#اللعبة
#الحلقة_الأولى
احنا متراقبين طول الوقت ، متشافين ثانية بثانية ، حتى أنفاسنا معدودة علينا كويس أوي ..
احنا أضعف حاجة في الكون دا كله ، احنا صغيرين اوي اوي
تحذير :
لو بتخاف أو عندك فوبيا من أي نوع متكملش معايه ..
لو عندك فضايح او ملفات سودا متكملش معايه ..
لو لسه فيه في حياتك حاجة تخاف عليها .. أرجوك .. أرجوك متكملش معايه ..
اللعبة اللي حضرتك داخل عليها مالهاش علاقة بأي برنامج كمبيوتر بتسطبه وبتعمل accept لكل شروطه من غير ما تقراها ..
اللعبة اللي حضرتك داخل عليها دي أخطر لعبة في حياتك كلها ، اللعبة دي هتدخلها إنسان وهتخرج منها إنسان تاني ، أو يمكن متخرجش منها إنسان اصلا ، أو جايز متخرجش منها خالص ..
اللعبة دي مش للمترددين ، مش للناس اللي متعودة ترجع من نص الطريق ، اللعبة دي للي قلبهم ميت ومستعدين يواجهوا الحقيقة زي ما هي ..
معندكش اختيارات غير انك ترفض اللعبة قبل ما تدخلها ، لكن لو دخلت لازم تكون متأكد انك عمرك ما هتخرج تاني ..
عدد الأشخاص اللي لعبوا اللعبة دي قبلك 3 ، اتنين منهم انتحروا ، وواحد اتجنن ..
لو معندكش حاجة تخاف عليها ، ومستعد تاخد الريسك ، دوس start وابدأ اللعبة ..
هديك نبذة مختصرة عن اللعبة قبل ما تبدأ ..
انا مبرمج وانا صاحب اللعبة اللي هتغير تاريخ البشرية كله ، غير البرمجة كان عندي هواية الغطس ..
سافرت كل الدول اللي فيها بحر وغطست فيها ..
لقيت تحت المايه عالم تاني كله أسرار ، كائنات عايشة بقوانينها ، سفن غرقانة ..
مرة لقيت سلسلة دهب تحت المايه ، اكيد كانت بتاعة واحدة غرقانة ..
لحد ما جه اليوم اللي غير حياتي ، واللي هيغير التاريخ البشري كله ..
اليوم اللي هيوقف حروب ويولع حروب جديدة خالص ..
يوم ما لقيت الصندوق في قاع البحر الميت ..
الصندوق اللي فيه كل أسرار الكون من يوم ما اتخلق لحد اللحظة اللي اترمى فيها في الماية ..
يومها انا كنت فاكر ان الحكاية كلها صندوق غرقان تحت المايه ، يمكن يكون فيه شوية ورق ، تحف ، مجوهرات حتى ، لكن مخطرش في بالي يكون فيه كل اللي انا شوفته ..
خدت الصندوق معايه الفندق اللي كنت نازل فيه ، وطلعت غرفتي وفتحت الصندوق و يا ريتني ما فتحته ..
الصندوق دا كان جواه عجايب وأسرار مفيش حد في الدنيا عنده طاقة يستحملها ..
هتعرف كل حاجة في وقتها .. المهم تكون جاهز لأن اللعبة شبه ابتدت ..
فتحت الصندوق واتفتحت معاه بوابة الأسئلة اللي مالهاش أي إجابة ، هتلف في دواير مقفولة لحد ما تدوخ ومش هتوصل غير لفكرة واحدة هي بس اللي ممكن تريح عقلك من الحيرة ، اننا أصغر حاجة في الكون ، مش كل حاجة هنفهم تفسيرها ، لكن برضو ده مش معناه انها مالهاش تفسير ..
الصندوق كان فيه جهاز كمبيوتر ، دي مش أغرب حاجة في القصة صدقني .. انا معاك انك تلاقي صندوق مقفول تحت المايه وتفتح الصندوق دا فتلاقي جواه جهاز كمبيوتر فكرة غريبة فعلا ، لكن مش أغرب حاجة في قصتي ..
يعني مثلا هتعمل ايه لو قولتلك ان الجهاز محصلش فيه اي عطل واشتغل بمجرد ما اتوصل بالتيار الكهربي رغم انه زي ما هو واضح قعد تحت المايه وقت كبير ، حاجة غريبة برضو مش كدا ؟
خد الاغرب بقى ..
لما شغلت جهاز الكمبيوتر طبعا بعد ما نشفت منه المايه كويس ، اكتشفت ان لغة البرمجة اللي بيشتغل عليها الجهاز دا مختلفة تماما عن كل اللي درسناه في الكلية او اللي ممكن تشوفه في اي مكان في العالم ..
هي حاجة لو جينا نشبهها بلغات التخاطب هنقول أنها لغة برمجة مكسرة ، لغة بتحاول تجاري لغة تانية أقل منها بكتير ، بتحاول تنزل لمستواها عشان مستخدمين اللغة دي يقدروا يفهموا ..
حتى لما حبيت احدد لغة النظام ، فوجئت ان القايمة فيها اكتر من 6000 لغة ، الرقم دا لوحده رقم يخض لو حضرتك مهتم باللغات ، وشغلت جهاز كمبيوتر لسه جايبه من قاع البحر ، وحاولت تحدد اللغة فبدل ما تلاقي قدامك العشرة خمستاشر لغة اللي انت عارفهم ومتعود عليهم فتلاقي 6000 لغة ، لو ما قدرتش تعتبر ان الجهاز دا هنج من رميته تحت المايه يبقى لازم شعرك يبيض من الخوف ..
أصل 6000 لغة يعني الجهاز دا عليه قاعدة بيانات شاملة كل اللغات تقريبا اللي اتكلم بيها الانسان من بداية التاريخ البشري ، واحنا اصلا اللغات القديمة اللي مفرداتها وصلتلنا مش كتير ، معندناش اي فكرة عن الحضارات اللي قامت واتدفنت في الكوكب دا ، فمين اصلا اللي برمج الجهاز دا واداله 6000 لغة وجابهم منين ؟؟؟؟
انتظروا الحلقة الثانية ،،،
#الحلقة_الثانية
قررت اني اصور الخطوات بالموبايل خاصة ان اللغة الاصلية كانت الماني ، وانا الالماني حافظ منه كام كلمة كدا باخدهم بالشبه ، فقلت هصور الخطوات كلها عشان اعرف ارجع هنا تاني لو اخترت اي لغة غريبة من دول ..
وبدأت اتصفح اللغات اللي موجودة على النظام
فيه لغة عربية .. اخترتها ، فوجئت أن الاختيار مش نهائي ، فيه أقسام كتييير اوي للغة العربية ، واسامي قبائل قديمة غالبا دي قبائل شبه الجزيرة العربية اللي كانت بتتكلم عربي وكل قبيلة لها لهجة مختلفة عن التانية ..
النظام كان عليها لغات قديمة كتير ، لاتينية ، هيروغليفية ، فينيقية ، سينسكريتية .. لغات كتيرة اوي ..
اخترت اللغة العربية الحديثة لأني كنت محتاج افهم كل حاجة في الجهاز العجيب دا ..
كنت محتاج افهم دا شغل جن وللا شغل فضائيين وللا ايه اللي بيحصل ، وكنت محتاج افهم ايه حجم الداتا اللي على جهاز أول خطوة في تشغيله تعتبر معجزة ممكن تقلب التاريخ البشري كله ، انت عارف يعني ايه واحد معاه اسامي وابجديات كل اللغات اللي اتكلمها الانسان من يوم الخلق ، ما اللغة مفتاح الحضارة ، لو كشفت أسرار اللغة مش بعيد تكشف كتير من أسرار الحضارات ..
بس قبل أي حاجة لازم اكلم يحيى صاحبي يجيلي الفندق ..
كلمت يحيى وطلبت منه يجيلي على الفندق بسرعة ، ويحيى دا هو صديق عمري والألفا بتاعنا في الكلية ، عارف انت صاحبك الدحيح اللي بيغشش الدفعة كلها ، اهو دا بقى يحيى
كان لازم يكون موجود معايه في موقف زي دا .. ويحيى دا هو اللاعب رقم 1 للعبة دي ، هتعرف دلوقتي حالا ايه اللي حصل ليحيى من اللعبة وبسببها ..
تعالى يا عم يحيى شوف اللي انا فيه .. دلوقتي الجهاز دا انا لقيته جوا صندوق في قاع البحر ..
= جهاز ايه يا عم انت اللي لقيته تحت البحر ، ما تقول كلام يتعقل
- لا يا يحيى وحياة ابوك لسه بدري أوي على الاستغراب ، الصندوق قدامك اهو ، ومتغطي بالريم زي ما انت شايف ، ودي حاجة غريبة طبعا ، لكن لسه فيه الأغرب ، الجهاز دا انا شغلته ..
= بس ، اعطل بقى انت خالص وسيبني اتعامل
وقعد قدام الجهاز وركز أوي في الشاشة ، وبدأ لاستغراب يظهر على وشه واحدة واحدة لحد ما بقى شبه علامة الاستفهام ..
= ايه دا ، ايه التهريج دا ، لغة البرمجة دي غريبة جدا ، الجهاز دي made in ايه ؟
- مش عارف ، مش مكتوب عليه أي بيانات ، حتى المادة اللي مكوناته مصنوعة منها مادة غريبة ، مش بلاستيك زي اللي احنا نعرفه
= سيبك من مادة الصنع دلوقتي ، لغة البرمجة اللي متصمم بيها نظام تشغيل الجهاز دا بتقول ان الناس اللي عملوا الجهاز دا سابقينا ب 500 سنة على الاقل
- خد الكبيرة بقى
= هو فيه اكبر من كدا ؟ هات
- اللغات المتاحة لنظام التشغيل بتاع الجهاز دا تعرف كام لغة ؟
= مش أقل من 20 لغة طبعا
- 6000 لغة
=!!!! انت بتقول ايه يا ابني انت ، انت فاهم معنى اللي بتقوله دا
- انا كنت مستغرب زيك كدا بالظبط وكنت فاكر الجهاز مهنج وعامل استنساخ ، بس أنا جربت بنفسي ، فيه هنا لغات قديمة جدا ، لغات ميتة ، مش هقولك هيروغليفي علشان الهيروغليفي نفسه رموزه اتفكت وبقى مفهوم بالنسبالنا ، بس اللغة اللي كان بيتكلم بيها الإنسان الأول في العصر الحجري والعصر الجليدي موجودة هنا بكل مفرداتها ومع كل لغة امكانية الترجمة لأي لغة تانية ، الجهاز دا حرفيا عليه التراث البشري كله ..
= حاجة غريبة أوي دي
- انا اشتغلت على الجهاز دا حوالي ساعتين ونص لحد ما انت جيتلي ، وبدأت لحد ما افهم الدنيا دايرة ازاي ، الجهاز دا لازم يتحرق يا يحيى
= جهاز ايه اللي يتحرق يا غبي انت ، دا كنز
- يحيى انت تعرف حجم الداتا اللي موجودة على الجهاز دا ؟
= لا ما اعرفش ، بس هعرف كل حاجة دلوقتي
- 800000 مليار جيجا
= نعم ؟ انت عبيط يا ابني هو فيه الرقم دا ، انت راجل مهندس عيب عليك ، هو الجهاز غريب فعلا بس مش للدرجادي يعني
- لما تعرف ايه الداتا اللي عليه ، هتعرف ان الرقم دا مش كبير خالص
= ايه الداتا اللي عليه
- التاريخ البشري كله ، من اول سيدنا ادم ، ومن قبل كدا كمان ، الجهاز دا عليه فيديوهات بجودة عالية جدا لكوكب الأرض قبل ظهور الإنسان اصلا عليه ، من ايام ما كانت الأرض مستعمرة لحيوانات من فصائل انقرضت من زمان منها اللي نعرفه زي الديناصور ومنها اللي منعرفش عنها اي حاجة ، انا شوفت فيديوهات تشيب قبل ما انت تجيلي ..
شوفت نزول ادم وحوا على الأرض ، شوفتهم زي ما انا شايفك كدا ، بأشكالهم وأجسادهم الحقيقية ، سمعت اصواتهم ، سمعت اللغة اللي كانوا بيتكلموا بيها ، سمعت حوار ادم الأول على الأرض مع زوجته ، سمعت دعواته لربنا علشان يسامحه على الذنب اللي عمله ، شوفت قابيل وهو بيقتل هابيل ، وشوفته وهو ندمان وبيبكي وبيلطم على وشه ، شوفت الغراب وهو بيدفن غراب تاني ميت ، وشوفت قابيل وهو بيتعلم الدرس من الغراب وبيدفن أخوه ..
= اكيد مش هصدق اللي انت بتقوله دا
- حقك ، انا نفسي مش مصدقه ، بس دا واقع قدامنا واحنا لامسينه ، تحت ايدينا ، تقدر تشوف كل حاجة بنفسك ، الحقيقة الكاملة اللي مينفعش فيها التزييف قدامك ، التاريخ كله صوت وصورة تحت إيدك ، يوميات كوكب الارض يوم بيوم متسجلة هنا فيديو ، انت متخيل ..
= احنا لازم نشوف كل حاجة
- يحيى ، احنا مش قد اللعبة دي ، احنا داخلين على ليلة اكبر مننا بكتير ، كفاية كدا
= مبقاش ينفع تقولي كفاية دلوقتي ، ما اقدرش يبقى تحت إيدي كنز زي دا وتطلب مني اسيبه ، انا وانت دخلنا التاريخ من اللحظة دي ، العالم كله هيعرف اسامينا وهيحفظها كويس أوي ..
- فيه حاجة خطيرة مكنتش عايزك تعرفها ، بس ما دام قررت تكمل يبقى لازم اقولهالك وتختار من دلوقتي هتكمل وللا هترجع
= حاجة ايه ؟
- التسجيلات اللي موجودة على الجهاز دا زي ما قولتلك مصورة تاريخ كوكب الأرض كله يوم بيوم من قبل ظهور الإنسان ولحد سنة 3000 ميلاديا ..
انا قدرت اوصل لاداة البحث هنا ، وبمجهود بسيط عرفت اجيب تفاصيل المكان والزمان اللي احنا فيهم بكل إحداثياتهم ، وشوفت بعيني فيديو ليا وأنا نازل البحر ، ولما لقيت الصندوق ولما خرجته وطلعت بيه على الفندق ، طبعا انت مش قادر تستوعب ، بس أنا هقولك حاجة مش هتصدقها ، انا شوفتك في المكان اللي كنت فيه قبل ما اكلمك وتجيلي هنا ، شوفتك ماشي مع بنت اسمها ماريان وبتتفسحوا ، وشوفتك في غرفتها في الفندق اللي انتو نازلين فيه ، وشوفتك لما رديت على تليفوني وغيرت هدومك وسيبتها ونزلت ، وطبعا كل اللي قبل كدا في حياتي وحياتك وحياة اي حد متصور لحظة بلحظة بالصوت والصورة ، انا اقدر افرجك دلوقتي على لحظة ولادتك ، اقدر أسمعك أول صرخة خرجت منك في اول يوم ليك في الدنيا ، مش انت بس ، انا اقدر أتابع سلسال جدودك كله لحد ما اوصل لادم .. واقدر كمان اشوف كل اللي لسه هيحصل معايه ومعاك ومع كوكب الأرض كله لحد بعد الف سنة جاية ..
= يعني انا دلوقتي اقدر اشوف المستقبل ، اقدر اعرف انا هموت امتى وازاي ، اقدر اتفرج على حياتي اللي لسه هعيشها ؟ انا موافق ابدأ اللعبة ودلوقتي حالا
- بس لازم تكون فاهم ان اللي انت داخل عليه دا خطر ، انت ماشي في طريق ممكن مترجعش منه تاني
= موافق
- طيب فيه حاجة أخيرة عايزك تعرفها
= حاجة ايه ؟
- كل اللي انت سمعته دا غريب ومثير مقولناش حاجة ، بس فيه حاجة اغرب ، الجهاز دا عليه برنامج لو زي ما انا فاهم كدا يبقى كارثة ، يبقى احنا معانا قوة خيالية جيوش العالم كلها متقدرش عليها ، احنا بالبرنامج دا على وشك نكون اقوى اتنين في العالم كله ، انا وانت هنبقى اقوى من الطبيعة ومن الزلازل والبراكين ومن التكنولوچيا ، هنبقى في قوة القدر نفسه
#الحلقة_الثالثة
لاااا ، انسى ، انت مش هتعرف أي حاجة عن البرنامج دا بالذات دلوقتي ، انا شفرته تماما ومش هتقدر توصله لوحدك
- ايه دا بقى ، من أولها كدا هنعمل الشغل دا مع بعض ، انت عايز تسيطر على العالم لوحدك ومحدش يشاركك في القوة اللي معاك
= انا مش عايز اسيطر على العالم يا يحيى انت اللي عايز ، أبوس إيدك متخوفنيش اكتر من كدا ، انت قبل ما تفهم أي حاجة عن الجهاز اللي وقع في ايدينا بدأت تفكر في السيطرة على العالم ، امال لما تبقى معاك القوة هتعمل ايه ، هتقضي على الاخضر واليابس ؟ اسمع كلامي يا يحيى اللعبة دي خطر والخطر مش علينا وبس ، الخطر على البشرية كلها ، قوة مطلقة في إيد اتنين زينا معناها دمار على العالم كله ..
- يا عم حسام ولا دمار ولا حاجة ، هو انت فاكرنا مين ، هتلر وموسوليني ، احنا لو معانا القوة اللي انت بتقول عليها دي فعلا يبقى كويس جدا لإننا هنستخدمها في خدمة الخير ، طول عمر الخير يا حس مضروب بالجزمة وواخد على قفاه ومالوش حد يدافع عنه ، طول التاريخ والطيبين غلابة والأشرار هما اللي معاهم القوة ، آن الوقت بقى نقلب موازين الأمور والطيبين يبقوا هما الاقويا ، احنا عايزين الخير يحكم العالم يا حسام ..
= نفسي اصدقك يا يحيى
- صدقني يا حسام ، ما انت عارفني كويس وصاحبي بقالك كام سنة ، شوفت مني اي شر
= مش هتبقى نفس الشخص اللي كنته طول حياتك ، الناس بتتغير لما بتملك القوة ، انت عندك حق لما قلت ان على طول التاريخ والطيبين ضعفا والأشرار اقويا ، هما مش ضعفا عشان طيبين يا يحيى ، هما طيبين علشان ضعفا ، طيبين علشان معندهمش اختيار تاني ، شوف المظلوم اللي بتتعاطف معاه لدرجة انه يوجع قلبك ، وهو بيدعي على الظالم بدموع عينه ، وتعالى تاني اتفرج عليه بعد ما يملك القوة ، هيبقى ظالم اكتر من اللي ظلمه نفسه .. انا خايف يا يحيى
- بص يا عم حسام ، خلينا نتفق اننا دلوقتي معانا كارت يقدر يغير مسار اللعبة كله ، احنا مش هنلعب يا حسام ، احنا هندير اللعبة ، هنقف على راس الكوكب ونمسك عصاية واللي يغلط نأدبه ، احنا معانا الحقيقة ، معانا الماضي ومعانا المستقبل ..
= طيب ما فكرتش فيه كام جهة هتحارب علشان توصل للكنز اللي في ايدينا ؟ احنا كدا هنحارب طواحين الهوا
- وعلشان كدا بقولك لازم نحمي نفسنا ، مش لازم نشتغل في النور ، خلينا نحرك كل حاجة في الضلمة من غير ما حد يشوفنا .. وانت لازم تثق فيا شوية يا عم حسام
= الحكاية مش كدا خالص يا يحيى ، مش حكاية ثقة ، الحكاية اني خايف عليك وعلى نفسي
- انسى الكلمة دي بقى يا حس ، من النهارده انا وانت مينفعش نخاف ، ها بقى ، ايه البرنامج اللي هيدينا قوة خارقة دا ..
= برنامج الموت ، انت بتفتح البرنامج دا وتعمل Brows لصورة شخص ، في خلال جزء من الثانية بيكون البرنامج اتعرف على بصمة وشه وقدر يرصد مكانه بالظبط ، فيه حقل في البرنامج انت بتكتب فيه الطريقة اللي عايز تقتل بيها صاحب الصورة وساعة الصفر اللي هتنفذ فيها حكم الاعدام ، والبرنامج بيقوم بتسليط طاقة على الهدف المحدد والطاقة دي بدورها بتقدر تقتله في المدة الزمنية المحددة بالظبط ..
انا لحد دلوقتي مش فاهم الميكانزم بتاعة اي حاجة ، ولا فاهم الجهاز دا مين اللي وراه ، بس واضح ان الكوكب بتاعنا كله بقاله ملايين السنين وهو لعبة في ايدين كائنات تانية اقوى مننا بكتير ، واديك شوفت ، بيراقبونا وبيصورونا فيديو من بداية الخلق ، انت عارف يا يحيى ، انا خايف لا يكون وجودنا على كوكب الأرض دا كله وتاريخنا البشري بكل ما فيه من احداث مجرد مسرحية بتتعمل على مسرح كبير وبتتفرج عليها كائنات عملاقة عندها قوة لا محدودة ، امال يعني هما كانوا بيصورونا ليه ، انت متخيل ان كل الحروب والصراعات والناس اللي بتقطع في بعضها دي علشان في الاخر كائنات تانية تتفرج علينا وتتسلى ، دي فكرة مرعبة ..
- في ظروف غير دي مستحيل كان يدخل دماغي حرف من اللي انت بتقوله ، بس دلوقتي أنا مصدق كل حاجة واي تصور ، بس خليني أقولك حاجة كويسة ، حتى لو احنا زي ما انت بتقول لعبة في ايدين كائنات تانية ، بايدينا نغير قوانين اللعبة دي ، كل نظام في العالم ليه ثغرات ، والثغرة دي هي غلطة صغيرة اااد كدهو لو فيه اتنين اذكيا زيي انا وانت عرفوا يدخلوا منها هيغيروا النظام كله ، الكائنات اللي انت بتتكلم عنها دي اكيد ما رمتش الجهاز الخطير دا في ايدينا متعمدة ، هي دي الغلطة ، هي دي الثغرة ، واحنا لو اشتغلنا عليها كويس هنغير مسار اللعبة كلها ..
= وجايز اللعبة بقالها ملايين السنين شغالة بنفس التكنيك فالموضوع بقى ممل ، رموا الجهاز دا في طريقنا عشان اللعب يسخن
- احنا حاليا واقفين على مسافة ثابتة من كل الاحتمالات ، مفيش احتمال اقرب من التاني ، مفيش قدامنا غير اننا نسترجل وندخل اللعبة زي ما هي ، قولي انت جربت برنامج الموت دا ؟
= بصراحة انا اول ما شوفته افتكرته برنامج ترفيهي كدا ، لعبة يعني ، بس بعد كدا استسخفت الفكرة دي أوي ، اصل مفيش مكان للتهريج في اللي بيحصل معانا دا ، قلت اجرب ، حطيت صورة رئيس الوزرا الإس**رائيلي ، وكتبت في الاوردر انه يموت برصاصة في زوره ، وكان الميعاد المفروض بعد ساعة ، فات ساعتين ونص اهو ، افتح التليفزيون وخلينا نشوف ..
يحيى شغل التليفزيون وبالفعل كان الخبر مغرق القنوات الفضائيه ، اغتـ.ـيال رئيس وزراء إسر**ائيل برصاصة مجهولة المصدر..
انتظروا الحلقة الرابعة ،،،
#الحلقة_الرابعة
عد الحادثة دي تحديدا كل حاجة في العالم هتتغير ، اللعبة بدأت ..
لما شوفنا بعينينا الطريقة اللي مات بيها رئيس وزراء الكيان بصمنا بالعشرة واتأكدنا اننا بالفعل تحت إيدينا قوة نقدر نحكم بيها كوكب الأرض بكل سكانه ..
مش محتاج اكتر من البوم صور لأقوى جيش في العالم هتعملها up load في البرنامج وتحط كلمة انفجار في حقل الوصف وتظبط التايمر بتاعك كإنك بتعمل كاب كيك في البيت ، ومع آخر ثانية من التوقيت المحدد أقوى جيش في العالم هيبقى كوم أشلاء وجثث متفحمة ..
ايه اللي بيفكر فيه الشخص اللي بيلعب بالنار ، بيقدم عرض مبهر قدام جمهور من المتفرجين بس ممكن في أي لحظة يحرق نفسه ، المشكلة ان الناس في كل الحالات هيسقفوا ..
نقلنا الجهاز معانا مصر ، ما عملش اي أزمة في المطار ، لابتوب عادي جدا مع واحد مسافر ، أمن المطار عمره ما كان يتخيل ان اللابتوب دا عليه سر اغتيال رئيس إسرائيل اللي قالب المجتمع الدولي ، مش بس كدا ، دا عليه كل أسرار العالم ، عليه كل الأدوات اللي هتمكن اتنين كتيانين زيي انا ويحيى انهم يحكموا العالم كله من جوا أوضة صغيرة في شقة في عمارة في الدقي ..
لحد اللحظة اللي دخلنا فيها الجهاز مصر انا كنت خايف جدا من اللعبة ومعنديش الجرأة الكافية عشان أدخلها ، لكن يحيى كان داخل فيها بكل طاقته وحماسه ، يحيى كان عايز يحكم الكوكب ..
بمجرد ما شغلنا الجهاز ويحيى قعد قدامه ، تقريبا مكانش بياكل ولا بيشرب ولا بينام ، يومه كله كان قدام الجهاز ، كان بيغوص في أعماقه بالساعات ويطلع باكتشاف جديد ..
يحيى هو اللي عرفني ان الجهاز عليه برنامج لقراية الأفكار ، بيشتغل بنفس طريقة برنامج الموت ، بتديله صورة الشخص وهو بينقلك كل فكرة بتدور في خياله ، وبنفس الطريقة اللي فكر بيها ، يعني لو حد قال بينه وبين نفسه انا جعان ، البرنامج بيبعت تكست بتقول انا جعان ، لو شاف واحدة وعجبته وبدأ خياله يشتغل معاها ، الجهاز بينقلنا المشهد اللي في خياله بالتفصيل ، صوت وصورة ..
دا جهاز مخابرات حديدي ، انت فاهم يعني ايه تقدر تراقب كل إنسان بيتنفس على كوكب الأرض ؟ تقدر تعرف بيفكر في ايه بالظبط ، مفيش أسرار ، حتى الأحلام اللي الناس بيحلموا بيها كنا بنشوفها ..
الموضوع مخيف فعلا ، احنا بقينا اتنين مرعبين ..
كمان يحيى اكتشف أن الجهاز عليه برنامج كنترول ، تقدر تتحكم تحكم تام في أي شخص تحدده ، تقدر تحركه زي قطعة الشطرنج ، تخليه يعمل كل اللي انت عايزه ..
يحيى وصل لقمة إثارته وجنونه ، الجهاز جننه فعلا ، وبدأ أول خطوة في مشوار نهايته لما رجع لفيديوهات يوم موت ابوه ، ابو يحيى مات مقتول وهو لسه *** صغير ، والحادثة اتقيدت ضد مجهول .. محدش عرف مين اللي قتله ، البوليس والنيابة غلبوا ، لحد ما قرروا يقفلوا ملف القضية كله ، لكن دلوقتي يحيى عنده القدرة انه يعرف القاتل ..
لما رجع لليوم اللي ابوه اتقتل فيه خد اول صدمة في وشه ، اللي قتل أبوه صديق عمره ، وهو نفسه الراجل اللي رباه كإنه ابنه ، دا اكتر حد بيحبه في الدنيا ، شافه بعينه في الفيديو وهو بيضرب ابوه بالرصاص وهو خاطفه ومكتفه في الصحراوي ..
وكان اكتر واحد منهار من البكا يوم جنازته ..
الصدمات ما انتهتش هنا لا دي ابتدت ، اللي بيعرف كل حاجة بيموت يا يحيى ، الحقيقة تقيلة يا يحيى ، ياما قولتله كدا ما سمعنيش ..
يحيى اكتشف أن صاحب ابوه كان على علاقة بامه وهما الاتنين اتفقوا على قتله ..
اكتر اتنين بيحبهم في الدنيا هما اللي يتموه ، امه اللي كان بيحلف بشرفها طلعت ست ساقطة ومجرمة ..
بس يحيى مش هيسكت وهينتقم منهم هما الاتنين ..
وفي لحظة جنون يحط صورهم في البرنامج ويديله اوردر انهم يتحرقوا في الشقة ، ويفضلوا جوا النار ساعتين قبل ما يموتوا ، الأوردر كان قاسي أوي ، فهمت منه ان خلاص يحيى صاحبي راح وجه مكانه وحش معندوش مشاعر ، قدر يحكم على الاتنين اللي ربوه مهما كان غلطهم انهم يتشووا في النار ساعتين وهو يتفرج عليهم وهما بيتنططوا زي السمك على النار لحد ما يموتوا ويتفحموا قدام عينيه ..
الإنسان دا مبقاش عنده قلب ، وإنسان من غير قلب يبقى وحش ، ووحش معاه قوة لا محدودة يبقى كارثة على العالم كله ..
يحيى لازم يخرج برا اللعبة بأي تمن ، لازم اشوف طريقة اخلص بيها منه قبل ما يدمر الكون باللي فيه ..
يحيى بعد ما قتل امه وعشيقها اتحول لقنبلة موقوتة ، خطر بيهدد الجنس البشري كله ، مكانش بيتحرك من قدام الجهاز ثانية واحدة ، كنت انا اللي بجيبله الأكل والشرب من كتر خوفي لا يموت وهو مش واخد باله ..
يحيى مكانش بيديني فرصة اقرب من الجهاز ، كان هو بس اللي بيتعامل معاه وبيشتغل عليه ، كل دا مكانش فارق معايه انا كنت خايف على يحيى من نفسه وخايف على العالم منه ..
في البداية كان مشغول بتصفية الحسابات ..
مفيش شخص اتعامل معاه من قريب أو من بعيد غير واخترقه تماما ، راجع تاريخ حياته كله ، اتجسس على كل مشاعره وأفكاره ..
وبعدين بدأ يفلتر الناس اللي بيكرهوه و اللي أذوه حتى لو إيذاء بسيط وغير متعمد ويعمل بأساميهم كشوف ، لدرجة انه كان كاتب أسامي مدرسين كانوا بيضربوه وهو صغير ، وصولات كانوا بيكدروه وهو في الجيش ، قايمة طويلة اوي مليانة بأسامي ناس بؤساء حظهم الأسود وقعهم في طريق واحد مختل ومعاه قوة خارقة ..
وبدأ يحيى لعبة الانتقام ..
أول ضحية كان صاحب البيت اللي طردهم زمان ، عمل عليه كنترول كامل وأجبره يرمي نفسه من فوق سطح العمارة ..
الضحية التانية كان وائل زميلنا في الجامعة ، وائل مرة اتخانق مع يحيى بسبب بنت زميلتنا ، خناقة عادية جدا بتحصل بين كل شباب الجامعة بس وائل عشان كان بطل كمال أجسام سفف يحيى التراب قدام الدفعة كلها ، الموقف عدى من زمان وكلنا نسيناه ، حتى وائل بعد كدا اعتذر ليحيى قدامنا كلنا وصالحه ..
بس بالنسبة ليحيى الموضوع ما انتهاش ، يحيى كان مأجل الحساب للوقت المناسب ، ومفيش وقت أنسب من دا للإنتقام ..
لما يحيى فكر في طريقة يقتل بيها وائل كان كل تركيزه انها تكون طريقة قاسية ومهينة ..
اختار وقت كان وائل خارج فيه مع مراته وبنته ، وعمل كنترول على وائل ، وعلى بياع مناديل في الشارع ، عيل صغير عنده 15 سنة ورفيع شبه القلم الرصاص ، وعمل كنترول على كل اللي في الشارع عشان يقفوا متفرجين ومحدش فيهم يفكر يحوش ..
وبعدين اداهم اوردر علشان يتخانقوا مع بعض ، وائل والواد بتاع المناديل والاتنين طبعا تحت السيطرة الكاملة ، والواد الصغير الضعيف دا مسك وائل مسح بيه الأرض ، ووائل قعد يستغيث ويتحايل على الواد عشان يرحمه ويبوس في رجله والواد يضرب فيه بالرجل لحد ما وائل مات تحت رجلين الواد ..
في الوقت دا طبعا كان وائل بطل الجمهورية في كمال الأجسام ، وكان بدأ يمثل في أفلام ويتعرف ، وبالتالي قضية موته بالطريقة دي مكانتش هتعدي بالساهل على الصحافة والإعلام ..
وائل اتقتل قدام مراته وبنته ، مات بطريقة مهينة مفيهاش اي كرامة ..
هل اللي وائل عمله زمان مع يحيى كان يستاهل عليه الموت ؟ حتى لو ، ذنبها ايه بنته اللي هتعيش طول عمرها فاكرة المشهد دا ومش هتقدر تنساه ..
يحيى لازم يبعد عن الجهاز ، لازم يبعد تماما ..
بس ازاي ؟ خلينا متفقين ان يحيى في الوقت دا لازم يتخاف منه ، ولازم تتعامل معاه بحذر ، مش بس تفكر الف مرة قبل ما تحاول تغدر بيه ، لا ، انت لازم تفكر الف مرة قبل ما تبصله بصة ممكن يفهم منها انك بتكرهه ..
يحيى هو الشبح اللي عامل رعب للعالم كله برا ، هو اللي ورا عمليات التفجير والاغتيالات والحرايق اللي مالهاش اي سبب مفهوم ، هو اللي ورا اختفاء الأرصدة من البنوك .. ازاي انا لوحدي اقدر عليه ..
مفيش حل غير اني احطله منوم في الأكل وبعد كدا ابعده من قدام الجهاز واحطه تحت الكنترول علشان اقدر اتحكم في كل تصرفاته واحمي الناس من جنونه ..
زي ما قولتلك ، يحيى كان مشغول بتصفية حساباته ، ومكانش بيتحرك من قدام الجهاز ، وكنت انا اللي بقدمله الاكل والشرب ، ودي كانت فرصتي اني احطله المنوم في العصير ، الدكتور قالي حباية تنيمك 24 ساعة ، حبايتين ينيموك 48 ساعة ، اكتر من كدا يعمل سكتة قلبية ويموت ..
ياااريت ، بس للاسف ما اقدرش ، صاحبي ولسه بحبه حتى لو اتحول سفاح ، مش هقدر اقتل واكون زيه ..
حطيت حباية واحدة من المنوم في العصير ، وقدمتهوله ، شربه كالعادة وهو شغال على الجهاز من غير ما يبصلي ، فاتت خمس دقايق وهو لسه صاحي ، عشر دقايق ، ربع ساعة ..
يحيى ما نامش ، ايه اللي حصل ..
من غير ما يبصلي قالي وهو لسه مركز في شاشة الجهاز ، مش هنام يا حس لو كنت مستنيني انام .. لان اللي انت اشتريته من الصيدلية واللي انت حطيته في العصير فيتامين سي ، كنت محتاجه عشان الانفلونزا ..
انت تحت الكنترول يا حسام ، ومش من دلوقتي ، من اول ما اشتغلت على الجهاز دا وبدأت افهمه ..
انتظروا الحلقة الأخيرة
استنو عليا يومين بقى ولا حاجه وانزل لكم الجزء الاخير انا اتاخرتش عليكم في الاجزاء
#الحلقة_الأخيرة
- يحيى ، انا مكنتش هأذيك ، صدقني ، انا صاحبك ، انا كل اللي كنت هعمله بس اني كنت هاخد من إيدك السلاح اللي هتئذي بيه نفسك
= عيل صغير انا يا حسام عشان تحميني من نفسي
- يا يحيى انا كنت هنيمك بس ، مكنتش هقـtـلك
= ما فكرتش فيها ولا لحظة يا حسام ، ما اتمنيتهاش
- اكدب عليك لو قولتلك مجاتش في بالي ، جت ، بس ما قدرتش ولا عمري هقدر يا يحيى
= تعرف ليه عمرك ما هتقدر ، عشان انت إنسان ، إنسان عادي ضعيف ، مش إله
- ولا انت إله يا يحيى
= لا ، انا إله ، إله كامل الصلاحيات ، العالم كله بين صوابعي ، اقدر اعمل فيه كل اللي انا عايزه ، ناقصني ايه علشان اكون إله ؟ انا خلاص ، قررت أعلن عن نفسي قدام العالم ، وكل الناس لازم يقدمولي فروض الطاعة والعبادة ، لازم يتمنوا رضايا
- اعقل يا يحيى واستغفر **** ، محـ.ـروق ابو الجهاز اللي هيجننك دا
= الزم أدبك وانت بتتكلم معايه يا مخلوق يا حقـ.ـير ، انا سيدك وإلهك ، واسجد تحت رجلي وانت بتكلمني
- انا ما بسجدش غير للي خلقني وخلقك يا يحيى ، واعمل فيا اللي انت عايزه ، انا عارف انك تقدر تعمل فيا اي حاجة ، بس هو دا العقاب اللي استاهله ، انا اللي دخلتك اللعبة دي ، وانا شريكك الخفي في كل جرايمك ، اقتـ.ـلني دلوقتي يا يحيى عشان لو دا محصلش انا اللي هقـ.ـتلك
= ها ها ها ، طب يالا نجرب كدا ، اقتـ.ـلني يا حسام
حاولت ساعتها امسك رقبته واخنـ.ـقه ، حسيت لأول مرة في حياتي اني ماليش حكم على إيدي ، كإنها إيد حد تاني
= ايه مش قادر تقتـ.ـلني ، طب سقف يا حسام ، سقف
لقيت إيدي بتسقف لوحدها وانا بتفرج عليها ، مش قادر ابطل تسقيف
= كفاية تسقيف يا حسام ، اقلع كل هدومك زي يوم ما أمك ولدتك
قلعت هدومي فعلا لا إراديا ، كأني منوم مغناطيسيا ، كنت مكسوف من نفسي جدا ، بس مش قادر اتحكم في افعالي ، معنديش اي إرادة قدام كلمته ، بدأت لأول مرة في حياتي أفكر في إحساس لعب ******* ، اظن دلوقتي ان لعب ******* بتحس زينا بالظبط بس ما بتقدرش تعترض على اي حاجة ..
= ها يا حسام ، انت اكيد عارف ان أمي ما طلعتش أشرف سـ.ـت في الدنيا ، أمي طلعت عاهـ.ـرة ، خايـ.ـنة ، بس مش هتكون أمي لوحدي ، قول يا حسام ان أمك خاطية
- أمي خاطية
= قول يا حسام ان أمك عشيقتي
- أمي عشيقتك
= قول يا حسام انك كـ.ـلب
- انا كـ.ـلب
= ها يا حس ، ناقصني ايه عشان اكون إله ، لعلمك ، انا لو عايز اخليك تسجد تحت رجليا دلوقتي هعملها ، بس دي الحاجة الوحيدة اللي مش هجبر اي حد عليها ، انا عايز عبيدي يدخلوا مملكتي برجليهم ، عايز كل الناس يعترفوا بقدرتي وهما بكامل وعيهم وإرادتهم
- انت عارف انك بتضحك على نفسك يا يحيى انت مخلوق ضعيف ، أضعف بكتير مما تتخيل ، كل قوتك في الجهاز دا ، والجهاز لا انا ولا انت نعرف مين اللي وراه ، لو بقيت إله زي ما بتقول مش هتكون اكتر من صنم عجوة ، الناس هتعبدك شوية وبعدين هياكلوك .. ثم احنا بنتجادل في ايه اصلا ، ما المستقبل كله تحت ايديك ، بص بصة لقدام وانت تعرف نهايتك ايه
= غـ.ـبي ، تفتكر انا ما عملتش دا في أول ثانية ليا قدام الجهاز ، نهايتي مش هتكون على إيدك ولا على إيد غيرك ، انا اللي هقـ.ـتل نفسي بنفسي ..
- طب وهو فيه إله بيمـ.ـوت
= طبعا ، كل الآلهة بتمـ.ـوت لما صلاحيتهم بتنتهي ، فين حورس دلوقتي ، فين كل الآلهة القديمة ؟ مـ.ـاتت ، وانا كمان همـ.ـوت اكيد ، بس بعد ما العب بالعالم كله وازهق من اللعبة كلها ، واسيب كل حاجة وامـ.ـوت ، أما انت بقى للأسف ، مش هتلحق تشوف اليوم دا لإن انت نهايتك جت خلاص ، وعشان انت صاحبي او كنت صاحبي في يوم من الأيام انا هديك offer ما اديتوش لحد من اللي قتـ.ـلتهم قبلك ..
أنت هتختار عقابك بنفسك يا حسام ، وبعد ما عقابك ينتهي هتختار المـ.ـوتة اللي هتـ.ـموتها ، قدامك خمس دقايق تفكر وتقولي اخترت ايه ..
- يعني انت خلاص يا يحيى ، قررت تقتـ.ـل صاحبك ؟ خلاص مش قادر تفتكرلي اي ذكرى حلوة لينا مع بعض ؟
= لااا يا حس ، اوعى تكون بتلعبها معايه عواطف ازعل منك اوي ، متحسسنيش انك غبي للدرجادي يا راجل ، دا أنا شاوي امي قدام عينيك ، أمي اللي رضعتني سنتين ، رضعتني انت يا حس ها ها ها
= خلاص يا يحيى ، اقتـ.ـلني وخلصني ، مش طايق اشوف شكلك
- اختار يا حبيبي ، عايز تتعـ.ـذب ازاي ، وعايز تمـ.ـوت ازاي
= اعمل اللي انت عايزه يا يحيى ، انا واحد مسلوب الإرادة وانت دلوقتي بتتحكم فيا كإني روبوت ، موتني زي ما تموتني ، كدا كدا هرتاح في الاخر ، إنما انت مش هتدوق الراحة حي ولا ميت ، انت تفوقت على إبليس في الشر يا أخي ، متخيل **** هيعمل فيك إيه ؟
- ششش ، مش عايز خطب ، مش عايز خطب يا شيخ حسام ، انت دلوقتي سيبتني اختارلك ، ودي مسؤولية كبيرة أوي يا حس ، انا عايزلك مـ.ـوتة شاعرية تليق بيك ، مـ ـوتة يكون فيها عذlب الفلاسفة اللي انت لابس عبايتهم ، انت تعرف سقراط مـ.ـات ازlي ، بلاش سقراط ، تعرف الحلاج مـ.ـات ازاي ، تعرف المسيح اتعمل فيه ايه ، كل اصحاب الرسالات لازم يتعـ.ـذبوا يا حسام وانت اخترت تكون صاحب رسالة ..
بس ، انا خلاص قررت ، انت هتمـ.ـوت بالصاعق الكهربي يا حس ، ايه رأيك ، الكابل دا الفولت اللي فيه مش عالي اوي ، مش هتمـ.ـوت بسرعة ، ودا اللي انا عايزه ، هتتعـ.ـذب شوية ، هتحس بالتيار وهو بيجري في جسمك ، هتحس بالمـ.ـوت وهو بيعصرك زي اللمونة ، إحساس فظيع اوي يا حسام ، بس تعرف ، أمتع حاجة في الموضوع انك هتروح دلوقتي على الكابل دا ، هتمسكه بإيدك وانت واعي تماما وعارف كل اللي هيحصلك ، الفجوة الشعورية اللي برنامج الكنترول بيحطها للضحية ما بين الأوردر اللي بينفذه وبين إرادته الخاصة اللي هي اكيد عكس الاوردر دا حاجة مثيرة جدا ، انك تكون عارف من جواك انك رايح للمـ.ـوت برجليك بس معندكش إرادة عشان متعملش دا ..
يالا بينا يا حس ، let's go يا بطل ، الكابل اهو قدامك ، روح امسكه بإيدك يا حسام ودوق المـ.ـوت ..
ولقيت نفسي بتحرك لا إراديا ناحية الكابل ، البرنامج حاططني تحت السيطرة الكاملة ليحيى ، طول ما البرنامج شغال انا مجبر انفذ اي أمر يحيى بيدهولي ..
لحظات تقيلة جدا من الرعب وأنا ماشي بخطوات بطيئة في اتجاه المـ.ـوت ، يحيى هو اللي حدد ان خطوتي تكون بطيئة علشان يطول مدة عذابي ، أشهد أن لا إله إلا **** وأشهد أن محمد **** **** ، سامحني يا *** على اي ذنب عملته في حياتي ، انا صحيح غلطاتي كتيرة بس انت كرمك واسع ، وانت عالم اني عمري ما سعيت في الشر ولا كان عندي رغبة في أذية مخلوق ..
ومسكت الكابل بإيدي والتيار جري في جسمي ، إحساس فظيع صعب توصفه الكلمات ، لقيت نفسي فجأة مرمي في آخر الأوضة ، واضح ان التيار حدفني ، وبعد كدا عمل قفلة في كهربة الشقة ، الدنيا كلها ضلمت ..
- متستعجلش يا حسام ، دي اول جرعة في العذاب ، يالا يا حس قوم أقف على رجليك ..
الغريبة اني ما وقفتش
- أقف يا حسام
ما وقفتش
" كل نظام ليه ثغرة ، الثغرة دي هي نقطة الضعف ، والاذكيا بس هما اللي بيقدروا يدخلوا منها وساعتها يقدروا يتحكموا في النظام "
دا كان كلام يحيى ليا في أول اللعبة ، افتكرته وأنا مرمي على الأرض ، هي دي الثغرة ، الكهربا اتقطعت عن الجهاز ، فمبقاش ليه اي قيمة ، وبالتبعية يحيى كمان مبقاش ليه اي قيمة من غير الجهاز هي دي فرصتي عشان اخلص العالم من كل الشرور اللي حصلت بسبب اللعنة دي ..
قمت على الجهاز زي المجنون ، كسرته ..
حسيت براحة عجيبة لما عملت كدا ..
يحيى خلاص ، بقى زي شمشون لما دليلة حلقتله شعره ، بقى وحش فاقد لقوته ، تعبان سنانه متخلعة ، العيال الصغيرة ممكن تلعب بيه ..
مقدرش يستحمل الفكرة دي ، خاف من انتقامي ، رمى نفسه من الشباك ..
ومـ.ـات منـ.ـتحر ..
اللعبة لسه مخلصتش ..
عايز اقولك اني ندمت عشان كسرت الجهاز ، حسيت اني خسرت قوة كانت ممكن تفيد البشرية ، ودا اللي خلاني أستعين باتنين اصحابي ، صلحوا الجهاز فعلا ورجع يشتغل زي الاول ، بس للاسف دي كمان كانت غلطة لان الاتنين دول لما دخلوا اللعبة ما استحملوش الحقيقة واحد منهم انتـ.ـحر والتاني اتجنن ..
بعدها قررت اشتغل لوحدي ، اشتغلت خمس سنين متواصلين لحد ما قدرت احول كل الداتا بتاعة الجهاز للعبة متاحة على الإنترنت لكل واحد عايز يخوض المغامرة ..
الكون دلوقتي بتاع الكل ، مفيش حد عنده القوة لوحده ، مفيش حد هيقدر يتحكم في الباقيين ويذلهم ، كل واحد يقدر من بيته يفتح اللعبة دي ويتعامل معاها ، بإيدك تكون يحيى وبإيدك تكون حسام ..
بس المهم تكون عارف ان اللعبة دي أخطر لعبة في حياتك ..
وكدا تبقى خلصت قصة اللعبة ..
اشوفكو بخير ..
أدهم موافي
- حضرتك الاستاذ أدهم موافي
= ايوه مين حضرتك
- انا المقدم سامح عبد **** أمن وطني
= اؤمرني
- حضرتك مطلوب القبض عليك
= بتهمة ؟
- التهم كتير ، متعدش ، انت نصبت على الناس وأعلنت على الإنترنت انك برمجت لعبة هتخلي كل الناس يعرفوا الماضي والمستقبل وحاجات تانية كتير ، ولميت ملايين الدولارات من الناس اللي زاروا موقعك من كل انحاء العالم علشان يشتروا اللعبة دي ، وفي الاخر الموقع ماعليهوش اي لعبة
= بالظبط ، لأن مفيش لعبة من الأساس يا سيادة المقدم
- علشان كدا انت متهم بالنصب والاحتيال
= فين النصب يا افندم ، انا مقولتش ان فيه لعبة ، ولا انا اصلا مبرمج ولا اسمي حسام ولا ليا صاحب اسمه يحيى ، كل دي شخصيات واحداث خيالية ، والبلوج اللي عليها القصة دي بلوج لقصص الخيال العلمي ، وانا مؤلف قصص خيال علمي ..
- أيوه يا استاذ بس الناس صدقتك
= دا معناه اني كاتب محترف مش اني نصاب ، والملايين اللي حضرتك بتتكلم عنها دي حقي ، مكافأة ذكائي يا سيادة المقدم ، على فكرة انا موقفي القانوني سليم جدا ، وروح حضرتك خلي زوار البلوج يرفعوا عليا قضايا ، ويقولوا اني الفت قصة وهما صدقوها ، هو مش فيه مثل برضو بيقول القانون لا يحمي المغفلين ؟؟
#الحلقة_الأولى
احنا متراقبين طول الوقت ، متشافين ثانية بثانية ، حتى أنفاسنا معدودة علينا كويس أوي ..
احنا أضعف حاجة في الكون دا كله ، احنا صغيرين اوي اوي
تحذير :
لو بتخاف أو عندك فوبيا من أي نوع متكملش معايه ..
لو عندك فضايح او ملفات سودا متكملش معايه ..
لو لسه فيه في حياتك حاجة تخاف عليها .. أرجوك .. أرجوك متكملش معايه ..
اللعبة اللي حضرتك داخل عليها مالهاش علاقة بأي برنامج كمبيوتر بتسطبه وبتعمل accept لكل شروطه من غير ما تقراها ..
اللعبة اللي حضرتك داخل عليها دي أخطر لعبة في حياتك كلها ، اللعبة دي هتدخلها إنسان وهتخرج منها إنسان تاني ، أو يمكن متخرجش منها إنسان اصلا ، أو جايز متخرجش منها خالص ..
اللعبة دي مش للمترددين ، مش للناس اللي متعودة ترجع من نص الطريق ، اللعبة دي للي قلبهم ميت ومستعدين يواجهوا الحقيقة زي ما هي ..
معندكش اختيارات غير انك ترفض اللعبة قبل ما تدخلها ، لكن لو دخلت لازم تكون متأكد انك عمرك ما هتخرج تاني ..
عدد الأشخاص اللي لعبوا اللعبة دي قبلك 3 ، اتنين منهم انتحروا ، وواحد اتجنن ..
لو معندكش حاجة تخاف عليها ، ومستعد تاخد الريسك ، دوس start وابدأ اللعبة ..
هديك نبذة مختصرة عن اللعبة قبل ما تبدأ ..
انا مبرمج وانا صاحب اللعبة اللي هتغير تاريخ البشرية كله ، غير البرمجة كان عندي هواية الغطس ..
سافرت كل الدول اللي فيها بحر وغطست فيها ..
لقيت تحت المايه عالم تاني كله أسرار ، كائنات عايشة بقوانينها ، سفن غرقانة ..
مرة لقيت سلسلة دهب تحت المايه ، اكيد كانت بتاعة واحدة غرقانة ..
لحد ما جه اليوم اللي غير حياتي ، واللي هيغير التاريخ البشري كله ..
اليوم اللي هيوقف حروب ويولع حروب جديدة خالص ..
يوم ما لقيت الصندوق في قاع البحر الميت ..
الصندوق اللي فيه كل أسرار الكون من يوم ما اتخلق لحد اللحظة اللي اترمى فيها في الماية ..
يومها انا كنت فاكر ان الحكاية كلها صندوق غرقان تحت المايه ، يمكن يكون فيه شوية ورق ، تحف ، مجوهرات حتى ، لكن مخطرش في بالي يكون فيه كل اللي انا شوفته ..
خدت الصندوق معايه الفندق اللي كنت نازل فيه ، وطلعت غرفتي وفتحت الصندوق و يا ريتني ما فتحته ..
الصندوق دا كان جواه عجايب وأسرار مفيش حد في الدنيا عنده طاقة يستحملها ..
هتعرف كل حاجة في وقتها .. المهم تكون جاهز لأن اللعبة شبه ابتدت ..
فتحت الصندوق واتفتحت معاه بوابة الأسئلة اللي مالهاش أي إجابة ، هتلف في دواير مقفولة لحد ما تدوخ ومش هتوصل غير لفكرة واحدة هي بس اللي ممكن تريح عقلك من الحيرة ، اننا أصغر حاجة في الكون ، مش كل حاجة هنفهم تفسيرها ، لكن برضو ده مش معناه انها مالهاش تفسير ..
الصندوق كان فيه جهاز كمبيوتر ، دي مش أغرب حاجة في القصة صدقني .. انا معاك انك تلاقي صندوق مقفول تحت المايه وتفتح الصندوق دا فتلاقي جواه جهاز كمبيوتر فكرة غريبة فعلا ، لكن مش أغرب حاجة في قصتي ..
يعني مثلا هتعمل ايه لو قولتلك ان الجهاز محصلش فيه اي عطل واشتغل بمجرد ما اتوصل بالتيار الكهربي رغم انه زي ما هو واضح قعد تحت المايه وقت كبير ، حاجة غريبة برضو مش كدا ؟
خد الاغرب بقى ..
لما شغلت جهاز الكمبيوتر طبعا بعد ما نشفت منه المايه كويس ، اكتشفت ان لغة البرمجة اللي بيشتغل عليها الجهاز دا مختلفة تماما عن كل اللي درسناه في الكلية او اللي ممكن تشوفه في اي مكان في العالم ..
هي حاجة لو جينا نشبهها بلغات التخاطب هنقول أنها لغة برمجة مكسرة ، لغة بتحاول تجاري لغة تانية أقل منها بكتير ، بتحاول تنزل لمستواها عشان مستخدمين اللغة دي يقدروا يفهموا ..
حتى لما حبيت احدد لغة النظام ، فوجئت ان القايمة فيها اكتر من 6000 لغة ، الرقم دا لوحده رقم يخض لو حضرتك مهتم باللغات ، وشغلت جهاز كمبيوتر لسه جايبه من قاع البحر ، وحاولت تحدد اللغة فبدل ما تلاقي قدامك العشرة خمستاشر لغة اللي انت عارفهم ومتعود عليهم فتلاقي 6000 لغة ، لو ما قدرتش تعتبر ان الجهاز دا هنج من رميته تحت المايه يبقى لازم شعرك يبيض من الخوف ..
أصل 6000 لغة يعني الجهاز دا عليه قاعدة بيانات شاملة كل اللغات تقريبا اللي اتكلم بيها الانسان من بداية التاريخ البشري ، واحنا اصلا اللغات القديمة اللي مفرداتها وصلتلنا مش كتير ، معندناش اي فكرة عن الحضارات اللي قامت واتدفنت في الكوكب دا ، فمين اصلا اللي برمج الجهاز دا واداله 6000 لغة وجابهم منين ؟؟؟؟
انتظروا الحلقة الثانية ،،،
#الحلقة_الثانية
قررت اني اصور الخطوات بالموبايل خاصة ان اللغة الاصلية كانت الماني ، وانا الالماني حافظ منه كام كلمة كدا باخدهم بالشبه ، فقلت هصور الخطوات كلها عشان اعرف ارجع هنا تاني لو اخترت اي لغة غريبة من دول ..
وبدأت اتصفح اللغات اللي موجودة على النظام
فيه لغة عربية .. اخترتها ، فوجئت أن الاختيار مش نهائي ، فيه أقسام كتييير اوي للغة العربية ، واسامي قبائل قديمة غالبا دي قبائل شبه الجزيرة العربية اللي كانت بتتكلم عربي وكل قبيلة لها لهجة مختلفة عن التانية ..
النظام كان عليها لغات قديمة كتير ، لاتينية ، هيروغليفية ، فينيقية ، سينسكريتية .. لغات كتيرة اوي ..
اخترت اللغة العربية الحديثة لأني كنت محتاج افهم كل حاجة في الجهاز العجيب دا ..
كنت محتاج افهم دا شغل جن وللا شغل فضائيين وللا ايه اللي بيحصل ، وكنت محتاج افهم ايه حجم الداتا اللي على جهاز أول خطوة في تشغيله تعتبر معجزة ممكن تقلب التاريخ البشري كله ، انت عارف يعني ايه واحد معاه اسامي وابجديات كل اللغات اللي اتكلمها الانسان من يوم الخلق ، ما اللغة مفتاح الحضارة ، لو كشفت أسرار اللغة مش بعيد تكشف كتير من أسرار الحضارات ..
بس قبل أي حاجة لازم اكلم يحيى صاحبي يجيلي الفندق ..
كلمت يحيى وطلبت منه يجيلي على الفندق بسرعة ، ويحيى دا هو صديق عمري والألفا بتاعنا في الكلية ، عارف انت صاحبك الدحيح اللي بيغشش الدفعة كلها ، اهو دا بقى يحيى
كان لازم يكون موجود معايه في موقف زي دا .. ويحيى دا هو اللاعب رقم 1 للعبة دي ، هتعرف دلوقتي حالا ايه اللي حصل ليحيى من اللعبة وبسببها ..
تعالى يا عم يحيى شوف اللي انا فيه .. دلوقتي الجهاز دا انا لقيته جوا صندوق في قاع البحر ..
= جهاز ايه يا عم انت اللي لقيته تحت البحر ، ما تقول كلام يتعقل
- لا يا يحيى وحياة ابوك لسه بدري أوي على الاستغراب ، الصندوق قدامك اهو ، ومتغطي بالريم زي ما انت شايف ، ودي حاجة غريبة طبعا ، لكن لسه فيه الأغرب ، الجهاز دا انا شغلته ..
= بس ، اعطل بقى انت خالص وسيبني اتعامل
وقعد قدام الجهاز وركز أوي في الشاشة ، وبدأ لاستغراب يظهر على وشه واحدة واحدة لحد ما بقى شبه علامة الاستفهام ..
= ايه دا ، ايه التهريج دا ، لغة البرمجة دي غريبة جدا ، الجهاز دي made in ايه ؟
- مش عارف ، مش مكتوب عليه أي بيانات ، حتى المادة اللي مكوناته مصنوعة منها مادة غريبة ، مش بلاستيك زي اللي احنا نعرفه
= سيبك من مادة الصنع دلوقتي ، لغة البرمجة اللي متصمم بيها نظام تشغيل الجهاز دا بتقول ان الناس اللي عملوا الجهاز دا سابقينا ب 500 سنة على الاقل
- خد الكبيرة بقى
= هو فيه اكبر من كدا ؟ هات
- اللغات المتاحة لنظام التشغيل بتاع الجهاز دا تعرف كام لغة ؟
= مش أقل من 20 لغة طبعا
- 6000 لغة
=!!!! انت بتقول ايه يا ابني انت ، انت فاهم معنى اللي بتقوله دا
- انا كنت مستغرب زيك كدا بالظبط وكنت فاكر الجهاز مهنج وعامل استنساخ ، بس أنا جربت بنفسي ، فيه هنا لغات قديمة جدا ، لغات ميتة ، مش هقولك هيروغليفي علشان الهيروغليفي نفسه رموزه اتفكت وبقى مفهوم بالنسبالنا ، بس اللغة اللي كان بيتكلم بيها الإنسان الأول في العصر الحجري والعصر الجليدي موجودة هنا بكل مفرداتها ومع كل لغة امكانية الترجمة لأي لغة تانية ، الجهاز دا حرفيا عليه التراث البشري كله ..
= حاجة غريبة أوي دي
- انا اشتغلت على الجهاز دا حوالي ساعتين ونص لحد ما انت جيتلي ، وبدأت لحد ما افهم الدنيا دايرة ازاي ، الجهاز دا لازم يتحرق يا يحيى
= جهاز ايه اللي يتحرق يا غبي انت ، دا كنز
- يحيى انت تعرف حجم الداتا اللي موجودة على الجهاز دا ؟
= لا ما اعرفش ، بس هعرف كل حاجة دلوقتي
- 800000 مليار جيجا
= نعم ؟ انت عبيط يا ابني هو فيه الرقم دا ، انت راجل مهندس عيب عليك ، هو الجهاز غريب فعلا بس مش للدرجادي يعني
- لما تعرف ايه الداتا اللي عليه ، هتعرف ان الرقم دا مش كبير خالص
= ايه الداتا اللي عليه
- التاريخ البشري كله ، من اول سيدنا ادم ، ومن قبل كدا كمان ، الجهاز دا عليه فيديوهات بجودة عالية جدا لكوكب الأرض قبل ظهور الإنسان اصلا عليه ، من ايام ما كانت الأرض مستعمرة لحيوانات من فصائل انقرضت من زمان منها اللي نعرفه زي الديناصور ومنها اللي منعرفش عنها اي حاجة ، انا شوفت فيديوهات تشيب قبل ما انت تجيلي ..
شوفت نزول ادم وحوا على الأرض ، شوفتهم زي ما انا شايفك كدا ، بأشكالهم وأجسادهم الحقيقية ، سمعت اصواتهم ، سمعت اللغة اللي كانوا بيتكلموا بيها ، سمعت حوار ادم الأول على الأرض مع زوجته ، سمعت دعواته لربنا علشان يسامحه على الذنب اللي عمله ، شوفت قابيل وهو بيقتل هابيل ، وشوفته وهو ندمان وبيبكي وبيلطم على وشه ، شوفت الغراب وهو بيدفن غراب تاني ميت ، وشوفت قابيل وهو بيتعلم الدرس من الغراب وبيدفن أخوه ..
= اكيد مش هصدق اللي انت بتقوله دا
- حقك ، انا نفسي مش مصدقه ، بس دا واقع قدامنا واحنا لامسينه ، تحت ايدينا ، تقدر تشوف كل حاجة بنفسك ، الحقيقة الكاملة اللي مينفعش فيها التزييف قدامك ، التاريخ كله صوت وصورة تحت إيدك ، يوميات كوكب الارض يوم بيوم متسجلة هنا فيديو ، انت متخيل ..
= احنا لازم نشوف كل حاجة
- يحيى ، احنا مش قد اللعبة دي ، احنا داخلين على ليلة اكبر مننا بكتير ، كفاية كدا
= مبقاش ينفع تقولي كفاية دلوقتي ، ما اقدرش يبقى تحت إيدي كنز زي دا وتطلب مني اسيبه ، انا وانت دخلنا التاريخ من اللحظة دي ، العالم كله هيعرف اسامينا وهيحفظها كويس أوي ..
- فيه حاجة خطيرة مكنتش عايزك تعرفها ، بس ما دام قررت تكمل يبقى لازم اقولهالك وتختار من دلوقتي هتكمل وللا هترجع
= حاجة ايه ؟
- التسجيلات اللي موجودة على الجهاز دا زي ما قولتلك مصورة تاريخ كوكب الأرض كله يوم بيوم من قبل ظهور الإنسان ولحد سنة 3000 ميلاديا ..
انا قدرت اوصل لاداة البحث هنا ، وبمجهود بسيط عرفت اجيب تفاصيل المكان والزمان اللي احنا فيهم بكل إحداثياتهم ، وشوفت بعيني فيديو ليا وأنا نازل البحر ، ولما لقيت الصندوق ولما خرجته وطلعت بيه على الفندق ، طبعا انت مش قادر تستوعب ، بس أنا هقولك حاجة مش هتصدقها ، انا شوفتك في المكان اللي كنت فيه قبل ما اكلمك وتجيلي هنا ، شوفتك ماشي مع بنت اسمها ماريان وبتتفسحوا ، وشوفتك في غرفتها في الفندق اللي انتو نازلين فيه ، وشوفتك لما رديت على تليفوني وغيرت هدومك وسيبتها ونزلت ، وطبعا كل اللي قبل كدا في حياتي وحياتك وحياة اي حد متصور لحظة بلحظة بالصوت والصورة ، انا اقدر افرجك دلوقتي على لحظة ولادتك ، اقدر أسمعك أول صرخة خرجت منك في اول يوم ليك في الدنيا ، مش انت بس ، انا اقدر أتابع سلسال جدودك كله لحد ما اوصل لادم .. واقدر كمان اشوف كل اللي لسه هيحصل معايه ومعاك ومع كوكب الأرض كله لحد بعد الف سنة جاية ..
= يعني انا دلوقتي اقدر اشوف المستقبل ، اقدر اعرف انا هموت امتى وازاي ، اقدر اتفرج على حياتي اللي لسه هعيشها ؟ انا موافق ابدأ اللعبة ودلوقتي حالا
- بس لازم تكون فاهم ان اللي انت داخل عليه دا خطر ، انت ماشي في طريق ممكن مترجعش منه تاني
= موافق
- طيب فيه حاجة أخيرة عايزك تعرفها
= حاجة ايه ؟
- كل اللي انت سمعته دا غريب ومثير مقولناش حاجة ، بس فيه حاجة اغرب ، الجهاز دا عليه برنامج لو زي ما انا فاهم كدا يبقى كارثة ، يبقى احنا معانا قوة خيالية جيوش العالم كلها متقدرش عليها ، احنا بالبرنامج دا على وشك نكون اقوى اتنين في العالم كله ، انا وانت هنبقى اقوى من الطبيعة ومن الزلازل والبراكين ومن التكنولوچيا ، هنبقى في قوة القدر نفسه
#الحلقة_الثالثة
لاااا ، انسى ، انت مش هتعرف أي حاجة عن البرنامج دا بالذات دلوقتي ، انا شفرته تماما ومش هتقدر توصله لوحدك
- ايه دا بقى ، من أولها كدا هنعمل الشغل دا مع بعض ، انت عايز تسيطر على العالم لوحدك ومحدش يشاركك في القوة اللي معاك
= انا مش عايز اسيطر على العالم يا يحيى انت اللي عايز ، أبوس إيدك متخوفنيش اكتر من كدا ، انت قبل ما تفهم أي حاجة عن الجهاز اللي وقع في ايدينا بدأت تفكر في السيطرة على العالم ، امال لما تبقى معاك القوة هتعمل ايه ، هتقضي على الاخضر واليابس ؟ اسمع كلامي يا يحيى اللعبة دي خطر والخطر مش علينا وبس ، الخطر على البشرية كلها ، قوة مطلقة في إيد اتنين زينا معناها دمار على العالم كله ..
- يا عم حسام ولا دمار ولا حاجة ، هو انت فاكرنا مين ، هتلر وموسوليني ، احنا لو معانا القوة اللي انت بتقول عليها دي فعلا يبقى كويس جدا لإننا هنستخدمها في خدمة الخير ، طول عمر الخير يا حس مضروب بالجزمة وواخد على قفاه ومالوش حد يدافع عنه ، طول التاريخ والطيبين غلابة والأشرار هما اللي معاهم القوة ، آن الوقت بقى نقلب موازين الأمور والطيبين يبقوا هما الاقويا ، احنا عايزين الخير يحكم العالم يا حسام ..
= نفسي اصدقك يا يحيى
- صدقني يا حسام ، ما انت عارفني كويس وصاحبي بقالك كام سنة ، شوفت مني اي شر
= مش هتبقى نفس الشخص اللي كنته طول حياتك ، الناس بتتغير لما بتملك القوة ، انت عندك حق لما قلت ان على طول التاريخ والطيبين ضعفا والأشرار اقويا ، هما مش ضعفا عشان طيبين يا يحيى ، هما طيبين علشان ضعفا ، طيبين علشان معندهمش اختيار تاني ، شوف المظلوم اللي بتتعاطف معاه لدرجة انه يوجع قلبك ، وهو بيدعي على الظالم بدموع عينه ، وتعالى تاني اتفرج عليه بعد ما يملك القوة ، هيبقى ظالم اكتر من اللي ظلمه نفسه .. انا خايف يا يحيى
- بص يا عم حسام ، خلينا نتفق اننا دلوقتي معانا كارت يقدر يغير مسار اللعبة كله ، احنا مش هنلعب يا حسام ، احنا هندير اللعبة ، هنقف على راس الكوكب ونمسك عصاية واللي يغلط نأدبه ، احنا معانا الحقيقة ، معانا الماضي ومعانا المستقبل ..
= طيب ما فكرتش فيه كام جهة هتحارب علشان توصل للكنز اللي في ايدينا ؟ احنا كدا هنحارب طواحين الهوا
- وعلشان كدا بقولك لازم نحمي نفسنا ، مش لازم نشتغل في النور ، خلينا نحرك كل حاجة في الضلمة من غير ما حد يشوفنا .. وانت لازم تثق فيا شوية يا عم حسام
= الحكاية مش كدا خالص يا يحيى ، مش حكاية ثقة ، الحكاية اني خايف عليك وعلى نفسي
- انسى الكلمة دي بقى يا حس ، من النهارده انا وانت مينفعش نخاف ، ها بقى ، ايه البرنامج اللي هيدينا قوة خارقة دا ..
= برنامج الموت ، انت بتفتح البرنامج دا وتعمل Brows لصورة شخص ، في خلال جزء من الثانية بيكون البرنامج اتعرف على بصمة وشه وقدر يرصد مكانه بالظبط ، فيه حقل في البرنامج انت بتكتب فيه الطريقة اللي عايز تقتل بيها صاحب الصورة وساعة الصفر اللي هتنفذ فيها حكم الاعدام ، والبرنامج بيقوم بتسليط طاقة على الهدف المحدد والطاقة دي بدورها بتقدر تقتله في المدة الزمنية المحددة بالظبط ..
انا لحد دلوقتي مش فاهم الميكانزم بتاعة اي حاجة ، ولا فاهم الجهاز دا مين اللي وراه ، بس واضح ان الكوكب بتاعنا كله بقاله ملايين السنين وهو لعبة في ايدين كائنات تانية اقوى مننا بكتير ، واديك شوفت ، بيراقبونا وبيصورونا فيديو من بداية الخلق ، انت عارف يا يحيى ، انا خايف لا يكون وجودنا على كوكب الأرض دا كله وتاريخنا البشري بكل ما فيه من احداث مجرد مسرحية بتتعمل على مسرح كبير وبتتفرج عليها كائنات عملاقة عندها قوة لا محدودة ، امال يعني هما كانوا بيصورونا ليه ، انت متخيل ان كل الحروب والصراعات والناس اللي بتقطع في بعضها دي علشان في الاخر كائنات تانية تتفرج علينا وتتسلى ، دي فكرة مرعبة ..
- في ظروف غير دي مستحيل كان يدخل دماغي حرف من اللي انت بتقوله ، بس دلوقتي أنا مصدق كل حاجة واي تصور ، بس خليني أقولك حاجة كويسة ، حتى لو احنا زي ما انت بتقول لعبة في ايدين كائنات تانية ، بايدينا نغير قوانين اللعبة دي ، كل نظام في العالم ليه ثغرات ، والثغرة دي هي غلطة صغيرة اااد كدهو لو فيه اتنين اذكيا زيي انا وانت عرفوا يدخلوا منها هيغيروا النظام كله ، الكائنات اللي انت بتتكلم عنها دي اكيد ما رمتش الجهاز الخطير دا في ايدينا متعمدة ، هي دي الغلطة ، هي دي الثغرة ، واحنا لو اشتغلنا عليها كويس هنغير مسار اللعبة كلها ..
= وجايز اللعبة بقالها ملايين السنين شغالة بنفس التكنيك فالموضوع بقى ممل ، رموا الجهاز دا في طريقنا عشان اللعب يسخن
- احنا حاليا واقفين على مسافة ثابتة من كل الاحتمالات ، مفيش احتمال اقرب من التاني ، مفيش قدامنا غير اننا نسترجل وندخل اللعبة زي ما هي ، قولي انت جربت برنامج الموت دا ؟
= بصراحة انا اول ما شوفته افتكرته برنامج ترفيهي كدا ، لعبة يعني ، بس بعد كدا استسخفت الفكرة دي أوي ، اصل مفيش مكان للتهريج في اللي بيحصل معانا دا ، قلت اجرب ، حطيت صورة رئيس الوزرا الإس**رائيلي ، وكتبت في الاوردر انه يموت برصاصة في زوره ، وكان الميعاد المفروض بعد ساعة ، فات ساعتين ونص اهو ، افتح التليفزيون وخلينا نشوف ..
يحيى شغل التليفزيون وبالفعل كان الخبر مغرق القنوات الفضائيه ، اغتـ.ـيال رئيس وزراء إسر**ائيل برصاصة مجهولة المصدر..
انتظروا الحلقة الرابعة ،،،
#الحلقة_الرابعة
عد الحادثة دي تحديدا كل حاجة في العالم هتتغير ، اللعبة بدأت ..
لما شوفنا بعينينا الطريقة اللي مات بيها رئيس وزراء الكيان بصمنا بالعشرة واتأكدنا اننا بالفعل تحت إيدينا قوة نقدر نحكم بيها كوكب الأرض بكل سكانه ..
مش محتاج اكتر من البوم صور لأقوى جيش في العالم هتعملها up load في البرنامج وتحط كلمة انفجار في حقل الوصف وتظبط التايمر بتاعك كإنك بتعمل كاب كيك في البيت ، ومع آخر ثانية من التوقيت المحدد أقوى جيش في العالم هيبقى كوم أشلاء وجثث متفحمة ..
ايه اللي بيفكر فيه الشخص اللي بيلعب بالنار ، بيقدم عرض مبهر قدام جمهور من المتفرجين بس ممكن في أي لحظة يحرق نفسه ، المشكلة ان الناس في كل الحالات هيسقفوا ..
نقلنا الجهاز معانا مصر ، ما عملش اي أزمة في المطار ، لابتوب عادي جدا مع واحد مسافر ، أمن المطار عمره ما كان يتخيل ان اللابتوب دا عليه سر اغتيال رئيس إسرائيل اللي قالب المجتمع الدولي ، مش بس كدا ، دا عليه كل أسرار العالم ، عليه كل الأدوات اللي هتمكن اتنين كتيانين زيي انا ويحيى انهم يحكموا العالم كله من جوا أوضة صغيرة في شقة في عمارة في الدقي ..
لحد اللحظة اللي دخلنا فيها الجهاز مصر انا كنت خايف جدا من اللعبة ومعنديش الجرأة الكافية عشان أدخلها ، لكن يحيى كان داخل فيها بكل طاقته وحماسه ، يحيى كان عايز يحكم الكوكب ..
بمجرد ما شغلنا الجهاز ويحيى قعد قدامه ، تقريبا مكانش بياكل ولا بيشرب ولا بينام ، يومه كله كان قدام الجهاز ، كان بيغوص في أعماقه بالساعات ويطلع باكتشاف جديد ..
يحيى هو اللي عرفني ان الجهاز عليه برنامج لقراية الأفكار ، بيشتغل بنفس طريقة برنامج الموت ، بتديله صورة الشخص وهو بينقلك كل فكرة بتدور في خياله ، وبنفس الطريقة اللي فكر بيها ، يعني لو حد قال بينه وبين نفسه انا جعان ، البرنامج بيبعت تكست بتقول انا جعان ، لو شاف واحدة وعجبته وبدأ خياله يشتغل معاها ، الجهاز بينقلنا المشهد اللي في خياله بالتفصيل ، صوت وصورة ..
دا جهاز مخابرات حديدي ، انت فاهم يعني ايه تقدر تراقب كل إنسان بيتنفس على كوكب الأرض ؟ تقدر تعرف بيفكر في ايه بالظبط ، مفيش أسرار ، حتى الأحلام اللي الناس بيحلموا بيها كنا بنشوفها ..
الموضوع مخيف فعلا ، احنا بقينا اتنين مرعبين ..
كمان يحيى اكتشف أن الجهاز عليه برنامج كنترول ، تقدر تتحكم تحكم تام في أي شخص تحدده ، تقدر تحركه زي قطعة الشطرنج ، تخليه يعمل كل اللي انت عايزه ..
يحيى وصل لقمة إثارته وجنونه ، الجهاز جننه فعلا ، وبدأ أول خطوة في مشوار نهايته لما رجع لفيديوهات يوم موت ابوه ، ابو يحيى مات مقتول وهو لسه *** صغير ، والحادثة اتقيدت ضد مجهول .. محدش عرف مين اللي قتله ، البوليس والنيابة غلبوا ، لحد ما قرروا يقفلوا ملف القضية كله ، لكن دلوقتي يحيى عنده القدرة انه يعرف القاتل ..
لما رجع لليوم اللي ابوه اتقتل فيه خد اول صدمة في وشه ، اللي قتل أبوه صديق عمره ، وهو نفسه الراجل اللي رباه كإنه ابنه ، دا اكتر حد بيحبه في الدنيا ، شافه بعينه في الفيديو وهو بيضرب ابوه بالرصاص وهو خاطفه ومكتفه في الصحراوي ..
وكان اكتر واحد منهار من البكا يوم جنازته ..
الصدمات ما انتهتش هنا لا دي ابتدت ، اللي بيعرف كل حاجة بيموت يا يحيى ، الحقيقة تقيلة يا يحيى ، ياما قولتله كدا ما سمعنيش ..
يحيى اكتشف أن صاحب ابوه كان على علاقة بامه وهما الاتنين اتفقوا على قتله ..
اكتر اتنين بيحبهم في الدنيا هما اللي يتموه ، امه اللي كان بيحلف بشرفها طلعت ست ساقطة ومجرمة ..
بس يحيى مش هيسكت وهينتقم منهم هما الاتنين ..
وفي لحظة جنون يحط صورهم في البرنامج ويديله اوردر انهم يتحرقوا في الشقة ، ويفضلوا جوا النار ساعتين قبل ما يموتوا ، الأوردر كان قاسي أوي ، فهمت منه ان خلاص يحيى صاحبي راح وجه مكانه وحش معندوش مشاعر ، قدر يحكم على الاتنين اللي ربوه مهما كان غلطهم انهم يتشووا في النار ساعتين وهو يتفرج عليهم وهما بيتنططوا زي السمك على النار لحد ما يموتوا ويتفحموا قدام عينيه ..
الإنسان دا مبقاش عنده قلب ، وإنسان من غير قلب يبقى وحش ، ووحش معاه قوة لا محدودة يبقى كارثة على العالم كله ..
يحيى لازم يخرج برا اللعبة بأي تمن ، لازم اشوف طريقة اخلص بيها منه قبل ما يدمر الكون باللي فيه ..
يحيى بعد ما قتل امه وعشيقها اتحول لقنبلة موقوتة ، خطر بيهدد الجنس البشري كله ، مكانش بيتحرك من قدام الجهاز ثانية واحدة ، كنت انا اللي بجيبله الأكل والشرب من كتر خوفي لا يموت وهو مش واخد باله ..
يحيى مكانش بيديني فرصة اقرب من الجهاز ، كان هو بس اللي بيتعامل معاه وبيشتغل عليه ، كل دا مكانش فارق معايه انا كنت خايف على يحيى من نفسه وخايف على العالم منه ..
في البداية كان مشغول بتصفية الحسابات ..
مفيش شخص اتعامل معاه من قريب أو من بعيد غير واخترقه تماما ، راجع تاريخ حياته كله ، اتجسس على كل مشاعره وأفكاره ..
وبعدين بدأ يفلتر الناس اللي بيكرهوه و اللي أذوه حتى لو إيذاء بسيط وغير متعمد ويعمل بأساميهم كشوف ، لدرجة انه كان كاتب أسامي مدرسين كانوا بيضربوه وهو صغير ، وصولات كانوا بيكدروه وهو في الجيش ، قايمة طويلة اوي مليانة بأسامي ناس بؤساء حظهم الأسود وقعهم في طريق واحد مختل ومعاه قوة خارقة ..
وبدأ يحيى لعبة الانتقام ..
أول ضحية كان صاحب البيت اللي طردهم زمان ، عمل عليه كنترول كامل وأجبره يرمي نفسه من فوق سطح العمارة ..
الضحية التانية كان وائل زميلنا في الجامعة ، وائل مرة اتخانق مع يحيى بسبب بنت زميلتنا ، خناقة عادية جدا بتحصل بين كل شباب الجامعة بس وائل عشان كان بطل كمال أجسام سفف يحيى التراب قدام الدفعة كلها ، الموقف عدى من زمان وكلنا نسيناه ، حتى وائل بعد كدا اعتذر ليحيى قدامنا كلنا وصالحه ..
بس بالنسبة ليحيى الموضوع ما انتهاش ، يحيى كان مأجل الحساب للوقت المناسب ، ومفيش وقت أنسب من دا للإنتقام ..
لما يحيى فكر في طريقة يقتل بيها وائل كان كل تركيزه انها تكون طريقة قاسية ومهينة ..
اختار وقت كان وائل خارج فيه مع مراته وبنته ، وعمل كنترول على وائل ، وعلى بياع مناديل في الشارع ، عيل صغير عنده 15 سنة ورفيع شبه القلم الرصاص ، وعمل كنترول على كل اللي في الشارع عشان يقفوا متفرجين ومحدش فيهم يفكر يحوش ..
وبعدين اداهم اوردر علشان يتخانقوا مع بعض ، وائل والواد بتاع المناديل والاتنين طبعا تحت السيطرة الكاملة ، والواد الصغير الضعيف دا مسك وائل مسح بيه الأرض ، ووائل قعد يستغيث ويتحايل على الواد عشان يرحمه ويبوس في رجله والواد يضرب فيه بالرجل لحد ما وائل مات تحت رجلين الواد ..
في الوقت دا طبعا كان وائل بطل الجمهورية في كمال الأجسام ، وكان بدأ يمثل في أفلام ويتعرف ، وبالتالي قضية موته بالطريقة دي مكانتش هتعدي بالساهل على الصحافة والإعلام ..
وائل اتقتل قدام مراته وبنته ، مات بطريقة مهينة مفيهاش اي كرامة ..
هل اللي وائل عمله زمان مع يحيى كان يستاهل عليه الموت ؟ حتى لو ، ذنبها ايه بنته اللي هتعيش طول عمرها فاكرة المشهد دا ومش هتقدر تنساه ..
يحيى لازم يبعد عن الجهاز ، لازم يبعد تماما ..
بس ازاي ؟ خلينا متفقين ان يحيى في الوقت دا لازم يتخاف منه ، ولازم تتعامل معاه بحذر ، مش بس تفكر الف مرة قبل ما تحاول تغدر بيه ، لا ، انت لازم تفكر الف مرة قبل ما تبصله بصة ممكن يفهم منها انك بتكرهه ..
يحيى هو الشبح اللي عامل رعب للعالم كله برا ، هو اللي ورا عمليات التفجير والاغتيالات والحرايق اللي مالهاش اي سبب مفهوم ، هو اللي ورا اختفاء الأرصدة من البنوك .. ازاي انا لوحدي اقدر عليه ..
مفيش حل غير اني احطله منوم في الأكل وبعد كدا ابعده من قدام الجهاز واحطه تحت الكنترول علشان اقدر اتحكم في كل تصرفاته واحمي الناس من جنونه ..
زي ما قولتلك ، يحيى كان مشغول بتصفية حساباته ، ومكانش بيتحرك من قدام الجهاز ، وكنت انا اللي بقدمله الاكل والشرب ، ودي كانت فرصتي اني احطله المنوم في العصير ، الدكتور قالي حباية تنيمك 24 ساعة ، حبايتين ينيموك 48 ساعة ، اكتر من كدا يعمل سكتة قلبية ويموت ..
ياااريت ، بس للاسف ما اقدرش ، صاحبي ولسه بحبه حتى لو اتحول سفاح ، مش هقدر اقتل واكون زيه ..
حطيت حباية واحدة من المنوم في العصير ، وقدمتهوله ، شربه كالعادة وهو شغال على الجهاز من غير ما يبصلي ، فاتت خمس دقايق وهو لسه صاحي ، عشر دقايق ، ربع ساعة ..
يحيى ما نامش ، ايه اللي حصل ..
من غير ما يبصلي قالي وهو لسه مركز في شاشة الجهاز ، مش هنام يا حس لو كنت مستنيني انام .. لان اللي انت اشتريته من الصيدلية واللي انت حطيته في العصير فيتامين سي ، كنت محتاجه عشان الانفلونزا ..
انت تحت الكنترول يا حسام ، ومش من دلوقتي ، من اول ما اشتغلت على الجهاز دا وبدأت افهمه ..
انتظروا الحلقة الأخيرة
استنو عليا يومين بقى ولا حاجه وانزل لكم الجزء الاخير انا اتاخرتش عليكم في الاجزاء
#الحلقة_الأخيرة
- يحيى ، انا مكنتش هأذيك ، صدقني ، انا صاحبك ، انا كل اللي كنت هعمله بس اني كنت هاخد من إيدك السلاح اللي هتئذي بيه نفسك
= عيل صغير انا يا حسام عشان تحميني من نفسي
- يا يحيى انا كنت هنيمك بس ، مكنتش هقـtـلك
= ما فكرتش فيها ولا لحظة يا حسام ، ما اتمنيتهاش
- اكدب عليك لو قولتلك مجاتش في بالي ، جت ، بس ما قدرتش ولا عمري هقدر يا يحيى
= تعرف ليه عمرك ما هتقدر ، عشان انت إنسان ، إنسان عادي ضعيف ، مش إله
- ولا انت إله يا يحيى
= لا ، انا إله ، إله كامل الصلاحيات ، العالم كله بين صوابعي ، اقدر اعمل فيه كل اللي انا عايزه ، ناقصني ايه علشان اكون إله ؟ انا خلاص ، قررت أعلن عن نفسي قدام العالم ، وكل الناس لازم يقدمولي فروض الطاعة والعبادة ، لازم يتمنوا رضايا
- اعقل يا يحيى واستغفر **** ، محـ.ـروق ابو الجهاز اللي هيجننك دا
= الزم أدبك وانت بتتكلم معايه يا مخلوق يا حقـ.ـير ، انا سيدك وإلهك ، واسجد تحت رجلي وانت بتكلمني
- انا ما بسجدش غير للي خلقني وخلقك يا يحيى ، واعمل فيا اللي انت عايزه ، انا عارف انك تقدر تعمل فيا اي حاجة ، بس هو دا العقاب اللي استاهله ، انا اللي دخلتك اللعبة دي ، وانا شريكك الخفي في كل جرايمك ، اقتـ.ـلني دلوقتي يا يحيى عشان لو دا محصلش انا اللي هقـ.ـتلك
= ها ها ها ، طب يالا نجرب كدا ، اقتـ.ـلني يا حسام
حاولت ساعتها امسك رقبته واخنـ.ـقه ، حسيت لأول مرة في حياتي اني ماليش حكم على إيدي ، كإنها إيد حد تاني
= ايه مش قادر تقتـ.ـلني ، طب سقف يا حسام ، سقف
لقيت إيدي بتسقف لوحدها وانا بتفرج عليها ، مش قادر ابطل تسقيف
= كفاية تسقيف يا حسام ، اقلع كل هدومك زي يوم ما أمك ولدتك
قلعت هدومي فعلا لا إراديا ، كأني منوم مغناطيسيا ، كنت مكسوف من نفسي جدا ، بس مش قادر اتحكم في افعالي ، معنديش اي إرادة قدام كلمته ، بدأت لأول مرة في حياتي أفكر في إحساس لعب ******* ، اظن دلوقتي ان لعب ******* بتحس زينا بالظبط بس ما بتقدرش تعترض على اي حاجة ..
= ها يا حسام ، انت اكيد عارف ان أمي ما طلعتش أشرف سـ.ـت في الدنيا ، أمي طلعت عاهـ.ـرة ، خايـ.ـنة ، بس مش هتكون أمي لوحدي ، قول يا حسام ان أمك خاطية
- أمي خاطية
= قول يا حسام ان أمك عشيقتي
- أمي عشيقتك
= قول يا حسام انك كـ.ـلب
- انا كـ.ـلب
= ها يا حس ، ناقصني ايه عشان اكون إله ، لعلمك ، انا لو عايز اخليك تسجد تحت رجليا دلوقتي هعملها ، بس دي الحاجة الوحيدة اللي مش هجبر اي حد عليها ، انا عايز عبيدي يدخلوا مملكتي برجليهم ، عايز كل الناس يعترفوا بقدرتي وهما بكامل وعيهم وإرادتهم
- انت عارف انك بتضحك على نفسك يا يحيى انت مخلوق ضعيف ، أضعف بكتير مما تتخيل ، كل قوتك في الجهاز دا ، والجهاز لا انا ولا انت نعرف مين اللي وراه ، لو بقيت إله زي ما بتقول مش هتكون اكتر من صنم عجوة ، الناس هتعبدك شوية وبعدين هياكلوك .. ثم احنا بنتجادل في ايه اصلا ، ما المستقبل كله تحت ايديك ، بص بصة لقدام وانت تعرف نهايتك ايه
= غـ.ـبي ، تفتكر انا ما عملتش دا في أول ثانية ليا قدام الجهاز ، نهايتي مش هتكون على إيدك ولا على إيد غيرك ، انا اللي هقـ.ـتل نفسي بنفسي ..
- طب وهو فيه إله بيمـ.ـوت
= طبعا ، كل الآلهة بتمـ.ـوت لما صلاحيتهم بتنتهي ، فين حورس دلوقتي ، فين كل الآلهة القديمة ؟ مـ.ـاتت ، وانا كمان همـ.ـوت اكيد ، بس بعد ما العب بالعالم كله وازهق من اللعبة كلها ، واسيب كل حاجة وامـ.ـوت ، أما انت بقى للأسف ، مش هتلحق تشوف اليوم دا لإن انت نهايتك جت خلاص ، وعشان انت صاحبي او كنت صاحبي في يوم من الأيام انا هديك offer ما اديتوش لحد من اللي قتـ.ـلتهم قبلك ..
أنت هتختار عقابك بنفسك يا حسام ، وبعد ما عقابك ينتهي هتختار المـ.ـوتة اللي هتـ.ـموتها ، قدامك خمس دقايق تفكر وتقولي اخترت ايه ..
- يعني انت خلاص يا يحيى ، قررت تقتـ.ـل صاحبك ؟ خلاص مش قادر تفتكرلي اي ذكرى حلوة لينا مع بعض ؟
= لااا يا حس ، اوعى تكون بتلعبها معايه عواطف ازعل منك اوي ، متحسسنيش انك غبي للدرجادي يا راجل ، دا أنا شاوي امي قدام عينيك ، أمي اللي رضعتني سنتين ، رضعتني انت يا حس ها ها ها
= خلاص يا يحيى ، اقتـ.ـلني وخلصني ، مش طايق اشوف شكلك
- اختار يا حبيبي ، عايز تتعـ.ـذب ازاي ، وعايز تمـ.ـوت ازاي
= اعمل اللي انت عايزه يا يحيى ، انا واحد مسلوب الإرادة وانت دلوقتي بتتحكم فيا كإني روبوت ، موتني زي ما تموتني ، كدا كدا هرتاح في الاخر ، إنما انت مش هتدوق الراحة حي ولا ميت ، انت تفوقت على إبليس في الشر يا أخي ، متخيل **** هيعمل فيك إيه ؟
- ششش ، مش عايز خطب ، مش عايز خطب يا شيخ حسام ، انت دلوقتي سيبتني اختارلك ، ودي مسؤولية كبيرة أوي يا حس ، انا عايزلك مـ.ـوتة شاعرية تليق بيك ، مـ ـوتة يكون فيها عذlب الفلاسفة اللي انت لابس عبايتهم ، انت تعرف سقراط مـ.ـات ازlي ، بلاش سقراط ، تعرف الحلاج مـ.ـات ازاي ، تعرف المسيح اتعمل فيه ايه ، كل اصحاب الرسالات لازم يتعـ.ـذبوا يا حسام وانت اخترت تكون صاحب رسالة ..
بس ، انا خلاص قررت ، انت هتمـ.ـوت بالصاعق الكهربي يا حس ، ايه رأيك ، الكابل دا الفولت اللي فيه مش عالي اوي ، مش هتمـ.ـوت بسرعة ، ودا اللي انا عايزه ، هتتعـ.ـذب شوية ، هتحس بالتيار وهو بيجري في جسمك ، هتحس بالمـ.ـوت وهو بيعصرك زي اللمونة ، إحساس فظيع اوي يا حسام ، بس تعرف ، أمتع حاجة في الموضوع انك هتروح دلوقتي على الكابل دا ، هتمسكه بإيدك وانت واعي تماما وعارف كل اللي هيحصلك ، الفجوة الشعورية اللي برنامج الكنترول بيحطها للضحية ما بين الأوردر اللي بينفذه وبين إرادته الخاصة اللي هي اكيد عكس الاوردر دا حاجة مثيرة جدا ، انك تكون عارف من جواك انك رايح للمـ.ـوت برجليك بس معندكش إرادة عشان متعملش دا ..
يالا بينا يا حس ، let's go يا بطل ، الكابل اهو قدامك ، روح امسكه بإيدك يا حسام ودوق المـ.ـوت ..
ولقيت نفسي بتحرك لا إراديا ناحية الكابل ، البرنامج حاططني تحت السيطرة الكاملة ليحيى ، طول ما البرنامج شغال انا مجبر انفذ اي أمر يحيى بيدهولي ..
لحظات تقيلة جدا من الرعب وأنا ماشي بخطوات بطيئة في اتجاه المـ.ـوت ، يحيى هو اللي حدد ان خطوتي تكون بطيئة علشان يطول مدة عذابي ، أشهد أن لا إله إلا **** وأشهد أن محمد **** **** ، سامحني يا *** على اي ذنب عملته في حياتي ، انا صحيح غلطاتي كتيرة بس انت كرمك واسع ، وانت عالم اني عمري ما سعيت في الشر ولا كان عندي رغبة في أذية مخلوق ..
ومسكت الكابل بإيدي والتيار جري في جسمي ، إحساس فظيع صعب توصفه الكلمات ، لقيت نفسي فجأة مرمي في آخر الأوضة ، واضح ان التيار حدفني ، وبعد كدا عمل قفلة في كهربة الشقة ، الدنيا كلها ضلمت ..
- متستعجلش يا حسام ، دي اول جرعة في العذاب ، يالا يا حس قوم أقف على رجليك ..
الغريبة اني ما وقفتش
- أقف يا حسام
ما وقفتش
" كل نظام ليه ثغرة ، الثغرة دي هي نقطة الضعف ، والاذكيا بس هما اللي بيقدروا يدخلوا منها وساعتها يقدروا يتحكموا في النظام "
دا كان كلام يحيى ليا في أول اللعبة ، افتكرته وأنا مرمي على الأرض ، هي دي الثغرة ، الكهربا اتقطعت عن الجهاز ، فمبقاش ليه اي قيمة ، وبالتبعية يحيى كمان مبقاش ليه اي قيمة من غير الجهاز هي دي فرصتي عشان اخلص العالم من كل الشرور اللي حصلت بسبب اللعنة دي ..
قمت على الجهاز زي المجنون ، كسرته ..
حسيت براحة عجيبة لما عملت كدا ..
يحيى خلاص ، بقى زي شمشون لما دليلة حلقتله شعره ، بقى وحش فاقد لقوته ، تعبان سنانه متخلعة ، العيال الصغيرة ممكن تلعب بيه ..
مقدرش يستحمل الفكرة دي ، خاف من انتقامي ، رمى نفسه من الشباك ..
ومـ.ـات منـ.ـتحر ..
اللعبة لسه مخلصتش ..
عايز اقولك اني ندمت عشان كسرت الجهاز ، حسيت اني خسرت قوة كانت ممكن تفيد البشرية ، ودا اللي خلاني أستعين باتنين اصحابي ، صلحوا الجهاز فعلا ورجع يشتغل زي الاول ، بس للاسف دي كمان كانت غلطة لان الاتنين دول لما دخلوا اللعبة ما استحملوش الحقيقة واحد منهم انتـ.ـحر والتاني اتجنن ..
بعدها قررت اشتغل لوحدي ، اشتغلت خمس سنين متواصلين لحد ما قدرت احول كل الداتا بتاعة الجهاز للعبة متاحة على الإنترنت لكل واحد عايز يخوض المغامرة ..
الكون دلوقتي بتاع الكل ، مفيش حد عنده القوة لوحده ، مفيش حد هيقدر يتحكم في الباقيين ويذلهم ، كل واحد يقدر من بيته يفتح اللعبة دي ويتعامل معاها ، بإيدك تكون يحيى وبإيدك تكون حسام ..
بس المهم تكون عارف ان اللعبة دي أخطر لعبة في حياتك ..
وكدا تبقى خلصت قصة اللعبة ..
اشوفكو بخير ..
أدهم موافي
- حضرتك الاستاذ أدهم موافي
= ايوه مين حضرتك
- انا المقدم سامح عبد **** أمن وطني
= اؤمرني
- حضرتك مطلوب القبض عليك
= بتهمة ؟
- التهم كتير ، متعدش ، انت نصبت على الناس وأعلنت على الإنترنت انك برمجت لعبة هتخلي كل الناس يعرفوا الماضي والمستقبل وحاجات تانية كتير ، ولميت ملايين الدولارات من الناس اللي زاروا موقعك من كل انحاء العالم علشان يشتروا اللعبة دي ، وفي الاخر الموقع ماعليهوش اي لعبة
= بالظبط ، لأن مفيش لعبة من الأساس يا سيادة المقدم
- علشان كدا انت متهم بالنصب والاحتيال
= فين النصب يا افندم ، انا مقولتش ان فيه لعبة ، ولا انا اصلا مبرمج ولا اسمي حسام ولا ليا صاحب اسمه يحيى ، كل دي شخصيات واحداث خيالية ، والبلوج اللي عليها القصة دي بلوج لقصص الخيال العلمي ، وانا مؤلف قصص خيال علمي ..
- أيوه يا استاذ بس الناس صدقتك
= دا معناه اني كاتب محترف مش اني نصاب ، والملايين اللي حضرتك بتتكلم عنها دي حقي ، مكافأة ذكائي يا سيادة المقدم ، على فكرة انا موقفي القانوني سليم جدا ، وروح حضرتك خلي زوار البلوج يرفعوا عليا قضايا ، ويقولوا اني الفت قصة وهما صدقوها ، هو مش فيه مثل برضو بيقول القانون لا يحمي المغفلين ؟؟
