! م اقصد اليوم الانت اكتشفت فيه الجريمة!!اليوم الحصلت فيه الجريمة!! انت كنت وين؟! الخفير قال موجود!! م طلعت مكان!؟ الحاج قال واخر مره شفت فيه المغدورة متين!! قال يوم الحادثة المغرب!! الحاج قال ليه اوصف لي حالتها كانت كيف؟! والحديث الدار بينكم شنو؟! حسين قال كانت متوتره وزي الماتمام!! الحاج قاطعو وقال كيف م تمام؟! حسين قال كانت شاردة!! وبعد شاغلتها حتى ردت علي!! الحاج قال ليه وم قالت ليك جات من وين؟ الخفير قال م سالتها و**** وطلعت علي الداخلية!! الحاج قال ليه مشيت المناسبة الساعة كم؟! قال ف حدود٨ مساء!! الحاج قال يعني طلعت زول حفلات!! حسين ابتسم!! الحاج قال ليه م مشيت مع اولادك!! الخفير قال ليه كنت م جاهز! وهم اساعجلوني قالو الحفله بتفوتهم!! الحاح قال ليه طيب مشيت متين ومع منو؟ قال ليه جهزت وطلعت أجرت ركشة!! الحاج قال ليه يعني م ركبت ف عربية صالون بيضاء!!؟
الخفير لمن قام علي حيلو من الخلعة!
نواصل بعدين
يتبع ……….
الجزء السادس من رواية القاتل المختل
الخفير بقي يتمتم!! وقال للحاج شنو!؟ القال ليك منو؟ الحاج بقى يمسح في كرشتو وقال ليه اقعد اقعد!! واحكي لي بالتفصيل ولو كنت صادق اوعدك اتساهل معاك!!
_والله ياسعادتك انا م كضبت!! انا المرحومة م شفتها من المغرب وهي داخلة!! الحاج قال بس انا ما سالتك شفتها متين!! انا بتكلم عن الشخص الركبت معاه!! حسين سكت!! الحاج قال ليه راحتك!! وامر العسكري الحاضر معاهم ييختو في الحراسة لحين اكتمال التحريات!!! مع انه الحاج م عندو اي صلاحيات!! والعسكري زاتو متردد ينفذ ولا يرفض؟! ومن قام علي حيلو عشان يمشي يستفسر من الرائد! هنا الخفير حسين قام فوق وبقى يتكبكب مفتكر انه العسكري موديه الحراسة فعلا؟! وقال و**** انا ما عملت حاجة؟! بكون ده كمال!! الحاج لبس نظارتو!! وقال ليه اقعد برواق وكلمني عن كمال ده منو؟! العسكري اتخلع اكتر من حسين!! وقعد ملهوف مسك ورقو وقلمو ومتحمس للكتابة!! قال للحاج و**** انا ماعارف القتلها منو ولا السبب شنو؟؟ الحاج قاطعه وقال احكي عن كمال!! وخلي الباقي علينا؟! حسين قال ممكن اولع سيجارة! الحاج قال ليه ولع لي معاك واحدة!! ولعوها وبدا!! قال يوم الحادثة وبعد ما المرحومة دخلت بساعة كده تقريبا كنت ماشي المناسبة مع اولادي!! بس جا واحد!! الحاج قال كمال!؟ حسين قال للحاح٦بتعرفو يعني!! الحاج قال ليه كمل!!
حسين قال جا وقال عايز يقابل ولاء!! بس انا رفضت وقلت الزمن م زمن زيارة؟! وهي ممنوع تطلع من الداخلية بعد الساعة٨ ولا حتتحاسب من قبل اداره الداخلية!! الحاج قاطعو وقال بس بتحصل بعض التجاوزات عن طريقك!! حسين سكت!! الحاج كان بعاين بيه بفوق النطارة؟! العسكري الشمار حارقو! قال ليه كمل!! الحاج ابتسم… حسين قال اول رفضت بس قال م بتاخر زعلانه منو وعايز يراضيها لانها ممتحنة بكرة وممكن ما تقدر تقرا!! وكمان قال ربع ساعة م حيكملها معاها!! وأنه يوصلني معاه على بيت المناسبة!! وانا وافقت!! الحاج ابتسم وقال ليه بدون قروش يعني!؟ حسين نطط عيونو وقال اداني حاجة بسيطة حق المواصلات بس!! اها بعداك حصل شنو؟! قال قدمت اولادي وانا انتطرت كمال لحدي ما ينزل!! الحاج قال ليه طلع ليها وين؟! حسين سكت!! العسكري نهرو!! قال م متأكد بس تقريبا السطوح!! لانو مستحيل الحارس يخليه يخش جووه للبنات!! الحاج قال اها طلع الساعة كم؟ ونزل كم؟ واخد زي كم من الوقت!! حسين قال م شفت الساعة بس لم طلع اذان العشاء كان بأذن!! ولم نزل انا كنت بصلي وضرب لي بوري نبهني انه طلع!! سلمت سريع سريع وطلعت معاه!! كان طبيعي وما طاهر عليه متضايق ولا زهجان ولمن شغل اغاني!! والاكد لي انه برئ اتصل اتكلم معاها وقال ليها نسيت فريمي معاك!! وكان بيضحك معاها!! الحاج قال ليه عرفت كيف كان بتكلم مع ولاء؟! سمعت صوتها!! حسين قال لا!! بس من خلال الكلام فهمت انه بتكلم معاها!! وصلني محل المناسبة ومشى!! الحاج قال ليه ده كل الحصل متأكد!! حسين بقى يحلف انه م كذب في شي وده الحصل!! الحاج كتبو تعهد بعدم مغادرة المدينة او الانتقال بدون اذن من الشرطة!! وقال ليه اذا اتصلنا عليك ولو الساعة عشرمية! وم رديت حتتسجن وحتكون المشتبه به الاول!!؟ حسين اكد للحاج انه م ح يغيب ولا يوم عن شغلو واستاذن وطلع!!
العسكري مندهش!! قال للحاج من وين عرفت كمال والعربية البيضاء!! الحاج ابتسم وقال ليه ده لعب كبار خليك مركز بس!! وشال طاقيتو وتلفونو واتمغى وقال م اجي القى الكرسي ده!! وطلع… العسكري بسرعة!! مشى كلم الرائد احمد؟! والاخير استنكر كلام العسكري!! بس وراهو اليومية!! وقال عرف الكلام ده كيف ومن وين!؟
_________________________________________
الحاج بعد وصل بيتو اتصل علي ناجي قال ليه عايزك توديني بيت روان! صاحبة المرحومة المغربة!! ناجي استغرب رقال ليه في شي!! الحاج قال م تدخل في شغلي بس وديني!! ناجي اصلا متغايظ من الحاج بس الأولوية عنده ملف القضية!! اتفق مع الحاج انه يجيهو المساء وفعلا في حوالي الساعة سبعة كان واقف جنب شقة الحاج!! اتصل عليه وبعد قريب النص ساعة حتى طلع ليه!! وطول الطريق ناجي بيتكلم والحاج ساكت!! لحدي م وصلو!! وقال للحاج الزيارات المفاجأة دي اصلا م بحبها!! اسسسه لو كان خليتنا نتصل عليهم اول عشان يكونو عارفين!! الحاج عاين ليه بغضب وقال ليه انت جاي تعقد ولا شنو؟! ناجي سكت!! نزلو ودق الباب! جا اخوها الكبير فتح ليهم!! وكان بيعرف ناجي! سلم عليهم وفضلهم علي الصالون!! لحدي م جا ابوها وضيفوهم!! وناجي كلمهم انه ده جنابو! علي الحاج وماسك التحقيق ف قضية المغدورة وعايز ياخد كم معلومة من روان اذا ما عندهم مانع!! الاب كان متضايق!! بس خجل يحرج ناجي ومراعاة لشعورهم ولفقدهم العظيم لبنتهم!! ورسل اخوها يناديها!! شوية كده وجات داخلة!! سلمت عليهم من بعيد وم صافحت!! ابوها قال ليها اقعدي جنابو عايز يسألك!! وكلهم فاتحين خشومهم منتظرين الحاج!! ابتسم وقال ليهم خلونا برااااانا مع بنتي دي! الاب وولدو بقو يعاينو لبعض!! ناجي اعتذر منهم وقال معليش طلب محرج بس جنابو عندو فهم معين في راسو!! وافقو وطلعو كلهم!! وفضل معاها! سألها عن صحتها وشاغلها بالكلمات!! وقال ليها لو كنت اصغر من عمري ده ب خمسة سنة بس!! كان عرستك!!؟ ابتسمت وقالت ليه شكلك نسين صغر!!! بقى يضحك لمن كحة!! وقال ليها طيب ي ست البنات بما انك طلعتيني عجوز مكعكع الليلة ما بخليك!! ابتسمت!! قال ليها كمال ده منو؟! اتجمدت الابتسامة في وشها!! الحاج كان بعاين ليه وهي ما عارفة تقول شنو؟! قال ليها سؤالي واضح مووش!! قالت ليه مالو عمل شنو؟!
قال ليها خلينا من العملو!! هو منو؟ اتهدت بصعوبة وقالت ليه حبيب ولاء **** يرحمها!! قال ليها احكي لي قصتهم!!؟
ورتو انو كان بيقرا ف نفس الجامعة بس اتخرج من لمن كانو برالمة!! وكان صاحبهم ولمن بقى حبيب ولاء!! وقالت انه علاقتهم حلوه وم بتخلو من الخلافات والمناقرات بس ف خلال اليوم بيرجعو لبعض!! قال ليها ف الفتره الاخيرة كانت بيناتهم اي مشاكل!!! قالت ليه ابداً؟! صاح بتشاكلو بس حاجة بسيطة م بخلوها تتطور!! قال ليها اديني رقمو ملتو ليه!! وسألها عن سكنو!! وصفت ليه البيت!! قال ليها في العادة بعزمها وين؟ قالت بالنسبة لشنو لم يتفسحو ولا لم يعزمها علي أكل!! قال الاتنين!! قالت بمشو المتطعم الفلاني!! ودائما بتمشو في شارع النيل !! الحاج ابتسم!! وقال ليها اها ف زول قرب ناحيتك!! ولا حصلت اي تهيُؤات تاني!! قالت ليه مره بعد مره!! بس اسسسه كويسه الحمد *** وم بطلع من البيت!! طلع من بيتهم!! وناجي حاول يعرف انهم اتناقشو في شنو؟! الحاج قال ليه ماف شي مهم!! وصلو البيت!! واتصل علي الرائد احمد!! قال ليه جهز امر قبض في مواجهة كمال محمد احمد ووصف ليه سكنو! واكد ليه انه هو بيعني اي كلمة قالها!! وقفل منو!! وخلا جنابو احمد محتار!؟
واتصل علي الضابط المناوب يقوم بالاجراءات ويشكل تيم مداهمة لكمال!! وفي حوالي الساعه ٢صباحا اتصل ناجي علي الحاج!! وقال ليه انت عملت شنو؟! روان تم اغتيالها!!؟
نواصل بعدين
يتبع ……….
الجزء السابع من رواية القاتل المختل
الحاج قام مخلوع وبقى يكابس في اللمبه!! وبقول لناجي شنو؟! روان مالها!!؟
قال ليه اغتالوها!! الحاج قفل منو وطلع كالعادة بالبجامة!! ومع انه نظرو ضعيف باليل بس قدر يصل المستشفى!! وكانت مليانه لدرجة المدافرة!! والشرطة بتطلع في الناس!! الحاج بصعوبة حتى قدر يدخل!! قال ليهم في المشرحة ولا وين؟! قالو ليه م ماتت!! البت في غرفة العمليات!! الحاج لمن رجلينو رجفو وبقى يفتش لناجي بين الناس بس **** شاف ليه وم لقاه!! لانه كان عاااادي يخلط فيه لجدو الاخير!! وسأل الضابط عن الحصل!!؟ قال انه المجني عليها كانت نايمة في غرفتها مع اختها!! وزي الساعة واحدة ونص صباحاً دخل مجهول البيت ووقدر يفتح الباب وعتدى علي روان من دون اختها الكان سريرها اقرب للباب!!؟ فده بدل علي انها مقصودة!! الحاج قال اعتدى عليها بشنو؟!
الضابط جاوبو بأنه سدد ليها تلاتة طعنات قاتلة!! بس الدكاترة بيعملو العليهم!!؟ والباقي على رب العالمين…الحاج قال مافي زول شافو نهائي!! قال اختها سمعتها صرخت!! وقنتت!! اختها قامت مخلوعة!! واختها بتتأوه!! وهي من الخلعة مفتاح اللمبة راح ليها وبتسأل روان مالك ف شنو؟! وحست بزول دفرها لمن وقعت في الارض وطلع جاري!! فبقت تكورك!! ناس البيت جو جارين!! لم ولعو اللمبه لقو روان غرقانة في دمها واختها لم شافت بشاعة المنظر دخلت في حالة صدمة وللان كل م تتزكر الحادثة بتغمر!! الحاج قال ماف زول من ناس البيت شاف الفاعل!! قال لا للاسف!! وسأله اذا في تيم مشاء على منزل الضحية!! والضابط اكد ليه انه فريق من الادلة الجنائية ومكافحة الجريمة مطوقين البيت وحصرو في الادلة الموجودة!! الحاج قال عظيم!! ومشى يواسي والدها!! بس الاخير من شافو زاغ منو!! واتجنب ملاقاة الحاج!! ابتسم ومشى رقد في غرفة مخصصة للممرضين!! وبعد خمسة ساعات حتى الطاقم الطبي طلع من العملية!! الحمد*** نجحت بس لسسسه وضع روان حرج!! وممكن تفارغ الحياة تحت اي لحظة!!؟ الرائد كثف الحراسة علي العناية المكثفة!! وحتى الدكتور م بيدخل عليها الا بعد يتأكدو من هويته!؟ وفي صباح اليوم التالي كمال اتقبض من المستشفى كان جاي يطمئن على روان!! بس داهموه هناك!! وبسأل فيهم في شنو؟ انا عملت شنو!! بس ماف زول بقول ليه انت بتقول في شنو؟! لحدي ما وصلو النيابة!! جنابو احمد قال للحاج! لازم توريني سبب القبض وتحكي لي التفاصيل لانه رئيس النيابة الاعلى حيشرف شخصيا علي التحقيق!! لازم اعرف انت امرت بالقبض علي كمال علي اااي اساس!! الحاج قال ليه بسيطة!! خليك مرتاح هنا! وانا ح امشي اشرح ليه ملابسات القضية!! احمد اتغاظ من عدم تعاون الحاج!! وجا طالع!! الحاج وقفو جنب الباب!! وقال ليه ارجع تعال!! جنابو احمد قعد والحاج قال ليه راجع يومية التحري دي؟!! مصعب بتاع الدكان قال شاف عربية صالون بيضاء واقفة جنب العمارة في حوالي الساعة ٨!! وذكر انه اولاد الخفير طلعو قاشرين بس حسين م كان معاهم!!؟ ومن خلال اقوال صاحب العمارة!! انه الطابقين العلويات فاضيات!! والطابق الاول الداخلية والارضي فيه صيانة واصحابو مسافرين!!؟ طيب العربية حتكون جات لمنو!! والاكد لي اكتر انه جاي لحسين لم مصعب قال م شاف حسين طلع تاني!! معناه مشى مع صاحب العربية!! بس سيد العربية عرفت هو منو!! بعد م خلعت حسين باستنتاجاتي!! جنابو احمد اندهش!! وقال ليه يعني انت م كنت بتعرف كمال!! الحاج لبس نظارتو وقال ليه قوم امشي لشغلك!! وخليني اشوف شغلي!! احمد قال يعني يمكن يكون قتلها كمال؟؟ بس معقولة ف ربع ساعة ينفذ جريمتو ويطلع نضيف والرأس م كان شايلو معاه!! الحاج قال ليه يمكن يكون وصل حسين بيت المناسبة ورجع تاني!! جنابو قال ولا يمكن يكون القاتل حسين وبعد م اثبت مكان تواجدة ف المناسبة رجع تاني قتلها!! الحاج ابتسم وقال ليه كلللو وارد!! الرائد احمد ابتسم وقال انا مستمتع بالقضية دي ياااخ!! الحاج ضحك وقال ليه انا وريتك قبل المره وتاني بكررها ليك!! انت مستجد وفرحان بالترقية!! لكن الشغلة دي بتطير ليك قريب!! اتبادلو الضحكات وكل واحد مشى بطريق!!
_________________________________________
الحاج شال نسخة من يومية التحري ومشى بيها النيابة!! لم وصل لقى جنابو احمد قدامو!! ابتسم ليه بس الحاج طنشو ورجع لغرورو تاني!! سلم علي وكيل النيابة الاعلى!! والاخير استقبلو بحفاوة!! وسأل الحاج عن براثين القضية!! الحاج عاين لاحمد وشايفو متحمس وماسك تحرياتو التعب فيها!! فما حبه يحبطو!! قال ليه ياسعادتك قدامك الرائد احمد شخصياً! ومالك ومال تخاريف زول عجوز!! وبقو يضحكو!! الحاج قال الملف ده مسئول عنه جنابو احمد وفريق عملة!! انا بساعدهم فكريا بس!! وطلع خلاهم قال عايز يطلع علي التحريات حقه كمال!!؟
واحمد بدا يشرح لوكيل النيابة في اخر التطورات!! الحاج دخل مكتب التحقيقات! ولقى المتحري كان مساعد وكيل نيابة بس قالو طلع الفطور!! الحاج طلب الملف بس العسكري رفض!! وفي اثناء م بجادل في الحاج وبحقق معاه انت منو؟ وبياتو حق اديك الملف!! واصلا الدخلك المكتب شنو ومولانا ماف!!؟ وفجأة جا داخل جنابو حسام قريب روان!! كان الغضب بييتطاير من عيونو!! وقال يا عسكري ده السيد علي الحاح مدير الامن السابق!! العسكري اعتذر وبقي يتملق الحاج!! وبراحة انسحب!! الحاج قال ليه وانت منو كمان ي سعادتك!! كان اسمو مكتوب بين علاماتو العسكرية بس الحاج عايزو هو يعرف عن نفسو!! حسام وهو صاري قعد في الكرسي المقاصد الحاج وقال بفخر انا النقيب حسام الدين مصفطي!! الحاج ابتسم وقال انتو مالكم بقيتو تتفاخرو برتبكم الهايفة دي!! في زمنا نحنا لواء بمقصاتو في اكتافو م بتفرزو من حضرة الصول لا بالعربية!! جيل متفشخر خلاص!! وكمان منو القال ليك انا مدير شنو كده م ه عارف السابق؟! حسام شوية فكى جبينو وابتسم!! قال ليه لو م كبرنا ليك كومك م بعرفوك الجماعة ديل!!! الحاج ضحك بقهقهة وقال اخر زمن!! يااحليل ايامك ي الثعلب!!
جنابو حسام قال ليه خلينا في المهم!! انا عرفت من عمي انك جيتهم في البيت وانفردت بروان!! وفي نفس الليلة تعرضت لمحاولة اغتيال!! فياريت توريني اتكلمتو في شنو؟! ولا روان عارفة شنو بالضبط وكل شوية حياتها في خطر!!؟
الحاج قال اولا انا ما بحققو معاي!! ولا ح ابرر ليك افعالي!! وفي رائد مسئول عن القضية امشي ليه بفيدك!! ومن جابو سيرتو جا داخل متحمس وفرحان جنابو أحمد!! واتفاجأ بشوفة حسام!! كانو دفعة في المعسكر!! وماشين مع بعض حتى في الرتب!! بس احمد ترقيتو جات قبل حسام فبقى واعد نقيب والتاني رائد!! اتسالمو واحمد سألو عن سبب حضورو!! وحزن لم عرف انه روان قريبة حسام!! وواسواه بكلمات طيبات ووعدو بأنهم حيقبضو علي الجاني طالما انه كلهم متكاتفين!! وعاين للحاج وقال وبما انو جدنا ده موجود!! الحاج ابتسم وقام بصعوبة من الكنبة!! ما قدر يخبي حزنو وعيونو اتملو دموع!! وطلع مسرع!! اتزكر ولدو إبراهيم كان في عمر الضباط ديل!! وطلع ولع ليه سيجارة وكان بعاين لبكاسي الشرطة داخلة ومارقة وشاف متهم مكلبش!! اتزكر كمال!! جدع باقي السيجارة ودعسها برجلو ودخل علي القسم جنب النيابة!! وسألهم كمال فلان وين؟! العسكري الكان الحاج خلاه يقرا ليه يوميات التحري داك زاغ من شاف الحاج!! والمشكلة انه هو العسكري المناوب علي الحراسات!! ف اتصل لزميلو!! وقال ليه الراجل العجوز المخرف ده شوفو عايز شنو وخليه يتخارج!! م تخش معاه في جدال!! وقفل منو!! حتى بعداك رده للحاج وقال ليه اجيبو ليك!! الحاج عاين ليه بستهتار!! وقال لا احسن تدخلني معاه الحراسة!!؟
ومشى على مكتب مدير القسم!! كان شايل ملف استجواب كمال وكان بتطلع عليه لحدي م العسكري جا داخل وكمال وراه!! وطلع!! كان واقف والحاج بعاين ليه!! بعداك قعد!! الحاج قال ليه انا طلبت منك تقعد؟! فقام على حيلو!! الحاج سألو عن اسمو كامل وعمرو ووظيفتو وسكنو!! وبعد مسافة حتى قال ليه اقعد!! كمال قال انا ما عملت شيء!! انا مستحيل اءذي ولاء ولا حتى بالكلام!! وانا متألم من وفاتها اكتر من اهلها زاتو!! دي حبيبتي وزوجتي المستقبلية!! الحاج اتنهد بصوت مسموع!! وقال ليه انا ما ح اعيد التحقيق!! بس عندي نقاط معينة حأسألك منها!! وكل كلمة حتقولها خليك مركز وعارف انت بتقول في شنو؟! لانها ياقربتك من حبل المشنقة يا كانت سبب نجاتك!! كمال اتخلع!! وقال انا عايز محامي؟! الحاج قال ليه ده حقك!! كلف اكبر محامي ماف زول بمنعك!! بس طالما انت ف فتره تحريات وتحقيق وطالما انه ملف التحري م اتقفل!! ممكن تتحبس لحدي م نخلص!! وبالضمان م بتطلع!! كمال قال عايز تعرف شنو؟!
الحاج قال سبب جيتك للداخلية في وقت زي ده شنو؟ اتنهد وقال سألوني الليلة السؤال ده الف مره!! و**** و**** كانت زعلانه مني!! وجيت ارضيها لانها ممتحنة!! وما حبيت اشوش عليها!! الحاج قال وهي زعلانه منك لشنو توافق تشوفك في زمن زي ده!! قال نحنا بطبعتنا بنتشاكل عادي!!!وممكن في نص الشكلة اقول ليها بحبك او العكس!! ودموعو جات نازلة!! والحاج مركز معاه!! المهم اتصلت وقلت ليها انا تحت وجاي عليك!! قالت لي حرس الداخلية م بخليني اطلع!! انا قلت ليها حنكيهو!! وقولي ليه طلبت دليفري وماشة استلم!! فعلا خلاها تطلع وانا دخلت معاها!! بس سبقتها بالسلم الخلفي علي السطوح!! وهي ادت الحارس الساندوتش حقي وقالت ليه ماشة اكل واراجع فوق ف السطوح!! هنا البنات جايطات ما بقدر اركز!! فعلا وافق طالما انها طالعه فوق وم نازلة لخارج الداخلية!! وغير كده لانه الطوابق الفوق فاضية مرات البنات بطلعو براجعو فوق عادي ماف زول بمنعهم!! الحاج قاطعو وقال خلينا في المهم!!؟ بعداك حصل شنو؟!
قال طلعت لقيتها في اللكونة بتاكل!! هزرت معاها وقلت ليها ما بتاكلي براك انا زاتي جيعان!! بس ابت تديني و****… اعتذرت منها وطيبت خاطرها بكلمتين!! وحاولت اديها مصاريف بس رفضت وكانت تاني حتزعل مني بس تداركت الموقف! وغيرت الموضوع!! وجاها تلفون!! فأتغيرت ملامحها!! وقدر ما حاولت اعرف منو المتصل ابت توريني وقالت لي انت لسسسه بتشك فيني!! ولانَو سبب مشكلتنا الاولى تلفون!! م حبيت اعيد السيناريو!! الحاج قاطعو وقال سبب المشكلة كان شنو؟!
كمال قال كنا بنتونس والكلام جاب الكلام وجابت لي سيره مناسبة بت اهلهم!! وطلبت منها ترسل لي صور العرس !! وبعد تحانيس جاتني كم صوره!! وكانت من بيناتهم صوره راجل في عربية دفع رباعي!! سألتها ده منو قالت لي قريبنا!! وصورتو متعمل شنو ف تلفونك!! قالت نزلت في قروب الاسره وبتكون نزلت تلقائ في التلفون!! المهم الكلام م اقنعني وانفعلت الصراحة!!! وهي زعلت مني وقالت انا ما بثق فيها وبشك فيها كمان!! بعداك جيت صالختها!! -الحاج قال وينها الصورة!! كمال قال حزفتها و**** لانو كل ما اشوفها بزعل!! وقلت بدل م تكون سبب خلاف لقدام احسن احزفها!! وسألو برضو شكل الراجل كيف؟! قال اخدر عمرو ف الخمسينات تقريبا!! وعندو عَنب في وشو!! الحاج قال العربية لونها شنو؟ قال ابيض!! الحاج قال اها وبعداك حصل بيناتكم شنو؟! قال طلبت مني انزل عشان م اعمل ليها مشكلة في الداخلية!! واذا في زول شافني معاها حيسيء لسمعتها!! المهم انا ابيت بس دفرتني عشان انزل لمن فريمي وقع!! وابت تخليني افتشو!! قالت لي بجيبو ليك بكره بعد الامتحان!! ودعتها ونزلت!! ودي اخر مره اشوفها!! قال ليه تاني م اتكلمت معاها نهائي!! قال لا؟! الحاح قال ليه شكرآ ليك!! ونده علي العسكري جا ساقو!!! وقال اذا كان كلامه صحيح!! مين الاتصل علي ولاء وخلاها ترتعب!! وصاحب الصوره ده منو؟! ولو فعلا هو م اتواصل معاها تاني!! طيب مين البكذب هو ولا الخفير القال كمال كان بتكلم معاها في العربية؟؟! قفل النوتة حقتو واتصل علي جنابو احمد وسالو عن سجلات شركة الاتصال اذا جابوها!! والاخير قال ليه انها امام وكيل النيابة الأعلى!! الحاج قفل في وش جنابو احمد ومشى دور عربيتو وطلع علي النيابة العامة!!
نواصل بعدين
يتبع …………
الجزء الثامن من رواية القاتل المختل
الحاج وهو في متجه علي النيابة العامة اتصل عليه ناجي اول ابى يرد ععليه!! لانه مغيوظ منو بسبب الخلعة الدخلها في الحاج لم قال ليه روان اغتالوها!!؟ وصل النيابة وخلا تلفونو في العربية ودخل!! سأل عن رئيس النيابة العامة بالولاية!! قالو ليه مشغول!! طلب منهم يبلغوه انه علي الحاج منتظر بره!! واذا قال مشغول ممكن اجيه مره تانية…!
بس م اشتغلو بيه كتير!! وتلفونو ما معاه عشان يتصل على زول يساعدو!! وبعد صعوبة نزل من الطابق التاني!! ولم وصل البوابة لمن نفسو انقطع!! وسبه! المقر والقضية!! ومن مسك التلفون!! جات خاشة مكالمة!! وفتح الخط اتفش في المتصل!! طلع صاحبه العقيد! الادى رقم الحاج للمستشار صاحب ناجي!!؟ هزر معاه واتبادلو الشتائم!! وقال للحاج مالو نفسك خامي!! م تكون هنااااااي!!؟ انت موووش حادي علي ولدك؟! الحاج ضحك لمن كحة!! وقال ليه صاااح خسرت قرة عيني!! بس لازم اجيب اخوه!! وتاني رجعو لكلامهم الكيف كيف دااااك!! بعداك الحاج حكى ليه وهو وين وبعمل في شنو؟! العقيد ضحك!! وقال معقولة في زول في اجهزتنا العدلية ما بعرفك ولا سمع بيك!! كان كده نحنا كبرنا و****!! يحليل وقت عندنا شنه ورنه!! الحاج ضحك وقال ليه زمنا فات وغناينا مات!! بس قال للحاج خليك قبلك انا بتصرف!! الحاج قال ليه انا لسسسه الثعلب!! بعرف احل مشاكلي!! انت خليك بعيد! وقفل منه!! وهو داخل علي المبنى! لاقاه واحد وقال يا حاج انت لسسسه واقف هنا!! الحاج قال اخيرا لقيت زول بيعرفني!! وجا عليه!! الشاب ضحك!! وقال ليه ما بعرفك وبس احتراما ليك ولانك كبير في العمر قلت ليك ياحاج!! الحاج ابتسم!! وقال ليه امشي من وشي ياابني الليلة سبيت كتييير!! ما ناقص ذنوب!!؟ الشاب استغرب من وقاحة الحاج! وقال ليه بإنفعال!! عارف انا منو؟! ولا انت بتكلم منو؟ الحاج ضحك وقال بكلم جيل الفشخرة!! امشي كلم رئيسك وقول ليه في زول قالك ياكلب! الثعلب منتظرك بره!!! والشاب انفعل وبقى ينده لرجال الامن!! ولمحاسن الصدف!! جا ماري مستشار!! وانتبه للجوطة!!؟ ولمح الحاج!! جا عليه ملهوف!! سلم عليه واعتذر!! وقال ليه الما بعرفك بجعلك يا ريس اتفضل!! والشاب كان مستغرب!!؟
الحاج قال ليه ده منو؟! المستشار قال ليه تقصد الطايش ده!! الحاج ابتسم أومئ برأسه! قال ده شالوه في الجهاز قريب!! معايناتهم شهرين ماتمت!! الحاج بقي يضحك!! وقال ليه بس اسمح لي يازعيم أسألك؟! سبب الزيارة شنو؟! طولنا شديد ماشفناك!! الحاج قال ليه بخصوص قضية الطالبة ولاء!! المستشار اندهش!! وقال ب****!! ماسك التحقيق انت؟! الحاج ابتسم بس م رده!! المستشار قال **** يكون في عون المجرم!! وضحك!! ودخل الحاج لمكتب النائب العام!! ولقاهم مجموعة!! شكلهم طالعين من اجتماع!! سلمو عليهم!! منهم البعرفو معرفة شخصية ومنهم السمع بيه من زملائهم!!؟ وبعداك طلعو خلوه مع وكيل النيابة الأعلى!! وقال للحاج عرفت انك مسكت الحقيق!! اها ماشي كيف؟! الحاج قال ليه بنفس طريقه عملكم!! مولانا ابتسم وحكى راسو؟! وقال ده مدح ولا ذم!! عشان اقدر ارد!! الحاج ضحك وقال في جهاز اداري في البلد دي بستحق المدح!! ضحكو!! وقال ليه زي ما انت لسانك متبري منك بس فاقدنك و****!! وبعد الونسة الطويلة دي حتى الحاج اتزكر موضوع السجلات!! وقال عايز يشوفها!! فعلا مولانا قام علي حيلو ومشى علي دولابه!! وطلع ملف ابيض مختوم بالاحمر!! فتح الظرف!! والحاج استلمو بلهفة!! وشاف اخر عشرة مكالمات!! لقاها لروان وكمال وابوها وواحدة اسمها نازك!! الحاج استغرب لم ما لقى المكالمة القالها كمال!! الخلت ولاء تتوتر!! من الساعة سبعة وللساعة ثمانية ونص!! م دخلت عليها مكالمة!! ونازك اتضح انها متصلة عليها قبل الجريمة بعشرة دقايق!! المكالمة الساعة٩وتلت وتقرير الطبيب اوضح ان ولاء فارقت الحياة في حوالي الساعة٩ونص او نص وخمسة دقائق مساء!! طيب نازك دي منو؟ وقالت ليها شنو!!
الحاج قال لمولانا!! ماممكن شركة الاتصال تمدنا بتسجيل صوتي للمكالمات!! لانو دي تقارير ساااي بس بتحدد زمن المكالمات!!! مولانا وكيل النيابة الأعلى! قال للحاج طلبنا منهم مدنا بالتسجيلات ويمكن تصل اليوم اذا جات!! حنرسلها ليك علي القسم!! الحاج شكرو وطلع!! وهو في عربيتو اتصل علي جنابو احمد قال ليه انت ف القسم!! قال ايواااا!! الحاج طلب منه يفتش في يومية التحري ويوريهو نازك دي منو وقالت شنو؟! احمد قال ليه خير نازك دي منو كمان!! كالعادة الحاج قفل في وشو!! ولم وصل القسم!! سأل عن كمال قالو طلع بضمان!! دخل علي جنابو احمد وقال ليه طلع امر قبض في مواجه كمال قبل ما يهرب!! جنابو احمد بخلعة قال ليه هو القاتل!! الحاج طلع من المكتب ومشى للمتحري قال ليه طلع لي تحرياتك مع نازك سرييع!! فعلا فتش اليومية وطلع اقوالها!! والحاج قال ليه اقرا لي!! والمتحري بدا يتلو في اقوال نازك!! وكانت بداية عادية!! اسمها عمرها سكنها دراستها وانها زميلة ولاء في السكن!! لحدي ما قالت كنا بنقرا مع بعض في السطوح وانا رجعت الغرفة خليتها!! وتاني نمنا وما كنا عارفين انها م رجعت الغرفة!! والصباح لم لقيناها ماف!! قلنا بتكون طلعت تقرا فوق لأنها بتعملها كتير!! وطلعنا علي الجامعة!! الحاج قال يعني ما جابت سيرة عن اتصال ولاء ليها!! وقال للمتحري طلع رقم تلفونها!! فعلا شالو من اول صفحة مع بياناتها؟! وقال لجنابو احمد استدعيها!!؟
فعلا اتصلو عليها كانت في الجامعة!! قالت بعد تخلص محاضرات حتجي القسم!! وفي الأثناء ديك جابو كمال وكان المحامي حقو معاه!! دخلو علي جنابو احمد!! طلب منو يقعد!! ونبه المحامي انه يلزم الصمت!! ولا حيطلب منه يطلع بره؟! دي اعاده استجواب!! المحامي قاعد وبقي يسمع!! الحاج فتح باب المكتب!! وجا داخل وقال لكمال!!! شكلك مشتاق لحبل المشنقة!! المحامي اعترض علي اسلوب الحاج الترهيبي!! وقال دي انتهاك لحقوق موكلو!! بس ماف زول اشتغل بأعتراضو!! الحاج قال ليهم لو سمحتو اطلعَو كلهم!! المحامي اتعنت وقال م بطلع الا وموكلو معاه!! الحاج قال للرائد احمد!! لو سمحت سيادتك!! تحقيقي سري!! بمعني اطلعو كلكم!! طوالي احمد قام وشال الكاب حقه وطلع!! والمحامي جاط وطنطن!! الحاج قال ليه محترمنك عشان مكانتك ياسيد!! فبتمنى تحترم قوانينا!! قلنا تحقيق سري اتفضل!! وكان متنرفز وبأشر للمحامي علي الباب!! المحامي اتنفس بصوت مسموع!! وقال لموكلو اي حاجة ما عارفها قول ما عارفها!! وادخر كلامك للمحكمة!! الحاج قال ليه انت قريت قانون وين يااستاذ؟! تحرض المشتبه به قدام القوات النظامية المشرفة علي التحري والتحقيق معاه!! وقبل ما المحامي يتطور الموضوع مع الحاج جاه جنابو احمد وقال ليه اتفضل معاي استاذ!! نحنا في تخقيق سري!! وم اطن محتاج اشرح ليك شنو يعني تحقيق سري!! المحامي اتنرفز وقال عارف!! بس الضابط المعاكم ده مستفز!! وم عندو اخلاق مهنية!! احمد ابتسم وقال ليه انت لسسسه ماشفت شي!! ومشو مكتب المشرف!!
___________________________________________
الحاج قال لكمال عايز تقول شنو ودي اخر فرصة ليك في انك تبرر موقفك!! كمال قال كل العندي قلتو المره الفاتت اعملو العايزين تعملوه!! ما خايف؟! بس حولوني المحكمة وانا بعرف ابرئ نفسي كيف قدام قاضي بفهم!! الحاج!! لقى واحد في لئيم زيو!! وقال ليه جدا!!؟ اعتبرك مقر بذنبك وحابي تترحل علي المحكمة!! خلاص اقعد في السجن لحدي م نحنا نكمل تحرياتنا!! ونشوفك حتمشي المحكمة برتك ولا حتسوق معاك منو!! واوعدك حتلقى عندنا احسن ضيافة!! كمال هاج وقال بتهددني!! الحاج قال ممكن اكون بهددك لو قلت حدخل خاذوق في قفاك!! بس انا بوريك في اجراءاتنا م اكتر!! ونده علي العسكري جا داخل في اقل من عشرة ثواني!! الحاج قال ليه وديه الحراسة!! ويترحل بكره علي السجن!! لحدي ما تحرياتنا تخلص!!؟ كمال كان متردد!! الحاج بنهره قال للعسكري كلبشو اول!! العسكري بقى يعاين للحاج مستغرب!! وطلع الكلباش!! وهنا كمال اتجهجة!! وقال انا موظف!! وسمعتي!! انا ح احاسبكم كلكم!! لم لقى المرضوع جد!! قال و**** انا م خبيت شيء وقلت كل العارفو!! الحاج قال ليه ما قلت انك اتصلت علي ولاء تنزل ليك من الداخلية!! وم حصل!! وقلت اعتذرت منها وكنت بتكذب!!! والاهم من ده كلووو انك مثلت فيها بتتكلم معاها لم كان حسين الخفير راكب معاك!!؟ عندك توضيح للكلام ده؟! ولا احسن تقولو لقاضي!! لانو رجل قانون ونحنا بلطجية سااااااي!!؟ كمال حيلو مات! وقعت بقوة علي الكرسي ويديهو مكلبشة!! وبقى يرجف!! ولمن ملامح وشو اتغيرت!! قال للحاج انا ما قتلتها!! الحاج قال اثبت لي؟! كمال بقى يعاين للعسكري!! الحاج قال ليه اقعد واكتب لي اقوالو!! العسكري اتكيف عايز يعرف الحصل!! جرا كرسيهو!! ومسك ورق فلسكاب وبدأ يدون!! كمال قال كنت جاي اراضيها!! وعملت ليها مفاجاة مع نازك زميلتها في السكن!! قلت ليها خليها تطلع السطوح! وانا ح افاجئها هناك!! وفعلا ده الحصل!! ادسيت في السطوح وهي جات نظام صحبتها عايزاها في موضوع!! بس قبل ما اظهر شفتها بتتكلم بتلفون تاني!! غير حقها!! الانا بعرفو!! وقلت عادي يمكن يكون شالت تلفون واحدة معاهم وم عندها رصيد!! بس صعقت لم سمعتها بتقول ليه انا ما بحبك ولا عايزه اشوف وشك وكان تاني ظهرت لي حابلغ عنك!! وتلفونك تعال شيلو من خفير عمارتنا!! انا حسيت براسي لفى!! بالجد رجولي رجفو!! لم جيت طالع عليها لم صرخت!!؟ ووشفت الغفير ضوى علينا بالبطارية من تحت!! يعني في شنو؟! فقربت عليها وهي انهارت!! وبقتت تتمتم وتقول لي كمال انت هنا من متين؟! انت بتعمل شنو هنا اصلا!! مسكتها من اكتافها!! وقلت ليها انا جاي اراضيك!! انا م قدرت استحمل زعلك مني وانتي داخلة علي امتحانات!! انتي بتخونيني ي ولاء!! نكرت وبقت تبكي!! انا قعدت في الارض!! جات علي دفرتها لمن وقعت علي قفاها!! وما بتزكر قلت ليها شنو بالضبط!! بس كنت منفعل شديد!! قلت ليها خليك مع عفنك ده وانا ماشي!! كانت بتتراجني!! اول مره ولاء تترجى ليها زول!! قالت لي انا خايفه!! م تخليني براي!! ما بقدر اواجهو براي!!؟ ازعل مني مابلومك بس م تخليني براي حموت!! ولم قربت علي ضربتها كف؟! وشافتني نازك صحبتها!! اتخلعت!! وجات جارية!! حسيت بأنها عايزة تنادي الحارس!! طوالي نزلت!! الحاج قال ليه والسندوتش الادتو ولاء للحارس!! والونسة والاعتذار وكل القلتو كان كذب!!؟ كمال اول سكت!! الحاج قال يعني بمكن تكون اسسسه بتكذب!! قال لا ما كذبت المره دي!! وحتى الفاتت ما كلو كذب!! سندوتشي اديتو لنازك قبل م الاقي ولاء!! الحاج قال وولاء كيف عرفت انها اكلت التاني!! ولمن ابت تديك معاها!! ده كلو تمثيل!! الحاج قال ليه على كلاً كلامك ده براه حيدينك!! وقال للعسكري وديهو الحراسة لحدي ما نشوف شنو الحقيقة وشنو الكذب!! وطلع معاه وهو منكسر وخايف!! والمحامي بره بسأل فيه مالك في شنو؟! وكلام كتير بس ما رده عليه!! واكتفى بالنظرات بس!!؟
وقبل ما يصل الحراسة جات نازك داخلة وشافتو مكلبش وموقفنو قدام الحراسة واتجمدت لخمسة ثواني ووقعت مغشي عليها!!
نواصل بعدين
يتبع ……..
الجزء التاسع من رواية القاتل المختل
العساكر جو جارين عليها!! ومستغريبن دي منو الصدمت دي!! بس لم كمال قال نازك!! الحاج كان في المكتب وسمعو!! طلع مسرع لقاهم شايلنها!! ختوها في كنبة في الصالة! ودخلو كمال الحراسة!! الحاج كان براجع في اقوالهم!! وكتب بعض الملاحظات!! وشرد بتفكيره لحدي ما داهمو النعاس!! وقبل ما يغمض دخل عليه جنابو احمد قال ليه البت فاقت!! ح استجوبها اذا حابي تحضر معانا!! الحاج ابتسم!! وقال ابدا معاها انا جاي!! وفعلا طلع ودخلوها مكتبو!! وبدا يحقق معاها!! ولانه قبل كده تم استجوابها!! سألها سؤال مباشر!! لشنو ما قالت انها شافت كمال بل اتفقت معاه أنه تخلي ولاء تطلع ليه السطوح!!؟
بقت تبكي وقالت عشان كده ما قلت ليكم!! عشان ما تتهموني!! و**** انا ما عارفة الحصل شنو!؟ جنابو احمد قال ليها احكي لي الحصل وبدون كذب وتلفيق!! لانك يقيتي مشتبة به ثاني!! وممكن تكوني شريكة في الجريمة!! بكت وانهارت!! وبقت تحلف انها ما عملت شي!! وكل الحصل إنها كانت في الحمام لم طلعت لقت كذا مكالمة من كمال!! رجعت ليه واتفق معاها انو ولاء زعلانة!! وهي كانت عارفه انها متشاكلة معاه!! وشايفاها متغيرة من كم يوم!!؟ عشان كده وافقت تساعد!! وطلب منها تخلي ولاء تطلع السطوح!! في حدود الساعة٨ مساء!! وقالت ده الحصل قلت ليها عايزاك في موضوع ناصر!! والحاج جا داخل ملهوف!! قال ليها انتي بتعرفي ناصر!!؟ نازك اتخلعت وقالت عرفتو عن طريق ولاء وروان!! الحاج قال ليها بتعرفي شنو؟! عاينت لجنابو احمد!! قال ليها جاوبي!! قالت ليه راجل اتعرفت عليه روان وولاء وكل يوم طالع ليهم بدراما!! وفصلوها منو؟! الحاج قال ليها منو العرفتو اول!؟ نازك قالت!! روان !! الحاج لبس نظارتو!! وقال ليها كملي!! قالت طلعت معاي السطوح وقالت لي مالو التافة من قبيل بيتصل علي وابيت ارد!! وريتها اني شفتو من كم يوم في بداية الشارع وفعلا ده الحصل!! احمد قال ليها يعني بتعرفي شكلو!!؟ قالت لا؟ بس شفت عببيتو كم مره جنب الداخلية كان موصل ولاء!! الحاج قال عربية لاندكروزر بيضاء!! قالت اااي!! اها وبعداك!! قالت قلت ليها ثواني اجيب تلفوني منتظرة مكالمة من ابوي عايز يحول لي مصاريف!!؟ ورجعت علي الداخلية!! لاقيت كمال طالع عليها!! سلمت عليه وشكرني وطلع سندوتش من الكيس!! رفضت بس اصر علي!! وسابو ف يدي وطلع!! وانا دخلت الداخلية!! وكنت مركزه عشان قبل م يطلع زول فوق اتدارك الموقف!! وفعلا بعد ربع ساعة بالكتير!! الحارس جا وسأل من ولاء !! قلت ليه بنقرا مع بعض ف السطوح!! وانا جيت اشيل دفتري نسيتو!! وفعلا خطفت دفتري وطلعت سريع علي فوق!! وعلي دخلتي اشوف!! كمال بيضرب في ولاء!!! انصدمت!! وما قدرت اصدق!! ما عارفه حصل بيناتهم شنو؟! بس حسيت انه استغلاني!! وعن طريقي اتمكن من صحبتي!! احمد قال طيب اذا استغلاك زي ما قلتي لشنو اتسترتي عليه!! وما قلتي كلامك ده من اول تحقيق!! قالت وهي بتبكي!! لاني جريت انادي الحارس !! بس هو جا جاري وراي!! ونزل مسرع!! انا رجعت لولاء لقيتها قاعده في الارض وبتبكي!! لم شافت ظلي لمن اترعبت!! قلت ليها دي انا!! واعتذرت منها وحضنتها!! وبقيت انبذ ليها في كمال!! وحكيت ليها الحصل!! انفعلت!! وقالت لي ليه تعملي كده ولامتني!! وفي اثناء م نحنا بنبكي!! جا الحارس شكلو سمع صوت البكاء ولا جري كمال م عارفة!! نهرنا وقال في شنو!! قلت ليه ولاء خايفه من امتحان بكرة!! وقالت م قارية!! اتكلم معاها!! وطلب مننا ننزل الداخلية!! بس ولاء قالت ليه مخنوقة!! والبنات جايطين ما بتقدر تستوعب!! وخلاها تقرا فوق!! وبتزكر وانا نازلة قالت لي شيلي الكيس ده معاك!! انا ابيت!! عرفتو ده الجابو كمال!! وندمت لاني شلت منو!! لم رفضت ادتو للحارس شالو ونزل!! الحاج قال ليها دقيقه!! كيس المطعم شالو الحارس حق الداخلية انتي متأكدة؟! قالت ايوااا!!؟ بعداك انا راجعت شوية ونمت!! صحيت الصباح لقيتها مافي!! قلت بنكون طلعت بدري ولا لسسسه زعلانة مني!! وقلت اراضيها في الجامعة!! والحصل بعداك انتو عارفنو!!؟
الحاج قال ليها انتي قلتي ناصر كان بتصل عليها بإستمرار!! انتي متأكدة!! قالت انا ما حصل سمعت صوتو بس ولاء كانت بنتجنبو!! الحاج قال السبب شنو؟! سكتت!! جنابو احمد قال ليها الزمن خلصينا!!؟ قالت شكلو عايزهم يمشو معاه في السكة الغلط!! بس هم رفضو!! وبقى يتصل عليهم وبضايقهم!! الحاج قال تقصدي بصيغة الجمع!! احمد قال روان وولاء!! قالت ايوااا!! بعداك جنابو احمد اعاد استجوابها في نقاط معينة!! وكتبوها تعهد انها م تغادر المدينة لحين اكتمال التحريات!! وطلبو ولي امرها!! ولا اي ذكر من اسرتها!! وكانت مرعوبة!! بس خلوها تطلع!! احمد قال للحاج شفت الشغلة جاطت كيف!! الحاج ابتسم وقال ياداب الصورة وضحت!! واتزكر حاجة وطلع ورا نازك مستعجل وقال اقيفي يابنتي!! اتلفتت ولامحها ما بتتفسر من شده الخوف!! قال ليها المرحومة عندها كم تلفون!!؟ قالت اتنين!! الحاج ابتسم وقال ليها شكرا ليك!! بس اديني رقمها التاني!! قالت رقم جديد جابو ليها ناصر!! بس ما عندي!! بتزكر يوم اتصلت علي من رقم غريب وسألتها قالت ده رقم جديد يمكن يكون هو!!! قال ليها بلهفة اديني ليه!! قالت ليه بكون ضايع في سجل المكالمات لانو الكلام ده ليه قريب الشهر!! بس بعد اصل البيت ح افتشو وارسلو ليك!! وشالت رقم الحاج!! وهو رجع علي مكتبو ما مشى لجنابو احمد!!
____________________________________
وقعد يفكر!! روان قالت ولا اتعرفت علي ناصر يوم ركبت معاه من الجامعة!! ونازك قالت كان بيعرف روان اول!!
وكيس المطعم!! كيف القاتل قدر يتحصل عليه إذا فعلا الحارس شالو ونزل بيه مع نازك!! وكيف انا لقيت مقايا السندوتش في حافة البلكونة!! يا نازك بتكذب!! يا الحارس وراهو سر خطير!! واهم سؤال!! وينو تلفون المرحومة التاني؟! والشالو منو؟! واتصل على ناجي!! الاخير رده متأسف عن الموقف الحصل!! وانه ما كان يقصد يخلع الحاج بس هو زاتو اتخلع لما قالو ليه روان قتلوها!! الحاج قال ما مشكلة!! اها روان فاقت!! ناجي قال وضعها مستقر بس لسسسه في العناية!! قال ليه تمام!! ناجي سأل الحاج عن القضية!! الحاج قفل الخط في وشوو!! ودخلت عليه مكالمة من رقم غريب!! لم رده!! لقاه ده رجل أمن جايب للحاج تسجيلات شركة الاتصال!! ومسكهم وهو متحمس!! كانو في فلاش!! مادى العسكري وجاهو جنابو احمد!! قال ليه شنو الخيانات دي!! منو الماسك التحقيق ده!! الحاج حاول يستفزو قال ليه ما مشكلة تعال اتعلم!! جنابو احمد ابتسم!! وقال ح اعلمك انت بشغلو الفلاش كيف؟! الحاج بقى يضحك!! وفعلا احمد وصل ليه الفلاش في جهاز معاه!! وبدو يسمعو ف التسجيلات!! وزي ما كانت في التقارير ماف اختلاف!! وحتى اتصال ولاء بروان قبل الحادثة بيوم كان نفس الكلام بالنص!! بس الحير الحاج!! مكالمة كمال الاخيرة!! فعلا نفس الكلام القالو حسين الخفير!! كان بتكلم عن موضوع فريم اسود!! وولاء مستغربة!! وبتقول كمال انت كويس في شنو؟! فريم شنو؟ انت مسامحني!! وقفل!! طيب لشنو اتصل عليها وهو ضاربها قبل دقائق!! ليه عايز يحسس عم حسين انه طبيعي معاها وانهم مبسوطين!! في حلقة مفقوده!!؟
الحاج سرح بعيد واحمد حس بخيبة امل لانه ما وصل لشي!! الحاج اتصل علي صاحب ولدو المرحوم عندو وكالة سفر!! سلم عليه!! وقال عايزك في خدمة!! داك قال ليه اتفضل!!؟
الحاج قال ليه في شخص دخل السودان من اقل من ستة شهور!! عارف اسمو بس وبعض الصفات ح اقدر القاهو!! صاحب ولدو ضحك!! وقال يعم علي كأنك بتفتش في إبرة في كومة قش!! بس اذا عندك زول في الخارجية بفيدك!! الحاج شكرو واتصل علي المدير التنفيذي في دائرة الهجرة والجوازات!! بوزارة الخارجية!! وطلب منو نفس الطلب!! قال بس لو عرفت لي تاريخ دخلو السودان ولو بالتقريب واسم الدولة الجا منها اوعدك القاه ليك!! بس اديني اسمو!! انا بحاول!! الحاج اداه المعلومات المعاه وقفل!!؟
وبقى يراجع في الادلة المصورة!! وما لاقي اي شي!! ونفس الصور الانطبعت في راسو!! جثه منتفخة!! رأس مقطوع يخلو من اللحم!! كيسين واحد اسود كبير حق قمامة!! وداخلو واحد ابيض تابع لمطعم معروف!! وقفازات!! الحاج راجع تقرير الأدلة الجنائية لقى انه كلها تالفة ماف اثر لاي علامة او رأس خيط!! قفل شاشه التلفون ورقد علي الكنبة!! وبقى مشوش!! مين البيلعب عليه!! مين القتل!؟ وفضل ليه اخر كرت!! اذا نازك لقت الرقم من خلال سجلات الشركة حيعرفو ناصر ده منو؟! ولا روان تفوق وتشد حيلها عشان تحكي ليهم الحصل بدون تلفيق؟! وحس بألم في مفاصله!! واتزكر انه ليه يومين ما نايم!! جرجر رجولو وما قدر يسوق عربيتو!! ركب ليه ترحال ورجع شقتو!!
اخد ليه نومة وما صحى لا المغرب!! بعد صلى لقى مكالمات من نازك ورسالة!! فتحها ملهوف ولقاها رقم ولاء الجديد!! اتصل لمدير شركة الاتصال السابق للشركة المعنية!! وسلم عليه وقال اتصرف لي عايزك في موضوع مهم!! حرسل ليك رقم وعايز صاحب الشريحة واخر عشرة مكالمات بالارقام والاسماء واكون شاكر ليك!!! صاحبة ضحك وقال ليه انا بقيت م مسئول عن الشركة!! الحاج قال ليه اتصرف!! المدير السابق!! سكت مسافة وقال ليه خلاص تمام!! ساعتين بالكتير وح ارجع ليك!!؟ وكانت اطول ساعتين في حياة الحاج العملية!! ولدرجة انه بتمشور في البيت من شدة القلق!! وماسك التلفون في يدو!! الحاج!!؟ وجات المكالمة المنظرة؟؟!
نواصل بعدين
يتبع ………
الجزء العاشر من رواية القاتل المختل
الحاج اتنهد بصعوبة!! وقال الووو!!؟ صاحبو المدير السابق للشركة قال ليه قول مصطفي أفضل مني!! حتى اوريك!! الحاج ضحك وسباه!! والاخير بادلو الضحكات!! الحاج قال اها بشرني!! صاحبو بتفس سخن!! قال الشريحة طلعت بأسم نصر الدين محمد احمد!! الحاج قال يعني اسمو ماناصر!؟ اها كمل!! قال ياسيدي الشريحة فيها تلاتة أرقام!! اتنين بإسم نصر الدين والتالت لشخص اسمه قمر الدولة!! اما اخر عشره مكالمات كانو بين نصر الدين ونصر الدين بس المستخدم ولاء!! الحاج قال حلووو ما قصرت على!! اردها ليك في مزززه عشرينية تجدد ليك شبابك!! مصطفى ضحك!! وقال ليه اعقل يااخ **** يتوب علينا!! الحاج ضحك وإنشراح!! وقال بس جاري للحرام!! انا قصدي نعرس ليك نعرس ليك!! صاحبو ضحك وقفل في الحاج الخط؟! الحاج لمن بقى يكح من شده الضحك؟!! واتنفس واخد نفس طويييييل واتزكر ولدو!! قام اخد ليه دشش!! ودخل المطبخ لقى التلاجة مليانة!! بأجر مره في العمارة الساكن فيها بتطبخ ليه بالاسبوع!! فتح كذا صنف!! بس نفسو اتسدت!! بالرغم من انه كان جيعان!! عمل ليه قهوة وولع ليه سيجارة وقعد في التلفزيون!! وبقلب في القنوات!! اتصل عليه جنابو احمد وقال في طريقه اجي عليك!! الحاج ابتسم وقال عايز تجي تتعلم مني بنوم كيف؟! احمد ضحك وقال لا الموضوع مهم!! الحاج سكت لوهلة! وقال تعال اصلا انا ما بنوم بدري!! وفي خلال نصف ساعة جنابو احمد ضرب الجرس!! الحاج قام فتح ليه!! احمد دا يدو للحاج بإندفاع ولهفة!! الحاج ابا يسلم عليه وقال ما بصافح؟! احمد ضحك لمن خبط زاوية الباب!! الحاج قال ليه ادخل ولز الباب وراك!! وسبقو علي الصالون!! جنايو احمد بقى يتلفت يمين شمال!! وقال للحاج البيت الكبير السمح ده عايش فيه براك!! الحاج ما رده عليه!! وبقى يشرب في قهوتو!! لم انتبه لقى احمد بعاين ليه!! حكى راسو وقال هدااك الكولر!! اشرب وادخل المطبخ كب ليك قهوة!! احمد ولا كذب!! ختى التلفون والكاب! ومشى شرب ودخل المطبخ!! وغيبتو طالت!! الحاج حاول يشوفو!! بس الحيطة حاجباه!! وشوية كده وشم ريحة الاكل!! بقى يتبسم! ودموعو ملو عيونو!! سبحام **** نفس تصرفات ابراهيم ولدو!! واحمد جا طالع من المطبخ وشايل الاكل!! قال للحاج جيرانك عندهم مناسبة ونقصو الاكل في تلاجتك ولا شنو؟! الحاج قال ليه انا فاتح مطعم هنا!! احمد ضحك وقال عايز اعمل لي كرشة زي حقتك دي!! واتبادلو الضحكات!! في الاول الحاج رفض ياكل!! بس احمد اصر عليه وبدوور والحاج نفسو فتحت!!؟ كأنه ليه شهرين ما ماكل!! احمد بعاين ليه وبتبسم!! وكل شوية يقول ليه امشي ازيدك!!؟ وكانت قعدة سمر حلوه!! بعداك احمد كب لنفسو قهوة وقال للحاج بكل فخر وعزة نفس!! جايك بخبر مستحييل تتوقعو!! الحاج ابتسم وقال ليه الحاجة الوحيدة المستحييييل اتوقعها انو المرحومة ولاء تكون ف المطبخ داك وعملت الاكل هي!! احمد ضحك! وقال اسمع واحكم!! الحاج قال اها قول؟ جنابو احمد عدل قعدتو وبقى مقاصد الحاج!! وقال العربية اللاندكروزر؟! طلعت بإسم!!! وقبل ما يكمل الحاج قاطعو وقال بأسم نصر الدين محمد احمد!!؟ احمد قام على حيلو وقال كنت عارف وما كلمتني!!؟ عرفت كيف ومتين!! ما تتخيل انا تعبت قدر شنو لحدي ما اتحصلت على المعلومة دي؟؟! الحاج ضحك وقال انت لسسسسه صغير لازم تجري وتتعب وتشقى!! بس انا عرفتها وانا في مكاني ده!! ومن كنبتي دي ما قمت؟! احمد اتغاظ!! الحاج قال ليه بس بحيك على مجهودك!! بالجد انت مجتهد!! ولكل مجتهد نصيب!! ويمكن بعد سبعين سنة لقدام تبقى الثعلب2!! احمد ضحك!! قال للحاج عرفت كيف؟! قال نازك ادتني الرقم وبطريقتي الخاصه عرفت صاحبه واكيد صاحبة هو صاحب العربية!! احمد قال! وانا الحاي ملهوف ومتحمس!!؟ الحاج قال وانت استعنت بمنو!! يمكن يفيدنا بشي ف المستقبل!! احمد قال ما اظن نستفاد شي!! المهم وانا خاشي الفيس شفت قروب حق اناقة ولا اسمو شنو ما بعرف!! ظهرت لي ماركات عالمية وانا بقيت اشوف في البدل ولمن اخترت خقة العرس!! الحاج بنهره كده قال ليه خش في الموضوع!! قال المهم وانا بفتش شفت ملابس شتوية ومن ضمنها جونتات!! الشكل كان مألوف بس ما عارف شفتهم وين!! لحدي م نسيت الموضوع وفتخت ملف القضية وشفت القفازات نفسيهم حقات الجاني!! استغربت من القاتل اللابس قفازات ب٨٠دولار ماركة شانيل ولا ميشيل م متأكد!! الحاج قاطعو وقال انت متأكد!! ورا الحاج صورة القفارات وقارنهم بمعروضات الجريمة!! الحاج قال معناها القاتل فاحش الثراء وبعداك رجعت لاقوال المشتبه بهم فلفتت انتباهي اقوال نازك قالت شافتو حولين الداخلية كم مره!! ففتشت كل كاميرة مراقبة ف المنطقه بالشارعين!! ولحدي ما ظهرت لي بالشارع الرئيسي البوصل للداخلية!! نفس المواصفات واللون!! وفي كاميرتين مخلفات ونفس الوقفة وبشارعين مخلفين!! قربنا الصوره اكتر وشلت رقم اللوحة واديتو لزميل لي في المرور وطلع معاه اسم المالك نصر الدين!! الحاج ابتسم وقال ليه جهدك مقدر و****!! ومشروع محقق ناجح!! بس خلي الغرور وشوفة النفس!! احمد ضحك وقال في زول بحصل غرورك؟! وبقو يضحكو!!
الحاج قال نداهمو في الليل ده ولا نصبر للصباح!! جنابو احمد قال للحاج رسلت رجال مباحث يجيبو لي خبرو وتحركاتو!! ونشوف البيحصل شنو للصباح!! الحاج قال ليه اطلع بعده عايز انوم!! احمد ابتسم قال ليه بعرس وبجي بسكن معاك!! الحاج قال ليه راحل ماشي امريكا!! احمد قال حلووو! طيب حتكون الشقة فاضية؟! الحاج ضحك وقال و**** اسجنك!! اتبادلو الضحاكت واحمد طلع!!
____________________________________
في صباح يوم التاني!! وبعد ما كانو رجال المباحث مطوقين العمارة المتواجد فيها نصر الدين!! اتصل ناجي علي الحاج وقال ليه روان اتحسنت شوية وطلعوها من العناية المكثفة على غرفة خاصة!! والدكتور مانع ليها الزيارة بس اهلها بسلمو عليها وبيطلعو!! لكن ممكن يسمحو للشرطة بأخذ اقواها!! الحاج قال ليه سواطة زي كل مره ولا خبر مؤكد!! ناجي ضحك وقال العفو منك جنابو!! ده الدكتور قال لي كده!!؟ الحاج قال ليه انا ماشي عليها!!!!وفعلا كان ماشي علي القسم غير مسارو ومشى على المستشفى!!؟
واتصل علي احمد يشوفو عمل شنو؟! قال ليه عناصرنا متمركزين من امس!! بس منتظرين وكيل النيابة الأعلى يوقع علي امر القبض!!
الحاج قال خير!! وقفل منو!! وصل المستشفى واتكلم مع الدكتور!! اهلها اول اعترضو وخصوصا اخوها وابوها!! الا رجال الأمن اتدخلو حتى طلعوهم برا!! وقالو وصعها ما بسمح لاستجوابها!!!َ وكل البلاوي دي وقعت عليهم بسبب القضية دي!! ف الوقت داك ناجي اتصل علي الحاج وسالو اذا وصل!! الحاج قال ليه ما كان تتصرف لي مع اهلها ديل طيب مادام انت معتم كده!!!وكمان من فترة مش قلت لي ما عندها اخوان!! طيب الحيوان ده منو؟! ناحي قال ليه معليس راعي لمشاعرهم برضو!! اما البتتكلم عنه ده اخوها ودخالها مربينو معاهم من صغير وفي مقام اخوها!! الحاج قال ليه انا داخل عليها وقفل!! دخل لقاها راقدة وافتكرها نايمة!! جا طالع!! قالت ليه بخلعة انت منو؟! لم قبل عليها!! بكت وقالت ده انت ياجنابو!! قرب عليها!! وكفر ليها وشجعها بالكلمات!! قال ليها ممكن ادردش معاك ولا اجي في وقت تاني!! سكتت!! قال ليها لو تعابنة بجيك مره تانية!؟ قالت ليه لالا خليك بس لو تعبت نوقف؟!
ابتسم وقال ليها انا ما عايز اكتب ولا كلمة انتي بتقولها!! بس عايز ادردش معاك!! اتنهدت بصعوبة وجسمها كلو أجهزة!! قالت ليه اتفضل!! قال ليها نصر الدين ده منو؟!
بكت وقالت ده عذابنا ودمار سعادتنا!! ده الفرقني عن رفيقة دربي!! وبقت تبكي وتإن!! شكلها اتوجعت!! الحاج هداها شوية وقال ليها احكي لي برواق الحصل شنو!! قالت ليه انا كذبت عليك!! انا العرفت نصرالدين بولاء!! الحاج قال ليها عارف!! بس كيف؟ عاينت ليه بإستغراب وقالت اتعرفت عليه ف الفيس!! وطلب يشوفني!! كان راقي وفاهم شديد وجذبني!! لم لاقيتو اتصدمت!! طلع قدر ابوي!! طوالي فصلتها منو وبقيت أتجنبوو !!
لحدي ما يوم لاقانا بالصدفة يوم قلت ليك ما لقينا مواصلات!! ركبنا معاه وصلني جنب شارعنا وخليت ولاء راكبة معاه عشان يوصلها الداخلية!! ومن هناك اتعارفو وبدت علاقتهم!! هي ما كانت بتحبو!! ولا عندها ليه حاجة!! بس ولاء طايشة ومجنونة وبتحب تخاطر!! لم لقتو زول كعب وعايزها في مواضيع فارغة!! برضو خلتو!! الحاج قال طيب هي عارفة انه كعب كانت متوقعة منو شنو؟! قالت طلعات وونسات ومصاريف ما اكتر!! الحاج عقد حاجبيه!! وقالت ليه و**** طيبة شديد وعلى نياتها!! الحاج قال بس ده سبب يخليه قتلها وبالطريقة البشعة دي!!!ويحاول يغتالك كمان!! قالت و**** ما عارفة السبب شنو؟! وما متاكده لو كان ده هو ولا زول تاني!! بس صدقني ما غلطنا في حقه بس يمكن يكون ما ااقبل الرفض بحكم انه مقتدر وغنيان!! الحاج قال ليها بتعرفي شكلو قالت اااي شفتو تلاته مرات!! ووصفتو!! نفس وصف كمال لما قال ولاء رسلت ليه الصورة بالغلط!! اخدر وعندو عنب في وشو!!؟ شكلها اتضايقت من كترة الكلام!!! وبقت تكح وبطلع دم من فمها!!؟
الممرضة جات عليها وطلت من الحاج يطلع بره لانه وضع المريضة ما بيسمح ليه يتم استجوابو!! وطلع براحة قبل ما اهل روان يشوفوه ويعرفو انه بنتهم تعبت!! مممن عادي يجلدوه الجماعة ديل!! لم طلع وركب عربيتو اتصل علي جنابو احمد وقال ليه اها قبضو نصر الدين!! جنابو احمد قال ليه لقينا نصر الدين مقتول من اذان الصبح وبطريقة بشعة شديييد!! الحاج قال مقتول؟! احمد قال وكأنو القاتل عارف كل تحركاتنا و سابقنا بخطوة!!!
الحاج قال ليه جاي عليكم!! وقفل وسااااق عربيتو بتهور ووصل مكان الجريمة الجديدة..!
نواصل بعدين
يتبع ………
الجزء الحادي عشر من رواية القاتل المختل
الحاج لم وصل لمكان الجريمة!! لقاه نفس المشهد البتكرر قدامو في كل تحقيق!! كم عربية شرطة وكلاب بوليسية! وتجمعات ناس!! وحاجة عجيبة!! كان بفش لجنابو احمد؟! بس شافو من بعيد وجا عليه!! وقال لو كان سمعنا كلامك والقينا القبض عليه م كان حصل الحصل!! الحاج قال ليه استغفر! ده مقدر ومكتوب!! بس وريني مات كيف؟! وهو منو اصلا!! احمد قاطع الحاج وقال ليه اسكت عشان اقدر احكي ليك!!!؟ الحاج رمقه بنظرتو اللئيمة ديك! جنابو احمد ابتسم وقال ليه ارح علي المظلة ديك!! لم وصلو وقعدو!! احمد قال ياسيدي شخصنا الغامض نصرالدين!! عمرو٥٥ سنة سوداني/كندي الجنسية!! ارمل!! عندو ولدين وبنت!! اتنين في كندا واحد ساكن هنا في الخرطوم في البيت ده!! وأشار لموقع الجريمة!! قال اها مات كيف وسبب والوفاة شنو؟! احمد قال ليه جاي عليك بالكلام!! من الفيلا دي باين عليهم فاحشي الثراء!! الحاج اتنرفز!! احمد ضحك!! وقال ليه معليش بس لازم تكون ملم بالتفاصيل!! المهم سبب الوفاة حريق من الدرجة الأولى بالاضافة لتجزئة اعضاء المغدور!! الحاج قال انت جادي!! احمد قال للحاج قطعو مفصل مفصل!! وحاول يذوبو بمادة حارقة!! وما كده بس حتى الجمجمة مهشمة!! وكانه طالع فيها جرار!! بالجد ده شخص مريض!!؟
الحاج قال والمشتبه فيهم منو؟! احمد قال ليه قول الجاني منو!؟ الحاج بحماااس قال ليه اتقبض يعني!! احمد قال لا بس اتعرف!!؟
الحاج قاعد حاجبيه! مستنكر!! احمد قال ليه مساعدو ووكيل اعمالو وضراعو اليمين زي ما بقولو!!؟ الحاج قال منو؟ احمد قال قمر الدولة!! الحاج اتزكر انه ده الاسم الاتلقى في تلفون ولاء!!؟
الحاج قال طيب دوافعو شنو الخلتو يرتكب جريمة زي دي!! أحمد قال للحاج علمي علمك!! نشوف التحريات حتاخدنا علي وين؟! الحاج قال ليه الماسك التحري منو؟! احمد قال ليه سعادة المقدم نادر!! داااك الجنب العربية داك!! الحاج جا ماشي عليه!! احمد قال ليه اعمل منو حسابك ما متعاون!! ويمكن ما تتفاهمو!! الحاج ابتسم!! ورفع بنطلونو الناصل داك وصلح الكاب! ومشى علي الضابط!! سلم عليه!! ورد الاخير ببرود!! الحاج عرف عن نفسو!؟ والضابط اكيد سمع عنه!! بس ما اداه اهتمام وقال ليه شكرا لتواجدك!! بس ما محتاجين مساعدتك!! عشان ما نأخر بعض!! وكمان فريقي مكتمل!! الحاج قال ليه **** يعينك!! ومشى منه!! اتصل علي رئيس سلاح الإشارة والعمليات!! وقال ليه عندكم كلب مسعور! ماسك عضمة بتخصني!! اصفيه ليكم ولا تتصرفو معاه!!؟ الاخير!! قال ليه صدقني لو ابعدناه عنك ح يرتاح ومعناه امو داعية ليه!! الحاج قال ليه بقيتو تعينو شفع ياااخ!! داك بقى يضحك وقال للحاج ده زمنهم خليهم يتعلمو!! بتتزكر نحنا لم كنا في سنهم عملنا شنو؟! الحاج ضحك بفجور!! وقال ليه المهم اتصرف!! اخد من الحاج اسم الضابط!! ومكان الحادثة!! وفي خلال نصف ساعة سرحو الضابط!! من القضية!! واوكلو بيها عقيد شرطة معروف في المنطقة بمرونتو!! وقوة شخصيتو!! الحاج دخل بيت المرحوم؟! وبقى يفتش غرفة غرفة!! كان نضيف شديد!! ومرتب علي حسب الطراز العالمي!! كان ف عسكري ماشي مع الحاج!! والحاج بقول ليه شوف النعمة دي سااي!! تتلقى من ولدوك ما خشيت مكان زي ده!! والعسكري بيضحك!! لحدي ما دخلو الغرفة الحصلت فيها الجريمة!! كانت شبة مهجورة!! وهي الوحيدة الاثاثاتها قديمة ومغبرة!! الحاج قال ليه الغرفة دي ما زي باقي البيت!! جا داخل العقيد وقال ليه لانها بتخص زوجة المغدور المتوفية!! وما بسمح لزول يدخلها ولا يغير فيها شي!! الحاج برفعة حاجب!! قال ليه م اتعرفنا!! العقيد سلم عليه وقال حيستلم القضية بدل المقدم فلان!! الحاج ابتسم!!؟
جا احمد داخل وسلم بدون مصافحة!! وقال للحاج ده البرميل الاستخدمو الجاني عشان يحلل الجثة!! ووراهو صور الجثة وهي ما بتتفرز اللحم من الحضم!! وصور الرأس المقطوع المهشم!! والأسنان مبعثرة حولينو!!؟
الحاج قال الجريمة كلها وقعت هنا!! في عسكري قال لا!! ده المكان الاتلقت فيه الحثة!! بس الحريمة وقعت في غرفة المجني عليه!! والحاج طلع وقدامو العسكري!! لحدي م وصلو الغرفة!! لم فتحوها كانت عبارة عن بركة دمم!! منظر بشع خلاص!! والابشع انه الجاني ماسح الدم في الارضية بممسحة!! يعني خافي اثار الرجلين بس بدون موية!! قاشي دم بالدم!! فزاد المنظر بشاعة!!؟
اتلقت المناشير والسكاكين!! م اخفى ولا دليل!! الحاج قال ده قاتل مجنون!!؟ جنابو احمد قال للحاج تعال!! لم جنب بيه طرف! قال سكلو المجنى عليه ما ليه علاقة بقضيتنا!! الحاج قال ليه عرفت شنو؟! احمد قال ولدو ف ايتجوابو!! قال انه كان في بيت نسابتو وباتو هناك وقدر بثبت الكلام ده!! والشغالة بتجي يوم بعد يومين!! ومن المفترض تجي اليوم بس حصلت الجريمة!! الحاج قال **** يرضى على والديك اختصر ياااخ!! احمد قال من الاخر كده!! والد المرحوم قال انو ابوه شكى!! ليه من قمر الدولة!! وانتو بقي يتجاوز حدودو!! وبنتحل شخصيتو في معظم الاوقات!! الحاج قال كيف؟! احمد طلع صورة من الملف وقال للحاج ده منو؟!
الحاج ركز في الصورة واتزكر ملامح مشابها!! وقال لاحمد ده نصرالدين!! احمد ضحك وقال ليه لا!! ده قمر الدولة منتحل شخصية نصر الدين!! الحاج قال كيف الكلام ده!! احمد قال ليه استنتجت كده غايتو!! روان ونازك وكمال كلهم قالو نصر الدين عندو نخل في وشو!! بس من خلال الصور الامامك دي بتبين انه داك هو قمر الدولة بس لشنو يخدعهم!!؟
الحاج قال ليه الموضوع ماشي يتعقد!! طلب نسخة من التحريات ورجع علي القسم!!
اتصل علي احمد وقال ليه ماف خبر عن قمرالدولة!! قال للان التحريات مستمرة!! وسالو!! مووش رجال الامن كانو مراقبين البيت!! اكيد شافو الطلع والدخل منو!! احمد قال ليه ايوووا ده في المحضر المعاي!! لانو نحنا الطلبنا منهم يراقبو؟! عشان كده م حقق معاهم العقيد ده ولا كان عالم بوجودهم!! الحاج قال ملهوف طيب قالو شنو ي ابني؟! م كل شوية ازكرك شغلك؟؟ احمد قال علي فكره انت شغال معاي!! ودي قضيتي انا!! الحاج سباه بس في سرو!! احمد قال ليه سمعتك!! الحاج ابتسم!! احمد اتنفس بصوت مسموع!! وقال للحاج قالو اذان الصبح شافو زول طالع وكان طبيعي وما ظاهر عليه الخوف ولا الارتباك!! طلع ومشى علي الجامع!! تبعو واحد من افرادنا لحدي م دخل المسجد!! وفضل منتظر!! بس لانه الواطا ضلام م شاف وشو!! ولحدي الواطا م اتكشفت والامام طلع وقفل معاه المسجد!! زولنا رجع وقال يمكن يكون طلع قدامو بس هو م انتبه ليه لانو م بيعرف ملامحو!! بس اكتشف انه ماف زول رجع البيت!! وعملنا المداهمة واكتشفنا الجريمة!! الحاج قال بالجد داهية الزول ده!! احمد قال يعني يمكن يكون هو القتل ولاء؟! الحاج قال بس السبب شنو؟!
وفي أثناء م بتتاقشو بالتلفون سمع جوطة بره!! قفل من احمد وطلع!! لاقاها محامية صغيرة فرحانة بحصانتها!! قال ليها في شنو يا انسة!! قالت ليه أستاذة لو سمحت!! أستاذة انفال حسين!! الحاج ابتسم وقال ليها اتفضلي يا أستاذة انفال!! قالت عندي موكل في الحراسة معتقل اعتقال غير مشروع!! وطلعت طلب من بين ورقها وقالت ده طلب الافراج ومؤشر من وكيل النيابة!! الحاج قال ما عايز يحرجها قدام العساكر وقال ليها اتفضلي يا أستاذة علي المكتب!! رفضت وقالت مستعجلة عندها سماع في محكمة الامتداد!! الحاج قال ليها بغضب!! يا أستاذة زولك ده كان مشتبه به!! بس الان هو المتهم الأول!! واتجدد حبسة من المحكمة لأغراض التحري!! راجعي قانون الإجراءات الجنائية يااستاذة!! احدد ليك المادة ولا م محتاجة؟ حست بالاهانة!! وقالت ليه انا ح ارفع شكوة عليكم!! واتصلت علي استاذها!! قال ليها مووش معاك طلب احضار لكمال من النيابة!! سلميهم الطلب!! ولو رفضو؟ خليه يأشر عليه بالرفض!! ونحنا حنتصرف معاهم!! اصلا ناس الشرطة ما بيمشو الا بالعين الحمره!! وهنا زولتنا انفعلت وانداحت!! وجات للحاج!! الزمتو إلا يسلمها كمال ولا ياشر في طلبها الجات بيه من النيابة بالرفض!! الحاج استلم منها الطلب وشرطو قدامها ورماه في السلة!! قال ليها امشي لرئيس الجمهورية قولي ليه الحاج قطع طلبي!! فعلت صوتها وضربت فايلها في التربيزة!!؟ والحاج قام عليها!! نادى! اقرب عسكري وقال ليه دخلها تونس كمال!!؟ والزولة اتكبكبت!!؟ انا محامية!! انا عندي حصانة!! راجع المادة ٤٨ من قانون المحاماة!! العسكري جاريها وهي تقابض وتفرفر!!! وندمت لليوم الجات فيه القسم المقرف ده!!؟ اتصلت علي استاذها وهي بتبكي!! اول م عرف صوتها!! بس الرقم مسجل عندو!! قال منو معاي؟! قالت ليه انا شهلاء الاعين
قال ليها منو؟! اتنهفت وقالت ليه انفال انفال معاك انا حرسوني!!؟ انفعل وكيف يعني وده منو الحيوان الدخلك الحراسة ده!! وقال ليها مسافة السكة واكون معاك!!؟
الحاج قال ليهم خلوها تقعد عشرة دقائق كده وطلعوها!! وفضل براجع في قضيتو!! لم مشو يطلعوها حلفت م بتطلع الا يجي تقيب المحامين ويشوف المهزلة دي!! كيف محامي وعندو حصانة يتحرس!!
الحاج قال خلوها بطلع براها!! جا عليه عسكري!! وقال ليه تصرفنا ده خطأ وحيسبب لينا مشاكل!! الحاج ابتسم!! قال وينها المشاكل!! خطاب احتجاج من النقابة ووقفة احتجاجية من المحامين!! وجوطة في القروبات القانونية!! واعتذار من السيد مدير الشرطة والموضوع انتهى!! وين المشكلة؟! تلعسكري ابتسم!! الحاج اتصل علي نازك وطلب منها تجي علي القسم!! وشوية كده ودخلو مجموعة من المحامين!! عاملين شوشرة وجوطة وفي منهم شايلين لافات امام القسم كلنا انفال حسين
وطلعت بزفة مهيبة من القسم!! وكل المحامين بتوعدو الحاج انه الموضوع ما حيعدي علي خير!! بس منو بقدر يهدد الحاج!! مهنة م عندو عشان يفصلو منها!!! صنع لنفسو اسم وبقي عايش عليه!!؟
واتزكر كمال؟! جابوه ليه في المكتب!! الجوطة دي كلها بسببك!؟ اها ما اتزكرت ليك حاجة!! كمال رفض يتكلم!! الحاج طلع ليه صورة قمر الدولة! وقال ليه ده منو!! كمال بدهشة قال ده نصرالدين!! خلاص قبضتوه!! الحاج عاين لكمال بإستنكار!! وقال منو القال ليك نحنا شاكين فيه؟! كمال سكت!! الحاج قال ليه انت عارف حاجة ومخبي علينا!!!؟
كمال قال لم اتشاكلت مع المرحومة وضربتها كف؟! قالت لي نصر الدين حيقتلني انت لازم تساعدني!! الحاج قلع نظارتو وقال لكمال!! كلامك ده لشنو م قلتو المره الفاتت!! المره الاولى انا كذبت!! والمره التانية ما جات مناسبة ونسيت الموضوع!! الحاج انفعل وقال كيف ما جات مناسبة!! كنت بلعب معاك انا ولا بستجوبك!! ونادى العسكري يدخلو الحراسة ويمنع منو الزيارة كمان!!
وفي اثناء ما هو متنرفز جات داخلة نازك!! شافتو ما علي بعضو؟!
خافت اكتر!! سلمت وقال ليها اقعدي؟؟
قعدت وفضلو ساكتين لاكتر من خمسة دقائق!! الحاج مرق ليها صورتين!! وقال منو نصر الدين في ديل!! وبعد تردد اختارت قمر الدولة!! قال ليها ما حصل سمعني المرحومة جابت سيرة قمر الدولة ولا شفيهو!!؟ قالت وهي بتمتم من شدة الخوف!!!ولاء **** يرحمها قالت لنصر الدين خلي تلفونك وحاحتك يحي يشيلها قمر الدولة!! بس ما حصل شفتو!!
الحاج قال ليها تلفونو وشنو؟!
قالت حاجتو!! الحاج قال ليها والهي شنو؟! قالت م عارفة بس سمعتها قالت كده!! الحاج شاف الكذب في عيون نازك!! بس حتستفيد شنو من كذبها!! وعايزه تحمي نفسها ولا زول تاني؟! الحاج ناقشها كم مره لم لقاها متعنتة وم عايزة تتجاوب معاه شكرها!! وطلب منها الانصراف!!
اتصل عليه مدير الشرطة!! انفعل وعنف الحاج علي تعاملو الغير اخلاقي مع المحامية!! وقال ليه كده اشنت سمعتنا نحن!! وم ممكن نعتذر نيابة عن زول اصلا م فرد من قواتنا!! الحاج قال ليه خلي الموضوع علي وقفل في وش المدير!! وهو بلملم في اوراقو راجع البيت!! جا داخل جنابو احمد مبسوط!! الحاج م سألو!! براه قال للحاج كنت متأكد من انك م حتسالني عن سبب سعادتي ياعدو النجاح!! الحاج ابتسم!! احمد جدع الملف من يدو وقال للحاج كنت بستجوب في بكري حارس الداخلية واتخيل كدي طلع القاتل منو؟!
نواصل بعدين
يتبع ………
الجزء الثاني عشر من رواية القاتل المختل
الحاج خلف رجل فوق رجل وقال اهاااا قول؟! بكل برود!! احمد ابتسم وقال ولت ايام الحاج!! الحاج ابتسم! جنابو احمد قال ليه مشيت داهمت بكري في الداخلية!! الحاج قال اها قول!! احمد دخل قلمو في جيب الكتف حق الكاكي وبقى يمسح علي شنباتو؟! الحاج قال سي سيد الجواك لسسسه م ارضى غرورو!! احمد ضحك وقال انا مركب مكنة اني الثعلب خليني اعيش اللحظة!! الحاج زهج وجا قايم!! احمد قال بعتذر بعتذر و****!! القاتل كمال بمساعدة نازك!! الحاج قعد بتأني!! وقال ليه كيف؟! احمد شال الورق من التربيزه وتلى علي الحاج اقوال بكري!! الحاج قال معقولة!! احمد قال ولا انا كنت مصدق؟! الحاج قبل م يطلب من احمد يجيب كمال!! قام ونادى علي عسكري يجيبو ليهم!! الحاج ابتسم!! احمد قال ليه اشطر منك موووش!! الحاج حكى راسو وقام وقف جنب الشباك وكان بعاين لاية قرأنية مكتوبة في الحيطة!! وفجأة جو داخليه بكمال!! قعد!! جنابو احمد قال ليه مبروك!! حتطلع من هنا!! كمال فرح وملامحو بقت ما بتتوصف!! قال ليهم اكتشفتو القاتل!! احمد قال انت شاكي في زول معين!! كمال قال ما عندي زول معين!!؟ الحاج قال ليه بعد وديت حسين المناسبة!! رجعت تاني الداخلية لشنو؟! كمال اتخلع!! وقال بإستنكار!! متين رجعت!! جنابو احمد قال ليه لم شافك الحارس واقف بتتكلم مع نازك في وقت الجريمة!!
كمال قام علي حيلو!!؟
الحاج قال ليه اقعد!! احمد قال ليه حتطلع من الحراسة علي حبل المشنقة!! بس ورينا سبب قتلك ليها شنو؟! كمال قال وينها نازك!!؟ احمد قال ليه خايف عليها!! قال لا بس عايزها تعترف علي عشان ما تدخل في التفاهة دي بدون ذنب!!
احمد قال ليه تافه انت؟! وانت مركب معاك حسين كنت بتخدعو عشان يحس بأنو علاقتك كويسة مع ولاء عشان لم تتقبض م يشهد ضدك؟! والحارس شافك واقف مع نازك!! وسلمتك حاجة ولم سأل نازك عنك قالت ليه ولد توصيل!! بس طلع ملخبط الطلبية!! والوقت داك كان قرابة الساعة الساعة تسعة إلا!! يعني انت رجعت الداخلية تاني!!؟
كمال بإنفعال قال اااي رجعت!! ولو كان لاقيتها كان قتلتها بالجد!! بس ابت تجيني!! الحاج قال ليه اتصلت ليها في اي رقم؟! لانه الحاج اتزكر في سجل المكالمات م اتلقت مكالمة من كمال!! كمال قال لم اتشاكلنا شلت منها التلفون التاني!! الجابو ليها الزول البتتكلم معاه!! احمد عاين للحاج وقال والتلفون المفقود طلع مع كمال!!
كمال قال لا! اسسسه م معاي؟ بعداك اتصلت وكنت بتكلم معاها عادي!! لانو حسين الخفير سمعها لم صرخت وكشف علينا بالبطارية! فقلت اذا ما رجعت ليها حيشك فيني !!
جنابو احمد قاطعو!! وقال ليه عرفت كيف حيقتلوها في نفس اليوم وحيشكو فيك؟!
قال ما كنت عارف!! بس اذا عرف اني جيت وشاكلتها تاني ما بخليني ادخل العمارة!!
الحاج قال ليه وانت شنو عايز تخش العمارة!! بما انك شاكلتها وتركتها علي حسب اقوالك السابقة!!؟
قال و**** ما بقدر اخلي ولاء!! بزعل منها وبتخاصمني!! بس مستحيل نسيب بعض!! الحاج لبس نظارتو وبقى يعاين لكمال!! احمد قال ليه كلم جنابو الحاج لم الحارس شافك مع نازك كنت بتعمل في شنو؟! قال! بعد وصلت حسين جات داخلة مكالمة في تلفون! في الاول افتكرتو ده تلفون الغفير!! بس كاتبة عليه العبيط وفي صورة جهاز الاتصال شفت صوره زول ما واضحة كويس ولا إضاءة التلفون بطيئة م عارف!! رديت بغضب ونبزتو وما خليت ليه جنبه ينوم عليها!! وقلت ليه انت لو راجل تعال واجهني في الحته الفلانية!! وريتو اسمي ومحل شغلي!! بس ما كان برد علي!!
بعداك قفل وانا رجعت بإنفعال للداخلية وكان حارس الداخلية مناوب لحسين لانه داك في المناسبة!! انصلت عليها ابت ترد!! اتصلت لنازك في الاول ما ردت بس لم كترت اتصالاتي!! ردت وقالت لي انا بكره ممتحنة وبقرا من تلفوني!! م تتصل علي ياود الناس!! وسكت!! احمد والحاج بصوت واحد قالو ليه وتاني!! احمد ابتسم! بس الحاج كان مركز مع كمال؟!
الاخير ده اتنفس بصعوبة!! وقال كلمتها بأني عايز ارجع ليها تلفونها!! اول رفضت بس عشان ترتاح مني جات وقالت لي ندمانة انا الساعدتك!!!؟ واول الحارس شافها ومنعها تطلع!! قالت ليه اتصلت على مطعم وجاياني طلبية!! قال ليها بعد بتاع التوصيل يجي انا بستلمها!! بس خلي قروشك!! وفي اثناء ماهي بتتحاجج مع الحارس بكري!؟ انا وصلت!! ونبزتني بصوت واطي وخطفت التلفون من يدي ومشت!!! مسرعة!! لم بكري شافها راجعة فاضية قالت ليه جاب الطلبية غلط دي م تابعة لي!! واداها باقي سندوتش كان معاه!! وقال ليها اتصبري بي ده!!؟ الحاج قال ليه وانت عرفت التفاصيل دي من وين؟! وانت ما كنت حاضر!! كمال قال بعد لاقيت نازك بعد الحادثة وعزنا بعض حكت لي!!؟ وانا رجعت بيتنا!! وما عارف انه ولاء مختفية إلا لم اتصلت علي نازل اليوم التاني بتسألني عنها!!
احمد نادى العسكري وقال ليه رجعو الحراسة وجهز اوراق ترحيلو حيترحل علي كوبر!! كمال كان محبط شديد!! وما اعترض حتى!!؟ وطلع مع العسكري منقاد وبدون مقاومة!! جنابو احمد قال للحاج اها ما سبقت الثعلب!!؟
الحاج ضحك وقال جهدك مقدر يا ابني!! بس كمال عندي احساس انه ما قتل!!بس ده ما يعني انه ليه دور في الحصل!! لانه من اول تحقيق بادر بالكذب وتلفيق القصص! احمد قاطعو وقال يمكن اسسسسه يكون بكذب!! الحاج قال وارد برضو!؟
بس العقربه الاسمها نازك دي طلع ليها امر قبض!!
كذابة اكتر من كمال!
م قالت انه كمال رجع تاني الداخلية!!
وما قالت انه تلفون المرحومة التاني كان عندها!
وحاولت تتوهنا لم زكرت انه الكيس الاتلقت فيه بقايا الجثة كان مع بكري الحارث!! في حين انو بكري رجعو ليها علي حسب اقوال كمال!!
البنت دي وراها سر!! ولو ما عملنا ليها امر قبض ما بتعترف!! اخلعوها ببوكس مليان عساكر عشان ترتعب!!؟ احمد قال انا متأكد أنه حسام ليه دور!؟
الحاج ابتسم وقال ان شاءالله ياااخ عشان نتخلص منك سريييع!! جنابو احمد ضحك وطلع يتصل علي وكيل النيابة الاعلى!! يبلغو بأخر المستجدات ويوصي بإصدار امر قبض في مواجهة نازك!! وفعلا ده الحصل؟!
____________________________________
الحاج اتصل علي ناجي قال ليه عايز الاقيك!! ناجي قال مسافة السكة واكون معاك!! وفي خلال ربع ساعة جاهو في القسم!! سلم على الحاج وقال ليه خير عايزني في شنو؟ الحاج سألو عن صحة روان و ناجي طمنو عليها وقال ماشة تتعافى!!قال ليه عايزك تجيب لي تلفون روان في اسرع مايكون!!
ناجي قال ليه خير في شنو؟ الحاج قال ليه لاغراض التحري ما اكتر!! ناجي قال خلاص كويس!! وضحك قال للحاج قايلاك عايز مصاريف!! ورفع شنطة في طاولة الحاج! وقال ليه جبت ليك معاي جزء من المبلغ!! الحاج عقد حاجبية وقال كم؟! ناجي بتردد قال تلاتة مليون!! الحاج ابتسم!! وقال خليها معاك بشيلها بعد القضية تخلص!! ناجي حلف طلاق ما يطلع سااي!! قال للحاج ده تعبك!! الحاج قال ليه م بقدر اطلع بمبلغ زي ده بجيب لي الحرامية!! وانا راجل كبير وساكن براي!! ناجي ضحك وقال للحاج عز الشباب و****!! الحاج صر عيونو وقال ما تحلف!! ناجي اتحرج شكلو بالغ في المجاملة!! وقال للحاج خلاص برسل ليك بنكك!! الحساب ما بحول اكتر من اتنين مليون في اليوم! ح ارسلها ليك اسسسه!! فعلا طلع تلفونو ورسل قال للحاج جاك اشعار؟! الحاج قال ليه تطبيقي قافل م بنزل لي بس شكرا ليك بتكون وصلت!! ناجي قال ليه دقيقة!! ورسل الاشعار للحاج في الواتساب!!؟
الحاج قال ليه ايوا جاا!! شكرو وطلع!! ماشي يجيب تلفون روان!!
جا داخل جنابو احمد وشاغل الحاج!! بس شكلو كدايسو قايمة عليه وطنش احمد!! الاخير قال ليه طلعنا امر القبض واتحركت قووة للتنفيذ!! الحاج قال عظيم!! الحاج شال حاجاتو وجا طالع!! جنابو احمد قال علي وين؟! الحاج عاين ليه بقر عينو!! وقال السماء!! تجي معاي!!؟
خلا احمد بيضحك وبضرب يد بيد؟! الحاج ولع ليه سيجارة وشرب ليه كباية شاي!! وطلع علي الداخلية!! لقى حسين قااعد جنب الباب!! سلم عليه سعادتك سعادتك!! وتملق شديد!! الحاج قال ليه ما ح اكتر معاك الكلام لملم عفشك وارحل من هنا!! الخفير اتخلع!! وقال عملت شنو انا ياجنابو؟! الحاج قال الما بخاف علي عروض والناس ينخاف منو؟! قد ما تكون القاتل ولا عارف هو منو!!؟ بس انت كنت مساهم بطريقة غير مباشرة!! وعشان قرشين تلاتة ممكن تبع بنت من الداخلية!! حسين اتخلع!! الحاج قال ليه ما عايز اعمل ليك شوشرة في القسم!! بس انت ما شخص يؤتمن علي بنات الناس!! والمرة الجاية ممكن تدخل ليهم جماعة اولاد!! حسين بقى يبرر ويعتذر وانه بعرف ولاء وكمال عشان كده وافق يخليه يطلع!! الحاج مشى خلاه بيتكلم!! وهو طالع علي الداخلية قال ليه بكره ما اجي القاك هنا!!؟ لم وصل الطابق الاول لقى بكري عندو غرفة صغييرة زي الكاونتر قاعد فيها!! حتى استغرب من المهندس الصممها!! وضحك قال بكون شارب ليه حاجة!! لم وصلو جا طالع عليه وقال للحاج اتفضل؟! الحاج ابتسم وقال ليه اتفضل علي القفص ده!!!؟ ضحكو وطلعو السطوح!! ولسسسه بحر الدم جافي ف الارض!! قال للحاج تشرب شنو؟! الحاج قال ليه ح اشرب من دمك!! خلا الحارس بيضحك وبحك في راسو!! والحاج ابتسامة ساي م ابتسمها!! فحارس الداخلية اتوتر!!
الحاج قال ليه قريت اقولك!! وكانت منطقية!! بس في حاجة انت م زكرتها!! بكرى عقد حاجبية وقال شنو؟! الحاج قال ليه انت قلت استلمت الحراسة بدل حسين!! وقلت انه جا واحد لنازك واتكلم معاها زي دقيقتين ومشى!! بكري قال ده الحصل!! الحاج قال طيب انت كنت وين لم الجاني طلع وارتكب جريمتو!! وانت كنت حارس العمارة وما اتحركت لحدي ما جاك حسين!؟ بكري اتوتر وقال للحاج انت شاكي فيني؟! الحاج قال ليه وممكن اشك ف نفسي كمان!! كمال قال انا ما اتحركت نهائي!! الحاج قال يعني القاتل جا بطيارة ونزل علي العمارة!! وجا قايم… بكري قال ليه و**** م بكذب!! الحاج قال كلو حنعرفو لقدام!! وبقى يتمشى في السطوح!! بكري قال ليه انا طلعت مره واحدة!! واذا تفسيرك صاااح وفي زول دخل العمارة بكون في الفتره دي!! الحاج ابتسم وقال يلا مشيت وين؟! بكري بقى يتمتم وقال لبه جيت شفت ولاء!! الحاج جا عليه مهرول وقال شنو؟! بكري قال لم طلعت اول مره ولقيتها بتبكي!! قلبي م اطمئن!! ولم ادتني الساندوتش ونزلت! م قدرت اكلو!! وحسيت كأنها عايزة ترشيني ولا شنو ما عارف!! ووالله في سني م ختيتو واديتو لصحبتها نازك لم نزلت للطلبية وما جاتها!! قلت خلاص طلع من قسمتها!! واتزكرت ولاء طلعت لقيتها في مكانها وماسكة تلفونها وسرحانة بعيد!! لم شافتني اتخلعت!! وقربت تصرخ!! بتزكر صحكت وقلت ليها الوقت اتأخر مادام بتخافي ادخلي الداخلية واقري جوه!! قالت لي شوية كده ونازلة!! ونزلت تحت خليتها بتلملم في حاجاتها!! الحاج قال ليه شفتها لم نزلت!! بكري قال لا!! الحاج قال ليه طيب متزكر شكل الكيس الاديتو لنازك!! قال ايوا من المطعم الفلاني!! الحاج قال ليه يعني كان شفتو بتعرفو!!! بكري اكد ليه انه بعرفو!! الحاج فتح تلفونو وجاب الصور وعرضها علي بكري لحدي م بكري وقفو وقال ده الكيس!! ياهو زاتو!! الحاج قال متاكد!! حلف ليه انه متأكد!! الحاج شكرو وطلع!!؟ وهو راكب في عربيتو وقبل ما يتحرك!! قال نازك عملت شنو بالكيس!! ادتو لمنو؟!! ولا القاتل اتحصل عليه كيف وهو معاها!!؟ وقبل ما يطلع من ملف الصور شاف الاشعار الاخضر وقال ده شنو كمان!! نسى انه ناجي رسلو ليه في الواتس!! بس كانت الصدمة لم لقاه تم تحويل مبلغ واحد مليون من حسابك الي حساب نازك اسماعيل سليمان بتاريخ كذا!!! الحاج لمن ختى يدو في راسو!!!!!!
نواصل بعدين
يتبع …….
الجزء الثالث عشر من رواية القاتل المختل
الحاج صعق من الشوفة الشافها!! ركز مع تاريخ الاشعار لقاه من يوم ١٢/٢ !! يعني قبل الجريمة بيومين!! طلع من الصور!! ودخل على الواتساب!! شاف دردشة ناجي لقاه مرسل صورة وملغي إرسالها!! بس الحاج عندو خاصية منع الحزف! ظهرت عليه علامة حزف الرسالة من المرسل! بس الصورة موجوده!! والصورة التانية تحوليل من ناجي للحاج!! وفي اثناء ما الحاج بعاين للاشعار وبفكر!! اتصل ناجي ملهوف!! الوووو كيفك!! جبت تلفون روان!! اها في جديد!! كان مرتبك شديد!! الحاج قال ليه جيبو لي في القسم!! وقبل ما يقفل!! ناجي قال للحاج شفت الاشعار!! الحاج ابتسم وقال ليه اي شفتو شكراً ليك!! ناجي قلبو اطمئن لانه مفتكر انه الحاج ما شاف اشعار تحويلو لنازك الاتحول غلط!!؟
الحاج اتصل علي جنابو احمد!! وسألو اذا كان في القسم!! احمد قال ليه بره بس راجع!! الحاج قال ليه اسرع!! كلمة اسرع دي خلت احمد يطلع من الإجتماع مستعجل!! وفي راسو الف سؤال!!؟
وصلو في وقت واحد!! واتلاقو جنب بوابة القسم!! احمد قال للحاج اها شكلك عرفت القاتل!! الحاج م رده لحدي م دخلو المكتب حق احمد!! الحاج قال ليه ناجي في تحرياتكم معاه قال شنو؟! احمد بإستنكار!! قال ما اتحرينا معاه!! خال الضحية وما ليه اي علاقه بالموضوع!؟ وما تنسى هو الكلفك بالتحقيق!!! الحاج قال ليه اسسسسسه حتغير رايك!! ووراهو الأشعار!! احمد قال ده تحويل مبلغ عادي؟! الحاج ابتسم وقال شوف من منو ولمنو؟! احمد ركز في الاشعار!! وقال من ناجي ل نازك!! نازك دي ما تكون زولتنا!! الحاج قال بشحمها ولحمها!!؟ احمد قال يمكن يكون عايز يرسل مصاريف لبت اختو!! وادتو حساب صحبتها!! الحاج ضحك!!قال ليه اقرا الرقم ده كم؟! المبلغ!! احمد ركز!! قال دي م عشرة؟! ومستحيل تكون مية الف!! بس ديل كم صفر!!! الحاج ضحك بشماتة!! وقال ليه ده مليااااار!! ده مليون جنية! انا اقتنعت اي ساقط رياضيات بخش الجيش!!؟ احمد لسه مخلوع من الرقم!! وقال ده حق شنو؟ الحاج!! قال ليه لو كان اتحريتو معاه كان عرفنا ده لشنو؟! احمد قال ليه بزعل!! وانت مالك م اتحريت معاه!! ما زولك واجرك هو!!؟ الحاج اتنرفز وقال اجرني؟! عربية انا!! احمد ابتسم وانسحب خلا الحاج بيغلي!!! جا العسكري وقال سعادتك!! الحاج قاطعو وقال لا سعادتك ولا زفت ما تتكلم معاي!! العسكري اتراجع وقال الطالبة نازك منتظرة بره!! بس خلاص اخليها تمشي لجنابو احمد!! الحاج حمر ليه وقال خليها تخش!!
دخلت وكانت مرعوبة!! لانه جوطة الحاج مع العسكري جاتها بره!! قعدت والحاج كان بحمر ليها!! الحاج قال ليها عمرك كم!؟ قالت ٢٢سنة!! الحاج قال ليها انا لي في المهنة دي ضعف عمرك!! وبحياتي ما شفت بت بوقاحتك!! بقت ترجف!! الحاج قال ليها م حاستجوبك!! ولا بس بسألك اسئلة مباشرة!! وعايز اجابة حقيقية!! المره دي!!؟
قالت ليه بصوت متقطع وانا متين كذبت ياجنابو!! الحاج كان بعاين ليها ورافع حاجبو!! وقال وين تلفون ولاء التاني!! البت زي التقول طقتها كهرباء!! جسمها كلو بيرجف!! قالت تلفون شنو؟! الحاج قال يمينا ب****!! تردي لي بنفس الاجابه دي اسجنك لحدي ما القضية تترحل المحكمة وتتحكمي!! احسن ليك تتعاوني!! واعاد نفس السؤال!! فكرت لدقيقتين في الاجابة وقالت في الداخلية!! الحاج قال في شنو بالضبط!! وصفتو ليه!! الحاج اتصل علي احمد في وقتها وقال ليه في تلفون في الحتة الفلانية في الداخلية رسلو لي مع اي زول!! وبنبه عليهم ماف زول يتصرف فيه اااي تصرف!! ورجع عاين ليها؟! وقال شلتي التلفون من منو؟ ولشنو؟!
قالت ليه التلفون فيه حاجات بتخصني!! الحاج قال ليها زي؟! قالت عندي صور في تلفون!! الحاج قال وضحي اكتر وبطلي تلميحات!! انفجرت في البكاء!! قالت انها كانت علي علاقة بواحد!! وكانو في لعبة ولا تحدي ما معروف!! والبكسب!! سكتت الحاج قال شنو؟! قالت ليه يقبل التاني!!؟ الحاج قال يعني كان فزتي ولا خسرتي حتهيني نفسك!!؟ قالت ليه لا بس اذا خسرت!!؟ اها وده علاقتو شنو بموضوعنا!!! قالت ليه جاية عليك بالكلام!! المهم في واحد خسرني عن قصد!! بس التحدي في الاخر تحدي!! وانا قبلت من اول بالشروط!! وانجبرت اني….الحاج قال ليها م تكملي اها وبعد عملتك دي؟!
قالت الايام مشت عادي وبعد كم شهر وبعد انفصلنا بقى يهددني بالصور ومقطع الفيديو!! ما بعرف الصورنا منو!! بس قال حينشرني في القروبات وحيرسلها لاهلي!! وهنا اتدخلت ولاء وكلمت نصر الدين يساعدنا وما بعرف عمل شنو!! بس وعدنا انه الموضوع انتهى ورسل لولاء المقطع!! بس ما بعرف اتصرف معاهم كيف؟! ومن يومها ما خشو علي!! الحاج قال ليها وده السبب الخلاك تسرقي التلفون!! قالت انا ما سرقت!! الحاج قال قولي السبب وخلصينا!! انا ما عارفه ولاء غلطت معاهم في شنو!! بس كانت زالاهم في شي!! الحاج قلع نظارتو وقال ليها ولاء زالة منو؟! بكت وقالت ولا عرفت عنه حاجة!! وقالت لي نصر الدين طلع غاشيني وما بخلية!! قلت ليها عمل شنو ابت تدخلني في الموضوع وقالت لي ما عايزة اسبب ليك مشاكل!! بس هي كانت بتبتزاه وهو بهددها!! لحدي ما التهديد وصلني!! واتصل علي قال لو ما جبت تلفون ولاء بدون علمها!! حيفضحني!!
الحاج قال ليها وعشان تنقذي نفسك ساعدتي في موت صحبتك!!!
بكت بحرقة وانفعلت وقالت و**** ما لي دخل!! كلمت ولاء بالحصل وعملت فلاش ونسخت من تلفونها بس شنو انا ما عارفة!! الحاج قال ليها والكان بهددك مشى الموضوع عادي كده!!؟
قالت ليه ياريت لو كان كده!! قالت ليه اتفقت مع ولاء وشلت منها التلفون بإرادتها ومشيت وديتو ليه!! قال ليها مشيتي وين؟! قالت جاني جنب الجامعة!! شال التلفون وفات بعد ساعتين وبعد ما خلصت محاضرتي المافهمت ليها حاجة!! اتصل علي وقال التلفون مع بتاع المكتبة الجنب الجامعة!! وفعلا سلموه ليها بعد م اتأكد من هويتها!! ورجعتو لولاء!! هم مفتكريني شلتو منها بالدس!! بس نحنا كنا متفقين!!وما بعرفهم عرفو لعبتنا كيف؟! بس عقابا لي فرضو! لي مليون جنية ولا حيفضحوني!! الحاج قال مليون!! ومنك انتي الطالبة!!؟
قالت اول افتكرتو بخوف فيني!! لانو غنيان وما محتاج لمليون ولا غيرو!! بس شكلو عايز يأدبني!! الحاج قال ليها اها عملتي شنو؟! قالت بعد يومين اشوف منزلين صورتي في الفيس ومغطين وشي وكاتبين جنبو فضيحة بنات الجامعة!! ومحددين يوم عديل لعرضو!!؟ انا اتهرت!! انا قربت انتحر!!
بس لاء قالت لي استعيني بناجي!! الحاج عاين ليها بدهشة!! وقال ناجي خال ولاء؟!
قالت ايوووا بعد انفصلت عن حبيبي الاول ربطت مع ناجي وكانت طلعاتنا عادية!! وكان في صور بأكلني فيها!! وفي صور قاعدين جنب بعض شديد!! فخفت اتفضح عشان كده غشيتو!! وقلت ليه في زول ببتزاني!! واتلاقينا وشاف الرسائل وسمع الريكوردات!! بس ما كان عارف الزول بتكلم عن اي صور!! ومن شدة ما خاف من المجتمع ونظرة الناس ليه رسلها لي القروش في نفس اليوم بس بشرط ان التسليم يتم عن طريق بنك ولا حساب مصرفي عشان لو غدرو بينا يقدر يجيبهم!! والغريبة نصرالدين اداني رقم حساب لم رسلت القروش ظهر لي بإسم قمر الدولة!! وريت ولاء بالحقيقة واني غشيت خالها عشان اتحل من الجماعة ديل!! ما زعلت مني بس قالت لي كان تصارحيهو!! وصدقني حيقيف معاك!! ولو قالو عايزين قروش اكتر!! المهم قالت لي اااي رسليها قمر الدولة ده مساعدو!! بس اوعدك اطلعها منهم ١٠مليار!! وفعلا ما نشرو صوري ومقطع الفيديو!! وقبل ما توفي بوعدها لي ماتت بعد يومين من سداد المبلغ!!؟الحاج قال ليها عايزاني اصدق المسرحية دي!!؟
قالت ليه ده الحصل بالجد!! واذا ما مصدقيني وديني المحكمة اتعاقب!! الحاج قال ليها اذا اذنبتي لازم تتعاقبي!!؟
وقال ليها اهم سؤال!!؟
الكيس الاداك ليه بكري فيه السندوتش!! وديتيهو وين؟! قالت بعد كمال جاب لي تلفونها!! طلعت ليها في السطوح!! ولقيتها متوترة وبتتهز في الكرسي!! اديتها التلفون قالت لي خليه معاك!! انا حاسه بنفسي ما كويسة!! حاولت افهم منها الحصل بس قالت ما عايزة تورط زول معاها!! وقالت لي كده احسن ليك!! اديتها تتعشي لانها فطور ما فاطرة بس رفضت!! انا اكلت وخليت باقي العيشة في كيسها جنبها!! وقلت ليها خلصي الباقي ده!! ودخلت علي الداخلية عشان اراجع للامتحانات!! وتاني ما شفتها!! الا وهي جثة!! الحاج قال ليها وعلاقتك كيف مع ناجي الأن!! قالت ليه من بعد حلينا المشكلة ديك تاني ما اتواصل معاي!! غير اننا عزينا بعض في ولاء!! الحاج قال ليها اخر سؤالين!! لشنو كنتي عايزاني اشك في بكري وقلتي لي نزل بالكيس!! في حين انو اداك ليه بس كذبتي!! وكأنك بتحاولي تتستري علي شيء!! قالت. خفت تشكو فيني!! قال ليها بس عادي عندك انك تتبلي علي زول تاني!! حتى ولو كان بريء!! قالت ليه انانية مني بس ما اكتر!! قال السؤال الاخير!!؟ الفلاش حق ولاء وين؟!
قالت و**** و**** م عارفة!! بس شكلو مع روان!؟
جا داخل عليهم جنابو احمد ومعاه ناجي!!؟ وكان ناجي متفاجيء بشوفة نازك!! الحاج قال لاحمد عندكم حراسة نسوان مووش!!؟ نازك صرخت!! الحاج قال ليها حتشرفينا اليوم لحدي اهلك ما يجيبو ليك ضامن!! ناجي اتخلع وقال ليهم انا بضمنها!! مالها عملت شنو؟! الحاج قال ليه تعد تطلع نفسك اول!!؟ ناجي استغرب وقال للحاج انا؟! انا عملت شنو كمان!!!
الحاج قال لناجي كنت وين يوم وقوع الجريمة!! ناجي ضحك!! وقال للحاج كان غلبتك قول غلبتني بس ما تقعد تخبط في الحيط!!احمد اتدخل وقال ليه اتكلم بأدب!! ناجي قال للحاج انا كلفتك تحقق في القضية عشان تنصف بنت اختي ولا عشان تتهمني!!
ناجي قال كمان اصلو الليلة ما قايل حاجة!! ان شاءالله تعدموني!! ورفض يتعاون نهائي!! ولمن دخلوه الحراسة!! وجابو ليهم ضامنين هو ونازك!!؟
احمد قال للحاج الجماعة ديل وراهم سر خطير!! الحاج قال انا ما صدقت نازك!! بس لازم اعرف ولاء كانت مبتزة الراجل في شنو؟! والفلاش اذا فعلا مع روان معناها الجاني عارفةكده كويس وكل شوية حيحاول يغتالها!!؟ لازم نتصرف ونحسب خطواتنا!!
____________________________________
الحاج سأل احمد عن مقتل نصر الدين!! وقال اذا نصر الدين ميت!! طيب طيب البهدد البنات ديل منو؟! وكمان لشنو نصر الدين يديهم رقم حساب قمر الدولة!! ده بيعني انه القاتل قمر الدولة!! لانو كل الشافو قمر الدولة بقولو عنه نصرالدين؟! معناها كلام ولد المرحوم صحيح!! وقمر الدولة بنتحل شخصية ابوه المغدور!! بس السؤال المحير لشنو يقتل نصرالدين!! واهم سؤال هل الجثة اللقيتوها دي فعلا تابعة لنصر الدين!! احمد قال علي حسب تقرير الطبيب انه الجثة بدت تتحلل بسبب المواد الكيميائية الحارقة الاستخدمها الجاني!! بس من خلال فحص الاسنان تبين انها من بتعود لنصر الدين….بس هل مقتلو ليه علاقة بمقتل ولاء!! ولا الجرىيمتين ما ليهم علاقة مع بعض!! القتل ولاء؟! وهل الجاني واحد ولا اشخاص متعددين؟!
والف سؤال كانو بطرحو نفسهم في ذهن الحاج!!
فقفل دفترو وقال ليهم انا راجع بيتنا بعد تعيدو استجواب ناجي ادوني خبر وطلع!
نواصل بعدين
يتبع ……………
الجزء الرابع عشر من رواية القاتل المختل
جنابو احمد وقف الحاج جنب بوابة القسم!! وقال للحاج انت كويس سعادتك!!؟
الحاج عقد حواجبو وقال لاحمد انصح من الخلفوك!! احمد ضحك وقال الحسنة ما بتنفع فيك نهائي!! المهم امش ارتاح واوعدك ما اخلي لناجي جنبة ينوم عليها!! لحدي ما اعرف علاقتو شنو بالقضية!! الحاج ابتسم!! وقال منتظر منك خبر مفرح!! وساق عربيتو ورجع بيتو!!
احمد دخل مكتبو بحماس وحزم!! وقال لمساعد الشرطة جيب لي ناجي!! الاخير قال ليه ناجي طلع قريب بس ضامنو موجود!!؟ احمد ضرب الطاولة وقال منو القال ليكم تخلوه يطلع؟؟ مشى وين؟!
العسكري قال ما منعناه لانه عندو ضامن سعادتك! وانت ما اديتنا تعليمات بأنو يكون تحت الاقامة الجبرية لحين اكتمال التحريات!!؟
احمد اتافف وقال ليه في خلال عشرة دقائق عايزو يكون قدامي اتصرف!! طلب ليه قهوة وولع سيجارة وبقى مركز مع الكمية المهولة من التحريات؟! وبينو وبين نفسو!! بقول دي احلها كيف!! وياترى القاتل منو؟!
جا داخل عليه نفس العسكري!! قال ليه بنهره!! اها وينو؟! العسكري قال اتصلنا عليه وقال طلع يصلي هنا قريب!! واضاف انه تلفون ولاء جابوه من الداخلية!! وسلمو ليه!! احمد حاول يفتحو بس كان شحنو مخلص!! فصل تلفونو من الشحن وخت تلفون المرحومة!! وفي اللحظة ديك جا داخل ناجي وبرضو شايل معاه تلفون روان!!؟ احمد نهرو وقال منو السمح ليك تطلع!! ناجي ما رده عليه واكتفى بالاعتذار!! احمد قال ليه اقعد!! وطلب من العسكري يجيب ليه ورق ابيض!! وبقو يعاينو لبعض!! ناجي ينزل عيونو ولسسه احمد مركز معاه!!؟ لم العسكري جاب الورق!! احمد قال ليه القضية كل مره ماشة تتعقد لانكم ما صادقين معانا!!؟ والبنتوصل ليه من خلال تحرياتنا!! كان ممكن يختصر علينا الزمن اذا خبرتونا بيه من نفسكم!! ناجي قال طلبتو مني شنو وانا ما نفذتو؟! ما حصل اتصلتو علي وانا رفضت!! بالعكس انا شايل هم اكتر منكم؟
احمد قال هم شنو؟! ناجي بدأ ينفعل!! وقال بنت اختي تتقتل بالطريقة البشعة دي واختي للان ما قادرة تتقبل الحصل!! ونحنا مطبقين يدينا!! ده في حد زاتو ما هم!؟
احمد قال من الاخر!! اعايز استجوبك!! ناجي قال يعني لسسسه شاكين فيني!؟
احمد قال ما بالضرورة نكون شاكين فيك!! ليه ما تحسبها بأنك عايز تساعدنا؟! يمكن معلومة صغيرة تفيدنا وانت ما جايب خبر!! ولا ما منتبه ليها!! ناجي اخد نفس سخن وقال لجنابو احمد ابدأ!! ما عندي مشكلة احاوبك اذا فعلا كلامي بساعد في حل القضية!! احمد قال ليه اخر مره شفت المرحومة متين؟! قال قبل الحادثة بيومين!! كانت في البيت وانا جيت اتغديت معاهم وجبتها الداخلية!! احمد قال ليه كيف كان سلوكها!! وما جابت ليك سيرة عن اي خلاف مع اي زول!! قال ابداً!! كنا مبسوطين وبنضحك!! ولمن وريتها اني عايز اتزوج صحبتها؟! احمد قال ليه نازك!!؟ ناجي استغرب وقال منو القال ليك! وانا نازك ما كلمتها!!؟ جنابو احمد قال ليه عشان كده قلت ليك انت الوحيد الما اتحرينا معاك!! ولسسسه نحنا عارفين اكتر من كده!!؟ ناجي قاطعو وقال معناها جنابو الحاج شاف إشعار بنكك!!؟ احمد قال ليه خلينا في المهم!! بعداك حصل شنو؟! ناجي قال فرحت وقالت لي مبروك بس مرتك بتقتلك!! وضحكت وما كنت عارف انو هي الحتموت!! كانت اكتر من بنت اخت بالنسبة لي!! كانت بتصارحني وبتستشيرني اكتر من ابوها!! ولانو ما عندها اخو اكبر منها!! انا كنت ليها الخال والاخ والصاحب!! واتأثر شديد وعيونو دمعت!!؟
احمد قال ليه **** يصبركم!! بس بما انك قريب ليها ما جابت ليك سيره اي خلاف مع اي زول!!؟ ناجي استغرب واستنكر فكره انها تكون عندها مشكلة مع زول؟! وقال لو اتشاكلت مع بتاع المواصلات بتجي تكلمني!! جنايو احمد قال ليه طيب علاقتها مع صاحباتها كيف؟!
قال ليه قوية شديد!! واحمد قال الاقرب ليها منو؟! قال بدون شك روان!! احمد قال ونازك؟! ناجي قال دي برضو صحبتها وفي نفس الداخلية!! بس روان صديقتها المغربة!! جنابو احمد قال ليه علاقتك مع نازك بدت متين؟! ناجي احرج!! لانو نازك اصغر منو باكتر من١٥ سنه!! قال ليه من فترة!! احمد قال بالتحديد!! قال زي ستة شهور تقريبا!! احمد قال ليه ومستمرين ولا؟! ناجي قال نفس كلام نازك!! قال كان عايز يتقدم ليها بس حصلت مشكلة وبعديها حصلت الوفاة!! فما متواصل معاها كتير!! وسألو عن موضوع القروش!! وبرضو نفس رواية نازك تطابقت مع اقوالو!! احمد سألو اذا شاكي في زول!! قال ما عندو زول معين بس بتمنى انو الجاني يتقبض قريب!!؟ وقال ليه حصل نازك ولا ولاء جابو ليك سيرة فلاش ولا تسجيلات!! قال بإستنكار أبداً؟! تسجيلات شنو؟! احمد قال ليه اناقشك في تحرياتنا كمان!! ناجي اعتذر وقال ليه نحنا لا ناس نيابات ولا محاكم!!! ولا عارفين الاجراءات والقوانين!! ما تأخذونا!! لانو ما دخلنا ليها إلا الحاااار!! احمد استلم منه تلفون روان وقال ليه اتفضل لو احتجنا ليك بنجيبك!!؟ ناجي جا قايم واتجه علي الباب!!! وقبل ما يطلع!! قال ليه ماعارف اذا حأفيدك ولا لا؟! بس قبل فتره ولاء كانت معاي في العربية وقالت الاغاني ما حلوه!! طلعت فلاش ونزلتو في العربية!! واشتغل زي كلام!! طوالي سحبتو وقالت لي دخلت الغلط؟! ده حق روان!! احمد لمن قام علي حيلو!! وقال ليه ده الكلام الانا عايز اسمعو!! الفلاش نوعو شنو؟! ونوع الكلام السمعتو شنو؟! واتزكر ولاء قالت شنو بالحرف لانو كلامك مهم شديد؟!.
ناجي جا راحع وقال ليه و**** انا ما ختيت في الموصوع حاجة؟! بس سوالك عن فلاش وم فلاش اتزكرت المرقف داك!! اما نوع الفلاش ما بعرفو انا ما مسكتو منها بس كان لونو اسود!! جنابو احمد قال ونوع الكلام!! قال برضو ما قدرت افرزو لانو الصوت ما كان عالي!! وهي طلعتو بسرعة لمن بدا!! وبتزكر اغاني زاتو تاني ما شغلنا!! احمد قال يعني ما جابت ليك سيرة عنو ولا عن روان ولا شالتو منها متين؟! قال لا ما حصل!! بس كل القالتَو انه حق روان فيه محاضرات صوتية ولا شنو ما متزكر!! احمد شكرو!! وقال ليه بعد نخلص من تحرياتنا حنتصل عليك تجي تستلم تلفون روان!! وطلع؟!
الرائد احمد! فتح تلفون روان كان بدون رمز!! راجعو حته حته ما لقى اي شي مريب!! حتى الدردشات كانت عادية!! وكلامها مع ولاء وحتى الدردشات المؤرشفة دخل عليها!!؟ ما اتوصل لشي!! لدرجة انه شغل الاغاني قال يمكن يلقى تسجيل صوت ولا اي شي يدعمو!! بس للاسف ما لقى شي!! وحتى الصور عادية!!! واتزكر من خلال كلامو مع الحاج انه روان اعترفت للحاج انها اتعرفت علي نصرالدين في الفيس!! دخل ملهوف علي حسابها ولقى الصفحة فاتحة بس الماسنجر قافلاه برمز!! اداه لخبير برمجيات معاهم فك الشفرة في ثواني!! فتش فتش لحدي ما لقى رساله مريبة من ولاء!! قالت ليها زولك طلع نصاب!! وروان راده ليها ب نصر الدين؟! ومعاه اموشن بتاع خلعة!! قالت ليها بحكي ليك في الجامعة م ينفع ندردش!! روان طلبت منها تتصل عليها بس ولاء رفضت وقالت ما عندها رصيد حتحكي ليها بكره!! والشي الاستوقف جنابو احمد قالت ليها والدليل علي كلامي ما بقدر اجيبو معاي بس بصورو ليك!! لكن الدليل شنو؟! وهل روان شافتو ولا لا؟!
ولم دخل دردشتها مع اسم مستعار بس من خلال الكلام والأسماء عرف انو ده نصر الدين؟! ولا قمر الدولة المنتحل شخصية نصرالدين ما معروف؟! واخر رسأل كان تهديد مباشر!! جيبي حاجتنا وبنرحمك ولا حيحصل فيك نفس الحيحصل في صحبتك!!؟ والوقت داك ولاء ما ماتت!! هل نفذ تهديدو فعلا وقتل ولاء!!! ولا صدف؟
احمد تاني ولع ليه سيجارة!! ورجع التلفون لباع البرمجيات المعاهم وقال ليه افحصو لي المستندات المفقوده!! ورجع مكتبو شاف تلفون ولاء لقاه شحن نص البطارية!! فصلو وفتحو بس كان مقفول بنمط!! نزلو برمجة براهو وفتحو!! ولانو التلفون ده عاملاه بالسر ماف زول عارفو غير نصرالدين وقمر الدولة وروان ونازك ويوم الحادثة وقبل وقوعها علم بيه كمال!! واخر مكالمة كانت من الرقم المسجلاه بالغياظ داك!! لم رجع للسجلات الطلعها الحاج!! لقى الارقام مطابقة وما محزوف شي!! ولم اداه للضابط بتاع البرمجيات لقاه مفرمط!! وم فرمطة عادية ممكن يستردو المحتويات تاني!! اشتغلو زول خبير لدرجة انه الضابط ما قدر يسترد الملفات المحزوفة!! واتزكر كلام نازل لم قالت نصرالدين طلب تلفون ولاء بدون علمها!! وشالو لمده ساعتين!!؟ بمده اتاكد انه حزفو الملفات عشان يخفو الادلة البتبتزاهم بيها ولاء!! بس بتبتزاهم بشنو؟! وهل ليهم علاقة بموتها ولا تصارب مواقف!! اتصل علي العقيد الماسك قضية مقتل نصرالدين!! واستفسر عن اخر التطورات!! لأنه المجني عليه ليه علاقة بموت المغدورة ولاء!! الاخير ضحك وقال حتى وهم ميتين معذبننا!! وقال فرح احمد لم قال ليه اكدنا انه القاتل قمر الدولة والان هارب!!؟ احمد قال كيف؟! العقيد قال ليه لانه سحب مبالغ من رصيدو في البنك واستخدم بطاقتو المصرفية في الولاية الفلانية!! وفي مستندات بتعود لنصر الدين مفقودة!! وبعد عمل عملتو دي هرب!!! ومن خلال تحرياتنا اتشاف في كذا حته بعد الجريمة وكان متنكر!! واسسسه بتبحث عنه!! احمد قال بس الدوافع شنو؟! العقيد قال القصد الجنائي ما حنعرفو الا اذا اعترف!! بس الحكاية واضحة كان بستخدم اسم نصرالدين!! وبغش ناس بالأسماء مستعارة ومنهم ضحيتكم!! وشكلها اكتشفت حقيقتو وخلص عليها!!؟ قبل ما تنبه الناس ولا تفضحو!! احمد شكرو وقال ليه ممكن توريني اخر مكان اتشاف فيه عشان نقفل تحقيقاتنا!!
وفعلا العقيد مصطفي وراه!!
احمد قال لو روان ولا الفلاش المعاها لقيناه حنقفل قضيتنا دي خلاص!!؟ واتصل يبلغ الحاج الخبر السعيد الوعدو بيه!! واتصل ملهوف ومن الحاج قال الووووو!! احمد قال ليه عرفت القاتل!! وعرفت مكانو كمان!!؟ الحاج ضحك وقال ليه قمر الدولة عااارف انه هو!! أحمد اتخلع وقال للحاج انت عندك جن برويك تحركاتنا!! الحاج قال ليه انا الثعلب! وقفل في وشو!!؟
احمد بقي يكتب في توصيتو الاخيرة لوكيل النيابة بتوجية الاتهام لقمر الدولة الهارب!! وياداب حس بالاريحية!! وقفل قضيتو ورجع بيتو فرحان!! لانه اثبت لنفسو وللحاج انه جدير بالمكانة وانه ضابط مجتهد!! ومن صباح الرحمن اتصل علي الحاج وقال ليه منتظرك نمشي النيابة مع بعض نرفع تقريرنا!!؟ الحاج قال ليه ده الاختلاف بيناتنا!! انت بتزفع ورق وانا برفع متهم!! احمد ايتغرب من غرطسة الحاج الزائدة!؟ وقال ليه اتراضع شوية ي جنابو ياااخ!!! الحاج ضحك وقال ليه اديني ٧٣ساعة وحسلمك الجاني!!؟
احمد اندهش!! وقال ليه نشوف؟!!
نواصل بعدين
يتبع ……..
الجزء الخامس عشر من رواية القاتل المختل
الحاج كان ماشي برجلينو وبفكر في القضية!! وقال قمر الدولة لشنو قتل نصرالدين!!؟ والكان غاشيهم بأنه اسمو ناصر؟ هل قمر الدولة ولا المرحوم نصر الدين!!! واتزكر انهم كللللهم بقولو لناصر نصر الدين!! روان وكمال ونازك!! بس في اول تحرياتهم ما قالو كده وقالو اسمو ناصر!! وناس الحاج ما عرفو اسم المرحوم الا بعد رجعو لشركة الاتصال وورتهم الشريحة مسجلة بأسم منو؟؟! وبعد تحليلاتو دي استنتج انهم كلهم بعرفو الضحية الأخيرة نصر الدين!!؟ وجاتو افكار عجيبة في انهم ممكن يكونو مشتركين في وفاتو!! وفضل ماشي لحدي م حس بالتعب الذهني والبدني!!؟ ووقف ليه عربية ورجع البيت!! كان بصلي في الظهر!! وجرس الباب ما وقف!! ولمن لخبط في صلاتو!! وسلم وقام متنرفز من الزائر الثقيل!! وفتح الباب بعنف!! لقاه احمد واقف مستغرب!! واتكلمو ف نفس الوقت!! الحاج بقول ليه عايز مني شنو ي غبي!! واحمد بقول مالك ما بتفتح!!قلت يمكن يكون القاتل اتمكن منك؟ الحاج اتأفف وقال ليه عايز شنو؟! جنابو احمد قال عايزك مع موضوع مهم!! اتصلت عليك وتلفونك مقفول؟! الحاج قال خش في الموضوع!! احمد قال وعلي الباب يا سعادتك!!؟ الحاج زح ليه من الباب ودخل!! قال انا حاسي انه نازك مشتركة مع قمر الدوله وهي البتنقل ليه تحركاتنا!!؟ الحاج قال شاكي ولا متأكد؟! احمد قال شبه متأكد!! الحاج قال كيف؟!
احمد قال اصلا انا ما كنت مطمئن لنازك ولاقوالها المتناقضة!! راقبت تلفونها!! ومرسل وراها بتاع مباحث!! جاتها رسالة من رقم مجهول؟ ورجعت فيه اربعة مكالمات بس ماف زول رده عليها!! وما بنقدر نعرف محتوى الرساله شنو؟ الا نفحص التلفون!!؟ الحاج قال ربعدين؟! احمد صلح قعدتو!! وقال عربية صالون سوداء وقفت بشارع الداخلية ونازك مشت عليها!! فانا متاكد انه ده قمر الدولة!! فجيت اكلمك!!!واشوف رايك في الموضوع!!
الحاج قال اكتشاف عظيم!! ومن خلال نازك حنصل للجاني!!؟
احمد قال للحاج ما وريتني عرفت من وين انه القاتل هو قمر الدولة!! الحاج ابتسم وقال ليه اعمل لينا شاي اول!! احمد دخل المطبخ وووصل السخان في الكهرباء!! وفتح التلاجة بكركب في الاكل!! الحاج قال ليه قول جابني الجوع!! ما تتحجج بالقضية!!؟ احمد ضحك!! وقال و**** ابوي ما حصل اهاني بالطريقة دي!! بس سبحان **** برضو بريدك وبحترمك!! وبحس كاني في بيتنا!! الحاج ابتسم بس ما رده عليه!! جا طالع شايل الشاي وماسك ساندوتش في اليد التانية!! قدم للحاج كبايتو وقال ليه احكي لي!! الحاج قال ليه امس ما رجعت البيت طوالي وغشيت روان!! وسالتها عن سر ولاء! بس قالت كل العارفاه انه مزور هويتو!! قال ليها هو منو؟! قالت ناصر!! الهو طلع نصر الدين!! وفي الحقيقة طلع اسمو قمر الدولة!! قال ليها طيب الحاجات الشالتها شنو؟! قالت صورت مستندات لقتها في عربيو ومعاها جواز بيحمل اسم مستعار بس الصورة تابعة لناصر الطلع في الاخر قمر الدولة!! لم سالتها لشنو ما كلمتنا من الاول قالت كانت مفنكره انه الموضوع ماليه علاقة بموت ولاء!! وحتى لو كان ليه علاقة من بعيد ما حبت تتورط معاهم!! عشان ما يحصل فيها نفس الحصل لولاء!!
احمد قال يعني روان طلعت الجوكر!! وداسسسه نفسها!! طيب لشنو اعترفت!! ونحنا اصلا ما كنا عارفين بموضوع التزوير ده!! الحاج قال سألتها نفس السؤال بس انا كنت عارف بموضوع الفلاش!! ومن جبت ليها سيرتو!! عرفت اني عالم بموضوع الفلاش!! وغير كده كانت متاكدة انه القاتل عارف انه الادلة معاها ولا ما كان حاول يغتالها!! احمد قال وووين الفلاش!! الحاج قال في الحفظ والصون!! وبحقق في محتوايتَو بطريقتي الخاصة!! احمد زعل وقال ليه لشنو انا اخر من يعلم في كل شي!!؟ وانا بكل حسن نيه! كل ما اكتشف حاجة بجي جاري اوريك ليها!! الحاج ابتسم وحكى راسو!! وقال انت شاطر ومجتهد!! بس انا كنت شاكي انو القاتل عندو شريك!! وما حبيت اكشف ليك الامر عشان القاتل ياخد احتياطاتو!! ولا يسبقنا بخطوه!!
جنابو احمد انفعل وقال للحاح ما بتثق فيني ولا تكون شاكي فيني!! الحاج ضحك وقال لأحمد اقعد ي ابني!! انت عملت الشاي من ايي موية!! لأنك شكلك لخبطت الكرستالات!! احمد ابتسم وقال بتشرب كمان!! الحاج كحة وقال جيل فهمكم عفن!! بس ناخدكم علي قدر فهمكم!! احمد رحع صر وشو وقال خلينا في موضوعنا!! لشنو تخبي علي!! الحاج قال لاني ما كنت عارف انه نازل هي البتساعد الجاني!! بس كنت متأكد من انه في زول بساعدو!!؟
احمد قال نعتقل نازك يعني!! الحاج قال ليه اسسسه ما شكرناك شنو الغباء المفاحي ده!!؟
اميد لازم تعتقلها!!؟
وقبل ما الرائد احمد يطلع!!؟ قال للحاج دقيقه!!! نازك قالت انه الفلاش غالبا ما يكون مع روان!! يعني عارفة مكانو!! واذا نازك عارفة معناها قمر الدولة عارف؟!
الحاج قال شدد الحراسة علي روان في المستشفى!! وقبل ما يتم كلامو اتصلو عليه العساكر المكلفين بحراسة روان وقالو تم اختطافها من المستشفى!!!
نواصل بعدين
يتبع ………..
الجزء السادس عشر من رواية القاتل المختل
احمد رجع للحاج وملامح وشو ما بتتفسر!! قال كيف الكلام ده؟! وانتو كنتو وين ياحيوانات!! اتخطفت متين!!؟ الحاج هرول علي تلفونو وما انتظر احمد يخلص مكالمتو!! واتصل علي مدير غرفة المراقبة في المستشفى!الكان اتعاون معاه يوم روان اختفت اول مره!! الاخير قال ليه نحنا بنراجع في الكاميرات الأن!! وقفل!! احمد قال للحاج الخائف منو حصل!؟ **** يستر بت الناس!!
الحاج قال ليه شوق نازك وين؟! واتحرك بنفسو اتصل علي بكري يستفسر منو لو نازك في الداخلية؟! الاخير قال ليه الليلة ما برجعو!! نهايه الاسبوع بمشو لاهلهم!! وطوالي اتحرك علي محل سكنها!! لم وصل دقة الباب شديييد!! جاه واحد شكلو كان نايم!! وفتح بأنفعال وقال جاين جاين ياااااخ؟ لم فتح ولقاه ضابط والصقر مزين اكتافو!! اندهش!! وقال خير سعادتك عايز منو؟! احمد عرف عن نفسه وسأل عن نازك!! الفتح الباب قال ليه عندنا مناسبة وطلعو!! بس عايز منها شنو؟! احمد قال المناسبة وين!! الولد انفعل!! وقال جنابو وبنحترمك!! بس شنو بتسأل عن بنتنا الشغلة سااايبة هي!! اولا وريني عايز منها شنو؟ وجاي البيت بخصوص شنو؟! احمد ما كتر معاه واتصل عليها اول جرس لمن قطع!! ما ردت؟ تاني اتصل قفلت فيه الخط وقفلت التلفون!! احمد اتنرفز شديد!! وقال للولد يلا بينا علي مكان المناسبة الموضوع مهم!! وكان بتكلم بإنفعال وغضب!! الولد ركب معاه ووصلو مكان المناسبة!! وبقو يفتشو فيها بس بدون فائدة؟! ماف زول شافها!! لحدي ما في شاب من الجيران قال ليهم موووش البنت اللابسة عباية كبدية ديك!! اهلها قالو ااااي!! قال ليهم وانا جاي من الجامع شايفها كانت بتتكلم مع زول في عربية!! بعداك ركبت معاه!! بس العربية كانت واقفة ما اتحركت!! وانا كملت طريقي وما عارف نزلت منها ولا مشت فيها!!؟ وسألو عن نوع العربية ولا لوحتها!! الشاب قال م انتبه للوحة كويس بس كانت بتبدا بالرقم 8 وكانت صالون لونها اسود!! احمد اتصل كلم الحاج وقال ليه حتى نازك اختفت!! الحاج قال حتقع جريمة تانية!! ولو حصلت حتعقد علينا الأمور!! احمد قال بس منو هو!! كيف بيلعب معانا بالذكاء ده!! انا اشك انه قمر الدولة ما براه معاه ناجي ولا كمال!! الحاج قال يمكن يكون اصابع الاتهام اقرب لناجي من كمال لانه في كوبر!! احمد قال ليه نسيت اوريك!! لطلقو صراحو من اول امس!! الحاج قال ده منو الحيوان الاصدر أمر زي ده!! احمد قال المحامي حقو قدم طعن في النيابة العامة!! وبعد البينة المتعلقة بقمر الدولة ظهرت للكل!! النيابة قبلت الطلب!! واطلقت سراحو لحين اكتمال التحريات!! الحاج قال تصرف غبي بس انا حأتصرف!! وقفل من احمد ومشى النيابة العامة!! في الطريق اتصل عليه المسئول عن مراقبة المستشفى! وقال ليه روان اتخطفت من الغرفة من قبل تلاتة اشخاص لابسين لبس ممرضين!! وطلعو بيها في عربية سوداء دفع رباعي!!؟ الحاج شكرو وقفل!! لم وصل النيابة اتكلم مع مولانا الافرج عن كمال وقال ليه تتحمل تبعات قرارك!! اذا تبين أنه كمال متورط!!؟ الاخير انفعل في الحاج كيف يخاطبو بأسلوب زي ده!! وجوطتو كانت فوق!! لمن المستشارين تدخلو!!! الحاج طلع غضبان!! وما عرف يقبل علي وين؟! واتزكر واحد ممكن يساعدو!! وبعد ركب وقبل ما يتحرك حسام فتح باب العربية وركب!! الحاج عاين ليه بدهشة!! نظام جاي من وين انت؟!
وقال ليه اتحرك ولا خليني اسوق ليك؟! الحاج قال ليه عارف انا ماشي وين؟! ولا بتركب ساي!! حسام قال اي محل!! بس المهم نلقى روان!! الحاج اتنفس بصعوبة وقال انا وعدتها اني احميها!! والثعلب عمرو ما اخلف بوعده!!
واتحرك لم وصل سجن كوبر! مأمور السجن رفض يخلي الحاج يقابل الشخص الهو عايزو!! بس حسام استخدم سلطاتة وطلع السجين الطلبو الحاج!!! لم جا!! قال ليه انت؟! الحاج ابتسم وقال لو ما محتاج ليك ما كان جيتك!!؟ ده مجرم كان قبضو الحاج في تزوير عملة وبسبب مساعدة منو للحاج وقف معاه في المحاكمة وخفف عنه العقوبة!! بس لسسسسسه بكون زعلان لانه دخل السجن بسبب الحاج!! قال ليه عايز شنو؟! الحاج طلع ليه جواز قمرالدولة المضروب وقال ليه ده شغل منو؟! السجين قال ليه ما تتخيل سعيد قدر شنو بشوفتك!! حسام نهرو!! السجين قال للحاج ده متدرب معاك ولا شنو؟! وكأنو بستحقر جنابو حسام!! الحاج هدا حسام وقال ليه لو ما بتقدر تضبط اعصابك خليني معاه واطلع!! حسام رجلو بقت ترجف وهزها بتوتر!! وطلع ليه سفه قدام الحاج!! الحاج قال للسجين طلباتك شنو؟! السجين قال لحسام شوف واتعلم!! و قال عايز يقللو ليه سنين سجنه!! بالإضافة لمتطلبات في السجن من اكل وكيف وقروش كمان!! الحاج وافق؟! الراجل قال ليهم ده شغل نجم الدين حسين!! الحاج قال ليه والقاه وين؟! السجين قال انا طولت هنا بس في زول بيعرف!!؟ وطلب سجين تاني!!؟ وحتى السجين التاني عندو طلبات ووعدوه انهم ينفذو بعض منها!! حتى بعداك وصف ليهم مغر نجم الدين!!؟
طلعو من السجن مستعجلين عشان يصلو المزور!! الممكن يمسكهم رأس خيط من خلاله يصلو للبنات؟!
__________________________________
احمد رسل قوة وداهمو بيت كمال وجابوه القسم!! وقوه تانية اتجهت علي بيت ناجي!! لم جابو كمال قال ليهم في شنو؟! احمد رفع رجلو في الكرسي القصاد كمال وقال ليه وديت نازك وين؟! كمال قال ليهم نازك مالها الحاصل عليها شنو؟! احمد انفعل وقال اياك ترد علي بسؤال!! لشنو اتصلت علي نازك أول أمس وفي نفس اليوم الطلعت فيه من كوبر!! قال ليهم عادي حبيت اطمئن عليها!! وين المشكلة!! وبما انكم عرفتو اني اتصلت!! ارجعو للسجلات وشوفو اتكلمت معاها في شنو؟!
احمد قال ليه يعني انت ما شفتها؟! كمال اول سكت بس تاني قال لا ما لاقيتها!!؟ احمد قال طيب عربيتك لونها شنو؟! قال بيضاء!! احمد قال ليه بس اللقيناها جنب بيتكم كانت سوداء!! نفس الصالون الاتخطفت بيها نازك!!؟ ومن الصدفة العجيبة انه رقم اللوحة يطابق رقم عربيتك!!! كمال قال مستحيل!! ونطط عيونو احمد قال رقم لوحتك كم؟! كمال قال 8664 وقال وهو متوتر وبيرجف وفاقد للتركيز!! انا! انا ما خطفت لا نازك ولا روان!!؟
احمد ضرب الطاولة بقوة وقال ليه عرفت من وين انه روان اتخطفت؟!
كمال بقي يبكي!! وانهار!! وقال في زول عايز يورطني!! احمد قال ليه احسن ليك اعترف والا حتتمنى الموت قبل ما تتحاكم!! وانا بعي كل كلمة قلتها!! وقاصد اي تهديد يخطر علي بالك!! وجدع الكاب من الطاولة وقال ليه وديت البنات وين؟! كمال قال و**** ما عارف الحصل ليهم شنو؟! بس اتصلت اطمئن علي نازك وقالت لي عايزة اللاقيك!؟ اتعذرت ليها بكم عذر بس رفضت!! واصرت انه نتلاقى اليوم!! قلت ليها اجيك في الداخلية رفضت وقالت لي بتكون مراقبة!! لم سألتها لشنو خايفه من الشرطة قالت لي ما خايفة منهم!! بعد نتلاقى حوريك خايفه من منو؟! ولو ما مصدقني امشو شوفو سجل المكالمة من شركة الاتصالات!! احمد قال وبعد داك؟! قال وصفت لي المكان الهي فيه ومشيت زرتها!! ولمن وقفتنا كانت ما ظريفة في الشارع دخلت العربية!! وقالت لي انها في خطر وانها ممكن يصيبها مكروة!! واذا ما سلمتو الفلاش المع روان!! قلت ليها هو منو قالت لي ما وراني اسمو بس شكلو ده القتل ولاء!! شلت منها الرقم وقلت ليها بحاول اساعدك واعرف ده منو عشان كلنا ترتاح!! ومن خلال كلامها حسيت بأنه هي وروان حياتهم في خطر!!؟ وهدا الرقم مسجلو في تلفوني لو ما مصدقني!! احمد قال وحصل شنو بعداك!!؟ كمال قال نزلت من العربية وانا مشيت!! ومن وصلت البيت انتو داهمتوني!!؟
احمد قال ليه عقدتها علي نفسك!!! وصدقني البنات ديل لو ما رجعو بسلامة انت حتروح فيها!!؟ وطلب من العسكري يرميهو في الحراسة!! واتصل يكلم الحاج بأخر التطورات؟! بس الحاج ما رده عليه!!
__________________________________
نازك فتحت ولقت نفسها مقيدة من رجلينها في كرسي!! اتخلعت وبقت تكورك!! والزاد خلعتها شافت روان ممدده قدامها في نقالة حقه مستشفي!!! ومحل الطعنات القديمة بطلع دم!! فزادت في الكواريك!! بتقدر تقوم علي حيلها بس ما بتقدر تحرك رجليها!! واتلفتت يمين شمال ماف حتى اثر باب!!!وما عرفت زاتو دخلو هنا كيف!! وسمعت صوت بتكلم معاها من خلال مكبر صوت؟! وقال ليها قدر ما انجزتي سريع طلعتي سريع!! بقت تصرخ بجنون!! وبتقول انت منو؟!
قال ليها موتك!! بكت وقعدت في الكرسي وقالت اقتلني!!؟ قال ليها ما بالسهولة دي؟! وقال بما انك طالبة مختبرات!! _اكيد درستي انوتومي!!؟ اتخلعت رقلبها بقى يضرب بقوه؟! وقالت عايزني اشرح شنو؟!
سمعت صوت ضحكات وقال ليها الجثة الامامك دي!!؟ وقعت مغمى عليها!! لم فتحت كانت رقبتها واجعاها شديد ولقت نصها في الارض ورجولها معلقة في الكرسي!! وقالت ليه اقتلوني بس مستحيل اقتل صحبتي ولا ااااي زول؟! قال ليها انتي متأكده ما قتلتي زول قبل كده!!؟ بقت تصرخ وبتطلب المساعدة بس من منو؟! وماف زول سامعها غير الشخص أو الاشخاص الحاجزنها ديل!! وقال ليها اكسبي الزمن قدامك ١٥ ثانية!! يا تبدي في تشريح الجثة القدامك دي!! ياتحصليها!! صرخت وقالت قتلتوها!! قتلتو روان؟! وحضنتها وبقت تبكي!! والعداد بدا!! 15’14، 13 وبقت تسمع صوت حفر!!! دنقرت تحتها شايفة اربعة رؤؤس حاده!! وصاعده لمقدمة الكرسي!! وكأنها حتخترق جسم نازك من تحت وما معروف تقيف وين!؟ فزاد هلعها وصريخها!!! وسمعت الصوت بقول ليها شررررحيها!!؟ ومسكت المشرط ويدها بترجف!!!
تواصل بعدين
يتبع ……..
الجزء السابع عشر من رواية القاتل المختل
نازك قامت على حيلها وجسمها كلو بيرجف!! لدرجة انه المشرط وقع منها مرتين!! وعلى قدر خوفها كانت غريزة حب البقاء عندها مسيطرة!! بكت بحرقة وبدت تقطع في تيشيرت روان!!! وخلت صدرها بملابسها الداخلية بسس!! ولمن ختت المشرط في نحرها!! ما قدرت تخترق جسد روان!؟ وتحت الدربكين!! لامست فخذها!! ومن شده الألم حست وكأنه مخترق قلبها ولا عينها!! وثبتت يدها بالتانية وبدت تشق في صدر روان!! وفجأة روان فتحت!!
نازك من الصدمة وقعت مغمى عليها!!؟
___________________________________
احمد بعد حقق مع كمال وكان منفعل شديد!! ولمن وشو برجف!! وبقول نحنا وين؟! في شيكاغو ولا المكسيك!! كيف يخطفو بنتين نهارا جهارا ونحنا قاعدين زي الطراطير!!! وبإنفعال قال للعسكري طير جيب لي ناجي!! لم جابوه!! كفكف اكمام الكاكي!! وشنق شفتو العلوية بسفه! وعيونو بتدفق شرار!! ناجي دخل وقال ليه خير جنايو انت كويس!! الرائد احمد جاط فيه وقال انت بتحقق معاي!! ناجي قال العفو بس عايز اطمن عليك!! احمد لفى بسريع من ورا الطاولة وجا قعد قصاد ناجي وقال ليه بتقربنا صله رحم!! ولا صاحبك انا عشان تطمئن علي!! ناجي اعتذر!!
بالجد جنابو احمد لاول مره ينفعل للدرجة دي!! وممكن عادي يضرب ولا يطلع عن طورو!! وقال لناجي نازك وين؟! ناجي قال نازك دخلي بيها شنو؟! احمد ضرب بتلفونو الطاولة وقال انت اتصلت علي نازك امس من رقم كذا كذا وهددتها!! بس كدي انكر وشوف ح اخليك تعترف كيف؟! ناجي سكت!!؟
احمد ابتسم وقال وما كده وبس!! امس جيتها في الداخلية! بعربية سوداء دفع رباعي!! ورفضت تلاقيك؟؟ ونفس العربية اتخطفت بيها روان اليوم من المستشفى!!! حتعترف ولا اخليك تعترف بطريقتي!! ولمن نفسو قايم!!! ناجي قال هددت نازك ومشيت اشوفها بس و**** عربيتي اتسرقت من صبح اليوم!! وطلع من جيبو بلاغ الفقدان من النيابة!! احمد ضحك وقال ليه يا انت غبي شديد!! يا بتستغباني!! ناجي قال و**** جادي معاك!! عربيتي اتسرقت!!احمد قال ونازك برضو العربية جاتها براها!! والتهديد اترسل ليها براه مووش!!؟ ناجي اتنهد!! وطلع تلفونو ورا احمد صور نازك وهي في الوضع المخل المع حبيبها السابق!! وقال ليه الرسائل دي جاتني امس!! اتصلت عليها بس نكرت وبعداك بقت تبكي!! وقفلت فيني ومشيت اشوفها الصور دي قصتها شنو؟! ولشنو غشتني وقالت كان ببتزوها بصوري وانا معاها!! وما كده وبس؟! حتى المرسل قال لي نازك ليها علاقة بمقتل ولاء!! عشان كده انا اتهورت!! احمد قال وخطفتها!!؟ قال ابدا و****!! الحمد*** انها اختفت براها لو لقيتها كان ممكن اغلط فيها!! احمد قال ليه ما مصدقك!! بس حأخد كلامك بعين الاعتبار!! وشال منو الرقم الاترسلت منو الرسائل لناجي!!! لم بحثوه لقوه بإسم محمد احمد!! وفي اثناء ما بيبحثو عن رأس خيط عنو!! لقوه فاتح بلاغ من يومين بسرقة تلفون هواوي y8 فأحمد اتشوش!! دخل ناجي وكمال الحراسة بس ما قدر يصل لمكان البنتين!!؟ اتصل كلم الحاج!!! الحاج قال ليهم ما طلق سراحهم لحدي ما اجي!! لم وصلو البيت الوصفو ليهم السجين!! حسام اتصل وطلب تعزيزات امنية وفعلا اتحركت تلاتة بكاسي شرطة واتجهو علي المكان الوصفو ليهم حسام!! ودخلو البيت الفي أرقى أحياء الخرطوم!! وفي الاول الحارس رفض يخليهم يدخلو ولدرجة انه النقيب حسام طلع ليه طبنجتو وختاها ليه في راسو حتى داك اتراجع!! الحاج دخل وجنابو حسام قفل الحارس في غرفة المراقبة وشال منو سلاحو وتلفونو!! وهم داخلين كان البيت فاااضي!!! دخلو كل الغرف!! كانت عبارة عن ورق عملة وطابعات عملة!! ومواد كيميائية!! ومنظر عجيب!! كيف الشرطة غافلة عن ده كلووو!!! وفي اثناء ما هم بفتشو لرأس خيط يوصلهم للبنات!! سمعو صوت بكاء خافت!! وبقى يتصنت علي الغرف وبقول للحاج اسمع!! لحدي م الصوت كان اقرب لغرفة!! لم دخلو لقوها فاضية!! بس فيها اثاث مكتبي!!! ورزم قروش!! شكلها مزورة!! وحسام قال ليه ماف شي هنا!! خلينا نشوف الغرفة التانية!! بس الحاج حس كأنو سمع ليه صوت!!! بقى يهبش في الحيطة!! بس بدون جدوة مافي شي!! ولا في باب خفي!! وجو طالعين!! حسام كان متقدم للحاج وماشي بسرعة!! وصوت البوت حقو في الارضية بيعمل صوت غريب!! وكأنه في فراق!! الحاج قال ليه اقيف!! ورفع السجادة لقى زر!! ضغط عليه!!! اتفتح باب زي حق الطائرات!! وفيه سلم حديدي صغير!! والخلعهم اكتر!! صوت صريخ روان!! جنابو حسام اتخلع!! ونزل بسرعة لمن وقع!! والحاج استعصى عليه النزول!! بسبب الحجم!! وكمان درجات السلالم بعيدة!! حسام جرا عليهم ملهوف!! وما مصدق عيونو!! ودم نازك مالي المكان!! القاتل المختل!! اخترق افخاذها بالدربكين!! وكانت فاقدة الوعي!! جنابو حسام رفعها للحاج وبصعوبة قدر يستلمها منو!! وهو شال روان في كتفو!! وهي بتأن من شده الألم!! ودمها كابي في الكاكي حق حسام!!؟
ومن طلعو قوات السجم وصلت!! اتصلو للاسعاف واسعفو البنات وركب معاهم ملازم اول!! وقال ليه ولا ثانية م تفارقهم!! وفضلو هو والحاج مع باقي التيم!! وببحثو عن دليل!! بس كان البيت فاااضي وما فيه إلا الحارس!! ولقو القاتل كان بتواصل معاهم عن بعد!! بواسطة لاسلكي!! يعني ما كان متواجد في نفس البيت!!؟
والنقيب حسام قال للحاج!! القاتل علاقتو شنو بنجم الدين المزور!!؟ ولا يمكن يكون ده قمر الدولة!! الحاج قال ليه الموضوع طلع اكبر مما تصورت!! والقاتل بتصرفو ده استفز الثعلب!! وحيشوف رد الثعلب حيكون كيف؟! وطلع قدام حساام!! ركب عربيتو وطلع على القسم!!! الشرطة حرزت البيت وضبطت كميات مهولة من المبالغ المزورة!! الكانت كفيلة بأنها تهد اقتصاد السودان!!؟
وماف امل انهم يعرفو الشبكة الإجرامية الورا الموضوع الا عن طريق الحارس!!؟
الحاج وصل القسم وجنابو احمد شرح ليه الحصل والاتوصل ليه بعد استجواب ناجي وكمال!!؟ الحاج قال ليه رسلو إرسالية لكل رجال المرور!! يتتبعو العربية الدفع الرباعي السوداء البتحمل رقم اللوحة كذا!!! دي حقه ناجي الادعى انها مسروقة!! لو طلعت فعلا مسروقة معناها حتوصلهم لحاجة!! لانها نفس العربية الاتخطفت بيها روان!!
احمد قال ما تنسى انه نازك اتشاهدت اخر مرة مع كمال!! في عربيتو!! ومن وقتها اتفقدت!! اذا افترضنا انه كمال خطف نازك!! وناجي خطف روان!! الرابط بيناتهم شنو او المصلحة الجامعاهم عشان يجمعو البنات مع بعض!!؟ في حلقة مفقودة!! الحاج شلت الكرسي وقال القاتل بستفز فيني!! احمد قال ليه رووق!! طالما انه بتهور كده اكيد حيكون خلا وراهو دليل!! الحاج قال ولو ما خلى دليل انا ح احصل عليه!! احمد قال ليه متأكد من انك حتعرفو!! وحبى يطمئن الحاج!! لانو شافو منفعل شديد!! وقال ليه انت الثعلب!! والثعلب لم يوعد لابد من يوفي او يغدر!! وبقى يضحك!! الحاج قام على حيلو وقال ليه انا قلت حةاقبضو في خلال ٧٢ساعة بس اذا ما قبضت بكرة على الجاني ما ابقى علي الحاج!! وطلع مهرول خلى جنابو احمد مزهول من ثقة الحاج المفرطة في نفسه!!؟
الحاج ركب عربيتو واتصل علي جنابو حسام يطمئن علي صحة البنات!! الاخير طمئنو وقال ليه كويسين بس نازك فقدت دم كتييير بس عوضوها بكم قزازة!! الحاج!! قال ليه فتحت!! حسام بإستغراب!! قال للحاج ما تقول لي جاي تستجوبهم!! الحاج قال لازم نضرب الحديد وهو حامي!!؟ وقال ليه انا جاي في السكة!! وقفل منو!! واتصل لمعارفو في تسجيلات الأراضي!! يتأكد من البيت الاتلقت فيه المضبوطات!! طلع بإسم منو؟! واتضح انه بإسم الفكي عثمان!! لم اتحرو عنو!! اتضح أنه بائع البيت قبل عام!! بس المشتري الجديد ما نقل الملكية لاسمو!! والمشتري اسمو عوض الكريم ادريس!! واتضح انه شخص متوفي منذ عام ١٩٦٠ بس في شخص منتحل شخصيتو!! وسارق الاسم!!؟
الحاج شال نفسو بصعوبة وقال لابد من انك تتعرف! واليوم قبل بكرة كمان!! ووصل المستشفى!! لقى اكتر من عشرة عساكر حارسين روان ونازك!! دخل عليهم!! وروان كانت تعبانة اكتر من نازك! بس سلم عليهم!! وقال لروان!! الحصل شنو معاك قبيل الصباح!!؟ بكت!! وقالت ما قادرة احكي!! تعبانة شديد سعادتك!! الحاج قال ليها بحزم! لازم تحكي؟! ولا حنفقد شخص تاني!!؟ شالت نفسها بصعوبة!! وقالت ليه كنت نايمة وحسيت بظل زول جنبي!! لم فتحت لقيتو طوالي خت لي منديل في انفي!! وتاني ما وعيت بشي!! لحدي ما شفت نازك ماسكة موس وبتجرح فيني!! الحاج قال ليها يعني ما شفتي شئ ولا لمحتي زول؟! قالت لا!! قال ليها شكرا ليك واخدي راحتك!! قبل على نازك!! كانت سرحانة بعيييد ودمعتها في خدها!! قال ليها ما حطول معاك!! بس بتمنى تتعاوني معاي!! قال ليها الخطفك منو؟! والحصل شنو بالضبط؟!!
نواصل بعدين
يتبع ……….
الجزء الثامن عشر من رواية القاتل المختل
نازك قالت للحاج بصوت خافت!! انا حأموت!! الحاج قرب عليها وقال قلتي شنو؟! جاااشت بالبكاء وقالت بصوت أوضح! حيقتلوني يا جنابو!! خليهم يقتلوني ساااي انا موافقة! بس ما يعذبوني!! الحاج شافها منهارة شديد!! وبدأ يهدي فيها!! وطمئنها أنه موجود وانه العساكر موجودين!! وطلب منها ما تخاف!! ولمن قرررب يتراجع عن استجوابها!! لانه بالجد وضعها صعب وكانت خايفه شديد!! الحاج متردد بين يقوم ولا يسأل!!؟ وهي اختصرت عليه الطريق وقالت ليه!! انا حوريك الحصل من البداية وانت احكم!! الحاج لم لقاها مصرة تحكي الفضول قتلو!! وحب يعرف الحصل!! وقال ليها بلهفة!! احكي لي!! وركزي **** يرضى علي والديك!! لانه اقل حاجة ومهما انت شفتيها هايفة وما بتستحق انها تتزكر ممكن تساعدني!!
نازك اتنهدت بصعوبة وقالت كويس!! قالت للحاج مشكلتي بدت قبل سنة إلا!! تتزكر حكيت ليك عن موضوع الصور والابتزاز الحصل لي!! الحاج قال ايي مالو!! اتنهدت وهي بتبكي!! وقالت الولد الكان بهددني ناصر ساعدني علي اذيتو!! الحاج كان مزهول!! وقال ليها كملي!!؟ قشت دمعتها وقالت لم ولاء اقترحت علي نطلب المساعدة من ناصر الهو طلع قمر الدولة! انا كنت محبطة وناصر كان طوق نجاة بالنسبة لي!! فعلا يوم كان جا وصل ولاء وانا طلعت عليهم!! سلمت! وركبت!! كانو اتنين!! واحد راكب ورا والتاني والاصلا بشوفو بوصل ولاء راكب قدام!! والعربية مضلمة وريحتها باااردة لمن بتدوخ !! الصراحة خفت!! بالرغم من انه ولاء معاي!! الراكب جنبها قال لي ما تخافي!! صحبتك حكت لينا قصتك واوعدك اني احلها ليك!! ولاء اكدت لي كلامو بس ما عرفتني عليهم!! وطلب مني صورة لحبيبي السابق!! انا اديتو!! وبغباء مني رسلت المقطع والصور الكانو ببتزوني بيهم!! نظام متظلمة وعشان يصدقني ويحن علي!! الحاج قاطعها وقال ممكن تختصري شوية؟!
الحاج بطبعو ما بحب حشوه الكلام!! قالت ليه انت قلت عايز التفاصيل!! اتفس بصوت مسموع وقال ليها خلاص كملي!! قالت ليه رسلتهم في تلفونو بالشير!! ونزلت انا ولاء وهم مشووو!! ووعدني يحل الموضوع!! بعد تلاتة يوم اتصل علي ناصر وقال لي تعالي تحت!! انا كنت في الداخلية فوق!! نزلت وابا ينزل من العربيه ولاني ملهوفة وخايفة ركبت وقلت ليه اها الحصل شنو؟! دور العربية! انا اتهجمت!! وحاولت افتح الباب بس م فتح معاي!! بقى يضحك وقال لي ما خاطفك انا!!؟ ارح حوريك حاجة بس!! خفت شديد وقلت ليه لالا ما ماشة انا طلعت بتوب من الداخلية!! وكمان الحارس ما بخليني ارجع الزمن!! بتزكر طلع عارف زمن عدم خروجنا وقال لي من 8م تسعة!! وقال لي ما تخافي قلنا ماشين قريب!! وفعلا ربع ساعة ما تميناها!! وصلت محل شكلو زي النادي الرياضي!! ولا صالون حلاقه ما عارفه!! قال لي ارح ادخلي!! ابيت بس هو ضحك واتقدم قدامي!! انا لم شفت الاولاد بعاينو لي وبتهامسو! تبعتو!! دخلنا وشفت محمود الاكس حقي!! الحاج قال اكس يعني شنو؟! قالت ليه حبيبي السابق!! قال ليها اهااا كملي!! قالت خفت وقلت يمكن يكونو متفقين معاه!! بس ناصر ضربو كف وقال ليه اعتذر منها!!؟ وفعلا محمود اعتذر!! وانا من الخوف جسمي كلو بيرجع ورجولي ما شالتني!! وفي ولدين بقو يضربو فيه!! وانا قمت جارية!! الحاج قال ليها المنطقة دي وين؟! قالت ما عارفه مشيت بالعربيه!! وموش العربات المظللة الجوه بشوف البرا!! يلا عربيتهم دي حتى الجوه ما بشوف!! سواد ساااي!! ركبت وانا خايفه!! جاني ناصر! وقال لي مالك طلعتي!! ده حقك لازم تشيليهو بالقوة ولا حتضيعي في عالم الذئاب البشرية ده!! قلت ليه لسسسه بضربو فيه!! تاني ضحك وقال لي يمكن يكون خلصو عليه!! انا لمن شهقت!! لسسه بضحك على!! وقال لي هزر معاك! ورجعني الداخلية!! انا تلاتة يوم ما نايمة!! والخوفني اكتر سألت من بعيد لبعيد عن محمود!! اصحابو والناس العلاقتي بيهم طبية!! قالو لي انو مختفي!! واحدين يقولو طلع بالسمبك!! وواحدين يقولو مفقود!! وفي الحالتين انا كنت مرعوبة وخفت فعلا يكونو قتلوه!! والشي الاكد لي انهم قتلوه!! قبيل والراجل المجنون البتكلم معاي!! قال لي شرحي روان!! وقال لي دي ما اول مره تقتلي!! حسيت انه بيحكي عن محمود!! بس انا ما قلت محمود و**** ياجنابو بيدي ما هبشتو!! الحاج قال ليها اها وبعداك حصل شنو؟! قشت دموعها واتنهدت بصوت!! وقالت كلمت ولاء واتخلعت!! وقالت لي الجماعة ديل انا شاكة فيهم من اول!! بس شوفي كان ما قبضتهم بالثابتة!! وفعلا قدرت تحصل علي بينات وادلة ضدهم!! ولدرجة انها قدرت تبتزاهم بيها!! ولم ما قدرو بتحصلو منها على شي!! ابتزوني انا عشان اجيب الفلاش والتلفون!! الحاج قال دقيقة!! عرفو موضوع الفلاش من وين؟! وكان اتفاقك معاهم علي تسليمو تلفون ولاء بس!! بكت وقالت انا كلمتهم!! انه الفلاش مع روان!! الحاج قال عشان كده اتخلصو من ولاء!! لانها ما حتفيدو في شي وبقت مصدر ازعاج ليه!! واتخلص منها!! بكت وقالت ما حيرتاح الا يتخلص مني ومن روان عشان يتستر على نفسه!! الحاج بغضب قال ليها طيب يابنتي لشنو ماكنتي صريحة معاي من الاول!! كان قبضناه ونهينا القصة دي!!! بدهشة قالت ليه يعني كده عرفت القاتل!! الحاج سكت!!!
وشوية كده وقال ليها اديني رقم وعنوان محمود!!! قالت ليه رحلو من بيتهم داك!! بس تلفونو معاي!! بس صدقني ليه قريب سنة مختفي ولا ميت ما عارفه! وبقت تبكي!! وملت الحاج الرقم!! اتصل على جنابو حسام!! قال ليه اتحرى لي عن صاحب الرقم ده واذا الاسم طلع عندو ارقام تانية!! حسام قال ليه بعده سلمني التحقيق!!! الحاج ابتسم بخبث وقال ليه انت من المفترض تشكرني!! بعد مداهمة أمس دي ترقيتك بتكون جات!! حسام ضحك وشكر الحاج!! والاخير كالعادة قبل ما الطرف التاني في المكالمة يخلص كلامو بيقفل فيه!! وعاين لنازك!! قال ليها انتِ كويسة!! هزت راسها بمعني ايووا! الحاج قال ليها يلا نجي للمهم!! امس لم اتصل عليك كمال قلتو شنو؟! والليلة لاقيتيه لشنو؟! وبعداك حصل شنو؟! قالت من يومين بخش علي رقم غريب وهددني!! قال ليها منو؟ قالت قمر الدولة!! الحاج جاط فيها وقال كيف ما بتتصلي تكلمينا!! قالت ما اتكلم معاي!! بخلي الخط فاتح بسمع صوت صريخ!! ولم بقيت ما برد رسل لي صور بنت مقتولة!! وما عرفت اعمل شنو؟! الحاج قال ليها طيب كيف عرفتيهو ده قمر الدولة!!؟ اذا هو فعلا ما اتكلم معاك؟! قالت في واحدة من رسائله التهديدية قال لي يا نيزك!! واتزكرت انه قبل المره ناصر قال لولاء دي ما نازك؟! دي نيزك عديييل وتحرق القلب!! لهزار كده!! بس لم شفت الرسالة اتزكرتو!! الحاج قال ليها كملي!! قالت لم كمال اتصل علي حستو المنقذ!! وقلت ليه عايزة اشوفك ضروري!! خفت املمو في التلفون يكون مراقب!! عشان كده قلت ليه بكره عندنا مناسبة واديتو العنوان!! لم الناس كانو في الصلاة اتصل علي وقال هو في بداية الشارع!! طلعت عليه!! وسلم علي!! بس احرجني وقال لي انا الفيني مكفيني وما ناقص مشاكل!! كفاية علي التهمة اللاصقنها فيني دي!! ما بقدر اساعدك و**** ولا عايز اعرف مشكلتك شنو؟ واعتذر مني! وقال لي الجأي للشرطة؟! وانا كنت محبطة شديد!! نزلت من عربيتو واتجهت على البيت!! في اقل من دقيقه سمعت صوت فرامل قوية ومعاها ضربة بوري!! قربت اقوم جارية قايلة نفسي ماشة في نص الشارع ولا عايزة اقطع زلط بدون ما اتلفت للاتجاه المعاكس!! بس فجأة العربية بقت قصادي وما اشوف الا اتنين عتاولة جارني عليهم!! كوركت بس الشارع فاضي!! دخلوني وانا بقاوم!! وبرفس!! وعضيت فيهم واحد!! وخبطني بوكس في راسي لمن اغمى علي!! وفعلا كان عندها كدمة كبيرة في جبينها!! الحاج قال ليها وبعداك!! قالت لم فتحت لقيت نفسي في الغرفة ديك روان ممددة قدامي!! الحاج قال ليها العربية شكلها كيف؟! قالت عربية سودا كبيرة!! قال ليها دفع رباعي!! قالت اااي!!
الحاج قال ليها متأكدة ما نسيتي شي!! ولا عايزة تعترفي بشي؟! بكت وقالت و**** حكيت ليك كل البعرفو!! الحاج قال ليها يازولة متأكدة تاني ماف شي!!! سكتت شوية!! وقالت زكرني طيب انا ما قادرة افكر في شي!! ولو عندك سؤال قولو يمكن اتزكر الاجابة!!؟
قال ليها وناجي وتهديداتو!! قالت اهاااا!!؟ و**** طلع من بالي!! ناحي انا ما شايلة ليه هم!! صااح بزعل!! بس اصلا انا وهو شبه منقطعين!! يعني تواصلنا شبه معدوم!! وانا كنت علي علاقة بيه بس لسسسه م تطورت لحب!! وغير كده هو متزوج وعندو *****!! الحاج قال ليها ده ما موضوعنا!! اها يعني ما شاكة فيه!!؟ قالت هو المحيرني عرف من وين بقصة الصور!! الوراه منو!! وكان منفعل لاني استغليتو!! بس ما اظن يخطفني ولا يقتلني!! ولو خطفني نقول معليش انا غلطانة!! بس روان ذنبها شنو!؟
فما اظن انه ناجي هو الفاعل!! بس انتو ادرى طبعاً!!؟
الحاج قال ليها اخدي راحتك وانا بشوف اللازم يحصل!! وطلع منهم!!
_________________________________
اتصل عليه حسام اداه تفاصيل الولد ورقم تلفونو وسكن اهلو!! الحاج شكرو وقال ليه نردها ليك في عرسك من روان!! حسام سكت متعجب!! الحاج ضحك وقال ظاهر في عيونك بدون ما تحكي!! جنابو حسام ابتسم وقبل ما يرد كالعادة الحاج قفل الخط!! وقبل ما يخت التلفون في الكرسي الجنبو تاني رنه!! لقاه ده جنابو احمد!! قال ليه ما قدرت استجوب الحارس!! النائب العام رفض وقال دي جريمة بتمس أمن الدولة عندهم ناس مخصصين ليها!! الحاج قال ليه خليه علي انا التافه!! وقفل خلا احمد بيضحك!! اتصل علي رئيس جهاز الأمن والمخابرات الوطني!! وسألو عن القرار ده!! استناداً علي شنو اتخذوه!! الاخير قال للحاج دي مسألة خطيرة ومستحيل نخلي حيثياتها متداولة بين الأفراد العاديين والنظامين!! حتى ولو كانو ضباط الشرطة او جيش!! ولازم نتكتم علي الموضوع ونديه للأفضل يباشر فيه التحقيق!! الحاج قال ليه يعني في أفضل مني!!؟ وقفل الخط في وش رئيس الجهاز!! الأخير اتصل علي الحاج بس زولنا رفض يرد!! حس بالإهانة!! اتأفف وساق عربيتو ومشى علي بيت محمود الاكس حق نازك!!
اتعرف على اهلو وقالو ليه انه مسافر واخبارو مقطوعه! بس بيتصل بعد فترة وبقول لينا انا كويس!! بكده الحاج اتاكد انه حي يرزق!!؟ طيب لشنو قمر الدولة كان بخوف في نازك!! والشي الوحيد اللفت انتباه الحاج الإسم!!؟ الاسم التالت لمحمود نفس الاسم الثاني لنصر الدين!! وسالهم اذانصرالدين ادريس بقربهم!! ابو محمود قال للحاج ود عمي طوالي!! فالحاج اخد ليه ضحكة اول بعداك شكرهم وطلع منهم!! بيمسح في كرشتو!! وبخاطبها!! قال ليها اعفي لي اليومين دي انشغلت عنك!! بس بعزك قرييب!! وركب عربيتو وطلع علي القسم!! لم وصل لقى رجال أمن حارسين مكتبو من بره!! قال للعساكر ديل مالهم!!؟ جاهو طالع احمد منبهر!! وقال للحاج انت عملت شنو؟! الحاج ضحك وقال ليه جايبين لي امر قبض ولا شنو؟! احمد ابتسم وقال ليه خوتك ظااابطة انا عايز اناسبك ان شاء **** تعرس لي كديستك!! لانو يدك واصلة وحتفيدني!! الحاج ابتسم وقال ليه كرهتك عشان كلامك الكتير ده!! انجز ي ابني ديل منو؟! احمد اتقدم للحاج وفتح ليه باب المكتب بحماس!! الحاج ذخل مسرع يشوف الفي داخل منو؟! لقاهو ده الحارس بتاع بيت التزوير!! ابتسم!! واحد من بتوع الأمن قال ليه سعادة السيد فلان بقرأك السلام! وقال ليك الثعلب واحد لا ثاني له!! وأضاف!! نحنا حننتظر بره بعد تخلص استجوابك حسوق معانا المتهم!! الحاج قال على بركة ****!! ودخل وراهو احمد وقفلو عليهم الباب!! وجنابو احمد حيطير من شده الفراح!! ماف رائد على مستوى السودان مسك قضية زي دي!! واتجدع في الحارس!! والحاج بستمع بس ما سأل ولا سؤال واضانو مع اساله جنابو احمد وعيونو مع الحارس!! طلع ما بيعرف قمر الدولة بس بيعرف الزول الوظفو!! وعارف انهم بشتغلو شغل مشبوه بس نوعو شنو طلع ما عارف!! وقال شاف الريس مره واحدة بالصدفة كان عايز يدخل عربيتو جوه البيت!! الحاج طلب ملف التحقيق حق مقتل نصر الدين وفتح ليه كم صورة وقال ليه طلع لي الريس الانت شفتو منو في ديل!! ركز كويس وقال ليه ده!! الحاج ابتسم!! وقال اخر مره شفتو متين!! قال من كم شهر!! بس ما بيجي المقر ده نهائي!! احمد دنقر للحاج وقال ليه عندك ليه سؤال!! الحاج ابتسم وقال ليه انت ما فضل ليك الا تسألو بتحب تسمع لاي فنان!! الاتنين بقو يضحكو!! الحاج ولع ليه سيجارة!!! وقال لجنابو احمد خليهم يجو يسوقوه!! وفعلا رجال الأمن ساقوه وطلعو بيه علي عربية كامري مصفحة ووراها بتاع شرطة بموتر!! احمد قال عززه زي العززه!! الحاج ضحك وقال ليه طيب ان شاء **** تكون بدلو!! احمد صر عيونو الحاج ضحك وطلع!! احمد جنابو احمد قال ليه علي وين؟! الحاج قال انا ابوي ما كان بيسالني السؤال ده!! احمد ضحك وقال ليه عشان كده طلعت….!؟ وسكت!! الحاج اتلفت رمقو مبنظرتو اللئيمة ديك وطلع!!؟ احمد ضحك ودخل مكتبو!! الحاج قال و**** وقعت وم سميت!!؟ طلع علي النيابة العامة وقال عايز صور مكبرة لموقع الجريمة!! راجع الصور بدقة!! وشاف تقرير الطبيب حق التشريح!! وابتسم!! طلع من هناك واتصل علي مدير شركة الاتصال وقال ليه عايزك تحدد لي موقع التلفون ده في خلال ربع ساعة!! قال للحاج كده عصرت علي!! حتى وانا مدير ما كانت عندي صلاحيات زي دي الا بخطاب من جهاز الأمن!! فصدقني حتى لو كنت المدير الحالي ما بقدر افيدك!! الحاج شكرو وقفل!! وقال ماف مفر الا اتصل عليه يعني!! ورجع اتصل لرئيس جهاز الأمن!! الاخير ضحك وقال ليه و**** و**** ما متصل عشان تتشكرني!! اكيد عايزني في خدمة!! الحاج ابتسم! وقال ليه عايز اعرف مرقع جهاز تلفون!! صاحبو قال ليه علاقة بالقضية!! الحاج قال ليه لالا خليل مرتك!! الاخير ضحك وسب الحاج!! اتبادلو الضحكات والدعابات! وقال ليه حيتصل عليك واحد بعد خمس دقايق اديهو الرقم!! وقفل منو!!! وفي أقل من خمس دقائق الرقم اتصل!! شال الرقم من الحاج وفي اثناء المكالمة حدد ليه الموقع!! الحاج شكرو وقال ليه خليك متتبعه لو اتحرك اديني اخبر!! وقفل منو؟! اتصل علي الرائد احمد وقال ليه اذا عايز تدخل التاريخ وتكون اول رائد يترقى كل ثلاثة شهور جهز كتيبة وتعال علي العنوان الفلاني!! جنابو احمد لم بقى يلخبط في الكلام!! القاتل!! لقيتو؟! منو؟ عليك **** منو؟! الحاج بيضحك بس اعاد ليه ذكر العنوان وقفل!!!
الحاج سبقهم علي العنوان!! وكانت عمارة تحت التشطيب!! وواقف جنبها اللاندكروزر الكان ضرب روان جنب الجامعة!! الحاج ابتسم واتصل علي حسام قال ليه تعال انتقم لبت عمك غشان تعحب بيك!! ووصف ليه المكان!! وفضل منتظرهم في العربية!! حسام وصل لانه قريب وصل قبل احمد وجماعتو!! وقال للحاج القاتل منو؟! ما يكون ناجي!! ناجي موووش!! الحاج ضحك وقال ليه ناجي لو كان قاتل ما كان خطف روان بعربيتو!! وهو عارف انه المستشفى فيها كاميرات مراقبة!! ده شخص عايزنا نشك في ناجي!! حسام قال بحماس!! معناها كمال!! الحاج ضحك وقال ليه حتعرف بعد شوية ياااخ!!.
وفجأة ظهرو ناس احمد!! كان منظر مهيب!! يحسسك بعظمة الشرطة!! دفارين عساكر وتلاتة دوريات وكلاب بوليسية!!؟ وكلهم في وقت واحد داهمو المبنى!! واحمد وحسام قايدين التيم!!
وثابت ثابت!!! اعتقلو كم واحد!!! وفي اتنين قامو جارين!!؟ حسام ضرب واحد رصاص!! جابو واقع!! والتاني تلب من بلكونة الطابق الاول!! وقبل ما يقوم من الارض!! لقى مسدس الحاج في دماغو!! وقال ليه حركة واحدة وحفجر دماغك يا نصر الدين؟! احمد وحسام جو متلبين وراهو!! وبصوت واحد نصرالدين المرحوم!!؟ الحاج ضحك!! احمد اداهو شلوت وحسام لبعو بخزنة المسدس!! وطلع الكلباش!! وبقى يعاين للحاج مندهش!! قال ده شنو؟! وانت كنت عارف!!! الحاج ابتسم وقال ليهم ارفعوه اول بنحكي ونحنا في الطريق!! جماعة نصر الدين وعلى راسهم محمود حبيب نازك السابق كانو في دفار!! والقاتل المختل نصر الدين كان في دفع رباعي مصفح وسايقها صابط برتبة مقدم ومشوو بيه علي مقر مجهول!! وجنابو احمد وحسام قالو للحاج كيف زور موتو!! وانت كيف عرفت والميت ده منو طيب؟!
الحاج حكى راسو!! وقال ليهم!! لو ما استفزاني ماكنت ح اعرفو!! بس من الاول كنت عارف انه ما قمر الدولة!! مستحيل يخلي لينا كل الادلة دي ضدو وكل واقعة بتشير لاسمو!! بس ما كنت عارف هو منو بالضبط!! والشوشني اكتر كذب المشتبه فيهم!! كل مره اكتشف كذبة سوا كانت من نازك او كمال ولا ناجي!! احمد بإنفعال قال اختصر ياااخ ورينا عرفتو كيف؟! الحاج ضحك وقال ليهم شفتو جرجرة الكلام بايخة كيف؟! وقال!! اول دليل انهم كانو اتنين وبكذبو علي البنات!! بس لو فعلا كان قمر الدولة بينتحل شخصية نصرالدين ما كان حينتحلها وهو راكب معاه وقدام البنات الا اذا كان متفق معاه!! تاني دليل نازك شافتو راكب ورا مع ولاء!! وعرفت منها لاحقا انه نصر الدين حبيبها!! بس لانه نازك ما بتعرف وينو فيهم نصر الدين افتكروه قمر الدولة!! لانو اصلا قمر الدولة كان مغير ليهم اسمو على اساس انه ناصر!! فصعب عليهم التفرقة بين ناصر ونصر الدين؟! اي نصرالدين وقمر الدولة!! احمد قال انا مافهمت؟! الحاج قال ليه اسكت اصلا انت ماشي بالبركة!! حسام قال بس معقولة عرفتو كده!! الحاج قال انت ابني المفضل؟!! قال ليهم نصر الدين لم عرف اننا وصلنا ليه ومتابعين بيتو!! قتل قمر الدولة وقطعو!! وحرقو عشان ما نتعرف عليه!! احمد قال يعني الطبيب الشرح الجثة كذب!! قال لا ما كذب!! بس نصرالدين ذكي!! هشم رأس قمر الدولة وشال سنونو وغيرهم بسنونو هو!! القام بزراعتهم في وقت سابق!! ولو ملاحظين انه الأسنان كانت مبعثرة حولين الراس وفي داخلو!! وكأنه عذبو اول وقلع اسنانو!! وبعد الفحص تبين للطبيب منها انه فيها الحمض النووي حق نصر الدين!! وكتب في التقرير انه المتوفي نصرالدين!! واللفت انتباهي اكتر لشنو قمر الدولة يمسح اثار الرجلين من الارض بالدم!! وهو اصلا ما اخفى الادلة!! بقت علي اثار الاقدام يعني!! لحدي ما استنتجت انه مقاس قدمو كان مختلف عن حق قمر الدولة عشان كده خفاه عشان نحنا ما نشك!! ويمكن يكون مشترك معاه محمود!! كدي نشوف بعد التحقيق!! حسام مزهول وقال انت عرفت حكاية الأسنان من وين؟! الحاج قال قوة ملاحظة وبالصدفة و**** وبقى يضحك!! قال في بعض الصور اتضح انه قمر الدولة عندو سن مكسورة!! بس الأسنان الاتلقت كانت كاااملة!! اكيد في غلط في الموضوع!! وبعد عرفت انه محمود وداخو نصرالدين عرفت انه القاتل وكنت متأكد من انهم حيكونو مع بعض!! وتخميني طلع في محلو!!احمد قال ليه طيب الجريمة وقعت كيف؟! الحاج قال ليه بعد نحقق معاه حنعرف التفاصيل!! بس علي حسب تحليلي وفي الغالب بكون صاااح!! بكون دخل ورا الحارس بكري لم طلب من ولاء ترجع الداخلية وارتكب جريمتو!! واصلا الكيس حق المطعم كان مع ولاء بعد خلتو نازك!! وشال فيه رأسها!! بس اذا معاه شريك ده حنعرفو بعدين في المحكمة نحنا دورنا انتهى!! جنابو احمد صفق للحاج!! وقال انا بالجد امي داعية لي لاني صادفتك واشتغلت معاك!! سمعت عنك كتير بس صدقني ما اتوقعتك تكون كده!! انا فخور و**** بمعرفتك!! الحاج ضحك وقال ليه بطل طلس!! رجعوني بيتي انا مسافر أمريكا لاحفادي ياااخ!!! شكروه وبقو يتونسو بنصرالدين والشريحة الدخلها فيهم وبيضحكو!!!
واخيرا خلصو السودان من اكبر مزور وقاتل مختل وده واحد من اللاف!! والحاج وجماعتو قاعدين ليهم بالمرصاد…!
النهاية ……………
الجزء الأول من رواية القاتل المختل
الوو روان صباح الخير! معليش متصلة ف زمن م مناسب بس محتاجة ليك؟!
-لالا ولا يهمك ولاء! اصلا انا قمت صليت الصبح وتاني م جاني نوم!! بس طمنيني الحاصل عليك شنو؟!
ولاء بقت تبكي بطريقه بهستريا وقالت ليها انا حأموت!! انا مابقدر انوم م بقدر اكل انا بخاف اغمض عيوني وانا بستحم؟!
-استهدي ب**** مالك ما تخوفيني!! الحاصل شنو؟ انا خليتك كويسة!!
ولاء اتنفست بصوت مسموع وقالت لروان تتزكري الراجل الكان بوصلني الداخلية من شهر تقريبا!! روان خافت؟! وقالت بصوت متقطع مالو!! ولاء بكت تاني وقالت ليها بهددني!! ومحل م امشي بلقاهو ف وشي!! روان زاد خوفها وقالت ليها بخلعة انتي عملتي ليه شنو؟؟
قالت انا بس طلعت ونزلت معاه كم اسبوع ولقيتو ثقيل وم بيعرف يتكلم وفهمو وسخان!! وقال عايز يوديني شقتو وحسيت بيه ناوي علي شر!!
طيب اسمعيني انا ابوي بناديني خليني امشي واجي ونشوف الراجل ده مشكلتَو شنو؟!
قفلت منها ومشت علي ابوها!! وابوها شالكلها لانها بتتكلم بالتلفون ف وقت زي ده!!! وانها ممتحنة بكرة ولازم تقرأ وده م وقت تلفون! وكلام من ده…. وبعد رجعت منه نست ترجع ليها!! وانشغلت مع ماده السايكو!! واليوم عدى سريغ لحدي م اتزكرتها بليل غرابة الساعة ١١م اتصلت عليها!! بس استغربت لانها م ردت عليها!! وابتسمت؟! قالت بتكون زعلانه مني لاني م رجعت ليها!!واستبعدت فكره انها تكون نايمة لانه الامتحان بكره وصعب وقرايتو pdf!! فصمتت التلفون ورجعت لقرايتها وقالت يمكن تتصل وابوها يسمع صوت المكالمة وتاني يحقق معاها!! بس ولاء م رجعت لحدي اليوم التاني روان مشت الجامعة! ولانها جات مع زمن الجلسه م فقدت ولاء!!! بعد خلصت الامتحان طلعت مبسوطة لانه الامتحان جا سااااهل وكل الحاجات الحددتها ليها ولاء جات ف الامتحان!!
طلعت تفتش ليها بين الطلبة!! كانت مشتاقة ليها شدييد وحابة تعتذر منها على موقف امس! وتشكرها علي توقعاتها الدائماً بتصدف!! بس م لقتها!!!وسألت عنها الطلبة بس ماف زول شافها!! لحدي م اتصدمت لم عرفت من واحدة من المراقبات بتعرفهم!!؟ وورتها انه ولاء م جات الامتحان!! ف روان قعدت في الارض من شده الصدمة!! وقالت شنو؟؟ المراقبة اكددت ليها!! وطلعت تلفونها وجسمها بيرجف!!! اتصلت عليها وبعد اربعة محاولات ماف زول برد عليها!!! بقت تبكي!؟ والناس مستغربة! بقولو ليها ف شنو؟؟ بتقول ليهم ولاء حاصل ليها شيء!!
اتصلو علي مشرف الداخلية قال ليهم امس كانت موجودة!!! وسجلت حضورها من ٨ مساء وم طلعت!! بس الصباح م شفتها وما عارفها طلعت متين؟! اتصلو لصحباتها المعاها في الغرفة قالو من الصبح طلعت افتكروها ماشة الجامعة لانها قالت م قارية كويس ومع جوطة بنات الداخلية م قادرة تركز!!! ف روان انهارت وبقت تصرخ!! لمن فقدت الوعي!!! بعد فاقت طلبوها ف الاداره!؟ دخلت لمدير الكلية واستفسر من الدراما الحصلت!!؟ ورتو انها خايفة علي صحبتها وانها امس كانت خايفة ومتوترة!!؟ المدير ب استنكار!! قال ليها خايفة من شنو؟!
سكتت مساااافة وم كلمتو بالكلام القالتَو ليها ولاء!! المدير اعاد السؤال!!؟ بس روان قامت علي حيلها واعتذرت عن انفعالها الحصل وطلعت من مكتب الإدارة؟!؟
اتصلت علي اهل ولاء في النيل الأبيض… واتفاجئو لانها م بترد عليهم وافتكروها دخلت الامتخان وصمتت التلفون والتلفونات بقت تتخابط!! والطلبة وعلي رأسهم روان بفتشو فيها!!؟ واهلها جاين ف الطريق واخوانها بلغو وبقو يفتشو في المستشفيات!!؟ وتلفونها بقي يديهم انه مقفول!! وماف زول من شلتعا قادر يقرأ للماده الحاية!!؟ بالجد كانو مرعوبين عليها!! وروان قربت تكلم الشرطة بموضوع التهديد داك!! وكلمت زميلها!! قال ليها حيجرجروك في الاقسام!! وقلتي ابوك صعب ممكن عادي يمنعك من الجامعة!!؟ فشنو اصبري شوية لحدي م نشوف الموضوع اخرو وين؟! روان بكت واتصلت علي حبيب ولاء وسالتو اذا اتواصلت معاه ولا عرف عنها خبر.؟! بس ماف جديد…!
ولاء مختفية يوم كاااامل واليوم التاني كان الاصعب على الاطلاق!! منزلين صورها في مواقع التواصل ومكرفونات الجوامع وم خلو حته م فتشوها!! لحدي الساعة تسعة مساء الموية حقة العماره الفيها الداخلية حقه ولاء قطعت؟! طلع الغفير اخر طابق عشان يفتح البلف حق السهريج!! شم ريحة م حلوه!! واتجه علي مفتاح اللمبة حقة السطوح!! بس ابت تشتغل شكلها ضااربة!!
ولع فلاش تلفونو ومشي علي الصهريج لقى زول سميين مرمي جنب الصهريج!!!؟
اتخلع وقام جاري بكورك للحارس بتاع الداخلية والناس جمهرت!! وصدف انه ف رجال امن كانو بحققو مع بنات الداخلية بخصوص اختفاء ولاء!! ومع الكواريك الكل طلع فوق!! وكانت الصدمة!!
نواصل بعدين..
يتبع ……….
الجزء الثاني من رواية القاتل المختل
الدنيا قاسية واختباراتها اقسى!! ناس ولا بالغلط م بنفكر اننا ممكن نفقدهم!!! وفي غمضة عين يمشو حتى قبل م يقولو مع السلامة ولا نشبع منهم!! اصلا م بنشبع منهم…بس الدنيا ظالمة شدييييد!
كل الفي البناية اتاسبقو علي السطوح!! الشرطة ابعدتهم بالقوة!! لحدي ما شالو خرطوش موية عادي عملوه حاجز بين الناس والجثة!! وعلى غير العادة في اقل من عشرة دقائق شرطة ولاية الخرطوم كلها كانت مطوقة المكان!!؟
للاسف طلعت دي جثة مقطوعة الرأس!! بس تم التأكيد بعد اخذ الحمض النووي! انها ل ولاء !! وزميلاتها عرفوها من الجلباب اللابساه قبل م نتيجة الفحص تطلع!!! كانت جريمة بشعة بك المقايس!! وهزت المجتمع السوداني!! طالبة جامعية في السنة الثالثة!! م اتجاوزت٢٢سنة!! تتقتل بالطريقة البشعة دي!!؟
اهلها كانو مصدومين و روان اكتر منهم!! لدرجة انها م واصلت امتحاناتها وشالت كل المواد بدائل!!؟ وماف زول عارف القاتل منو ولا سبب القتل شنو؟! بس الافكار الما فارقت روان ولا لحظة كلمات صحبتها الاخيرة!!! ولم غلبها تسكت!؟ كلمت ابوها!! وهي بتبكي…حضنها عليه مسافة!! وقام خلاها!!
اتصل على واحد قريبهم ضابط في الجيش؟! وحكى ليه الحصل!! الاخير قال ليه م تتصرف لحدي م اجي عليكم…! فعلا وفي اقل من ساعة كان معاهم في البيت!! ناقش روان وهي بترجف من شده الخوف!! بعداك قال ليها امشي البسي وارح معاي!!؟ كانت لابسة عباية وطرحة مكرمشة! وكلها دموع ومخاط..! قالت ليه لابسه!! بس حنمشي وين؟! قال ليها م تخافي انا معاك!!! ابوها قال ليه ماشين القسم!! قال ليه لا حنمشي النيابة!! الاب جا طالع معاهم بس النقيب حسام!! رجعو وقال ليه صدقني م حنحتاجك!!! الاب انفعل وقال ليه كيف اخليها تمشي براها!!! جنابو حسام طرف ب احمد والد روان! وقال ليه يا عمي شوفها خايفة كيف؟! مشيتك معاها حتخوفها اكتر!! ويمكن قدامك م تقدر تتكلم!! وصدقني وكيل النيابة يمكن يسألها اي سؤال؟! ونحنا عايزين نضمن مصداقيتها في كل كلمة حتقولها!! خليك مطمئن اخوها معاها!! احمد اتنهد بصعوبة وربت علي ظهر حسام! وقال ليه خير إن شاء ****…وحسام ساق روان!!! وطلع! ركب عربيتو وهي سرحانة بعيييييد وتجدد البكاء كل م تتزكر موقف ليها مع صحبتها!!؟
قال ليها م تخافي ادعي ليها!!! وساعدينا عشان نصل للقاتل!!؟ قالت ليه بس انا م بعرفو!!! شفت العربية بس!!! قال ليها برضو حتدينا رأس خيط ..ولم وصلو النيابة رجولها خدرت وم قدرت تمشي!! مسكها من يدها وقال م تخافي انا معاك!!! قشت دموعها ودخلت!! لقى وكيل النيابة في مرور علي الحراسة!! انتظرو لمدة نصف ساعة!!! وكان بحاول يروقها ويسألها عن دراستها عشان يهدي اعصابها!!؟ لانه شوية كده وكانت حتتشنج؟!؟
لم وكيل النيابة جا فاتح الباب بقوة وماشي يتقدل بالبدلة وصاري وشو!! النقيب حسام سلم عليه!! وكان سلامو بارد!! وسألو خير ان شاءالله عندكم شنو؟! وكان وكيل النيابة برتب ف اوراق قدامو! وبيقرأ ليه في ورقة باليد التانية!! وبعاين للروان بقعر عينو!! حسام قال ليه جاين بخصوص قضية ضحية داخلية الإستقامة!!!؟ وكيل النيابة لمن رمى الورق من يدو!! ووجهه كرسية المتحرك عليهم!! وقال بدهشة! شنو؟! حسام اتنهد وقال ليه صاحبة المغدورة عايزة تدلي بإفادة!!!؟ وكيل النيابة قال لي روان تعالي اقعدي هنا!!! وكانت قاعدة ف الكنبة الجنب الباب!! ناداها تقعد ف الكرسي العلى يمينه!! بصعوبة حتى قدرت تتحرك!! وقعت ف الكرسي كأنه جذبها مغنطيس!!؟ حسام قال ليه روان صاحبه ولاء المغربة ويوم الحادثة!!! مولانا قاطعه وقال ليه!! معليش ي سعادة!! بس خليها تحكي هي!!؟ وسألهم يشربو شنو؟!
طلب قهوة!! وسأل روان قالت م عايزة شي!! شوية كده وجا عسكري داخل ومعاه واحد شايل الضيافة!! شاي لمولانا وجبنة لجنابو حسام وموية لروان!!! مداها ليها بس الكباية كانت بترجف ف يدها وم قدرت تشرب!! مسكها منها حسام…!
مولانا قال ليها م تخافي قولي كل حاجه عارفاها عن الموضوع!! ونوعدك اذا ساعدتينا حنقدر نقبض علي قاتل صحبتك!!! بكت بحرقة وقالت و**** انا م بعرفو بس عايزة اساعد!! ولاء اتخطفت في عز شبابها!! عديم الانسانية قتلها بوحشية!!؟
مولانا قال ليها نبدأ من الاول!!؟ بتعرفي من متين؟! قالت ليه من ثلاثة سنوات!! من سنه اولى جامعه ونحنا مع بعض!! قال ليها علاقتك معاها كيف؟! بكت بحرقة!! قالت ليه كانت اختي التانية!! كانت اكتر من صحبة بالنسبة لي!! كانت البيست فريند لي!! قال ليها اخر مرة شفتيها متين!؟ قالت ليه قبل ثلاثة ايام من اول امتحان!! بعد جدول الامتحانات نزل اتلاقيها وشرحنا المادة!! وهي مشت الداخلية وانا رجعت بيتنا!!؟ قال ليها لاحظتي شنو في سلوكها!!! قالت كيف يعني؟؟ قال ليها تصرفاتها!! قالت ليه طبيعية كانت!! قال ليها اها واصلي!! بعداك حصل شنو؟! قالت ليه كنا بنتواصل ف الفيس بس؟! قال ليه ليه!!؟ قالت ليه لانه اتفقنا لحدي م نخلص الامتحانات ماف واحدة فينا تفعل نت!! فبقينا نخش الفيس المجاني نسلم علي بعض ونطلع سريع لقرايتنا!! قال ليها وبعداك؟! قالت ليه لحدي قبل الامتحان بيومين كنا كويسين ولو ف حاجة غلبتني بتصل عليها وكانت بتشرح لي!!؟ وبقت تبكي!!! م قدرو يسكتوها!! لحدي م كملت بكيتها!! وعيونها ورمت!؟ حسام اداها تشرب موية وكان ماسك ليها الكباية لانها منهارة!!؟ شربت واتنفست بصوت مسموع واستغفرت!! وقال ليها مولانا!! اها نواصل!!؟ اومأت برأسها!! وقالت بعد م شرحت لي الدبرشن!! قفلت بدون م تهزر معاي كعادتها!!؟ وقلت بكون بسبب ضغطة الإمتحانات!! بس هي م من النوع البشيل هم امتحان!! كانت شاطرة ي مولانا!!! وتاني رجعت للبكاء!! قال ليها خليك قويه وكملي اها حصل شنو بعداك!!؟
قالت ليه بعداك نمت!! وقمت الصبح اراجع المادة!! اتصلت علي بعد الصبح!! قال ليها يعني زي الساعه كم؟! قالت ليه خمسة ونص صباحاً!! قال ليها اها وعداك!؟ قالت ليه كانت خااايفة ومرعوبة!! بالجد اول مره احسها خايفه للدرجة دي؟! وقالت لي تتزكري الراجل الكبير الكان بجيني داك!!؟ المهم كانت خايفة شديد وقالت لي انه بتابعها محل م تمشي وانها خايفه وتقريبا بهدد فيها!!؟ بالجد كانت مرعوبة!!! بس انا السبب؟! وروان بقت تصرخ لمن العساكر جو جارين!! ودخلو المكتب؟! مولانا طلعهم!!! حسام جا قعد جنبها وحاول يسكتها!! حضنتو وغمرت؟!
بعد خمس دقائق تقريباً!! فتحت لقت نفسها في الكنبة القعدت فيها اول ما دخلت!!؟ جات قايمة وكان رأسها لسسسه لافي!! اتلفتت يمين شمال م شافت زول؟! قامت علي حيلها رأسها لفه لمن ثبتت ف طرف الكنبة واتركزت علي الباب!؟ فتحت باب المكتب!! لقت شرطي برتبة رقيب!! قاعد ف كاونتر قريب لمكتب وكيل النيابة!! جا عليها وقال!!! خليك جوه!! مولانا مشي يصلي العصر وجاي!؟ قالت ليه وجنابو حسام!! قال ليه معاه!! رجعت قعدت وجابو ليها عصير!!! بس م قربت عليه لحدي م مولانا وجنابو جو داخلين!! سلمو عليها وسألوها اذا واجعها شي!؟ هزت رأسها بمعنى لا!! مولانا مسك قلمه وقال ليها نحنا مقدرين الالم الانتِ فيه!! بس صدقيني كل م استعجلنا في اجراءاتنا حنقبض علي الجاني اسرع!!؟ فبتمنى تساعدينا!! قالت ليهم ان شاءالله…؟!
قال ليها اها الزول ده منو وعرفتو كيف ومتين ومن وين بما انك صاحبتها الانتيم!! اتنهدت وقالت ..من شهر!! كنا طالعين من الجامعة وم لقينا مواصلات !! وانتظرنا لاكتر من ساعتين!!! لم جات مواصلاتي ركبت وقلت ليها!! بدل تقيفي ارح اركبي معاي وانزلي بعد الكبري!! يمكن هناك تلاقي اسرع!!؟ وياريتني م قلت ليها!!؟ مولانا رفع عينو وعاين ليها مسااافة!! وقال ليها كملي!! قالت ليه فعلا ركبت معاي ونزلت جنب النفق!! وانا واصلت!! بقيت اتصل عليها اشوفها ركبت شنو بي م بترد علي!! بعد وصلت البيت اتصلت عليها اشوفها وصلت كيف! ولا حصل معاها شنو؟! ردت مبسوطة وقالت لي متفاخرة أنها لقت زول مرطب وصلها وشال رقمها وقالت لي ممازحة حتخلص باقي الجامعة بدون م تتشحط في لمواصلات تاني!! وعرفت منها انه عرض عليها ترتبط بيه!!؟ وانا حذرتها بس هي م بتخاف!! اصلا م عندها ليه حاجة بس بتهمها بطنها وراحتها!! ولو زهجت منه بتفكو؟!
مولانا قال ليها يعني صحبتك لعوب!! بكت وقالت لا ابدا!!! بس دائما بعجبو بيها الرجال الكبار!! وسبحان **** بكون وضعهم كويس!! الواحد يعزمها مرتين تلاتة وبتفصلها منه!؟ بس م بتتمادى مع واحد فيهم!! ولا ترابط بيهم؟!
مولانا قال ليها اها وبعدين؟
قالت ورتني انه رجل اعمال ولا تاجر م عارفه وعدو عربيه اخر مويل!! وقالت لي ح اعرفك بيه شكلو ظريف؟! بس انا بخاف!! قلت ليها خليه يجي جنب الجامعة اشوفو!! فوافقت!!؟ وبعداك بقت م بتجيب لي سيرتو!! ولا عارفه اذا باللقيهو ولا لا!!؟ لحدي م يوم قالت لي حيجي الجامعة!! طلعت مخصوص عشان اشوفو!! بس الغريبة ابا ينزل العربية كانت مظللة وقالت لي تعالي اركبي!! انا ابيت؟! قالت لي خلاص تعالي سلمي؟! يرضو ابيت!! وقلت في سري مفتري!! بدل هو ينزل يسلم علي!! عايزني امشي ليه انا كمان؟! ومشيت خليتهم!! بس اشرت ليها بيدي نظام مع السلامة!! وتاني م شفتو!! وقالت لي بعد يومين تلاتة انها فصلتها منه!! ضحكت!! لاني عارفة طبعها!! م بتستمر في تعارف اكتر من اسبوع!! وم بتخش في علاقة مهما حصل لانها بتحب واحد من اهلها!!؟ مولانا قال ليها!! طيب ماورتك نوع التهديد شنو؟! قالت ليه كانت عايزة تكلمني بس ابوي ناداني وقلت ليها برجع ليك ونسيت ارجع ليها!! للمساء كده لم اتذكرت!! رجعت ليها بس م بترد!! اتاريها الوقت داك ميتة!!؟ وصدمت تاني!!! حسام نقلها علي المستشفى!! ووكيل النيابة قال ليه كلامها مهم شديد!! لازم نعرف الراجل ده منو؟! وهل هو القتلها ولا سبب التهديد كان شنو؟!! بعد تتحسن شوية حنواصل معاها!! لازم نحصل علي راس خيط!!!؟
في المستشفي اخدت ليها دربين بعداك رجعها البيت بعد المغرب!!!؟ اهلها كانو متوترين!! ولانه م عندها اخو شقيق!؟ ابوها كان متوتر شديد وافكارو تودي وتجيب…وجاتو افكار سيئة شديد!! وانه بنتو الكبيرة ممكن تكون بتعمل شنو من وراهم؟! وتساؤلات كتيرة!!! لحدي م وصلت!! امها اساقبلتهم جنب الباب!! ارتمت في حضن امها وبكت!! ابوها فضل حسام علي الصالون وعرف منه الحصل شنو؟! بس حسام طمئنو أنه مافي شئ!!؟ وروان وصعها مطمئن!!؟ افادتها مهمة شديد!! وانهم قد يحتاجو ليها تحت اي لحظة!!؟ وقال لابوها!! م تخاف ي عمي انا معاك!؟ م بخلي اختي براها!؟ واكيد م يحصل إلا الخير!!؟
وطلع منهم رغم اصرارهم عليه أنه يتعشى معاهم!؟! بس رفض وشكرهم!! وطلع!!
______________________
اما اهل المغدورة كانه حيجينو من بعد سماع الفاجعة دي!!؟ وابوها قرب يعتدي علي رجال الشرطة لم منعوه يتكلم مع الدكتور الشرح الجثة!!؟ واكد ليهم انها م مغتصبة!!؟ وانا لسسسه بكامل بكارتها وم تعرضت لاي اعتداء!؟ طيب من حيستفيد من موتها!!؟ مين قتلها بالطريقة البشعة دي؟! وحتكون عملت ليه شنو؟!
المنظمات المحلية والإقليمية كانت متبنية متابعة الأحداث واصبحت قضية رأي عام…لحدي ما رئيس النيابة الاعلى استدعى روان تاني!! والمره دي ساقوها بدون م يكون جنابو حسام معاها!!؟ وكانو يحققو معاها ثلاثة!! واعادت ليهم نفس القصة الفاتت وكل واحد بتفنن في نوع الاسئلة!! نوع العربية ولوحتها ولونها!! وشكل المشتبه به اذا شافتو؟! ولا لو شافتو ف تلفون صحبتها!!؟ بس اكدت ليهم انها م بتعرفو!! بس كل العارفاه انه كان مقيم لاكثر من ٣٠ سنه خارج البلاد!! وانه ساكن ف ارقى احياء الخرطوم؟! واسمو ناصر تقريباً!! ادتهم شوية امل في انهم ممكن يحصلو علي راس خيط!!
بعد اسبوع من الحادثة وفي جزيرة توتي تحديدا !! واحد من الصيادين وبعد سحب شبكة الصيد حقتو!! طلع معاه كيس؟!! فتحو ملهوف!!؟ وصعق لم لقاه رأس جثة ومعاه قفازات..؟!
نواصل بعدين
يتبع ……….
الجزء الثالث من رواية القاتل المختل
الصياد من الهجمة لمن جدع الكيس من يدو وزحف بإيديه للخلف وهو قاعد على الارض!! وكورك لكم صياد معاه!! جو جارين وكان بأشر ليهم علي الكيس!! واحد ابا يقرب عليه! التاني شال عصاية الصنارة وجراه لبرا شوية من البحر!! لحدي م استلمو ف يدو!! لم فتحو بقي يستعيذ ب****! ويتشهد!؟؟
ختاه ف الارض وقال لواحد معاهم اضرب٩٩٩!!
طوالي طلع تلفونو وقبل م يتصل!! الكان واقف بعيد داك قال ليهم م تجيبو لنفسكم مشاكل!!؟ اسسسه يحرجروكم في المحاكم والاقسام والنيابات!؟ ويقطعو معايشنا!! م ناقصين مصائب نحنا!!؟ ف الأيد كلامه!! بس الصياد اللقى الرأس ومعاه واحد قالو انتو اطلعو منها نحنا حنبلغ؟! يمكن يكون الزول المقتول ده مجهول ولا قلب اهلو مقطوع عليه وم عارفنو وين؟! يمكن يكون **** طلعو قدامنا لحكمة يعلمها هو!! واتصلو للشرطة!! دلاك شالو شباكهم وقالو ليهم اعتبرو نفسكم م شفتونا ومشو!!؟
الشرطة خلال نصف ساعة ملت المكان!! صورو الشباك وموقع الكيس وحتويات الكيس وحققو مع الصياد وخلوه ندم لليوم الاتصل ليهم فيه!! ولانه الرأس متحلل م اتعرف لرجل ولا مرأة وودوه المشرحة!!؟
والقفازات والاكياس الكانت فيها مشت علي الفحص الجنائي!! ولليوم التاني حتى نتيجة الفحص طلعت مطابقة للحمض النووي المغدورة ولاء!؟ وكيل النيابة اتصل علي اهلها وجدد ليهم الآلام! وبعد اكتمال التشريح واخذ العينات سلموهم الرأس لدفنه!!! ف الناس اتألمت من بشاعة الموقف اكتر من دفنها الاول!!! وبعد الدفن مباشرة خالها تاجر! اتصل علي صاحبه مستشار قانوني بوزارة العدل!! كان منهار!! وبقى يشتم ويسئ و متحسر علي الحصل لبنت اخته!! صاحبه هداه شوية وقال ليه تعالني في الوزارة منتطرك؟؟!
فعلا من المقابر مباشرة اتجة على وزارة العدل!! كان المستشار في اجتماع وهو قاعد منتظر في صالة بالقرب من المكتب شافو واحد تاني كان برضو منتظر يقابل مستشار تاني!! عندو مشاكل ادارية متعلقة بمبنى منسوب للوزارة!! المهم اتبادلو اطراف الحديث وخال ولاء اسمه ناجي! حكى ليه القصة الاصللا التاني طلع متابع احداثها في الصحف اليومية وعزاه!! ولمن دخل لناحي افكار عجيبة غريبه وبقي يحلل وينظر!! ويفترض اشياء صعبة الحدوث!! وقال لخال المغدورة صدقني الشرطة م بترجع ليك حق بنت اختك!! حيلفو كدااااا ويجوطو الشغلانة وبعدين يركنو البلاغ ضد مجهول!!؟
انا بقترح عليك توكل محقق خاااااص للقصية دي!!؟ ناجي قال ليه كيف؟
الراجل قال عدل قعدتو وقال ليه في محققين خاصين! ببحثو بطريقتهم الخاصه لحدي م يصلو للجاني ويسلموه للعدالة!! وكان عايز تاخد حقك بيدك دا برجع ليك بعدين!!؟ ناجي اتحمس!! وقال ليه بس القاهم وين وكيف؟!
الراجل همس ليه وقال!! جيبك كان م تقيل م بتقدر تجيبو!! لكن بكشفها ليك يعني بكشفها ليك!! ناجي قال علي الطلاق كان ابيع كليتي! م اخليه يفلت من العقاب!! بس انت دلني علي واحد!! وفعلا الراجل اده ناجي رقم واحد وقال ليه اتواصل معاه!! وان شاء **** حيفيدك!!
اتصل عليه وقتي وقال ليه انا ناجي جايك من طرف فلان!! قصدو الشخص القاعد جنبو!! بس المحقق برضو م قدر يتعرف علي الزول! وسأل ناجي عايز شنو؟ بدا يحكي ليه ف الموصوع وداك بيسمع!! بعداك اختصرو وقال ليه خلاص تمام!! موافق حاشتغلها ليكم!! واكيد حنكشف الجاني!! ناجي اتنفس الصعداء!! وحس بشوية امل.. والمحقق المجهول قال ليه ح ارسل ليك رقم حسابي!! ح ترسل خمس مليون! وبعد ينتهي التحقيق حتدفع الخمسة التانية!! ناجي م اعترض علي المبلغ!! بس احتار من اسلوب المحقق!! لا درس القضية ولا قال نتلاقي ولا حتى اتكلم عن الموضوع!! واول شي طلب خمسة مليار!! بالجد شي يحير!!؟
قال ليه خيير! بعدين بتصل عليك! وقفل منو؟ وقبل م يتناقش مع الراجل المعاه!! جا واحد نده علي ناجي وقال ليه اتفضل مولانا منتظرك!!؟ ودخل معاه علي صاحبه!! سلم عليه وعزاه ف ولاء!! واتكلمو باستفاضة عن الموضوع!! لحدي م ناجي ذكر ليه موضوع المحقق!! المستشار ضحك بقهقهة!! وقال ليه م تكون حولت القروش؟!
ناجي ابتسم وقال ليه لا لكن فكرت ف الموضوع!! المستشار قال ليه و**** القرش السايب يعلم السرقة!! حول لي القريشات دي انا اولى بيها!! وخلا ناجي يضحك وهو ف حالتة السيئة ديك!! المهم قال ليه من قال ليك نحنا شرطتنا م انافعة ولا حتضيع حق بنت اختك!!! صاااح الموضوع بياخد زمن! بس أكيد م حيقصرو وحيقومو بدورهم علي اكمل وجه وان حصل بعض القصور!! ناجي قال ليه يلا انا خايف من القصور ده!!؟
المستشار ضحك وقال ليه اذا مصر عايز محقق خاص حشوف ليك اجعص محقق في السودان والدول المجاورة والغربية كمان!! ناجي عقد حاجبية وقال ليه ده منو كمان!! قال ليه علي الحاج!! الثعلب كما يحلو له!؟ قال ليه طيب اصل ليه كيف!! وصرفو بالدولار م تقول لي!!! المستشار ضحك وقال ليه لالا م بقول ليك عايز ١٠ مليار؟! بس صدقني لو وافق يستلم القضية دي انا ح اساهم معاك ف دفع المبلغ الحيطلبو!! بس صدقني حيطلب حاجة معقولة!! ناجي قال ليه بحماس م مشكلة اي سعر انا موافق بس اتصل لي عليه!!؟
المستشار فتش تلفونو واتصل علي وزير عدل سابق سلم عليه وطلب منو رقم الحاج!! ووصح ليه السبب بس م اتعمق ف التفاصيل!!؟ وفعلا في اقل من خمس دقائق الرقم اترسل!! ناجي قال ليه رقمو عند الوزير!! المستشار ضحك!! وقال بدون مبالغة م تستبعد انه يكون عند مستشار البيت الأبيض الأمريكي!! ناجي ضحك وقال ليه شوقتني اشوفو!!؟
اتصل عليه م رده!! رجعو يتونسو!! وبعد ربع ساعة تاني اتصل!! رده الحاج بخمول!! منو معاي؟!
المستشار ابتسم لم سمع صوت الحاج وقال ليه معاك المستشار محمد هاشم!! وسلم عليه والحاج ساكت!! المستشار قال الووو!!
الحاج قال ليه سامعك عايز شنو!؟ المستشار مندهش من اسلوب الحاج!! سمع انه لئيم بس م قايلو للدرجة دي!! تاني ابتسم وقال ليه عايزك بخصوص القضية الفلانيه!! وقبل م يخش في تفاصيل الحاج!! قاطعو وقال ليه هو وقف الشغل الجنائي وم فاضي واعتذر منو وقفل!!!
المستشار اتنفس بصعوبة وقال لناجي للاسف م وافق قال مشغول!! بس ثواني اشوف واحد يتوسط لينا عندو!! اتصل علي عقيد ف الجيش كان بيحكي ليه عن علي الحاج وانه بعرفو معرفة شخصية!! وكلام من ده!! اتصل وسلمو على بعض وطرح ليه الموضوع!! العقيد قال ليه م اظن حيوافق ولده الكبير ابراهيم اتوفى ف أمريكا!! وهو ف حداد عليه!! ومرات بقول اعتذل العمل وحيسافر يستقر مع حفيدينو ف أمريكا!! بس انا بحاول ليكم معاه!! وقفل منهم!! ناجي شال رقم الحاج من صاحبه وشكرو وطلع!! رجع بيت العزاء لقى الاهل جددو البكاء والنواح تاني وم فضل إلا يفرشو ليها تاني!! دخل علي البيت جوه لقى روان حضنتو وبكاء فيها شديد لانو مرات بوصلها بيتهم لم تجي للمرحومة!! ف اتأثر شديد…!
اتصل على ضابط في الشرطة وسأله اذا في تطور في القضية!! بس الاخير اكد ليه انهم شغالين وتحرياتهم شغالة! وانهم باذلين جهودهم لتحقيق العدالة! وكلام مملق كده م بشفي غل اهل الضحايا!! وكل الطرق مسددة في وجوهمم!! وحتى الادلة الجنائية م اتوصلت لاي بصمات لا ف الجثة ولا ف الرأس والقفازات!! وحصرو تحقيقهم في بيانات هاتف المقدورة الماجات من شركة الاتصال!! وفي وصف روان لعربية المشتبة به! والبينات القدمتها!! لحدي المغرب أذن!! روان قالت راجعة بيتهم!! طلبو منها تبيت بس اعتذرت انه اختها ممتحنة بكرة ماف طريقه تبيت معاهم بس حتجي مره تانية!!
ناجي خال ولاء قال ليها خلاص خلوني اصلي وبوصلكم!! شكرتو ورفضت مبررة بأنهم مضيفوين وانه المواصلات ماشة وحتصل سريع مع اختها!! بس هو نهرها وقال ليها عشان اختك ماتت معانها م اوصلك تاني!! خليني اصلي قلت ليك!! في النهاية وافقت!! بعد الصلاة ركبو معاه هي واختها!! ولم طلعو الشارع الرئيسي شافت عربية شبيهه لحقه الزول الشاكين فيه واقفة ف بداية الشارع!! قلبها ضرب وعربيتهم مشت وهي لسسسسه متلفته بتعاين للعربيه الفضلت واقفة م اتحركت!!؟
جسمها بقي يرجف!! بس قالت بينها وبين نفسها بتكون دي عربية بتشبها ساي م اكتر! ناجي سألها في شنو؟! قالت ليه ماف شي!! وصلهم بيتهم ورجع!! وهي مع انه الموضوع عادي بس الليل كلو مقلقة!! والنوم طار منها!! ولو الشباك ضرب ساي هي بتقوم ناطة؟! م طلعت من بيتهم لكم يوم!! دفعتها خلصت الامتحانات واخدو اجازة صغيييرة حتى ينزلو !! ف الايام جرت سريع والحادثة قربت للشهر وماف اااي جديد!! لحدي م في يوم روان طلعت علي الجامعة عايزة تشوف موضوع البدائل حتمتحنهم متين!! وتشوف حتقدر تسجل للسنة الجديدة ولا لا!! ولم وصلت الجامعة وقطعت الزلط شافت ماشة وراها!! اسرعت ف المشي وخشت تحت ولا شجر ف ممر طويل للجامعة!! وجسمها كلو بيرجف!! لحدي م دخلت الجامعة!! قعدت ف الاستراحة!! وقالت اكيد انا بتوهم!! ماف زول متابعني!!! اصلا انا عملت شنو؟! وبعد ربع ساعة حتى مشت لمسجل الكلية واستفسرت موقفها وخطواتها الجاية حتكون كيف!!؟ ولاقت بعض زملائهم ف الكلية سلمو عليها واتكلمو عن المرحومة وواسوها بالكلمات وعزموها تفطر معاهم بس شكرتهم ومشت!! لم طلعت اتلفتت يمين شمال م شافت العربية!! لمن ابتسمت!! ومن قعطت الزلط وقبل م تصل الجهة التانية ومن حيث لا تدري جات عربية بسرعة فائقة ضربتها ومشت!!؟ خلتها طارت فووووق وارتضمت ب الترتوار!!؟
نواصل بعدين
يتبع ………
الجزء الرابع من رواية القاتل المختل
اخر حاجة شافتها روان دخان العادم حق اللاند كروزر الضربها!! وفقدت الوعي! الناس اتجمهرت واسعفوها براهم م اتصلو للاسعاف!! ولانه الحادثة حصلت قدام الجامعة ف كذا دكتور حصلوها علي المستشفي!!
الحمد*** **** لطف بيها اصيبت بشق في الحوض وكسر ف اليد والترقوة!! بالاضافة للكدمات والخدوش!! والموضوع عمل بلبلة لدى الاهل وحتى رجال الشرطة!! هل الحادث مقصود!! ام حادث عرضي ناتج عن تهور احد السواقين!! في ناس شاهدو البوكس ووصفوه لناس الشرطة!! واكدو ليهم انه م فيهو نمرة!! وكان مظلل؟ فبقت عيونهم مركزه علي روان وشددوا عليها الحراسة ف المستشفى! ومنتظرنها تتحسن شوية حتى يستجوبوها!! لانها ف حالة صدمة لمدة يومين!! وحتى بعد م استعادت الوعي سارحة بعيييد وم بتتكلم مع زول!!؟ قد يكون بسبب الحادث او لشئ تاني؟!
جا زارها ناجي…! اطمئن عليها!! واتذكر بنت اختو م قدر يخبي دموعو!! وقال وكان مفتكر انها كانت شاردة وم انتبهت للعربيه وهي جاية عليها!! وقال ليها اختك وجعتنا كلنا بس ده قدر ****!! كلنا لها! حاولي اتمالكي نفسك وركزي وم تضيعي نفسك من ورا التفكير!! صدقيني صعب علينا نخسر بنتين؟! بقت تبكي معاه وقالت ليه هو العايز يقتلني هو عايزني احصل اختي وصحبتي!!؟ عاين ليها بدهشة!! وقال ليها هو منو؟!
بكت بحرقة وقالت القتل ولاء!! ناجي قام علي حيلو! وقال ليها انتي بتعرفيهو!!؟ قشت دموعها وقالت لا!! بس شاكة انو هو!! لانه يوم دفنتو باقي الجثمان حسيت بأنه ف عربية كانت متابعاني!! وقبيل وانا داخلة علي الجامعة شايفة ف بوكس وراي!! دخلت منو ورا الشجر ومشى عادي من جنبي ودخلت الجامعة مسرعة!!؟ ولمن طلعت ولقيتو ماف لمن فرحت!! بس من قطعت الزلط!! طلع لي من وين م عارفه!!! وتاني م وعيت بشي؟؟ ناحي بقى يتأتي وقال ليها يعني ف زول عايز يقتلك!! عملتو شنو انت وهي؟! كلميني عشان اقدر اساعدك! بقت تبكي وقالت ليه م عملنا شي!!؟ وانهارت!! طلع خلاها ملهوف وماشي مهرول وم عارف يقبل على وين ولا يتصرف كيف؟! وسبحان **** اول زول خطر علي باله علي الحاج!!!
طلع تلفونو ولمن يدو فاقدة توازنها!! واتصل عليه!! وزي كل مره م رده من اول اتصال!!؟ تاني اتصل!! وقبل اخر جرس الحاج رده!! ب انفعال!! من اول محاولة من المفترض تعرف انه ياصاحب التلفون بعيد يا ماعايز يرد!!؟
ناجي اعتذر بأدب وقال ليه انا ناجي اسماعيل… متصل بخصوص قضية المغدورة ولاء ميرغني..! الحاج قاطعه وقال ليه انا وقفت الشغل!! **** يرحمها ويعوض شبابها الجنة!! بس انا ما بقدر استلم القضية دي!! بس ناجي الح عليه وعزاه ف ولده!! الحاج قال ليه انت بتعرف ولدي!! ناجي سكت لوهلة وقرب يقول اااي عشان يكسب وُدّ الحاج!! بس راجع نفسه وقال ليه لا!! بس المستشار الاتصل عليك من كم اسبوع داك كلمني!! الحاج سكت!!
ناجي قال ليه و**** القاتل ده بيلعب بينا!! ومن يومين حاول يقتل صحبة المغدورة!! بس **** نجاها!! بس م معروف اذا كانت كل مره حتنجو!! وغير كده هو منو وعايز شنو نحنا م عارفين!! عليك **** ساعدنا!!؟ الحاج قال ليه م بوعدك بس خلي تلفونك معاي!! ويمكن القى ليك محقق ثقة يشتغلها ليكم!! ناجي احبط بس شكر الحاج! وقال ليه بتمنى تفكر في الموضوع!! وقفل منه…!
____________________________________ اهل ولاء فقدو الامل في انهم يعرفو الجاني!! وده الشئ المُؤلمهم اكتر!! وده كلو حصل لم روان اتعرضتت لهجوم من مجهول!! والمخذي انه الفاعل م اتعرف!! وظهر ف كاميرات المراقبة الفي بداية الشارع بس م قدرو يعرفوه قاصد ولا لا!!؟ في نفس اليوم
وفي الفترة المسائية تحديداً روان طلعت من غرفتها واصابت اهلها بهلع!! قلبو المستشفي كلها مافي ليها أثر!! واكيد الشرطة بقت تمشط في الشوارع المحيطة بالمستشفي وف بعضهم كان براجع ف كاميرات المراقبة!! لحدي م في سستر ناجي موصية علي روان اذا احتاجت حاجة!! بالإضافة لانه يخلي بالو عليها!! المهم اتصل عليه ووراهو الخبر الشين!! ناجي من الخلعة اتصل الحاج في ليلو داك قريب الساعة١٢ مساء!! وقال ليه بلعثمة روان!! روان اتخطفت!!؟ الحاج قال ليه من اي مستشفى!! ناجي وصفه ليه!! الحاج قال ليه مسافة السكة اكون معاك وقفل!!؟
ناجي دور عربيتو وطلع يفتش معاهم!! كلهم اتجمعو ف المستشفى!! لانه الكاميرات لقطتها وهي طالعه ملهوفة!! وخايفة ولمن بتثبت ف طرف الحيطة حتى بتمشي!! بس م كان ف زول وراها!! وكاميرا الباب م لقتطها وهي طالعه!!؟ يعني روان لسسسسسسه ف المستشفي بس وين؟! والحاصل عليها شنو م معروف!!؟ الحاج وصل!! كان لابس طقم رياضي ولابس كاب وكرشتو بتنطط في المشي!! لم دخل ماف زول من اهل روان ولا حتى ناجي!! اتعرف عليه!! كان ظاهر عليه الحزن!! دقت مبعثرة وشعر كثيف بأطراف الكاب!! وحتى ملامح وجهه بقى كأنو ف الثمانين من العمر!!
سلم وقال من فيكم ناجي!!؟ ولا انا داخل غلط!!؟ وقبل م ناجي يرد! كان مستغرب من الزول الصوتو مألوف بس م قدر يتعرف عليه!! لحدي م جا داخل ضابط عليهم وقال ليهم لقيناها!! وكلهم قامو مخلوعين!! ويسألو عن مكانها!! قال ليهم اهدو هي بخير!! وجا طالع!! ولمح الحاج!! انجمد في مكانو! وقال السيد علي الحاج ولا شبه!! الحاج ابتسم!! وناجي اتخلع وقال بعفوية انت الحاج!!! الحاج ضحك بقهقه وقال ليه كنت قايلني شاب ثلاثيني ولا شنو؟! الضابط جا ملهوف بسلم عليه!! وطلعو مع بعض علي مكان روان!! الحاج قال ليه اتلقت وين؟!
الضابط قال ليه في غرفة الرنين المغناطيسي!! الحاج حقد حاجبيه وقال بتعمل في شنو؟! الضابط قال شكلها كانت خايفة من حاجة ولبدت هناك!!؟
مشو عليها!! في مكتب المدير الطبي!! ولقى اكتر من سبعة عساكر معاها!! وفي ملازم اول بتكلم مع المدير الطبي!! كلهم سمعو بالحاج بس قليل منهم الشافو قبل المره والضابط الجا داخل مع الحاج عرفهم بيه!! ورحبو بيه بحفاوه!!؟
الحاج عاين ليها لقاها قاعدة ف كنبة!! قرب عليها وم سلم!! بس قعد قصادها!! وقال ليها كنتي خايفه من شنو؟!
ف عسكري قال ليه كانت حاسه بزول براقبها!! الحاج قال ليه بإزدراء!! انا سألتك انت؟! ولا كنت معاها!! العسكري بقى يعاين للقائد حقو!! الاخير ابتسم يعني مشيها مشيها!!
وعاين لروان!! وقال؟ اها جاوبي ي بنتي!!
قالت ليه بنبره خوف!! كان ف زول براقبني ف الغرفة!! قال ليها معاك في الغرفة!! قالت لا؟ قال ليها طيب في قزاز ف الغرفة بخليك تشوفي الشخص البرا!! قالت لا!! قال ليها طيب كيف عرفتي انو ف زول براغبك؟! قالت ليه جاني ممرض اداني الدواء!! تاني جاني واحد قال عايز يديني الدواء!! وكان شكلو غريب م من الممرضين البدخلو علي في اليوم كذا مره ديل!! فخفت منو!! وقلت ليه نادي لي امي اول ماشة الحمام!! وبعداك ح احد الدواء عشان هو بنوم!! والدرب حركتو بطيئة!! م بقدر انتظرو لمن يخلص!!! كان متردد ومتوتر!! فزاد خوفي منو!! ولم بديت انفعل!! قال لي خلاص تمام حناديها ليك!! ومن طلع من الغرفه انا طلعت وراه ولمن تعبت من المشي وخفت يشوفني ادسيت هنا!! الحاج قال ليها ايوااا!! وسالها عن شكل الممرض!! وصفتو ليه!! لم راجعو كاميرات المراغبة!! فعلا لقوه ده ممرض معاهم!!؟
لم استجوبوه!! اتضح انه فعلا فعلا في كرت متابعة المريض الدكتور كاتب مسكن لروان والممرض كان بقوم بواجبه م اكتر!! بس روان المخليها تخاف وتتهيأ حاجات م حاصلة شنو؟! الحاج طلع بره ولع ليه سيجارة!! وجا عليه ناجي!! اعتذر لانه ازعجو ف وقت زي ده!! وكمان شكرو لحضورو!! وانه قبل يمسك القضية!! الحاج عقد حابيه وقال وقال بإستنكار منو القال ليك مسكت التحقيق فيها!!! ناجي عاين ليه بتعجب!! فالحاج ضحك!! قال ليه بكرة حامشي القسم اشوف الحاصل شنو!! وبيناتنا اتصال؟!
ناجي ضحك من تناقض الحاج!! وقال ليه اوصلك؟! الحاج قال ليه لالا معاي عربيه!! وطلع خلى ناجي واقف بغالط ف نفسه!! ويسأل اسسسسسه الشايب ده بحل القضية!!؟
وفعلا من صباح الرحمن…الحاج مشى القسم!! اتطلع علي الملف وشاف صور المعروضات!! وصور الجثة وركز في كل صور مسرح الجريمة!! وسأل اذا المكان مغلق!! العساكر اكدو ليه انه السطوح قافل للان!!؟ قال ليهم ارح!! ومشو معاه بدون م بجادلو!! لانها اوامر الضابط الاعلى!!
وصلو العمارة ودخل شاف الداخلية! وغرفة المغدورة حتى بعداك!! طلع علي السطوح!! كان كلو حواجز تابعة للشرطة وبقى يتلفت يمين وشمال!! لحدي م شاف بقايا سندوتشات جافة!! شال باقي السندوتش!! وطلع منو اللفافه الورقية ولقاها تابعة لمطعم معروف ف المنطقة!! وطلب من عسكري يعرض ليه الصور!! لحدي م وقفو ف المعروضات الاتلقت مع رأس الجثة!! وقال ليهم الكيس الداخلي الملون ده!!! مش من نفس المطعم!!! كلهم اتخلعو!! وركزو كويس!! لقوه كلامو صاح!!! الحاج ضحك وقال ده شنو القاتل الراقي ده!!! بأكل من افضل المطاعم وبيقتل!!!؟
نواصل بعدين
يتبع ……….
الجزء الخامس من رواية القاتل المختل
الضابط المسئول عن القضية!! استغرب؟ كيف م انتبهو لبقايا الطعام الكانت في حافه البلكونة!! ومع انهم ركزو مع الكيس اكتر وعرفوه من المطعم الفلاني!! بس م عارفين اذا الجاني كان شايلو ولا لقاه ف موقع الجريمة!! وقال للحاج الصراحة كما عهدناك بتنتبه لأتفه التفاصيل!! وصدقني حنستفيد من وجودك معانا كتير بس! للأسف الشديد م حاسمح ليك تواصل معانا في القضية من دون موافقة خطية من السيد مدير عام جهاز الامن الوطني؟! الحاج ابتسم!! وقال!! انا م بشيل اذن من زول! واتصل لرئيسك وقول ليه كلامي ده!!! واضف ليه رفعة الحاجب دي!! ومشى خلا الرائد بيضحك!! رجع القسم واتصل للقائد حقه؟! الأخير ضحك بقهقه وقال ليه ماف زول يتعرض ليه ولا يسالو!! الحاج مرشح ثلاثة مرات لنيل منصب المدير العام لجهاز الأمن والمخابرات الوطني بس بيرفض بدون م يبرر رفضو لزول!! والفي راسو بيعملو!! اتعاونو معاه بس ما تفقدو الشرطة هيبتها قدامو لأنه مستفز أحياناً!! وبقى يضحك وقال ليه عايز رقمو!! الضابط قال ليه م معاي بس بحاول اجيبو من العساكر!! وف أثناء ماهم يتكلمو جا داخل عليهم عسكري وقال للرائد سعادتك!! جنابو الحاج قال عايز يوميات التحري!! الرائد قال للقائد بالتلفون خلاص بدينا مع وجع الرأس!! اتبادلو الضحكات وقفل منه!! قال للعسكري م تدوه اليوميات!! جيبها لي هنا وخليه يجيني؟ شوية كده وجاه الحاج بتمايل من شده السمن!! قعت بقوه على الكنبة ومدد رجولو! وربع يديه وعاين للرائد بإستهتار!! وقال اذا جبت التحريات معاك معناه حتمنعني من اني اطلع عليها!! ولا تكون مفتكر انك أفضل مني!! الرائد استفزاه اسلوب الحاج!! وقال ليه اقعد عديل نحنا م في مصيف!! مكانتك علي راسنا بس ده م يعني انك تتجاوز حدودك!! والقانون فوق الجميع حتى ولو كان اسمك الثعلب!! الحاج ابتسم وقال ليه شكلك جديد!! مبروك عليك الكرسي!! وجا طالع!! في اقل من ربع ساعة جات مكالمة للرائد اللهو رئيس القسم!! بأنه يسلم ملف القضية للحاج ويفصلو ليه مكتب…! الرائد احمد م كان مستبعد حاجة زي دي بس م اتخيل بالسرعة والسهولة دي!! م فضل إلا يقولو ليه اشتغل تحت إمره الحاج!!؟
المهم شال الملف وطلع لقى الحاج رجع البيت!! كلف عساكر ينضفو مكتب المستندات السابق للحاج!! وشال تلفونو منهم واتصل بس الحاج كالعاده برد بالمزاج!!
اليوم التاني جاهو ناجي في البيت وحكى ليه كل القصة!! الحاج قال ليه عايز اطلع علي التحريات عشان اقدر احدد مسار القضية!! وم تدخل لي في شغلي ولا تتصل علي الا انا اطلب حضورك!! وكان جادي شديد!! ناجي ابتسم وقال ليه حاضر سعادتك!! وطلعو مع بعض!! الحاج علي القسم وناجي علي اشغالو!! لم وصل لقى مكتبو جاهز!! قال بسم **** ودخل!! اول ملاحظة قال ليهم غيرو لي الكرسي ده بجيب لي بواسير!! وعايز مكيف!! العسكري حبه يتظارف!! قال ليه ده قسم شرطة م فندق!! الحاج قال ليه تعال انت زولي!! وطلب من العسكري التاني يجيب ليه الملف!! العسكري قال ليه انا ورديتي انتهت حيستلم بدلي فلان!! الحاج قال ليه معقولة وتخليني براي ف الفندق ده!! وجا داخل التاني جايب الملف!! الحاج لبس نظارتو العملاقة ديك وقال للعسكري اقرا لي من بداية اليومية!! احرو مع منو وعددهم كم؟! العسكري قال ليه انا اقرا ليك!!؟ الحاج عاين ليه بفوق النظارة وقال ليه عندك اعتراض!! العسكري اتغاظ!! بس قال بينو وبين نفسه هو الرائد م قدر علي الحاج!! انا ممكن يفصلني عادي!! واتنفس بصوت عالي! وجرا الكرسي التاني ومسك اليومية!! الحاج مسك قلمو وقدامو ورقة! وقال ابدا!! العسكري قال اول زول اتحرينا معاه الخفير بتاع البناية!! الحاج قال ليه هو اللقى الجثة!! العسكري قال ايوااا! الحاج قال ليه اها قال سنو؟! العسكري قال ليه الاتي: ف يوم اكتشاف الجريمة كانت الموية قاطعة من البناية وطلعت السطوح افتح بلف الصهريج ولقيت الضحية مرمية وبالوصف الموضح بالكروكي والصور!! الحاج قال ليه يوم الحادثة كان وين؟ العسكري قلب الصفحات وقال ليه!! قال كنت مع زوجتي ف مناسبة!! الحاج قال ليه وخلا البناية بدون حراسة!؟ العسكري قال للحاج وحتى الرائد سألو نفس السؤال!! الحاج قال كمل اها رده بشنو؟! قال… مرات بستأذن من سيد العمارة وبخلي الحارس بتاع الداخلية يستلم شغلي علي بال م ارجع!!؟ الحاج قال وتاني!! بخصوص الضحية قال شنو!! العسكري زهج من الحاج!! هو عايز يقرا اقوال الخفير دفعة واحدة وبعداك الحاج يحلل بطريقتو!! بس الحاج كل شوية بسالو من شي مختلف الشي البصعب علي العسكري البحث في الاقوال!! المهم بعد خلص تلاوه اقوال الحارث!! الحاح بقى يتثائب!! وقال ليه انا مليت!! دي شنو السخافات البتتكتب دي!! ده منو الكان بتونس معاه ده!! المتحري ده منو!! العسكري قال ليه المساعد شرطة فلان!! الحاج صلح طاقيتو وختى الورقة والقلم ف جيبو وقال ليه هم كم!! العسكري قال منو ي سعادتك!! الحاج قال ركز ي ابني!! اتحريتو مع كم؟! العسكري قال ٢٠ شخص تقريباً صحباتها ٣+ زميلاتها ف السكن١٠+ الخفير والحارس بتاع الداخلية+صاحب الداخلية+اهلها+وبتاع البقاله الجنب العمارة!! الحاج قال ليه طيب اقرا اليومية كلها!! العسكري اتخلع ده كراس عديل!! وبدا يقرأ والحاج بسمع! م كتب ولا ملاحظة واحدة!! العسكري لمن ريقو نشف!! بعد خلص رزع اليومية ف التربيزة!! الحاج ابتسم وقال ليه اها لقيت فندقي كيف!! وبقي يضحك بإستهتار!! العسكري استأذن الحاج وطلع!! الحاج بقى يعاين لليومية!! وبقلب صفحاتها بأني بس م بيقرا فيها!! في نقاط استوقفتو!! وفي إجابات م منطقية!! واتصل علي الرائد!! قال ليه حتعبك معاي بس استحملوني لحدي م القضية تخلص!! الرائد جامل الحاج بالكلمات وسألو اذا عايز حاجة!! الحاج قال عايز الخفير ضروري!! الرائد قال ليه رقمو مسجل ف اليومية!! الحاج قال ليه عارف!! بس عايزكم تجيبوه فجأة بدون م تتصلو عليه!! داهموه وياريت لو أولادك العساكر يرهبوه لي شويه!! في حين انه شكلهم براه بخوف!! وبقي يضحك!! جنابو احمد م ضحك معاه!!! وقال ليه خير ان شاء ****…!
وادى تعليمات لقوه تتحرك علي الخفير!! وفعلا ف اقل من نص ساعة جابوه مخلوع وبتكبكب!! ف شنو وانا عملت شنو؟! دخلوه علي الرائد اول!! قال حيحقق معاك السيد علي الحاج مندوب رئاس جهاز الأمن!! ف حين انه الحاج م ليه اي علاقه بالوظيفة دي بس شينة في حق القسم يقول ليه جاي محقق خاص يحقق معاك تاني!! وغير كده لازم يرهبو عشان يخاف!!؟.
العسكري دخلو للحاج وكان نايم ف الكرسي!! ده نفس العسكري القال ليه الحاج اقرا اليومية!! وعشان ينتقم من الحاج خبط البوت بقوه ف الارض لمن الحاج نطه وقام مخلوع!! وقال ليه وبتحية سعادتك ده الخفير!! الحاج ضحك!! وقال ليه م تلعب معاي انا الثعلب!!!وركز نظرو علي الخفير!! الاخير بقى يعاين للحاج وبقول ف سرو!! ده مسئول ولا مجنون!! اسسسسه الخفير فينا منو؟ وابتسم!! الحاج كانه قرا افكارو!! قال ليه ماشاءالله جاي مبسوط!! اتفضل اتفضل نحنا زاتنا بنبسطك!!؟ الراجل ملامحو اتغيرت!!! وقال ف حاجة سعادتك!! الحاج قرا اسمو ف اليومية!! وقال ليه حسين!! الطالبة الصغييييرة دي فقدت عمرها! ونحنا من واجبنا نحقق ليها العدالة!! فما تصايق مننا كان عصرنا عليك بالأسئلة!! قال ليه ولا يهمك سعادتك نحنا بتسعدنا مساعدتكم!! والمغدورة ف مقام بنتي كانت بت طيبة خلاص!! واتاثر!! الحاج قال ليه كدي احكي لي انت شغال ليك كم سنه!! قال ١٠ او١٥ الفتره طالت!! الحاج قال ليه والداخلية ليها كم سنة!! قال خمسة سنه!! الحاج قال ليه وفي خلال الخمسه سنة دي حصلت اي تجاوزات!! حسين قال زي شنو مثلا!! الحاج قال مثلا بنت طلعت ف زمن متأخر ولا زول دخل البناية ف وقت ممنوعة فيه الزيارة!! حسين قال تقصد شنو؟! الحاج قال ولا شي!! اها يوم الجريمة من الصباح انت كنت وين؟ قال ليه مشيت المغلق اجيب ادوات سباكة ف شقق محتاجة لشغل!! الحاج قال ليه شكلك م فهمتني!! م اقصد اليوم الانت اكتشفت فيه الجريمة!!اليوم الحصلت فيه الجريمة!! انت كنت وين؟! الخفير قال موجود!! م طلعت مكان!؟ الحاج قال واخر مره شفت فيه المغدورة متين!! قال يوم الحادثة المغرب!! الحاج قال ليه اوصف لي حالتها كانت كيف؟! والحديث الدار بينكم شنو؟! حسين قال كانت متوتره وزي الماتمام!! الحاج قاطعو وقال كيف م تمام؟! حسين قال كانت شاردة!! وبعد شاغلتها حتى ردت علي!! الحاج قال ليه وم قالت ليك جات من وين؟ الخفير قال م سالتها و**** وطلعت علي الداخلية!! الحاج قال ليه مشيت المناسبة الساعة كم؟! قال ف حدود٨ مساء!! الحاج قال يعني طلعت زول حفلات!! حسين ابتسم!! الحاج قال ليه م مشيت مع اولادك!! الخفير قال ليه كنت م جاهز! وهم اساعجلوني قالو الحفله بتفوتهم!! الحاح قال ليه طيب مشيت متين ومع منو؟ قال ليه جهزت وطلعت أجرت ركشة!! الحاج قال ليه يعني م ركبت ف عربية صالون بيضاء!!؟
الخفير لمن قام علي حيلو من الخلعة!
نواصل بعدين
يتبع ……….
الجزء السادس من رواية القاتل المختل
الخفير بقي يتمتم!! وقال للحاج شنو!؟ القال ليك منو؟ الحاج بقى يمسح في كرشتو وقال ليه اقعد اقعد!! واحكي لي بالتفصيل ولو كنت صادق اوعدك اتساهل معاك!!
_والله ياسعادتك انا م كضبت!! انا المرحومة م شفتها من المغرب وهي داخلة!! الحاج قال بس انا ما سالتك شفتها متين!! انا بتكلم عن الشخص الركبت معاه!! حسين سكت!! الحاج قال ليه راحتك!! وامر العسكري الحاضر معاهم ييختو في الحراسة لحين اكتمال التحريات!!! مع انه الحاج م عندو اي صلاحيات!! والعسكري زاتو متردد ينفذ ولا يرفض؟! ومن قام علي حيلو عشان يمشي يستفسر من الرائد! هنا الخفير حسين قام فوق وبقى يتكبكب مفتكر انه العسكري موديه الحراسة فعلا؟! وقال و**** انا ما عملت حاجة؟! بكون ده كمال!! الحاج لبس نظارتو!! وقال ليه اقعد برواق وكلمني عن كمال ده منو؟! العسكري اتخلع اكتر من حسين!! وقعد ملهوف مسك ورقو وقلمو ومتحمس للكتابة!! قال للحاج و**** انا ماعارف القتلها منو ولا السبب شنو؟؟ الحاج قاطعه وقال احكي عن كمال!! وخلي الباقي علينا؟! حسين قال ممكن اولع سيجارة! الحاج قال ليه ولع لي معاك واحدة!! ولعوها وبدا!! قال يوم الحادثة وبعد ما المرحومة دخلت بساعة كده تقريبا كنت ماشي المناسبة مع اولادي!! بس جا واحد!! الحاج قال كمال!؟ حسين قال للحاح٦بتعرفو يعني!! الحاج قال ليه كمل!!
حسين قال جا وقال عايز يقابل ولاء!! بس انا رفضت وقلت الزمن م زمن زيارة؟! وهي ممنوع تطلع من الداخلية بعد الساعة٨ ولا حتتحاسب من قبل اداره الداخلية!! الحاج قاطعو وقال بس بتحصل بعض التجاوزات عن طريقك!! حسين سكت!! الحاج كان بعاين بيه بفوق النطارة؟! العسكري الشمار حارقو! قال ليه كمل!! الحاج ابتسم… حسين قال اول رفضت بس قال م بتاخر زعلانه منو وعايز يراضيها لانها ممتحنة بكرة وممكن ما تقدر تقرا!! وكمان قال ربع ساعة م حيكملها معاها!! وأنه يوصلني معاه على بيت المناسبة!! وانا وافقت!! الحاج ابتسم وقال ليه بدون قروش يعني!؟ حسين نطط عيونو وقال اداني حاجة بسيطة حق المواصلات بس!! اها بعداك حصل شنو؟! قال قدمت اولادي وانا انتطرت كمال لحدي ما ينزل!! الحاج قال ليه طلع ليها وين؟! حسين سكت!! العسكري نهرو!! قال م متأكد بس تقريبا السطوح!! لانو مستحيل الحارس يخليه يخش جووه للبنات!! الحاج قال اها طلع الساعة كم؟ ونزل كم؟ واخد زي كم من الوقت!! حسين قال م شفت الساعة بس لم طلع اذان العشاء كان بأذن!! ولم نزل انا كنت بصلي وضرب لي بوري نبهني انه طلع!! سلمت سريع سريع وطلعت معاه!! كان طبيعي وما طاهر عليه متضايق ولا زهجان ولمن شغل اغاني!! والاكد لي انه برئ اتصل اتكلم معاها وقال ليها نسيت فريمي معاك!! وكان بيضحك معاها!! الحاج قال ليه عرفت كيف كان بتكلم مع ولاء؟! سمعت صوتها!! حسين قال لا!! بس من خلال الكلام فهمت انه بتكلم معاها!! وصلني محل المناسبة ومشى!! الحاج قال ليه ده كل الحصل متأكد!! حسين بقى يحلف انه م كذب في شي وده الحصل!! الحاج كتبو تعهد بعدم مغادرة المدينة او الانتقال بدون اذن من الشرطة!! وقال ليه اذا اتصلنا عليك ولو الساعة عشرمية! وم رديت حتتسجن وحتكون المشتبه به الاول!!؟ حسين اكد للحاج انه م ح يغيب ولا يوم عن شغلو واستاذن وطلع!!
العسكري مندهش!! قال للحاج من وين عرفت كمال والعربية البيضاء!! الحاج ابتسم وقال ليه ده لعب كبار خليك مركز بس!! وشال طاقيتو وتلفونو واتمغى وقال م اجي القى الكرسي ده!! وطلع… العسكري بسرعة!! مشى كلم الرائد احمد؟! والاخير استنكر كلام العسكري!! بس وراهو اليومية!! وقال عرف الكلام ده كيف ومن وين!؟
_________________________________________
الحاج بعد وصل بيتو اتصل علي ناجي قال ليه عايزك توديني بيت روان! صاحبة المرحومة المغربة!! ناجي استغرب رقال ليه في شي!! الحاج قال م تدخل في شغلي بس وديني!! ناجي اصلا متغايظ من الحاج بس الأولوية عنده ملف القضية!! اتفق مع الحاج انه يجيهو المساء وفعلا في حوالي الساعة سبعة كان واقف جنب شقة الحاج!! اتصل عليه وبعد قريب النص ساعة حتى طلع ليه!! وطول الطريق ناجي بيتكلم والحاج ساكت!! لحدي م وصلو!! وقال للحاج الزيارات المفاجأة دي اصلا م بحبها!! اسسسه لو كان خليتنا نتصل عليهم اول عشان يكونو عارفين!! الحاج عاين ليه بغضب وقال ليه انت جاي تعقد ولا شنو؟! ناجي سكت!! نزلو ودق الباب! جا اخوها الكبير فتح ليهم!! وكان بيعرف ناجي! سلم عليهم وفضلهم علي الصالون!! لحدي م جا ابوها وضيفوهم!! وناجي كلمهم انه ده جنابو! علي الحاج وماسك التحقيق ف قضية المغدورة وعايز ياخد كم معلومة من روان اذا ما عندهم مانع!! الاب كان متضايق!! بس خجل يحرج ناجي ومراعاة لشعورهم ولفقدهم العظيم لبنتهم!! ورسل اخوها يناديها!! شوية كده وجات داخلة!! سلمت عليهم من بعيد وم صافحت!! ابوها قال ليها اقعدي جنابو عايز يسألك!! وكلهم فاتحين خشومهم منتظرين الحاج!! ابتسم وقال ليهم خلونا برااااانا مع بنتي دي! الاب وولدو بقو يعاينو لبعض!! ناجي اعتذر منهم وقال معليش طلب محرج بس جنابو عندو فهم معين في راسو!! وافقو وطلعو كلهم!! وفضل معاها! سألها عن صحتها وشاغلها بالكلمات!! وقال ليها لو كنت اصغر من عمري ده ب خمسة سنة بس!! كان عرستك!!؟ ابتسمت وقالت ليه شكلك نسين صغر!!! بقى يضحك لمن كحة!! وقال ليها طيب ي ست البنات بما انك طلعتيني عجوز مكعكع الليلة ما بخليك!! ابتسمت!! قال ليها كمال ده منو؟! اتجمدت الابتسامة في وشها!! الحاج كان بعاين ليه وهي ما عارفة تقول شنو؟! قال ليها سؤالي واضح مووش!! قالت ليه مالو عمل شنو؟!
قال ليها خلينا من العملو!! هو منو؟ اتهدت بصعوبة وقالت ليه حبيب ولاء **** يرحمها!! قال ليها احكي لي قصتهم!!؟
ورتو انو كان بيقرا ف نفس الجامعة بس اتخرج من لمن كانو برالمة!! وكان صاحبهم ولمن بقى حبيب ولاء!! وقالت انه علاقتهم حلوه وم بتخلو من الخلافات والمناقرات بس ف خلال اليوم بيرجعو لبعض!! قال ليها ف الفتره الاخيرة كانت بيناتهم اي مشاكل!!! قالت ليه ابداً؟! صاح بتشاكلو بس حاجة بسيطة م بخلوها تتطور!! قال ليها اديني رقمو ملتو ليه!! وسألها عن سكنو!! وصفت ليه البيت!! قال ليها في العادة بعزمها وين؟ قالت بالنسبة لشنو لم يتفسحو ولا لم يعزمها علي أكل!! قال الاتنين!! قالت بمشو المتطعم الفلاني!! ودائما بتمشو في شارع النيل !! الحاج ابتسم!! وقال ليها اها ف زول قرب ناحيتك!! ولا حصلت اي تهيُؤات تاني!! قالت ليه مره بعد مره!! بس اسسسه كويسه الحمد *** وم بطلع من البيت!! طلع من بيتهم!! وناجي حاول يعرف انهم اتناقشو في شنو؟! الحاج قال ليه ماف شي مهم!! وصلو البيت!! واتصل علي الرائد احمد!! قال ليه جهز امر قبض في مواجهة كمال محمد احمد ووصف ليه سكنو! واكد ليه انه هو بيعني اي كلمة قالها!! وقفل منو!! وخلا جنابو احمد محتار!؟
واتصل علي الضابط المناوب يقوم بالاجراءات ويشكل تيم مداهمة لكمال!! وفي حوالي الساعه ٢صباحا اتصل ناجي علي الحاج!! وقال ليه انت عملت شنو؟! روان تم اغتيالها!!؟
نواصل بعدين
يتبع ……….
الجزء السابع من رواية القاتل المختل
الحاج قام مخلوع وبقى يكابس في اللمبه!! وبقول لناجي شنو؟! روان مالها!!؟
قال ليه اغتالوها!! الحاج قفل منو وطلع كالعادة بالبجامة!! ومع انه نظرو ضعيف باليل بس قدر يصل المستشفى!! وكانت مليانه لدرجة المدافرة!! والشرطة بتطلع في الناس!! الحاج بصعوبة حتى قدر يدخل!! قال ليهم في المشرحة ولا وين؟! قالو ليه م ماتت!! البت في غرفة العمليات!! الحاج لمن رجلينو رجفو وبقى يفتش لناجي بين الناس بس **** شاف ليه وم لقاه!! لانه كان عاااادي يخلط فيه لجدو الاخير!! وسأل الضابط عن الحصل!!؟ قال انه المجني عليها كانت نايمة في غرفتها مع اختها!! وزي الساعة واحدة ونص صباحاً دخل مجهول البيت ووقدر يفتح الباب وعتدى علي روان من دون اختها الكان سريرها اقرب للباب!!؟ فده بدل علي انها مقصودة!! الحاج قال اعتدى عليها بشنو؟!
الضابط جاوبو بأنه سدد ليها تلاتة طعنات قاتلة!! بس الدكاترة بيعملو العليهم!!؟ والباقي على رب العالمين…الحاج قال مافي زول شافو نهائي!! قال اختها سمعتها صرخت!! وقنتت!! اختها قامت مخلوعة!! واختها بتتأوه!! وهي من الخلعة مفتاح اللمبة راح ليها وبتسأل روان مالك ف شنو؟! وحست بزول دفرها لمن وقعت في الارض وطلع جاري!! فبقت تكورك!! ناس البيت جو جارين!! لم ولعو اللمبه لقو روان غرقانة في دمها واختها لم شافت بشاعة المنظر دخلت في حالة صدمة وللان كل م تتزكر الحادثة بتغمر!! الحاج قال ماف زول من ناس البيت شاف الفاعل!! قال لا للاسف!! وسأله اذا في تيم مشاء على منزل الضحية!! والضابط اكد ليه انه فريق من الادلة الجنائية ومكافحة الجريمة مطوقين البيت وحصرو في الادلة الموجودة!! الحاج قال عظيم!! ومشى يواسي والدها!! بس الاخير من شافو زاغ منو!! واتجنب ملاقاة الحاج!! ابتسم ومشى رقد في غرفة مخصصة للممرضين!! وبعد خمسة ساعات حتى الطاقم الطبي طلع من العملية!! الحمد*** نجحت بس لسسسه وضع روان حرج!! وممكن تفارغ الحياة تحت اي لحظة!!؟ الرائد كثف الحراسة علي العناية المكثفة!! وحتى الدكتور م بيدخل عليها الا بعد يتأكدو من هويته!؟ وفي صباح اليوم التالي كمال اتقبض من المستشفى كان جاي يطمئن على روان!! بس داهموه هناك!! وبسأل فيهم في شنو؟ انا عملت شنو!! بس ماف زول بقول ليه انت بتقول في شنو؟! لحدي ما وصلو النيابة!! جنابو احمد قال للحاج! لازم توريني سبب القبض وتحكي لي التفاصيل لانه رئيس النيابة الاعلى حيشرف شخصيا علي التحقيق!! لازم اعرف انت امرت بالقبض علي كمال علي اااي اساس!! الحاج قال ليه بسيطة!! خليك مرتاح هنا! وانا ح امشي اشرح ليه ملابسات القضية!! احمد اتغاظ من عدم تعاون الحاج!! وجا طالع!! الحاج وقفو جنب الباب!! وقال ليه ارجع تعال!! جنابو احمد قعد والحاج قال ليه راجع يومية التحري دي؟!! مصعب بتاع الدكان قال شاف عربية صالون بيضاء واقفة جنب العمارة في حوالي الساعة ٨!! وذكر انه اولاد الخفير طلعو قاشرين بس حسين م كان معاهم!!؟ ومن خلال اقوال صاحب العمارة!! انه الطابقين العلويات فاضيات!! والطابق الاول الداخلية والارضي فيه صيانة واصحابو مسافرين!!؟ طيب العربية حتكون جات لمنو!! والاكد لي اكتر انه جاي لحسين لم مصعب قال م شاف حسين طلع تاني!! معناه مشى مع صاحب العربية!! بس سيد العربية عرفت هو منو!! بعد م خلعت حسين باستنتاجاتي!! جنابو احمد اندهش!! وقال ليه يعني انت م كنت بتعرف كمال!! الحاج لبس نظارتو وقال ليه قوم امشي لشغلك!! وخليني اشوف شغلي!! احمد قال يعني يمكن يكون قتلها كمال؟؟ بس معقولة ف ربع ساعة ينفذ جريمتو ويطلع نضيف والرأس م كان شايلو معاه!! الحاج قال ليه يمكن يكون وصل حسين بيت المناسبة ورجع تاني!! جنابو قال ولا يمكن يكون القاتل حسين وبعد م اثبت مكان تواجدة ف المناسبة رجع تاني قتلها!! الحاج ابتسم وقال ليه كلللو وارد!! الرائد احمد ابتسم وقال انا مستمتع بالقضية دي ياااخ!! الحاج ضحك وقال ليه انا وريتك قبل المره وتاني بكررها ليك!! انت مستجد وفرحان بالترقية!! لكن الشغلة دي بتطير ليك قريب!! اتبادلو الضحكات وكل واحد مشى بطريق!!
_________________________________________
الحاج شال نسخة من يومية التحري ومشى بيها النيابة!! لم وصل لقى جنابو احمد قدامو!! ابتسم ليه بس الحاج طنشو ورجع لغرورو تاني!! سلم علي وكيل النيابة الاعلى!! والاخير استقبلو بحفاوة!! وسأل الحاج عن براثين القضية!! الحاج عاين لاحمد وشايفو متحمس وماسك تحرياتو التعب فيها!! فما حبه يحبطو!! قال ليه ياسعادتك قدامك الرائد احمد شخصياً! ومالك ومال تخاريف زول عجوز!! وبقو يضحكو!! الحاج قال الملف ده مسئول عنه جنابو احمد وفريق عملة!! انا بساعدهم فكريا بس!! وطلع خلاهم قال عايز يطلع علي التحريات حقه كمال!!؟
واحمد بدا يشرح لوكيل النيابة في اخر التطورات!! الحاج دخل مكتب التحقيقات! ولقى المتحري كان مساعد وكيل نيابة بس قالو طلع الفطور!! الحاج طلب الملف بس العسكري رفض!! وفي اثناء م بجادل في الحاج وبحقق معاه انت منو؟ وبياتو حق اديك الملف!! واصلا الدخلك المكتب شنو ومولانا ماف!!؟ وفجأة جا داخل جنابو حسام قريب روان!! كان الغضب بييتطاير من عيونو!! وقال يا عسكري ده السيد علي الحاح مدير الامن السابق!! العسكري اعتذر وبقي يتملق الحاج!! وبراحة انسحب!! الحاج قال ليه وانت منو كمان ي سعادتك!! كان اسمو مكتوب بين علاماتو العسكرية بس الحاج عايزو هو يعرف عن نفسو!! حسام وهو صاري قعد في الكرسي المقاصد الحاج وقال بفخر انا النقيب حسام الدين مصفطي!! الحاج ابتسم وقال انتو مالكم بقيتو تتفاخرو برتبكم الهايفة دي!! في زمنا نحنا لواء بمقصاتو في اكتافو م بتفرزو من حضرة الصول لا بالعربية!! جيل متفشخر خلاص!! وكمان منو القال ليك انا مدير شنو كده م ه عارف السابق؟! حسام شوية فكى جبينو وابتسم!! قال ليه لو م كبرنا ليك كومك م بعرفوك الجماعة ديل!!! الحاج ضحك بقهقهة وقال اخر زمن!! يااحليل ايامك ي الثعلب!!
جنابو حسام قال ليه خلينا في المهم!! انا عرفت من عمي انك جيتهم في البيت وانفردت بروان!! وفي نفس الليلة تعرضت لمحاولة اغتيال!! فياريت توريني اتكلمتو في شنو؟! ولا روان عارفة شنو بالضبط وكل شوية حياتها في خطر!!؟
الحاج قال اولا انا ما بحققو معاي!! ولا ح ابرر ليك افعالي!! وفي رائد مسئول عن القضية امشي ليه بفيدك!! ومن جابو سيرتو جا داخل متحمس وفرحان جنابو أحمد!! واتفاجأ بشوفة حسام!! كانو دفعة في المعسكر!! وماشين مع بعض حتى في الرتب!! بس احمد ترقيتو جات قبل حسام فبقى واعد نقيب والتاني رائد!! اتسالمو واحمد سألو عن سبب حضورو!! وحزن لم عرف انه روان قريبة حسام!! وواسواه بكلمات طيبات ووعدو بأنهم حيقبضو علي الجاني طالما انه كلهم متكاتفين!! وعاين للحاج وقال وبما انو جدنا ده موجود!! الحاج ابتسم وقام بصعوبة من الكنبة!! ما قدر يخبي حزنو وعيونو اتملو دموع!! وطلع مسرع!! اتزكر ولدو إبراهيم كان في عمر الضباط ديل!! وطلع ولع ليه سيجارة وكان بعاين لبكاسي الشرطة داخلة ومارقة وشاف متهم مكلبش!! اتزكر كمال!! جدع باقي السيجارة ودعسها برجلو ودخل علي القسم جنب النيابة!! وسألهم كمال فلان وين؟! العسكري الكان الحاج خلاه يقرا ليه يوميات التحري داك زاغ من شاف الحاج!! والمشكلة انه هو العسكري المناوب علي الحراسات!! ف اتصل لزميلو!! وقال ليه الراجل العجوز المخرف ده شوفو عايز شنو وخليه يتخارج!! م تخش معاه في جدال!! وقفل منو!! حتى بعداك رده للحاج وقال ليه اجيبو ليك!! الحاج عاين ليه بستهتار!! وقال لا احسن تدخلني معاه الحراسة!!؟
ومشى على مكتب مدير القسم!! كان شايل ملف استجواب كمال وكان بتطلع عليه لحدي م العسكري جا داخل وكمال وراه!! وطلع!! كان واقف والحاج بعاين ليه!! بعداك قعد!! الحاج قال ليه انا طلبت منك تقعد؟! فقام على حيلو!! الحاج سألو عن اسمو كامل وعمرو ووظيفتو وسكنو!! وبعد مسافة حتى قال ليه اقعد!! كمال قال انا ما عملت شيء!! انا مستحيل اءذي ولاء ولا حتى بالكلام!! وانا متألم من وفاتها اكتر من اهلها زاتو!! دي حبيبتي وزوجتي المستقبلية!! الحاج اتنهد بصوت مسموع!! وقال ليه انا ما ح اعيد التحقيق!! بس عندي نقاط معينة حأسألك منها!! وكل كلمة حتقولها خليك مركز وعارف انت بتقول في شنو؟! لانها ياقربتك من حبل المشنقة يا كانت سبب نجاتك!! كمال اتخلع!! وقال انا عايز محامي؟! الحاج قال ليه ده حقك!! كلف اكبر محامي ماف زول بمنعك!! بس طالما انت ف فتره تحريات وتحقيق وطالما انه ملف التحري م اتقفل!! ممكن تتحبس لحدي م نخلص!! وبالضمان م بتطلع!! كمال قال عايز تعرف شنو؟!
الحاج قال سبب جيتك للداخلية في وقت زي ده شنو؟ اتنهد وقال سألوني الليلة السؤال ده الف مره!! و**** و**** كانت زعلانه مني!! وجيت ارضيها لانها ممتحنة!! وما حبيت اشوش عليها!! الحاج قال وهي زعلانه منك لشنو توافق تشوفك في زمن زي ده!! قال نحنا بطبعتنا بنتشاكل عادي!!!وممكن في نص الشكلة اقول ليها بحبك او العكس!! ودموعو جات نازلة!! والحاج مركز معاه!! المهم اتصلت وقلت ليها انا تحت وجاي عليك!! قالت لي حرس الداخلية م بخليني اطلع!! انا قلت ليها حنكيهو!! وقولي ليه طلبت دليفري وماشة استلم!! فعلا خلاها تطلع وانا دخلت معاها!! بس سبقتها بالسلم الخلفي علي السطوح!! وهي ادت الحارس الساندوتش حقي وقالت ليه ماشة اكل واراجع فوق ف السطوح!! هنا البنات جايطات ما بقدر اركز!! فعلا وافق طالما انها طالعه فوق وم نازلة لخارج الداخلية!! وغير كده لانه الطوابق الفوق فاضية مرات البنات بطلعو براجعو فوق عادي ماف زول بمنعهم!! الحاج قاطعو وقال خلينا في المهم!!؟ بعداك حصل شنو؟!
قال طلعت لقيتها في اللكونة بتاكل!! هزرت معاها وقلت ليها ما بتاكلي براك انا زاتي جيعان!! بس ابت تديني و****… اعتذرت منها وطيبت خاطرها بكلمتين!! وحاولت اديها مصاريف بس رفضت وكانت تاني حتزعل مني بس تداركت الموقف! وغيرت الموضوع!! وجاها تلفون!! فأتغيرت ملامحها!! وقدر ما حاولت اعرف منو المتصل ابت توريني وقالت لي انت لسسسه بتشك فيني!! ولانَو سبب مشكلتنا الاولى تلفون!! م حبيت اعيد السيناريو!! الحاج قاطعو وقال سبب المشكلة كان شنو؟!
كمال قال كنا بنتونس والكلام جاب الكلام وجابت لي سيره مناسبة بت اهلهم!! وطلبت منها ترسل لي صور العرس !! وبعد تحانيس جاتني كم صوره!! وكانت من بيناتهم صوره راجل في عربية دفع رباعي!! سألتها ده منو قالت لي قريبنا!! وصورتو متعمل شنو ف تلفونك!! قالت نزلت في قروب الاسره وبتكون نزلت تلقائ في التلفون!! المهم الكلام م اقنعني وانفعلت الصراحة!!! وهي زعلت مني وقالت انا ما بثق فيها وبشك فيها كمان!! بعداك جيت صالختها!! -الحاج قال وينها الصورة!! كمال قال حزفتها و**** لانو كل ما اشوفها بزعل!! وقلت بدل م تكون سبب خلاف لقدام احسن احزفها!! وسألو برضو شكل الراجل كيف؟! قال اخدر عمرو ف الخمسينات تقريبا!! وعندو عَنب في وشو!! الحاج قال العربية لونها شنو؟ قال ابيض!! الحاج قال اها وبعداك حصل بيناتكم شنو؟! قال طلبت مني انزل عشان م اعمل ليها مشكلة في الداخلية!! واذا في زول شافني معاها حيسيء لسمعتها!! المهم انا ابيت بس دفرتني عشان انزل لمن فريمي وقع!! وابت تخليني افتشو!! قالت لي بجيبو ليك بكره بعد الامتحان!! ودعتها ونزلت!! ودي اخر مره اشوفها!! قال ليه تاني م اتكلمت معاها نهائي!! قال لا؟! الحاح قال ليه شكرآ ليك!! ونده علي العسكري جا ساقو!!! وقال اذا كان كلامه صحيح!! مين الاتصل علي ولاء وخلاها ترتعب!! وصاحب الصوره ده منو؟! ولو فعلا هو م اتواصل معاها تاني!! طيب مين البكذب هو ولا الخفير القال كمال كان بتكلم معاها في العربية؟؟! قفل النوتة حقتو واتصل علي جنابو احمد وسالو عن سجلات شركة الاتصال اذا جابوها!! والاخير قال ليه انها امام وكيل النيابة الأعلى!! الحاج قفل في وش جنابو احمد ومشى دور عربيتو وطلع علي النيابة العامة!!
نواصل بعدين
يتبع …………
الجزء الثامن من رواية القاتل المختل
الحاج وهو في متجه علي النيابة العامة اتصل عليه ناجي اول ابى يرد ععليه!! لانه مغيوظ منو بسبب الخلعة الدخلها في الحاج لم قال ليه روان اغتالوها!!؟ وصل النيابة وخلا تلفونو في العربية ودخل!! سأل عن رئيس النيابة العامة بالولاية!! قالو ليه مشغول!! طلب منهم يبلغوه انه علي الحاج منتظر بره!! واذا قال مشغول ممكن اجيه مره تانية…!
بس م اشتغلو بيه كتير!! وتلفونو ما معاه عشان يتصل على زول يساعدو!! وبعد صعوبة نزل من الطابق التاني!! ولم وصل البوابة لمن نفسو انقطع!! وسبه! المقر والقضية!! ومن مسك التلفون!! جات خاشة مكالمة!! وفتح الخط اتفش في المتصل!! طلع صاحبه العقيد! الادى رقم الحاج للمستشار صاحب ناجي!!؟ هزر معاه واتبادلو الشتائم!! وقال للحاج مالو نفسك خامي!! م تكون هنااااااي!!؟ انت موووش حادي علي ولدك؟! الحاج ضحك لمن كحة!! وقال ليه صاااح خسرت قرة عيني!! بس لازم اجيب اخوه!! وتاني رجعو لكلامهم الكيف كيف دااااك!! بعداك الحاج حكى ليه وهو وين وبعمل في شنو؟! العقيد ضحك!! وقال معقولة في زول في اجهزتنا العدلية ما بعرفك ولا سمع بيك!! كان كده نحنا كبرنا و****!! يحليل وقت عندنا شنه ورنه!! الحاج ضحك وقال ليه زمنا فات وغناينا مات!! بس قال للحاج خليك قبلك انا بتصرف!! الحاج قال ليه انا لسسسه الثعلب!! بعرف احل مشاكلي!! انت خليك بعيد! وقفل منه!! وهو داخل علي المبنى! لاقاه واحد وقال يا حاج انت لسسسه واقف هنا!! الحاج قال اخيرا لقيت زول بيعرفني!! وجا عليه!! الشاب ضحك!! وقال ليه ما بعرفك وبس احتراما ليك ولانك كبير في العمر قلت ليك ياحاج!! الحاج ابتسم!! وقال ليه امشي من وشي ياابني الليلة سبيت كتييير!! ما ناقص ذنوب!!؟ الشاب استغرب من وقاحة الحاج! وقال ليه بإنفعال!! عارف انا منو؟! ولا انت بتكلم منو؟ الحاج ضحك وقال بكلم جيل الفشخرة!! امشي كلم رئيسك وقول ليه في زول قالك ياكلب! الثعلب منتظرك بره!!! والشاب انفعل وبقى ينده لرجال الامن!! ولمحاسن الصدف!! جا ماري مستشار!! وانتبه للجوطة!!؟ ولمح الحاج!! جا عليه ملهوف!! سلم عليه واعتذر!! وقال ليه الما بعرفك بجعلك يا ريس اتفضل!! والشاب كان مستغرب!!؟
الحاج قال ليه ده منو؟! المستشار قال ليه تقصد الطايش ده!! الحاج ابتسم أومئ برأسه! قال ده شالوه في الجهاز قريب!! معايناتهم شهرين ماتمت!! الحاج بقي يضحك!! وقال ليه بس اسمح لي يازعيم أسألك؟! سبب الزيارة شنو؟! طولنا شديد ماشفناك!! الحاج قال ليه بخصوص قضية الطالبة ولاء!! المستشار اندهش!! وقال ب****!! ماسك التحقيق انت؟! الحاج ابتسم بس م رده!! المستشار قال **** يكون في عون المجرم!! وضحك!! ودخل الحاج لمكتب النائب العام!! ولقاهم مجموعة!! شكلهم طالعين من اجتماع!! سلمو عليهم!! منهم البعرفو معرفة شخصية ومنهم السمع بيه من زملائهم!!؟ وبعداك طلعو خلوه مع وكيل النيابة الأعلى!! وقال للحاج عرفت انك مسكت الحقيق!! اها ماشي كيف؟! الحاج قال ليه بنفس طريقه عملكم!! مولانا ابتسم وحكى راسو؟! وقال ده مدح ولا ذم!! عشان اقدر ارد!! الحاج ضحك وقال في جهاز اداري في البلد دي بستحق المدح!! ضحكو!! وقال ليه زي ما انت لسانك متبري منك بس فاقدنك و****!! وبعد الونسة الطويلة دي حتى الحاج اتزكر موضوع السجلات!! وقال عايز يشوفها!! فعلا مولانا قام علي حيلو ومشى علي دولابه!! وطلع ملف ابيض مختوم بالاحمر!! فتح الظرف!! والحاج استلمو بلهفة!! وشاف اخر عشرة مكالمات!! لقاها لروان وكمال وابوها وواحدة اسمها نازك!! الحاج استغرب لم ما لقى المكالمة القالها كمال!! الخلت ولاء تتوتر!! من الساعة سبعة وللساعة ثمانية ونص!! م دخلت عليها مكالمة!! ونازك اتضح انها متصلة عليها قبل الجريمة بعشرة دقايق!! المكالمة الساعة٩وتلت وتقرير الطبيب اوضح ان ولاء فارقت الحياة في حوالي الساعة٩ونص او نص وخمسة دقائق مساء!! طيب نازك دي منو؟ وقالت ليها شنو!!
الحاج قال لمولانا!! ماممكن شركة الاتصال تمدنا بتسجيل صوتي للمكالمات!! لانو دي تقارير ساااي بس بتحدد زمن المكالمات!!! مولانا وكيل النيابة الأعلى! قال للحاج طلبنا منهم مدنا بالتسجيلات ويمكن تصل اليوم اذا جات!! حنرسلها ليك علي القسم!! الحاج شكرو وطلع!! وهو في عربيتو اتصل علي جنابو احمد قال ليه انت ف القسم!! قال ايواااا!! الحاج طلب منه يفتش في يومية التحري ويوريهو نازك دي منو وقالت شنو؟! احمد قال ليه خير نازك دي منو كمان!! كالعادة الحاج قفل في وشو!! ولم وصل القسم!! سأل عن كمال قالو طلع بضمان!! دخل علي جنابو احمد وقال ليه طلع امر قبض في مواجه كمال قبل ما يهرب!! جنابو احمد بخلعة قال ليه هو القاتل!! الحاج طلع من المكتب ومشى للمتحري قال ليه طلع لي تحرياتك مع نازك سرييع!! فعلا فتش اليومية وطلع اقوالها!! والحاج قال ليه اقرا لي!! والمتحري بدا يتلو في اقوال نازك!! وكانت بداية عادية!! اسمها عمرها سكنها دراستها وانها زميلة ولاء في السكن!! لحدي ما قالت كنا بنقرا مع بعض في السطوح وانا رجعت الغرفة خليتها!! وتاني نمنا وما كنا عارفين انها م رجعت الغرفة!! والصباح لم لقيناها ماف!! قلنا بتكون طلعت تقرا فوق لأنها بتعملها كتير!! وطلعنا علي الجامعة!! الحاج قال يعني ما جابت سيرة عن اتصال ولاء ليها!! وقال للمتحري طلع رقم تلفونها!! فعلا شالو من اول صفحة مع بياناتها؟! وقال لجنابو احمد استدعيها!!؟
فعلا اتصلو عليها كانت في الجامعة!! قالت بعد تخلص محاضرات حتجي القسم!! وفي الأثناء ديك جابو كمال وكان المحامي حقو معاه!! دخلو علي جنابو احمد!! طلب منو يقعد!! ونبه المحامي انه يلزم الصمت!! ولا حيطلب منه يطلع بره؟! دي اعاده استجواب!! المحامي قاعد وبقي يسمع!! الحاج فتح باب المكتب!! وجا داخل وقال لكمال!!! شكلك مشتاق لحبل المشنقة!! المحامي اعترض علي اسلوب الحاج الترهيبي!! وقال دي انتهاك لحقوق موكلو!! بس ماف زول اشتغل بأعتراضو!! الحاج قال ليهم لو سمحتو اطلعَو كلهم!! المحامي اتعنت وقال م بطلع الا وموكلو معاه!! الحاج قال للرائد احمد!! لو سمحت سيادتك!! تحقيقي سري!! بمعني اطلعو كلكم!! طوالي احمد قام وشال الكاب حقه وطلع!! والمحامي جاط وطنطن!! الحاج قال ليه محترمنك عشان مكانتك ياسيد!! فبتمنى تحترم قوانينا!! قلنا تحقيق سري اتفضل!! وكان متنرفز وبأشر للمحامي علي الباب!! المحامي اتنفس بصوت مسموع!! وقال لموكلو اي حاجة ما عارفها قول ما عارفها!! وادخر كلامك للمحكمة!! الحاج قال ليه انت قريت قانون وين يااستاذ؟! تحرض المشتبه به قدام القوات النظامية المشرفة علي التحري والتحقيق معاه!! وقبل ما المحامي يتطور الموضوع مع الحاج جاه جنابو احمد وقال ليه اتفضل معاي استاذ!! نحنا في تخقيق سري!! وم اطن محتاج اشرح ليك شنو يعني تحقيق سري!! المحامي اتنرفز وقال عارف!! بس الضابط المعاكم ده مستفز!! وم عندو اخلاق مهنية!! احمد ابتسم وقال ليه انت لسسسه ماشفت شي!! ومشو مكتب المشرف!!
___________________________________________
الحاج قال لكمال عايز تقول شنو ودي اخر فرصة ليك في انك تبرر موقفك!! كمال قال كل العندي قلتو المره الفاتت اعملو العايزين تعملوه!! ما خايف؟! بس حولوني المحكمة وانا بعرف ابرئ نفسي كيف قدام قاضي بفهم!! الحاج!! لقى واحد في لئيم زيو!! وقال ليه جدا!!؟ اعتبرك مقر بذنبك وحابي تترحل علي المحكمة!! خلاص اقعد في السجن لحدي م نحنا نكمل تحرياتنا!! ونشوفك حتمشي المحكمة برتك ولا حتسوق معاك منو!! واوعدك حتلقى عندنا احسن ضيافة!! كمال هاج وقال بتهددني!! الحاج قال ممكن اكون بهددك لو قلت حدخل خاذوق في قفاك!! بس انا بوريك في اجراءاتنا م اكتر!! ونده علي العسكري جا داخل في اقل من عشرة ثواني!! الحاج قال ليه وديه الحراسة!! ويترحل بكره علي السجن!! لحدي ما تحرياتنا تخلص!!؟ كمال كان متردد!! الحاج بنهره قال للعسكري كلبشو اول!! العسكري بقى يعاين للحاج مستغرب!! وطلع الكلباش!! وهنا كمال اتجهجة!! وقال انا موظف!! وسمعتي!! انا ح احاسبكم كلكم!! لم لقى المرضوع جد!! قال و**** انا م خبيت شيء وقلت كل العارفو!! الحاج قال ليه ما قلت انك اتصلت علي ولاء تنزل ليك من الداخلية!! وم حصل!! وقلت اعتذرت منها وكنت بتكذب!!! والاهم من ده كلووو انك مثلت فيها بتتكلم معاها لم كان حسين الخفير راكب معاك!!؟ عندك توضيح للكلام ده؟! ولا احسن تقولو لقاضي!! لانو رجل قانون ونحنا بلطجية سااااااي!!؟ كمال حيلو مات! وقعت بقوة علي الكرسي ويديهو مكلبشة!! وبقى يرجف!! ولمن ملامح وشو اتغيرت!! قال للحاج انا ما قتلتها!! الحاج قال اثبت لي؟! كمال بقى يعاين للعسكري!! الحاج قال ليه اقعد واكتب لي اقوالو!! العسكري اتكيف عايز يعرف الحصل!! جرا كرسيهو!! ومسك ورق فلسكاب وبدأ يدون!! كمال قال كنت جاي اراضيها!! وعملت ليها مفاجاة مع نازك زميلتها في السكن!! قلت ليها خليها تطلع السطوح! وانا ح افاجئها هناك!! وفعلا ده الحصل!! ادسيت في السطوح وهي جات نظام صحبتها عايزاها في موضوع!! بس قبل ما اظهر شفتها بتتكلم بتلفون تاني!! غير حقها!! الانا بعرفو!! وقلت عادي يمكن يكون شالت تلفون واحدة معاهم وم عندها رصيد!! بس صعقت لم سمعتها بتقول ليه انا ما بحبك ولا عايزه اشوف وشك وكان تاني ظهرت لي حابلغ عنك!! وتلفونك تعال شيلو من خفير عمارتنا!! انا حسيت براسي لفى!! بالجد رجولي رجفو!! لم جيت طالع عليها لم صرخت!!؟ ووشفت الغفير ضوى علينا بالبطارية من تحت!! يعني في شنو؟! فقربت عليها وهي انهارت!! وبقتت تتمتم وتقول لي كمال انت هنا من متين؟! انت بتعمل شنو هنا اصلا!! مسكتها من اكتافها!! وقلت ليها انا جاي اراضيك!! انا م قدرت استحمل زعلك مني وانتي داخلة علي امتحانات!! انتي بتخونيني ي ولاء!! نكرت وبقت تبكي!! انا قعدت في الارض!! جات علي دفرتها لمن وقعت علي قفاها!! وما بتزكر قلت ليها شنو بالضبط!! بس كنت منفعل شديد!! قلت ليها خليك مع عفنك ده وانا ماشي!! كانت بتتراجني!! اول مره ولاء تترجى ليها زول!! قالت لي انا خايفه!! م تخليني براي!! ما بقدر اواجهو براي!!؟ ازعل مني مابلومك بس م تخليني براي حموت!! ولم قربت علي ضربتها كف؟! وشافتني نازك صحبتها!! اتخلعت!! وجات جارية!! حسيت بأنها عايزة تنادي الحارس!! طوالي نزلت!! الحاج قال ليه والسندوتش الادتو ولاء للحارس!! والونسة والاعتذار وكل القلتو كان كذب!!؟ كمال اول سكت!! الحاج قال يعني بمكن تكون اسسسه بتكذب!! قال لا ما كذبت المره دي!! وحتى الفاتت ما كلو كذب!! سندوتشي اديتو لنازك قبل م الاقي ولاء!! الحاج قال وولاء كيف عرفت انها اكلت التاني!! ولمن ابت تديك معاها!! ده كلو تمثيل!! الحاج قال ليه على كلاً كلامك ده براه حيدينك!! وقال للعسكري وديهو الحراسة لحدي ما نشوف شنو الحقيقة وشنو الكذب!! وطلع معاه وهو منكسر وخايف!! والمحامي بره بسأل فيه مالك في شنو؟! وكلام كتير بس ما رده عليه!! واكتفى بالنظرات بس!!؟
وقبل ما يصل الحراسة جات نازك داخلة وشافتو مكلبش وموقفنو قدام الحراسة واتجمدت لخمسة ثواني ووقعت مغشي عليها!!
نواصل بعدين
يتبع ……..
الجزء التاسع من رواية القاتل المختل
العساكر جو جارين عليها!! ومستغريبن دي منو الصدمت دي!! بس لم كمال قال نازك!! الحاج كان في المكتب وسمعو!! طلع مسرع لقاهم شايلنها!! ختوها في كنبة في الصالة! ودخلو كمال الحراسة!! الحاج كان براجع في اقوالهم!! وكتب بعض الملاحظات!! وشرد بتفكيره لحدي ما داهمو النعاس!! وقبل ما يغمض دخل عليه جنابو احمد قال ليه البت فاقت!! ح استجوبها اذا حابي تحضر معانا!! الحاج ابتسم!! وقال ابدا معاها انا جاي!! وفعلا طلع ودخلوها مكتبو!! وبدا يحقق معاها!! ولانه قبل كده تم استجوابها!! سألها سؤال مباشر!! لشنو ما قالت انها شافت كمال بل اتفقت معاه أنه تخلي ولاء تطلع ليه السطوح!!؟
بقت تبكي وقالت عشان كده ما قلت ليكم!! عشان ما تتهموني!! و**** انا ما عارفة الحصل شنو!؟ جنابو احمد قال ليها احكي لي الحصل وبدون كذب وتلفيق!! لانك يقيتي مشتبة به ثاني!! وممكن تكوني شريكة في الجريمة!! بكت وانهارت!! وبقت تحلف انها ما عملت شي!! وكل الحصل إنها كانت في الحمام لم طلعت لقت كذا مكالمة من كمال!! رجعت ليه واتفق معاها انو ولاء زعلانة!! وهي كانت عارفه انها متشاكلة معاه!! وشايفاها متغيرة من كم يوم!!؟ عشان كده وافقت تساعد!! وطلب منها تخلي ولاء تطلع السطوح!! في حدود الساعة٨ مساء!! وقالت ده الحصل قلت ليها عايزاك في موضوع ناصر!! والحاج جا داخل ملهوف!! قال ليها انتي بتعرفي ناصر!!؟ نازك اتخلعت وقالت عرفتو عن طريق ولاء وروان!! الحاج قال ليها بتعرفي شنو؟! عاينت لجنابو احمد!! قال ليها جاوبي!! قالت ليه راجل اتعرفت عليه روان وولاء وكل يوم طالع ليهم بدراما!! وفصلوها منو؟! الحاج قال ليها منو العرفتو اول!؟ نازك قالت!! روان !! الحاج لبس نظارتو!! وقال ليها كملي!! قالت طلعت معاي السطوح وقالت لي مالو التافة من قبيل بيتصل علي وابيت ارد!! وريتها اني شفتو من كم يوم في بداية الشارع وفعلا ده الحصل!! احمد قال ليها يعني بتعرفي شكلو!!؟ قالت لا؟ بس شفت عببيتو كم مره جنب الداخلية كان موصل ولاء!! الحاج قال عربية لاندكروزر بيضاء!! قالت اااي!! اها وبعداك!! قالت قلت ليها ثواني اجيب تلفوني منتظرة مكالمة من ابوي عايز يحول لي مصاريف!!؟ ورجعت علي الداخلية!! لاقيت كمال طالع عليها!! سلمت عليه وشكرني وطلع سندوتش من الكيس!! رفضت بس اصر علي!! وسابو ف يدي وطلع!! وانا دخلت الداخلية!! وكنت مركزه عشان قبل م يطلع زول فوق اتدارك الموقف!! وفعلا بعد ربع ساعة بالكتير!! الحارس جا وسأل من ولاء !! قلت ليه بنقرا مع بعض ف السطوح!! وانا جيت اشيل دفتري نسيتو!! وفعلا خطفت دفتري وطلعت سريع علي فوق!! وعلي دخلتي اشوف!! كمال بيضرب في ولاء!!! انصدمت!! وما قدرت اصدق!! ما عارفه حصل بيناتهم شنو؟! بس حسيت انه استغلاني!! وعن طريقي اتمكن من صحبتي!! احمد قال طيب اذا استغلاك زي ما قلتي لشنو اتسترتي عليه!! وما قلتي كلامك ده من اول تحقيق!! قالت وهي بتبكي!! لاني جريت انادي الحارس !! بس هو جا جاري وراي!! ونزل مسرع!! انا رجعت لولاء لقيتها قاعده في الارض وبتبكي!! لم شافت ظلي لمن اترعبت!! قلت ليها دي انا!! واعتذرت منها وحضنتها!! وبقيت انبذ ليها في كمال!! وحكيت ليها الحصل!! انفعلت!! وقالت لي ليه تعملي كده ولامتني!! وفي اثناء م نحنا بنبكي!! جا الحارس شكلو سمع صوت البكاء ولا جري كمال م عارفة!! نهرنا وقال في شنو!! قلت ليه ولاء خايفه من امتحان بكرة!! وقالت م قارية!! اتكلم معاها!! وطلب مننا ننزل الداخلية!! بس ولاء قالت ليه مخنوقة!! والبنات جايطين ما بتقدر تستوعب!! وخلاها تقرا فوق!! وبتزكر وانا نازلة قالت لي شيلي الكيس ده معاك!! انا ابيت!! عرفتو ده الجابو كمال!! وندمت لاني شلت منو!! لم رفضت ادتو للحارس شالو ونزل!! الحاج قال ليها دقيقه!! كيس المطعم شالو الحارس حق الداخلية انتي متأكدة؟! قالت ايوااا!!؟ بعداك انا راجعت شوية ونمت!! صحيت الصباح لقيتها مافي!! قلت بنكون طلعت بدري ولا لسسسه زعلانة مني!! وقلت اراضيها في الجامعة!! والحصل بعداك انتو عارفنو!!؟
الحاج قال ليها انتي قلتي ناصر كان بتصل عليها بإستمرار!! انتي متأكدة!! قالت انا ما حصل سمعت صوتو بس ولاء كانت بنتجنبو!! الحاج قال السبب شنو؟! سكتت!! جنابو احمد قال ليها الزمن خلصينا!!؟ قالت شكلو عايزهم يمشو معاه في السكة الغلط!! بس هم رفضو!! وبقى يتصل عليهم وبضايقهم!! الحاج قال تقصدي بصيغة الجمع!! احمد قال روان وولاء!! قالت ايوااا!! بعداك جنابو احمد اعاد استجوابها في نقاط معينة!! وكتبوها تعهد انها م تغادر المدينة لحين اكتمال التحريات!! وطلبو ولي امرها!! ولا اي ذكر من اسرتها!! وكانت مرعوبة!! بس خلوها تطلع!! احمد قال للحاج شفت الشغلة جاطت كيف!! الحاج ابتسم وقال ياداب الصورة وضحت!! واتزكر حاجة وطلع ورا نازك مستعجل وقال اقيفي يابنتي!! اتلفتت ولامحها ما بتتفسر من شده الخوف!! قال ليها المرحومة عندها كم تلفون!!؟ قالت اتنين!! الحاج ابتسم وقال ليها شكرا ليك!! بس اديني رقمها التاني!! قالت رقم جديد جابو ليها ناصر!! بس ما عندي!! بتزكر يوم اتصلت علي من رقم غريب وسألتها قالت ده رقم جديد يمكن يكون هو!!! قال ليها بلهفة اديني ليه!! قالت ليه بكون ضايع في سجل المكالمات لانو الكلام ده ليه قريب الشهر!! بس بعد اصل البيت ح افتشو وارسلو ليك!! وشالت رقم الحاج!! وهو رجع علي مكتبو ما مشى لجنابو احمد!!
____________________________________
وقعد يفكر!! روان قالت ولا اتعرفت علي ناصر يوم ركبت معاه من الجامعة!! ونازك قالت كان بيعرف روان اول!!
وكيس المطعم!! كيف القاتل قدر يتحصل عليه إذا فعلا الحارس شالو ونزل بيه مع نازك!! وكيف انا لقيت مقايا السندوتش في حافة البلكونة!! يا نازك بتكذب!! يا الحارس وراهو سر خطير!! واهم سؤال!! وينو تلفون المرحومة التاني؟! والشالو منو؟! واتصل على ناجي!! الاخير رده متأسف عن الموقف الحصل!! وانه ما كان يقصد يخلع الحاج بس هو زاتو اتخلع لما قالو ليه روان قتلوها!! الحاج قال ما مشكلة!! اها روان فاقت!! ناجي قال وضعها مستقر بس لسسسه في العناية!! قال ليه تمام!! ناجي سأل الحاج عن القضية!! الحاج قفل الخط في وشوو!! ودخلت عليه مكالمة من رقم غريب!! لم رده!! لقاه ده رجل أمن جايب للحاج تسجيلات شركة الاتصال!! ومسكهم وهو متحمس!! كانو في فلاش!! مادى العسكري وجاهو جنابو احمد!! قال ليه شنو الخيانات دي!! منو الماسك التحقيق ده!! الحاج حاول يستفزو قال ليه ما مشكلة تعال اتعلم!! جنابو احمد ابتسم!! وقال ح اعلمك انت بشغلو الفلاش كيف؟! الحاج بقى يضحك!! وفعلا احمد وصل ليه الفلاش في جهاز معاه!! وبدو يسمعو ف التسجيلات!! وزي ما كانت في التقارير ماف اختلاف!! وحتى اتصال ولاء بروان قبل الحادثة بيوم كان نفس الكلام بالنص!! بس الحير الحاج!! مكالمة كمال الاخيرة!! فعلا نفس الكلام القالو حسين الخفير!! كان بتكلم عن موضوع فريم اسود!! وولاء مستغربة!! وبتقول كمال انت كويس في شنو؟! فريم شنو؟ انت مسامحني!! وقفل!! طيب لشنو اتصل عليها وهو ضاربها قبل دقائق!! ليه عايز يحسس عم حسين انه طبيعي معاها وانهم مبسوطين!! في حلقة مفقوده!!؟
الحاج سرح بعيد واحمد حس بخيبة امل لانه ما وصل لشي!! الحاج اتصل علي صاحب ولدو المرحوم عندو وكالة سفر!! سلم عليه!! وقال عايزك في خدمة!! داك قال ليه اتفضل!!؟
الحاج قال ليه في شخص دخل السودان من اقل من ستة شهور!! عارف اسمو بس وبعض الصفات ح اقدر القاهو!! صاحب ولدو ضحك!! وقال يعم علي كأنك بتفتش في إبرة في كومة قش!! بس اذا عندك زول في الخارجية بفيدك!! الحاج شكرو واتصل علي المدير التنفيذي في دائرة الهجرة والجوازات!! بوزارة الخارجية!! وطلب منو نفس الطلب!! قال بس لو عرفت لي تاريخ دخلو السودان ولو بالتقريب واسم الدولة الجا منها اوعدك القاه ليك!! بس اديني اسمو!! انا بحاول!! الحاج اداه المعلومات المعاه وقفل!!؟
وبقى يراجع في الادلة المصورة!! وما لاقي اي شي!! ونفس الصور الانطبعت في راسو!! جثه منتفخة!! رأس مقطوع يخلو من اللحم!! كيسين واحد اسود كبير حق قمامة!! وداخلو واحد ابيض تابع لمطعم معروف!! وقفازات!! الحاج راجع تقرير الأدلة الجنائية لقى انه كلها تالفة ماف اثر لاي علامة او رأس خيط!! قفل شاشه التلفون ورقد علي الكنبة!! وبقى مشوش!! مين البيلعب عليه!! مين القتل!؟ وفضل ليه اخر كرت!! اذا نازك لقت الرقم من خلال سجلات الشركة حيعرفو ناصر ده منو؟! ولا روان تفوق وتشد حيلها عشان تحكي ليهم الحصل بدون تلفيق؟! وحس بألم في مفاصله!! واتزكر انه ليه يومين ما نايم!! جرجر رجولو وما قدر يسوق عربيتو!! ركب ليه ترحال ورجع شقتو!!
اخد ليه نومة وما صحى لا المغرب!! بعد صلى لقى مكالمات من نازك ورسالة!! فتحها ملهوف ولقاها رقم ولاء الجديد!! اتصل لمدير شركة الاتصال السابق للشركة المعنية!! وسلم عليه وقال اتصرف لي عايزك في موضوع مهم!! حرسل ليك رقم وعايز صاحب الشريحة واخر عشرة مكالمات بالارقام والاسماء واكون شاكر ليك!!! صاحبة ضحك وقال ليه انا بقيت م مسئول عن الشركة!! الحاج قال ليه اتصرف!! المدير السابق!! سكت مسافة وقال ليه خلاص تمام!! ساعتين بالكتير وح ارجع ليك!!؟ وكانت اطول ساعتين في حياة الحاج العملية!! ولدرجة انه بتمشور في البيت من شدة القلق!! وماسك التلفون في يدو!! الحاج!!؟ وجات المكالمة المنظرة؟؟!
نواصل بعدين
يتبع ………
الجزء العاشر من رواية القاتل المختل
الحاج اتنهد بصعوبة!! وقال الووو!!؟ صاحبو المدير السابق للشركة قال ليه قول مصطفي أفضل مني!! حتى اوريك!! الحاج ضحك وسباه!! والاخير بادلو الضحكات!! الحاج قال اها بشرني!! صاحبو بتفس سخن!! قال الشريحة طلعت بأسم نصر الدين محمد احمد!! الحاج قال يعني اسمو ماناصر!؟ اها كمل!! قال ياسيدي الشريحة فيها تلاتة أرقام!! اتنين بإسم نصر الدين والتالت لشخص اسمه قمر الدولة!! اما اخر عشره مكالمات كانو بين نصر الدين ونصر الدين بس المستخدم ولاء!! الحاج قال حلووو ما قصرت على!! اردها ليك في مزززه عشرينية تجدد ليك شبابك!! مصطفى ضحك!! وقال ليه اعقل يااخ **** يتوب علينا!! الحاج ضحك وإنشراح!! وقال بس جاري للحرام!! انا قصدي نعرس ليك نعرس ليك!! صاحبو ضحك وقفل في الحاج الخط؟! الحاج لمن بقى يكح من شده الضحك؟!! واتنفس واخد نفس طويييييل واتزكر ولدو!! قام اخد ليه دشش!! ودخل المطبخ لقى التلاجة مليانة!! بأجر مره في العمارة الساكن فيها بتطبخ ليه بالاسبوع!! فتح كذا صنف!! بس نفسو اتسدت!! بالرغم من انه كان جيعان!! عمل ليه قهوة وولع ليه سيجارة وقعد في التلفزيون!! وبقلب في القنوات!! اتصل عليه جنابو احمد وقال في طريقه اجي عليك!! الحاج ابتسم وقال عايز تجي تتعلم مني بنوم كيف؟! احمد ضحك وقال لا الموضوع مهم!! الحاج سكت لوهلة! وقال تعال اصلا انا ما بنوم بدري!! وفي خلال نصف ساعة جنابو احمد ضرب الجرس!! الحاج قام فتح ليه!! احمد دا يدو للحاج بإندفاع ولهفة!! الحاج ابا يسلم عليه وقال ما بصافح؟! احمد ضحك لمن خبط زاوية الباب!! الحاج قال ليه ادخل ولز الباب وراك!! وسبقو علي الصالون!! جنايو احمد بقى يتلفت يمين شمال!! وقال للحاج البيت الكبير السمح ده عايش فيه براك!! الحاج ما رده عليه!! وبقى يشرب في قهوتو!! لم انتبه لقى احمد بعاين ليه!! حكى راسو وقال هدااك الكولر!! اشرب وادخل المطبخ كب ليك قهوة!! احمد ولا كذب!! ختى التلفون والكاب! ومشى شرب ودخل المطبخ!! وغيبتو طالت!! الحاج حاول يشوفو!! بس الحيطة حاجباه!! وشوية كده وشم ريحة الاكل!! بقى يتبسم! ودموعو ملو عيونو!! سبحام **** نفس تصرفات ابراهيم ولدو!! واحمد جا طالع من المطبخ وشايل الاكل!! قال للحاج جيرانك عندهم مناسبة ونقصو الاكل في تلاجتك ولا شنو؟! الحاج قال ليه انا فاتح مطعم هنا!! احمد ضحك وقال عايز اعمل لي كرشة زي حقتك دي!! واتبادلو الضحكات!! في الاول الحاج رفض ياكل!! بس احمد اصر عليه وبدوور والحاج نفسو فتحت!!؟ كأنه ليه شهرين ما ماكل!! احمد بعاين ليه وبتبسم!! وكل شوية يقول ليه امشي ازيدك!!؟ وكانت قعدة سمر حلوه!! بعداك احمد كب لنفسو قهوة وقال للحاج بكل فخر وعزة نفس!! جايك بخبر مستحييل تتوقعو!! الحاج ابتسم وقال ليه الحاجة الوحيدة المستحييييل اتوقعها انو المرحومة ولاء تكون ف المطبخ داك وعملت الاكل هي!! احمد ضحك! وقال اسمع واحكم!! الحاج قال اها قول؟ جنابو احمد عدل قعدتو وبقى مقاصد الحاج!! وقال العربية اللاندكروزر؟! طلعت بإسم!!! وقبل ما يكمل الحاج قاطعو وقال بأسم نصر الدين محمد احمد!!؟ احمد قام على حيلو وقال كنت عارف وما كلمتني!!؟ عرفت كيف ومتين!! ما تتخيل انا تعبت قدر شنو لحدي ما اتحصلت على المعلومة دي؟؟! الحاج ضحك وقال انت لسسسسه صغير لازم تجري وتتعب وتشقى!! بس انا عرفتها وانا في مكاني ده!! ومن كنبتي دي ما قمت؟! احمد اتغاظ!! الحاج قال ليه بس بحيك على مجهودك!! بالجد انت مجتهد!! ولكل مجتهد نصيب!! ويمكن بعد سبعين سنة لقدام تبقى الثعلب2!! احمد ضحك!! قال للحاج عرفت كيف؟! قال نازك ادتني الرقم وبطريقتي الخاصه عرفت صاحبه واكيد صاحبة هو صاحب العربية!! احمد قال! وانا الحاي ملهوف ومتحمس!!؟ الحاج قال وانت استعنت بمنو!! يمكن يفيدنا بشي ف المستقبل!! احمد قال ما اظن نستفاد شي!! المهم وانا خاشي الفيس شفت قروب حق اناقة ولا اسمو شنو ما بعرف!! ظهرت لي ماركات عالمية وانا بقيت اشوف في البدل ولمن اخترت خقة العرس!! الحاج بنهره كده قال ليه خش في الموضوع!! قال المهم وانا بفتش شفت ملابس شتوية ومن ضمنها جونتات!! الشكل كان مألوف بس ما عارف شفتهم وين!! لحدي م نسيت الموضوع وفتخت ملف القضية وشفت القفازات نفسيهم حقات الجاني!! استغربت من القاتل اللابس قفازات ب٨٠دولار ماركة شانيل ولا ميشيل م متأكد!! الحاج قاطعو وقال انت متأكد!! ورا الحاج صورة القفارات وقارنهم بمعروضات الجريمة!! الحاج قال معناها القاتل فاحش الثراء وبعداك رجعت لاقوال المشتبه بهم فلفتت انتباهي اقوال نازك قالت شافتو حولين الداخلية كم مره!! ففتشت كل كاميرة مراقبة ف المنطقه بالشارعين!! ولحدي ما ظهرت لي بالشارع الرئيسي البوصل للداخلية!! نفس المواصفات واللون!! وفي كاميرتين مخلفات ونفس الوقفة وبشارعين مخلفين!! قربنا الصوره اكتر وشلت رقم اللوحة واديتو لزميل لي في المرور وطلع معاه اسم المالك نصر الدين!! الحاج ابتسم وقال ليه جهدك مقدر و****!! ومشروع محقق ناجح!! بس خلي الغرور وشوفة النفس!! احمد ضحك وقال في زول بحصل غرورك؟! وبقو يضحكو!!
الحاج قال نداهمو في الليل ده ولا نصبر للصباح!! جنابو احمد قال للحاج رسلت رجال مباحث يجيبو لي خبرو وتحركاتو!! ونشوف البيحصل شنو للصباح!! الحاج قال ليه اطلع بعده عايز انوم!! احمد ابتسم قال ليه بعرس وبجي بسكن معاك!! الحاج قال ليه راحل ماشي امريكا!! احمد قال حلووو! طيب حتكون الشقة فاضية؟! الحاج ضحك وقال و**** اسجنك!! اتبادلو الضحاكت واحمد طلع!!
____________________________________
في صباح يوم التاني!! وبعد ما كانو رجال المباحث مطوقين العمارة المتواجد فيها نصر الدين!! اتصل ناجي علي الحاج وقال ليه روان اتحسنت شوية وطلعوها من العناية المكثفة على غرفة خاصة!! والدكتور مانع ليها الزيارة بس اهلها بسلمو عليها وبيطلعو!! لكن ممكن يسمحو للشرطة بأخذ اقواها!! الحاج قال ليه سواطة زي كل مره ولا خبر مؤكد!! ناجي ضحك وقال العفو منك جنابو!! ده الدكتور قال لي كده!!؟ الحاج قال ليه انا ماشي عليها!!!!وفعلا كان ماشي علي القسم غير مسارو ومشى على المستشفى!!؟
واتصل علي احمد يشوفو عمل شنو؟! قال ليه عناصرنا متمركزين من امس!! بس منتظرين وكيل النيابة الأعلى يوقع علي امر القبض!!
الحاج قال خير!! وقفل منو!! وصل المستشفى واتكلم مع الدكتور!! اهلها اول اعترضو وخصوصا اخوها وابوها!! الا رجال الأمن اتدخلو حتى طلعوهم برا!! وقالو وصعها ما بسمح لاستجوابها!!!َ وكل البلاوي دي وقعت عليهم بسبب القضية دي!! ف الوقت داك ناجي اتصل علي الحاج وسالو اذا وصل!! الحاج قال ليه ما كان تتصرف لي مع اهلها ديل طيب مادام انت معتم كده!!!وكمان من فترة مش قلت لي ما عندها اخوان!! طيب الحيوان ده منو؟! ناحي قال ليه معليس راعي لمشاعرهم برضو!! اما البتتكلم عنه ده اخوها ودخالها مربينو معاهم من صغير وفي مقام اخوها!! الحاج قال ليه انا داخل عليها وقفل!! دخل لقاها راقدة وافتكرها نايمة!! جا طالع!! قالت ليه بخلعة انت منو؟! لم قبل عليها!! بكت وقالت ده انت ياجنابو!! قرب عليها!! وكفر ليها وشجعها بالكلمات!! قال ليها ممكن ادردش معاك ولا اجي في وقت تاني!! سكتت!! قال ليها لو تعابنة بجيك مره تانية!؟ قالت ليه لالا خليك بس لو تعبت نوقف؟!
ابتسم وقال ليها انا ما عايز اكتب ولا كلمة انتي بتقولها!! بس عايز ادردش معاك!! اتنهدت بصعوبة وجسمها كلو أجهزة!! قالت ليه اتفضل!! قال ليها نصر الدين ده منو؟!
بكت وقالت ده عذابنا ودمار سعادتنا!! ده الفرقني عن رفيقة دربي!! وبقت تبكي وتإن!! شكلها اتوجعت!! الحاج هداها شوية وقال ليها احكي لي برواق الحصل شنو!! قالت ليه انا كذبت عليك!! انا العرفت نصرالدين بولاء!! الحاج قال ليها عارف!! بس كيف؟ عاينت ليه بإستغراب وقالت اتعرفت عليه ف الفيس!! وطلب يشوفني!! كان راقي وفاهم شديد وجذبني!! لم لاقيتو اتصدمت!! طلع قدر ابوي!! طوالي فصلتها منو وبقيت أتجنبوو !!
لحدي ما يوم لاقانا بالصدفة يوم قلت ليك ما لقينا مواصلات!! ركبنا معاه وصلني جنب شارعنا وخليت ولاء راكبة معاه عشان يوصلها الداخلية!! ومن هناك اتعارفو وبدت علاقتهم!! هي ما كانت بتحبو!! ولا عندها ليه حاجة!! بس ولاء طايشة ومجنونة وبتحب تخاطر!! لم لقتو زول كعب وعايزها في مواضيع فارغة!! برضو خلتو!! الحاج قال طيب هي عارفة انه كعب كانت متوقعة منو شنو؟! قالت طلعات وونسات ومصاريف ما اكتر!! الحاج عقد حاجبيه!! وقالت ليه و**** طيبة شديد وعلى نياتها!! الحاج قال بس ده سبب يخليه قتلها وبالطريقة البشعة دي!!!ويحاول يغتالك كمان!! قالت و**** ما عارفة السبب شنو؟! وما متاكده لو كان ده هو ولا زول تاني!! بس صدقني ما غلطنا في حقه بس يمكن يكون ما ااقبل الرفض بحكم انه مقتدر وغنيان!! الحاج قال ليها بتعرفي شكلو قالت اااي شفتو تلاته مرات!! ووصفتو!! نفس وصف كمال لما قال ولاء رسلت ليه الصورة بالغلط!! اخدر وعندو عنب في وشو!!؟ شكلها اتضايقت من كترة الكلام!!! وبقت تكح وبطلع دم من فمها!!؟
الممرضة جات عليها وطلت من الحاج يطلع بره لانه وضع المريضة ما بيسمح ليه يتم استجوابو!! وطلع براحة قبل ما اهل روان يشوفوه ويعرفو انه بنتهم تعبت!! مممن عادي يجلدوه الجماعة ديل!! لم طلع وركب عربيتو اتصل علي جنابو احمد وقال ليه اها قبضو نصر الدين!! جنابو احمد قال ليه لقينا نصر الدين مقتول من اذان الصبح وبطريقة بشعة شديييد!! الحاج قال مقتول؟! احمد قال وكأنو القاتل عارف كل تحركاتنا و سابقنا بخطوة!!!
الحاج قال ليه جاي عليكم!! وقفل وسااااق عربيتو بتهور ووصل مكان الجريمة الجديدة..!
نواصل بعدين
يتبع ………
الجزء الحادي عشر من رواية القاتل المختل
الحاج لم وصل لمكان الجريمة!! لقاه نفس المشهد البتكرر قدامو في كل تحقيق!! كم عربية شرطة وكلاب بوليسية! وتجمعات ناس!! وحاجة عجيبة!! كان بفش لجنابو احمد؟! بس شافو من بعيد وجا عليه!! وقال لو كان سمعنا كلامك والقينا القبض عليه م كان حصل الحصل!! الحاج قال ليه استغفر! ده مقدر ومكتوب!! بس وريني مات كيف؟! وهو منو اصلا!! احمد قاطع الحاج وقال ليه اسكت عشان اقدر احكي ليك!!!؟ الحاج رمقه بنظرتو اللئيمة ديك! جنابو احمد ابتسم وقال ليه ارح علي المظلة ديك!! لم وصلو وقعدو!! احمد قال ياسيدي شخصنا الغامض نصرالدين!! عمرو٥٥ سنة سوداني/كندي الجنسية!! ارمل!! عندو ولدين وبنت!! اتنين في كندا واحد ساكن هنا في الخرطوم في البيت ده!! وأشار لموقع الجريمة!! قال اها مات كيف وسبب والوفاة شنو؟! احمد قال ليه جاي عليك بالكلام!! من الفيلا دي باين عليهم فاحشي الثراء!! الحاج اتنرفز!! احمد ضحك!! وقال ليه معليش بس لازم تكون ملم بالتفاصيل!! المهم سبب الوفاة حريق من الدرجة الأولى بالاضافة لتجزئة اعضاء المغدور!! الحاج قال انت جادي!! احمد قال للحاج قطعو مفصل مفصل!! وحاول يذوبو بمادة حارقة!! وما كده بس حتى الجمجمة مهشمة!! وكانه طالع فيها جرار!! بالجد ده شخص مريض!!؟
الحاج قال والمشتبه فيهم منو؟! احمد قال ليه قول الجاني منو!؟ الحاج بحماااس قال ليه اتقبض يعني!! احمد قال لا بس اتعرف!!؟
الحاج قاعد حاجبيه! مستنكر!! احمد قال ليه مساعدو ووكيل اعمالو وضراعو اليمين زي ما بقولو!!؟ الحاج قال منو؟ احمد قال قمر الدولة!! الحاج اتزكر انه ده الاسم الاتلقى في تلفون ولاء!!؟
الحاج قال طيب دوافعو شنو الخلتو يرتكب جريمة زي دي!! أحمد قال للحاج علمي علمك!! نشوف التحريات حتاخدنا علي وين؟! الحاج قال ليه الماسك التحري منو؟! احمد قال ليه سعادة المقدم نادر!! داااك الجنب العربية داك!! الحاج جا ماشي عليه!! احمد قال ليه اعمل منو حسابك ما متعاون!! ويمكن ما تتفاهمو!! الحاج ابتسم!! ورفع بنطلونو الناصل داك وصلح الكاب! ومشى علي الضابط!! سلم عليه!! ورد الاخير ببرود!! الحاج عرف عن نفسو!؟ والضابط اكيد سمع عنه!! بس ما اداه اهتمام وقال ليه شكرا لتواجدك!! بس ما محتاجين مساعدتك!! عشان ما نأخر بعض!! وكمان فريقي مكتمل!! الحاج قال ليه **** يعينك!! ومشى منه!! اتصل علي رئيس سلاح الإشارة والعمليات!! وقال ليه عندكم كلب مسعور! ماسك عضمة بتخصني!! اصفيه ليكم ولا تتصرفو معاه!!؟ الاخير!! قال ليه صدقني لو ابعدناه عنك ح يرتاح ومعناه امو داعية ليه!! الحاج قال ليه بقيتو تعينو شفع ياااخ!! داك بقى يضحك وقال للحاج ده زمنهم خليهم يتعلمو!! بتتزكر نحنا لم كنا في سنهم عملنا شنو؟! الحاج ضحك بفجور!! وقال ليه المهم اتصرف!! اخد من الحاج اسم الضابط!! ومكان الحادثة!! وفي خلال نصف ساعة سرحو الضابط!! من القضية!! واوكلو بيها عقيد شرطة معروف في المنطقة بمرونتو!! وقوة شخصيتو!! الحاج دخل بيت المرحوم؟! وبقى يفتش غرفة غرفة!! كان نضيف شديد!! ومرتب علي حسب الطراز العالمي!! كان ف عسكري ماشي مع الحاج!! والحاج بقول ليه شوف النعمة دي سااي!! تتلقى من ولدوك ما خشيت مكان زي ده!! والعسكري بيضحك!! لحدي ما دخلو الغرفة الحصلت فيها الجريمة!! كانت شبة مهجورة!! وهي الوحيدة الاثاثاتها قديمة ومغبرة!! الحاج قال ليه الغرفة دي ما زي باقي البيت!! جا داخل العقيد وقال ليه لانها بتخص زوجة المغدور المتوفية!! وما بسمح لزول يدخلها ولا يغير فيها شي!! الحاج برفعة حاجب!! قال ليه م اتعرفنا!! العقيد سلم عليه وقال حيستلم القضية بدل المقدم فلان!! الحاج ابتسم!!؟
جا احمد داخل وسلم بدون مصافحة!! وقال للحاج ده البرميل الاستخدمو الجاني عشان يحلل الجثة!! ووراهو صور الجثة وهي ما بتتفرز اللحم من الحضم!! وصور الرأس المقطوع المهشم!! والأسنان مبعثرة حولينو!!؟
الحاج قال الجريمة كلها وقعت هنا!! في عسكري قال لا!! ده المكان الاتلقت فيه الحثة!! بس الحريمة وقعت في غرفة المجني عليه!! والحاج طلع وقدامو العسكري!! لحدي م وصلو الغرفة!! لم فتحوها كانت عبارة عن بركة دمم!! منظر بشع خلاص!! والابشع انه الجاني ماسح الدم في الارضية بممسحة!! يعني خافي اثار الرجلين بس بدون موية!! قاشي دم بالدم!! فزاد المنظر بشاعة!!؟
اتلقت المناشير والسكاكين!! م اخفى ولا دليل!! الحاج قال ده قاتل مجنون!!؟ جنابو احمد قال للحاج تعال!! لم جنب بيه طرف! قال سكلو المجنى عليه ما ليه علاقة بقضيتنا!! الحاج قال ليه عرفت شنو؟! احمد قال ولدو ف ايتجوابو!! قال انه كان في بيت نسابتو وباتو هناك وقدر بثبت الكلام ده!! والشغالة بتجي يوم بعد يومين!! ومن المفترض تجي اليوم بس حصلت الجريمة!! الحاج قال **** يرضى على والديك اختصر ياااخ!! احمد قال من الاخر كده!! والد المرحوم قال انو ابوه شكى!! ليه من قمر الدولة!! وانتو بقي يتجاوز حدودو!! وبنتحل شخصيتو في معظم الاوقات!! الحاج قال كيف؟! احمد طلع صورة من الملف وقال للحاج ده منو؟!
الحاج ركز في الصورة واتزكر ملامح مشابها!! وقال لاحمد ده نصرالدين!! احمد ضحك وقال ليه لا!! ده قمر الدولة منتحل شخصية نصر الدين!! الحاج قال كيف الكلام ده!! احمد قال ليه استنتجت كده غايتو!! روان ونازك وكمال كلهم قالو نصر الدين عندو نخل في وشو!! بس من خلال الصور الامامك دي بتبين انه داك هو قمر الدولة بس لشنو يخدعهم!!؟
الحاج قال ليه الموضوع ماشي يتعقد!! طلب نسخة من التحريات ورجع علي القسم!!
اتصل علي احمد وقال ليه ماف خبر عن قمرالدولة!! قال للان التحريات مستمرة!! وسالو!! مووش رجال الامن كانو مراقبين البيت!! اكيد شافو الطلع والدخل منو!! احمد قال ليه ايوووا ده في المحضر المعاي!! لانو نحنا الطلبنا منهم يراقبو؟! عشان كده م حقق معاهم العقيد ده ولا كان عالم بوجودهم!! الحاج قال ملهوف طيب قالو شنو ي ابني؟! م كل شوية ازكرك شغلك؟؟ احمد قال علي فكره انت شغال معاي!! ودي قضيتي انا!! الحاج سباه بس في سرو!! احمد قال ليه سمعتك!! الحاج ابتسم!! احمد اتنفس بصوت مسموع!! وقال للحاج قالو اذان الصبح شافو زول طالع وكان طبيعي وما ظاهر عليه الخوف ولا الارتباك!! طلع ومشى علي الجامع!! تبعو واحد من افرادنا لحدي م دخل المسجد!! وفضل منتظر!! بس لانه الواطا ضلام م شاف وشو!! ولحدي الواطا م اتكشفت والامام طلع وقفل معاه المسجد!! زولنا رجع وقال يمكن يكون طلع قدامو بس هو م انتبه ليه لانو م بيعرف ملامحو!! بس اكتشف انه ماف زول رجع البيت!! وعملنا المداهمة واكتشفنا الجريمة!! الحاج قال بالجد داهية الزول ده!! احمد قال يعني يمكن يكون هو القتل ولاء؟! الحاج قال بس السبب شنو؟!
وفي أثناء م بتتاقشو بالتلفون سمع جوطة بره!! قفل من احمد وطلع!! لاقاها محامية صغيرة فرحانة بحصانتها!! قال ليها في شنو يا انسة!! قالت ليه أستاذة لو سمحت!! أستاذة انفال حسين!! الحاج ابتسم وقال ليها اتفضلي يا أستاذة انفال!! قالت عندي موكل في الحراسة معتقل اعتقال غير مشروع!! وطلعت طلب من بين ورقها وقالت ده طلب الافراج ومؤشر من وكيل النيابة!! الحاج قال ما عايز يحرجها قدام العساكر وقال ليها اتفضلي يا أستاذة علي المكتب!! رفضت وقالت مستعجلة عندها سماع في محكمة الامتداد!! الحاج قال ليها بغضب!! يا أستاذة زولك ده كان مشتبه به!! بس الان هو المتهم الأول!! واتجدد حبسة من المحكمة لأغراض التحري!! راجعي قانون الإجراءات الجنائية يااستاذة!! احدد ليك المادة ولا م محتاجة؟ حست بالاهانة!! وقالت ليه انا ح ارفع شكوة عليكم!! واتصلت علي استاذها!! قال ليها مووش معاك طلب احضار لكمال من النيابة!! سلميهم الطلب!! ولو رفضو؟ خليه يأشر عليه بالرفض!! ونحنا حنتصرف معاهم!! اصلا ناس الشرطة ما بيمشو الا بالعين الحمره!! وهنا زولتنا انفعلت وانداحت!! وجات للحاج!! الزمتو إلا يسلمها كمال ولا ياشر في طلبها الجات بيه من النيابة بالرفض!! الحاج استلم منها الطلب وشرطو قدامها ورماه في السلة!! قال ليها امشي لرئيس الجمهورية قولي ليه الحاج قطع طلبي!! فعلت صوتها وضربت فايلها في التربيزة!!؟ والحاج قام عليها!! نادى! اقرب عسكري وقال ليه دخلها تونس كمال!!؟ والزولة اتكبكبت!!؟ انا محامية!! انا عندي حصانة!! راجع المادة ٤٨ من قانون المحاماة!! العسكري جاريها وهي تقابض وتفرفر!!! وندمت لليوم الجات فيه القسم المقرف ده!!؟ اتصلت علي استاذها وهي بتبكي!! اول م عرف صوتها!! بس الرقم مسجل عندو!! قال منو معاي؟! قالت ليه انا شهلاء الاعين
قال ليها منو؟! اتنهفت وقالت ليه انفال انفال معاك انا حرسوني!!؟ انفعل وكيف يعني وده منو الحيوان الدخلك الحراسة ده!! وقال ليها مسافة السكة واكون معاك!!؟الحاج قال ليهم خلوها تقعد عشرة دقائق كده وطلعوها!! وفضل براجع في قضيتو!! لم مشو يطلعوها حلفت م بتطلع الا يجي تقيب المحامين ويشوف المهزلة دي!! كيف محامي وعندو حصانة يتحرس!!
الحاج قال خلوها بطلع براها!! جا عليه عسكري!! وقال ليه تصرفنا ده خطأ وحيسبب لينا مشاكل!! الحاج ابتسم!! قال وينها المشاكل!! خطاب احتجاج من النقابة ووقفة احتجاجية من المحامين!! وجوطة في القروبات القانونية!! واعتذار من السيد مدير الشرطة والموضوع انتهى!! وين المشكلة؟! تلعسكري ابتسم!! الحاج اتصل علي نازك وطلب منها تجي علي القسم!! وشوية كده ودخلو مجموعة من المحامين!! عاملين شوشرة وجوطة وفي منهم شايلين لافات امام القسم كلنا انفال حسين
وطلعت بزفة مهيبة من القسم!! وكل المحامين بتوعدو الحاج انه الموضوع ما حيعدي علي خير!! بس منو بقدر يهدد الحاج!! مهنة م عندو عشان يفصلو منها!!! صنع لنفسو اسم وبقي عايش عليه!!؟واتزكر كمال؟! جابوه ليه في المكتب!! الجوطة دي كلها بسببك!؟ اها ما اتزكرت ليك حاجة!! كمال رفض يتكلم!! الحاج طلع ليه صورة قمر الدولة! وقال ليه ده منو!! كمال بدهشة قال ده نصرالدين!! خلاص قبضتوه!! الحاج عاين لكمال بإستنكار!! وقال منو القال ليك نحنا شاكين فيه؟! كمال سكت!! الحاج قال ليه انت عارف حاجة ومخبي علينا!!!؟
كمال قال لم اتشاكلت مع المرحومة وضربتها كف؟! قالت لي نصر الدين حيقتلني انت لازم تساعدني!! الحاج قلع نظارتو وقال لكمال!! كلامك ده لشنو م قلتو المره الفاتت!! المره الاولى انا كذبت!! والمره التانية ما جات مناسبة ونسيت الموضوع!! الحاج انفعل وقال كيف ما جات مناسبة!! كنت بلعب معاك انا ولا بستجوبك!! ونادى العسكري يدخلو الحراسة ويمنع منو الزيارة كمان!!
وفي اثناء ما هو متنرفز جات داخلة نازك!! شافتو ما علي بعضو؟!
خافت اكتر!! سلمت وقال ليها اقعدي؟؟
قعدت وفضلو ساكتين لاكتر من خمسة دقائق!! الحاج مرق ليها صورتين!! وقال منو نصر الدين في ديل!! وبعد تردد اختارت قمر الدولة!! قال ليها ما حصل سمعني المرحومة جابت سيرة قمر الدولة ولا شفيهو!!؟ قالت وهي بتمتم من شدة الخوف!!!ولاء **** يرحمها قالت لنصر الدين خلي تلفونك وحاحتك يحي يشيلها قمر الدولة!! بس ما حصل شفتو!!
الحاج قال ليها تلفونو وشنو؟!
قالت حاجتو!! الحاج قال ليها والهي شنو؟! قالت م عارفة بس سمعتها قالت كده!! الحاج شاف الكذب في عيون نازك!! بس حتستفيد شنو من كذبها!! وعايزه تحمي نفسها ولا زول تاني؟! الحاج ناقشها كم مره لم لقاها متعنتة وم عايزة تتجاوب معاه شكرها!! وطلب منها الانصراف!!
اتصل عليه مدير الشرطة!! انفعل وعنف الحاج علي تعاملو الغير اخلاقي مع المحامية!! وقال ليه كده اشنت سمعتنا نحن!! وم ممكن نعتذر نيابة عن زول اصلا م فرد من قواتنا!! الحاج قال ليه خلي الموضوع علي وقفل في وش المدير!! وهو بلملم في اوراقو راجع البيت!! جا داخل جنابو احمد مبسوط!! الحاج م سألو!! براه قال للحاج كنت متأكد من انك م حتسالني عن سبب سعادتي ياعدو النجاح!! الحاج ابتسم!! احمد جدع الملف من يدو وقال للحاج كنت بستجوب في بكري حارس الداخلية واتخيل كدي طلع القاتل منو؟!
نواصل بعدين
يتبع ………
الجزء الثاني عشر من رواية القاتل المختل
الحاج خلف رجل فوق رجل وقال اهاااا قول؟! بكل برود!! احمد ابتسم وقال ولت ايام الحاج!! الحاج ابتسم! جنابو احمد قال ليه مشيت داهمت بكري في الداخلية!! الحاج قال اها قول!! احمد دخل قلمو في جيب الكتف حق الكاكي وبقى يمسح علي شنباتو؟! الحاج قال سي سيد الجواك لسسسه م ارضى غرورو!! احمد ضحك وقال انا مركب مكنة اني الثعلب خليني اعيش اللحظة!! الحاج زهج وجا قايم!! احمد قال بعتذر بعتذر و****!! القاتل كمال بمساعدة نازك!! الحاج قعد بتأني!! وقال ليه كيف؟! احمد شال الورق من التربيزه وتلى علي الحاج اقوال بكري!! الحاج قال معقولة!! احمد قال ولا انا كنت مصدق؟! الحاج قبل م يطلب من احمد يجيب كمال!! قام ونادى علي عسكري يجيبو ليهم!! الحاج ابتسم!! احمد قال ليه اشطر منك موووش!! الحاج حكى راسو وقام وقف جنب الشباك وكان بعاين لاية قرأنية مكتوبة في الحيطة!! وفجأة جو داخليه بكمال!! قعد!! جنابو احمد قال ليه مبروك!! حتطلع من هنا!! كمال فرح وملامحو بقت ما بتتوصف!! قال ليهم اكتشفتو القاتل!! احمد قال انت شاكي في زول معين!! كمال قال ما عندي زول معين!!؟ الحاج قال ليه بعد وديت حسين المناسبة!! رجعت تاني الداخلية لشنو؟! كمال اتخلع!! وقال بإستنكار!! متين رجعت!! جنابو احمد قال ليه لم شافك الحارس واقف بتتكلم مع نازك في وقت الجريمة!!
كمال قام علي حيلو!!؟
الحاج قال ليه اقعد!! احمد قال ليه حتطلع من الحراسة علي حبل المشنقة!! بس ورينا سبب قتلك ليها شنو؟! كمال قال وينها نازك!!؟ احمد قال ليه خايف عليها!! قال لا بس عايزها تعترف علي عشان ما تدخل في التفاهة دي بدون ذنب!!
احمد قال ليه تافه انت؟! وانت مركب معاك حسين كنت بتخدعو عشان يحس بأنو علاقتك كويسة مع ولاء عشان لم تتقبض م يشهد ضدك؟! والحارس شافك واقف مع نازك!! وسلمتك حاجة ولم سأل نازك عنك قالت ليه ولد توصيل!! بس طلع ملخبط الطلبية!! والوقت داك كان قرابة الساعة الساعة تسعة إلا!! يعني انت رجعت الداخلية تاني!!؟
كمال بإنفعال قال اااي رجعت!! ولو كان لاقيتها كان قتلتها بالجد!! بس ابت تجيني!! الحاج قال ليه اتصلت ليها في اي رقم؟! لانه الحاج اتزكر في سجل المكالمات م اتلقت مكالمة من كمال!! كمال قال لم اتشاكلنا شلت منها التلفون التاني!! الجابو ليها الزول البتتكلم معاه!! احمد عاين للحاج وقال والتلفون المفقود طلع مع كمال!!
كمال قال لا! اسسسه م معاي؟ بعداك اتصلت وكنت بتكلم معاها عادي!! لانو حسين الخفير سمعها لم صرخت وكشف علينا بالبطارية! فقلت اذا ما رجعت ليها حيشك فيني !!
جنابو احمد قاطعو!! وقال ليه عرفت كيف حيقتلوها في نفس اليوم وحيشكو فيك؟!
قال ما كنت عارف!! بس اذا عرف اني جيت وشاكلتها تاني ما بخليني ادخل العمارة!!
الحاج قال ليه وانت شنو عايز تخش العمارة!! بما انك شاكلتها وتركتها علي حسب اقوالك السابقة!!؟
قال و**** ما بقدر اخلي ولاء!! بزعل منها وبتخاصمني!! بس مستحيل نسيب بعض!! الحاج لبس نظارتو وبقى يعاين لكمال!! احمد قال ليه كلم جنابو الحاج لم الحارس شافك مع نازك كنت بتعمل في شنو؟! قال! بعد وصلت حسين جات داخلة مكالمة في تلفون! في الاول افتكرتو ده تلفون الغفير!! بس كاتبة عليه العبيط وفي صورة جهاز الاتصال شفت صوره زول ما واضحة كويس ولا إضاءة التلفون بطيئة م عارف!! رديت بغضب ونبزتو وما خليت ليه جنبه ينوم عليها!! وقلت ليه انت لو راجل تعال واجهني في الحته الفلانية!! وريتو اسمي ومحل شغلي!! بس ما كان برد علي!!
بعداك قفل وانا رجعت بإنفعال للداخلية وكان حارس الداخلية مناوب لحسين لانه داك في المناسبة!! انصلت عليها ابت ترد!! اتصلت لنازك في الاول ما ردت بس لم كترت اتصالاتي!! ردت وقالت لي انا بكره ممتحنة وبقرا من تلفوني!! م تتصل علي ياود الناس!! وسكت!! احمد والحاج بصوت واحد قالو ليه وتاني!! احمد ابتسم! بس الحاج كان مركز مع كمال؟!
الاخير ده اتنفس بصعوبة!! وقال كلمتها بأني عايز ارجع ليها تلفونها!! اول رفضت بس عشان ترتاح مني جات وقالت لي ندمانة انا الساعدتك!!!؟ واول الحارس شافها ومنعها تطلع!! قالت ليه اتصلت على مطعم وجاياني طلبية!! قال ليها بعد بتاع التوصيل يجي انا بستلمها!! بس خلي قروشك!! وفي اثناء ماهي بتتحاجج مع الحارس بكري!؟ انا وصلت!! ونبزتني بصوت واطي وخطفت التلفون من يدي ومشت!!! مسرعة!! لم بكري شافها راجعة فاضية قالت ليه جاب الطلبية غلط دي م تابعة لي!! واداها باقي سندوتش كان معاه!! وقال ليها اتصبري بي ده!!؟ الحاج قال ليه وانت عرفت التفاصيل دي من وين؟! وانت ما كنت حاضر!! كمال قال بعد لاقيت نازك بعد الحادثة وعزنا بعض حكت لي!!؟ وانا رجعت بيتنا!! وما عارف انه ولاء مختفية إلا لم اتصلت علي نازل اليوم التاني بتسألني عنها!!
احمد نادى العسكري وقال ليه رجعو الحراسة وجهز اوراق ترحيلو حيترحل علي كوبر!! كمال كان محبط شديد!! وما اعترض حتى!!؟ وطلع مع العسكري منقاد وبدون مقاومة!! جنابو احمد قال للحاج اها ما سبقت الثعلب!!؟
الحاج ضحك وقال جهدك مقدر يا ابني!! بس كمال عندي احساس انه ما قتل!!بس ده ما يعني انه ليه دور في الحصل!! لانه من اول تحقيق بادر بالكذب وتلفيق القصص! احمد قاطعو وقال يمكن اسسسسه يكون بكذب!! الحاج قال وارد برضو!؟
بس العقربه الاسمها نازك دي طلع ليها امر قبض!!
كذابة اكتر من كمال!
م قالت انه كمال رجع تاني الداخلية!!
وما قالت انه تلفون المرحومة التاني كان عندها!
وحاولت تتوهنا لم زكرت انه الكيس الاتلقت فيه بقايا الجثة كان مع بكري الحارث!! في حين انو بكري رجعو ليها علي حسب اقوال كمال!!
البنت دي وراها سر!! ولو ما عملنا ليها امر قبض ما بتعترف!! اخلعوها ببوكس مليان عساكر عشان ترتعب!!؟ احمد قال انا متأكد أنه حسام ليه دور!؟
الحاج ابتسم وقال ان شاءالله ياااخ عشان نتخلص منك سريييع!! جنابو احمد ضحك وطلع يتصل علي وكيل النيابة الاعلى!! يبلغو بأخر المستجدات ويوصي بإصدار امر قبض في مواجهة نازك!! وفعلا ده الحصل؟!
____________________________________
الحاج اتصل علي ناجي قال ليه عايز الاقيك!! ناجي قال مسافة السكة واكون معاك!! وفي خلال ربع ساعة جاهو في القسم!! سلم على الحاج وقال ليه خير عايزني في شنو؟ الحاج سألو عن صحة روان و ناجي طمنو عليها وقال ماشة تتعافى!!قال ليه عايزك تجيب لي تلفون روان في اسرع مايكون!!
ناجي قال ليه خير في شنو؟ الحاج قال ليه لاغراض التحري ما اكتر!! ناجي قال خلاص كويس!! وضحك قال للحاج قايلاك عايز مصاريف!! ورفع شنطة في طاولة الحاج! وقال ليه جبت ليك معاي جزء من المبلغ!! الحاج عقد حاجبية وقال كم؟! ناجي بتردد قال تلاتة مليون!! الحاج ابتسم!! وقال خليها معاك بشيلها بعد القضية تخلص!! ناجي حلف طلاق ما يطلع سااي!! قال للحاج ده تعبك!! الحاج قال ليه م بقدر اطلع بمبلغ زي ده بجيب لي الحرامية!! وانا راجل كبير وساكن براي!! ناجي ضحك وقال للحاج عز الشباب و****!! الحاج صر عيونو وقال ما تحلف!! ناجي اتحرج شكلو بالغ في المجاملة!! وقال للحاج خلاص برسل ليك بنكك!! الحساب ما بحول اكتر من اتنين مليون في اليوم! ح ارسلها ليك اسسسه!! فعلا طلع تلفونو ورسل قال للحاج جاك اشعار؟! الحاج قال ليه تطبيقي قافل م بنزل لي بس شكرا ليك بتكون وصلت!! ناجي قال ليه دقيقة!! ورسل الاشعار للحاج في الواتساب!!؟
الحاج قال ليه ايوا جاا!! شكرو وطلع!! ماشي يجيب تلفون روان!!
جا داخل جنابو احمد وشاغل الحاج!! بس شكلو كدايسو قايمة عليه وطنش احمد!! الاخير قال ليه طلعنا امر القبض واتحركت قووة للتنفيذ!! الحاج قال عظيم!! الحاج شال حاجاتو وجا طالع!! جنابو احمد قال علي وين؟! الحاج عاين ليه بقر عينو!! وقال السماء!! تجي معاي!!؟
خلا احمد بيضحك وبضرب يد بيد؟! الحاج ولع ليه سيجارة وشرب ليه كباية شاي!! وطلع علي الداخلية!! لقى حسين قااعد جنب الباب!! سلم عليه سعادتك سعادتك!! وتملق شديد!! الحاج قال ليه ما ح اكتر معاك الكلام لملم عفشك وارحل من هنا!! الخفير اتخلع!! وقال عملت شنو انا ياجنابو؟! الحاج قال الما بخاف علي عروض والناس ينخاف منو؟! قد ما تكون القاتل ولا عارف هو منو!!؟ بس انت كنت مساهم بطريقة غير مباشرة!! وعشان قرشين تلاتة ممكن تبع بنت من الداخلية!! حسين اتخلع!! الحاج قال ليه ما عايز اعمل ليك شوشرة في القسم!! بس انت ما شخص يؤتمن علي بنات الناس!! والمرة الجاية ممكن تدخل ليهم جماعة اولاد!! حسين بقى يبرر ويعتذر وانه بعرف ولاء وكمال عشان كده وافق يخليه يطلع!! الحاج مشى خلاه بيتكلم!! وهو طالع علي الداخلية قال ليه بكره ما اجي القاك هنا!!؟ لم وصل الطابق الاول لقى بكري عندو غرفة صغييرة زي الكاونتر قاعد فيها!! حتى استغرب من المهندس الصممها!! وضحك قال بكون شارب ليه حاجة!! لم وصلو جا طالع عليه وقال للحاج اتفضل؟! الحاج ابتسم وقال ليه اتفضل علي القفص ده!!!؟ ضحكو وطلعو السطوح!! ولسسسه بحر الدم جافي ف الارض!! قال للحاج تشرب شنو؟! الحاج قال ليه ح اشرب من دمك!! خلا الحارس بيضحك وبحك في راسو!! والحاج ابتسامة ساي م ابتسمها!! فحارس الداخلية اتوتر!!
الحاج قال ليه قريت اقولك!! وكانت منطقية!! بس في حاجة انت م زكرتها!! بكرى عقد حاجبية وقال شنو؟! الحاج قال ليه انت قلت استلمت الحراسة بدل حسين!! وقلت انه جا واحد لنازك واتكلم معاها زي دقيقتين ومشى!! بكري قال ده الحصل!! الحاج قال طيب انت كنت وين لم الجاني طلع وارتكب جريمتو!! وانت كنت حارس العمارة وما اتحركت لحدي ما جاك حسين!؟ بكري اتوتر وقال للحاج انت شاكي فيني؟! الحاج قال ليه وممكن اشك ف نفسي كمان!! كمال قال انا ما اتحركت نهائي!! الحاج قال يعني القاتل جا بطيارة ونزل علي العمارة!! وجا قايم… بكري قال ليه و**** م بكذب!! الحاج قال كلو حنعرفو لقدام!! وبقى يتمشى في السطوح!! بكري قال ليه انا طلعت مره واحدة!! واذا تفسيرك صاااح وفي زول دخل العمارة بكون في الفتره دي!! الحاج ابتسم وقال يلا مشيت وين؟! بكري بقى يتمتم وقال لبه جيت شفت ولاء!! الحاج جا عليه مهرول وقال شنو؟! بكري قال لم طلعت اول مره ولقيتها بتبكي!! قلبي م اطمئن!! ولم ادتني الساندوتش ونزلت! م قدرت اكلو!! وحسيت كأنها عايزة ترشيني ولا شنو ما عارف!! ووالله في سني م ختيتو واديتو لصحبتها نازك لم نزلت للطلبية وما جاتها!! قلت خلاص طلع من قسمتها!! واتزكرت ولاء طلعت لقيتها في مكانها وماسكة تلفونها وسرحانة بعيد!! لم شافتني اتخلعت!! وقربت تصرخ!! بتزكر صحكت وقلت ليها الوقت اتأخر مادام بتخافي ادخلي الداخلية واقري جوه!! قالت لي شوية كده ونازلة!! ونزلت تحت خليتها بتلملم في حاجاتها!! الحاج قال ليه شفتها لم نزلت!! بكري قال لا!! الحاج قال ليه طيب متزكر شكل الكيس الاديتو لنازك!! قال ايوا من المطعم الفلاني!! الحاج قال ليه يعني كان شفتو بتعرفو!!! بكري اكد ليه انه بعرفو!! الحاج فتح تلفونو وجاب الصور وعرضها علي بكري لحدي م بكري وقفو وقال ده الكيس!! ياهو زاتو!! الحاج قال متاكد!! حلف ليه انه متأكد!! الحاج شكرو وطلع!!؟ وهو راكب في عربيتو وقبل ما يتحرك!! قال نازك عملت شنو بالكيس!! ادتو لمنو؟!! ولا القاتل اتحصل عليه كيف وهو معاها!!؟ وقبل ما يطلع من ملف الصور شاف الاشعار الاخضر وقال ده شنو كمان!! نسى انه ناجي رسلو ليه في الواتس!! بس كانت الصدمة لم لقاه تم تحويل مبلغ واحد مليون من حسابك الي حساب نازك اسماعيل سليمان بتاريخ كذا!!! الحاج لمن ختى يدو في راسو!!!!!!
نواصل بعدين
يتبع …….
الجزء الثالث عشر من رواية القاتل المختل
الحاج صعق من الشوفة الشافها!! ركز مع تاريخ الاشعار لقاه من يوم ١٢/٢ !! يعني قبل الجريمة بيومين!! طلع من الصور!! ودخل على الواتساب!! شاف دردشة ناجي لقاه مرسل صورة وملغي إرسالها!! بس الحاج عندو خاصية منع الحزف! ظهرت عليه علامة حزف الرسالة من المرسل! بس الصورة موجوده!! والصورة التانية تحوليل من ناجي للحاج!! وفي اثناء ما الحاج بعاين للاشعار وبفكر!! اتصل ناجي ملهوف!! الوووو كيفك!! جبت تلفون روان!! اها في جديد!! كان مرتبك شديد!! الحاج قال ليه جيبو لي في القسم!! وقبل ما يقفل!! ناجي قال للحاج شفت الاشعار!! الحاج ابتسم وقال ليه اي شفتو شكراً ليك!! ناجي قلبو اطمئن لانه مفتكر انه الحاج ما شاف اشعار تحويلو لنازك الاتحول غلط!!؟
الحاج اتصل علي جنابو احمد!! وسألو اذا كان في القسم!! احمد قال ليه بره بس راجع!! الحاج قال ليه اسرع!! كلمة اسرع دي خلت احمد يطلع من الإجتماع مستعجل!! وفي راسو الف سؤال!!؟
وصلو في وقت واحد!! واتلاقو جنب بوابة القسم!! احمد قال للحاج اها شكلك عرفت القاتل!! الحاج م رده لحدي م دخلو المكتب حق احمد!! الحاج قال ليه ناجي في تحرياتكم معاه قال شنو؟! احمد بإستنكار!! قال ما اتحرينا معاه!! خال الضحية وما ليه اي علاقه بالموضوع!؟ وما تنسى هو الكلفك بالتحقيق!!! الحاج قال ليه اسسسسسه حتغير رايك!! ووراهو الأشعار!! احمد قال ده تحويل مبلغ عادي؟! الحاج ابتسم وقال شوف من منو ولمنو؟! احمد ركز في الاشعار!! وقال من ناجي ل نازك!! نازك دي ما تكون زولتنا!! الحاج قال بشحمها ولحمها!!؟ احمد قال يمكن يكون عايز يرسل مصاريف لبت اختو!! وادتو حساب صحبتها!! الحاج ضحك!!قال ليه اقرا الرقم ده كم؟! المبلغ!! احمد ركز!! قال دي م عشرة؟! ومستحيل تكون مية الف!! بس ديل كم صفر!!! الحاج ضحك بشماتة!! وقال ليه ده مليااااار!! ده مليون جنية! انا اقتنعت اي ساقط رياضيات بخش الجيش!!؟ احمد لسه مخلوع من الرقم!! وقال ده حق شنو؟ الحاج!! قال ليه لو كان اتحريتو معاه كان عرفنا ده لشنو؟! احمد قال ليه بزعل!! وانت مالك م اتحريت معاه!! ما زولك واجرك هو!!؟ الحاج اتنرفز وقال اجرني؟! عربية انا!! احمد ابتسم وانسحب خلا الحاج بيغلي!!! جا العسكري وقال سعادتك!! الحاج قاطعو وقال لا سعادتك ولا زفت ما تتكلم معاي!! العسكري اتراجع وقال الطالبة نازك منتظرة بره!! بس خلاص اخليها تمشي لجنابو احمد!! الحاج حمر ليه وقال خليها تخش!!
دخلت وكانت مرعوبة!! لانه جوطة الحاج مع العسكري جاتها بره!! قعدت والحاج كان بحمر ليها!! الحاج قال ليها عمرك كم!؟ قالت ٢٢سنة!! الحاج قال ليها انا لي في المهنة دي ضعف عمرك!! وبحياتي ما شفت بت بوقاحتك!! بقت ترجف!! الحاج قال ليها م حاستجوبك!! ولا بس بسألك اسئلة مباشرة!! وعايز اجابة حقيقية!! المره دي!!؟
قالت ليه بصوت متقطع وانا متين كذبت ياجنابو!! الحاج كان بعاين ليها ورافع حاجبو!! وقال وين تلفون ولاء التاني!! البت زي التقول طقتها كهرباء!! جسمها كلو بيرجف!! قالت تلفون شنو؟! الحاج قال يمينا ب****!! تردي لي بنفس الاجابه دي اسجنك لحدي ما القضية تترحل المحكمة وتتحكمي!! احسن ليك تتعاوني!! واعاد نفس السؤال!! فكرت لدقيقتين في الاجابة وقالت في الداخلية!! الحاج قال في شنو بالضبط!! وصفتو ليه!! الحاج اتصل علي احمد في وقتها وقال ليه في تلفون في الحتة الفلانية في الداخلية رسلو لي مع اي زول!! وبنبه عليهم ماف زول يتصرف فيه اااي تصرف!! ورجع عاين ليها؟! وقال شلتي التلفون من منو؟ ولشنو؟!
قالت ليه التلفون فيه حاجات بتخصني!! الحاج قال ليها زي؟! قالت عندي صور في تلفون!! الحاج قال وضحي اكتر وبطلي تلميحات!! انفجرت في البكاء!! قالت انها كانت علي علاقة بواحد!! وكانو في لعبة ولا تحدي ما معروف!! والبكسب!! سكتت الحاج قال شنو؟! قالت ليه يقبل التاني!!؟ الحاج قال يعني كان فزتي ولا خسرتي حتهيني نفسك!!؟ قالت ليه لا بس اذا خسرت!!؟ اها وده علاقتو شنو بموضوعنا!!! قالت ليه جاية عليك بالكلام!! المهم في واحد خسرني عن قصد!! بس التحدي في الاخر تحدي!! وانا قبلت من اول بالشروط!! وانجبرت اني….الحاج قال ليها م تكملي اها وبعد عملتك دي؟!
قالت الايام مشت عادي وبعد كم شهر وبعد انفصلنا بقى يهددني بالصور ومقطع الفيديو!! ما بعرف الصورنا منو!! بس قال حينشرني في القروبات وحيرسلها لاهلي!! وهنا اتدخلت ولاء وكلمت نصر الدين يساعدنا وما بعرف عمل شنو!! بس وعدنا انه الموضوع انتهى ورسل لولاء المقطع!! بس ما بعرف اتصرف معاهم كيف؟! ومن يومها ما خشو علي!! الحاج قال ليها وده السبب الخلاك تسرقي التلفون!! قالت انا ما سرقت!! الحاج قال قولي السبب وخلصينا!! انا ما عارفه ولاء غلطت معاهم في شنو!! بس كانت زالاهم في شي!! الحاج قلع نظارتو وقال ليها ولاء زالة منو؟! بكت وقالت ولا عرفت عنه حاجة!! وقالت لي نصر الدين طلع غاشيني وما بخلية!! قلت ليها عمل شنو ابت تدخلني في الموضوع وقالت لي ما عايزة اسبب ليك مشاكل!! بس هي كانت بتبتزاه وهو بهددها!! لحدي ما التهديد وصلني!! واتصل علي قال لو ما جبت تلفون ولاء بدون علمها!! حيفضحني!!
الحاج قال ليها وعشان تنقذي نفسك ساعدتي في موت صحبتك!!!
بكت بحرقة وانفعلت وقالت و**** ما لي دخل!! كلمت ولاء بالحصل وعملت فلاش ونسخت من تلفونها بس شنو انا ما عارفة!! الحاج قال ليها والكان بهددك مشى الموضوع عادي كده!!؟
قالت ليه ياريت لو كان كده!! قالت ليه اتفقت مع ولاء وشلت منها التلفون بإرادتها ومشيت وديتو ليه!! قال ليها مشيتي وين؟! قالت جاني جنب الجامعة!! شال التلفون وفات بعد ساعتين وبعد ما خلصت محاضرتي المافهمت ليها حاجة!! اتصل علي وقال التلفون مع بتاع المكتبة الجنب الجامعة!! وفعلا سلموه ليها بعد م اتأكد من هويتها!! ورجعتو لولاء!! هم مفتكريني شلتو منها بالدس!! بس نحنا كنا متفقين!!وما بعرفهم عرفو لعبتنا كيف؟! بس عقابا لي فرضو! لي مليون جنية ولا حيفضحوني!! الحاج قال مليون!! ومنك انتي الطالبة!!؟
قالت اول افتكرتو بخوف فيني!! لانو غنيان وما محتاج لمليون ولا غيرو!! بس شكلو عايز يأدبني!! الحاج قال ليها اها عملتي شنو؟! قالت بعد يومين اشوف منزلين صورتي في الفيس ومغطين وشي وكاتبين جنبو فضيحة بنات الجامعة!! ومحددين يوم عديل لعرضو!!؟ انا اتهرت!! انا قربت انتحر!!
بس لاء قالت لي استعيني بناجي!! الحاج عاين ليها بدهشة!! وقال ناجي خال ولاء؟!
قالت ايوووا بعد انفصلت عن حبيبي الاول ربطت مع ناجي وكانت طلعاتنا عادية!! وكان في صور بأكلني فيها!! وفي صور قاعدين جنب بعض شديد!! فخفت اتفضح عشان كده غشيتو!! وقلت ليه في زول ببتزاني!! واتلاقينا وشاف الرسائل وسمع الريكوردات!! بس ما كان عارف الزول بتكلم عن اي صور!! ومن شدة ما خاف من المجتمع ونظرة الناس ليه رسلها لي القروش في نفس اليوم بس بشرط ان التسليم يتم عن طريق بنك ولا حساب مصرفي عشان لو غدرو بينا يقدر يجيبهم!! والغريبة نصرالدين اداني رقم حساب لم رسلت القروش ظهر لي بإسم قمر الدولة!! وريت ولاء بالحقيقة واني غشيت خالها عشان اتحل من الجماعة ديل!! ما زعلت مني بس قالت لي كان تصارحيهو!! وصدقني حيقيف معاك!! ولو قالو عايزين قروش اكتر!! المهم قالت لي اااي رسليها قمر الدولة ده مساعدو!! بس اوعدك اطلعها منهم ١٠مليار!! وفعلا ما نشرو صوري ومقطع الفيديو!! وقبل ما توفي بوعدها لي ماتت بعد يومين من سداد المبلغ!!؟الحاج قال ليها عايزاني اصدق المسرحية دي!!؟
قالت ليه ده الحصل بالجد!! واذا ما مصدقيني وديني المحكمة اتعاقب!! الحاج قال ليها اذا اذنبتي لازم تتعاقبي!!؟
وقال ليها اهم سؤال!!؟
الكيس الاداك ليه بكري فيه السندوتش!! وديتيهو وين؟! قالت بعد كمال جاب لي تلفونها!! طلعت ليها في السطوح!! ولقيتها متوترة وبتتهز في الكرسي!! اديتها التلفون قالت لي خليه معاك!! انا حاسه بنفسي ما كويسة!! حاولت افهم منها الحصل بس قالت ما عايزة تورط زول معاها!! وقالت لي كده احسن ليك!! اديتها تتعشي لانها فطور ما فاطرة بس رفضت!! انا اكلت وخليت باقي العيشة في كيسها جنبها!! وقلت ليها خلصي الباقي ده!! ودخلت علي الداخلية عشان اراجع للامتحانات!! وتاني ما شفتها!! الا وهي جثة!! الحاج قال ليها وعلاقتك كيف مع ناجي الأن!! قالت ليه من بعد حلينا المشكلة ديك تاني ما اتواصل معاي!! غير اننا عزينا بعض في ولاء!! الحاج قال ليها اخر سؤالين!! لشنو كنتي عايزاني اشك في بكري وقلتي لي نزل بالكيس!! في حين انو اداك ليه بس كذبتي!! وكأنك بتحاولي تتستري علي شيء!! قالت. خفت تشكو فيني!! قال ليها بس عادي عندك انك تتبلي علي زول تاني!! حتى ولو كان بريء!! قالت ليه انانية مني بس ما اكتر!! قال السؤال الاخير!!؟ الفلاش حق ولاء وين؟!
قالت و**** و**** م عارفة!! بس شكلو مع روان!؟
جا داخل عليهم جنابو احمد ومعاه ناجي!!؟ وكان ناجي متفاجيء بشوفة نازك!! الحاج قال لاحمد عندكم حراسة نسوان مووش!!؟ نازك صرخت!! الحاج قال ليها حتشرفينا اليوم لحدي اهلك ما يجيبو ليك ضامن!! ناجي اتخلع وقال ليهم انا بضمنها!! مالها عملت شنو؟! الحاج قال ليه تعد تطلع نفسك اول!!؟ ناجي استغرب وقال للحاج انا؟! انا عملت شنو كمان!!!
الحاج قال لناجي كنت وين يوم وقوع الجريمة!! ناجي ضحك!! وقال للحاج كان غلبتك قول غلبتني بس ما تقعد تخبط في الحيط!!احمد اتدخل وقال ليه اتكلم بأدب!! ناجي قال للحاج انا كلفتك تحقق في القضية عشان تنصف بنت اختي ولا عشان تتهمني!!
ناجي قال كمان اصلو الليلة ما قايل حاجة!! ان شاءالله تعدموني!! ورفض يتعاون نهائي!! ولمن دخلوه الحراسة!! وجابو ليهم ضامنين هو ونازك!!؟
احمد قال للحاج الجماعة ديل وراهم سر خطير!! الحاج قال انا ما صدقت نازك!! بس لازم اعرف ولاء كانت مبتزة الراجل في شنو؟! والفلاش اذا فعلا مع روان معناها الجاني عارفةكده كويس وكل شوية حيحاول يغتالها!!؟ لازم نتصرف ونحسب خطواتنا!!
____________________________________
الحاج سأل احمد عن مقتل نصر الدين!! وقال اذا نصر الدين ميت!! طيب طيب البهدد البنات ديل منو؟! وكمان لشنو نصر الدين يديهم رقم حساب قمر الدولة!! ده بيعني انه القاتل قمر الدولة!! لانو كل الشافو قمر الدولة بقولو عنه نصرالدين؟! معناها كلام ولد المرحوم صحيح!! وقمر الدولة بنتحل شخصية ابوه المغدور!! بس السؤال المحير لشنو يقتل نصرالدين!! واهم سؤال هل الجثة اللقيتوها دي فعلا تابعة لنصر الدين!! احمد قال علي حسب تقرير الطبيب انه الجثة بدت تتحلل بسبب المواد الكيميائية الحارقة الاستخدمها الجاني!! بس من خلال فحص الاسنان تبين انها من بتعود لنصر الدين….بس هل مقتلو ليه علاقة بمقتل ولاء!! ولا الجرىيمتين ما ليهم علاقة مع بعض!! القتل ولاء؟! وهل الجاني واحد ولا اشخاص متعددين؟!
والف سؤال كانو بطرحو نفسهم في ذهن الحاج!!
فقفل دفترو وقال ليهم انا راجع بيتنا بعد تعيدو استجواب ناجي ادوني خبر وطلع!
نواصل بعدين
يتبع ……………
الجزء الرابع عشر من رواية القاتل المختل
جنابو احمد وقف الحاج جنب بوابة القسم!! وقال للحاج انت كويس سعادتك!!؟
الحاج عقد حواجبو وقال لاحمد انصح من الخلفوك!! احمد ضحك وقال الحسنة ما بتنفع فيك نهائي!! المهم امش ارتاح واوعدك ما اخلي لناجي جنبة ينوم عليها!! لحدي ما اعرف علاقتو شنو بالقضية!! الحاج ابتسم!! وقال منتظر منك خبر مفرح!! وساق عربيتو ورجع بيتو!!
احمد دخل مكتبو بحماس وحزم!! وقال لمساعد الشرطة جيب لي ناجي!! الاخير قال ليه ناجي طلع قريب بس ضامنو موجود!!؟ احمد ضرب الطاولة وقال منو القال ليكم تخلوه يطلع؟؟ مشى وين؟!
العسكري قال ما منعناه لانه عندو ضامن سعادتك! وانت ما اديتنا تعليمات بأنو يكون تحت الاقامة الجبرية لحين اكتمال التحريات!!؟
احمد اتافف وقال ليه في خلال عشرة دقائق عايزو يكون قدامي اتصرف!! طلب ليه قهوة وولع سيجارة وبقى مركز مع الكمية المهولة من التحريات؟! وبينو وبين نفسو!! بقول دي احلها كيف!! وياترى القاتل منو؟!
جا داخل عليه نفس العسكري!! قال ليه بنهره!! اها وينو؟! العسكري قال اتصلنا عليه وقال طلع يصلي هنا قريب!! واضاف انه تلفون ولاء جابوه من الداخلية!! وسلمو ليه!! احمد حاول يفتحو بس كان شحنو مخلص!! فصل تلفونو من الشحن وخت تلفون المرحومة!! وفي اللحظة ديك جا داخل ناجي وبرضو شايل معاه تلفون روان!!؟ احمد نهرو وقال منو السمح ليك تطلع!! ناجي ما رده عليه واكتفى بالاعتذار!! احمد قال ليه اقعد!! وطلب من العسكري يجيب ليه ورق ابيض!! وبقو يعاينو لبعض!! ناجي ينزل عيونو ولسسه احمد مركز معاه!!؟ لم العسكري جاب الورق!! احمد قال ليه القضية كل مره ماشة تتعقد لانكم ما صادقين معانا!!؟ والبنتوصل ليه من خلال تحرياتنا!! كان ممكن يختصر علينا الزمن اذا خبرتونا بيه من نفسكم!! ناجي قال طلبتو مني شنو وانا ما نفذتو؟! ما حصل اتصلتو علي وانا رفضت!! بالعكس انا شايل هم اكتر منكم؟
احمد قال هم شنو؟! ناجي بدأ ينفعل!! وقال بنت اختي تتقتل بالطريقة البشعة دي واختي للان ما قادرة تتقبل الحصل!! ونحنا مطبقين يدينا!! ده في حد زاتو ما هم!؟
احمد قال من الاخر!! اعايز استجوبك!! ناجي قال يعني لسسسه شاكين فيني!؟
احمد قال ما بالضرورة نكون شاكين فيك!! ليه ما تحسبها بأنك عايز تساعدنا؟! يمكن معلومة صغيرة تفيدنا وانت ما جايب خبر!! ولا ما منتبه ليها!! ناجي اخد نفس سخن وقال لجنابو احمد ابدأ!! ما عندي مشكلة احاوبك اذا فعلا كلامي بساعد في حل القضية!! احمد قال ليه اخر مره شفت المرحومة متين؟! قال قبل الحادثة بيومين!! كانت في البيت وانا جيت اتغديت معاهم وجبتها الداخلية!! احمد قال ليه كيف كان سلوكها!! وما جابت ليك سيرة عن اي خلاف مع اي زول!! قال ابداً!! كنا مبسوطين وبنضحك!! ولمن وريتها اني عايز اتزوج صحبتها؟! احمد قال ليه نازك!!؟ ناجي استغرب وقال منو القال ليك! وانا نازك ما كلمتها!!؟ جنابو احمد قال ليه عشان كده قلت ليك انت الوحيد الما اتحرينا معاك!! ولسسسه نحنا عارفين اكتر من كده!!؟ ناجي قاطعو وقال معناها جنابو الحاج شاف إشعار بنكك!!؟ احمد قال ليه خلينا في المهم!! بعداك حصل شنو؟! ناجي قال فرحت وقالت لي مبروك بس مرتك بتقتلك!! وضحكت وما كنت عارف انو هي الحتموت!! كانت اكتر من بنت اخت بالنسبة لي!! كانت بتصارحني وبتستشيرني اكتر من ابوها!! ولانو ما عندها اخو اكبر منها!! انا كنت ليها الخال والاخ والصاحب!! واتأثر شديد وعيونو دمعت!!؟
احمد قال ليه **** يصبركم!! بس بما انك قريب ليها ما جابت ليك سيره اي خلاف مع اي زول!!؟ ناجي استغرب واستنكر فكره انها تكون عندها مشكلة مع زول؟! وقال لو اتشاكلت مع بتاع المواصلات بتجي تكلمني!! جنايو احمد قال ليه طيب علاقتها مع صاحباتها كيف؟!
قال ليه قوية شديد!! واحمد قال الاقرب ليها منو؟! قال بدون شك روان!! احمد قال ونازك؟! ناجي قال دي برضو صحبتها وفي نفس الداخلية!! بس روان صديقتها المغربة!! جنابو احمد قال ليه علاقتك مع نازك بدت متين؟! ناجي احرج!! لانو نازك اصغر منو باكتر من١٥ سنه!! قال ليه من فترة!! احمد قال بالتحديد!! قال زي ستة شهور تقريبا!! احمد قال ليه ومستمرين ولا؟! ناجي قال نفس كلام نازك!! قال كان عايز يتقدم ليها بس حصلت مشكلة وبعديها حصلت الوفاة!! فما متواصل معاها كتير!! وسألو عن موضوع القروش!! وبرضو نفس رواية نازك تطابقت مع اقوالو!! احمد سألو اذا شاكي في زول!! قال ما عندو زول معين بس بتمنى انو الجاني يتقبض قريب!!؟ وقال ليه حصل نازك ولا ولاء جابو ليك سيرة فلاش ولا تسجيلات!! قال بإستنكار أبداً؟! تسجيلات شنو؟! احمد قال ليه اناقشك في تحرياتنا كمان!! ناجي اعتذر وقال ليه نحنا لا ناس نيابات ولا محاكم!!! ولا عارفين الاجراءات والقوانين!! ما تأخذونا!! لانو ما دخلنا ليها إلا الحاااار!! احمد استلم منه تلفون روان وقال ليه اتفضل لو احتجنا ليك بنجيبك!!؟ ناجي جا قايم واتجه علي الباب!!! وقبل ما يطلع!! قال ليه ماعارف اذا حأفيدك ولا لا؟! بس قبل فتره ولاء كانت معاي في العربية وقالت الاغاني ما حلوه!! طلعت فلاش ونزلتو في العربية!! واشتغل زي كلام!! طوالي سحبتو وقالت لي دخلت الغلط؟! ده حق روان!! احمد لمن قام علي حيلو!! وقال ليه ده الكلام الانا عايز اسمعو!! الفلاش نوعو شنو؟! ونوع الكلام السمعتو شنو؟! واتزكر ولاء قالت شنو بالحرف لانو كلامك مهم شديد؟!.
ناجي جا راحع وقال ليه و**** انا ما ختيت في الموصوع حاجة؟! بس سوالك عن فلاش وم فلاش اتزكرت المرقف داك!! اما نوع الفلاش ما بعرفو انا ما مسكتو منها بس كان لونو اسود!! جنابو احمد قال ونوع الكلام!! قال برضو ما قدرت افرزو لانو الصوت ما كان عالي!! وهي طلعتو بسرعة لمن بدا!! وبتزكر اغاني زاتو تاني ما شغلنا!! احمد قال يعني ما جابت ليك سيرة عنو ولا عن روان ولا شالتو منها متين؟! قال لا ما حصل!! بس كل القالتَو انه حق روان فيه محاضرات صوتية ولا شنو ما متزكر!! احمد شكرو!! وقال ليه بعد نخلص من تحرياتنا حنتصل عليك تجي تستلم تلفون روان!! وطلع؟!
الرائد احمد! فتح تلفون روان كان بدون رمز!! راجعو حته حته ما لقى اي شي مريب!! حتى الدردشات كانت عادية!! وكلامها مع ولاء وحتى الدردشات المؤرشفة دخل عليها!!؟ ما اتوصل لشي!! لدرجة انه شغل الاغاني قال يمكن يلقى تسجيل صوت ولا اي شي يدعمو!! بس للاسف ما لقى شي!! وحتى الصور عادية!!! واتزكر من خلال كلامو مع الحاج انه روان اعترفت للحاج انها اتعرفت علي نصرالدين في الفيس!! دخل ملهوف علي حسابها ولقى الصفحة فاتحة بس الماسنجر قافلاه برمز!! اداه لخبير برمجيات معاهم فك الشفرة في ثواني!! فتش فتش لحدي ما لقى رساله مريبة من ولاء!! قالت ليها زولك طلع نصاب!! وروان راده ليها ب نصر الدين؟! ومعاه اموشن بتاع خلعة!! قالت ليها بحكي ليك في الجامعة م ينفع ندردش!! روان طلبت منها تتصل عليها بس ولاء رفضت وقالت ما عندها رصيد حتحكي ليها بكره!! والشي الاستوقف جنابو احمد قالت ليها والدليل علي كلامي ما بقدر اجيبو معاي بس بصورو ليك!! لكن الدليل شنو؟! وهل روان شافتو ولا لا؟!
ولم دخل دردشتها مع اسم مستعار بس من خلال الكلام والأسماء عرف انو ده نصر الدين؟! ولا قمر الدولة المنتحل شخصية نصرالدين ما معروف؟! واخر رسأل كان تهديد مباشر!! جيبي حاجتنا وبنرحمك ولا حيحصل فيك نفس الحيحصل في صحبتك!!؟ والوقت داك ولاء ما ماتت!! هل نفذ تهديدو فعلا وقتل ولاء!!! ولا صدف؟
احمد تاني ولع ليه سيجارة!! ورجع التلفون لباع البرمجيات المعاهم وقال ليه افحصو لي المستندات المفقوده!! ورجع مكتبو شاف تلفون ولاء لقاه شحن نص البطارية!! فصلو وفتحو بس كان مقفول بنمط!! نزلو برمجة براهو وفتحو!! ولانو التلفون ده عاملاه بالسر ماف زول عارفو غير نصرالدين وقمر الدولة وروان ونازك ويوم الحادثة وقبل وقوعها علم بيه كمال!! واخر مكالمة كانت من الرقم المسجلاه بالغياظ داك!! لم رجع للسجلات الطلعها الحاج!! لقى الارقام مطابقة وما محزوف شي!! ولم اداه للضابط بتاع البرمجيات لقاه مفرمط!! وم فرمطة عادية ممكن يستردو المحتويات تاني!! اشتغلو زول خبير لدرجة انه الضابط ما قدر يسترد الملفات المحزوفة!! واتزكر كلام نازل لم قالت نصرالدين طلب تلفون ولاء بدون علمها!! وشالو لمده ساعتين!!؟ بمده اتاكد انه حزفو الملفات عشان يخفو الادلة البتبتزاهم بيها ولاء!! بس بتبتزاهم بشنو؟! وهل ليهم علاقة بموتها ولا تصارب مواقف!! اتصل علي العقيد الماسك قضية مقتل نصرالدين!! واستفسر عن اخر التطورات!! لأنه المجني عليه ليه علاقة بموت المغدورة ولاء!! الاخير ضحك وقال حتى وهم ميتين معذبننا!! وقال فرح احمد لم قال ليه اكدنا انه القاتل قمر الدولة والان هارب!!؟ احمد قال كيف؟! العقيد قال ليه لانه سحب مبالغ من رصيدو في البنك واستخدم بطاقتو المصرفية في الولاية الفلانية!! وفي مستندات بتعود لنصر الدين مفقودة!! وبعد عمل عملتو دي هرب!!! ومن خلال تحرياتنا اتشاف في كذا حته بعد الجريمة وكان متنكر!! واسسسه بتبحث عنه!! احمد قال بس الدوافع شنو؟! العقيد قال القصد الجنائي ما حنعرفو الا اذا اعترف!! بس الحكاية واضحة كان بستخدم اسم نصرالدين!! وبغش ناس بالأسماء مستعارة ومنهم ضحيتكم!! وشكلها اكتشفت حقيقتو وخلص عليها!!؟ قبل ما تنبه الناس ولا تفضحو!! احمد شكرو وقال ليه ممكن توريني اخر مكان اتشاف فيه عشان نقفل تحقيقاتنا!!
وفعلا العقيد مصطفي وراه!!
احمد قال لو روان ولا الفلاش المعاها لقيناه حنقفل قضيتنا دي خلاص!!؟ واتصل يبلغ الحاج الخبر السعيد الوعدو بيه!! واتصل ملهوف ومن الحاج قال الووووو!! احمد قال ليه عرفت القاتل!! وعرفت مكانو كمان!!؟ الحاج ضحك وقال ليه قمر الدولة عااارف انه هو!! أحمد اتخلع وقال للحاج انت عندك جن برويك تحركاتنا!! الحاج قال ليه انا الثعلب! وقفل في وشو!!؟
احمد بقي يكتب في توصيتو الاخيرة لوكيل النيابة بتوجية الاتهام لقمر الدولة الهارب!! وياداب حس بالاريحية!! وقفل قضيتو ورجع بيتو فرحان!! لانه اثبت لنفسو وللحاج انه جدير بالمكانة وانه ضابط مجتهد!! ومن صباح الرحمن اتصل علي الحاج وقال ليه منتظرك نمشي النيابة مع بعض نرفع تقريرنا!!؟ الحاج قال ليه ده الاختلاف بيناتنا!! انت بتزفع ورق وانا برفع متهم!! احمد ايتغرب من غرطسة الحاج الزائدة!؟ وقال ليه اتراضع شوية ي جنابو ياااخ!!! الحاج ضحك وقال ليه اديني ٧٣ساعة وحسلمك الجاني!!؟
احمد اندهش!! وقال ليه نشوف؟!!
نواصل بعدين
يتبع ……..
الجزء الخامس عشر من رواية القاتل المختل
الحاج كان ماشي برجلينو وبفكر في القضية!! وقال قمر الدولة لشنو قتل نصرالدين!!؟ والكان غاشيهم بأنه اسمو ناصر؟ هل قمر الدولة ولا المرحوم نصر الدين!!! واتزكر انهم كللللهم بقولو لناصر نصر الدين!! روان وكمال ونازك!! بس في اول تحرياتهم ما قالو كده وقالو اسمو ناصر!! وناس الحاج ما عرفو اسم المرحوم الا بعد رجعو لشركة الاتصال وورتهم الشريحة مسجلة بأسم منو؟؟! وبعد تحليلاتو دي استنتج انهم كلهم بعرفو الضحية الأخيرة نصر الدين!!؟ وجاتو افكار عجيبة في انهم ممكن يكونو مشتركين في وفاتو!! وفضل ماشي لحدي م حس بالتعب الذهني والبدني!!؟ ووقف ليه عربية ورجع البيت!! كان بصلي في الظهر!! وجرس الباب ما وقف!! ولمن لخبط في صلاتو!! وسلم وقام متنرفز من الزائر الثقيل!! وفتح الباب بعنف!! لقاه احمد واقف مستغرب!! واتكلمو ف نفس الوقت!! الحاج بقول ليه عايز مني شنو ي غبي!! واحمد بقول مالك ما بتفتح!!قلت يمكن يكون القاتل اتمكن منك؟ الحاج اتأفف وقال ليه عايز شنو؟! جنابو احمد قال عايزك مع موضوع مهم!! اتصلت عليك وتلفونك مقفول؟! الحاج قال خش في الموضوع!! احمد قال وعلي الباب يا سعادتك!!؟ الحاج زح ليه من الباب ودخل!! قال انا حاسي انه نازك مشتركة مع قمر الدوله وهي البتنقل ليه تحركاتنا!!؟ الحاج قال شاكي ولا متأكد؟! احمد قال شبه متأكد!! الحاج قال كيف؟!
احمد قال اصلا انا ما كنت مطمئن لنازك ولاقوالها المتناقضة!! راقبت تلفونها!! ومرسل وراها بتاع مباحث!! جاتها رسالة من رقم مجهول؟ ورجعت فيه اربعة مكالمات بس ماف زول رده عليها!! وما بنقدر نعرف محتوى الرساله شنو؟ الا نفحص التلفون!!؟ الحاج قال ربعدين؟! احمد صلح قعدتو!! وقال عربية صالون سوداء وقفت بشارع الداخلية ونازك مشت عليها!! فانا متاكد انه ده قمر الدولة!! فجيت اكلمك!!!واشوف رايك في الموضوع!!
الحاج قال اكتشاف عظيم!! ومن خلال نازك حنصل للجاني!!؟
احمد قال للحاج ما وريتني عرفت من وين انه القاتل هو قمر الدولة!! الحاج ابتسم وقال ليه اعمل لينا شاي اول!! احمد دخل المطبخ وووصل السخان في الكهرباء!! وفتح التلاجة بكركب في الاكل!! الحاج قال ليه قول جابني الجوع!! ما تتحجج بالقضية!!؟ احمد ضحك!! وقال و**** ابوي ما حصل اهاني بالطريقة دي!! بس سبحان **** برضو بريدك وبحترمك!! وبحس كاني في بيتنا!! الحاج ابتسم بس ما رده عليه!! جا طالع شايل الشاي وماسك ساندوتش في اليد التانية!! قدم للحاج كبايتو وقال ليه احكي لي!! الحاج قال ليه امس ما رجعت البيت طوالي وغشيت روان!! وسالتها عن سر ولاء! بس قالت كل العارفاه انه مزور هويتو!! قال ليها هو منو؟! قالت ناصر!! الهو طلع نصر الدين!! وفي الحقيقة طلع اسمو قمر الدولة!! قال ليها طيب الحاجات الشالتها شنو؟! قالت صورت مستندات لقتها في عربيو ومعاها جواز بيحمل اسم مستعار بس الصورة تابعة لناصر الطلع في الاخر قمر الدولة!! لم سالتها لشنو ما كلمتنا من الاول قالت كانت مفنكره انه الموضوع ماليه علاقة بموت ولاء!! وحتى لو كان ليه علاقة من بعيد ما حبت تتورط معاهم!! عشان ما يحصل فيها نفس الحصل لولاء!!
احمد قال يعني روان طلعت الجوكر!! وداسسسه نفسها!! طيب لشنو اعترفت!! ونحنا اصلا ما كنا عارفين بموضوع التزوير ده!! الحاج قال سألتها نفس السؤال بس انا كنت عارف بموضوع الفلاش!! ومن جبت ليها سيرتو!! عرفت اني عالم بموضوع الفلاش!! وغير كده كانت متاكدة انه القاتل عارف انه الادلة معاها ولا ما كان حاول يغتالها!! احمد قال وووين الفلاش!! الحاج قال في الحفظ والصون!! وبحقق في محتوايتَو بطريقتي الخاصة!! احمد زعل وقال ليه لشنو انا اخر من يعلم في كل شي!!؟ وانا بكل حسن نيه! كل ما اكتشف حاجة بجي جاري اوريك ليها!! الحاج ابتسم وحكى راسو!! وقال انت شاطر ومجتهد!! بس انا كنت شاكي انو القاتل عندو شريك!! وما حبيت اكشف ليك الامر عشان القاتل ياخد احتياطاتو!! ولا يسبقنا بخطوه!!
جنابو احمد انفعل وقال للحاح ما بتثق فيني ولا تكون شاكي فيني!! الحاج ضحك وقال لأحمد اقعد ي ابني!! انت عملت الشاي من ايي موية!! لأنك شكلك لخبطت الكرستالات!! احمد ابتسم وقال بتشرب كمان!! الحاج كحة وقال جيل فهمكم عفن!! بس ناخدكم علي قدر فهمكم!! احمد رحع صر وشو وقال خلينا في موضوعنا!! لشنو تخبي علي!! الحاج قال لاني ما كنت عارف انه نازل هي البتساعد الجاني!! بس كنت متأكد من انه في زول بساعدو!!؟
احمد قال نعتقل نازك يعني!! الحاج قال ليه اسسسه ما شكرناك شنو الغباء المفاحي ده!!؟
اميد لازم تعتقلها!!؟
وقبل ما الرائد احمد يطلع!!؟ قال للحاج دقيقه!!! نازك قالت انه الفلاش غالبا ما يكون مع روان!! يعني عارفة مكانو!! واذا نازك عارفة معناها قمر الدولة عارف؟!
الحاج قال شدد الحراسة علي روان في المستشفى!! وقبل ما يتم كلامو اتصلو عليه العساكر المكلفين بحراسة روان وقالو تم اختطافها من المستشفى!!!
نواصل بعدين
يتبع ………..
الجزء السادس عشر من رواية القاتل المختل
احمد رجع للحاج وملامح وشو ما بتتفسر!! قال كيف الكلام ده؟! وانتو كنتو وين ياحيوانات!! اتخطفت متين!!؟ الحاج هرول علي تلفونو وما انتظر احمد يخلص مكالمتو!! واتصل علي مدير غرفة المراقبة في المستشفى!الكان اتعاون معاه يوم روان اختفت اول مره!! الاخير قال ليه نحنا بنراجع في الكاميرات الأن!! وقفل!! احمد قال للحاج الخائف منو حصل!؟ **** يستر بت الناس!!
الحاج قال ليه شوق نازك وين؟! واتحرك بنفسو اتصل علي بكري يستفسر منو لو نازك في الداخلية؟! الاخير قال ليه الليلة ما برجعو!! نهايه الاسبوع بمشو لاهلهم!! وطوالي اتحرك علي محل سكنها!! لم وصل دقة الباب شديييد!! جاه واحد شكلو كان نايم!! وفتح بأنفعال وقال جاين جاين ياااااخ؟ لم فتح ولقاه ضابط والصقر مزين اكتافو!! اندهش!! وقال خير سعادتك عايز منو؟! احمد عرف عن نفسه وسأل عن نازك!! الفتح الباب قال ليه عندنا مناسبة وطلعو!! بس عايز منها شنو؟! احمد قال المناسبة وين!! الولد انفعل!! وقال جنابو وبنحترمك!! بس شنو بتسأل عن بنتنا الشغلة سااايبة هي!! اولا وريني عايز منها شنو؟ وجاي البيت بخصوص شنو؟! احمد ما كتر معاه واتصل عليها اول جرس لمن قطع!! ما ردت؟ تاني اتصل قفلت فيه الخط وقفلت التلفون!! احمد اتنرفز شديد!! وقال للولد يلا بينا علي مكان المناسبة الموضوع مهم!! وكان بتكلم بإنفعال وغضب!! الولد ركب معاه ووصلو مكان المناسبة!! وبقو يفتشو فيها بس بدون فائدة؟! ماف زول شافها!! لحدي ما في شاب من الجيران قال ليهم موووش البنت اللابسة عباية كبدية ديك!! اهلها قالو ااااي!! قال ليهم وانا جاي من الجامع شايفها كانت بتتكلم مع زول في عربية!! بعداك ركبت معاه!! بس العربية كانت واقفة ما اتحركت!! وانا كملت طريقي وما عارف نزلت منها ولا مشت فيها!!؟ وسألو عن نوع العربية ولا لوحتها!! الشاب قال م انتبه للوحة كويس بس كانت بتبدا بالرقم 8 وكانت صالون لونها اسود!! احمد اتصل كلم الحاج وقال ليه حتى نازك اختفت!! الحاج قال حتقع جريمة تانية!! ولو حصلت حتعقد علينا الأمور!! احمد قال بس منو هو!! كيف بيلعب معانا بالذكاء ده!! انا اشك انه قمر الدولة ما براه معاه ناجي ولا كمال!! الحاج قال يمكن يكون اصابع الاتهام اقرب لناجي من كمال لانه في كوبر!! احمد قال ليه نسيت اوريك!! لطلقو صراحو من اول امس!! الحاج قال ده منو الحيوان الاصدر أمر زي ده!! احمد قال المحامي حقو قدم طعن في النيابة العامة!! وبعد البينة المتعلقة بقمر الدولة ظهرت للكل!! النيابة قبلت الطلب!! واطلقت سراحو لحين اكتمال التحريات!! الحاج قال تصرف غبي بس انا حأتصرف!! وقفل من احمد ومشى النيابة العامة!! في الطريق اتصل عليه المسئول عن مراقبة المستشفى! وقال ليه روان اتخطفت من الغرفة من قبل تلاتة اشخاص لابسين لبس ممرضين!! وطلعو بيها في عربية سوداء دفع رباعي!!؟ الحاج شكرو وقفل!! لم وصل النيابة اتكلم مع مولانا الافرج عن كمال وقال ليه تتحمل تبعات قرارك!! اذا تبين أنه كمال متورط!!؟ الاخير انفعل في الحاج كيف يخاطبو بأسلوب زي ده!! وجوطتو كانت فوق!! لمن المستشارين تدخلو!!! الحاج طلع غضبان!! وما عرف يقبل علي وين؟! واتزكر واحد ممكن يساعدو!! وبعد ركب وقبل ما يتحرك حسام فتح باب العربية وركب!! الحاج عاين ليه بدهشة!! نظام جاي من وين انت؟!
وقال ليه اتحرك ولا خليني اسوق ليك؟! الحاج قال ليه عارف انا ماشي وين؟! ولا بتركب ساي!! حسام قال اي محل!! بس المهم نلقى روان!! الحاج اتنفس بصعوبة وقال انا وعدتها اني احميها!! والثعلب عمرو ما اخلف بوعده!!
واتحرك لم وصل سجن كوبر! مأمور السجن رفض يخلي الحاج يقابل الشخص الهو عايزو!! بس حسام استخدم سلطاتة وطلع السجين الطلبو الحاج!!! لم جا!! قال ليه انت؟! الحاج ابتسم وقال لو ما محتاج ليك ما كان جيتك!!؟ ده مجرم كان قبضو الحاج في تزوير عملة وبسبب مساعدة منو للحاج وقف معاه في المحاكمة وخفف عنه العقوبة!! بس لسسسسسه بكون زعلان لانه دخل السجن بسبب الحاج!! قال ليه عايز شنو؟! الحاج طلع ليه جواز قمرالدولة المضروب وقال ليه ده شغل منو؟! السجين قال ليه ما تتخيل سعيد قدر شنو بشوفتك!! حسام نهرو!! السجين قال للحاج ده متدرب معاك ولا شنو؟! وكأنو بستحقر جنابو حسام!! الحاج هدا حسام وقال ليه لو ما بتقدر تضبط اعصابك خليني معاه واطلع!! حسام رجلو بقت ترجف وهزها بتوتر!! وطلع ليه سفه قدام الحاج!! الحاج قال للسجين طلباتك شنو؟! السجين قال لحسام شوف واتعلم!! و قال عايز يقللو ليه سنين سجنه!! بالإضافة لمتطلبات في السجن من اكل وكيف وقروش كمان!! الحاج وافق؟! الراجل قال ليهم ده شغل نجم الدين حسين!! الحاج قال ليه والقاه وين؟! السجين قال انا طولت هنا بس في زول بيعرف!!؟ وطلب سجين تاني!!؟ وحتى السجين التاني عندو طلبات ووعدوه انهم ينفذو بعض منها!! حتى بعداك وصف ليهم مغر نجم الدين!!؟
طلعو من السجن مستعجلين عشان يصلو المزور!! الممكن يمسكهم رأس خيط من خلاله يصلو للبنات؟!
__________________________________
احمد رسل قوة وداهمو بيت كمال وجابوه القسم!! وقوه تانية اتجهت علي بيت ناجي!! لم جابو كمال قال ليهم في شنو؟! احمد رفع رجلو في الكرسي القصاد كمال وقال ليه وديت نازك وين؟! كمال قال ليهم نازك مالها الحاصل عليها شنو؟! احمد انفعل وقال اياك ترد علي بسؤال!! لشنو اتصلت علي نازك أول أمس وفي نفس اليوم الطلعت فيه من كوبر!! قال ليهم عادي حبيت اطمئن عليها!! وين المشكلة!! وبما انكم عرفتو اني اتصلت!! ارجعو للسجلات وشوفو اتكلمت معاها في شنو؟!
احمد قال ليه يعني انت ما شفتها؟! كمال اول سكت بس تاني قال لا ما لاقيتها!!؟ احمد قال طيب عربيتك لونها شنو؟! قال بيضاء!! احمد قال ليه بس اللقيناها جنب بيتكم كانت سوداء!! نفس الصالون الاتخطفت بيها نازك!!؟ ومن الصدفة العجيبة انه رقم اللوحة يطابق رقم عربيتك!!! كمال قال مستحيل!! ونطط عيونو احمد قال رقم لوحتك كم؟! كمال قال 8664 وقال وهو متوتر وبيرجف وفاقد للتركيز!! انا! انا ما خطفت لا نازك ولا روان!!؟
احمد ضرب الطاولة بقوة وقال ليه عرفت من وين انه روان اتخطفت؟!
كمال بقي يبكي!! وانهار!! وقال في زول عايز يورطني!! احمد قال ليه احسن ليك اعترف والا حتتمنى الموت قبل ما تتحاكم!! وانا بعي كل كلمة قلتها!! وقاصد اي تهديد يخطر علي بالك!! وجدع الكاب من الطاولة وقال ليه وديت البنات وين؟! كمال قال و**** ما عارف الحصل ليهم شنو؟! بس اتصلت اطمئن علي نازك وقالت لي عايزة اللاقيك!؟ اتعذرت ليها بكم عذر بس رفضت!! واصرت انه نتلاقى اليوم!! قلت ليها اجيك في الداخلية رفضت وقالت لي بتكون مراقبة!! لم سألتها لشنو خايفه من الشرطة قالت لي ما خايفة منهم!! بعد نتلاقى حوريك خايفه من منو؟! ولو ما مصدقني امشو شوفو سجل المكالمة من شركة الاتصالات!! احمد قال وبعد داك؟! قال وصفت لي المكان الهي فيه ومشيت زرتها!! ولمن وقفتنا كانت ما ظريفة في الشارع دخلت العربية!! وقالت لي انها في خطر وانها ممكن يصيبها مكروة!! واذا ما سلمتو الفلاش المع روان!! قلت ليها هو منو قالت لي ما وراني اسمو بس شكلو ده القتل ولاء!! شلت منها الرقم وقلت ليها بحاول اساعدك واعرف ده منو عشان كلنا ترتاح!! ومن خلال كلامها حسيت بأنه هي وروان حياتهم في خطر!!؟ وهدا الرقم مسجلو في تلفوني لو ما مصدقني!! احمد قال وحصل شنو بعداك!!؟ كمال قال نزلت من العربية وانا مشيت!! ومن وصلت البيت انتو داهمتوني!!؟
احمد قال ليه عقدتها علي نفسك!!! وصدقني البنات ديل لو ما رجعو بسلامة انت حتروح فيها!!؟ وطلب من العسكري يرميهو في الحراسة!! واتصل يكلم الحاج بأخر التطورات؟! بس الحاج ما رده عليه!!
__________________________________
نازك فتحت ولقت نفسها مقيدة من رجلينها في كرسي!! اتخلعت وبقت تكورك!! والزاد خلعتها شافت روان ممدده قدامها في نقالة حقه مستشفي!!! ومحل الطعنات القديمة بطلع دم!! فزادت في الكواريك!! بتقدر تقوم علي حيلها بس ما بتقدر تحرك رجليها!! واتلفتت يمين شمال ماف حتى اثر باب!!!وما عرفت زاتو دخلو هنا كيف!! وسمعت صوت بتكلم معاها من خلال مكبر صوت؟! وقال ليها قدر ما انجزتي سريع طلعتي سريع!! بقت تصرخ بجنون!! وبتقول انت منو؟!
قال ليها موتك!! بكت وقعدت في الكرسي وقالت اقتلني!!؟ قال ليها ما بالسهولة دي؟! وقال بما انك طالبة مختبرات!! _اكيد درستي انوتومي!!؟ اتخلعت رقلبها بقى يضرب بقوه؟! وقالت عايزني اشرح شنو؟!
سمعت صوت ضحكات وقال ليها الجثة الامامك دي!!؟ وقعت مغمى عليها!! لم فتحت كانت رقبتها واجعاها شديد ولقت نصها في الارض ورجولها معلقة في الكرسي!! وقالت ليه اقتلوني بس مستحيل اقتل صحبتي ولا ااااي زول؟! قال ليها انتي متأكده ما قتلتي زول قبل كده!!؟ بقت تصرخ وبتطلب المساعدة بس من منو؟! وماف زول سامعها غير الشخص أو الاشخاص الحاجزنها ديل!! وقال ليها اكسبي الزمن قدامك ١٥ ثانية!! يا تبدي في تشريح الجثة القدامك دي!! ياتحصليها!! صرخت وقالت قتلتوها!! قتلتو روان؟! وحضنتها وبقت تبكي!! والعداد بدا!! 15’14، 13 وبقت تسمع صوت حفر!!! دنقرت تحتها شايفة اربعة رؤؤس حاده!! وصاعده لمقدمة الكرسي!! وكأنها حتخترق جسم نازك من تحت وما معروف تقيف وين!؟ فزاد هلعها وصريخها!!! وسمعت الصوت بقول ليها شررررحيها!!؟ ومسكت المشرط ويدها بترجف!!!
تواصل بعدين
يتبع ……..
الجزء السابع عشر من رواية القاتل المختل
نازك قامت على حيلها وجسمها كلو بيرجف!! لدرجة انه المشرط وقع منها مرتين!! وعلى قدر خوفها كانت غريزة حب البقاء عندها مسيطرة!! بكت بحرقة وبدت تقطع في تيشيرت روان!!! وخلت صدرها بملابسها الداخلية بسس!! ولمن ختت المشرط في نحرها!! ما قدرت تخترق جسد روان!؟ وتحت الدربكين!! لامست فخذها!! ومن شده الألم حست وكأنه مخترق قلبها ولا عينها!! وثبتت يدها بالتانية وبدت تشق في صدر روان!! وفجأة روان فتحت!!
نازك من الصدمة وقعت مغمى عليها!!؟
___________________________________
احمد بعد حقق مع كمال وكان منفعل شديد!! ولمن وشو برجف!! وبقول نحنا وين؟! في شيكاغو ولا المكسيك!! كيف يخطفو بنتين نهارا جهارا ونحنا قاعدين زي الطراطير!!! وبإنفعال قال للعسكري طير جيب لي ناجي!! لم جابوه!! كفكف اكمام الكاكي!! وشنق شفتو العلوية بسفه! وعيونو بتدفق شرار!! ناجي دخل وقال ليه خير جنايو انت كويس!! الرائد احمد جاط فيه وقال انت بتحقق معاي!! ناجي قال العفو بس عايز اطمن عليك!! احمد لفى بسريع من ورا الطاولة وجا قعد قصاد ناجي وقال ليه بتقربنا صله رحم!! ولا صاحبك انا عشان تطمئن علي!! ناجي اعتذر!!
بالجد جنابو احمد لاول مره ينفعل للدرجة دي!! وممكن عادي يضرب ولا يطلع عن طورو!! وقال لناجي نازك وين؟! ناجي قال نازك دخلي بيها شنو؟! احمد ضرب بتلفونو الطاولة وقال انت اتصلت علي نازك امس من رقم كذا كذا وهددتها!! بس كدي انكر وشوف ح اخليك تعترف كيف؟! ناجي سكت!!؟
احمد ابتسم وقال وما كده وبس!! امس جيتها في الداخلية! بعربية سوداء دفع رباعي!! ورفضت تلاقيك؟؟ ونفس العربية اتخطفت بيها روان اليوم من المستشفى!!! حتعترف ولا اخليك تعترف بطريقتي!! ولمن نفسو قايم!!! ناجي قال هددت نازك ومشيت اشوفها بس و**** عربيتي اتسرقت من صبح اليوم!! وطلع من جيبو بلاغ الفقدان من النيابة!! احمد ضحك وقال ليه يا انت غبي شديد!! يا بتستغباني!! ناجي قال و**** جادي معاك!! عربيتي اتسرقت!!احمد قال ونازك برضو العربية جاتها براها!! والتهديد اترسل ليها براه مووش!!؟ ناجي اتنهد!! وطلع تلفونو ورا احمد صور نازك وهي في الوضع المخل المع حبيبها السابق!! وقال ليه الرسائل دي جاتني امس!! اتصلت عليها بس نكرت وبعداك بقت تبكي!! وقفلت فيني ومشيت اشوفها الصور دي قصتها شنو؟! ولشنو غشتني وقالت كان ببتزوها بصوري وانا معاها!! وما كده وبس؟! حتى المرسل قال لي نازك ليها علاقة بمقتل ولاء!! عشان كده انا اتهورت!! احمد قال وخطفتها!!؟ قال ابدا و****!! الحمد*** انها اختفت براها لو لقيتها كان ممكن اغلط فيها!! احمد قال ليه ما مصدقك!! بس حأخد كلامك بعين الاعتبار!! وشال منو الرقم الاترسلت منو الرسائل لناجي!!! لم بحثوه لقوه بإسم محمد احمد!! وفي اثناء ما بيبحثو عن رأس خيط عنو!! لقوه فاتح بلاغ من يومين بسرقة تلفون هواوي y8 فأحمد اتشوش!! دخل ناجي وكمال الحراسة بس ما قدر يصل لمكان البنتين!!؟ اتصل كلم الحاج!!! الحاج قال ليهم ما طلق سراحهم لحدي ما اجي!! لم وصلو البيت الوصفو ليهم السجين!! حسام اتصل وطلب تعزيزات امنية وفعلا اتحركت تلاتة بكاسي شرطة واتجهو علي المكان الوصفو ليهم حسام!! ودخلو البيت الفي أرقى أحياء الخرطوم!! وفي الاول الحارس رفض يخليهم يدخلو ولدرجة انه النقيب حسام طلع ليه طبنجتو وختاها ليه في راسو حتى داك اتراجع!! الحاج دخل وجنابو حسام قفل الحارس في غرفة المراقبة وشال منو سلاحو وتلفونو!! وهم داخلين كان البيت فاااضي!!! دخلو كل الغرف!! كانت عبارة عن ورق عملة وطابعات عملة!! ومواد كيميائية!! ومنظر عجيب!! كيف الشرطة غافلة عن ده كلووو!!! وفي اثناء ما هم بفتشو لرأس خيط يوصلهم للبنات!! سمعو صوت بكاء خافت!! وبقى يتصنت علي الغرف وبقول للحاج اسمع!! لحدي م الصوت كان اقرب لغرفة!! لم دخلو لقوها فاضية!! بس فيها اثاث مكتبي!!! ورزم قروش!! شكلها مزورة!! وحسام قال ليه ماف شي هنا!! خلينا نشوف الغرفة التانية!! بس الحاج حس كأنو سمع ليه صوت!!! بقى يهبش في الحيطة!! بس بدون جدوة مافي شي!! ولا في باب خفي!! وجو طالعين!! حسام كان متقدم للحاج وماشي بسرعة!! وصوت البوت حقو في الارضية بيعمل صوت غريب!! وكأنه في فراق!! الحاج قال ليه اقيف!! ورفع السجادة لقى زر!! ضغط عليه!!! اتفتح باب زي حق الطائرات!! وفيه سلم حديدي صغير!! والخلعهم اكتر!! صوت صريخ روان!! جنابو حسام اتخلع!! ونزل بسرعة لمن وقع!! والحاج استعصى عليه النزول!! بسبب الحجم!! وكمان درجات السلالم بعيدة!! حسام جرا عليهم ملهوف!! وما مصدق عيونو!! ودم نازك مالي المكان!! القاتل المختل!! اخترق افخاذها بالدربكين!! وكانت فاقدة الوعي!! جنابو حسام رفعها للحاج وبصعوبة قدر يستلمها منو!! وهو شال روان في كتفو!! وهي بتأن من شده الألم!! ودمها كابي في الكاكي حق حسام!!؟
ومن طلعو قوات السجم وصلت!! اتصلو للاسعاف واسعفو البنات وركب معاهم ملازم اول!! وقال ليه ولا ثانية م تفارقهم!! وفضلو هو والحاج مع باقي التيم!! وببحثو عن دليل!! بس كان البيت فاااضي وما فيه إلا الحارس!! ولقو القاتل كان بتواصل معاهم عن بعد!! بواسطة لاسلكي!! يعني ما كان متواجد في نفس البيت!!؟
والنقيب حسام قال للحاج!! القاتل علاقتو شنو بنجم الدين المزور!!؟ ولا يمكن يكون ده قمر الدولة!! الحاج قال ليه الموضوع طلع اكبر مما تصورت!! والقاتل بتصرفو ده استفز الثعلب!! وحيشوف رد الثعلب حيكون كيف؟! وطلع قدام حساام!! ركب عربيتو وطلع على القسم!!! الشرطة حرزت البيت وضبطت كميات مهولة من المبالغ المزورة!! الكانت كفيلة بأنها تهد اقتصاد السودان!!؟
وماف امل انهم يعرفو الشبكة الإجرامية الورا الموضوع الا عن طريق الحارس!!؟
الحاج وصل القسم وجنابو احمد شرح ليه الحصل والاتوصل ليه بعد استجواب ناجي وكمال!!؟ الحاج قال ليه رسلو إرسالية لكل رجال المرور!! يتتبعو العربية الدفع الرباعي السوداء البتحمل رقم اللوحة كذا!!! دي حقه ناجي الادعى انها مسروقة!! لو طلعت فعلا مسروقة معناها حتوصلهم لحاجة!! لانها نفس العربية الاتخطفت بيها روان!!
احمد قال ما تنسى انه نازك اتشاهدت اخر مرة مع كمال!! في عربيتو!! ومن وقتها اتفقدت!! اذا افترضنا انه كمال خطف نازك!! وناجي خطف روان!! الرابط بيناتهم شنو او المصلحة الجامعاهم عشان يجمعو البنات مع بعض!!؟ في حلقة مفقودة!! الحاج شلت الكرسي وقال القاتل بستفز فيني!! احمد قال ليه رووق!! طالما انه بتهور كده اكيد حيكون خلا وراهو دليل!! الحاج قال ولو ما خلى دليل انا ح احصل عليه!! احمد قال ليه متأكد من انك حتعرفو!! وحبى يطمئن الحاج!! لانو شافو منفعل شديد!! وقال ليه انت الثعلب!! والثعلب لم يوعد لابد من يوفي او يغدر!! وبقى يضحك!! الحاج قام على حيلو وقال ليه انا قلت حةاقبضو في خلال ٧٢ساعة بس اذا ما قبضت بكرة على الجاني ما ابقى علي الحاج!! وطلع مهرول خلى جنابو احمد مزهول من ثقة الحاج المفرطة في نفسه!!؟
الحاج ركب عربيتو واتصل علي جنابو حسام يطمئن علي صحة البنات!! الاخير طمئنو وقال ليه كويسين بس نازك فقدت دم كتييير بس عوضوها بكم قزازة!! الحاج!! قال ليه فتحت!! حسام بإستغراب!! قال للحاج ما تقول لي جاي تستجوبهم!! الحاج قال لازم نضرب الحديد وهو حامي!!؟ وقال ليه انا جاي في السكة!! وقفل منو!! واتصل لمعارفو في تسجيلات الأراضي!! يتأكد من البيت الاتلقت فيه المضبوطات!! طلع بإسم منو؟! واتضح انه بإسم الفكي عثمان!! لم اتحرو عنو!! اتضح أنه بائع البيت قبل عام!! بس المشتري الجديد ما نقل الملكية لاسمو!! والمشتري اسمو عوض الكريم ادريس!! واتضح انه شخص متوفي منذ عام ١٩٦٠ بس في شخص منتحل شخصيتو!! وسارق الاسم!!؟
الحاج شال نفسو بصعوبة وقال لابد من انك تتعرف! واليوم قبل بكرة كمان!! ووصل المستشفى!! لقى اكتر من عشرة عساكر حارسين روان ونازك!! دخل عليهم!! وروان كانت تعبانة اكتر من نازك! بس سلم عليهم!! وقال لروان!! الحصل شنو معاك قبيل الصباح!!؟ بكت!! وقالت ما قادرة احكي!! تعبانة شديد سعادتك!! الحاج قال ليها بحزم! لازم تحكي؟! ولا حنفقد شخص تاني!!؟ شالت نفسها بصعوبة!! وقالت ليه كنت نايمة وحسيت بظل زول جنبي!! لم فتحت لقيتو طوالي خت لي منديل في انفي!! وتاني ما وعيت بشي!! لحدي ما شفت نازك ماسكة موس وبتجرح فيني!! الحاج قال ليها يعني ما شفتي شئ ولا لمحتي زول؟! قالت لا!! قال ليها شكرا ليك واخدي راحتك!! قبل على نازك!! كانت سرحانة بعيييد ودمعتها في خدها!! قال ليها ما حطول معاك!! بس بتمنى تتعاوني معاي!! قال ليها الخطفك منو؟! والحصل شنو بالضبط؟!!
نواصل بعدين
يتبع ……….
الجزء الثامن عشر من رواية القاتل المختل
نازك قالت للحاج بصوت خافت!! انا حأموت!! الحاج قرب عليها وقال قلتي شنو؟! جاااشت بالبكاء وقالت بصوت أوضح! حيقتلوني يا جنابو!! خليهم يقتلوني ساااي انا موافقة! بس ما يعذبوني!! الحاج شافها منهارة شديد!! وبدأ يهدي فيها!! وطمئنها أنه موجود وانه العساكر موجودين!! وطلب منها ما تخاف!! ولمن قرررب يتراجع عن استجوابها!! لانه بالجد وضعها صعب وكانت خايفه شديد!! الحاج متردد بين يقوم ولا يسأل!!؟ وهي اختصرت عليه الطريق وقالت ليه!! انا حوريك الحصل من البداية وانت احكم!! الحاج لم لقاها مصرة تحكي الفضول قتلو!! وحب يعرف الحصل!! وقال ليها بلهفة!! احكي لي!! وركزي **** يرضى علي والديك!! لانه اقل حاجة ومهما انت شفتيها هايفة وما بتستحق انها تتزكر ممكن تساعدني!!
نازك اتنهدت بصعوبة وقالت كويس!! قالت للحاج مشكلتي بدت قبل سنة إلا!! تتزكر حكيت ليك عن موضوع الصور والابتزاز الحصل لي!! الحاج قال ايي مالو!! اتنهدت وهي بتبكي!! وقالت الولد الكان بهددني ناصر ساعدني علي اذيتو!! الحاج كان مزهول!! وقال ليها كملي!!؟ قشت دمعتها وقالت لم ولاء اقترحت علي نطلب المساعدة من ناصر الهو طلع قمر الدولة! انا كنت محبطة وناصر كان طوق نجاة بالنسبة لي!! فعلا يوم كان جا وصل ولاء وانا طلعت عليهم!! سلمت! وركبت!! كانو اتنين!! واحد راكب ورا والتاني والاصلا بشوفو بوصل ولاء راكب قدام!! والعربية مضلمة وريحتها باااردة لمن بتدوخ !! الصراحة خفت!! بالرغم من انه ولاء معاي!! الراكب جنبها قال لي ما تخافي!! صحبتك حكت لينا قصتك واوعدك اني احلها ليك!! ولاء اكدت لي كلامو بس ما عرفتني عليهم!! وطلب مني صورة لحبيبي السابق!! انا اديتو!! وبغباء مني رسلت المقطع والصور الكانو ببتزوني بيهم!! نظام متظلمة وعشان يصدقني ويحن علي!! الحاج قاطعها وقال ممكن تختصري شوية؟!
الحاج بطبعو ما بحب حشوه الكلام!! قالت ليه انت قلت عايز التفاصيل!! اتفس بصوت مسموع وقال ليها خلاص كملي!! قالت ليه رسلتهم في تلفونو بالشير!! ونزلت انا ولاء وهم مشووو!! ووعدني يحل الموضوع!! بعد تلاتة يوم اتصل علي ناصر وقال لي تعالي تحت!! انا كنت في الداخلية فوق!! نزلت وابا ينزل من العربيه ولاني ملهوفة وخايفة ركبت وقلت ليه اها الحصل شنو؟! دور العربية! انا اتهجمت!! وحاولت افتح الباب بس م فتح معاي!! بقى يضحك وقال لي ما خاطفك انا!!؟ ارح حوريك حاجة بس!! خفت شديد وقلت ليه لالا ما ماشة انا طلعت بتوب من الداخلية!! وكمان الحارس ما بخليني ارجع الزمن!! بتزكر طلع عارف زمن عدم خروجنا وقال لي من 8م تسعة!! وقال لي ما تخافي قلنا ماشين قريب!! وفعلا ربع ساعة ما تميناها!! وصلت محل شكلو زي النادي الرياضي!! ولا صالون حلاقه ما عارفه!! قال لي ارح ادخلي!! ابيت بس هو ضحك واتقدم قدامي!! انا لم شفت الاولاد بعاينو لي وبتهامسو! تبعتو!! دخلنا وشفت محمود الاكس حقي!! الحاج قال اكس يعني شنو؟! قالت ليه حبيبي السابق!! قال ليها اهااا كملي!! قالت خفت وقلت يمكن يكونو متفقين معاه!! بس ناصر ضربو كف وقال ليه اعتذر منها!!؟ وفعلا محمود اعتذر!! وانا من الخوف جسمي كلو بيرجع ورجولي ما شالتني!! وفي ولدين بقو يضربو فيه!! وانا قمت جارية!! الحاج قال ليها المنطقة دي وين؟! قالت ما عارفه مشيت بالعربيه!! وموش العربات المظللة الجوه بشوف البرا!! يلا عربيتهم دي حتى الجوه ما بشوف!! سواد ساااي!! ركبت وانا خايفه!! جاني ناصر! وقال لي مالك طلعتي!! ده حقك لازم تشيليهو بالقوة ولا حتضيعي في عالم الذئاب البشرية ده!! قلت ليه لسسسه بضربو فيه!! تاني ضحك وقال لي يمكن يكون خلصو عليه!! انا لمن شهقت!! لسسه بضحك على!! وقال لي هزر معاك! ورجعني الداخلية!! انا تلاتة يوم ما نايمة!! والخوفني اكتر سألت من بعيد لبعيد عن محمود!! اصحابو والناس العلاقتي بيهم طبية!! قالو لي انو مختفي!! واحدين يقولو طلع بالسمبك!! وواحدين يقولو مفقود!! وفي الحالتين انا كنت مرعوبة وخفت فعلا يكونو قتلوه!! والشي الاكد لي انهم قتلوه!! قبيل والراجل المجنون البتكلم معاي!! قال لي شرحي روان!! وقال لي دي ما اول مره تقتلي!! حسيت انه بيحكي عن محمود!! بس انا ما قلت محمود و**** ياجنابو بيدي ما هبشتو!! الحاج قال ليها اها وبعداك حصل شنو؟! قشت دموعها واتنهدت بصوت!! وقالت كلمت ولاء واتخلعت!! وقالت لي الجماعة ديل انا شاكة فيهم من اول!! بس شوفي كان ما قبضتهم بالثابتة!! وفعلا قدرت تحصل علي بينات وادلة ضدهم!! ولدرجة انها قدرت تبتزاهم بيها!! ولم ما قدرو بتحصلو منها على شي!! ابتزوني انا عشان اجيب الفلاش والتلفون!! الحاج قال دقيقة!! عرفو موضوع الفلاش من وين؟! وكان اتفاقك معاهم علي تسليمو تلفون ولاء بس!! بكت وقالت انا كلمتهم!! انه الفلاش مع روان!! الحاج قال عشان كده اتخلصو من ولاء!! لانها ما حتفيدو في شي وبقت مصدر ازعاج ليه!! واتخلص منها!! بكت وقالت ما حيرتاح الا يتخلص مني ومن روان عشان يتستر على نفسه!! الحاج بغضب قال ليها طيب يابنتي لشنو ماكنتي صريحة معاي من الاول!! كان قبضناه ونهينا القصة دي!!! بدهشة قالت ليه يعني كده عرفت القاتل!! الحاج سكت!!!
وشوية كده وقال ليها اديني رقم وعنوان محمود!!! قالت ليه رحلو من بيتهم داك!! بس تلفونو معاي!! بس صدقني ليه قريب سنة مختفي ولا ميت ما عارفه! وبقت تبكي!! وملت الحاج الرقم!! اتصل على جنابو حسام!! قال ليه اتحرى لي عن صاحب الرقم ده واذا الاسم طلع عندو ارقام تانية!! حسام قال ليه بعده سلمني التحقيق!!! الحاج ابتسم بخبث وقال ليه انت من المفترض تشكرني!! بعد مداهمة أمس دي ترقيتك بتكون جات!! حسام ضحك وشكر الحاج!! والاخير كالعادة قبل ما الطرف التاني في المكالمة يخلص كلامو بيقفل فيه!! وعاين لنازك!! قال ليها انتِ كويسة!! هزت راسها بمعني ايووا! الحاج قال ليها يلا نجي للمهم!! امس لم اتصل عليك كمال قلتو شنو؟! والليلة لاقيتيه لشنو؟! وبعداك حصل شنو؟! قالت من يومين بخش علي رقم غريب وهددني!! قال ليها منو؟ قالت قمر الدولة!! الحاج جاط فيها وقال كيف ما بتتصلي تكلمينا!! قالت ما اتكلم معاي!! بخلي الخط فاتح بسمع صوت صريخ!! ولم بقيت ما برد رسل لي صور بنت مقتولة!! وما عرفت اعمل شنو؟! الحاج قال ليها طيب كيف عرفتيهو ده قمر الدولة!!؟ اذا هو فعلا ما اتكلم معاك؟! قالت في واحدة من رسائله التهديدية قال لي يا نيزك!! واتزكرت انه قبل المره ناصر قال لولاء دي ما نازك؟! دي نيزك عديييل وتحرق القلب!! لهزار كده!! بس لم شفت الرسالة اتزكرتو!! الحاج قال ليها كملي!! قالت لم كمال اتصل علي حستو المنقذ!! وقلت ليه عايزة اشوفك ضروري!! خفت املمو في التلفون يكون مراقب!! عشان كده قلت ليه بكره عندنا مناسبة واديتو العنوان!! لم الناس كانو في الصلاة اتصل علي وقال هو في بداية الشارع!! طلعت عليه!! وسلم علي!! بس احرجني وقال لي انا الفيني مكفيني وما ناقص مشاكل!! كفاية علي التهمة اللاصقنها فيني دي!! ما بقدر اساعدك و**** ولا عايز اعرف مشكلتك شنو؟ واعتذر مني! وقال لي الجأي للشرطة؟! وانا كنت محبطة شديد!! نزلت من عربيتو واتجهت على البيت!! في اقل من دقيقه سمعت صوت فرامل قوية ومعاها ضربة بوري!! قربت اقوم جارية قايلة نفسي ماشة في نص الشارع ولا عايزة اقطع زلط بدون ما اتلفت للاتجاه المعاكس!! بس فجأة العربية بقت قصادي وما اشوف الا اتنين عتاولة جارني عليهم!! كوركت بس الشارع فاضي!! دخلوني وانا بقاوم!! وبرفس!! وعضيت فيهم واحد!! وخبطني بوكس في راسي لمن اغمى علي!! وفعلا كان عندها كدمة كبيرة في جبينها!! الحاج قال ليها وبعداك!! قالت لم فتحت لقيت نفسي في الغرفة ديك روان ممددة قدامي!! الحاج قال ليها العربية شكلها كيف؟! قالت عربية سودا كبيرة!! قال ليها دفع رباعي!! قالت اااي!!
الحاج قال ليها متأكدة ما نسيتي شي!! ولا عايزة تعترفي بشي؟! بكت وقالت و**** حكيت ليك كل البعرفو!! الحاج قال ليها يازولة متأكدة تاني ماف شي!!! سكتت شوية!! وقالت زكرني طيب انا ما قادرة افكر في شي!! ولو عندك سؤال قولو يمكن اتزكر الاجابة!!؟
قال ليها وناجي وتهديداتو!! قالت اهاااا!!؟ و**** طلع من بالي!! ناحي انا ما شايلة ليه هم!! صااح بزعل!! بس اصلا انا وهو شبه منقطعين!! يعني تواصلنا شبه معدوم!! وانا كنت علي علاقة بيه بس لسسسه م تطورت لحب!! وغير كده هو متزوج وعندو *****!! الحاج قال ليها ده ما موضوعنا!! اها يعني ما شاكة فيه!!؟ قالت هو المحيرني عرف من وين بقصة الصور!! الوراه منو!! وكان منفعل لاني استغليتو!! بس ما اظن يخطفني ولا يقتلني!! ولو خطفني نقول معليش انا غلطانة!! بس روان ذنبها شنو!؟
فما اظن انه ناجي هو الفاعل!! بس انتو ادرى طبعاً!!؟
الحاج قال ليها اخدي راحتك وانا بشوف اللازم يحصل!! وطلع منهم!!
_________________________________
اتصل عليه حسام اداه تفاصيل الولد ورقم تلفونو وسكن اهلو!! الحاج شكرو وقال ليه نردها ليك في عرسك من روان!! حسام سكت متعجب!! الحاج ضحك وقال ظاهر في عيونك بدون ما تحكي!! جنابو حسام ابتسم وقبل ما يرد كالعادة الحاج قفل الخط!! وقبل ما يخت التلفون في الكرسي الجنبو تاني رنه!! لقاه ده جنابو احمد!! قال ليه ما قدرت استجوب الحارس!! النائب العام رفض وقال دي جريمة بتمس أمن الدولة عندهم ناس مخصصين ليها!! الحاج قال ليه خليه علي انا التافه!! وقفل خلا احمد بيضحك!! اتصل علي رئيس جهاز الأمن والمخابرات الوطني!! وسألو عن القرار ده!! استناداً علي شنو اتخذوه!! الاخير قال للحاج دي مسألة خطيرة ومستحيل نخلي حيثياتها متداولة بين الأفراد العاديين والنظامين!! حتى ولو كانو ضباط الشرطة او جيش!! ولازم نتكتم علي الموضوع ونديه للأفضل يباشر فيه التحقيق!! الحاج قال ليه يعني في أفضل مني!!؟ وقفل الخط في وش رئيس الجهاز!! الأخير اتصل علي الحاج بس زولنا رفض يرد!! حس بالإهانة!! اتأفف وساق عربيتو ومشى علي بيت محمود الاكس حق نازك!!
اتعرف على اهلو وقالو ليه انه مسافر واخبارو مقطوعه! بس بيتصل بعد فترة وبقول لينا انا كويس!! بكده الحاج اتاكد انه حي يرزق!!؟ طيب لشنو قمر الدولة كان بخوف في نازك!! والشي الوحيد اللفت انتباه الحاج الإسم!!؟ الاسم التالت لمحمود نفس الاسم الثاني لنصر الدين!! وسالهم اذانصرالدين ادريس بقربهم!! ابو محمود قال للحاج ود عمي طوالي!! فالحاج اخد ليه ضحكة اول بعداك شكرهم وطلع منهم!! بيمسح في كرشتو!! وبخاطبها!! قال ليها اعفي لي اليومين دي انشغلت عنك!! بس بعزك قرييب!! وركب عربيتو وطلع علي القسم!! لم وصل لقى رجال أمن حارسين مكتبو من بره!! قال للعساكر ديل مالهم!!؟ جاهو طالع احمد منبهر!! وقال للحاج انت عملت شنو؟! الحاج ضحك وقال ليه جايبين لي امر قبض ولا شنو؟! احمد ابتسم وقال ليه خوتك ظااابطة انا عايز اناسبك ان شاء **** تعرس لي كديستك!! لانو يدك واصلة وحتفيدني!! الحاج ابتسم وقال ليه كرهتك عشان كلامك الكتير ده!! انجز ي ابني ديل منو؟! احمد اتقدم للحاج وفتح ليه باب المكتب بحماس!! الحاج ذخل مسرع يشوف الفي داخل منو؟! لقاهو ده الحارس بتاع بيت التزوير!! ابتسم!! واحد من بتوع الأمن قال ليه سعادة السيد فلان بقرأك السلام! وقال ليك الثعلب واحد لا ثاني له!! وأضاف!! نحنا حننتظر بره بعد تخلص استجوابك حسوق معانا المتهم!! الحاج قال على بركة ****!! ودخل وراهو احمد وقفلو عليهم الباب!! وجنابو احمد حيطير من شده الفراح!! ماف رائد على مستوى السودان مسك قضية زي دي!! واتجدع في الحارس!! والحاج بستمع بس ما سأل ولا سؤال واضانو مع اساله جنابو احمد وعيونو مع الحارس!! طلع ما بيعرف قمر الدولة بس بيعرف الزول الوظفو!! وعارف انهم بشتغلو شغل مشبوه بس نوعو شنو طلع ما عارف!! وقال شاف الريس مره واحدة بالصدفة كان عايز يدخل عربيتو جوه البيت!! الحاج طلب ملف التحقيق حق مقتل نصر الدين وفتح ليه كم صورة وقال ليه طلع لي الريس الانت شفتو منو في ديل!! ركز كويس وقال ليه ده!! الحاج ابتسم!! وقال اخر مره شفتو متين!! قال من كم شهر!! بس ما بيجي المقر ده نهائي!! احمد دنقر للحاج وقال ليه عندك ليه سؤال!! الحاج ابتسم وقال ليه انت ما فضل ليك الا تسألو بتحب تسمع لاي فنان!! الاتنين بقو يضحكو!! الحاج ولع ليه سيجارة!!! وقال لجنابو احمد خليهم يجو يسوقوه!! وفعلا رجال الأمن ساقوه وطلعو بيه علي عربية كامري مصفحة ووراها بتاع شرطة بموتر!! احمد قال عززه زي العززه!! الحاج ضحك وقال ليه طيب ان شاء **** تكون بدلو!! احمد صر عيونو الحاج ضحك وطلع!! احمد جنابو احمد قال ليه علي وين؟! الحاج قال انا ابوي ما كان بيسالني السؤال ده!! احمد ضحك وقال ليه عشان كده طلعت….!؟ وسكت!! الحاج اتلفت رمقو مبنظرتو اللئيمة ديك وطلع!!؟ احمد ضحك ودخل مكتبو!! الحاج قال و**** وقعت وم سميت!!؟ طلع علي النيابة العامة وقال عايز صور مكبرة لموقع الجريمة!! راجع الصور بدقة!! وشاف تقرير الطبيب حق التشريح!! وابتسم!! طلع من هناك واتصل علي مدير شركة الاتصال وقال ليه عايزك تحدد لي موقع التلفون ده في خلال ربع ساعة!! قال للحاج كده عصرت علي!! حتى وانا مدير ما كانت عندي صلاحيات زي دي الا بخطاب من جهاز الأمن!! فصدقني حتى لو كنت المدير الحالي ما بقدر افيدك!! الحاج شكرو وقفل!! وقال ماف مفر الا اتصل عليه يعني!! ورجع اتصل لرئيس جهاز الأمن!! الاخير ضحك وقال ليه و**** و**** ما متصل عشان تتشكرني!! اكيد عايزني في خدمة!! الحاج ابتسم! وقال ليه عايز اعرف مرقع جهاز تلفون!! صاحبو قال ليه علاقة بالقضية!! الحاج قال ليه لالا خليل مرتك!! الاخير ضحك وسب الحاج!! اتبادلو الضحكات والدعابات! وقال ليه حيتصل عليك واحد بعد خمس دقايق اديهو الرقم!! وقفل منو!!! وفي أقل من خمس دقائق الرقم اتصل!! شال الرقم من الحاج وفي اثناء المكالمة حدد ليه الموقع!! الحاج شكرو وقال ليه خليك متتبعه لو اتحرك اديني اخبر!! وقفل منو؟! اتصل علي الرائد احمد وقال ليه اذا عايز تدخل التاريخ وتكون اول رائد يترقى كل ثلاثة شهور جهز كتيبة وتعال علي العنوان الفلاني!! جنابو احمد لم بقى يلخبط في الكلام!! القاتل!! لقيتو؟! منو؟ عليك **** منو؟! الحاج بيضحك بس اعاد ليه ذكر العنوان وقفل!!!
الحاج سبقهم علي العنوان!! وكانت عمارة تحت التشطيب!! وواقف جنبها اللاندكروزر الكان ضرب روان جنب الجامعة!! الحاج ابتسم واتصل علي حسام قال ليه تعال انتقم لبت عمك غشان تعحب بيك!! ووصف ليه المكان!! وفضل منتظرهم في العربية!! حسام وصل لانه قريب وصل قبل احمد وجماعتو!! وقال للحاج القاتل منو؟! ما يكون ناجي!! ناجي موووش!! الحاج ضحك وقال ليه ناجي لو كان قاتل ما كان خطف روان بعربيتو!! وهو عارف انه المستشفى فيها كاميرات مراقبة!! ده شخص عايزنا نشك في ناجي!! حسام قال بحماس!! معناها كمال!! الحاج ضحك وقال ليه حتعرف بعد شوية ياااخ!!.
وفجأة ظهرو ناس احمد!! كان منظر مهيب!! يحسسك بعظمة الشرطة!! دفارين عساكر وتلاتة دوريات وكلاب بوليسية!!؟ وكلهم في وقت واحد داهمو المبنى!! واحمد وحسام قايدين التيم!!
وثابت ثابت!!! اعتقلو كم واحد!!! وفي اتنين قامو جارين!!؟ حسام ضرب واحد رصاص!! جابو واقع!! والتاني تلب من بلكونة الطابق الاول!! وقبل ما يقوم من الارض!! لقى مسدس الحاج في دماغو!! وقال ليه حركة واحدة وحفجر دماغك يا نصر الدين؟! احمد وحسام جو متلبين وراهو!! وبصوت واحد نصرالدين المرحوم!!؟ الحاج ضحك!! احمد اداهو شلوت وحسام لبعو بخزنة المسدس!! وطلع الكلباش!! وبقى يعاين للحاج مندهش!! قال ده شنو؟! وانت كنت عارف!!! الحاج ابتسم وقال ليهم ارفعوه اول بنحكي ونحنا في الطريق!! جماعة نصر الدين وعلى راسهم محمود حبيب نازك السابق كانو في دفار!! والقاتل المختل نصر الدين كان في دفع رباعي مصفح وسايقها صابط برتبة مقدم ومشوو بيه علي مقر مجهول!! وجنابو احمد وحسام قالو للحاج كيف زور موتو!! وانت كيف عرفت والميت ده منو طيب؟!
الحاج حكى راسو!! وقال ليهم!! لو ما استفزاني ماكنت ح اعرفو!! بس من الاول كنت عارف انه ما قمر الدولة!! مستحيل يخلي لينا كل الادلة دي ضدو وكل واقعة بتشير لاسمو!! بس ما كنت عارف هو منو بالضبط!! والشوشني اكتر كذب المشتبه فيهم!! كل مره اكتشف كذبة سوا كانت من نازك او كمال ولا ناجي!! احمد بإنفعال قال اختصر ياااخ ورينا عرفتو كيف؟! الحاج ضحك وقال ليهم شفتو جرجرة الكلام بايخة كيف؟! وقال!! اول دليل انهم كانو اتنين وبكذبو علي البنات!! بس لو فعلا كان قمر الدولة بينتحل شخصية نصرالدين ما كان حينتحلها وهو راكب معاه وقدام البنات الا اذا كان متفق معاه!! تاني دليل نازك شافتو راكب ورا مع ولاء!! وعرفت منها لاحقا انه نصر الدين حبيبها!! بس لانه نازك ما بتعرف وينو فيهم نصر الدين افتكروه قمر الدولة!! لانو اصلا قمر الدولة كان مغير ليهم اسمو على اساس انه ناصر!! فصعب عليهم التفرقة بين ناصر ونصر الدين؟! اي نصرالدين وقمر الدولة!! احمد قال انا مافهمت؟! الحاج قال ليه اسكت اصلا انت ماشي بالبركة!! حسام قال بس معقولة عرفتو كده!! الحاج قال انت ابني المفضل؟!! قال ليهم نصر الدين لم عرف اننا وصلنا ليه ومتابعين بيتو!! قتل قمر الدولة وقطعو!! وحرقو عشان ما نتعرف عليه!! احمد قال يعني الطبيب الشرح الجثة كذب!! قال لا ما كذب!! بس نصرالدين ذكي!! هشم رأس قمر الدولة وشال سنونو وغيرهم بسنونو هو!! القام بزراعتهم في وقت سابق!! ولو ملاحظين انه الأسنان كانت مبعثرة حولين الراس وفي داخلو!! وكأنه عذبو اول وقلع اسنانو!! وبعد الفحص تبين للطبيب منها انه فيها الحمض النووي حق نصر الدين!! وكتب في التقرير انه المتوفي نصرالدين!! واللفت انتباهي اكتر لشنو قمر الدولة يمسح اثار الرجلين من الارض بالدم!! وهو اصلا ما اخفى الادلة!! بقت علي اثار الاقدام يعني!! لحدي ما استنتجت انه مقاس قدمو كان مختلف عن حق قمر الدولة عشان كده خفاه عشان نحنا ما نشك!! ويمكن يكون مشترك معاه محمود!! كدي نشوف بعد التحقيق!! حسام مزهول وقال انت عرفت حكاية الأسنان من وين؟! الحاج قال قوة ملاحظة وبالصدفة و**** وبقى يضحك!! قال في بعض الصور اتضح انه قمر الدولة عندو سن مكسورة!! بس الأسنان الاتلقت كانت كاااملة!! اكيد في غلط في الموضوع!! وبعد عرفت انه محمود وداخو نصرالدين عرفت انه القاتل وكنت متأكد من انهم حيكونو مع بعض!! وتخميني طلع في محلو!!احمد قال ليه طيب الجريمة وقعت كيف؟! الحاج قال ليه بعد نحقق معاه حنعرف التفاصيل!! بس علي حسب تحليلي وفي الغالب بكون صاااح!! بكون دخل ورا الحارس بكري لم طلب من ولاء ترجع الداخلية وارتكب جريمتو!! واصلا الكيس حق المطعم كان مع ولاء بعد خلتو نازك!! وشال فيه رأسها!! بس اذا معاه شريك ده حنعرفو بعدين في المحكمة نحنا دورنا انتهى!! جنابو احمد صفق للحاج!! وقال انا بالجد امي داعية لي لاني صادفتك واشتغلت معاك!! سمعت عنك كتير بس صدقني ما اتوقعتك تكون كده!! انا فخور و**** بمعرفتك!! الحاج ضحك وقال ليه بطل طلس!! رجعوني بيتي انا مسافر أمريكا لاحفادي ياااخ!!! شكروه وبقو يتونسو بنصرالدين والشريحة الدخلها فيهم وبيضحكو!!!
واخيرا خلصو السودان من اكبر مزور وقاتل مختل وده واحد من اللاف!! والحاج وجماعتو قاعدين ليهم بالمرصاد…!
النهاية ……………
