فضفضة ملخص الزواج في مصر (1 مشاهد)

[جدو سامى 🕊️ 𓁈]

• ملخص الزواج في مصر

- أهل الزوجة بيشترطوا كتابة مؤخر كبير ، وبيعتبروه شيء منفصل عن المهر ، عشان يضمنوا ان الزوج لو عايز يطلق بنتهم يفكر ألف مرة.. و يا إما يطلق ويدفع.. أو يطاطي.
- أهل الزوجة بيشترطوا كتابة قايمة بمبلغ كبير.. وبيكتبوا الذهب اللي اشتراه بفلوسه فعلاً وأصبح ملكها.. وكتير بيكتبوا الذهب بالجرام أضعاف أضعاف الذهب الموجود فعلاً.. ده غير انهم بيكتبوا الحاجات اللي هو اشتراها بفلوسه.. عشان لو الزوج فكر يطلق بنتهم يدفع دم قلبه أو يتسجن.
• العريس لو فكر يرفض، يسألوه، انت ناوي تطلق ولا إيه.. إنت مش شاري ولا إيه.. إنت بتفكر في الغدر ولا إيه..
• العريس إما يتمسك برأيه ويترفض، أو يثبت انه شاري ويمضي على القايمة والمؤخر الكبير.
• هنا أصبحت القايمة والمؤخر في منزلة الشرط الجزائي في عقد الزواج ولكن في ورقة منفصلة.. هيقولوا بنضمن حقها عشان لو طلقتها.. هو ده مفهوم الشرط الجزائي

طب ينفع عقد من طرفين، نكتب شرط جزائي على طرف واحد فقط، في حين ان الطرف الثاني يقدر يفسخ العقد بمنتهى الحرية.

هو ينفع شرعاً نعمل شرط جزائي في الطلاق أصلا.

طب حالياً الزوجة تقدر تخلع وتاخد العيال والشقة والقايمة .. وبترفع طلاق للضرر بادعاءات كاذبة وتاخد الشرط الجزائي بالكامل مع العيال والشقة.. أو ترفع طلاق للشقاق وتاخد الشرط الجزائي كله أو نصفه وبرضو بتاخد العيال والشقة.. يعني الشرط الجزائي على الزوج فقط بغض النظر مين اللي طلب الطلاق.

كل ده في إيد الزوجة فقط.. يجلعها وقت الخلاف في مركز القوة حتى لو كانت ناشز أو خاينة مثلاً.. والزوج يتنازل عن كرامته عشان مايتعرضش لكل البهدلة دي.. أو يتمسِّك برجولته ويتفرم في المحاكم.. عشان في قعدة الاتفاق قال أنا شاري ومش بفكر في الطلاق.

العيب كل العيب على الزوج اللي بيتصرف بالرعونة والسفه ده.. وطبعاً للأسف الأهل هما أول ناس بيعارضوا العريس لو قال انا هجهز ومش همضي قايمة.. لان عندهم بنت عايزينها تتجوز بقايمة ومتمسكين بالعرف الفاسد ده.

مش كل الناس بتستعمل القايمة غلط لكن النسبة الفاسدة هي السواد الأعظم للأسف.

نصيحة يا أخي العزيز.. ابعد عن كل التعب ده.. جهز بيتك على قد ظروفك وخد ذات الدين اللي ترضى بظروفك أياً كان مستواك الاجتماعي و**** يغنيكما من فضله.. وادفع لها مهراً من المال أو الذهب قدر استطاعتك ولا تضع رقبتك تحت يد زوجة **** اعلم هتعمل ايه مستقبلاً.. المحاكم مليانة من شباب زي الورد كانوا بيقولوا (دول ناس محترمين وعمرهم ما هيغدروا بيا.. وللأسف غدروا).

إوعَ تساعد في العبث بشرع **** وتوافق على كتابة شرط جزائي في حالة الطلاق (قايمة أو مؤخر ضخم أو وصل أمانة) انت عارف جزاء من يبدل شرع **** وانا خايف عليك.