مكتملة رومانسية درامية رواية همس العيون 1

[𝙷𝚄𝙻𝙺 𝙼𝙸𝙻𝙵𝙰𝚃]

رواية همس العيون




شخصيات الرواية :

إياد مواليد 81 شاب انيق حليوة قلبه طيب والكل يحبه … متخرج من كلية الشرطة ويشتغل في مركز الشرطة ادارة مكافحة الجريمة
امه مريم بوه متوفي عنده اخ اصغر منه بعامين اسمه عمار واختين تؤم سارة وسرور
نورس بنوتة قنوشة مواليد 91 تقرا طالبة في كلية الهندسة عندها اخ اكبر منها ب 6 سنين اسمه رياض و اخت اصغر منها بعام اسمها هديل بوها محمد

إياد:انزل جيبنا كابتشينو
صلاح صاحب اياد :به هات فلوس
إياد:تي خلص انت … حي ع امه خبط السيارة
صلاح:ال$#@^& خبطها وهرب
إياد:و**** اﻻ مانوريه
ولع السيارة اياد وطبق وراء السيارة اللي خبطتله سيارة العمل
صلاح:باين عليها بنت اون شفاشيفها طايرات
إياد خدي المايك تبع السيارة وقال :ياصاحبة الهوندا خودي يمين خودي يمين ..
نورس في سيارتها تلعلع ورواشن مسكرة …شن يبو شرطة النم هادونا والنبي خلي نهرب منه زي ماعلمني رياض… مافيش خير من هكي ناخدها زنق في زنق لين انريحه
صلاح :خير عمها ماوقفتش لهدرجة هازية علينا
إياد:ريتها كيف تجري الحقيرة كان مانجيبهاش مانبداش إياد
صﻻح:غريبة عادتا البنات يتمرعشو لما يسمعو بشرطي ايوقفهم

إياد:غير اصبر بش تو نوري عمها نخليها تتمرعش تبكي دم البنات مايبوش غير هكي دودات مايبوش اﻻ العفس

صلاح عبر المايك:ياصاحبة الهوندا درسي يمين

إياد:خليها خليها تو نعلق عليها تحساب روحها داريفر …

نورس تكلم ف نفسها الشكﻻت خير عمهم هادو فوتوني تره
تو انريحك غير اصبر بس …..
بتلف يمين وعلى اخر لحظة خدت ايسار
صلاح:ايواه ايواه ايوه من علمها الشي هدا
إياد:تافهة وراها وراها اليوم خبطتلي السيارة
صلاح :خود الزنقة المقابلة تطلع وراها طول

نورس:ههههههههه ضيعتهم المهبلة ووووواوووو هههههه … حي
الشيت طريق مسكرة
إياد ل صﻻح:بش قتلك تو نعلق عليها..
نزل إياد من سيارة الشرطة وجي جيهة سيارة نورس
نزلت نورس من سيارة
إياد:انتي !
نورس:إنت !

قبل 7 اشهر من هدا كله .
إياد :اها بيبي شن الجو
رهف (حبيبة إياد):تمام دودي
إياد:استحشتك سموحتي
رهف:حقا في العشية بنطلعو ل حوش خالي *** نبات غادي
إياد:عﻻش البيات
رهف:متلقطين كلنا
إياد:ﻻ مافيش مشي
رهف:حبيبيييي
إياد:خﻻص قلت ﻻ عاد
رهف:اح به خﻻص …
إياد:استحشتك رهوفة ..
رهف:حتى انا …اممم حبيبي بتجيني اليوم في الكلية
إياد:ﻻﻻ مانقدرش فيه اجتماع بعد شوية وعندي دورية بنطلع بعدين
رهف : يعني مافيهاش كيف
إياد: ﻻﻻ صعب اليوم …. كملي محاضرتك وروحي طول باهي مش تمشو مطعم انتي وصحباتك
رهف:به حاضر حبي
إياد:ساعة كم اتم هيا محاضرتك؟
رهف:من 12-2
إياد :به حبيبي ردي بالك على روحك 2 طول للحوش
رهف:ان شاء ****
إياد:سﻻم
سكر الخط اياد وحط النقال على قلبه وغمض عيونه
جاه صﻻح وقاله :إياد غطي عليا عندي طلعة عالسريع
إياد:مانيش مغطي ع حد نقعد غير ناخد ف الهزايب
صلاح:تي غير هيا ياراجل
إياد:فيه اجتماع توا
صلاح:بجديات
إياد:ايه زي النم
صلاح:عالساعة كم
إياد:توا اهو بدي يخي … نوض نوض فيسع
صلاح:نفخ ياراجل كرهت $##$& امها الخدمة اهياه
إياد:استقيل
صﻻح:ههههههه و**** كان نلقى عمل تاني مانبدى اﻻ مستقيل ..
إياد:عﻻش ؟؟
صلاح: خدمتنا زايدة يااياد ماحد معبرنا حتى لما ننزلو في الطرق يصير موقف واﻻ عركة تكلم واحد تقوله راك غالط مثﻻ يقولك انا ثاير وتو نجيب كتيبة ومش عارف شنو يسمعك كﻻم بكل
إياد: معليشي شوي شوي تو تتسقم … هي نوض خلي نمشو
صلاح:هي
طلعو إياد وصﻻح من المكتب وتوجهو لقاعة اﻻجتماعات … لقووه بادي تسللو وقعمزو بحيث ان الظابط احمد مايشوفهمش
بعد نص ساعة
ظابط احمد :سيتم ترقية إياد عمر فﻻن من رتبة مساعد ظابط اول الى رتبة ظابط نظرا لكفائته والتزامه بالعمل … يرجى منه التقدم للمنصة ﻻستﻻم شهادة تقدير
وقف اياد ومتجه للمنصة سلم على الضابط احمد واستلم شهادة التقدير
((تصفيق حار ))
ظابط احمد:وسيتم ترقية صﻻح علي فﻻن من رتبة رئيس عرفاء الى رتبة مساعد ظابط اول

رهف ل فاتن(صاحبتها): اسمعي اهو معتز جي بري انتي
فاتن:و**** واجعني إياد ايحبك وانتي عندك واحد تاني
رهف:هكي زوز خير بش اللي يصدف ويتقدم للخطبة هوا اﻻول ناخده خير ماندير صاحب واحد ويفوتني ونقعد مجروحة … هيا بري بري معاز قريب يوصل فينا
فاتن:به انا مروحة راه
رهف:باهي به باي
جي معتز قرب من رهف وقال:السﻻم عليكم
رهف:وعليكم السﻻم … كيف حالك حبيبي
معتز:تمام ياعمري شن مدايرة انتي رهف:بخير مستاحشاتك بس
معتز:وانا اكثر رهوفتي
رهف:خيرك عطلت من بكري نستنى فيك
معتز:كان عندي امتحان درته وبالي كله معاك
رهف:جاوبت حبيبي ؟
معتز:باهي الحمد *** … استحشتك

وبعد ساعة من سرد الترقيات تم اﻻجتماع والكل بارك ل إياد بالترقية
صلاح:مبارك ياظابط إياد هههههه
إياد:يبارك فيك ومبارك ليك حتى انت..
صلاح:**** يبارك فيك
إياد:و**** فرحت الحق ماتوقعتش ايرقوني الحمد *** ياربي
صلاح:حتى انا و**** ماتوقعتش
إياد:تعرف …
صلاح:شنو
إياد:حسني بنمشي ندير مفجأة ل رهوفة من بكري اتقولي تعال… ﻻزم نشاركها فرحتي
صلاح:ومن قدك ياعم ههههه
إياد:ههههه خلي نمشي عالسريع
صلاح :ستناني شوية… حتى انا بندير مفجأة لحبيبتي
إياد:ومن امتى اتحب مفجأن انت ؟
صلاح: شنو غير انت او ؟واﻻ مايطلعش علينا !
إياد:باهي غير هيا سقدني
صلاح:شوية بس نخش الحمام
إياد :به اماﻻ ، تلقاني في سيارة
صلاح:تمام ياغالي
خدي اياد مفاتيح سيارة وطلع من المكتب متجه لباب المركز وصل لساحة ركب سيارة ولعها ويستنى في صﻻح … فتح اف ام >> نسيني الدنيا نسيني العالم ذوبني حبيبي وسبني ااقولك احﻻ كﻻم ..
اتكى اياد وغمض عيونه يتخيل في رهف جنبه
بعد شوي جي صﻻح .. وركب وقال:شنو عالرومنتك يابوعبعاب
اياد:قطعتلي انساجامي

صلاح:ياروحي عالإنشجام
اياد:بهداوة بشوية ياراجل قريب قلعت باب السيارة
صلاح:بشوية عليا وانت اتكشخ سامحنا خﻻص اهو نزلت هي برا بروحك
اياد:تركب ياراجل بﻻ جو نساوين اللي ادير فيه
صلاح:به خﻻص اهو بنركب غير على خاطر ترجيتني بس
اياد:ترجيت طياح سعدك مش غير ترجيتك
صلاح:ههههههه
اياد:هههه حقا صلوحة
صلاح:اها ياغالي
اياد:احتمال العشية بنمشي انا وامي ناخدو شوي ذهب
صلاح:اووو معناها اررربت بتخطب
اياد:ايه وبالك نقولها اليوم على هالخبر الحلوو
صلاح:مبارك مقدما ^^ منسق معاها ع موعد واﻻ بطب طبان
اياد:**** يبارك فيك .. بنطب طبان ماه قلنا مفجأة خيرك ماتفهمش ف جو ههههههه
صلاح:ياسر انت تفهم ههههه
صلاح:حقا خيره الظابط احمد ماعطانيش سيارة !
اياد:تو يعطيك الصبر طيب …
صلاح:به اعفس بنزينة هي خلي نمشي للكبيدة
اياد:نستنى غير امتى نﻻقيها

ستاحشتها رهوفة

يتبع ……

الجزء الثاني من رواية همس العيون​

رهف:معتز بيبي مش مرتاحة اهنا تعال نمشو لمكانا اﻻول
معتز:خيره المكان هدا حلو
رهف:معبي ناس خاطمين ماشيين معتز :بس مكانا هداك بعيد ورجلي توجع
رهف:هيا حبوووبي تو نمشو واحدة واحدة لين نوصلو
معتز:به عسولتي نوضي هي
رهف:ياروووحي انت …عارف شن احلا حاجة في حياتي
معتز:شنووو
رهف:انت يامعتز …انحبك

***

صلاح:حطني كنهدا حتى اهنا
اياد:ﻻﻻ خلي نخششك ل كلية الزراعة بعدين نرجع العلوم
صﻻح:به تمام ..
كمل طريقه تلفت يساره لقي كلية العلوم خدي نفس عميق ادكر رهف وهوا ماشي شاف رهف مع شاب شاداته اﻻيد في اﻻيد ويتمشو
انصدم اياد من اللي شافه قدامه حبيبته اللي حبها 4 سنين
احببتكي وجعلتكي ملكة قلبي احببتكي وها انا ارى خيانتكي بعيناي التي طالما كنتي بداخلهما
.. اياد تشنج في مكانه درس سيارته
صلاح :اصبر ماتفهمش غلط بالك حد يقربلها
اياد: شن تهدر ياصﻻح كيف قريبها تشده هكي
نزل اياد ونزل وراه صلاح
رهف عايشة الدور مع معتز وماتندري عليها منين زارقة
لين جاهم اياد ووقف قدامهم …
رهف صارلها استك حبيبها اﻻول قدامها والتاني جنبها ((خاينة) هيا هادي الفئة اللي تخلي في الشباب واخدين فكرة غلط عالبنات …
اياد ماتكلمش واﻻ كلمة قعد يشوفلها باحتقار
صلاح واقف جنب اياد خايفه يدير عركة ويضرب معتز
اياد ساكت بعدين طلع سلاحه فتح تأمينة ووشده بيديه الزوز وصوب باتجاهم الزوز رهف ومعتز …
رهف خافت ولبدت وراء معتز
معتز يحسابه شرطة اﻻداب فقال :شن فيه ياخونا عﻻش موجه السلاح علينا… احنا ف مكان عام ومادرنا شي
اياد عينه تلمع بدمعة وقال:انت اسكت حتى كلمة وديني تتكلم مانبدى اﻻ معبيك رصاص تبدى زي الكسكاس …
وانتي ياحقيرة اللي ﻻبدة وراه تستغلي حبي ليك تضحكي عليا ياتافهة وتلعبي عالحبلين يلي ماتتحشميش ع وجهك !
معتز مصدوم من اللي يسمع فيه
وساكت
صلاح:فكنا من السلاح اياد ماضيعش روحك على حد مايستاهلش
اياد نزل راسه شوي و غمض عيونه ويغز في سنونه شبح لصالح وقال:اسكت صلاح اطلع منها …
شاف لرهف وكمل كلامه: وتقت فيك ياملاعبية منورة و**** منورة … وانت يادمنقل شاد ف ايدها وفرحان بيها تو اديرلك زي مادارتلي بزبط نفس السيناريو
صلاح:غير نزل سلاحك يا اياد
اياد كيف بيطلق رصاصة بعدين استدرك روحه نزل سلاحه ورده مكانه قرب منهم وقام ايده بيعطي رهف كف لكن سكر قبضة ايده وعطي بونية لمعتز وشبحلهم شبحة نص نص وتلفت عليهم ومشي

معتز تلفت لرهف وقالها :من هوا هدا وشن يقول
رهف تبكي وقالت:هدا ولد خالي هوا يبيني وانا مانبيشي
معتز :كيف يقولي تخونك زي ماخانتني
رهف:ماندريش عليه بالك يحسابني نحبه
معتز:فيه ان في الموضوع مستحيل يقول الكلام هدا من فراغ
رهف:هوا تفكيره بكل …غيور
معتز:لو انه ولد خالك زي ماانتي تقولي كنهدا راهو جبدك من شعرك وروح بيك
رهف تبكي: عﻻش مش مصدقني
معتز: انتي تلعبي …ماتقنعينيش… الراجل شفت عيونه بيدمعو ومتكطكط وتقوليلي علاش مش مصدقني … تلفت معتز على رهف وهوا شاد خده من قوة البونية وخلا رهف ومشي
رهف تنادي:معتز معتزززز ماتمشيش استنى

صلاح: بالك ..
قاطعه اياد:هاك مفاتيح برا موعدك
صلاح:ﻻﻻ اما موعد شن نخليك هكي اياد:برا ياصلاح
صلاح:تي ش….
اياد يكشخ:برا ياصلاح خيرنا… *** نقعد بروحي مش طايق حد برا
صلاح:باهي به … تو نمشي ساعة ونوليلك
مشي صلاح …وقعمز اياد على كرسي في الجامعة يشبح ل الوطى وعينه فيها دمعه موجوع من اللي صارله حس بحد حطله موس في قلبه .. قريب ينفجر متكطكط

كلية الهندسة النووية …
عادل حبيب نورس:مش عارف المهم هدا اللي صار
نورس:ماتوقعتكش هكي بأي شكل من اﻻشكال
عادل:مش مني… امي تبي اتجوزني ل بنت خالتي
نورس:وبما انك عارف ان ماتقدرش تتجوزني ﻻش مرتبط بيا واﻻ تحسابني لعبة
عادل:نحساب روحي نقدر نقنعها
نورس: نحساب روحي نقنعها … وشن طلعت انا من حساباتك
عادل:سامحيني هدا اللي صار
نورس:اللي يحرق الدم انك مش متحسر عندك عادي
عادل:به شن بندير عطيني حل
نورس:حسبي **** ونعم الوكيل فيك شخص جبان اناني
عادل:من حقك اتقولي هكي مش حنلومك
نورس:وﻻ عمري حنسامحك

مشت نورس وخلت عادل وراها ..
حب حياتها باعها تبكي وتمسح ف دموعها وتبكي وتشرق مشت من كلية الهندسة لين طلعت على كلية العلوم ورجليها معش حاملينها معش تشوف في شي قدامها وكﻻم عادل يتردد في وذانها امي بتجوزني وزني وزني… بنت خالي لي لي لي

اياد سارح ومخنوق
نورس تبكي و جاية من بداية الممر وكيف بتخطم من قدام اياد …
اياد مد رجليه وحط ايديه في جيب السروال يدور في كينكس في نفس الوقت نورس مانتبهتش ان فيه حد ماد رجليه فعثرت نورس في رجل اياد وكانت فيه حفرة قدامها خشت فيها
نورس:خيرك هكي !
اياد شبحلها اياد على جنب وقالها :انتي تمشي بﻻ عيون
نورس:فيه حد ايمد رجليه هكي
اياد:انتي الغالطة
نورس:ديما اتحطو اللوم عالبنت هيا الغالطة وهيا مش عارفة شنو
اياد انفعل زيادة عن اللزوم وكان يبي ايفش غله في اي حد:وانتو ديما اديرو في روحكم بريئات ومافيش منكم
نورس تبكي وتشوف ف اياد عادل :باه بما ان ماعندكش حس مسؤولية عﻻش ترتبط عﻻش
قداش سنة ف سنة حب وبعدين بكل وقاحة تقول امي بتجوزني ويقول فيها بكل برادة خاين …
سكتت نورس واستدركت روحها تدوي مع شخص غريب مسحت دموعها ومع هدا مازال تبكي
اياد :باهي انتي بما انك تبي اديري واحد صاحب عﻻش تكلمي فيا عﻻش اتحبي زوز في نفس الوقت عندك قلبين واﻻ كيف
نورس:انا حبيته هوا بس مافيش غيره لكنه طلع مايستهلش الحب
اياد:شفت بعيني ماحد قالي … خاينات البنات مهما ادير معاهم تنحي عيونك وتمدهم مافيش فايدة هكي بنخونك مدامك تحبني بنخونك عناد
نورس:الشباب هما اللي خاينين واحدة لتسلية و واحدة لزواج
اياد قام راسه وهو مخنوق بعبرته قالها: صدقيني البنات
نورس شبحتله على جنب ومسحت دموعها وقتله:اكيد الشباب
اياد:معش تعاندي
نورس:اصﻻ انتو ديما هكي ماتحسوش
اياد:وانتو ديما تحبو تحسو بشعور راني مطلوبة ومرغوبة ويبوني هلبا ومش ميتة على زويلك
نورس:انتو اللي تكلمو وتحبو وتهدرزو مع واحدة بعدين تمشو ل الست الوالدة وتقولولها اخطبيلي بنتجوز …باهي ﻻش اﻻرتباط
اياد :المهم البنات خاينات
نورس:والشباب كدابين و خاينين
قعدو يشبحو لبعضهم نظرة كره وحقد وكأنهم يعرفو بعض

اﻻسلكي :من صفر واحد الى صفر تسعة صفر تسعة حول …. صفر تسعة اجب
فتح اياد بطمة اﻻسلكي وقال: نعم يا صفر واحد حول
صفر 1 : صفر 9 حدد موقعك

نقال نورس ايرن مسحت دموعها وردت :الو نعم ماما … بجديات اللطف … امتى ﻻ حول وﻻقوة اﻻ ب****
مشت نورس من خلعتها بالخبر اللي قالتهولها امها مشت بخطوات سريعة نست تتأسف لشاب اللي هزباته بدون سببت كملت طريقها متجهة للبوابة

اياد ماﻻحظش ان البنت اللي يكلم فيها مشت ﻻنه يتكلم بلاسلكي وراسه مش صافي :انا ف كلية العلوم جامعة طرابلس
صفر 1 :جريمة قتل في حي اﻻكواخ توجه للمكان حاﻻ
اياد:ان شاء **** هي …
حرك موجة اﻻسلكي وقال:صلاح تجيني توا وين ماحطيتني
هناء:كلم صاحبك ياصلوحة
صلاح:فوتيه فوتيه خليني معاك توا ياحبي
اياد:صﻻح عارفك تسمع فيا

هناء:هههههه رد عليه
صلاح:ايديك ناعامات زي بشرة البيبي *** يحفظك حبوبتي

اياد يكشخ :صﻻاااااح $#@$/&&
صلاح خدي اﻻسلكي متنرفز وقال :تي باهي النهار المبارك تو نجيك عشرة دقايق بس
اياد:اتجيني توا واﻻ هات سيارة وبرا على حالك
هناء:خﻻص براله بالك يبيك ضروري
صلاح:ماعنده مايبي قاعد مصدوم بخبر حبيبته ويبي فش غله فيا … هاتي ايدك هاتي

اياد:و**** كان نجيك نقلبها على راسك ياعافن
صلاح:تي اصبر شوية خيرنا
اياد:فيه قتل في حي اﻻكواخ
صلاح:اها اوكي جايك هي …
تلفت لهناء وقالها :سموحتي مطر نمشي ردي بالك ع روحك انحبك

بعد دقيقتين جي صﻻح ل اياد نزل وعطاه المفتاح وركب جنبه
خدي اياد المفتاح وساق طلع من جامعة .
صلاح:خيرك استاكيت ف اﻻسلكي كيف حطينا اﻻيد ف اﻻيد وبنعيشو طشة غراميات
اياد:مصحك
صلاح:حقا شنو صار
اياد تنهد:في شنو
صلاح:ماتستاهلش انك تزعل عليها يا اياد
اياد:انا واجعني حالي كيف كنت نحبها زي المهبول خاينات سافلات
صلاح:*** يبعتلك بنت الحﻻل
اياد:وﻻ عمري حنوتق في بنت خاينات … اﻻولى ضحكت عليا التانية باعتني التالتة خانتني ريت ياصﻻح بش شي يوجع هدا
صلاح:و**** ماعارف شن بنقول الحق
اياد:و**** كيف بنضربها بعدين شديت ايدي ماعمريش مديت ايدي على بنت وﻻ عمري لعبت على بنت مش عارف حظي خيره هكي
صلاح:الصبر وتو تحصل بنت كويسة
اياد:قتلك مستحيل اني نحط ثقة في بنت نهاااائي
صلاح:ان شاء **** خير
اياد:حيييه عالجو بنت هزبتها
وماتأسفتش حتى منها
صلاح :بنت منو
اياد:فيه بنت ..( حكاله اللي صار )
صلاح:هههههه ياعافن فشيت غلك في البنت شن دنبها
اياد:حتى هيا واعرة حطتلي كﻻم زي السم باين عليها موجوعة احرف مني
صﻻح:اها … حي اﻻكواخ وين في حي اﻻكواخ احنا فيه
اياد:ستنى شوية ….
من صفر 9 الى صفر 1 حول
صفر 1:نعم نسمع فيك حول
اياد:انا في حي اﻻكواخ
صفر 1 :تم تم يابرو
صلاح:مش مطمن ادارتنا مايقولوش تم تم يابرو
اياد:قصدك كمين ؟
صﻻح:مش مطمن هدوء تام ف المنطقة … وخر وخر خلي نرجعو
اياد:اصبر نتصل بالعريف ايمن
صلاح:كلمه بنقالك بالك اﻻسلكي ﻻعبين بيه
اياد:قلت بنتصل انا واضحة نقال ….طلع نقاله اياد من جيبه واتصل بالعريف ايمن … خيره مايردش … افففف و**** ماناقص تبهديل اللي فيا كافيني …
ايوه السلام عليكم … ايمن ب**** فيه اي بلاغات عن جريمة قتل في حي اﻻكواخ
ايمن:لحظة نشوفلك
اياد:اوكي
ايمن:ﻻ مافيش ياحضرة الظابط
اياد:كيف ماف…
واياد ماكملش كلامه درست سيارة وطلعو شخصين منها وبدو يضربو ف رصاص على سيارة الظابط اياد..

يتبع………







درست سيارة ونزلو منها زوز شباب ملتمين وبدو يضربو ف رصاص على سيارة الظابط اياد

صلاح:يا $*،&#@ كﻻب كﻻب
اياد :طبس راسك فيسع
صلاح:تي منو هادو
اياد:مش عارف ،انزل انزل
صلاح:رصاص ياراجل وين بننزل
اياد:مايجيش نهربو منهم حيديروها تاني انزل ياراجل
صلاح:بترزني ف عمري قصدك
اياد:العمر واحد ياصلاح .
فتح الباب اياد ونزل اي مطبس وشاد سلاحه بيديه الزوز قام راسه شوية لقي شاب ملتم وتاني ﻻ ..ويضربو ب كلاشن
صلاح:بكل انت اياد ..
اياد:تي انزل
انتقل صلاح من كرسيه ل كرسي اياد ونزل من نفس باب اياد
اياد:غطي عليا بنمشي جيهة تانية وراء السور بش نقدر نضرب
صلاح :راهو عندهم كلاشن مش زينا مسدس بلجيكي
اياد:ادير اصابة رصاصة بلجيكي واﻻ ماديرش؟
صلاح:ادير
اياد:تقتل رصاصة بلجيكي واﻻ ماتقتلش ؟
صلاح:تقتل
اياد:خلاص اماﻻ حط عجينة ف فمك وغطي عليا
صلاح:باه برا هي
صلاح منحني شوي وراء سيارة وقف شوي وطلق رصاص في جيهة المتهجمين بحيث ان اياد وصل وراء السور وبمجرد ماوصل طلقو في جيهته عزقة رصاص استنى اياد اللحظة المناسبة وقت بيعبو كلاشنهم قام راسه شوي وطلق رصاصتين واحدة جت في سيارة وتانية جت
الملتم جت في صدره طاح
التاني بيشوف صاحبه المضروب طلق عليه صﻻح رصاصة جاته في بطنه وطاح ..
طلع اياد من وراء السور وصلاح من وراء سيارة واتجهو ل المتهجمين
الشاب اللي جت رصاصة ف بطنه مازال عايش طلع بلجيكي من خصره وطلق رصاصة على ظابط اياد

سالمة:باهي اللي جيتي
نورس:وينه وينه بابا
سالمة:في العناية يابنتي وووك عليا نورس:شن صارله ماما احكي …
رياض رياض خيره بابا شن عنده
رياض حط ايده على عيونه وقال:فجأة قلبه ناض عليه وفمه يطلع ف رغوة
نورس تبكي :حي علينا بابا
رياض:جلطة قال دكتور
نورس تبكي :ان شاء **** خير ياربي..

صلاح كلبش المتهجم و طبس ع اياد وقاله :اياد اياد تسمع فيا … اياد ماتموتش نوض ياراجل
اياد حل عينه وقاله:هههه ماتخافش انا بسبعة ارواح.. كلم صفر 1 ع وجه على الموجة اﻻمنة
صلاح:تم خلي نحطك ف سيارة بش نمشي بيك ….
اياد:ﻻﻻ مخنوق خليني اهنا تكيني عالسور بس
صلاح: به اياح اصلا العجلتين متع سيارة مفشوشات
اياد:غير كلم … كلم صفر 1
خدي صلاح ﻻسلكي من سيارة وقال :من دورية صفر 9 الى صفر 1 حول ….من صفر 9 الى صفر 1 حول
صفر 1 :نعم صفر 9
صلاح:ظابط دورية 09 انضرب برصاص جراء اشتباك مع زوز مسلحين ارسلي العريف ايمن مع سيارة اسعاف
صفر 1 :ياصفر 9 كيف صار اﻻشتباك
صلاح:صفر 9 مصاب بعيار ناري
صفر 1: انت المساعد صلاح
صلاح:نعم صلاح
صفر1: خليك مكانك

صلاح ل اياد:اصبر اياد
اياد ميل راسع عالجنب وبنبرة حزن شديييد قال:سبحان ****… اليوم هدا معش يبي ايتم يا صلاح … انحس ف روحي مغموم وضايع معلق في الهواء وجعتني في نص قلبي تشوف واحدة حبيتها من قلبك اتخونك مع واحد سردوك
صلاح:ماتستاهلكش يااياد فوتها خلاص
اياد:شو سهل الحكي مين اللي بيعرف ف قلب التاني شو فيه
… دمعت عين اياد
صلاح:خلاص يااياد
اياد:و**** من بكري شاد دموعي محرها ياريتها الرصاصة جت فقلبي ومتت وافتكيت
صلاح:استغفر **** ياراجل
اياد:استغفر **** العلي العظيم …
صلاح:باهي منو هدونا
اياد:الشهر اللي فات كنت طالع دورية… شديت مجرم جاي بيقتل واحد فضربته في رجليه برصاص وشديته … تقريبا هدا خوه
صلاح:بش قتلك الخدمة هادي ادره في الكبد
اياد:رسمي و****
صلاح:خلاص معش تتكلم غير امتى يجو اﻻسعاف بس…خلونا ملوحين انت والزوز هادو قريب ايموتو دمهم اتصفى
اياد:خيره الناس ماجي حد عرض علينا خدماتهم توصيل وخيره شارع فاضي
اياد:الناس بدت تخاف ياصلاح
بعد شوي وصلت سيارة اﻻسعاف خدت ايادووه…وسيارة الشرطة
خدت زوز المجرمين
اياد ولى لونه اصفر

نورس:رياض امتى يطلعو بابا
رياض: بالك غدوة العشية ان شاء ****
نورس:و**** خايفة عليه
رياض:ادعيله بس
نورس:ان شاء **** *** يشفيه ويحفظه وينجيه
رياض:ان شاء ****
نورس:راسي يوجع فيا
رياض :بالك ماتغديتيش
نورس:قاعدة هكي من عشي امس رياض:هدا باش

نورس: وووه ب**** عليك رياض تعال معاي دور اللوطي *** الحمام رياض:بري بروحك واﻻ قولي ل امي
نورس:امي مش حتتحرك من اهنا بما ان بابا ف العناية …غير هيا نخاف من حمامات العامة اوقفلي بس حتى بعيد ماتخشش
رياض:اصﻻ كيف بنخش وهوا حمام نساء يادكية …
نورس:به هيا
رياض :باهي هي

صلاح اهو :وصلنا اياد
هز راسه اياد به
المسعف:نزف هلبا صديقك عﻻش ماجبتاش ابكر
صلاح : ليه ساعة اﻻ ربع مضروب وماقدرتش نجيبه فيه مجرمين مضروبين برصاص ف شارع وعجل سيارة مفشوشة تخلطت
اياد نحى اﻻكسجين وقال:تي باهي وانت احرف من مديعين النشرة .
صلاح:ههههه
وصلو بوابة مستشفى ونفتحت سيارة اﻻسعاف .نزلوه بالبريلا
خشو بيه
وخطمو من قدام نورس
اياد شافها ابتسم ابتسامة خفيفة وغمض عيونه فقد الوعي

نورس:انهااار سود
رياض:خيرك
نورس:هدا االمضروب خششوه الشرطي
رياض:شن تخرطي !
نورس:ﻻﻻ شي
رياض:خيره الشرطي
نورس:امبكري عترت كان ماد رجله فهزبته مسكين
رياض:100 مرة نقولك معش تردي على حد… لسانك الطويل هدا يبي القص يانورس
نورس:مش مني هوا الغالط
رياض قرن حواجبه وقالها:به وكان طلع ماينفعش وسمعك كلام خامر شن بديري وقتها
نورس:مش عارفة …تعرفني فيسع نتنرفز
رياض:نتنرفز ! شدي روحك
نورس:ان شاء **** غير يسامحني بس مش ايموت و انا مهزباته
رياض:ان شاء **** خير وانتي حشيشتك الفال اﻻسود …
نورس:كان ناض براله اطمن ع..
رياض:احويلتك السودة مصح وجهك سقدينا خشي لحمام ..
سكتت نورس ومشت خشت للحمام

بعد ساعة
صلاح:شن صار يادكتور ؟
الدكتور:الحالة نزف هلبا طلعناله الرصاصة من الكتف اﻻيمن وحطيناله شكارة دم
صلاح:وامتى الخروج
الدكتور:بكرة الصبح ان شاء ****
صلاح:تمام مشكور دكتور
الدكتور:الشكر ***
مشي الدكتور وجي العريف ايمن
العريف ايمن :احكيلي شن صار حضرة المساعد
صلاح:مش عارف كيف زوز ﻻعبين ف ﻻسلكي كلمو الظابط اياد عليه وقالوله فيه جريمة قتل …كمين
ايمن:اها استغربت انا سألني و سكر عليا امبكري
ايمن:وكيف حاله الظابط اياد؟
صلاح:عطووه شكارة دم ومهدئات
ايمن:باه ان شاء **** ﻻ باس عليه
صلاح:شن صار في الزوز اللي جبناهم ؟
ايمن:واحد توفى والتاني في العناية
صلاح:سأل علينا الظابط احمد؟
ايمن:ايه وتو بنرجع ل اﻻدارة بش نعطي التقرير غادي
صﻻح:اوكي
طلع نقاله صلاح واتصل ب عمار خو اياد وقالهم عاللي صار
مع ساعة 4 وصلو عيلة اياد وخشو يطمنو عليه

رياض:هيا يمى خلي نروح بيكم
خ سالمة:ﻻ ياوليدي مانيش متحركة من اهنا
رياض:غير هيا يمى انحطكم ونرجع انا نقعد اهنا
نورس:ايه ماما وجهك اصفر وباين عليك تعبانة خلي نروحو
خ سالمة:ﻻ ياكبدي
نورس:اهو رياض بيقعد
رياض:غير هيا يمى
خ سالمة:احححح باهي وانتو اتنقو

اياد:اااااااخ يمى اخ تعبان و**** تعبان
امه:سمله عليك *** يحفظك
اياد:موجوع
سارة :ان شاء **** ﻻباس عليك

في ممر المستشفى نورس خطمت من قدام حجرة اياد وهيا ماتندريش عليه شادة في ايد امها وتشكي
نورس:ماما
خ سالمة:هاه
نورس:نحس ف روحي مغمومة
خ سالمة:بعيد السو عليك ….اااخ كلنا مغمومين يابنتي فضفضي فضفضي
نورس:اخيه ع الدنيا وخلاص مرات تصادفك حاجات تتمني لو ماصادفتيهاش

خ مريم:احكيلي شن فيه اياد..شن موجعك
اياد:موجوع من هالدنيا يمى …اللي تأمنه ع كل شي يطعنك ف ظهرك

نورس:اللي تحسابه موسى يطلع فرعون

اياد:شفت حاجة اليوم خلتني نتمنى نموت

نورس:اضايقت ماما.. توجع لما اعز الناس ايبيعك … قصدي بنت راه مش شاب

اياد:تبدى عاطيه عيونك وشاريه يهزا عليك ويفوتك

نورس:مش عارفة ماما…ممكن انا غبية ماحسبتهاش صح

اياد:اصلا انا الغالط يمى انا الغالط
وتقت ف شخص حرام فيه التقة

يتبع……..







عمار:هي يابرو بنروح بالعويلة
خ مريم:رد بالك ع روحك
اياد:ان شاء ****
سارة:بسﻻمة ايادو
اياد:سﻻم سويرا
طلعو عيلة اياد من الحجرة واياد تكى راسه على حاشية السرير ايفكر في اللي صارله اليوم من الصبح للقايلة
وبينما هوا ايفكر نقاله ايرن >> بحبك انا كثير ياحبيبي ظلك طل علي

رهف تتصل بيه سكر عليها بالحمراء وخش على الظبط نحالها النغمة اللي مخصصها … اتصلت تاني حطها في قائمة الرفض … جوه عزقة مكالمات منها انرفضو … بعدين وصله مسج ** اياد حبيبي انت فهمت غلط امبكري اللي معاي كان زميلي في الكلية انت غيور هلبا … هوا كان يبيني نحله اسئلة متع اﻻمتحان بس و**** بجد هدا اللي صار **
اياد يكلم ف روحه :كدابة كدابة حقيرة مازال عندك عين تكدبي اتفيه عليك
وحدف النقال عالحيط
على خشت صلاح للحجرة
صلاح: نحسابك وليت فالح و حاصل ع ممرضة تاريتك هبلت تدوي بروحك
اياد:فوتني ياراجل انت وين وانا وين
صلاح :ماتقوليش عالق ف نفس الموضوع
اياد:اللي يسمع ايقول الموضوع هدا ليه عام … الصبح كيف صار الموقف خيرنا
صلاح:سقيلها بالبصلة يااحبيبي ماتعطيهاش اكبر من حجمها صدقني حجمها صغيروووون هكي كبريته فقط …لو كبرته حتتعب
اياد:حاس بغصة ف قلبي
صلاح:تمشي تمشي مش اول مرة تاخد صدمة من البنات مفروض خديت مناعة قوية
اياد:مناعة هههههههه صدقت رسمي زي الفيروس
صلاح:ايه هكي اضحك ياراجل وانسى الموضوع
اياد:ان شاء **** خير …. حق ماقتلكش
صلاح: ﻻ ﻻ
اياد:البنت اللي هزبتها ف حديقة الجامعة
صلاح:ايه شنو حبيتها من اول نزرة ههههه
اياد:هههههه تي ﻻ ياعافن لقيتها ف مستشفى وقت جبتني اهنا
صلاح:ماركزتش
اياد:عارفك امقنص عالممرضات
صلاح:ههههههه و**** ماصارت شاقي بيك وانت اتقولي ممرضات
اياد:امممممبه
صلاح:ايسلم عليك ايمن وقالك ان شاء **** ﻻ باس عليك
اياد:**** ﻻ ايوريك بأس

نورس:اخخخخ تعبانة
هديل:كيف حال بابا
نورس:قالو حالته مستقرة توا
هديل:اها ان شاء **** خير وخلاص
نورس:قبل مانبيش انروح رياض ايزن هيا هيا
هديل:باهي اللب روحتو من بكري قاعدة في الحوش بروحي … تعرفي وانا مروحة لقيت واحد طرف طيار …على طول على عرض على لحية مواسية ماتفهمي شي قعدت نشوفله وهوا سحيقة وﻻ قال انشوف هههههه نورس وئ انتي يابنت
نورس:هاه
هديل:من بكري ندوي
نورس:ماسمعتكش
هديل:وين سارحة
نورس:عادل
هديل:خيره حبيب الئلب
نورس:كلب
هديل:هههههه علاش
نورس:سافل قالي امي بتجوزني هالبنية حارورة مرض ان شاء **** مايرتاح معاها
هديل:مصح وجهه خزيه ياخسارة الحب
سكتت نورس تتذكر في ذكرياتها مع عادل وكيف كانت اتحبه واتعبي في الكروت بش تتصل بيه وتاخدله في الهداية وجعها حالها

هديل :معش تبكي يانورس مايستاهلكش ماتبكيش على واحد ماقدرش قيمتك
نورس:واجعتني روحي بس كيف كنت نحبه .
هديل:نوضي نوضي خودي دوش وتوضي وصلي وتغدي وغيري جوك
نورس:ان شاء **** خير

صلاح:قول من كلمني امبكري يسأل عليك
اياد:منو
صلاح:محمد
اياد:من محمد
صلاح:الطيار ياراجل
اياد:الكابتن اوووو و**** ليه وحشة وينه معش باين
صلاح:قالي الفترة اﻻخيرة انشغلت ويتصل بيك يلقى فيك خارج التغطية … المهم يسأل عليك وقالك ان شاء **** ﻻباس
اياد:**** ﻻ ايوريه باس …به خيره ماجاش
صلاح:وقت كلمني طالع عنده رحلة لفيينا قال بعد مانروح تو نتلاقو وتبيله عاد بش ايحن علينا ونتلاقو
اياد:و**** ليه وحشة
صلاح:اي…هي ياغالي بنروح انا … هوا داك مغرب… غدوة صبح بيعطيك الدكتور خروج تو انجيك هي سﻻم
اياد:غير استنى وانت هارب لملي التلفون متاعي بتريا ف جيهة والغﻻف ف جيهة طرف طرف
صلاح:مابعده تلفونك منك
اياد:هههههه
لمله صلاح نقاله وركبه وردهوله
وروح
اتكى اياد ع السرير ومشي فيها نومة

واذن العشاء واياد مازال راقد لين صبح الصبح

نورس:هيا ماما
خ سالمة:اشبح يخششونا عالصبح واﻻ ﻻ
رياض:عندي صاحبي ف مستشفى تو يخششنا …نستنتكم ف سيارة قولها ماتعطليش هديكا المهبولة
خ سالمة :به … هيا يانورس
نورس:هيا هي واتية هاه
خ سالمة:كان نعرف شن اديري
نورس:اهو طلعت هاه

طلعو خ سالمة و نورس وركبو سيارة
وتوجهو ل المستشفى

عمار:هيا اياد
اياد: هي لحظة نخش الحمام بس
عمار:به

خ سالمة خيرها زحمة قدام السبيتار
رياض:انزلو انزلو ستنوني ف الريسبشن ندرس السيارة ونجي
خ سالمة:به
نزلو نورس و امها وخشو مستشفى
وقعمزو ف صالة اﻻنتظار

اياد:هي … شوف القجر بالك مخلي حاجة
عمار:شيكت عليهم فاضيات
اياد:به هي
اياد:باهي بشوية خيرك تجري
عمار:هههههه وراي مقابلة عمل

نورس:خلي نسأل ريسبشن ع بابا بالك يعرفو حاجة
خ سالمة :به

اياد:واخيرا وصلنا الدور اﻻرضي تعرف كل درجة نحس فيها نخصة في كتفي
عمار:واعرة ياودي *** يشفيك
اياد:شن البنت هادي زي الخبزة اليابسة تخدم اهنا واﻻ شنو
عمار:وينها
اياد:اهياه المشفشفة
عمار:ههههههه
تلفتت نورس لقت اياد عكرشت وجهها متع شنو انت طالعلي ف البخت واﻻ كيف !
اياد همسلها :ياشينة
نورس همست:ياقنين
اياد يغيض فيها وقالها:عارف روحي قنين
نورس:زي اللي حق
اياد:على كل ح…
خ سالمة:انتي يابنت …
وتعض ع شواربها
تلفتت نورس لامها ومشتلها
اياد كمل طريقه ل الباب متع المستشفى وطلع

نورس:شنو فيه ماما
خ سالمة:تحسابيني مانشبحش فيك
نورس:ع شنو
خ سالمة:تلوقني مع بو عيون زرق وتقولي شن فيه
نورس:هههه مش نلوقن معاه
خ سالمة:ومازال تكدبي ريتك بعيوي ماتقوليش خوي يخش عليا يشوفني نهدرز
نورس:ياماما ماعنديش حاجة اندسها الشاب هدا صاير موقف بينا مد رجله و انا عترت طحت هزبته
خ سالمة:به وكان شافك خوك واقفة عليه
نورس:كنت واقفة عريسبشن وبعدين رياض قتله امس ع الموقف هدا ماصار شي اكثر من اللي قلته
خ سالمة:به به انهي مطول لسانك طالعة لعمتك لسانها هكي طوله ادير الحاجة وتجي تناصي كان مازال خليتك تمشيلها
نورس:كل ماتصير حاجة عمتك عمتك

خش رياض وكلم ريسبشن ومشو التلاتة ل الحاج واطمنو عليه ومع العشية روحو بيه

بعد ستة اشهر وتﻻتة اسابيع … من عداب اياد قدر يتناسى شوي موضوع رهف وسكر موضوع البنات وماجي منه حتى الزواج قرر انه مش حيتجوز
ام بالنسبة ل نورس بكت على عادل لين قالت ياسر وبعدين دارت عزم انها معش بترتبط بكل و حطت كل همها ف مشروع تخرجها وتخرجت وبواسطة من معارف بوها اشتغلت على طول وقعدت اتزن على بوها لين وافق انها اتسوق وخلى رياض يعلمها السواقة …
رياض:خوديها واسعة واااااسعة افهمي
نورس:باهي بشوية عليا
رياض:تو عﻻش واقفة هي الطريق ليك ياغبو …. هدا طريق رئيسي والزنق طرق فرعية ماتوقفي لحد بري طبق
نورس:به …حي فيه شرطي
رياض:ماتخافيش … لما نلقى ف شرطي نهرب منه انا
نورس:عﻻش
رياض:هكي جو مطاردة متع اﻻفلام هههههه
نورس:ههههههه جو
رياض:نقعد ناخد فيها زنق ف زنق
نورس:به ديرها توا
رياض:ﻻﻻ
نورس:وراااس ريضووو
رياض:امممبه درسي هي
نورس:هي
رياض:ووووه امتى بتتعلمي ادرسي زي الناس
نورس:اهو درستها
رياض:انزلي شوفيها من برا كيف مدرستيها …انزلي
نورس :به …
نزلت نورس وقالت:حي عالجووو هههههه بعيدة على المرشبيدي بهلبا رياض:هدا اللي نتكلم عليه ياحولة اركبي هي
ركب نورس ..
رياض:ليا شهور نعلم فيك لين عييت وتعبت
نورس:معليشي ريضو
رياض:اربطي الحزام اربطي اونه شرطي ف بداية الشارع … خلي نزيد سرعة ع 240
نورس:هههههه وووووو جووووو
رياض:ههههه اونه طلع وراي
نورس:حي كما يشدنا
رياض:يشد عينك
ومشي رياض يمين يسار بين السيارات وكأنه في سباق سيارات
وخش عزنق ووراه الشرطي
نورس:هههههههههههههههه جو جو رياض
رياض:هههه ماريتي شي

الشرطي:ياصاحب الكامري خود يمين
رياض:ان شااااء **** تو ناخد يمين هي …. شوفي تعويجة اهياه
بندير روحي بنخش زنقة اليمين و على اخر لحظة خش يسار
نورس:ووووو يادرايفر قوية اهياا قوية
رياض:ريتي كيف توهته هههه كان صادفك شرطي ديري هكي
نورس:حفظته الدرس
رياض:نهارك اديريها
نورس:هههههه ان شاء **** غير بابا يشريلي سيارة
رياض:قالك سبوع جاي واﻻه
نورس:ايه
وفات السبوع وشرالها عمك محمد السيارة وصارو 7 اشهر من موقف خيانة رهف ل اياد و غدر عادل ل نورس..
في يوم بعد سبعة اشهر بتمام الساعة 8 صباحا
إياد:انزل جيبنا كابتشينو
صلاح:به هات فلوس
إياد:تي خلص انت … حي ع امه خبط السيارة
صلاح:ال$#@^& خبطها وهرب
إياد:و**** اﻻ مانوريه .
ولع السيارة اياد وطبق وراء السيارة اللي خبطتله سيارة العمل
صلاح:باين عليها بنت اون شفاشيفها طايرات
إياد خدي المايك تبع السيارة وقال :ياصاحبة الهوندا خودي يمين خودي يمين ..
نورس في سيارتها تلعلع ورواشن مسكرة …شن يبو شرطة النم هادونا والنبي خلي نهرب منه زي ماعلمني رياض… مافيش خير من هكي ناخدها زنق في زنق لين انريحه
صلاح صاحب( إياد):خير عمها ماوقفتش لهدرجة هازية علينا
إياد:ريتها كيف تجري الحقيرة كان مانجيبهاش مانبداش إياد
صلاح:غريبة عادتا البنات يتمرعشو لما يسمعو بشرطي ايوقفهم

إياد:غير اصبر بس… تو نوري عمها نخليها تتمرعش تبكي دم …البنات مايبوش اﻻ هكي…. دودات مايمشي معاهم اﻻ العفس

صلاح عبر المايك:ياصاحبة الهوندا درسي يمين

إياد:خليها خليها تو نعلق عليها تحساب روحها داريفر …

نورس تكلم ف نفسها …الشكلات خير عمهم هادو فوتوني تره
تو انريحك غير اصبر بس …..
بتلف يمين وعلى اخر لحظة خدت ايسار
صلاح:ايواه ايواه ايوه من علمها الشي هدا
إياد:تافهة.. وراها وراها اليوم خبطتلي السيارة
صلاح :خود الزنقة المقابلة تطلع وراها طول
نورس:ههههههههه ضيعتهم المهبلة ووووواوووو هههههه … حي
الزفت…الطريق مسكرة
إياد ل صلاح:بش قتلك تو نعلق عليها..
نزل إياد من سيارة الشرطة وجي جيهة سيارة نورس
نزلت نورس من سيارة
إياد:انتي !
نورس:إنت !

يتبع…….







اياد:انتي
نورس:انت
اياد يتمتم:عندك مخالفة

نورس:انت مش شرطي مرور بش اديرلي مخالفة
اياد:خبطيلي السيارة ياهانم

نورس:امتى

اياد:خبطيها وهربتي ياريتك حتى تأسفتي

نورس:مانندريش عليك انك وراي
اياد:ماسمعتينيش نقولك ياصاحبة الهوندا
نورس:ﻻﻻ ماسمعتش
اياد :به كيف الراي ف السيارة !
صلاح:اياد اياد …
اياد:انعم
صلاح:تعال الظابط احمد يبيك ضروري ع ﻻسلكي
اياد:جاي هي
اياد رجع لسيارة وخدي اﻻسلكي
ركبت نورس ف سيارتها ومن عنادها الزايد ولعت السيارة ووخرت وعطتها الشياط
اياد:و**** ماتستحي ****
صلاح:ايييه علينا خير عمها هادي
اياد سكوت تام ويغز ف سنونه
صلاح:شن قتلك
اياد:تتسهوك قتلي مانندريش عليك وراي
صلاح:تزفرت واضحة
اياد:كان نعرف من معلمها السواقة هكي
صلاح:به شنو صار ف سيارة عوضاتك واﻻ قتلك الحس ظهرك
اياد:انت ضبحت عليا هيا هربت حسستني ف فلم اجنبي النهارات
صلاح:ههههههههه سكر عليك السيمافرو
اياد:بنطلع ف اﻻحمر
صلاح:ﻻﻻ خليك اونه شدها الشنبو
اياد:وين
صلاح:اونه بداية الشارع المقابل
اياد:ههههههه صحة ليك ياشنبو

الشرطي شنبوو:مخالفة
نورس:اعلاش
اشنبوو:طالعة ف اﻻحمر وتجري هاتي اوراق سيارتك
نورس:ماكانش قصدي غير مستعجلة يبوني ف الحوش ضروري
شنبو:هاتي اوراق سيارتك
نورس:به كي…
فنص فيها شنبو وكشخ عليها :تي هاتي اﻻوراق النهار المبارك صبح يافتاح
درس جنبهم اياد ونزل و
قال:زيدها ياشنبو مخالفة فوق مخالفة السرعة وطلوع ف اﻻحمر
تلفت الشرطي ل اياد وقاله:اووو صباح الخير
اياد:صباح النور شنبو….زيدلها مخالفة اﻻخت
شبحتله نورس شبحة حقددد
واياد دارلها ابتسامة صفرا متع اهو علقتي
شنبو:شن السبب
اياد:ضربتلي السيارة قريب طريت البرافانقو
شنبو:ضاربة سيارة ضابط وهاربة ! هلبا هكي
نورس ماسمعتش كلمة ظابط وخافت من اشنبو و عيونها ولو زي سبانك بيدمعو وقف اياد ع روشن سيارة نورس وقالها : كان قعدتي ف مكانك امبكري كنت حنسامحك لكن هكي تهربي مني ع مرتين بايخة ف حقي
نورس :مش قصدي غير ف يبوني ف الحوش ضروري
اياد:توا صبح …وساعة 8:15 اكيدة طالعة من حوشكم ومتوجهة لجامعة واﻻ العمل صح كلامي ؟
نورس هزت راسها صح
اياد:به قوليلي امتى لحقو انهم يبوك ضروري ف الحوش !
نورس تفجئت من تحليلات اياد وقعدت تشبحله زي المسبوها
خبط شنبو ع سيارتها وقالها ياهاتي اوراقك ياتنزلي توا
دمعت عيون نورس وفتحت القجر سيارة ومدتله اوراق السيارة
قراهم شنبو وقالها رياض … قوليله يجيني رياض خلي نقوله ع عمايلك
رعشت نورس
شنبو ركب موطوه ومشي
اياد تلفت بيمشي ع حاله
نورس:استنى
تلفتلها اياد وقالها :نعم
نورس تبكي :ب**** عليك انا مش قصدي
اياد فباله ياكدابة دموع البنات معش يأثرو فيا
نورس فبالها سحيقة جدري والبلي فيك معقولة نبكي وماسخفتكش حتى شوية خيرهم هكي الرجالة قساة القلوب
اياد :لو انك قعدتي امبكري وماهربتيش راهو مشيتهالك لكن هكي عيب تضربي سيارة شرطة وتهربي …. باهي اللي مادرتش فيك احرف من هكي
نورس فبالها ياجيفة وكان شرطي جاي اتفحج عليا ببدلتك ..وردت عليه:خوي واعر وكان عرف باللي صار حيدير فيا البهادل

بالك يحبسني ف الحوش ويبطلني من الخدمة
اياد عقله مداير تحديرات كدابة كدابة ماتصدقش تتسحنن بش تنحيلها المخالفات ماتصدقهاش كدابة
نورس تشوف لعيونه وتقول فبالها ياودي شوره واعر مايمشيش معاه البكي خلي ندير روحي سايخة
اياد:ماعندي ماندير انتي اللي حطيتي روحك ف هيك موقف
نورس دارت روحها ساخت
اياد قعد يفرفش … ياانسة يااختي ….صلااااح صلااااح وئ
صلاح :انعم
اياد:تعال فيسع
صلاح:خيرك
اياد:البنت ساخت
جاه صلاح ورد عليه :خيرها
اياد:شنبو دارلها مخالفتين وانا زدتها التالتة

صلاح:ان شاء **** غير مايطلعش فيها السكر ياراجل رعشتها … حد يرعش هالملايكة هادي
اياد:تي اتحشم البنت سايخة وانت تكحل فيها
صلاح:به شن بندير حد يرفس النعمة
اياد:اقعد اهنا خلي نمشي محل نجيبلها اميا
صلاح:باهي … احيه يادعوة عفستلي ع رجلي خيرك اتفرفش
اياد:راك ادير فيها حاجة عارفك ماتهنيش روحك
صلاح:الخدود الحمر رايحين زي الطماطم ﻻﻻ زي التفيفيحات القنينات كان انحصل انتيشة بس
نورس فبالها نهار اسود كما يدير فيا حاجة واﻻ يمسلي خدودي عملة عممملة … اياد مفروض بعت هالمعفن وقعد هوا يعطيه دعوة حلو اسمه اياد كان اتجوزت وجبت ولد تو نسميه اياد.
صلاح :ياارض احفزي ماعليكي تي بجديات انتي سايخة
نورس فبالها ﻻﻻ انمتل الحق
صلاح :عيونك ايرمشو مع كل كلمة نقولها بالك كلماتي خشو للقلب طول
نورس تي فوووتني ياودي خلي التمتيلية تمشي ع خير …مبرد عمك
صلاح تعرفي كان مدايرتها بلعاني صاحبي مش حيرحمك قصدي كنهدا فيقي من توا خيرلك
نورس فبالها مانيش فايقة.. بكل هالسمين التحتوح ..يابطة ميحي ميحي يابطة راك اطيحي والبطة ماحت ماحت
جي اياد وقال:شنو فاقت؟
صلاح:ﻻﻻ لكن اترمش ف عيونها انحس فيها بلعاني
جي اياد وفي ايده كيسة معبيا شكاليط وعصير خدي شيشة الميا وفتحه وصب شوية ف ايده وقال ل صلاح :حنعرفو بلعاني واﻻ ﻻ

نورس شن بدير انت وياه نهاركم اسود ع دمغاتكم
بخ اياد الميا على وجه نورس فتحت عيونها وقالت :ااااااه امصقعةةةة
اياد:بالحق كنتي سايخة

واﻻ تكدبي ع امي ؟
نورس:ايه علاش بنكدب عليها امك وين نعرفها

اياد:حسيتك هكي تلعبي معاي ف غميضة
نورس تعصر ف عيونها تبي تبكي وقتله: انا اسفة مش قصدي اسفة جدا حضرة الشرطي …
خدت كينكس ومسحت دموعها وكملت كﻻمها

ب**** كلم شرطي المرور يردلي اوراقي مشغولة الحق حناي مريضة ف المستشفى وامي تعبانة على خاطر امها مريضة وانا رادة بالي من الحوش واختي الصغيرة مسكينة عندها حرارة ماشية بنجيبلها شروبو امساك قصدي حرارة

اياد:استغفر ****… امستف تستفيف تستيف ياصﻻاااح
صلاح:سبحان **** هدا ماعندهم يديرو بيه طريق للبحر
نورس: ظروفي صعبة

اياد: باهي معش تبكي عطيني ساعة وتو نجيبلك اوراقك
نورس: بالحق

اياد:ايه ~_~
نورس:وين نلقاك
اياد:اهنا بعد ساعة
نورس:ماه بنمشي العمل… قصدي بنمشي العمل بناخد اجازة و بنروح ل الحوش
اياد:وين مقر عملك
نورس:مركز البحوث النووية
اياد:تاجوراء ؟
نورس:ايه
اياد:تم تم … بعد ساعة تو نجيبلك اوراقك هاتي رقمك
نورس:علاش رقمي
ﻻسلكي:من 03 الى 09 …09 اجب
اياد:نعم يا 03
ﻻسلكي: جانا بلاغ من مشروع الهضبة مجموعة مسلحة اقتحمت شقة وسمعو رصاص احتمال فيه جريمة قتل
اياد: ارسل العريف ايمن
ﻻسلكي:ياصفر 9 اﻻدارة فاضية والبحث الجنائي ﻻ يستجيب
اياد:اوكي تو نمشي

اياد ل نورس: شنو علاش؟تحسابيني بنعاكسك ! خﻻص تو نبعتهملك مع شنبو نعطيه اوراقك ونقوله يستناك اهنا بعد ساعة….زي ماشايفة مشغول انا ومدابيا نفتك
نورس:ﻻﻻﻻﻻ هداكا متع الشناب ﻻ هاك رقمي *091201406
اياد:اوكي
نورس:مشكور و*** ايعاونك واسفة على خبطة السيارة حضرة الشرطي
اياد:الشكر ***.سﻻم …هيا صلاح
صلاح:هيا
ركبو سيارة هما الزوز وعفس بنزينا اياد متجه للهضبة

نورس:هههههه مشت عليهم جدري هالصلاح قريب كﻻني

صلاح:شن خﻻك تساعدها البنت
اياد:قتلي امي وحناي مرضى ومش عارف شنو و تحسابني مصدقها
صلاح:اماﻻ عﻻش بتساعدها
اياد:سخفتني
صلاح:قلبك طيب يادعوة
اياد:قلبي لوحته معش نبيه ﻻ طيب وﻻ واحدة تره غير شفت فيها خواتي مرات يصادفهم موقف ما … ماتدريش زي ماسعدتها *** حيبعت لخواتي من يساعدهم لو صارت حاجة لا قدر ****
صلاح:ياربي قيم عليا هلأنسان قيمه
اياد:هههه خيرك
صلاح:تي ياهمي كنت اتقول دودات مايبوش اﻻ العفس وتوا تتساهل معاها
اياد:فوته موضوع عارفها كدابة البنت ….وعلى فكرة زي الخبزة اليابسة نفسها اللي هزبتها قبل سبعة شهور كان تدكر
صلاح:اما هيا
اياد:هديكا متع جامعة ….
صلاح:ايه ايه ادكرتها
اياد:ولقيتها ف مستشفى
صلاح:شن الصدف هادي
اياد:مش عارف وباين عليها واحدة ههههت على قولت امي واحدة والزمان … لكن تو نديرلها رعشة امقومة عقوبة الهروب مني غير اصبر عليا بس

يتبع ………







وصلت نورس للعمل درست سيارتها ونزلت
وقعت دخول بالكرت وركبت لدور التاني متوجهة لمكتبها وهيا ماشية ف الممر تلاقت مع رئيس قسمها…
عبدالله:نورس متاخرة اليوم
نورس:طريق زحمة
عبدالله:اطلعي بكري
نورس:ان شاء **** .
نقال نورس ايرن
نورس :بعد ادنك استاد عبدالله
عبدالله:تفضلي
خشت لمكتبها
نورس:انقدتيني باتصالك
رتاج (زميلتها):علاش
نورس:ههههههه لقيت استاد عبدالله بيديرلي حضرة ع خاطر جاية متاخر غير انتي اتثلي فاستئدنت منه
رتاج:هههههه كلبة الفطور عليك اليوم ….
نورس:ﻻااااا يعطيه جدري
رتاج:منو …
نورس: عبدالله مقوى عينه
رتاج:علاش
نورس:بلوزتي تمزقت نهار ابيض كيف ندير تو
رتاج:ههههههههه رقعيها
نورس:تتسهوكي يامعفنة

اياد:يا 03 03 حددلي المكان
03:عمارة الكرداس الدور الرابع
اياد:وين بالزبط عمارة الكرداس
03:قبالت مركز لوزة لروايات
اياد:لوزة لوزة ايه لقيته تمام 03
صلاح:انت ظابط مفروض قاعد ف المكتب راه… مش شغلك هدا
اياد:مانحبش المكاتب هكي خير مكتب ملل نقعد ف الحوش ارجل
صلاح:حشيشتك عاد رصاص ومسدسات ومطاردة وجو
اياد:اماﻻ ﻻش خاش كلية شرطة كان *** مكتب راني خشيت كلية العلوم واﻻ الهندسة
صلاح:كله من جرايرك خش معاي كلية شرطة ندمت الحق .
اياد:قتلك في اﻻخير ع راحتك
صلاح:كداب قعدت اتنق عليا مغرر بيا
اياد:هههههههه على فكرة انت كنت بتبطل قراية وبتشتغل ف ورشة ان كنت ناسي افكرك
صلاح:ﻻﻻ كنت بنخش كلية الطيران زي محمد …وانت زي الزهاق شرتة شرتة شرتة درهتلي كبدي لين خشيت شرتة
اياد:ههههههههه قوية شرتة …انزل انزل مافيش فايدة توا من دكريات والندم
صلاح:هيا هادي عمارة الكرداس
اياد:تقريبا قالي قبالت مركز لوزة لروايات… مافيش غيرها العمارة
صلاح:به اماﻻ هيا هادي

رتاج:مقوى قلبك يابنت كيف قدرتي تهربي من شرطة !
نورس:شدني مرة اﻻولى شرطي ومرة تانية شدني شرطي مرور خدالي اوراق سيارة
رتاج:حيه عليك من ريااااض ابيقتلك اليوووم
نورس:ﻻﻻ درت الجو زعميتني سايخة ههههه
رتاج:وشن دارلك؟
نورس:مشي للمحل وصاحبه البطمة قعد يتغزل ف خدودي وانا نقول *** يستر كما يمسلي خدودي ههههههه
رتاج:ههههه كان انا راني درتها تحتي
نورس:ندير هكي خير ما رياض يقلبها عليا
رتاج:به وشن صار
نورس تحكي ل رتاج وتضحك ع كلام صلاح وتحكي ع تصرفات اياد
رتاج:يامجرمة

نورس:و**** زي مانقولك تو المهم قتله *** اوراق سيارة تسخفتله هكي درتله دمعتين وجو هههه قالي باهي
رتاج:حلووو
نورس:لكن شاكة فيه مش حيجيبهم … تعرفي انتي.. الرجال مالهمش امان كدابين منافقين مخادعين
رتاج:مش كلهم
نورس:كلهممم بدون استثناء

صلاح:شن ادف فيا قبلك انت الظابط برا قبلي انا كلي ع بعضي مساعد بس
اياد:مادفيتكش ياسحنة … حول من قدامي
صلاح:بشوية علينا
اياد:اس اس فيه صوت ف دروج العمارة
صلاح:اياد خود يمين
(طلق رصاص كثيف) من شخص مجهول تحامى اياد خلف حيط وضرب رصاص وركب يجري
ووراه صلاح … ضرب رصاص ع واحد من مجرمين جت ف رجله كلبشه صلاح والتانيين ركبو لسطح لحقهم اياد لفوق لقاهم نقزو لسطح الحوش اللي جنبه نقز وراهم و خدي ﻻسلكي وقال :صلاح انزل فيسع من العمارة المجرمين هربو من سطح العمارة تانية
صلاح :تم اهو نازل
لحقهم اياد في دروج القربطون فيه حديدة طالعة مانتبهلاش اياد فصارله جرح متوسط العمق زفي فخده
ومع هدا قعد يجري
كيف وصل اياد ل نهاية الدروج ركبو مجركين سيارتهم وهربو
صلاح جري وراهم وضرب رصاص لكن مافيش فايدة
اياد:احيييه
صلاح:جت فيك رصاصة
اياد:ﻻﻻ حديدة خشت في فخدي اييييي محرها ياراجل
صلاح:استنى نجيبلك مطهر
اياد:مش وقته خلي نركبوا فيسع نشوفو الشقة اللي كانو فيها المسلحين..
صلاح:تقدر تمشي
اياد:نقدر ايه
ركب صلاح واياد ل شقة وخشو
صلاح:استغفر **** معقولة هكي حد يقتل بدم بارد
اياد:تلاتة قتلى وتلقاه على سبب تافه
صلاح:اهواه الرابع ف دار
خدي اياد ﻻسلكي من جيبه وقال: من 09 الى 03 03 اجب
03: نعم 09
اياد:ابعت العريف ايمن وسيارة اسعاف وكلم البحث الجنائي ايجو ضروري …حول
03:يا 09 اعطينا تقرير اولي
اياد:عدد 4 ضحايا رجل خمسيني وامراة قتلو بعيار ناري نوعية كلاشن … شاب في منتصف العشرينات تقريبا تعذيب بضرب حتى الموت
الرابع شاب منتصف العشرينات مدبوح …
03:قبضت ع المجرم
اياد:قبضت على واحد واتنان هربو
03:علم يا09 يوجد اصابات ف طاقمك ؟
اياد:ﻻ شئ يذكر
03:تمام
صلاح:شن ﻻ شئ يذكر تي مفروض قتله راك خديت تعويض واﻻ حاجة
اياد:حاجة بسيطة ﻻش التعويض
صلاح:به ….اممم ياودي مش مطمن حاس انهم حيرجعو ع خاطر صاحبهم
اياد:برا انت سلمه للمركز وانا نقعد اهنا وبمجرد مايجو الاسعاف حنلحقك عالمركز
صلاح:نخليك بروحك
اياد:تي برا ياصلاح
صﻻح:ﻻﻻ فوت الموضوع حنقعد اهنا واللي بيك بيا
اياد:به ع راحتك

نورس:مصح وجهه قولي من يتصل
رتاج:منو
نورس:الحمار عادل
رتاج:بش اتجوز شن مازال يبي
نورس:بعتلي مسج …ستني … مكتوب ماقدرتش ننساك يانورس ..
رتاج:مبرده
نورس:ستني نبعتله مسج
رتاج:ههههه شن بتكتبي
نورس:اصبري…..تم اﻻرسال …كتبتله سحيقة ونار طليقة اجعنك ماتنساني وتموت بحسرتك وقت تلقاني مع واحد تاني
رتاج:يستاهل بس نحس فيك ضايعة من غيره
نورس:كلب حمار قرد معفن حبيته ااااخ لكن هكي خير افتكيت منه ولد الماما

وبعد نص ساعة جي البحث الجنائي و اﻻسعاف.. دارو ل اياد اسعافات اولية للفخد وداروله فاشة وخدت القتلى رفعتهم للمستشفى ورجع اياد للإدارة متعه حط تقرير خش لمكتبه فتح فيه دوﻻب صغيرون بدل حوايجه ولبس مدني
وقعمز ع كرسيه وحط ايديه في بعض ويفكر
خش عليه صلاح وقاله:مدني امتى بدلت !
اياد:توا ….السروال اتمزق امبكري
صلاح:به اسمع بنروح انا
اياد:علاش مازال بكري
صلاح:عندي موعد مع الكبيدة
اياد:اها به برا وارجع
صلاح:ﻻﻻ بنمشي ف مرة واحدة نروح للحوش ندوش ونبدل ونطلع موعدي بش ﻻ تقولي تعال ﻻ زمارة
اياد:ههههه حسد هدا كله ع خاطر شافني مدني
صلاح:هههههههه
اياد:حقا نسيت نقولك
صلاح:قول قول
اياد:البنت متع سيارة
صلاح:خيرها
اياد:تشتغل ف مركز البحوث
صلاح:ماتقولش النووية !
اياد:ههههه ايه
صلاح: بعد شارعين من مركزنا
اياد:صدف عمياء
صلاح:راك اتقولها انك تشتغل جنبها تعلق فيك راه
اياد:ﻻ عارف
صلاح:هي بنروووح انااا
اياد:*** نبعتك ليها
صلاح: منو
اياد:البنت تعطيها اوراقها
صلاح:تي شن حالك انت …. وقت عليا برا انت واﻻ ابعت اي حد من الوحوش اللي اهنا
اياد: خلاص تو نبعت ايمن تسهل انت وسلمنا عليها هنوو
صلاح:يوصل
طلع صلاح مشي ع حاله ..
فتح اياد الدرج بيطلع اوراق لقي ميدالية هاديتهاله رهف خداها وناض يعرج فتح الروشن وحدفها

جت ع راس صلاح
صلاح :احيه هدا شنو
قامها لقاها مكتوب عليها رهف واياد حب الى اﻻبد
قام راسه صلاح وقال :به انا شن دخلني توا ! انت يلي حدفت الميدالية

سمع اياد صوت صﻻح ف ساحة طلع من روشن
اياد:خير عمك !
صلاح: حدفتها ع راسي شن دخلني انا ف الحب الى اﻻبد
اياد:ههههههه ارفعها للكبيدة
صلاح:ﻻ ياكبدي مش ناقصني فال سو
اياد:علقها ف مفاتيحك
صلاح:هههههه ماهبلتش

خش اياد تاني وقعمز ع كرسيه يفكر ف رهف وخيانتها يدكر في هداك اليوم بتاريخ وساعة
وتتم بصوت واضح
28-3-2014 ساعة 1:15 مساء خدي البيرو وكتب ع الورقة
*انكانك خنت !
انعدك سراب وفي الغلا ماكنت …
وكيف ماعليك ابدم بارد هنت
نقدر بﻻ هم و زعل ننساك
حتى وانا واخد عليك ادمنت
نقدر ادماني نعدمه ياﻻك
ومانكمل عمري على ذكراك *
حط البيرو ايادوه … وقال : **** يقطعك يارهف ويقطع البنات معاك فعلا ﻻ تستحقو الحب …
سمع سارينة شرطة ادكر اوراق البنت
خدي نقاله واتصل بقسم الشرطة
ايوه السلام عليكم
القسم:وعليكم السلام تفضل خونا
اياد:علي اشنبو موجود؟
القسم:ايه لحظة
بعد شوي
اشنبو :ايوه منو
اياد:معاك الظابط اياد
اشنبو:مرحبا حضرة الظابط اي خدمة
اياد:مرحبا بيك.. *** اوراق سيارة البنت اللي درتلها مخالفة امبكري
اشنبو:شديت هلبا اليوم مخلفات
اياد:اللي خبطتلي السيارة
اشنبو:ايه عرفتها
اياد:تمام ابعتهملي مع اي حد
اشنبو:لوين
اياد:لمقر عملي
اشنبو:تمام عشرة دقايق بالتمام ويكونو عندك
اياد:تمام مشكور سلام

بعد ربع ساعة وصلو اﻻوراق ل مكتب اياد …
فتح كتيب السيارة لقاه ب اسم رياض محمد فلان

قام نقاله من ع طاولة وخش ع اﻻسماء واتصل ب نورس
اياد:السلام عليكم
نورس:وعليكم السلام ..شكون ؟
اياد:مقدمها كلمة شكون
نورس:به سقدني بلاش برادة من انت ؟
اياد:ماتبردتش انا …. قلت رايي حول الكلمة بس
نورس:به شن خصك فيها قديمة جديدة من العصور الوسطى
اياد:خيره اسلوبك هكي انتي
نورس:باين عليك فاضي ومكسد وانا مش فاضية ومش مكسدة
اياد:الحق مش فاضي ياام لسان وراقيك عندي تبيهم واﻻ نردهم لشرطي الشنيبات
نورس ماتوقعتش انه بيحصلهم بسرعة هادي ومحطتش فبالها انه حيكون قد كلمته ويطلعلها اوراقها
اياد:الووووو
نورس:هئ حم … نعم نعم معك مشكور بارك **** فيك
اياد:ههههههه ياسبحان **** توا كنتي تلعلي عليا كيف ولى صوتك هكي رقيق ! تصنع واضحة
نورس:مانتصنعش انا …وماكنتش نعرف انك انت …نحساب شخص غريب .. شخص غريب كيف تبيني نكلمه بترحيب يعني ؟
اياد:ومازلت بالنسبة ليك شخص غريب جمعتنا الصدف والمواقف فقط
نورس:اللي هو… اقلها مش بنيتك تتعرف …توقعت شاب يتبرد بش يقولي نتعرفو
اياد يبي يحرقلها اعصابها فقالها:شن قلتي تبي تتعرفي ؟؟
نورس:ماق…
قاطعها اياد:تعرف مرة واحدة ﻻ حول وﻻ قوة اﻻ ب**** العلي العظيم البنات بدو يطلبو ف تعارف من شباب
نورس:انت سمعت….
اياد:اسف مانتعرفش على البنات ..
نورس:بتسمعني واﻻ نسكر عليك تو
اياد:جربي سكري هي ورينا
نورس:ايه نسكر
اياد:ايه جربي …. خيرك ماسكرتيش
نورس:تحسابني مانقدرش
اياد:عارفك تقدري لكن شدي روحك بعد التسكيرة شن بيصير فيك
نورس:وشن بيصير يعني !
اياد:مش مهم تعرفي سكري وخلاص
نورس زعما نسكر زعما ﻻ امممم بالك يدير فيا حاجة امممم ياودي بﻻش عناد يانورس خودي اوراقك منه واعطيه تيرو اينطره ل انطاكيا
اياد:قاعد نستنى
نورس:عموما … وين نلقاك بش نحصل اوراقي
اياد:ﻻ مش حتلقيني
نورس:به كيف بنحصلهم
اياد:بنبعتلك اي واحد يمدهملك …
نورس:غير تواضع
اياد:عندي عمل يا ام لسان
نورس:*** ايعاونك ياحنة
اياد:شنو شن حسك قلتي ؟حنة !
نورس:ههههه سامحني و**** ماشية ف لساني بس
اياد:اها نحسابك …هي نستاذنك وتو نبعتلك شخص يرفعلك اوراقك
نورس:وين
اياد:لمركز البحوث
نورس:انا مش ف العمل ف الحوش
اياد: عارفك ف العمل قسم الطاقة
نورس:كي كيف عرفت
اياد:عندي عمل توا … نستادنك سﻻم ..
ههههه بصدفة قلت قسم الطاقة طلعت حق ف قسم الطاقة ياعليك جو
زعما منو نبعت بش يرفعلها اوراقها
مافيش خير من ايمن ثقة الولد
طلع ﻻسلكي من جاكيت وقال :
ايمن انت وين
ايمن:قاعد ف الهضبة انت بعتتني حضرة الظابط
اياد:اها اوكي
ايمن:اي اوامر
اياد:ﻻﻻ وﻻ شي اتم عملك…
حط ﻻسلكي اياد ويفكر زعما منو ..منو استغفر **** اللي تحصل فيه دبرله خلي نمشي انا وخﻻص برغم البنات معش نحب نتعامل معاهم بكل

يتبع …….






وقف اياد…. احيه احيه رجلللي اي اي اي
شن يوصلني ل لوطى …
طلع اياد من مكتبه ولقي زميله سعيد
سعيد:ان شاء **** ﻻباس
اياد:**** ﻻ ايوريك بأس … كان سئل عليا حد قوله طلع
سعيد:ان شاء ****
اياد:واي بﻻغات اتحولها عند العريف ايمن قوله يتكفل بكل شي مادورونيش بكل بنروح
سعيد:تمام حضرة الظابط

رتاج :خيرك اتفرفشي
نورس:لحقي عليا
رتاج:شنو فيه
نورس:اياد بيجيني اهنا
رتاج:من اياد
نورس:الشرطي يادنقا
رتاج:وبه بيسلم اوراقك واﻻه
نورس:قتله انا ف الحوش مشي قالي عارفك ف العمل ف قسم الطاقة
رتاج:اوووف شوره دولة …. كيف عرف هكي انك تشتغلي ف القسم هدا
نورس:عمممملة كما قصقص عليا
رتاج:وعﻻش بيقصقص شن يبي فيك
نورس:صح اي شن يبي فيا …اي اي … ناخد اوراقي وخلاص
رتاج:ايه
نورس:واﻻ نقولك …
رتاج:هاه
نورس:انتي اطلعيله
رتاج :عينك

وائل:ظابطنا كيف حالك قالو انصبت بعيار ناري
اياد:ﻻ حديدة ف القربطون خشت فيا وائل:سلامات سلامات 09
اياد:**** ﻻ ايوريك باس 03 …. بنغير الرمز بنحيه 09 كسرتلي راسي بيه
وائل:هههههههه
اياد:هي سﻻم توا
وائل:سلام
عكز اياد لين وصل لساحة المقر.. ركب سيارته ومتجه ل مركز البحوث اللي يبعد عن مقر عمله ب شارعين

نورس:غير كان جي اطلعيله انتي خير مانبيش نكون كدابة ف نظر حد قتله امبكري روحت للحوش
رتاج:افففف منك
نورس:غير هيا
رتاج تبي تنسبها ف موضوع فقتلها: غير توا ننزلو للمعمل نجيبو الحاجات وبعدين ساهل
نورس:به

درس سيارته اياد وبعد اربعة سيارات لقي سيارة نورس مدرسة قال فباله كدابة وتقول ف الحوش… مش عارف البنات علاش حشيشتهم الكدب
خش من الباب وهدرز مع الريسبشن طلع صاحب خوه عمار وقالهم صاحبة الهوندا وين مكتبها وشن اسمها قاله اسمها و وين مكتبها وخلاه يخش
ركب اياد ومافات هاادور لين خليني بونخليك رجله واجعاته …وصل للمكتب خش وقعمز يستنى فيها

نورس:هيا خديتي حاجتك واﻻه
رتاج:ايه كملت هي خلي نركبو

نورس ورتاج ركبو من المعمل تحت ووقت قريب يوصلو لمكتبهم صارت بينهم عركة ف الممر
نورس:بتقابليه ؟؟؟
رتاج:مافهمتش علاش شن سبب يعني
نورس:قتلك مانبيش نطلع في نظره كدابة بس …ﻻني قتله روحت للحوش وانا قاعدة اهنا
رتاج:انتي الغالطة الراجل بيخدمك وانتي شوفي شنو اديري وبعدين خيرك هكي حاسة بذنب انك كدبتي وكانا كدبتي يعني
نورس:شنو وكان كدبت
رتاج: حسستيني انك تعرفيه واﻻ راجلك بش تحسي باﻻحساس هدا
نورس: عارفة انه مايعنيلي شي بس انا شخصيا مانحبش نكدب ع حد وموقف امبكري كان اطراري بس .. خودي منه انتي اﻻوراق وانا تو نتأسفله بعدين
رتاج :ﻻﻻ فكيني
تعفلقت نورس من رتاج وخشت للمكتب وانصدمت ان اياد مقعمز ف المكتب
هوا يشوفلها وهيا تشوفله
نورس هرب عليها الضي تحشمت وجها ولى احمر
اياد:صباح الخير ياام لسان
نورس:مش ام لسان انا
اياد:اطول من لسانك ماريتش
نورس:يتهيألك يااياد
اياد:اياد حاف باهي قولي حتى استاذ على اﻻقل
نورس:به اعدرني يااستاد ..كيف عرفت اسمي وكيف خشيت اهنا
اياد:مش صعب اني نعرف
نورس:الدخول بالكرت
اياد:عندي كرت
نورس:بش تشتغل شرطي
اياد:ايه
نورس:اماﻻ كيف عندك كرت
اياد:مش هدا موضوعنا …. ع اساس انك ف الحوش وحناك مريضة وامك تعبانة ﻻن امها مريضة واختك مسكينة عندها حرارة
نورس:حافظ الجملة تامة ماتنساش ؟
اياد:للأسف ﻻ … وحسيت انك ف العمل واتبعت احساسي وطلع صح
نورس:باه حلو ياابو احساس
اياد دارلها نظرة انك تكدبي
نورس:به اوكي انا كدبت برغم اني مانحبش نكدب بس اطريت
وقف اياد وقرب منها وقالها :كان قتيلي طول انك تبي اوراقك هكي فقش ﻻ لفيتي وﻻ درتي فهمتي راهو خير من الفلم اللي درتيه
نورس نزلت راسها وجمرة طاحت ف اميا انحطت في موقف محرج برغم من لسانها الطويل وقوتها وجرائتها اﻻ ان النوعية هادي ماتحبش حد يضيق عليها الخناق ويحسسها ان انتي صغيروونة
اياد:عموما الكدب حبله قصير
نورس:عارفة ان حبله قصير بس انا كنت ف موقف صعب ومانبررش لروحي عارفة نفسي غالطة و اسفة ياحضرة الشرطي بجد بجد ماكانش قصدي
اياد : صار خير ومعش تهربي من شرطي انا متساهل نوعا ما بس صدقيني لو طحتي في ظابط تاني ماكانش حيرحمك
نورس:انت ظابط ؟؟؟
اياد:ايه
نورس:انهاااار ابيض
اياد:خيرك ؟
نورس:نحسابك شرطي عادي
اياد:حتى ولو درتيها لشرطي عادي كان حيبهدلك مش شكرانية ف نفسي بس قتلك بش معش اديريها تاني
نورس سكتت معش عرفت شن تقول مدلها اياد اوراقها وقالها :هي نستئذنك
نورس:مشكور بارك **** فيك وبجد اسفة على الموقف هدا وموقف الجردينة في جامعة قبل سبعة شهور
اياد:اها مادكرينيش بيه هداك اليوم كان اسوء يوم عندي نقطة سوداء في حياتي
نورس شبحت لسقف عينها فيها دمعة بسيطة وشافت لعينه وقتله: وكان اسوء يوم في حياتي فوق السواد من فوق
تنهد اياد
نورس:سلامتك
اياد: تنهدت والتنهيد قلبي ضره والرخص من بعد الغلا ماحره
نورس:تنهدت وتنهيد درته مونة من كثر الوجع قلبي زايدات اهمومه
اياد ماتوقعش ترد عليه بشتاوة فطلعلها شتاوة تانية ورد عليها : موجوع من غدر الزمان انعاني …خاني غلايا وخلاني
نورس:ماريت كيف غدره غدر قال عذره بكل مكر ماصان ﻻ غلا وﻻ ود
اياد:وديته… وعيوني عطيته بس طلع خوان مايستاهل الوديدة
شافتله نورس وعينها دمعت واياد استاجع حسها حبت بصدق و حبيبها خانها وغدر بيها زي مادارتله حبيبته فقلها : ﻻ ماتبكي هاللي ماصانك وفي الحب خانك مايستاهل البكى عليه
هزت راسها نورس ومسحت دموعها
مد ايده اياد بش يسلم عليها … مدتله ايدها نورس
اياد:كل الصدف اللي جمعتنا كانت في ظروف سيئة نوعا … على وعسى يجي يوم نلتقي بصدفة حلوة ابتسمت نورس وقتله:ان شاء ****
اياد:سلام انسة نورس
نورس:سلام استاذ اياد قصدي حضرة الظابط ..
ابتسم اياد ومشي يعكز
نورس:ان شاء **** ﻻ باس
اياد:**** يوريك بأس ..

وهوا كيف طلع من المكتب رتاج جاية من بداية الممر ابتسمتله
ماعطهاش اي اهتمام حط عيونه في الوطى وكمل طريقه يعكز

خشت رتاج للمكتب
رتاج ل نورس: طرف طرف يا نورس ريته في الممر
نورس:منو
ريتاج:مش عارفة اول مرة نشوفه ف المركز …معقولة عندنا طروف هكي واحنا مانندروش
نورس:رجله تعرج ؟
رتاج:ايه
نورس:هدا اياد
رتاج:تكدبي
نورس:و**** بجد … لقيته ف المكتب اهنا
رتاج:بش ع اساس ماتبيش تقابليه
نورس:قلنا لقيته ف المكتب من بعد نقاشنا العقيم هداكا خشيت للمكتب لقيته ف وجهي
رتاج:ياريتني وافقت اني نطلعله

….باهي شن قالك
نورس:طلع ظابط
رتاج:حي عالجووووو …طيحتيه
نورس:بري روحي شن نطيحه هادي مانفكرش ف موضوع الرجالة بكل
رتاج:ااها
نورس:قتلك ان مش اول مرة نتلاقو صح
رتاج:ﻻﻻ الصبح تلاقيتو واﻻه
نورس:ﻻ تلاقينا قبل سبعة شهور من توا صدف غريبة انا بروحي مش فاهمتها

روح اياد ل الحوش وخش لداره يفكر في نورس… معقولة فيه بنت اتحب بصدق …غريبة توقعتش الحق …

نورس وقفت عالروشن وسرحت في اياد …اوف شاب ايحب بصدق ومتوجع على حبيبته و**** تاريته مازال فيه شباب يحبو بصدق توقعت ﻻ.. امممم ..
وتم دوام نورس وروحت وقيلت ومشت اﻻمور عادية
ساعة 12 ليلا
نورس اتكلم ف رتاج ع الفايبر ومتكية على سريرها فتحت قائمة اسماء ف الفايبر لقت اياد حاط صورته قعدت تشوفلها عجبها طرف
وتشوفله وتتغزل ف حسن وجماله

صلاح:انا قاعد مستغرب من صدفك معاها …بالك هيا هادي نصيبك و*** يحط فيها قدامك
اياد:قفلته موضوع البنات وماجي منه ياصلاح … صح ماننكرش البنت ب 100 راجل حسيتها …وكان حبت تحب بصدق لكن مش ليا

هديل:شن اديري
نورس:نشوف ف صورة الظابط اللي حكيتلك عليه
هديل:تره وريني
نورس:ﻻ مافيش …. ياوخيتي محلاه
هديل:تي هاتي
نورس: لا فيش …. ياوووخيتي مسمح زوله
هديل:ياكلبة ياوريهولي يااسكتي
نورس:هههههه اماﻻ عيونه خلاص خلاص سكتت
هديل:راسليه
نورس:ﻻﻻ عيب
هديل:مدامه ينط قدامك ديما بصدفة معناها انتو لبعض
نورس:مانبيش نرتبط
هديل:انتي ماترتبطيش تعرفي عليه قبل
نورس:كان ايحب واحدة وخاناته اي ان انا بالنسبة ليه يشوف فيا زي باقي البنات
هديل:شن خلاك اتقولي هكي
نورس:زي ماانا نشوف فيه زي باقي الشباب
هديل مش شرط

صلاح :مش ضروري يااياد كان رهف خاناتك معناها حتى هادي بتخونك
مش كلهم زي بعض

هديل:معقولة بتفني عمرك على دكرى شخص ماعرفش قيمتك

صلاح:كان تسمع مني بس وتكلمها وحتى عملها قريب من مقر عملنا حتكون قدام عينك

هديل:فرصة ياغبية ظابط وطرف زي ماتقولي ماه تكلميه وتنسي ماضيك مع عادل وتبدى حياة جديدة

صلاح:انساها رهف اعفس عليها وكانها مش موجودة في قاموس حياتك …امحيها

نورس :زعما ياهديل ؟
هديل:ايه ايه ابعتيله عالفايبر شنو منو ديري روحك غالطة

اياد:هكي تقول ياصلوحة
صلاح:تي ايه ايه ابعتلها سمايل عالوتساب كيف عﻻش …خت فت دير روحك غالط
اياد:بالك تفهمني غلط نتلصق واﻻ حاجة
صلاح:تي دير زي مانقولك
اياد سكت وحط ايده ع لحيته و يفكر ف كﻻم صﻻح

نورس:بالك يحطني فباله نطيح روحي عليه
هديل:ﻻﻻ ﻻاعتقد حتى ولو انتي مش حتخلي وجهك عنده
نورس شدت خصلة شعرها وتفكر

اياد :باه تمام
نورس:به اوكي

يتبع……..






اياد:باهي باش بنتسبل شن نكتب
صلاح:ابعت نكتة
اياد:اممم ﻻﻻ فكني تو تقول نكته باياخات احسن شي نبعت رسالة عادية …
صلاح:به اكتب ياراجل اي حاجة
اياد:مساء الخير انسة نورس …
صلاح:اتقول ف مدرسة
اياد:اماﻻ نكتبلها مرحبا
صلاح:شنو ويندوز اماﻻ
اياد:مفروض سموك زقاق مش صلاح !

هديل:ارسلي هي
نورس:نرسل ملصق وخلاص
هديل :به
نورس:نرسل ملصق..متع الة الحلوة
هديل:ههههه تحسابيه عيل !
نورس:به اماﻻ ملصق الولد اهواه حلو
هديل:امتى بتتعلمي اﻻنوثة مش عارفة
نورس:به شن نرسل يادراهت الكبد

اياد:به خﻻص تو نكتبلها كل عام وانت بألف خير بمناسبة العاشوراء
صلاح:ايعيدو بيها العاشوراء ؟؟
فنص اياد ف صﻻح وقرن حواجبه
صلاح:به به اوكي يعيدو بيها تقريبا

هديل:الناس ترسل قلوب ورد حاجة معبرة
نورس:مصحك هوا مش حبيبي بش نرسله قلوب و ورد …نرسله ملصق البنت اللي قايمة ايدها
هديل:به كويس

اياد:ﻻﻻ بنفوت الموضوع
صلاح :انت دراه كبد مع مرتبة الشرف
اياد:عيب عيب نعاكس نصاص اليالي.
صلاح:دير رايك معش بندوي انا
اياد:به تو نبعتلها مساء الخير..

هديل:تي ابعتي ياحولة
نورس:بلا نقان……خﻻص اهو كتبت هاي …. هاه رسلتهاله

اياد:رسلتها

تيريرن
صلاح:فايبر متاعي ؟
اياد:ﻻﻻ متاعي اكيدة واحد من النفاخين مايطلع اﻻ وائل
فتح اياد الباسوورد
ولقي رسالة منها
اياد:رسلتلي عالفايبر
صلاح:بالك شافت رسالتك ع الوتساب بعتتلك عالفايبر
اياد:انت ياام غبي ياام تتغابى كيف نبعتلها ف تطبيق ترد عليا ف تطبيق تاني !
صلاح:قلت بالك انا
اياد:اصلا مش ردا ع كﻻمي ماكتبتش مساء النور

نورس ل هديل:بعتلي ع الواتساب
هديل:حققق شن كتبلك
نورس:مساء الخير. في نفس الوقت انا اللي بعتت فيه هوا بعتلي

صلاح:امممم قصدك ااا…
اياد:قصدي..

نورس:رسلت انا وياه

اياد:مع بعض
صلاح:و**** انتو الزوز كارثة انسانية بجديات… تي برا اخطب ياراجل شن تستنى
اياد:شن نخطب مصحك

نورس:مش مصدقة انا … ستني ستني نشوف وقت اﻻرسال امتى رسلها
هديل:اوك
نورس:في نفس الوقت ياهمي
معقولة هكي فكرنا ببعض في نفس الوقت
هديل:ايه تصير ((حقيقة ))
نورس:سبحان ****

صلاح:تعرف كيف ايادوه
اياد:عارف نرد عليها عالفايبر … زابط الجو ….

هديل:وريني صورته
نورس:ستني ….. اهواه شوفي
هديل :

_

نورس:خيرك مصدومة
هديل:قصدك فيه طروف هكي في ليبيا
نورس:ههههه اخر قطعة
هديل:اسمعي وخيتي انتي متليعة من عادل … الشباب ماينفعوش راه يلعبو بالبنات.. فوتيه فوتيه اياد واعطيني نتعرف عليه
نورس:مصحك مصحك انتهازية وصوليه

اياد : خلي نرد عليها بسمايل
نورس:كيفك ؟
اياد:تمام بخير وانتي
نورس:تمام
…صمت تااام … فقطع اياد الصمت وقال: صار امورك طيبة انسة نورس
نورس:ناديني نورس بدون انسة
ههههه مش ضروري ادكرني اني عزباء
اياد:ﻻ و**** ماقصدي هكي
نورس:عارفة نبصر بس

صلاح:شنو نروحو مدنكس راسك ف النقال تكتب وتبتسم
اياد:به به روح نتﻻقو ف العمل غدوة صﻻح:اشي صحة الوجه والرزالة ايوزع العافن
اياد:ههههههه ماه انت تدوي وهيا تهدرز مانعرفش نركز ع حاجتين يابنفوتك يابنفوتها
صلاح:المطر بتصب حسها
اياد:ايه تبشبش
صلاح:تعرف واﻻه توا نعبي كرت عشرة ونروح نخش تحت هداكا اليرغان ونكلم حوبي وندلعو بعضنا
اياد:به به بدون تفاصيل برا تصبح ع خير
صلاح:ههههه تﻻقيه

اياد يبي يحرقلها اعصابها فكتبلها:شن خلاك تراسليني …تعاكسي فيا ؟
نورس… غبارة ف شكارة يحسابني نعاكس …فكتبتله: بعتهالك بالغلط
اياد:مافيش حاجة اسمها بالغلط
نورس:جل ماﻻ يخطئ
اياد:به انتي خشيتي ع اسمي عالفايبر معناها خشيتيله بالتعني
نورس:ﻻ مش بتعني
اياد:خشيتي بتشوفي صورتي ؟
نورس اندهشت من كلامه قتله:اكيد ﻻ وعلاش التحقيقات هادي ؟
اياد:حياتي كلها تحقيقات
نورس:باهي افصل بين مجال عملك وبين حياتك الخاصة
اياد:قصدك تبي تفهميني انك انتي حياتي الخاصة ؟
نورس فبالها وووووه منك وووه انا كلبة كلمتك كككللللبة حتى انك طرف ..طرف لروحك وﻻمك وبوك انا شن *** فييييك
اياد: ؟
نورس:بس حتى انت رسلتلي عالوتس اب مساء الخير معناها تعاكس !
اياد:ﻻ ماعاكستكش … كنت فاتح الوتساب فجأة لقيتك باعثيلي عالفايبر هاي فرديت عليك بمساء الخير
نورس:تحسابني غبية ! حتى انت تعاكس غير ادير في الجو عليا ههههه
اياد:ههههه ياودي باين عليك شويطينة … اسمعي المطر اتصب شوية نخش للحوش ونكلمك … واﻻ بترقدي ؟؟
نورس:مازال فايقة
اياد:اوكي به

ومرو شهرين بينهم يحكو عالفايبر واتصاﻻت ومسجات …يصبحو ويمسو على بعض تعلق اياد ب نورس و نورس ب اياد بس كل واحد منهم مخنس من التاني من الصدمات اللي تعرضولها ف حياتهم

في يوم ما ساعة 10:45 صباحا .

اياد:قاعدة ف العمل ؟؟؟
نورس:ايه ورتاج شادة فيا تبيني نرفعها لمحلات مش خاطري الحق
اياد:بري معاها بالك تبي تاخد حاجة ضرورية
نورس:ايه.. قتلها باهي مع ساعة 12 وخلاص
اياد:كويس
نورس:شوية ونكلمك اوكي غير عندي المدير طالب نبعتله دراسة
اياد:اوكي بباي

خش صلاح للمكتب وقال : باين عليك كنت تتكلم مع نورس
اياد:ايه
صلاح:شن صار فيكم
اياد:عادي مدايرها صديقة ليا
صلاح:مافيش صداقة ف ليبيا ياحب ياجواز
اياد:ﻻ فيه
صلاح:مافيش … قول فترة تعارف ايه معاك نوافقك الراي ام صداقة ياودي مهئه
اياد: تبي الحق البنت عجبتني من ناحية افكارها وطريقة كﻻمها لكن مازال طريقة كﻻمهت وافكارها مش هدا اللي نبيه
صلاح:هههه اماﻻ شن تبي
اياد:*** افعالها …حنديرلها تست
صلاح:في شنو
اياد:نختبرها هل هيا هادي البنت اللي نكمل نتعرف عليها واﻻ ﻻ … ﻻن بنقعد نهدرز معاها هكي وبعدين تطلع فالصو مش راي الحق
صلاح:ياودي فكنا من دوة هادي
اياد:ﻻﻻ بجديات ﻻزم ندير هكي ياسر مش ف كل مرة نبدى زي الهيدوق
صﻻح:به كيف بديره التست
اياد:حتعرف ….
فتح قائمة اﻻسماء في نقاله واتصل ب عمار
اياد: الو اها عمار شج
عمار:كويس شجك مجك انتا
اياد:ماشية …. شن بنقولك … ااا نبيك هكي ف خدمة بسيطة
عمار:ان شاء **** خير
اياد:نبيك تعاكس بنت
صلاح:اكيدة هبلت انتا
عمار:هههههه كيف ؟
اياد:شن الدوشة هادي انت وين ؟
عمار:ف سوق الحوت
اياد:شن ادير غادي
عمار:انبيع ف الحوت

ايه شنو كيف بنعاكس بنت ؟؟
اياد:تعال اهنا مقر عملي وتو نقولك عمار:به شن ليا مصلحة منه موضوع نقعمز نبيع حويتاتي خير نكسبلي 70 دينار كويسات
اياد: سبحان **** ياربي تو نشريه منك الحوت ب 70 دينار وبعدين ارجع بيعهم حوتاتك
عمار:حلو مكسب خلاص تم
اياد:انتهازي درجة اولى
عمار:ههههه كيف بنعرف شكلها البنت
اياد:تو نوريهالك … المهم انت روح للحوش سمعتني روووح خود دوش ماتجينيش بحوتك وزفرتك وحلق دير لحية خفيفة…و البس احسن لبسة عندك وبخ احلا برفان
عمار:هههههه باهي عطيني ساعة هكي ونكون جيهة مقر عملك
اياد:تم تم

نورس:تعرفي رتاج … حسيت ان عقدتي اتجاه الشباب بتبدى تنحل
رتاج:عﻻش
نورس:اهو تعرفت ع اياد معناها قدرت نتخطى مرحلة عقدة عادل برغم اني مخنسة من ناحيته اياد… قلت فبالي بالك حب بصدق.. حب بصدق ووقت بتجي ع وجهي بينتقم من البنات
رتاج:تبي نصيحتي واﻻه
نورس:ايه
رتاج:معش تكلمي شخص واحد
نورس:كيف يعني
رتاج:كلمي هلبا في نفس الوقت اريحلك وخليه ينتقم واﻻ يزمر حتى احنا نعرفو ننتقمو
نورس:ﻻﻻ عينك
رتاج:و**** اريحلك يانورس ﻻ تتعقدي وﻻ واحدة
نورس:بس صعب
رتاج:ﻻ مش صعب اونه خالتي اتكلم في اربعة في نفس الوقت وواحد منهم خطبها فاتت التﻻتة التانيين اونه عرسها في نهاية شهر 1 … انتي تليعتي هلبا يانورس سادك اللي شفتيه ..اللي يكلمك كلميه وتعرفي شوفي امورك
نورس:زعما هكي تقولي
رتاج:ايه ايه
نورس:بس انا مش هكي
رتاج:كوني هكي احنا في وقت ماتعيش فيه غير الفانص معش ينفعوا المبادئ والقيم مع الشباب
نورس:مشكلتي مانقتنعش بسهولة ومشكلتك عندك طريقة اقناع فظيعة
رتاج:خلاص ديري زي ماقتلك
سكتت نورس تفكر ف هالكﻻم متع رتاج ونوعا ما عجبتها طريقة رتاج
نورس:خﻻص حنشوف

صلاح ل اياد :ﻻ اله اﻻ ****
اياد:محمد **** ****
صلاح:خيرك انت شكاك ؟؟
وقف اياد وحط ايده ع لحيته يفكر بعدين تحرك بخطوات وقعمز على الديسك طاولة المكتب
اياد:مش شك هدا ….
صلاح:اماﻻ شن يسموه
اياد:ياصلاح انا شخص كان حبيت نحب بجديات والبنات يلعبو ..ادير روحها مافيش منها ذات وصفات بعدين تلقاها حباني حباني ياحبوب … مدايرة واحد للحب واحد صرافة فلوس وتالت دلع …
في حبي اﻻول كنت صرافة فلوس زي الغبي بعدين في تانية كنت لدلع كلما اضيق بيها الدنيا تتصل بيا نواسيها ونهشك ونبشك وبعدين فاتتني وتجوزت وتالتة خيانة قدام عيني.
معش عندي ثقة ف البنات انعدمت ياصلاح افهمني … علاش بعد مانحب ونحرق دمي تطلع مش مزبوطة ماه من اﻻول اشكم القطوس واعرف راسك من رجليك واعرفها هل هيا متع تتعرف ع عزقة واللي يصدف باهي .. واﻻ ﻻ … هل هيا تحب تتعرف على شخص واحد واﻻ من نوع تكون هلبا صداقات افهمني ياصلاح تعبت انا تعبت مافيش حد فاهمني

ﻻسلكي:انا فاهمك يا 09
صلاح:مقعمز ع ﻻسلكي يسمع فيك وائل
وقف اياد بيقبم ﻻسلكي بش بيسكره فتكلم ﻻسلكي تاني :مايستاهلوش يا 09 فوت النم و**** بعد ماريت مافيش واحدة تقعد معاك ع اول فرصة زواج تفوت عمك طول… كلبات #@/&*&/#@ مرة واحدة
اياد:وراس امك ياوائل فوتني انا بروحي مش ناقص

عمار :ب**** يامحسن قيملي الحويتات مروح انا
محسن:خيرك بكري اليوم
عمار:عندي موضوع ساعتين هكي وراجع …
محسن:اوك
خدي تاكسي عمار وروح للحوش دوش وحلق لحيته دارها خفيفة وطلع من الحمام فتح دوﻻبه مالقاش وﻻ لبسة محدده مشي لدار اياد فتح دوﻻبه لقاه كل الحوايج محددات ومعلقات خدي احلا لبسة سروال جينز اكحل وسورية سماوية دخلها ف سروال ودار سبتة لبس فوقهم جاكيت اكحل وبخ برفان ولبس كندرة حلوة بلون اﻻكحل برضو من كنادر اياد
وطلع من الحوش خدي تاكسي واتجه لتاجوراء مقر عمل اياد

بعد نص ساعة

صلاح:اوووو عمار شن الجو
عمار:تمام كيف حالك انت
صلاح:بخير …شنو طارح بالجنيه كله ههه ياحارقها
عمار:ههههه لوازم المهمة
صلاح:هههههه اونه فوق اياد اركبله

نورس:قاعدة ف العمل
اياد:اها باهي .. شنو مدايرة مشيتي تسوقتي ؟
نورس:ﻻﻻ شوي تاني نكمل اللي ف ايدي وبنمشو
اياد:باهي حلو اتغيري جو ..
خش عمار ع اياد ف مكتبه اشرله اياد اسكت ماتتكلمش… هز عمار راسه اوكي
نورس:اي برغم ان رئيس قسم يقولنا معش تطلعو وتخلو مكتب فاضي
اياد:ردي بالك يديرلك لفت نظر.
نورس:هههه بنمشو عالسريع ان شاء **** مايﻻحظش
اياد:اوكي … عندي عمل وشوي تقارير ﻻزم نديرها تو نهدرزو بعدين اوكي
نورس:اوكي *** ايعاون
اياد:سلمك سلام
عمار :شن موضوع
اياد فنص في عمار وقاله :حوايجي هادو
عمار:ماه…
اياد:احوايجي ياعافن … مالقيتش اﻻ لبسة هادي
عمار:انت قتلي البس احلا لبسة ودوﻻبي كله معكرش لبست من عندك وجيتك
اياد حط ايده ف فمه من غيضه ورد عليه :تي جديدة النهار الموبارك اجديدة مالبستهاش بكل
عمار:ههههه غير خلينا ف موضوع كيف بنعاكس
اياد:مش بتعاكس ﻻنك بتعاكس وبتهدرز ﻻﻻ ياحلو بتعاكس ﻻن نبيك تعاكس وتجيبلي الدوة
عمار:اها نحسابك جايبلي واحدة
اياد: ﻻ … المهم هيا شوي تاني بتطلع باهي لحقها بسيارة
عمار:جيت بتاكسي
اياد:انت فالطة فااالطة
عمار:وين نندري انا
اياد:به تو ندبر سيارة… المهم هيا وقت بتطلع من مركز البحوث انا حنوريهالك كيف شكلها لحقها ووقت يوصلو للمحل عاكسها وكلمها واصر انها تسجل رقمك … وكان سئلاتك شن اسمك اخترع اي اسم باهي … تمام وقولها ان عندك محلات في جرابة بش تزوريني ..فهمتني ؟ على اساس انك فلوس وجو
عمار :تمام فهمت عليك
اياد:حلو ..تو نطلبلك سيارة تندرا
عمار:تندرا بجديات ؟؟
اياد:ايه ادير بيها حاجة وﻻ تخدشها و**** نقتلك ياعمار
عمار:تم تم في الحفظ والصون

اياد:ايوه العريف ايمن … ب**** شوفلي القراج فيه سيارة تندرا ؟؟ تمام تمام طلعلي واحدة في الساحة اوكي ..ﻻﻻ عالون اﻻكحل تمام سلام
عمار:مازال سؤال واحد …
اياد:شنو
عمار:علاش هدا كله
اياد:تو نهدرزو بعدين غير هيا نوض توا
نوقفو بعيد بحدا مركز البحوث وبعد ماتطلع هيا من الشارع انت لحقها بمسافة بعيدة شوية بحيث انها ماتلاحظكش
عمار :اوكين ايادوه
نزلو عمار واياد من المكتب و مشو لساحة وركبو ف التندرا وطلعو من المقر ماشيين ل مركز البحوث ودرسو بعيد شوي
بعد نص ساعة طلعو نورس ورتاج من المركز ومشو للبركيدجو

اياد:شفتها
عمار:اي
اياد: خﻻص هي خلي ننزل انا ونلبد وراء شجرة
عمار:تم تم
اياد:عندك فلوس
عمار:ﻻﻻ ماعنديش اﻻ عشرة بس
اياد:راكب تندرا وتيزتانك فاضي … هاك فلوس ماتصرف منهم شي اﻻ لضرورة … اهم طلعو وراهم فيسع
عمار :تم
مشي عمار وراهم بمسافة بعيدة

صلاح:اصلا حتى كان تعرفت من حقها
اياد:ﻻ مش من حقها
صلاح:علاش
اياد:اتكلم ف شخص علاش بتكلم غيره
صلاح:انت ماحبيتهااااش افهم
اياد:*** نتاكد بس … ﻻن كدة مرة نجيب ف دوة و اتقول انا مانعدلش عاللي يعاكسو وانا مانبيش دوة *** نشوف بعيني افعاااال فهمتني عيت من الكلام

نورس:هوا هدا السوق واﻻ
رتاج :ايه ايه
نورس:اوك انزلي هي
درس عمار جنبهم ودار روحه ماراهمش يبربش ف نقال

رتاج:وك عليا صاحب التندرا محلاه فزيييع هكي اللي بطيح طيحة واﻻ بلاش باين عليه امعبي
نورس:قداش اتعز عليا التندرا ااااخ ياكبادي خاطري فيها .. هي انزلي انزلي
نزلو هما الزوز ومشو خطوات وبعدين نزل عمار من السيارة ومشي وراهم
رتاج تلفتت وراها لقت الشاب متع التندرا فقالت ل نورس:نورس غير شوفيه الشبوب متع التندرا بيخش لسوق حتى هوا… ايهبل
تلفتت نورس وقالت ل رتاج :ياوخيتي حلاه هههه
حتى ريحة برفانه سابقاته
قرب منهم عمار وخطم من جنبهم شاف ل نورس ب نظرات حلوة وسبقهم خش لسوق
رتاج: سعدووودك يشوفلك شورك عجبتيه … كان كلمك كلميه ياكلبة

وقف عمار قدام باب السوق من داخل ووقت خشو نورس ورتاج قرب منهم عمار وقال : يامساء العسل

يتبع…..









عمار :يامساء العسل
شبحتله نورس عسريع ونزلت عيونها وكملت طريقها
لحقهم عمار ماشي وراهم وقال ل نورس :هكي نقولك مساء العسل تمشي وتخليني ؟؟
رتاج تهمس ل نورس:كلميه يادعوة
عمار:ردي عليا حتى اخﻻقيا مايجيش تفوتيني ..غير كلمنا ياحلو ..به نعاود التحية تاني… يا مساء العسسل ^^
تلفتتله نورس قارنة حواجبها وقتله:مساء البصل على راسك وحق *** كان ماتمشيش توا مانبدى اﻻ ضارباتك بشنطة
تلفتت عليه ومشت
عمار لحقها وقالها:اتعز عليا النوعية هادي شخصية قوية…عندك علم زدتي شوقتيني نتعرف عليك
رتاج:ياقردة كلمممميه
عمار:انتي حلوة وعجبتيني بجديات امي ادورلي تبي تخطبلي …
وقف قدامها عمار وكمل كﻻمه
انا مهندس وعندي محﻻت في جرابة بجديات من اول ماشفتك خشيتي خاطري
خدت يمين نورس وماعدلتش عليه خشت للمحل ووراها رتاج

رتاج:خيرك يابليدة الولد ايكلم فيك وانتي وﻻ هنا
نورس:شن *** فيه تره
رتاج:باين عليه فلوس واهو مهندس خودي الرقم بعدين فكري

صلاح:شنو خيرك اتفرفش
اياد:نموت ونعرف شن صار
صلاح:عﻻش هيا فاش اتهمك بش صديقة ؟؟
اياد:ايه صديقة بس مانبيش نخسرها كﻻمها وتفكيرها عجبني مازال افعالها
صلاح:انت بلقطتك هادي حتخسرها امتكم خوك ومدايرله صنفرة وباعته ب تندرا مواصفات ماﻻخير حلم اي بنت اكيد بتكلمه
اياد:ماه كان كلمته معناها سطحية وادور في صرافة فلوس
صلاح:ياودي راسك هدا مش عارف وين بيوصلك

رتاج:شوفي البلوزة هادي حلوة ؟
نورس:ايه
رتاج:اوك … بكم هادي
صاحب المحل :ب 30
رتاج:به اعطيهالي
صاحب المحل:اوك …
رتاج:تفضل هي … شكرا

نورس:اف باهي اللي مشي جدري
رتاج :اونه كيف طالع من محل
نورس:وووه هيا فيسع خلي نروحو
رتاج:شن قتلك انا خودي رقمه وكلميه واللي يشد يشد

وهما ماشيات جي جنبهم عمار وقال ل رتاج :كلمينا صاحبتك معقولة هكي نجري ف جرتها من بكري
نورس:امشي من اهنا باش تفهم انت ؟
عمار:قصدي عﻻش مسكرة راسك انتي
مشت نورس وخلاته
عمار ل رتاج:خيرها هادي *** نتعرف عليها بصدق انا شخص صادق جدا
رتاج: مش عارفة خيرها نستئدنك توا

مشت رتاج ل نورس ولحقهم عمار
عمار :اكتبي الرقم … تكتبي يا متعجرفة
ركبت نورس سيارتها وماعدلتش عليه. وشبحتله شبحة من فوق لتحت وسكرت الباب
ركببت رتاج سيارة وركب عمار التندرا
رتاج:ماتقوليليش خير بﻻك ؟
نورس:خيرني
رتاج:صاكة عالولد اﻻزرق
نورس:اها تبيني نتبسمله ونقوله يامرحبتين مرحبا ؟
رتاج:يجري ف جرتك وانتي فايتيه بش قتلك كان عاكسك واحد كلميه وكان كلمك كلمي خيرك
نورس: ياودي انا مش هكي مانقدرش الحق… عزقة ف نفس الوقت كيف بنركز كل شخص شن اسمه وشن يحب وشن يكره حنخلطها ونديرها عجينة ونقعد ف موقف مع كل شخص
رتاج:غبية
نورس:رتاج ! ماتكسريليش راسي عجبك بري كلميه
وخرت نورس وطلعت من بركيدجو السوق

عمار :اها اياد
اياد:ها شن صار
عمار :شن باعتني لراجل انت واﻻ كيف
اياد:عﻻش شن صار
عمار:ماعطتنيش وجه
اياد:كلماتك ؟
عمار: هزبتني
اياد:باهي شنو حسيتها من نوعية اللي تهزب بش اتقرب الشخص ليها واﻻ ﻻ
عمار:كيف ؟
اياد:ماه فيه نوعية تهزب الشاب بش يزيد يجري ف جرتها بعدين ف اﻻخير تعطيه وجه وتاخد الرقم فهمتها كيف متع انا مش هكي لكن انت شديتي فيا فبناخده الرقم وخﻻص
عمار:هههههههههه يعنجد تحليلاتك … ﻻﻻ اطمن هزبتني وماعطتنيش وجه ركبت سيارتها وعفسا بنزينة وانا قاعد وراها
اياد:حلو حلو
عمار: شنو نلحقها ؟؟
اياد:ﻻﻻ ماتلحقهاش … فوت ساعة وتعال للمقر بش تحط سيارة … المهم كمل شن قتلك
عمار حكاله اللي صار ) حالة اتقول راجل نضربك بشنطة و بصل وشبحات نص كم
اياد سرح يفكر نعم هكدا اريدها انثى معي ورجل مع باقي الرجال … نعم هكدا اريدها ان وضعتها بين 100 رجل لن تخذلني
نعم هكدا اريدها تئن وتأتيني
عمار:الووووو
اياد:اوكي اوكي منور عميرو بعد ساعة تعال
عمار:اوك سﻻم يابرو

صلاح:شنو منو
اياد:ماعدلتش ع عمار
صلاح:بجديات
اياد:ايه ههههه قالت لعمار كان ماتمشيش نضربك بشنطة
صلاح:بالك من نوعية ادير هكي بعدين ترضخ وتاخد الرقم
اياد:ههههه حتى انت نفس تفكيري لكن ﻻﻻ كشخت عليه وركبت سيارتها وطلعت من السوق
صلاح:كويس اهو صار اللي تبيه هي
اياد:ﻻ مازال التيست التاني
صلاح:شن هوا؟
اياد:هل تجيبها هدرزة ف الموضوع واﻻ ادس … كان قالت معناها واضحة واالي في قلبها ع لسانها … كان دست معناها عمار ماعجبهاش وكان حصلت واحد عجبها حتكلمه
صلاح:$#$&*#@ باهي $##*&#@ نزيدك ؟
اياد:هني روحك معش تسب
صلاح:يااياد راك تعفلق فيا بجديات ركبتلي الشك بديت غير نشك ف هناء
اياد:مش بضرورة هناء اتكون خاينة البنت اتحبك وشارياتك
صلاح:به به غير راك تاخدنا بعين

رتاج:به خيرك قالبة وجهك خلاص حاجة وصارت
نورس:و**** عكرلي جوي هالبلي
رتاج:فوتي
نورس:مازال مرة تانية تقوليلي كلمي نهارك احرف … بيني وبينك عادي لكن قدامه هكي بايخة
رتاج:ماسمعنيش هوا
نورس:الشاب هدا ماسمعكش مرة تانية شاب تاني ودانه كبار حيسمعك
رتاج:وتقوليلي انحلت عقدتك من ناحية الشباب !
نورس:انحلت لكن مش هكي بطريقة هادي… يتلصق اتقول لصقة فيران

صلاح :انا طالع توا … تبي حاجة
اياد:ماتعطلش بنبعتك ل مكان انت وايمن
صلاح:اووو شنو معش بتطلع عمل ميداني بتشدها مكاتب ؟؟
اياد:ﻻﻻ عندي صداع بس
صلاح:اوك هي تشاو

رتاج:انا اصلا عارفاتك ع اللي اسمه اياد
نورس:خيره اياد
رتاج:حاطة امل فيه انه يكون ليك حبيبتي اصحي وفيقي هدا متليع واحدة خاناته قدام عيونه مازال بيفكر ف البنات وراس امي ماحيفكر فيك يكلمك يكلمك ويميعد ويديقن بعدين يقول لامه اخطبيلي مالقيتش بنت كويسة ((حقيقة بس مش الكل))
…*رتاج عزفت عالوتر الحساس ل نورس *
نورس وجهى ولى احمر وحست بغمة في قلبها وقالت:مش على اياد انا
رتاج:ﻻ على اياد زعميتك تعلقتي بيه ومش عارفة شنو تو لما يعطيك التيرو الحزين هداكا تو تفيقي ع عمرك تو تجيني تبكي وتقوليلي كلامك صح
نورس:اسمعي انا واياد مابينا شي فاهمة… شخصين جمعتهم الصدف والمواقف … صحيح اني انميله بس مارتبطناش افهمتي
رتاج:تي انتي فتتي اﻻرتباط من غادي تصير اي حاجة طول عند اياد انا متأكدة طلعتنا هادي قلتيهاله تره قولي ﻻ
نورس:شن المشكلة وكان قتله ﻻ عيب و ﻻ حرام
رتاج:انتي جريئة وقوية لكن ماتعرفيش تكوني غامضة او صندوق مسكر ﻻزم كل شي دو دو دو دو تعاوديه مرة قريت ف كتاب اجنبي ان الرجل ايحب ايميل للأنثى الغامضة ايحب يكتشفها هادي منو وكيف اتفكر مش كتاب مفتوح اقرا ولوح حيحسك واحدة زي غيرك ((حقيقة))

نورس:رتاج هادي حياتي الخاصة نقوله مانقولاش نهدرزله نكلمه نحضنه نهرب انا وياه هدا شئ يرجعلي انا و بس
رتاج:اللي يخاف عليك تنجرحي هكي تقوليله …اوك ع راحتك
نورس :قصدي
رتاج:اوكي اوكي خﻻص نورس انهيه الموضوع وانا اسفة خايفة عليك لكن وعد مش حندخل ف شي .
ساد الصمت بينهما
ووصلو للعمل ونزلو رتاج خشت لمكتب زميلتها و نورس خشت لمكتبها قعمزت ونزلت راسها ع المكتب تفكر ف الموقف…. سحيقة خيرهم هكي الوﻻد يتلصقو معقولة هكي… وحتى رتاج زادتها خمسة الصراحة وفشيت فيها غلي اكيد حرجت مني افففف وزادتني خنس على خنسي زعما حق يعطيني تيرو اياد ويفوتني ….به كان هكي خلي نفوته انا قبل ..ونستنى نصيبي ايجي من الباب وخﻻص … انا معش بنسمح ل وﻻ شاب يلعب بيا مرة تانية انا نورس طائر حر على الميناء ..سادني تبهديل اللي كاتبه *** بيصير علاش نشقي في روحي ..
مسكينة رتاج هيا خايفة عليا ننجرح وانا بدلتها براجل …اخيه عليا وخﻻض اخيه
على اتصال اياد … ماردتش عليه .. اتصل مرة تانية دراته صامت وحطاته في الدرج

اياد واقف عالروشن يفكر …
خيرها ماتردش مش من عوايدها … عادتا حتى مشغولة تبعتلي مسج تقولي نكلمك بعدين.. شن فيه …مايكون مشت مكان تاني وعندها موعد مثلا؟؟ واﻻ زعما اكتشفت ان عمار خوي ؟؟؟ لكن منين بتعرف انه خوي
ﻻﻻ ماتحطش هالأحتماﻻت ف راسك اياد … اصبر اكيد عندها حاجة ..
بس شن هيا الحاجة نقالها ديما ف ايدها وترد عليا ف اقسى الظروف
ايش معنى توا

نورس:اها رياض
رياض:انتي ف العمل
نورس :ايه
رياض:اسمعي انا سيارتي عطلت وواحد من صحابي حطني اهنا خودي اذن من مدير واطلعي نروح بيك *** سيارتك ضروري

اياد خلي نعاودلها بالك شافت مكالمتي وماعندهاش رصيد بش تكلمني

نورس:بالك مايعطينيش ادن
رياض:ﻻﻻ يعطيك غير هيا بسرعة
نورس:ا
توت توت …نحت النقال من ودنها وشافت من خاش عليها انتظار اياد مكالمة واردة

اياد ماردتش عليا وفوق منها نتصل بيها انتظار عرفت انا … عرفت انها تلعب من وراي هه اكيدة بتقوله انا ف مكان فﻻن الفوﻻني تعاﻻلي نستنى فيك

نورس:باهي يارياض دقايق وطالعة هي
رياض:اوكي فيسع مستعجل

اياد يبكبك خزيه كلبات البنات ماينفعش فيهم انا الغالط يا$#/&/##^&^&$#@^*&$#^&’$#/&/#/&&/#@/^$#
انا الهيدوق انااا
تي قداش مرة ياكلب بيديروهالك قداش مرة قداااش المؤمن ﻻ يلذغ من نفس الجحر مرتين وانا لدغت 3 وهادي الرابعة … واااااك واك

نورس:اها رياض انت وين
رياض:ف البركيدجو
نورس:حتى انا ف بركيدجو
رياض:بحدا سيارتك ياحولة
نورس:ايه ريتك ريتك … جاية هي

اياد سكر قبضة ايده ويخبط ع الحيط وتكلم بصوت واضح خزيه خزيه يانورس
خدي نقاله واتصل تاني
فخاطرها نورس تبي ترد بس خايفة تنجرح اكثر لو كلماته تعلقت بيه ولو استمرت معاه تخاف يسيبها

اياد يفكر. احسن شي نمشي نشوف بركيدجو المركز متعها كان سيارتها موجودة معناها ف العمل و مشغولة وننسى اﻻنتظار
كان مش موجودة معناها طالعة موعد انا غبي ماخليتش عمار يلحقها

طلعو نورس ورياض من المركز ومشو ع حالهم
رياض:بنمشي ناخد طروف لسيارة
نورس:به غير حطني ف الحوش
رياض:نهدرزلك ياهبلة … خيره جوك مش هوا ؟
نورس:خلوقي ضايقات ..
رياض:اها اكيدة ضغط عمل

طلع اياد جري بخطوات واسعة وهوا يبكبك حتى اللي يكلمه مايسمعش فيه يسحن يسحن لين لقي روحه قدام مركز البحوث خش للبركيدجو ماﻻقاش سيارة
خش لريسبشن صاحب عمار
اياد:صباح الخير مهند
مهند:صباح النور كيف الحال
اياد:باهي .. انسة نورس امتى طلعت
مهند:مش عارف كنت ف الكفيتيريا … ستنى نتصل ب مكتبها
اياد:اوكي
مهند:ايوه … انسة نورس موجودة …اوكي سلام
اياد:ها شنو
مهند:واخدة اذن وطالعة
اياد:تم تم منور يامهند هي سﻻم

طلع اياد من المركز مكسور الخاطر
رجع ل المقر
قعمز ف ساحة المقر على الوطى
ويفكر … علاش هكي يانورس عﻻش بس … صح مابينا شي بس كان ف داخلي شعور ليك … تقوليلي بنطلع لسوق وراجعة لعملي عالسريع وانتي ماشية لموعد ايه مانستبعدش انها ماشية موعد …اذا كان متع حب 4 سنين خانتني ماتخونيش تعارف متع شهرين ….
سحبت فابرقت فارعدت فصبت مطر على راس اياد وهوا مقعمز ف الساحة
فاتت نص ساعة وهوا ع هالحال حس روحه غبي وهردوز هههه يضحكو عليه البنات ويفوتوه
جي صلاح يشوف ف اياد مقعمز ف ساحة قرب منه يحساب روحه غالط
قرب اكثر لقاه حق اياد فقاله:خيرك انت هبلت مقعمز تحت المطر ؟
شبحله اياد ب نظرات حزن
صلاح:خير بﻻك ؟؟ نحوك من رتبة ظابط؟؟ اتكلم … فصلوك من العمل ؟؟
اياد:كان فصلوني من العمل نمشي ندور عمل تاني ونحصل حتى سكيروتي لكن لما ينفصل القلب عن شرايينه و اوردتها كيف يصير ؟؟
صلاح:غير نوض نوض تو تمرض مقعمز ع الستاك وفوقك مطر اتصب … تي نوض … تو نهدرزو داخل
ناض اياد مع صﻻح وخشو داخل

هديل:خيرك امبومة
اتكت نورس ع كتف هديل وقتلها :تعبت ياهديل تعبت علاش مايجينيش واحد طول يخطبني ونتجوز ونفتك من مشاعري الزايدة علاقة وحب ودوة فاضية
هديل:علاش انتي حبيتي اياد ،؟؟
نورس:ماحبيتاش لكن تعلقت بيه وشن بعد التعلق غير انه يفوتني
هديل:علاش من قالك بيفوتك
نورس:واضحة ياهديل زي مادرالي عادل باعني
هديل:عادل عادل عادل فوتي عمه البلي هدا … بش قلنا بنحطوه ورانا ونفوتوه خيرك هكي
نورس:مخنسة من ناحيا اياد مخنسة مش حيوتق فيا افهميني نضيع غير في وقتي معاه وخلاص
هديل:زعما ؟
نورس:ايه
هديل:جربتي تسئليه ان مثﻻ هل حيجي يوم وتخليني ؟؟
نورس:مش انا اللي نسئل سؤال زي هدا … مش انا ياهديل … مانحبش نبان ف لحظة ضعف من فقدان رجل …صدقيني هكي حيهزا عليا … عمرك ماتبيني لشاب انك انت منقدي واملي الوحيد
(حقيقة خودو بيها يابنات النصيحة هادي هههه نصايح بالبلاش)
هديل: باهي كيف بديري يانورس
نورس:حنفوته اياد

اياد:فتتها خﻻص
صلاح:علاش شن صار

هديل:عيب عليك بالك الولد حاس بشعور اتجاهك
نورس:ﻻ شعور وﻻ واحدة
هديل:ﻻﻻ نورس انتي مش هكي .. ردي بالك ﻻنك لو تهربتي من اياد وفوتيه من غير ماتقوليله صدقيني حيكون عادل خير منك بهلبا اقلها قالك وفهمك وماخﻻكش تتصلي بيه ومايردش او ماخلاكش تجري ف جرته

صلاح:اممممم ماحطيتش فبالك ان صارتلها حاجة
اياد: ماعندها مايصيرلها نقالها انتظار و واخدة اذن وطالعة والحياة حلوة نتصل بيها ماتردش شن مازال؟؟ انا طرطور هفك هردوز هوا هدا هكي معناها
صلاح:اسمعني
اياد:انا يضحكو عليا قلبي طيب شوره نصدق اللي يجي
صلاح:اسمعني بس
اياد:ماعندي مانسمع فوتني ياصﻻح وراااااس امك وراس اممممك فوتني
صلاح:تي اسمع … مايحقلكش تحكم عليها من غير ماتسمع منها
اياد:اها ﻻزم نشوف بعيوني زي ماصارلي ف رهف…هه اسف مش حمل صدمات انا تعبت

هديل:انتي يا اما حمارة ياتتحومري
نورس:علاش
هديل:كلميه وفهميه انك معش تبي تستمري معاه
نورس:صعب عليا
هديل:معناها اياد ولى جزء من حياتك

صلاح:به انت بش قتلي مرحلة تعارف عﻻش داير ف روحك هكي
خلاص هدا اللي كنت تبيه من التيست واﻻه وهادي النتيجة تم
اياد:مش عارف
صلاح:معناها انت ملتلها نورس وتبيها
اياد:ماتقنعنيش انه حب
صلاح: عﻻش ﻻ ؟
اياد:حب ف شهرين !
صلاح :ان شاء **** يوم ولد عمي حب ف يومين وخطبها ف تالت يوم..
شهرين راهو اللي هازي عليهم يطلعو 60 يوم و 1440 ساعة من غير الدقايق وثواني شوف قداش مرة فكرت فيها

هديل:كلميه يا نورس خير ماتخسريه
سببك مش مقنع انك تخليه ع خاطر حسيتي انه حيجي يوم ويسيبك

صلاح:اسمع منها قبل ماتحكم عليها
مرات ظالمها

نورس:تو نكلمه بعدين ونقوله..توا هوا اكيد مشغول بالعمل ومش فاضي ..خلي ف الليل نكلمه ونوضحله ان مش ﻻزم نتواصلو مع بعض

اياد:مش حنتصل بيها بكل ياصلاح … كان اتصلت احتمال نرد اخطى من هكي سليمتها.

ومر الوقت رزييين على نورس واياد هي تفكر فيه وهو يفكر فيها …
اياد يفكر هاه فاتتني المعفنة
ونورس توحوح كيف بنقوله ..
وتستنى ف الليل بش تقوله كل شخص ف طريق

اياد:كنت دايرك غير البنات … نتحدا الناس وعيني ف عينهم نقولهم هادي غيرهم

نورس:موش بيديا ﻻزم نفترق ياعزيز عليا نتوجع شوي وننسى… خير ماتجيني وجيعة اكبر ومانقدر ننسى

وليل الليل روح اياد خدي دوش وخش لداره اتكى ع سريره يشوف لنقاله مايلقاش ف مكالمات خش ع الفايبر مالقهاش موجودة
حس ان فيه شئ ما ناقصه …
نورس غسلت مواعين العشاء وخشت لدارها واتكت ع سريرها قامت نقالها بتتصل بعدين حطاته بعدين قاماته تاني وخشت ع سجل مكالمات وبتتصل ب اياد
اتصلت بيه و …

يتبع ……….









اتصلت نورس ب اياد
اياد شاف نقاله ماباش يرد
نورس اتمتم خيره مايردش خلي نعاودله
خدي نقاله اياد ورد :نعم
نورس:اهلين كيف الحال
اياد:من **** بخير
نورس:انا عارفة على خاطر مارديتش عليك
اياد:وين كنتي اليوم ووين مشيتي بعد السوق
نورس ادكرت كلام رتاج ع الكتاب المفتوح وانها ﻻزم تكون غامضة
اياد:نكلم فيك خيرك ساكتة وين كنتي
نورس:بنقولك حاجة
اياد يفكر هه اكيدة بتكدب وتفنتي عليا رد عليها:قولي هي
نورس:انا .. انا
اياد :تي تكلمي …. عارف اانا عارف
نورس:شن عارف
اياد:عارف وخلاص … عموما …
نورس:شن عارف احكي
اياد:اطمني مش حنلومك هادي حياتك بس مفروض انك من بداية قتيلي
نورس فبالها .. كيف عرف اني بنقوله كل واحد ف طريق … زعما قتله هديل !
اياد: زابط حظي كرنب يانورس كل مانقول اهو تعدلت اﻻمور تصير حاجة تقلب الموازين كلها.
استغربت نورس من كلام اياد حست انه يعني شئ ما معناها هوا مايبيش يخليها زي ما هيا حاطة فبالها ..وظلت ساكتة تسمع منه

اياد:مش عارف فركستيني بلقطاتك وكدبك عليا برغم انك عارفة اني مانحبش الكدب

نورس:علاش ؟؟فاش كدبت عليك ؟
اياد:خﻻص ماينفعش الكﻻم توا المهم نستئذنك توا
نورس:فاش واجهني وقولي فاش كدبت !
اياد:كدبتي عليا…. وقتيلي ماشية السوق ممكن مشيتي مش هدا موضوعنا …اللي كدبتي فيه انك قلتي بنمشي عالسريع ونرجع للعمل
نورس:غير اس…
وقف اياد جنب دوﻻبه ويخبط عليه ويكشخ:خليني انكمل دوووتي …قلتي بنمشي عسريع وبنرجع للعمل وانتي واخدة اذن وطالعة مرة واحدة وﻻ ووقت نتصل ماترديش قلنا هيا يااياد بالك البنت مشغولة نزيد نعاود انتظار …انتظار ياهانم
طبينا ع مكان عملك قالولي ﻻ واخدة اذن وطالعة وتبيني مانقولش كدبتي عليا انا هيدوق لاقيتيني متليع تقولي هيا اهو متليع خلي نكلمه ونهدرز تو يكبد عليا فيسع
نورس تفكر برغم انه يكشخ عليا اﻻ ان واضح انه مهتم بيا خلاص مافيش داعي نقوله كل شخص ف طريق

اياد: الوووو
نورس:كيف تكلمني بطريقة هادي كييف ؟ اتكدب فيا وتقصقص وراي ف مكان عملي شن اللي ادير فيه هدا؟؟ شن بيقولو عليا واحد جاي يسئل وراها
اياد:نورس ماتغيريش الموضوع خلينا من تفاصيل التفتف هادي وقوليلي وين كنتي !
نزرس:شن تسئل فيا بط…
اياد يكشخ:تي وين كنتي
نورس:اياد معش تعلي صوتك … ماكدبتش عليك … وبرغم ان ماليكش الحق تحاسبني وين ماشية ووين جاية لكن حنقولك ﻻن مانحبش نبان ف حلقت الكدب … مشيت لسوق و((حكتله موقف عمار))
اياد:اها وكيف صاحبتك اتقولك ديري هكي … خلينا منه موضوع صاحبتك تو نتناقشو فيه… كملي به
نورس:خلاص المهم رجعت للعمل انت اتصلت بيا مارديتش كنت ف الحمام حشاك … وقت رجعت للمكتب لقيت رياض يتصل رديت عليه في هديكا اللحظة انت خشيت انتظار ((حكتله موقف رياض وسيارة ))
اياد:به جيتك للعمل وقالولي واخدة اذن
نورس:الريسبشن ؟؟
اياد:ايه
نورس:انا طلعت والشاب اللي ف الريسبشن مهناش وبعدين مافيش حد يعرف اني خديت اذن اﻻ رتاج
اياد:الريسبشن كلم مكتبك !
نورس:خلاص معناها ردت رتاج على الريسبشن ﻻن مكتب مافيشي حد اﻻ انا وياها
فرح اياد وكل شكوكه زالت
نورس:تصبح ع خير
اياد:علاش
نورس:انت كدبتني يااياد وقصقصت وراي وانا مانحبش هكي الحق … تحاسب فيا اتقول زوجتك
اياد:ﻻﻻ مش هكي امبكري من كثر مانسحن ماقدرتش نشد روحي قلت ﻻزم نمشيلها ف العمل بما انها ماتردش… مالقيتش سيارتك ف البركيدجو ﻻ اراديا لقيت روحي خاش لريسبشن
تنهدت نورس وحست ان فيه شخص مهتم بيها

اياد:حق قوليلي اما صاحبة هادي اللي ادف صاحبتها بش تاخد رقم شاب وتبيها تكلم هلبا ف نفس الوقت
نورس:هيا خايفة عليا
اياد :من شنو خايفة عليك
نورس:من انك تف….
استدركت نفسها نورس قريب قتله انك تفوتني..
اياد :من انك شنو
نورس:مش قصدي من انك ﻻﻻ من ان تفوت عليا الفرصة ونقعد وحدانية من غير حبيب
اياد:مش صاحبة هادي …. حتى لما لقيتها ف الممر متع المركز قبل شهرين حسيت شبحاتها مش نظيفة سامحيني فيها الكلمة هادي لكن بجديات قعدت تشبحلي لين انا اتلكمست ونزلت راسي
نورس:عيب اياد معش تقول عليها هكي مهما كان صاحبتي
اياد:امعش اتقولي صاحبتي
نورس:صاحبتي
اياد:مش صاحبتك انتي مش زيها !
نورس:حتى وان اختلفت اﻻراء بينا
اياد:به امتى عرفتيها ؟
نورس:من اول ماشتغلت ف المركز قبل 8 شهور
اياد:هادي زميلة عمل ياحلوة … توا انا عندي صاحبي صلاح معاي من كنت ف العدادي يعرف عليا كل شي.. و وائل نعرفه من وقت خدمت ف الشرطة يعني زميلي مانحكيله ف شي شوفي اهو ليا 10 سنين نشتغل ف شرطة ومع هدا مانعتبراشي صاحبي
نورس:انا مش صغيرة يااياد نزبط الصح وين والغلط وين … مش حتأثر عليا في شي
اياد:باه لكن ردي بالك
نورس:ان شاء ****
اياد:صار هكي يعاكس فيك واحد
نورس:بكل سحيقة الملح درهلي كبدي يااياد وعكرلي مزاجي ورتاج زادتني خمسة

مر هالموقف ع خير
ومرو ثلاتة شهور
فوق هالشهرين ولو خمس شهور
يوم الثلاتاء الساعة 10 صباحا

نورس ل هديل:خايفة انه مايبادلنيش نفس الشعور
هديل:نفهم من كلامك انك حبيتيه
نورس:مش مني الولد اهتمام زيادة عن اللزوم وكان مرضت شوي شوي تلقيه متصل يطمن عليا يخاف عليا هلبا
هديل:بالك حتى هوا يبيك ويحبك
نورس:المشكلة انه ماقالش

وفي نفس الوقت مانقدرش نقوله ان فيه شعور اتجاهك
هديل:علاش شن السبب
نورس:مصحك هديل كيف تبيني نقول ل شاب اني نبيك
هديل:به به *** نرقد توا
نورس:بترقدي من توااااا ؟؟ مازال بكري ساعة 9
هديل:و**** تعبانة من الفجر مارقدتش لتوا
نورس:به ارقدي هي تو نتصل ب اياد نهدرز عليه

صلاح:تي هيا ياراجل بنروح
اياد:تي اصبر النم *** ناخدلها جبة قنينة
صلاح:من قال بتلبس جبب تو هي !
اياد:مش جبة تامة جبة تلت رباع هكي حلوة
صلاح:قتلها انك تبيها ؟؟

نقال اياد يرن >>في عيونك لغز واسرار ف عيونك رحلة ومشوار
اياد:اهي تتصل …. ايوه السلام عليكم
نورس:وعليكم السلام شن الجوو
اياد:تمام بخير شن جوك انتي
نورس:كويسة
اياد:نورس انا قاعد ف مكان زحمة شوي انتم اموري ونكلمك
نورس:اوكي
اياد: مش ترقدي
نورس:ﻻﻻ فايقة
اياد:اوكي سلام

صلاح:خود اهياه
اياد:ﻻااا منظرها متع عزايز
صلاح:و**** حيرتني
اياد:*** ناخدهالها جبة اتكون نازكة ولون حلو
صلاح:امممم شن رايك في هادي
اياد:بالزبط حلوووة و**** عندك ذوق ياصلوحة … بكم هادي ياخونا
صاحب المحل :125
اياد:اوكي لفهالي
صلاح:بجديات بتاخدهالها ب 125 ؟
اياد:شن المشكلة
صلاح:ﻻ مافيش مشاكل بعدين قولي انا صرافة فلوس ومش عارف شن هوا
اياد:هادي هدية عيد ميلاادها وطالعة من طيبة خاطري مش هيا قتلي جيبلي وجيب و**** مصدوم لتوا ماطلبتش مني حتى طلب حتى وقت يكون ماعندهاش رصيد ماتقوليش حولي دينار
صلاح:امممم به هيا مستعجل عندي مبارة بنحضرها
اياد:خﻻص كملت هاه …
طلع فلوس اياد خلص صاحب المحل وخدي الكيسة منه وشكر صاحب المحل وطلع
صلاح:هناء تغيرت عليا يااياد
اياد:عﻻش شن السبب
صلاح:مش عارف … ف اﻻول قتلي جاني عريس ونبي نرفضه ع خاطرك وبعدها ب ايام تغيرت معادش تتصل ﻻ ترن ﻻ شي حتى نتصل بيها تقولي مش فاضية توا
اياد:بالك صايرلها ظغط من اماليها يبوها توافق
صلاح:مش عارف ان شاء **** خير وخلاص… برغم اني حاس انها بديرلي صابونة وبتوافق ع العريس

ركبو سيارة وحط اياد صلاح ف حوشه وروح حتى هوا للحوش
خدي دوش و تعشى هدرز مع العويلة شوي وخش لداره
اتصل ب نورس
نورس:الووو
اياد:اهلين ياام لسان
نورس:ههههه قاعد تتدكر
اياد:ماننساش انا ^^
هدرزو ع بعض وحكو وهما هدرزة وبصارة وضحك وكل مايتم رصيده يعبي تاني ويكلمها لين طقت ساعة 12 مزبوطة
اياد:كل عام وانتي بألف الف خير
نورس:هههه وانت بألف خير بس بمناسبة شنو
اياد:عيد ميلاد يامريوووحة
نورس ابتسمت وقالت:و**** ناسياته مرة واحدة
اياد:عارفك باهي اللي مانسيتيش اسمك … ويﻻ توا الوقت تأخر .. ارقدي بش تفيقي بكري
نورس:ان شاء ****..ليلة سعيدة

اياد :ليلتك اسعد

نورس حاولت ترقد بس ماقدرتش قعدت تتقلب يمين يسار ماجاهاش نوم كل ماتغمض عينها ايجي اياد فبالها فاتت 1 2 3 وهيا مازال فايقة لييين جت ساعة 4:15 بش قدرت ترقد

وصبح الصبح يوم الثلاثاء
فاق اياد اول شخص ناشط قبل الشحاتة وبنتها…. دوش دار قهوة شربها ولبس مدني ومع ساعة 7:30 طلع من الحوش وصل جيهة مركز البحوث ووقف يستنى ف نورس بيديرلها مفجأة واﻻخت نورس مستمخة راقدة

هديل:انتي ياسحنة وئ شنو ماتبيش تمشي للعمل ؟
نورس: ساعة كم
هديل:8:10
نورس لوحت البطانية ع طول ايدها وطلعت من سريرها وقالت:نهارك اغبر ع راسك علاش مانوضتينيش
هديل:ياكلبة من بكري انوض فيك !

طبق نورس للحمام شافت امورها وبعد شوي طلعت من الحمام فتحت دوﻻبها لبست اي لبسة ختى تناسق الوان مافيش
وطلعت من دارها
نورس:صباح الخير ماما
خ سالمة:صباح النور اتعالي افطري
نورس:هييي ساعة 8:30 ﻻﻻ مستعجلة باي باي

اياد يسحن خيرها معش جت تسعة اﻻ زعما ماتبيش اتجي ! ﻻﻻ خلي نزيد نستنى شوي بالك زحمة الطريق شنو سيارة هديكا المسلفرة زعما من فيها؟؟انحس فيه شخص ﻻﻻ عدة اشخاص يشبحولي منها ههههه مبردني انا وتحليلاتي صدق فيا صلاح لما يقولي بكل انت وتحليلاتك هههه شنو زعما نمشي خلي نزيد نستنى.. اليوم ﻻزم نقولها ان انا معجب بيك ونبيك اليوم عيد ميﻻدها كان تبيني حتكونلها الفرحة فرحتين
*** يحفظك يانورس

وبعد عشرة دقايق شرفت الست نورس وبمجرد ماشافها بخ برفان ونزل من سيارة ووقف بجنب سيارته درست نورس وربطت سيارتها وسكرتها وماشية بخطوات واسعة ماتلفتتش جيهة اياد بكل
اياد:بست وئ
ماعدلتش نورس وماتلفتتش لحقها اياد وقالها :وئ يامشفشفة
ابتسمت نورس وتلفتتله وقتله : هههه اياد صباح الخير
اياد:صباح النور
نورس:ماحسبتكش انت ماشية مستعجلة عالتوقيع نضت متاخر
اياد:هههه كسوووولة
نورس:ههههه
اياد:عموما مش حنأخرك بنقولك كلمتين بس
نورس:اها اكيد … قول
اياد:ان انا واﻻه …
معش عرف شن يقول
نورس:اها
اياد:جبتلك هدية كل عام وانتي بالف خير عقبال مئة شمعة
ابتسمت نورس وقتله :ﻻش متعب روحك اياد !
اياد:مافيهاش تعب هدا يوم عيد ميﻻدك وحبيت نقولك ااا …
نورس:اانطق هالجوووهرة
اياد شاف لعيونها رمش رمشتين وعيونه همسو ل نورس
نورس شافت لعيونه وقعدو لحظات عينهم ف عيون بعض همس العيون ومااجملها من لغة …لغة العيون.
اياد يفكر اخترتك يانورس برغم ان الوقت اللي مر بينا خمس شهور
بس *** عالم قداش انتي شخص مهم ف حياتي
نورس .. محلا اهتمامك ليا يا اياد ايقولو نص الحب اهتمام مزالي النص التاني نتمنى اتكون ليا وبس يااياد
اياد..انتي ملكي يانورس بس فيه حاجة مانعتني اني نقولهالك اني نقول نبيك
نورس..ياريتك اتعبر عن مشاعرك اياد انحس انك تبيني بس مش قادر اتقولها
اياد..*** يحفظك يانورس
نورس..*** يخليك ليا اياد

فاق اياد من سرحته وقالها :ههههه سامحيني سرحت
نورس:ههههه حتى انا سرحت
اياد:اوكي يﻻ بري لعملك وتو بعدين نهدرزو
نورس:ﻻﻻ كنت بتقولي حاجة
اياد:امممم … هيا حاجة مهمة جدا جدا واحتمال انها اتفرحك واحتمال ﻻ نورس:شن هيا
اياد:مش قادر نطلعها بس توا انتي وقعي و اركبي لمكتبك نتصل بيك ونقولك …
نورس:اووكي
اياد:مش ماترديش
نورس حست لو انه ماقالهاش توا مش حيتصل بعدين ويقولها من منطلق يضربها خماس ف سداس ويغير رايه هههه فقتله:اوكي حتى انت مش تنشغل وماتتصلش كنهدا مش حنسمعها منك بكل الحاجة اللي بتقولها
اياد:هههه تقدري يامهبولة
نورس:ايه نقدر وكان ماتصلتش عليك حق ومعش نكلمك بككككل هههه
اياد:به حنتصل ان شاااء **** وكان ماتصلتش حق عليا معش تكلميني بكل و اممم اعتبريني مانبيش نكلمك ياشينة
نورس:هههههه خلاص به ياشين
اياد:ردي بالك ع روحك نورس

نورس :ان شاء **** ياشين باي اها وشكرا ع الهدية
اياد:مافيشي جميل سموحة هي سلام
نورس:سلام ..
خشت نورس ل المركز وهي مسرورة طايرة من الفرحة
ولع سيارته اياد وطلع من بركيدجو وتتحرك وراه السيارة اللي كانت مدرسة برا المركز ف الشارع
قام نقاله اياد بيتصل ب نورس حس ان السيارة نفسها اتلحق فيه ايتمام احساسي كان صح … فاتصل ب صلاح
اياد:صلاح فيه سيارة تلحق فيا
صلاح:كيف انت وين
اياد:بعد مركز البحوث بشارع تعال فيسع
صلاح:اوكي هي
فات شارع التاني واعترضت طريقه السيارة .. بيهرب منهم اياد …
نزلو جماعة مسلحة من سيارة نزلوه من سيارته اياد بيقاوم ضربوه ع رساه بحاشية الكلاشن
وحطوه فسيارتهم وعطوها الشياط

وصل صلاح هوا وايمن للمكان اللي وصفه اياد مالقوش اﻻ سيارته مفتوحة وهوا مهناش
صلاح :وينه وين اياد مااقوليش ااا
ايمن:خطفوه

يتبع ………

التالية◀