مكتملة أسرار (1 مشاهد)

[🦂 the king Scorpion]

مقدمة..

في حياة كل واحد فينا أسرار، أسرار مش بيقدر يحكيها حتي لنفسه، في اللي بيعيش مع أسراره و في اللي ما بيقدرش يستحملها وبتخنقه..

احيانا بنحتاج نحكي أسرارنا لحد...أي حد.. حتي لو كان غريب عننا منعرفوش ومش هنشوفه تاني..

نرمي تعبنا وخنقتنا عليه ونمشي مش عايزين منه حل او نصيحة، كل اللي محتاجينه حد يسمع وبس..

و ده سر من الأسرار دي..
************

في عيادة طبيب نفسي مشهور..

شقة أنيقة في عمارة فاخرة في حي راقي..

كل شئ مطلي بالابيض يعطي شعور بالراحة النفسية موسيقي هادئة منبعثة من مكان ما بصوت متوسط كخلفية للشعور المريح للمكان..

العيادة مفيهاش ناس كتير..

ماهو مش عشان طبيب مشهور لازم تلاقي الناس واقفة علي السلم مستنية الدور بتاعها..

مش عيادة امراض باطنة هي..

بتدخل واحدة ست جميلة جدا، جسم رياضي ومتناسق.

ماشية بهدوء وثقة.. ووقفت عند السكرتيرة..

الست: الدكتور موجود.

السكرتيرة: ايوة يا فندم في حجز سابق ولا لأ.

الست: لأ مفيش حجز سابق، هيبقي في مشكلة لو هاخد دور حد..

السكرتيرة: المفروض ان في معاد محجوز دلوقتي، بس الحالة لسه ما وصلتش، لو إتاخر عن معادة 15 دقيقة الحجز بيتلغي، ساعتها لو الحجز اللي بعده موجود بدخله، لو مش موجود ممكن ادخل حضرتك.

الست: يعني هتردي عليا بعد اد ايه؟

السكرتيرة: استريحي يا فندم ربع ساعة واعرف حضرتك الوضع ايه.

بعد ربع ساعة..



قامت السكرتيرة و خبطت علي باب في اخر الريسبشن وبعد كده دخلت..

5دقايق وخرجت وراحت للست اللي لسه قاعدة..

السكرتيرة: حضرتك يا فندم تقدري تدخلي للدكتور بعد 5 دقايق، الحجز الحالي اتلغي والحجز اللي بعد لسه ما وصلش، فمفيش مانع عند الدكتور ان حضرتك تدخلي..

الست: تمام ميرسي.

السكرتيرة: ممكن اخد شوية بيانات؟

الست: (بتوتر) بيانات ايه؟

السكرتيرة: الاسم والسن والعنوان والحالة الاجتماعية، ما تقلقيش يا فندم الداتا بتاعة الحالات دايما بتبقي سرية.

الست: اسمي سميره، مدام، السن 40سنة، العنوان ....................

السكرتيرة: تمام يا فندم.

رجعت السكرتيرة للدكتور تاني وبعد كده خرجت وهي بتقول..

السكرتيرة: اتفصلي مدام سميره

قامت سميره وخبطت علي الباب وسمعت صوت هادي قوي بيقول

الدكتور: ادخل

سميره دخلت وشافت الدكتور كان واقف في استقبالها بابتسامة هادية وملامح وقورة..

الانطباع الاول لسميره..

دكتور في حوالي الـ40 او 45 من عمرة، في بعض الشيب في شعرة، طويل جسمه رياضي، عينيه بني بدقن خفيفة فيها بعض الشيب بردو.

الاوضة كلها بالابيض وواسعة مش عارفة عشان اللون مخليها واسعة او هي كبيرة فعلا..

لابس بدلة واضح انها غالية وقالع الجاكت وواقف بالصديري بس ومقفول..

الدكتور: اتفضلي يا مدام سميره، انا عامر محسن.. استريحي.

سميره: ميرسي يا دكتور. وقعدت..

عامر: خير يا مدام سميره، تحبي نبدأ منين؟

سميره: مش عارفة يا دكتور عامر، كنت فاكرة انك هتبدأ تسألني والكلام يجيب بعضه.

عامر: أولا ناديني عامر بس، ثانياً تحبي نتكلم وانت قاعدة علي الكرسي ولا الشيزلونج هيبقي مريح اكتر ليكي؟

سميره: لأ أفضل اني ابقي علي الكرسي.

عامر: تمام.. انا عايز اوصل بيكي لكل اللي يوصلك للهدوء النفسي.

سميره: ميرسي يا دكتور

عامر: قلنا عامر بس، عشان يبقي في نوع من التفاهم مش مجرد دكتور وحالة، عشان نبني جسر ثقة بيننا.

سميره: تمام يا عامر.

عامر: تحبي نبدأ منين؟

سميره: بجد مش عارفة.

عامر: ماشي، هبدأ انا.. هل سميره اسمك الحقيقي؟

سميره: (بإبتسامة خفيفة) لأ بس خليها سميره دلوقتي.

عامر: انا عارف اني هحتاج وقت لحد ما اوصل لثقتك الكاملة، بس مش عشان كده سألت السؤال ده، انما ده هيوصلني لسؤالي التاني الي هو.. اشمعني الاسم ده؟

سميره: معرفش اخترته علي اي اساس، بس اول اسم جه في بالي لما السكرتيرة سألتني عن اسمي، وطبعا العنوان مش عنواني الحقيقي، الحاجة الوحيدة اللي كانت صح اني مدام.

عامر: عندك حق.

سميره: تقصد ايه؟

عامر: اقصد انك ماقلتيش سنك الحقيقي.

سميره: مفيش ست بتقول سنها الحقيقي.

عامر: مفيش مشكلة بس عموما العنوان مش مشكلة اننا نعرفة، والاسم اللي اخترتيه ليه معني معين في عقلك وهنوصل ليه مع بعض، اما السن فإنت سنك 35.

سميره: (بدهشة) عرفت ازاي؟

عامر: خبرة السنين، المهم يا سميره هل انا اول طبيب نفسي تزوريه ولا كان في قبلي؟

نظرت سميره طويلاً الي نافذة الغرفة التي احتلت حائط بأكمله مطلة علي منظر رائع للنيل ليلاً..ثم قالت..

سميره: انت مش اول دكتور اروحله، انت الرابع، منهم اتنين بره مصر، ومحدش فيهم عرف يوصل لحل، هنا اتوصفلي مهدئات ومضادات اكتئاب، وبره نفس الموضوع..لأ كمان اقترحوا جلسات كهربا..

صحباتي القريبين اقترحوا عليا اروح لدجالين، شوف التخلف وصل لإيه، الدجل والشعوذة..

يتابع