مكتملة رومانسية درامية رواية معذبتي 2 (1 مشاهد)

[𝙷𝚄𝙻𝙺 𝙼𝙸𝙻𝙵𝙰𝚃]

➤السابقة​

الجزء الحادي والعشرون من رواية معذبتي​

ف سر عايزة اأتمنكم عليه!! انا م بعرف انمق كلماتي! ولا بقدر ارد مباشرتاً ع الكلام الحلو!! قد يكون لاني منغلقة ع نفسي!! وم لي تجارب عاطفية! ولا انا م سعيت لاكتساب المهارات دي!! لانو من المستحيل تكون شيء فطري!! بحاول القط لي كم كلمة حلوة!! ومرات بتغمس شخصية امل اختي!! وبرد بإسلوبها؟! م عارفة دا اسميه شنو؟ حاولت اجتهد شوية مع نفسي وم خليت قروبات الفيس والواتس!! كيف تكوني منفتحة!! وكيف تتقن وفنون الرد!! وهلُم جرجرة…! وبحث بثقتي ف نفسي زادت وبتصل ع حسااام بكل حماس! وبيني وبين نفسي بقول الليلة بختو ف فتيل وادهشه بكلامي!! بس من اسمع الصوت المبحوح!! بتجهجه!! وببدأ التأتة واللعثمة!! ياخ برتبك عديل!! وبرجع تاني لاسلوبي الخشن!! الجاف! البعيد كل البعد عن الانوثة!! يمكن يكون هو بحب طريقتي ف الكلام واسلوبي الجعفري دا!! بس الصراحة انا م كنت راضية عن نفسي!! لاني شايفة البنات بيتكلمو كيف مع حبايبهم!! وذكرت الموضوع دا ليه!! علشان انا ماشة ازورو؟؟ واكيد م حيكون ف غرفة معزولة!! فخايفة احرج نفسي قدام اهلو وناسو!! واقعد ارتبك واقول خارجيات!! لاني م بقدر اقاوم نظرتو!! والعجب الابتسامة والنائب الطويل!! ااااه **** تصبرني!! انا الوقعني شنو ف المشية دي!!؟ ريم خبطتني ع خفيف ف رجلي وقالت سرحانة وين!!؟ ابتسمت! وقلت الزمن خايفاه يتأخر لي وم القي مواصلات!! ضحكت وقالت لي انتي ف زول خبرك قبل المرة انك كاذبة فاشلة!! ضحكت وقلت م ناقصاك!! بطريقة غير مباشرة كانت بتحاول تهدى ف اعصابي وتفرفش معاي!! بالجد انا مبسوطة بصحبتي مع ريم اكتر من علاقتي ب اخوها!! **** يرزقكم بصحبات زي ريم!! والعندها بنصحها تمسك فيها قوي!! لانها م بتتعوض!! وبدون م نحس بطول المسافة وصلنا!! انا قلبي بقي يضرب!! وايدي بردو شديد!! قالت لي ابتسمي وخليك ع طبيعتك! وم تشيلي هم شيء!! انا معاك!! وشبكت يدها ف يدي وبخبطت كتفها مع حقي وابتسمت!! دخلت معاها!! وف هولهم الكبير كان ف والدتهم!! معها نسودان من شافتني! الكلام راح ليها واظنها نست بتحكي ليهم عن شنو!!؟ هم ركزو معاي!! جينا عليهم وسلمنا!! وخالتي سلمت علي عادي وسألتني عن ناس بيتنا!! وطوالي عرفتني عليهم!! وقالت ليهم هيام خطيبة حساام السابقة!! سلمو علي تاني وبقو يعاينو لبعض!! ريم استأذنت منهم وساقتني وطلعنا ع غرفة حساام!! سمعنا صوت الضحكات ونحنا ف السلم!! اترددت ولمن رجولي بقو يطاقشو!! قالت لي بطلي جُبن!! وطرقت الباب ودخلت قدامي!! وكوركت وجرت ع ودخالتها!! شفتو قبل المرة بس م حصل احتكيت بيه!! كان مسافر! سلمت عليه وانا مدنقرة وبطرف عيني بحاول اللمح حسام بس م قادرة اشوفو!! سلمت عليهم!! وقبل م تعرفني عليهم قال ليها عرفتها!! وبقو يضحكو!! خالد كان موجود!! سألني عن صحتي واهلي والشغل معاي!! صدقوني م كنت مركزة ولا عارفة انا برد كيف ولا بقول شنو!!؟ متوترة وم شفت حسام!! ريم قالت ليهم ف الحمام ولا شنو؟! محمد ودخالتهم قال ليها ياخ ريحة عفنتو تخنق وجبرناه عديل علشان يستحم!! انا ابتسمت!!؟ وريم قربت شوية من الحمام الداخلي وقلت لي م تمشي هيام بيطلع اسه مالك مستعجلة!! وقبل م تتم جملتها فتح باب الحمام وكان راسو كلو صابون!! وقال اقبضيها الجبانة! م تخليها تمش؟ ورجع قفل الباب…خلانا كلنا نضحك!!؟ تقريبا حمامو م خلصو ونادي ع خالد علشان يساعدو ف لبس ملابسو تقريباً!! وشويتين كدا! وطلعو مع بعض!! ماشاءالله تبارك الرحمن من الوجاها!! كأنو طالع من عرس م من حادث!! عيني باردة عليه!! ودلوكتي اشتغلت!!! نهاااائي انا م عندي قلب!! دي دلوكة وبقت تضرب!! اتوترت لدرجة اني مسكت ريم!! غمزت لي وهمست ف اضاني قالت عارفة اخوي كسار وماف بت بثبت كدامو بس اتشجعي!! وقبل م تتم ضحكتها لبعتها!! بدون م اراعي للحاضرين!! بالجد موقف محرج ياخ!! قمت ع حيلي وكنت عايزاه يقعد ف السرير حتي اسلم عليه!! وهو السجمان عايز يسلم علي حتي يرقد!! وبقينا واقفين وبنعاين لبعض!! ومنتظرين منو فينا يبادر!!؟ ابتسم وحاول يجي علي!! انا اترددت واختصرت عليه المسافة واتقدمت كم خطوة ناحيتو!! سلمت وعيوني ف الارض!! بس دقيقة!! لشنو ادنقر!! رفعت رأسي ولمن صريت عيوني وعاينت ليه شديييد جوه عيونو!! وبقيت اسألو عن صحتو!! يلا ملامحو بقت م بتتفسر!! لا مبتسم ولا مكشر!! وسلامو كان عادي! م حسيت باللهفة الزمان!! ورجعت قعدت جنب ريم!! وهو اتسند ع حافة السرير حتى قعد!! قلت ليها رجلو اتكسرت ولا شنو!!؟ عاين لي بحزن وقال لي قلبي م رجلي!!؟ انا سكت!! ريم قالت ليه بطل طلس!! وحركاتك دي احسن تخليها!! قبل شوية م كنت راقد رززز!! وبقو يضحكو!! انا ابتسمت بس!! قال ليها **** يقدرك ع فعل الخير!!؟ وعاين لي!! لم عيونا اتلاقت بدون اشعر دنقرت!! بس علشان اكون سيدة الموقف عاينت ليه وسألتو!! لشنو استعجلت وطلعت من المستشفي قبل م تتعافي تماماً!! ابتسم وقال لي بقعد معاي منو ف المستشفي لكن!! كنت وحيد عشان كدا طلعت!! ريم قالت ي نكار الجميل!! سمعت ي خالد!! قطعت تزكرة من المانيا وحارسو ع مدار الساعة ويقول ليها وحيد!! خالد بقي يضحك!! قال ليها ليس ع المريض حرج!! حسام قال ليها اطلعي برا!! قالت ليه لو طلعت بسوق معاي فلانة!! حسام ضحك واتنهد بصوت مسموع وقال ليهم من بعد اذنكم!! ممكن تدونا بعض الخصوصية انا وهيام!! انا خلاص عايزة اقوم جارية!! بس بيني وبين نفسي بقول انتي بت واعية وناضجة!! خلي عندك شخصية!! وم تهربي!! واجهيهو!! بس نحنا م ف معركة علشان استخدم معاه اسلوب النِدية!! وبالجد اتوترت!! طوالي خالد ومحمد جو طالعين يتبسمو! وريم شغلتها ليه كدااا!! لمن شترها بالريمود بتاع الكيف! حتى طلعت جارية وصوت ضحكاتها مالي المكان!!؟ وفضلنا بس نحنا الاثنين!!؟ قال لي ممكن تقربي شوية!! قلت ليه كدا مرتاحة!! قال لي بس انا م مرتاح!!؟ وبالجد رقبتي واجعاني مابقدر اميل عليك علشان اشوفك!! ف سري قلت تشوف لي شنو! م ياني هيام الزمان ديك!! قال لي بس اذا شايفة انو الوضع دا انسب ليك م عندي مانع!! اهم شيء راحتك!! وانا بدبر اموري!! قمت وبمسكنة كدا قعدت ف الكنبة القصادو!! وكان بيبعد عني زي متر ونص تقريباً م تتخيلو توتري زاد قدر شنو!!؟ وحسيت كأي قاعدة ف رجولو مووش قصادو وبس!! وعيونو حلفو كان يترفعو!! ياخ انا عارفة نفسي هبلة ومفضوحة!! قال لي اخيرا لقيت فرصة احكي معاك!!؟ عايزة ارد!! قاطني وقال لي لو سمحتي خليني اطلع كل الجواي وبتمني انك تسمعيني للاخر!! قلت ليه م عندي مشكلة ف سماعك!! بس انا جيت اطمئن عليك! واقوم بالواجب بس م اكتر!! فما عايزة افتح مواضيع تانية!!؟ ابتسم وقال لي زي م انتي!! مستعجلة جلاص!! صريت عيوني!! ومن قال لي فكيها يااخ!! بدون م اشعر لقيت نفسي ابتسمت!! اتنهد! وقال لي اولا انا عايز اعتذر منك!! قلت ع شنو!! قالي م تقاطعيني هيامي!! ولا م من حقي اناديك بيه!! سكت واكتفيت ببلع ريقي!!؟ قال لي انا زعلان من نفسي وم قادر اسامحها!! فخجلان اطلب منك السماح!! بس صدقيني ضميري م مرتاح!! بالجد انا عايز ف عذاب!! م تتخيلي انتي شاغلة بالي قدر شنو!!؟ م تتصوري انا مستني اللحظة دي من متين!!؟ بالجد انا اوسخ واحد ف الوجود!! عارفة لشنو!! لانو **** انعم علي ب انسانة زيك وانا ف لحظة غضب وتهور ضيعتها!! وشككت ف محبتها لي!! انا للان م قادر استوعب انا كيف طلع مني الكلام القلتو ف حقك!! بقي يبكي!! انا قلبي وجعني شديد واتزكرت اهناتو لي!!؟ قال لي انا م طالب منك ترجعي لي!! لاني فقدت الحق ف طلب شيء زي دا!! بس عايزك تسامحيني!! وبينك وبين نفسك اذا حسيتي انك ممكن تتجاوزي الحصل وتديني فرصة تانية!! اوعدك م اضيعها!! واخبيك بين ضلوعي..واعمل المستحيل علشان اسعدك!! بس سامحيني لو قدرتي!! انا فضلت ساكتة والعبرة خنقتني وم قدرت اخبي دموعي!! قال لي م تستعجلي ف اتخاذ قرارك!! اذا وافقتي حكون اسعد انسان!! ولو رفضتي ح افضل مستنيك ع امل انك تحني علي ف يوم وتغفري لي!!؟ قلت ليه انا نسيت الفات!! صاح انت اكتر زول جرحني واتألمت شديد من ورا ارتباطي بيك!! بس دا كلو بقي ماضي!! وصعب علي اعيشو تاني ولا ارجع ليه!! فأنا الان حبيسة الزكريات دي وصدقني بصعوبة حتي بقدر انتشل نفسي منها!! فما بقدر اخاطر وارجع ليها تاني!! وعلشان ضميرك يرتاح!! انا مسامحاك!! بس صعب ارجع ليك!! **** يسعدك مع اياً كانت!! بس انا خلاص اكتفيت!! انا جيتك اليوم علشان اقنع نفسي واقنعك بانو نحنا انتهينا ي حسام وم بيناتنا الا الود والاحترام وبعض الزكريات الحزينة!! وجيت قايمة!! قلت ليه **** يواليك لالعافية وخلي بالك من نفسك!! واتعافي سريييع اهلك منتظرنك!! قال لي وانتي!! ابتسمت وقلت انا ماضي!! جا قايم!! وظاهر انو متألم وم قادر يخطو برجلو!! بس كان بكابر!! ومخبي الالم!! قرب علي وهو شبة بيعرج!! ومسكني من طرف اصابع يدي اليمين!! وقال لي قصتنا لسه م اكتملت!! عليك **** اديها فرصة!! م تتخذي قرارك الان!! اخدي وقتك ف التفكير!! وكان مغالب ف الالم حبيت اساعدو علشان يرجع سريرو!! قال لي انا عايزك دائما تكوني معاي وسانداني!! شوفة عينك انا من دونك مايل!!؟ هيامي انا محتاجك ف حياتي!! لو سمحتي ردي لي حياتي!! وف اللحظة ديك وقبل م ارد جات داخلة روعة منفعلة!! اظنو خبروها اني مع حسام!! وقالت لي بتعملي ف شنو انتي!! واستلمت يد اخوها وسندتو هي علشان يقعد ف السرير!! وبقت تهرج فيهو! وانا م قلت ليك بطل امورك الفارغة دي وم تتعب نفسك عشان شيء م مستاهل!! عاين لي وقال ليها قد تشوفيهو شي فارغ!! بس دي حياتي!! انا ودعتو من بعيد ادعيت ليه بالشفاء وجيت طالعة!! قال لي هيام!! اتلفت عليه وعيوني مدمعين..قال لي ارحميني!!

نواصل بعدين
يتبع …….

الجزء الثاني والعشرون من رواية معذبتي​

كل بداية وليها نهاية!! وم كل حاجة حلوه بتستمر معانا!! ولا كل حاجة بنتمناها بنحصل عليها!! انا م حصل طلبت شخص بمواصفات حسام ف صلاتي!! ولا كان فارس احلامي!! بس يمكن **** بحبني!! ولا يمكن استجاب دعوات والديني!!؟ لانو الفترة العشتها معاه!! بتغنيني عن الف حياة!! وحكون طماعة اذا طلبت من **** حياة افضل منها؟! يمكن اكون بخدع نفسي!! ولا بخدعكم ف حكايةاني م بطلت احب حسام!! يمكن م اكون ضليعة ف الحب ولا لي تجارب سابقة!! ولا بقدر افتي فيه!! بس الشيء انا حسيتو وعشتو اعظم من الحب!! والاربعة حروف دي مستحيل تقدر تحتويه!!؟ بس دا كلو م يعني اني م بحترم ذاتي!! يمكن لو كان حسام هبشني ف حتة تانية!!؟ غير اخلاقي وشرفي!! كان من الممكن اسامحه!! بس صعب اتجاوز النقطة دي تحديداً!! م حكاية كبرياء!! بس قبل المرة هو سألني عن اساس اي علاقة شنو!!؟ وهو بنفسو قال لي م الحب!! الثقة! الثقة ي جماعة؟؟! طيب اذا هو من اول عقبة واجهتنا شكك ف اخلاقي!! طيب كيف اضمن مستقبلي معاه!! كيف اسلمو نفسي!! حسام هدم الشيء الجميل الكان بيناتنا!! وحتى وإن عملنا ترميم للاتكسر!! حيفضل مشوه!! وحيفقد رونقو!!؟ علشان كدا عايزه قصتنا تفضل جميلة وم تملاها الشكوك والظنون وخيبات الامل!! عايزة اعيش حياة طبيعية!! م فيها خوف من يوم باكر!! انتو فاهمني صااح؟!
طلعت من غرفتو!! وانا مقهورة ع هجر حسام!! انا الخليتو بس لشنو قلبي اتكسر!! وحاسة بالغصة بتنحر حنجرتي!!؟ استوقفتني روعة ف السلم!! ف سري قلت م ناقصة إهانات!! قربت علي!! وصدمتني بإسلوب غير متوقع منها!! سلمت علي!! وقالت اسفة اذا جرحتك بكلماتي!! وانا مندهشة من كلماتها اللبِقة!! وقلت بيني وبين نفسي يمكن يكون حسام طلب منها تعذر مني؟؟! والصراحة بقيت مجمدة وم عرفت ارد!! مسكت يدي وقالت انا م عندي معاك مشكلة شخصية!! ولا كنت بعرفك من الاساس!! بس احترمنا حب اخوي الكبير ليك؟! وصدقيني كرهتك لم شفت حالة اخوي الوصل ليها بسببك!!؟ وزاد كرهي ليك بعد عمل الحادث الفجع دا!! بس نرجع ونقول كل شيء قسمة ونصيب!! وبما انو كلك قناعة بأنو اخوي م حيكون شريك حياتك!! بتمنى تطلعي من حياتو وللابد!! وشددت لي ع كلمة للابد!! ودموعها نزلو وقالت لي انا م بقدر استحمل شوفة اخوي ف الحالة دي!! وكمية العذاب دا!! بالجد ي هيام انتي عذبتي اخوي!! حسام المن **** خلقني م شفت الا البسمة ف شفاه!! بقي يكون قافل عليه غرفتو ويبكي!! وان كتم الجواه بيظهر الحزنف عيونو وملامحو!! ياخ اخوي م بستاهل تعملي فيه كدا!! يمكن يكون غلط ف حقك!! وانا بعتذر نيابة عنو!! بس لو سمحتي خليه ف حالو!! لانو من دخلتي حياتو م لقي إلا الحزن!! ارحمينا كلنا!! **** يرضي عليك! انا عايزة ابكي!! زول يخبيني ف حضنو!! م عابزاها تشوف دموعي!! م عايزة انهار قدامها!!؟ راسي لافي زول يمسك بيدي!! حرام البحصل معاي دا!! وفعلا ريم المنقذة حصلتني!! بالجد **** بحبني!! قالت مالكم ف شنو!! انا بقيت اعاين لريم…م قادرة اوصل ليكم شعوري!! بس اقرب وصف ليه!! الشافع الما يتوبخ من زول غريب وفجأة امو تجي داخلة علية!! م قادر يشكي ولا قادر يتكلم ومنتظرها تقول ليه مالك؟! ويرتمي ف حضنها ويبكي!! بس دا شعوري ف اللحظة دي؟! روعة قالت ماف شيء! ربتت ع كتفي وقالت لي م تاخدي كلامي ع محمل شخصي بس فكري فيه بتمعن!! وابتسمت ونزلت خلتني ماسكة ف ريم!! قبل م اطلب منها!! حضنتني شديييد!! يااااه بالجد كنت محتاجة ليه!! وبكيت بحرقة!! وهي ف الاول بتهدىء فيني!! وبعداك جاملتني وبكت معاي!!مع انها م عندها علم بالكلام الدار بيني وبين اختها بس اعتذرت نيابة عنها!! وقالت لي بتكون م تقصد تزعلك بس هي بتحب حساام شديد وم بترضى فيه شيء!! اتنهدت وقلت ليها م تشغلي بالك م قالت شيء غلط!! وجيت نازلة وقفتني بس ابت اقيف!! وجات جارية وراي!! الحمد*** م لاقينا زول من ناس البيت ف طريقنا…ومباشرتاً عنيت الباب!! مسكتني وظاهر عليها الندم!! وقالت لي انا اسفة لاني ختيتك ف موقف محرج زي دا!!؟ وبعتذر لاني جبتك بيتنا وذت آلامك!! ابتسمت وقلت ليها بشكرك لانك جبتيني!! ياداب انا ارتحت وريحت ضميري واتخذت قراري!!؟ حضنتها ع خفيف وبستها ف خدها وطلعت!! جاني احساس انو حسام بعاين لي بس ابيت التفت ابيت ارفع عيوني ع غرفتو!! وطلعت خليت ريم واقفة!!؟ م عارفة حاسة بشيء غريب!! ف طاقة غريبة اتملكتني!! دا شنو!! وين الالم والحزن الجواي!! لشنو م حاسة بشيء!! راحة الضمير دي سرها شنو؟! وبسأل ف نفسي لحدي م وصلت الظلط!! وانا واقفة لمواصلات العربي جاتني عربية حسام!! عرفت انو م سايقها بس دا منو؟! نزل القزاز!! وكان دا خالد!! قال لي طالع ع امدرمان ارح اوصلك بطريقي!! ابتسمت وعرفت انو م بيعرف زول هناك واصحاب زاتو م عندو!! بس بكون دا حسام طلب منو يوصلني!!؟ ركبت وعم الهدوء المكان!! لحدي م شغل اغاني وقال لي ننعش الجو شوية!! انتي ممله وانا فايتك بمراحل!! ضحكت!!؟ والغريبة الاغاني شغالة ونحنا نتونس!! ويحكي لي عن المواقف المحرجة الحصلت معاه ف المانيا لم مشي طالب جديد ف الجامعة وكان متمكن من اللغة الانجليزية بس م ناقش شي ف الالمانية!! ويحكي لي عن تريقة الناس والمواقف المحرجة العملها بسبب جهلو بعادات البلد ولغتهم!! وانا ضحكت من جوووه قلبي!! ولمحتو بالصدفة!! م حصل دققت ف ملامحو!! نفس عيون حسام بس انفو طوييل وحاد م زي حسام!! دنقرت وبعداك انشغلت بقراية اسماء المحلات!! قال لي ممكن اتدخل ف خصوصياتك!! عقدت حواجبيني!! وقلت ليه ممكن اتفضل؟! ابتسم! وقال لي حسام اخوي…وقبل م يواصل قاطعتو!! قلت ليه علشان م نخش ف نقاش م منو جدوة!! انا طويت صحيفة اخوك!! وبتمنى ليه كللل السعادة!! هدن العربية وبقي يعاين لي ويحكي!! قال لي انا م عايز منك ترجعي ليه!! ولا اصلا لي حق ف طلب شيء زي دا!! انتي الحتعيشي معاه كل حياتك م نحنا!! واذا وافقتي لازم بكون عن قناعة منك!! علشان م تدمرو حياة بعض وتقلبوها نكد وجحيم!! قلت ليه بإستغراب!! طيب عايز تصل لشنو؟! قال لي ي ستي عايز انصحك!! مافي شيء ف الدنيا دي مثالي!! قاطعتو وقلت منو قال ليك اناببحث عن المثالية!!؟ قال لي م تستعجلي خليني اواصل!! ابتسمت وقلت كمل!!؟ قال لي الحب بتشوبو بعض العيوب!! قلت كيف؟! قال لي ف نوع بحب من اعماق اعماق قلبو!! بس برضو تلقيهو عندو درببات!! ابتسمت وقلت م فهمتك!! قال لي علشان ابسط ليك!! انا بعرف شاب ممكن بقتل اذا جابو سيرة خطيبتو بالغلط ف شيء سيء!! وبحبها لابعد الحدود!! بس ف نفس الوقت عندو عشرمية بت بحنك معاهم بس م بحبهم!! تقدري تقولي بعشم فيهم!! وبقي يضحك!! قلت ليه بس دا عيب ف حق رجولتو!! وبيني وبينك الراجل الصاح م بيلعب بمشاعر بنات الناس!!؟ قالي فهمتي غلط!! قلت طيب وضح؟! قال لي ف فرق بين انك تخدع بنت!! وبين انك تجاريها!! قلت ليه كيف؟! ابتسم وقال لي لم انتي تصاحبي ليك ولد وتكوني عارفة انو مرتبط وبحب خطيبتو وبرضو متعلقة فيه وبتحاولي تسحبيهو!! بلغة البنات اسمها شنو؟! قلت ليه شلب!! ضحك وقال لي بس ياها!! كيف تقولي عنو مخادع وهو م وعد بشيء!! قلت ليه ودا دخلو شنو بموضوعنا!! ابتسم وقال لي بتكلم عن الكمال والمثالية!! حتى الثقة!! فيها شوائب!! زي قصتك انتي وحسام!! الحب مكتمل والثقة كانت ماشة ف السليم لحدي م الغيرة غيرت مسار ثقة حسام!! وم تنسي كان ف عوامل مؤثرة!! زي عبدالله واباذر!! وحاولو يهدمو الثقة البيناتكم!! وللاسف نجحو!! بس دا م يعني انو مستحيل ترجعو تكتسبوها وترجعوها للمسار الصحيح!! قلت ليه والمطلوب!! قال لي بالمختصر!! قاطعتو وقلت الحالة دي بالمختصر!! طيب اذا طولت كلامك يكون كيف!!؟ وبقينا نضحك!! قال لي بالمختصر قلنا!! م حتلقي شخص بيثق فيك ثقة عمياء للابد!! لازم تحصل حاجة وتزعزعها!! بس الثنائي الناجح هو البيقدر يتغلب علي مطبات الحياة ويقويها وان اصابها الضعف!! فياستي!! استهدي ب**** واقعدي مع نفسك!! وشوفي معاير الثقة عندك شنو!! واذا فقدتيه عند حسام!! ولقيتيه عند شخص تاني!! هل حتضمني انو يحبك!! هل الثقة وحدها كافية علشان تعيشي سعيدة!!؟ ولا حتخليه برضو وحتمشي تفتشي للحب عند واحد تاني!! واذا كنتي محظوظة ولقيتي الحب والثقة بس ماف احترام!! هل حتكملي ولا برضو حتمشي تفشي للاحترام عند شخص تاني!! وحتفضلي ف دوامة!! وحلقات متتالية!!؟ شوفي انتي عايزة شنو؟! وتاني ح اعيد م قصدي ترجعي لاخوي!! بس ادرسي الموضوع من كل الجوانب!! وشوفي سعادتك وين!! وم تقيفي علي المثالية ف الحب والعلاقات لانو كلنا نقص!! وم حتلقي شخص كامل او بتميز بكل الصفات الزكرتها!! لانو تلات ارباعها مكتسبة!! وبحبك واهتمامك واجتهادك حتروضيهو ع يدك!! وتحصلي ع مبتغاك!!؟ قلت ليه بحاول اعاين للامور من منظورك!! قالي لا!! من منظورك انتي والشيء البعايزاه انتي شنو؟! ابتسمت وقلت حاضر!! تسلم ع النصيحة!! قال لي بعدا انزلي شميتك زاتو!! ضحكت وانتبهت ياداب!! انو العربية واقفة قدام باب بيتنا!!؟ وصلنا متين م عارفة!! اتخلعت وبقيت اضحك!! قلت ليه من متين نحنا واقفين!! ضحك وقال لي مطوفشة دي!!؟ نزلت وقلت ليه والحالة موضوعك كان مختصر!!؟ ضحكنا وشكرتو وطلبت منو يتفضل بس شكرني واعتذر قال مستعجل!! ومشي!! دخلت بيتنا وانا كلي قناعة بقراري!! بس قلت م ح اخسر شيء اذا درست وجهة نظر خالد واخدها بعين الاعتبار!!؟ امي قالت لي لشنو اتأخرتي!! وريتهم اني زرت حسام!! امي شاكلتني وهرجت فيني واول مره تقول لي ي رخييصة!! م تزلي نفسك ليهم!! ولا عاجبك البيت والعربية!!وسمعتني كلام كتير يسم البدن بس ف النهاية امي!! سكت ومشيت ع غرفتي!! ابوي شكلو م رضى بس امي كفت ووفت!! وم قال لي شيء!! غيرت ملابسي واعدت السيناريو من الاول!!؟ وبقيت بفكر ف كلامهم كللللهم!! لحدي م نمت؟! وبيني وبينكم العشاء م صليتو!! وم قمت إلا الصباح!!؟ جهزت وطلعت ع الشغل!! م لقيت أ/مرتضي وأ/عباس كلفني بشغل!! اي ياهو زاتو الصعب الحقار داك!! وبقيت ادعي م اتصدم معاه ف موقف ولا اتصرف برعونة زي كل مرة!! كان العمل خارج الجريدة وحنمشي مع فريق كامل!! وبالرغم من انو ا مرتضي فصل عملي عن عبدالله بس اتفاجأ انو ا عباس جايبو معانا!! كنا حنمشي لتغطية حدث عام ف السااحة!! تقريبا بيع مخفض!! وعروض شركات محلية واقليمية!!!!وشرحو لينا المطلوب شنو بالضبط!! ومشينا!! م اتلاقيت معاه كتير وكنت مشغولة ف استطلاع ارأء الناس والوفود المشاركة ف اليوم المفتوح!! وبعد يوم طوييل ومرهق!! كنت بشرب ف مشروب غازي!! وف واحد من افراد الشركات المشاركة بقي يلاطف فيني ويمشي ويجي يتكلم معاي!! وتعالي شوفي منتجاتنا وعندنا تخفيض وبالاخص للبنات الحلوة!! وبهزر هزار تقيل كدا!! اتجنبتو!! وم حبيت اعمل مشكلة!! وخايفة من أ عباس اكتر من الشيء الممكن يحصل معاي!! وبقيت اتزاوغ منو!! لحدي م خلصنا وجري ركبت الترحيل!! بس م اتحركنا كان ف زملاء لسه م جو!! وفضلت انا ومروة!! وواحدة اسمها اسراء!! بنعلق ع المعرض والسلع واسعارها!! وفجأة ظهر لي العبيط من خيث لا ادري!! قال لي ماشة وين قبل م نتعرف!! طلع المحتال مندوب مبيعات وبتاع تسويق م عارفة وقال لي اذا م فيها ازعاج لحضرتك ممكن رقم تلفونك!! وانا مصدومة من جرأتو!! عرفة متين!! وهو رقمي دا سايب ساااي!!؟ بإسلوب لطيف اعتذرت منو وقلت ليه عديل م حابة اتواصل معاك!! وانا مخطوبة!! قال لي م تستعجلي! انا م قلت عايز اتزوجك!! بس عايز اتواصل معاك!! يمكن نبقي اصحاب!!؟ شوفوه الوسخ احرجني كيف!! صريت وشي وقلت ليه بنهرة م عندي رقم تلفون!! وجا من هناك عبدالله وملامحو ناوي الشر!! وخبط ع كتف الولد وقال ليه عايز منها شنو؟! كلمني انا!!؟

نواصل بعدين.
يتبع ………

الجزء الثالث والعشرون من رواية معذبتي​

الحياة مشوار طويييل فما بتمشي لينا لوحدنا!! لازم يكون عندنا الرفيق!والسند! والونيس!! ولكن كيف نختار الرفيق!!؟ صعبة شديد!! وماف معيار معين ليه!! للاسف مرات بتكون رفقة سوء!! وبنخسر بسببهم دنيتنا وحتى اخرتنا! بسبب طيش ولا مبالاة مننا!! ويااابخت من لقي الرفيق الطيب الصالح!! البحثك ع انك تقدم! لاخرتك وبعينك ع نزعاتك الشيطانية وع الشيطان؟؟! فديل م بنلاقاهم بالساهل!! بس كل البيدنا انو نطلب من **** يرزقنا بيهم!! انا بصراحة م بؤمن بالصداقة بين الجنسين!! ف الاول قلت الموضوع عادي ويمكن لاني م احتكيت باولاد ادم كتر!! اكون واخدة عنهم انطباع خاطىء!! وم اخبي عنكم! لم صادقت عبدالله! غلطت نفسي وقلت انا كنت مضخمة الموضوع!! وخاتة اعتقادات م ليها اساس!! بس بعد الحصل من عبدالله ازدت قناعة بأنو مستحيل البنت والولد يتصاحبو!! وزي م بقولو كبارنا!! ابعدو البيضة من الحجر! والنتاية من الضكر!!؟ وبعداك كل واحد وفهمو!! بس انا قناعاتي الشخصية بتقول لي مستحيل تظبط!! ولكن لكل قاعدة استثناء!!؟
انا بقيت ادعو **** عبدالله م يخش ف مشكلة مع الشاب!! وخبطو ع كتفو بإستحقار!! وقال ليه اتكلم معاي انا!! الولد ابتسم ورفع يديهو وكأنو حيكبر للصلاة!! وقال ليه ماعندي حاجة اقولها عن اذنكم!! وجا ماشي اتلفت غمز لي ومشى!! عبدالله وقف قصاد الشباك وبقى يعاين لي!! حاولت اقفل القزاز بس كان خاتي يدو وبعد كذا محاولة حتى زح يدو!! مروة قالت لي دا مالو!! قلت ليها متخلف بس م اكتر!! جا ركب جنبي!! طوالي قمت ومشيت قدام!! قعدت جنب اسراء ف المقعد الخلف السواق!! وبقول **** عدي اليوم دا علي خير!!؟ والزملاء جو وركبو!! وفضل المقعد الصغير الجنب الباب…اللهو لصق لمقعدي!! جا استاذ كبير اسمو صلاح!! قال لنا ي شباب الضهر ابا!! شوفو ليي مقعد كويس!! انا جيت بالطرف وقلت ليه اقعد هنا!! ضحك وقال لي اخدي راحتك..وعاين للشباب وقال ليهم شهامة ماف!! وبقو يضحكو!! نزلو اتنين ولمن بقو يحلفو طلاق!! ومن بينهم عبدالله!! وكأنو بكاوي فيني رفض يخلي زميلو يقعد جنبي!! وركبهم الاثنين خلفنا وقعد!! انا قلبي وجعني!! وزحيت ع اسراء وختيت الشنطة بيناتنا!!ابتسم وهمس لي!! قال لي مستحيل اتحرش بيك!! قربك بس بكفيني!! وزحى مني والتزم بمقعدو!! انا النار ولعت ف جسمي!! وم عارفة عبدالله دا بستفاد شنو من استفزازي!! لشنو بمغص علي حياتي!!؟ وهو عارف بعمايلو دي انا كرهي ليه بزيد!! والشيء المانعني احكي معاه انو أ/عباس راكب قدام!! وم عايزه انصدم معاه ف شيء!! وكتمتها جواي!! وصلنا الجريدة! وكل واحد سلم استطلاعو وخليناه عند سكرتارية مدير التحرير!! وطلعنا!! وانا واقفة للمواصلات جا وقف جنبي!! قبل م يتكلم نهرتو!! وقلت م تعتبر سكاتي خوف!! بس انا م عايزة اعمل شوشرة ف محل الشغل!! فما تخليني استخدم معاك اسلوب عفن زيك!! ابتسم وقال لي! م قدرت اقاوم شوفتك وقربك مني…عاقبيني اي عقاب بيخطر ع بالك بس م تحرميني من قربك ي هيوم!! انا زاد غضبي!! ولمن وشي بقي يرجف!!؟ قال لي من الاخر كدا وبدون م تسمعيني كلام فارغ…وبقي يضحك قال لي انا عايز اعرسك!! بموافقتك غصباً عنك المهم ح اقلعك ح اقلعك!! وحتشوفي بنفسك!! وفجأة بركان غضب اتفجر جواي!! وقلت ليه انت حيوان!! وقبل م اكمل نبز!! قاطعني وقال لي كلامك م بأثر فيني بل العكس! بشدني ليك اكتر!! وجا ماشي!! خلاني منفعلة وبنبز فيه وهو ولا كأنو قال شيء!! ماشي يتبختر ويتبسم!! شوفو السبهللي دا عليكم ****…! من شدة الغضب فوت كذا عربية ونسيت زاتو انا عايزة اركب شنو!! ف الاخر لعنت الشيطان! واستغفرت وركبت وبرضو قلبي فاير وواجعني من كلام عبدالله!! رجعت البيت ولقيتهم مبسوطين شدييييد ع غير العادة!! بإستغراب قلت ليهم فرحوني معاكم!! امي قالت لي امشي صلي العصر اول!! ضحكت وقلت ليها عارفة بتك شمارة!!؟ داعبتها وبستها كم بوسة كدا!! وهي تضحك تقول لي وبرضو م حوريك!! ضحكتا ومشيت غيرت ملابسي وصليت! لم جيت عليهم لقيت معاها مرة ضيفة! وم طلعت لبعد المغرب!! وبعداك انا نسيت الموضوع!! ولليل كدا وقبل م انوم كانت امل بتلمح لي عن الارتباط واني اتقدمت ف العمر وقربت اخش٢٦وكلام من دا!! بس انا بلعب ف تلفوني وشغالة ليها اممم اي و****!! ليك حق!! وظاهر اني بمشي فيها وم مركزة معاها!! قامت حيلها ووقفت قصادي وانا ف وادي تاني!! وبلعب ومندمجة!! لبعتني لمن صرخت!! م من وجع الضربة!! بس بالجد خلعتني!! وبقت تضحك!! وانا خسرت القيم بسببها!!؟ وقمت عليها!! بالرغم من انها سليطة اللسان وجنها مشاغلة وهزار!! بس خوافة شديد ومن اهيج فيها بتجر لامي!! انا ساكها ف الحوش زي الشفع!! وامي كانت بتصلي وهي تتجاري مني يمين وشمال وبتضحك بخوف!! وتحنس فيني م ادقها!! وانا بضحك وبتوعدها بالكلامات!! والليلة اسوي ليك واسوي ليك!! لحدي م امي سلمت!! وقالت دا الفضل!! البورة بتسوي اكتر من كدا!! امل قالت ليها بايرة براها انا لسسسه٢١سنة!! ولميت ليكم فيها خبط من طرف!! امي بتتكلم معانا فضحتوني مع الجيران!! ودا شنو الفتوات الاتلمن لي ف البيت دا يالله!! ابوي جا من الجامع ونهرنا!! وقال اصواتكم جايني من نص الشارع!! وادانا محاضرة!! قلت ليه دي بتك قليلة الادب دي!! وهي تتفاصح!! قال لينا اعقلو!! وواحدة تقوم تسوي لي شاي!! امي قالت ليه م خارب طبعهن الا انت!! اسسه كان ولدي احمد قاعد كان لمى فيهن ضرب من طرف!! ابوي ضحك بس م بردا ع امي!! بصراحة م حصل سمعناه بقول ليها بحبك!! بس بتظهر ف معاملاتهم اليومية وطريقة كلامهم!! وف مشكارو لي طبخها وشايها وكل حاجة بتعملها!! وف لم نديه كبابة الشاي بسألنا اذا ادينا امنا!! وف لم تكون تعبانة وترفض تاكل ويجي يقيف ف راسها ويحثها عليه!! وف لم تجبر بخاطرو وتقوم جاملو وتاكل معانا وف اي حاجة تطلع منهم بنلقي محبتهم موجودة!! **** يمتعهم بالصحة والعافية وطوله العمر وياربي م تحرمني منهم…ويحفظ كل ابهاتنا واماتنا والفقدو وجودهم وسبقوهم للرفيق الاعلى!! بتمنى **** يتقبلهم ويجعل مثواهم الجنة ويصبركم ع فراقهم لانو بالجد حااار!!
بعد الونسة الحلوة معاههم..جيت قايمة وماشة ع غرفتي!! ابوي وقفني!! امل وقفت معاي!! قال ليها قلت هيام انتي اسمك هيام!! ضحكت فيها وهي خنقت ابوي بس بهزار دا وقالت ليه اااي م بقت موظفة وبتجيب قروش!! وانا مشغلني حبشية ف بيتكم دا!!وبعدا كلو ماف زول معبرني!! ضحكنا وامي قالت ليها امشي عايزين اختك!! انا بالجد اتخلعت!! امي وابوي عايزني ف موضوع!!
قعدت جنبهم وقلت خير ان شاءالله!! ابوي قال لي كل الخير!! امي قالت لي جاك عريس هدي ورضي!! انا بطني فرقعت!! بالدارجي كدا عملت تتتتك!! ولمن قلبي بقي يضرب!! ابوي قال لي مصعب ودخالتك امنة قال عايزك!! وكلنا بنعرفو ولد محترم ومسئول!! وم فيه عيب الصراحة!! وكمان بيتو جاهز!! بس منتظر موافقتك!! جيت قايمة وقلت لابوي م عايزة اتزوج اسسسه!! امي قالت لي اترزعي هنا!! مالك م عايزة!! قايلة نفسك صغيرة!! ولا تكوني لسسه متعشمة ف ود الراحات!! وكانت تقصد حساام!! عيوني دمعو!! قلت ليها حسام م ليه دخل!! دي حياتي ي امي!! انا م مستعدة لاي علاقة جديدة ي ابوي افهمني!! امي قالت لي نحنا ادينا كلمة!! ولو عايزة تصغري ابوك وتحرجيني قدام اختي ارفضي!! ابوي سكتها!! وقال لي ماف زول حيجبرك بس فكري ف الموضوع وم تستعجلي والقرار البتتخذيه داك نحنا معاك!! وكلنا عايزين سعادتك!! امي قالت ليه كيف م توافق عندك منو!!؟ لو عندك زول خليه يجي بالباب!! ولا انا ح اديك لوداختي!! ابوي قال لي امك دي بتتكلم ساي!! خليها علي!! قمت خليتها بتهرج فيه وبتشاكل!! مشيت غرفتي وانا مصدومة!! امل نطت لي ف السرير!! وقالت بشناتك دي م بعرف اولاد الناس السمحين بيعجبهم فيك شنو!!؟ نظام بتهزر وبتفرفش معاي!! بس انا مخلوعة وخايفة من اصرار امي!! وشايفة الجدية ف عيونها!! اسوي شنو انا!! انا م مستعدة للزواج!! لالا لا الموضوع خطير!بس **** يجيب العواقب سليمة!!؟ امل قالت لي اذا فعلا اتجاوزتي حسام وفعلا عايزة تبدي صفحة جديدة لازم تتخذي خطوة زي دي!! قلت ليها طيري من وشي م ناقصاك!! رقدت ف سريري! وبقيت افكر!! دا شنو البحصل معاي دا!!؟ بيجاي عبدالله واسه مصعب!! وهناك حسام!! لو سمع ردة فعلو حتكون كيف!!؟ بس انا لشنو خايفة عليه!! م خلاص نحنا انتهينا!! وكمان عبدالله لازم اضع ليه حد!! يمكن اذا شافني اتزوجت ببعد عني!! بس انا م مقتنعة بالموضوع!! اساساً م مستعدة!! لسسسه جرحي بينزف!! كيف اداويه بزول تاني!! كيف اظلمو معاي!! وهل ح اقدر اقدم ليه السعادة الهو متوقعها وبيحلم بيها!! **** ساعدني ودلني ع الطريق الصحيح!! وامي م يحصل ليها شيء بسببي ولا تختلف مع خالتي!! وراسي جاط!! والتفكير وجع راسي!! واتوكلت ع رب العالمين وبلعت لي بندول ونمت!! الصباح قمت ع نفس الروتين!! بس الغريب ف الامر انو امي كانت شبه زعلانة ومبوزة مني!! بستها ف جبينها وقلت وانا بدعواتك شوفي البحصل معاي!! فما بالك اذا فقدتها ممكن يحصل فيني شنو!!؟ اخدت ليها نفس حااار وقالت لي م زعلانة دي حياتك وانا منو علشان افرض عليك رأي!! دا كلام شنو ي امي!! ومشت خلتني!! بتستخدم معاي اسلوب ضغط علشان اوافق ع مصعب!! بالجد ماف زول حاسي بالجواي!! ارحموني!!
انا متضايقة شديد!! لشنو جايني احساس اي بخون ف حسام!! دا شنو الاحساس المُر دا!! لشنو قلبي واجعني!!؟ ياربي انا لسسسه….لالا مستحيل انتهينا م بحبو!! ولا بحبو بس بطلت احبو؟ ولا شنو بالضبط انا ضايعة!!؟
نواصل بعدين
يتبع ……..

الجزء الرابع والعشرون من رواية معذبتي​

ف امتحانات ربانية! صعبة شدييد! وبتضع مستقبلنا ع المحك!!؟ والغلطة الواحدة بألف!! وبنخاف نفشل فيها!؟ ومرات بندخل ف إثم مع **** بسببها!! فبسأل **** يربط ع قلبوبنا ويثبتنا علي مصائب الحياة!! ويقربنا ليه بالطاعات والصبر ع الابتلائات!!؟
طلعت من بيتنا وانا مدبرسة وكارهه نفسي!! وحاسة كأني كبش وماشي ع المزبح!! مش ماشة ع شغلي!! وصلت الشغل وحاولت اخبي حزني وم اظهر وجعي لزملائي!! بس من البوابة عم حسين قال لي مالك ان شاءالله عافية!! عيانة؟ ابتسمت! وقلت بخير بس دعواتك لي!! بالجد ادعى لي من جوووه قلبو!! وحسيت بالراحة والسكينة وقتي!! بالجد انا محظوظة بالناس الحوليني!! م عارفة من دونهم كيف ح اقدراجازف الحياة دي؟! دخلت ع الجريدة وسلمت ع زملائي وفضلت منتظرة مروة لسسه م جات!! وبقلب ف اوراقي!! ف زول جدع فيني الزهرة بتاعة شجرة دقن الباشا!! جدعتها مني وعاينت ليه وعرفتو عبدالله!! اصلا اغبي منو مافي!! ضحك وقال لي م لقيت وردة فقلت اقدم ليك الشيء دي!! شمي ريحتها م حلوه عليك ****!! م رديت! شلت شنطتي واوراقي وجيت قايمة!! قال لي صباح السعادة لمرتي المستقبلية!! واتلفت عليه وقلت ينعل ابوك!! خليتو بضحك وملامحو ظاهر عليه التفاجؤ من ردي!! بالجد م عارفاها طلعت مني كيف؟ بس غاظني!! واستغفرت لانو ابوه م غلط ف حقي!! لكن ولدو كلب ياااخ!! ف طريقي لاقيت استاذي!! سلمت عليه وقال لي بت حلال اسسسه ف بالي! مسكني ملف وقال لي تعالي معاي!! مشيت معاه المكتب!! قال لي عندنا طلعة مستعجلة!! لو كنتي مع عبدالله ف قروب واحد كنت حرسلكم وانا مطمئن!! بس م بقدر اخاطر بإرسال واحد فيكم ولا ثنائي غيركم!! قلت ليه شكلو موضوع مهم شديد!! قال لي اكيد!! حنمشي مجلس الوزراء!! اتخلعت وقلت ليه عايز ترسل متدربين!! ابتسم قال لي م اي متدربين لكن؟؟! وكمان وين ثقتك ف نفسك؟! ابتسمت وقلت موجودة! بس الموضوع كبير شوية علي!! م لاني بخاف ولا متوترة!! بس حاجة بتتعلق بالحكومة عايزة ليها زول ملم بالسياسة ومواكب الاحداث!!؟ ابتسم وقال لي علشان كدا عايز اسوقك معاي علشان تتعلمي!! وتاني ارسلك براك!! ابتسمت وقلت متين حنمشي!! قال لي بعدين العصر!! قلت ليه بخلعة وحنجي متين؟! والمواصلات!! ضحك وقال لي انتي صحفية م استاذة اساس علشان تتقيدي بزمن!! وم تخافي حنمشي بعربيتي!!؟ ابتسمت وقلت تمام!! قال لي امشي ساعدي مروة واسراء وجهزي نفسك وابحثي عن سيرة الوزير فلان!! وشوفي شي يفيدنا وخلي الباقي علي!! فعلا مشيت ونفزت الطلبو مني!! لحدي م اليوم عدا سريع!! وزملائي طلعو وانا فضلت ف الجريدة!! عبدالله كان الفصول قاتلو وم قادر يسألني عن الشيء المؤخرني شنو؟! واستاذ مرتضي قاعد لو سألني قدامو خايف يجيب لنفسو مشاكل!! لانو منذرين قبل المرة!! وسأل مروة بس ابت توريه وقالت ليه امشي اسألها!! اتصلت كلمت ناس البيت اني ح اتأخر!!؟ وطلعت مع أ مرتضي!! مشينا وخلونا ننتظر اكتر من نص ساعة علشان نقابلو واعتذرو لينا قالو ف اجتماع!! بس كذابين اذا كان عندو اجتماع م كان حيحددو لينا موعد اليوم!! واكيد كانو ح يأجلو لقائنا معاه!! المهم بعد القعدة المملة ديك دخلنا!! وسلم لينا بطريقة حلوه شديد!! وسكرتير المكتب جا ومعاه عامل ولا شنو م عارفة! وقدم لينا قهوة!! وأ/مرتضي بقي يدردش معاه!! واااي من الفهم وطريقة الاسئلة وقوة الشخصية!! ومناقشة الوزير بلهجة حادة احياناً وانا قاعدة مسكينة وبدون ف ملاحظات!! بعد خلصو اللقاء الاستمر لاكتر من ساعة!! الوزير داعبني وقال بتك متدربة ولا شنو؟! أمرتضي قال ليه دي أ هيام صحافية يحتذى بها!! ولكن حبت تكتسب خبرة اكتر! الوزير ابتسم وقال لي تشرفنا!! أ مرتضي قال لي م عندك سؤال للوزير؟! انا كتمت فيني!! ونظراتهم كانت متمركزه علي!! واخدت لي نفس عميق! وقلت بس سؤال واحد!! حضرتك طلعت ف اول مؤتمر صحفي ليك بعد توليك المنصب!! صرحت بأنك خلال سنة حترفع انتاج الكهرباء ل٢٠٠% وحتفتح مشروعات توليد كهربائي وكذا وعد!! والان مرت سنتين ومخزونا الكهربائي تم استهلاكو وانهارت المنظومة الكهربائية ف البلد!! بترجع السبب لشنو سعادتك؟! انا لم خلصت اخر كلمتين حسيت ب سخونة نفسي ف شفتي العلويه!! من شدة م متوترة!! أ/مرتضي ابتسم وعاين لي بإعجاب!! والوزير ملامحو اتجمدت!! وقال لي بعتذر ي استاذة الرد ع سؤالك دا حيكون ف مؤتمر صحفي خليك قريبة ومتابعة!! واحتجب عن الرد!! وطلعنا من عندو!! استاذ مرتضي قال لي **** يحفظك وخليك كدا ع طول!! مجالنا بتطلب الشجاعة والجرأة!! وانتي اضفتي سرعة البديهه!! وكنت مبسوطة من نفسي ف حين انو كنت شايفاه سؤال عادي!! وطلع بعفويه!؟ المهم وصلني بيتنا وطول الطريق بيشرح لي عن الشغل وعن المواقف الممكن اتعرض ليها!! وعن انو كيف لازم يكون اسلوبي وكلام كتييير استفدت منو اكتر؟! وبعد تحانيس حتى رضا يدخل معاي البيت!! وعرفتو عليهم وم شرب غير الموية وطلع!! امي من قفلت باب الشارع قالت لي جبتي دا ولا شنو؟! فهمتها تقصد شنو بس اتغابيت وقلت ليها كيف يعني م فهمت؟! ابوي قال لي خليها!! شيلي كبايتك وامشي!! اتعشيت وحكيت ليهم عن الحصل معاي وكنت مرهقة شديد ومشيت نمت!! الصباح جهزت ولبست عبايتي وقلت ليهم ماشة الارشيف بتاع الجريدة ف موضوع اتكتب عن سد النهضة من كم سنة عايزنو والمدير عايز يدمجو مع مقال جديد!! لانو كل الكلام الاتقال زمان اتطبق بحزافيرو!! وكلفوني بمهمة البحث عن المقال!! افتكرت الموضوع صعب وقلت الليلة ح اتملي غبار وضهري حيتكسر من الوقفة!! بس لم وصلت لقيت امين المستندات ولا الارشيف هو! زول ماشاءالله تبارك الرحمن!! نشيط وعارف الشغل تمام!! بالرغم من انو اتجاوز الستين من العمر!! ساعدني وف اقل من عشرة دقائق طلع لي العدد الانا زكرتو!! وشلت النسخة بتاعة الجريدة وطلعت!! وديتها لاستاذي اول كلفني بكتابة التقرير بس اتراجع!! وقال لي خاتي ليك شغل تاني!! وطلعت من المكتب!! وانا منتظرة ف الممر البودي ع مكتبنا الكبير اشوف عبدالله داخل ع مكتب استاذنا!! طوالي قمت من محلي علشان م يطلع ويشوفني ويمغصني بالكلام!! وانا بقلب ف التلفون لقيت كذامكالمة من ريم واخر واحدة مستلمة!! عرفت من تاريخ المكالمة انها امس المساء وقلت بتكون ردت امل!! ومن الطبيعي م تكلمني لاني طلعت من البيت خليتها نايمة!! وعادي بتحصل بيناتنا انو نرد ع تلفونات بعض!! رجعت لريم م ردت علي!!! قلت بتكون بعيدة من التلفون!! مشيت اتونست مع ناس مروة وسألوني عن اللقاء مع الوزير!! وقالو لي بختك شيخك قوي!! ومن بديتي بديتي من رأس الهرم!! هزرت معاهم وشاغلتهم؟ ورجعت بيتنا! وخايفة امي تاني تطرح لي موضوع مصعب!! بس م قالت شيء ولا جابت لي سيرتو!! لكن الكلام متغير وظاهر عليها متضايقة!! والايام مرت سريع وكنت نايمة صحتني امل بخلعة وقالت لي اجري شوفي التلفزيون!! انا اتخلعت وقلت الحكومة سقطت ولا شنو؟! طلع لقاء صحفي عاملو وزير الطاقة والكهرباء!! واتفاجأت لم اتكلم عن وعدو السابق!! وذكر انو ف صحفية سألتو وهو وعدها بمؤتمر صحفي عن الموضوع وانا م مصدقة نفسي!! وشرح الحصل والعقبات الواجهتهم وخلافات السد القللت استيرادنا للكهرباء من دول الجوار!! وكلام كتييير!! واخر كلامو قال موعدنا ثلاثة شهور اذا م حصل تقدم حيقدم استقالتو وحيطلع يعتذر من الشعب!! انا فرحت بشجاعتو!! وبعداك النومة طارت!! واتزكرت ريم من كم يوم م اتكلمت معاها!! من يوم لقيت المكالمة ف التلفون!! اتصلت وقلت امعطها شوية!! ف الاول م ردت علي تاني اتصلت!! وقلت مستحيل تنوم بدري كدا!!؟ بعداك ردت بفتور!! وسلمت علي ببرود!! سألتها اذا حاصل معاها شيء!! ابت توريني!! احترت وسألتها عن ناس البيت وكانت ردودها مختصره شديد!! عرفت انو ف شيء م تمام!! وقبل م تقفل مني قالت لي مبروك الخطوبة!! **** يتتم ليك ع خير!! وقفلت التلفون!! انا من الخلعة رميت التلفون من يدي!!؟ وعاينت لامل!!؟

نواصل بعدين
يتبع ………..

الجزء الخامس والعشرون من رواية معذبتي​

ف حياتنا بنمر بمطبات كتييرة!! وبننصدم ف ناس ابداً م كنا متوقعنهم يكسرو بخاطرنا؟! واسوأ شعور هو شعور الخذلان!! انا اتخذلت ف تلاتة ارباع الناس العرفتهم ف حياتي!! بس الاصعب علي كان خذلان حسام وكسرو لقليبي!!؟ بس اليوم ولاول مره اختي حبيبتي تكسر قلبي!!؟ شيء م متوقع ومؤلم شديييد!! اكتر من مؤلم صدقوني!!؟ لشنو ي امل؟؟
اتلفت عليها وكانت منشغلة بتلفونها وبدردش!! قلت ليها امل!! عاينت لي بطرف عينها!! قلت ليها وانا صوتي مخنوق!! انتي قلتي لريم شنو؟! ختت تلفونها ف السرير وكانت راقدة!! قعدت ف نص السرير وربعت رجولها…وقالت لي هي قالت ليك شنو؟! نهرتها وقلت انا سألتك انتي قلتي ليها شنو؟؟ اتنهدت وقالت لي اتصلت وانتي كنتي نايمة!! دردشت معاها شوية!! وسألتها عن اخوها!! قلت ليها عني انا قلتي شنو؟؟ قالت لي بصراحة وم تزعلي!! وم اظنك حتزعلي لانك اصلا حسمتي موضوعك مع حسام!! عيوني رقرقو!! وبلعت ريقي بصعوبة!! وقلت ليها لاخر مرة بسألك قلتي ليها شنو؟! قالت لي لم سألتني عنك!! قلت ليها جاك عريس!! وهي اتخلعت وقالت لي هيام وافقت!! وانا قلت ليها مبدئياً كدا وافقت بس لسسسه م ردو لودخالتي!! قاطعتها وقلت ليها بياتو حق تكلميها!! دخلك شنو انتي!! انا متين قلت ليك موافقة!! قالت لي يعني انتي حكسري بخاطر امي!! قلت ليها م تدخلي امي ف الموضوع!! دي حياتي انا بعيش معاه م امي!!؟ ثم ثانياً انا كلفتك متين بإتخاذ قراراتي نيابتاً عني؟؟ قالت لي انا حبيت اساعدك!! كوركت فيها وقلت متين طلبت مساعدتك!! قالت لي خلاص اسفة!! قلت م تعتذري!! ونفس الجرح السببو لي حسام وعبدالله انتي عملتيه وصدقيني حقك وجعني اكتر!! انفعلت فيني وقالت لي انا م جرحتك ولا كذبت فيك!! ولا حاسداك!! بس لانك جبانة وم قادرة تتخذي قرار!! وبتجاملي ف ريم حبيت اقنعها انك مستحيل ترجعي لاخوها!! وسهلت عليك الحكاية!! بالجد كلماتها دي استفزتني شديد!! وقمت عليها وصدقوني كل حواسي بتقول لي اضربيها!! ووقفت ف راسها!! وهي ع غير العادة م جرت ولا زحت مني!! وفضلت قاعدة ف حتتها وبتحمر لي كمان!! لشنو ي امل؟؟ انا اختك الكبيرة!! اضربها!! امد يدي عليها؟! اعمل ليها شنو وروني!! قلت ليها يدي دي م حامدها عليك! بس من يوم الليلة انتي ف حدك وانا ف حدي!! واذا بالغلط لقيتك بتدخلي ف حياتي م تلومي إلا نفسك!! ومشيت خليتها!! لانو لو اتلامضت معاي!! م بقدر اتخيل ممكن اعمل فيها شنو؟؟ طلعت برا الحوش! وكنت متضايقة شديد!! معقولة اكون انا السبب!! انا الخليتها م تحترمني؟؟ بس انا م قدمت ليها الا الحب!! عمري م بخلت ليها بشيء!! عمري م مديت عليها يدي!! لشنو اختي الاصغر مني تتصرف معاي كدا!! ف بعتبرها امي! الصغيرة!! بس يااااخسارة!! وم كان العشم ي اختي!!؟ وانا بتنهد بصعوبة وتاني حسيت بطعم الدم ف حلقي!! م بعرف انا عندي ضيق شراين ولا آلم ف القلب م عارفة!! بس كل ازعل شديد! بحس بنفس الشيء!!؟ اصلاً الجماعة ديل لو م قتلوني م برتاحو!! ابوي جا لقاني ف حتتي!! كان شايل ابريقو وشكلو ماشي ع الحمام!! قال لي مالك ف شيء!! قلت ليه ابداً! بس م صليت!! عايزة اتوضى!! الواطا ضلام! كان واقف جنبي…صاح م شفت نظرة عيونو!! بس حسيت بكلامو العايز يقولو!! ختا الابريق وقعد جنبي ف سرير الحوش!! قال لي ف شنو؟! هزيت راسي وم اتكلمت!! بس بمعني ماف شيء!! قرصني من اضاني!! وقال لي بتخبي علي ي مطموصة!! انا ابتسمت بحزن ودمعتي نزلت!! اتنهدت وقلت و**** الموضوع م خطير!! متضايقة شوية من امل!! قال لي بإستغراب واضح!! مالها عملت شنو؟! م حكيت ليه! بس قلت ليه خلاف اخوات عادي م تشغل بالك انت!! قال لي اتحاننو ي بتي!! نحنا م دايمن ليكم!! اختك غشيمة!! م تزعلي منها ولو لقيتيها ف غلط انصحيها ولو م سمعت نصيحتك اضربيها!! ابتسمت وقلت منو فينا المستعدة تضرب التانية!! ضحك وقال لي الصراحة اختك طالعة لامك!! شعيتة خلاص!! ضحكنا وقلت ليه وانا طالعة ليك!! ضحك ضحكاية صغيرووونة كدا! وقال لي قومي نومي!! قلت ليه **** م يحرمني منك ابوي!! وحضنتو بالجنبة شديد!! وجيت قايمة!! دخلت غرفتي وخليتو ف حتو م قام!! وهي ولا يهمها؟؟ رجعت لتلفونها!! طفيت اللمبة ورقدت!! النوم م جاني وتقريباً م نمت لقريب الصباح!! بفكر ف حسام تخيلو؟؟! ياربي ريم بتكون كلمتو؟! ريم معقولة تصدق اني ح اتزوج!! بس كلمتها اختي كيف م تصدق!! حرااام عليك ي امل!؟ و انا ناقصة؟؟

الصباح قمت بفتور! والنعاس غلبني بس عندي التزامات عمل!! جهزت وطلعت ع الجريدة!! وكل الانظار كانت موجهه علي!! استغربت!! ف ياتو مصيبة جاياني!! لحدي م لاقيت مروة وسلمت علي بلهفة وفرحة!! قالت لي بختك ي المحظوظة!! قلت ليها بإستغراب ف شنو؟ قالت لي م عارفة بالجد ولا بتستهبلي!! ابتسمت وقلت و**** م عارفة!! قالت لي امس م حضرتي المؤتمر الصحفي حق الوزير!!؟ قلت اهاااا نسيت و****!! ااي حضرت لقطات بس!! قلت ليها انا دخلي شنو!! وتقريباً اسمي زاتو م اتزكر؟ ضحكت وقالت لي اسمك لو اتزكر البعرفك منو؟؟ ولا البهتم لامرك منو!! ضحكت وقلت ليها صريحة لكن!! ابتسمت وقالت لي بس اتزكر اسم جريدتنا!! والمدير فرحان منك!! ابتسمت وقلت ليها دا موضوعكم الخطير اسسه!! ضحكت وقالت لي متغطرسة خلاص!! ضحكت ومشيت خليتها!! مي السكرتيرة قالت لي الاستاذ عايزك!! مشيت وسلم علي بحفاوه!! وبعد كلام كتييير حلو قال الجريدة حتديني حافز!! شكرتو!! وقلت **** يقدرني واقدم الافضل للجريدة!! وطلعت من المكتب!! لاقيت عبدالله!! قال لي م اتفاجأت فيك!! لانك تستحقي اكتر من كدا!! ومدا لي يدو!! معقولة انا اسلم عليه!! حمرت ليه وجيت ماشة!! ابتسم وحكي شعرو!! وقال فيني شعر!! بس منو بهتم!!؟ مشيت ع المكتب حقنا!! وكانو بتناقشو عن موضوع اتناولتو الجريدة!! وبكلمو عنو وعن رده فعل القارئ حتكون كيف؟! وف بعض منهم قال لازم تضاف ليه كذا حاجة!! انا مليت ونعست!! لاني سلفاً م نايمة!! طلعت برا!! ومشيت ع عم حسين!!؟ كان ماف قعدت ف مقعدو!! اظنو لمحني من بعيد!! جا علي وجاب معاه كرسي!! سلم علي وقعد يدردش معاي!! قال لي انتي واعداني بأنك تحكي لي موضوع أ/عبدالله!! ابتسمت وقلت و**** م ناسية بس الليلة مرهقة ومدبرسة م بقدر احكي!! قال لي اخدي راحتك!! كنت بفرفش معاك بس!! وريني المضايقك انا ف مقام ابوك!! ابتسمت وقلت ليه اكيييد انت ابوي!! بس و**** الدنيا دي يومياً بتتفنن ف اذيتي!! م عارفة انا عملت شنو؟ بس و**** البيحصل دا كتير علي وصعب اني استحملو!! عقد حواجبينو وقال لي *** كرييم واذا م بحبك م بيبتليك!!؟ قلت ليه ونعم ب****!! بسسس….قاطعني وقال م تبسبسي!! فوضي امرك *** وهو عالم بالخفايا!! م تشيلي ليها هم الدنيا دي؟! كتيرة وقليلة رايح!! ابتسمت واتنهدت وقلت **** يلطف بي وييسر لي اموري!! وعليك **** ادعو لي! قال لي ان شاءالله!! واداني وقتيا كدا كذا دعوة!! وقال لي بخبيك بعديين ف دعوات الصلاة!! ابتسمت وقلت **** يتقبل! شكرا ليك ابوي!! وقام خلاني قال لي اخدي راحتك ومشي ع سولق الترحيل!! شكلهم عندهم موضوع مع بعض!! جا بدون مقدمة عبدالله الفقر وقعد جنبي!! جيت قايمة مسكني من يدي!! وقال لي م تهربي!! عايز اتكلم معاك ف موضوع ضروري!!؟ قبل م يكمل كلامو داك!! نتلت منو يدي!! قالي انتي زولة كبيرة وناضجة وانا عايزك ف موضوع جدي!! لمتين حتفضلي تتهربي مني!! لازم نحسم الموضوع دا!!؟ قلت ليه م بيناتنا شيء بتحكي!! خليك ف حالك ي ودالناس انا م ناقصاك!!؟ قال لي اسمعي كلامي ووديهو البحر!! وبعداك القرار ف يدك!! قلت ليه انا م عندي ليك شيء!! ومستحيل ارتبط بيك!! وم تحلم اني اتزوجك!! قال لي عيبي شنو؟؟ انا انفعلت وقلت عيبك شنو؟؟ براي جريت الكرسي وقعدت!! قلت ليه انت م راجل انت واحد خسيس وخبيث!! انت خربت بيني وبين خطيبي علشان تحصل علي!! انت م بتحبني انت مشتهيني!! واكبر دليل ع كدا رسوماتك التافة زيك ديك!! انت عايز تتملكني ي عبدالله!! انت واحد اناني وشايف نفسك!! وشايف انو ماف بت بترفضك!! بس انت واهم نفسك؟ انا مستحيل اكون ليك؟؟ ملامحو اتغيرت ولاول مره اشوف الانكسار ف عيونو!! قال لي بحزن واضح!! يشهد **** انا حبيتك ي هيام!! انا م اكذب عليك انو ف شهوة جواي ناحيتك!! ودا شيء طبيعي وفطري!! لكن هل ف يوم انا قليت ادبي معاك!! قلت ليه اكتر من كدا!!؟ قال لي م تخلطي الامور ببعضها!! انا قصدي قله ادب من نوع تاني!! **** مضايقات!!نظرات م تمام!! او كلام فاحش!! قلت ليه وشعرك داك!! قال لي انا اقصد صراحتاً هل سمعتي مني شيء سيء!! اما موضوع الاسكيتش داك خاص بي!! ومن المخذي انو يتسرب لاي زول!! وانا ندمان ومكسوف لانكم اطلعتو عليه!! واكتر شيء مزعلني انو حسام شاف صورك الانا راسمها!! بالجد اتمنيت يعمي ويلا يشوفهم ولا الغيرو انتي بتخصيني انا براي!!؟ قلت ليه عبدالله استهدي ب****!! انت مريض امشي اتعالج!! انا م سلعة بشتروني علشان تقول حقتك!! ولا وارثني من اهلك!! انا انسانة ولي مشاعر!! ومستحيل ابادلك اي شيء!! ولو فعلا كنت بتحبني كان صارحتني!! وانا ي رفضت ي وافقت!! وم كنا وصلنا للمرحلة وفضل بيناتنا الود والاحترام!! بس شوف انت وصلتنا لوين؟! قال لي الغيرة عمت ع عيوني!! انا من اول بكره حسام ولم اتصل علي لموضوع الاسكيتش كرهتو اكتر!! وم اكذب عليك! كذبت عليه!! ووريتو انك بتحبيني!! قلت ليه عارفة!! عاين لي بإستغراب وقال لي الوراك منو؟! حسام!! م رديت!! قال لي بالجد تصرف دنيء!! بس انتي جبرتيني اعمل كدا!! وبسبب الشعور بالذنب واني ف الاخر شككت ف اخلاق حبيبتي!! ضميري انبني!! واتصلت كلمت حسام بااااي شيء!! صاح انا خسرتك لاني كذبت فيك!! واعذرت ووضحت الحصل لحسام!! بس هو فقدك لانو م وثق فيك وشكك ف اخلاقك!! اتخيلي الغبي ضيعك من يدو؟؟ انا لحدي الان مستغرب من لعبة القدر دي!! انا قلبي وجعني!! قلت ليه لا انت ولا حسام م بتهموني!! وكفاية انا عارفة نفسي شنو!! وم محتاجة تقيم منك ولا منو!! قال لي انا ح اموت اذا اتزوجتي غيري!! و**** انتحر!! شوفو الغبي دا بقول ف شنو؟؟! قلت ليه ف حياتك جبان وف موتك ضعف ايمان!! انت حر ف نفسك!! و**** بحاسبك!! قال لي حساب **** اهون علي من شوفتك ف حضن راجل تاني!! جيت قايمة!! قال لي انا ح ابذل كل جهدي علشان اخليك تسامحيني واقنعك بالزواج بي!! انا ابتسمت بإستهتار!! وبتمنى تديني فرصة!! خليتو قاعد وطلعت ع بيتنا!! مرتبي م صرفتو!!؟ بالجد قلبي واجعني!! وانا ف الطريق اتصلت ع ريم!! كنت مفتكرها م حترد!! بس ردت عادي!! وسلمت علي كالمعتاد!! استغربت وقلت البت دي منفسنة ولا شنو؟! وسألتني عن ناس بيتنا كمان!! قلت ليها خليتهم كويسين!! اتبادلنا الكلمات الحلوة وقلت ليها عايزه اتكلم معاك ف الموضوع الفتحتو معاك امل اختي!! بس انا ف المواصلات بعد اصل البيت؟! قالت لي خلاص تمام!! اصلا انا كنت بفكر اتصل عليك قبل شوية!! ابتسمت وقلت خير ان شاءالله!!؟ قالت لي كل الخير!! عايزه اعزمك!! استغربت وقلت بإبتسامة ع شنو؟؟! قالت لي عقد حسام!! وانكسرت الابتسامة!!؟

نواصل بعدين
يتبع ……….

الجزء السادس والعشرون من رواية معذبتي​

لم زول يقول الدنيا ضلمت ف وجهه بسبب فقد شخص عزيز عليه!! انا كنت بستغرب؟ وبقول معقولة نربط سعادتنا وحياتنا بشخص معين؟! قاعدة اشوف انو دا غباء منهم بس م اكتر!! لكن الليلة شربت من نفس الكاس!! وبالجد الدنيا قتلت رغبتي ف اااي شيء؟ ياااخ انا صبورة لابعد الحدود!! بس صدقوني استنزفت كل طاقتي!! كل صدمة بمر بيها بقول حتقويني!! وبكون متيقنة انو **** م بظلم زول!! واكيد حينصرني ولو بعد حين؟! لكن اليوم حتى ايماني اتزعزع!! وامنيت الموت!! ايوااا انا عايزة اموت!! دنيتكم دي م مكتوب لي اسعد بيها!!؟ وكل مره بسأل نفسي!! لشنو انا؟ ليه كل المصائب دي!! ياخ انا بستحق اعيش بسلام!! ع الاقل يكون عندي شوية امل بمستقبل افضل!! بس كل مرة الدنيا بتديني ع راسي!!؟
لم سمعت كلام ريم!! سمعت صوت ضجيج ف رأسي!! يمكن نكون دي روحي بتتعذب؟ وفقد الزاكرة لم ثانية!! لدرجة اني م عارفة انا منو ولا ماشة وين!! بالجد دا الحصل معاي!! واول حاجة اتزكرتها بعداك انو حسام حيتزوج!! وكأني م كنت حاسبة حساب ليوم زي دا!! انا وحسام منفصلين!! وشيء طبيعي انو يرتبط ويتزوج؟! بس انا لشنو حاسة بأنو قلبي اتقلع من صدري!! لشنو م حاسة بأنو جواااي ف فراغ كبييير؟! وزي الفيني شيء ناقص!!؟ وبقيت اسأل ف نفسي!! معقولة حسام حيتزوج غيري وبالسرعة دي!!؟ معقولة بين يوم وليلة نساني؟! ظلمني اول!! واليوم خان وعودو لي!! وحيقول حبيبتي لواحدة تانية!!؟ دا كلو بياكل ف عقلي! والعبرة خانقاني بس دموعي ابت تنزل؟! انا كنت ف حالة صدمة!! وصدقوني كانت قوية شديد وغير متوقعة!! وم انتبهت ع نفسي إلا لم الكمساري قال لي وصلنا اخر محطة ي اخت!! دقيقة اخر محطة شنو؟ انا جيت وين!!؟ فوتت بيتنا!! هو كويس انا اتزكرت انو عندنا بيت!! نزلت وانا دايشة!! وحاسة بالدنيا لافة بي!! اشكي لمنو انا!! احضن منو وابكي!!؟ ركبت تاني ورجعت بيتنا!! ولسوء حظي لقيت ناس البيت طلعو!! ولا اتصلت اعرفهم مشو وين!!؟ بس امنية نادتني بالحيطة وقالت سمعت حركة ف البيت وحبت تتأكد دا منو!! م صرفت معاها عربي كتير!! وقلت ليها تعالي بالباب انا محتاجة ليك؟؟ من الخلعة طلعت ف السرير وبقت تعاين لي بفوق السور!؟ وبتسأل فيني انتي كويسة!! هزيت ليها رأسي بمعنى لا؟! نزلت جري وف ثواني القاها قدامي!! تخيلو انا واقفة ف الشمس وم قادرة ادخل ع البيت؟! وكأني لسسه بتكلم معاها بالحيطة!! بالجد انا م قادرة اركز!!؟ جرت السلك وجاتني جارية وتوبها م لابساه كويس؟ ومسكتني من اكتافي وبتقول لي مالك ف شنو؟! حضنتها وبكيييت؟ بكيت بحرقة!! وكل الزكريات المتعلقة بحسااام بتوقد النار جواي اكتر!! انا انهرت تماماً وم حسيت بنفسي إلا وانا قاعدة ف برندتنا!! وهي بترش موية باردة ف وجهي!! وسامعة صوتها بعيييد!! وشايفاها رهاب رهااب!! م قصرت وفصلت معاي لحدي م استجمعت قوااي!! وقلت ليها حسام يتزوج!! وتاني بكيت؟ عاينت لي مسااافة!! وضغطت ع يدي!! وقالت لي كلو قسمة ونصيب!! وانتي قسمتك قاااعدة!! واكيد **** حيعوضك بالافضل!! م تبكي علشانو؟ هو الخسرك!! ودموعك زاتها كتيرة عليه!! قلت ليها بس بالسرعة دي قدر يتجاوزني!! قالت لي طز فيه!! اياك تنزلي دموعك عشان ولد م بستاهل!!؟ ياخ خوفتيني انا قايلة مات ليكم زول ولا حصلت ليك مصيبة!! انسينا من حسام!! واصلا دا شيء متوقع!! انتي زاتك وافقي ع ودخالتك؟ وعرسي قبليه كمان!! اتنهدت بصعوبة!! حسيت بيها متعاطفة معاي!! وعايزة تطلعني من الكآبة الانا فيها!! من خلال استصغار موضوع حسااام!! بس صدقوني الجواي ماف زول بحس بيه غيري!! انا محطمة حرفياً…! قمت اتوضيت وصليت لي ركعتين لوجه ****!! علشان **** يربط ع قلبي وم اخش ف شرك مع ****!!؟ بعداك لقيتها عاملة لي عصير!! رفضت اشرب بس اصرت!! انتو قادرين تتخيلو اني م ضايقة ليه طعم!! بالجد؟ قالت لي ارح معاي بيتنا!! لانها خاتة ليها حلة ف النار وامها نايمة!! وكمان م عايزة تخليني برااي!! قلت ليها عايزة استحم واقعد مع نفسي شوية!! واذا مليت ح اجي عليكم!!؟ ف الاول اترددت بس اظنها اتفهمت فكره اني عايزة اقعد مع نفسي شوية!!؟ وفعلا مشت!! اخدت لي حمام!! وكل كلماتو لي سامعاها!! وكأني مسجلاها ف تلفون وقاعدة اسمع فيها!! حتى الضحكة صداها ف اضاني!! بعداك رجعت ع غرفتي!! ومسكت تلفوني!! اتصل عليه ولا لا؟؟ بس اتصل لشنو؟ واقول شنو؟؟ معقولة ابارك ليه عادي كدا!! والفضول حيقتلني!! دي منو؟ وهو ف الحالة دي بفكر ف العرس؟ ولا عايز ينتقم من نفسو ومني!! وبعد صراع مع نفسي اتخذت قراري واتصلت ع ريم!! وبرضو م ردت علي!! فتحت ملفي الامن ودقتت ع صورو ومقاطع الفيديو المرسلها لي!! مره ابتسم ومره ابكي!! وسبحان **** ف تفاصيل كده موجودة!! اليوم اول مره الاحظ ليها!! ولانو عاشق للتصوير كل اللحظات الحلوة العشتها معاه كان موثقة!! ومرسلها لي وف بعض منها مصورنها بتلفوني!! بعداك حزفت كل شيء!! م خليت حاجة ف التلفون بتتعلق بحساام!! ع امل اني اتناساه!! بس هل قلبي حيعمل نفس الشيء؟؟! انا نسيت قلبي انتزعوه مِني!!؟ وف اللحظة ديك رجعت لي ريم!! رديت عليها بصوت مخنوق!! وكان ظاهر ع صوتي انو باكي!! قالت لي مالك؟ قلت ليها اخدت لي نومة علشان كدا صوتي متغير!! قالت لي خلاص م ازعجك اخليك تواصليها!!؟ قلت ليها اتقطعت خلاص!! سكتت مسافة وم قالت لي شيء!! انا بادرت وقلت ليها قبيل التلفون قفل فجأة وم كملنا كلامنا!! قالت لي فعلا و****!! وقالت لي انتي عارفة انو انا اكتر واحدة كنت متنياك لاخوي!! بس يمكن يكون **** م كاتبكم لبعض!! بس اكيد خوتنا ثابتة!! ابتسمت ودمعتي نزلت ع خدي!! وبصعوبة حتى قدرت اقول ليها اكيييد وانا البيناتنا اكبر من انو يرتبط بنسب ولا غيرو!! انتي اختي البحبها شديد!! قالت لي وانتي كمان **** يعلم ويشهد ع مكانتك الجواي!! اتنهدت بصوت مسموع وقلت ليها م وريتني العروس منو؟! قالت لي لَما صاحبة روعة!! قلت ليها اهااااا عرفتها؟ كانت مكرشة ع حساام من زمان وكل مره بصدها!! بس شأت الاقدار انها تكون من نصيبو!! قلت ليها **** يتمم ع خير!! قالت لي اخوي كان متمسك بيك شديييد!! وللان معندو حاجة ل لَما بس ناس البيت لم شافو حالتو النفسية اصرو عليه يعقد عليها!! عسى ولعلى يقدر يتجاوز قصتكم!! وهي وافقت وقالت م عندها مشكلة!! حتى ولو كان بحبك؟ لانها بتقدر تكتسب محبتو ف القريب العاجل ع حد قولها!!؟ شلت نفس حااار وقلت ليها مبروك ليهم **** يسعدهم!! قالت لي وانتي؟؟ قبل م تحكي لي انا زعلانة منك؟ معقولة اعرف من امل وانتي م توريني!!؟ اتألمت شديد!! وقلت ليها الموضوع لسسه ف اولو!! وم اتخذنا خطوة جادة!! قالت لي **** يسعدك وتستاهلي كل الخير!! قلت جمعا!! قالت لي اها انتي عايزاه!! انا قلبي وجعني!! وقربت اقول ليها لا!! بس حتأثر ف شنو اذا قلتها!!؟ وبعد م انا اتخليت عن اخوها!! تاني بياتو حق اتدخل ف الموضوع!!؟ وعم السكوت!! قالت لي مشيتي وين؟؟ قلت ليها معاك!! قالت لي اهاااا م تخبي علي انتي عايزاه!! قلت ليه لو قلت ااي ولا لاا شنو حيتغير!! سكتت لوهلة وقالت لي ولا شيء!! اتنهدت وقلت ليها طيب م فرقت؟ المهم انها بداية جديدة للطرفين!! قالت لي انتو معاندين نفسكم!! بس صدقوني ماف زول حيتألم غيركم!! ابتسمت بحزن وقلت ليها م ظنيت ف آلم اكتر من العشناه!! اخدت ليها نفس حاار وقالت لي **** يصلح الحال!! واستأذنتني وقفلت!! قلبت علي المواجع!! وانا بحاول اخبي حزني جو ناس البيت داخلين!! عملت فيها نايمة علشان م يشوفوني بالحالة دي!! وفترت من البكاء قدامهم!! غطيت وجهي! ورقدت….وبعداك نمت فعلا!! وم صحيت الا مع المغرب!! صليت وم كان عندي نفس اتغدا معاهم!! واكتفيت بكباية الشاي!! ابوي قال لي م بتتصلي تشوفينا وين؟؟ ابتسمت وقلت م نزلت رصيد!! امي قالت ليه وهي فاضية لينا!! م عقبت ع كلامها!! ابوي قال لي كنا مع ناس خالتك!! سألتهم اذا مشو عافية!! امي قالت طيبين بس مستنينك!! وانتي متعززة عليهم!!؟ جيت قايمة علشان م اخش معاهم ف نقاش!! بس ابوي وقفني وقال لي رايك شنو ف مصعب!! قلت ليه م فيه عيب وكل بت بتتمناه!! قال لي اها موافقة عليه!! جيت قعدت جنبهم!! وقلت ي ابوي انا م رافضة بس م مستعدة للزواج اسسسه واتصلو كلموه لو بينتظرني خمس سنة م عندي مشكلة موافقة!! ودا رد تعجيزي!! لاني متأكدة انو مستعجل للعرس!! امي هرجت فيني!! وقالت لي دايرة تعرسي ف الثلاثينات!! حلفت م تخليني اقعد معاهم للوقت داك!!؟ قلت ليها حتجبريني ي امي!!؟ ابوي طلع تلفونو واتصل ع مصعب!! وقال ليه ي ولدي م عندك قسمة ف بناتنا!! و**** يكتب ليك الافضل من بتي!! وامي لمن قامت عايزة تخطف التلفون!! بالجد كانت لحظات عصيبة خلاص والشيطان دخل بيناتنا ولاول مره امي تغلط ف حق ابوي وتسيئو قدامنا!!؟ بس ابوي حكييم صوتو عِلى بس م جرحها بكلامو!! وقامت ع حيلها لبست توبها وطلعت من البيت!! وامل جارية وراها بتوقف فيها!! ابوي وقفها وقال ليها خليها!! وهي زاتها نهرتها وقالت زول يوقفني ماف!!؟ وطلعت!! انا خفت شديييد!! امي عندها ضغط وانفعالية شديييد!! خفت يحصل ليها شيء لا سمح **** بسببي!! وجاني صداع حاااد ودماغي كان حينفجر!! صاح انا زعلت امي مني!! بس ي جماعة دي حياتي انا م بقدر اغش مصعب!! بالجد م بحبو ولا عندي قلب علشان يحب تاني!! وقريب الساعة عشرة امي م جات!! وكلنا متوترين!! وابوي راقد ف سريرو وبسبح!! وامل قله ادبها فيني وكلو منك وامي وم احترمتي رغبة امي وكلام فارغ كتييير!!! م غالبني ارد عليها!! بس علشان نصل وين؟؟ فترت من المشاكل والنقاشات!! وكمان ليها حق!! امي زعلانة بسببي وم معروف مشت وين!!؟ وقريب الساعة١١ حتى جات داخلة!! جينا جارين عليها انا وامل وسألنها مشت وين؟؟ ابت ترد علينا وشت رقدت ف سريرها!! بالجد كان يوم صعب شديد علي الاسرة كلها!!؟ اليوم التاني م قدرت امشي الشغل!! كنت مرهقة شديييد وغير كدا امي حبيبتي راقدة عيانة!! عندها صداع وضغطها مرتفع!! ونحنس فيها علشان نوديها المستشفي تدعي نفسها بالموت!!؟ ابوي اتكلم معاها بس م سمعت منو!! جيتها وانا دمعتي ع خدي وقلت ليها انا موافقة اتزوج مصعب!! ووريت ابوي يتصل عليه يحددو يوم لخطبتنا!! ولبست عبايتي وطلعت!! م عارفة رجولي موديني ع وين؟؟ اتصلت علي مروة تطمئن علي لاني م مشيت الجريدة!! وريتها تاخد لي اذن والدتي عيانة!! ودا الحصل!! وبقيت احاول اقنع نفسي ب مصعب!! وقلت كدا كدا انا حياتي مدمرة!! ومصعب م حيضيف شيء!!؟ م بكيت!! دموعي زاتها زهجت مني!!؟ رجولي وجعوني من المشي!! وقعدت لي ف مسطبة!! وجاني تلفون من ريم!! اول اترددت وم كنت عايزة ارد!! بس فصل وتاني اتصلت!! قلت الموضوع بكون مهم!! رديت وسألتني عن مكاني!! قلت ليها ف البيت!! قالت لي انا جبت الجريدة افتكرتك هناك!!؟ بس نص ساعة واكون معاك!!؟ قلت ليها ف شنو!! قالت لي م تخافي موضوع خاصي بي!! قلت ليها تمام منتظراك؟! وبقيت اسأل نفسي ياترى الموضوع شنو؟! وزي م قالت ف حدود النص ساعة جات!! انتظرتها ف الشارع لانو دخولها البيت ف وضع زي دا حيكون صعب علينا!! لم شافت حالتي اتخلعت!! وقالت لي مالك!! ابتسمت وقلت ليها شلت هم العرس بس!! ابتسمت وملامحها كانت بقول انها مستغربة من الحاصل!! قلت ليها نقعد هنا ولا نمشي وين!! قالت لي تحت ظل الشجرة ديييك!! واشرت عليها؟! فعلا مشينا وقعدنا!! قلت ليها خير ان شاءالله!! شنو الموضوع المهم شديييد البخليك تفتشيني من مكان لمكان!! ضحكت وقالت لي انتي لاقية زول يسأل عنك!! ابتسمت…قالت لي عايزاك تساعديني!! قلت ليها خير ف شنو!! قالت لي جااي يتقدم لي امجد!! دا المعيد بتاعها ف الجامعة كان!! وبعد اتخرجت طلبها للزواج!! حكت لي عنو كتيير قبل كدا بس م ورتني انها عايزاه!! رغم حزني فرحت ليها من جووه قلبي!! وباركت ليها!! ابتسمت وقالت لي كنت مترددة بس يازوله الزمن بقى صعب وزي امجد م حلاقي بالساهل!! وكمان اتعودت عليه وفهمنا بعض والاعجاب متبادل!!؟ قلت ليها **** يتمم ع خير…بس انا مهمتي شنو!! ابتسمت وقالت لي عايزة اشتري فستان! وف مستلزمات ناقصاني عايزه اجيبها!! والصراحة حتكون خطوبتنا مفاجأة!! م عايزة الخبر ينتشر من اسسسه بين المعارف والدفعة!! بس انتي صديقتي المقربة لازم تساعديني!! قلت ليها ابشري!! اليوم البتكوني فيهو جاهزة انا جاهزة!! ققالت لي من دربنا دا نمشي!! لاني خطوبتنا بعد بكرة يوم الجمعة!! وم عندي زمن!!؟ قلت ليها بس انا م جاهزة!! عبايتي مكرفسة!! ولابسة سفنجة حمام!! وحالتي بالبلاء!! قالت لي عبايتك حلوة وماف زول اصلا حيلاحظ ليك ولا لسفنجتك دي!! قلت ليها م بتأخر!! اذا انتي م عايزة تصلي معاي البيت اديني بس عشرة دقائق اغير واجي!! قالت لي بس انا طلبت الترحال!! وفعلا ف اثناء كلامنا دا جات عربية وقفت!! وجاها اشعار الوصول ف تلفونها!! قالت لي مشينا!!؟ م عارفاها شفقانة كدا لشنو!! بس قلت عروس وبتكون مبسوطة!! والزمن ضاق ليها!! ركبت معاها واتصلت ع ابوي سألتو عن امي!! قال لي جاتها خالتك مريم ام امنية!! واظنها اتكلمت معاها!! بس طمئني عليها!! ووريتو بالحصل!! م رضا مشيتي بس قال لي كان ترجعي البيت اول!! وكيف تمشي تخلي امك وهي عيانة!! وقال لي خلاص بعد تجي حنتناقش ف الموضوع!! ونبه علي م اتأخر!! قلت ليها ماشين وين!! قالت لي المعرض الفلاني!! وفعلا مشينا!! وم اتأخرنا ف اختيار الفستان!! لانو بالجد كانت فساتين رهيبة ولو انت مغمض واخترت واحد حيطلع احلا من العينك وقعت عليه!! وطقمتو بالاكسسوارس!! واصرت تشتري لي حاجة!! رفضت واتخنقت من المكان طلعت ليها برا وكنت شايلة ليها اكياس!! بعداك ركبنا وقلت ليها يلا انا بعدا م قصرت!! راجعة بيتنا اشوف امي بقت كيف!!؟ وقالت لي اول حاجة نفطر ونشرب لينا عصير وتمشي!! رفضت…بس اصرت علي!! قلت ليها انتي مؤجرة العربية لليوم كلو!! ابتسمت وقالت لي لحدي م يوصلنا المطعم!! من هناك حيجينا خالد علشان يرجعك امدرمان!! رفضت وقلت ليها ح امشي بالمواصلات!! قالت لي راحتك!! ووصلنا المطعم..دخلنا لم كنت ف المعرض زول بعاين للتاني ولا شغال بيه ماف!! بس لم جينا المطعم الانظار كلها ع ام سفنجة!! بس كلام الناس اخر همي!! قعدنا وقلت ليها م بقدر اكل م عندي نفس و**** بس م حبيت اكسفك!! خليني اشرب عصير ونطلع!! قالت لي اوك!! وطلبنا العصير!! ف اثناء م بنتكلم جاتها مكالمة!! وقالت لي عن اذنك راجعة!! انا فتحت تلفوني واتصلت ع ابوي م ردا!! بالرغم من اني زعلانة من امل بس لازم اطمئن ع امي!! ردت وين انتي!! م ناقصة تحقيق انا!! م جاولت وقلت ليها امي بقت كيف؟ قالت لي كويسة وقامت زاتو!! قلت ليها الحمد***!! وقفلت!! وانا منشغلة بتلفوني سمعت صوت حديدة جنبي!! رفعت عيوني!! اشوف حسام!! انا من الخلعة م صدقت انو دا هو فعلا.ً..؟! وقلت حساام !جيت قايمة مصدومة!! قال لي اترزعي!! وفعلا قعدت!! هو طلع الكرسي لبرا شوية وقعد بقوة ع الكرسي!! وتكل المشاية ع الطاوله!!؟ بقيت اتلفت اشوف ريم!! بس اختفت!!؟ قلت ليه الجابك هنا شنو وطلعت اصلا من البيت ليه ولسسه رجلك واجعاك!!؟ قال لي يعني افهم منك انك مهتمة لامري!! م رديت؟! قال لي مفتكرة اني حأسمح ليك تتزوجي غيري!! انا حاجة جواي عملت فحححح!! وقلت ليه انت طبيعي!!؟ مش ي ودالناس عقدك اتحدد!!؟ قال لي وبرضو مش انتي عرسك قرب!!؟ قلت ليه من الاخر عايز شنو؟! مسك يدي وقال لي انتي؟؟! انا عيونو لمعو!! صدقوني حسيت بفرحة م بتتوصف جواي!! بس م اظهرتها!!؟ واتزكرت كلامي لامي واني قلت ليهم موافقة!! وربطت الاحداث!! لم امل قالت لي امي بقت كويسة وقامت!! قلت بتكون فرحت بموافقتي واحتمال تكون اتصلت ع خالتي؟! وسرحت بعيد!! قال لي انا جنبك وانتي كالعادة سرحانة!!؟ انا لازم كل مره اتوعد خيالك دا بالقتل!!؟ انا دمعتي جات نازلة!! قلت ليه ولَما!! ابتسم وقال لي دي شريحة دخلتها فيك ريم علشان تعرفي انك بتحبيني وم حتستحملي تشوفي واحدة تانية معاي!! بالجد زعلت!! قلت ليه يعني كنتو بتلعبو بمشاعري انت واختك!!؟ قال لي شفتي الاحساس صعب كيف لم تسمع انو روحك حتتاخد منك!!؟ بس بيني وبينك عقلك م رجع راسك واتأكدتي انك لسسسه مييتة فيني!! ابتسمت!! وقلت كلامك صااح بس فات الاوان صدقني!!؟ خطوبتي اتحددت!!؟ قرب علي شديد وقال م بقدر اشيلك واجر!! بس لو اضطريت بخطفك بخطفك!!؟ قلت ليه بس انا زعلانة منك!! وبقيت ابكي بحرقة!! وقلت ليه انت شككت ف محبتي وف اخلاقي!! قال لي كنت غبي وحمار والشيطان غشاني!! فبترجاك سامحيني بالجد انا اتعذبت شديد ي هيامي!! قلت ليه ثقتي فيك م حترجع زي الاول!! قال لي خلي كل شيء للزمن هو بيتكفل بالباقي!!؟ قلت ليه يعني انت بتحبني زي اول!!؟ ابتسم وقال لي م عارف!! بس لم سمعت انك حتتزوجي اول حاجة جات ف بالي اني اقتل الفكر ف زواجك دا!! انا ابتسمت!! قال لي اسف هيامي سامحيني!!؟ اسف لاني جرحتك اسف لاني خليتك تبكي واسف لاني م قدمت ليك السعادة البتستحيها!! بس اوعدك اعوضك عن كل لحظة اتألمتي فيها بسببي!! لو سمحتي ادي حسام حبيبك فرصة تانية!! واكون ممنون ليك طول العمر!! قلت ليه كيف تطالب بشيء وهو ملكك!! خبى وجهه بين ايدينو وبقي يبكي!! وانا بدون احس ع نفسي جاملتو!! وبعداللحظةالشاعرية دي! ريم جات!! وقالت نبطل دراما هندية ونشوف المهم!! اها نجي نسوقك متين الزول دا كرهنا العافية!! ضحكت وقلت ليها تضحكي ع صحبتك!!؟ قالت لي لاني عايزة سعادتك وعارفاك عنيدة وم بتقتنعي الا بالطريقة دي!! قلت ليها والفستان والحاجات الاشتريناها!! ضحكت وقالت لي دا حق السمسرة!! خطوبة لميس صحبتها قربت!! ضحكت وقلت ليها وامجد!! حمرت لي!! لانو حسام م عارف بموضوعو!! قالت لي خلاص بدينا من اسسه عايزة تفتنيني مع اخوي!! بقينا نضحك!! وقالت لينا منتظراكم ف العربية م تتعاورو وتتأخرو علينا!! قلت معاكم منو تاني!! المأذون!! ضحكت وقالت لي م تستعجلي !! دا خالد ي بايرة!! مشت خلتنا بنضحك!! قال لي ملامحك شاخت!! وعارف انو بسبب حبيبك الواطي!! بس انتقمي منو بعدين ف بيتك وقطعيه النفس!! انا ابتسمت بخجل وقلت كدا خلاص رجعنا يعني!! بقي يضحك!! وقال لي لا عايزاني اتنازل عنك بالسهولة دي!! قلت ليه بس ف مشكلة!! قال لي م حتكون اصعب من المرينا بيه!! قولي!! قلت ليه انا قبل م اطلع مع ريم وريت ناس البيت اني مةافقة ع الزواج!!؟ قال لي ي خاينة!! عايزة تبيعيني كنتي!! ابتسمت وقلت امي ضغطت علي!! وانت تميت الناقصة بموضوع عقدك!! قال لي عليك **** غرتي!! ابتسمت بحزن!! ودموعي نزلت…مسكاطراف اصابعي وقال لي بحبك!! سامحيني!! قلت بحاول!! قال لي م رديتي ع الكلمة الاولى!! ابتسمت وجيت قايمة قلت ليه رجعوني بيتنا!!؟ جا قايم وانا ساعدتو!! ولامسنا بعض!! دلوكتي رجعت لي!! اقصد قلبي!!! بقي يضرب شديد وكانو بغني طربا ع رجعة المريود!! قال لي زحي مني!! استغربت وقلت لشنو!! قال لي اهون علي اقع ولا اكون ملامسك وم قادر…! وسكت!! انا فهمتو وابتسمت!! جاتنا ريم جنب الباب!! وقالت شنو الحكاية الزمن!!؟ طلعنا وقلت ليه حنقول لاهلنا شنو!!؟ قال لي خليها ع ****!! وانا الطريق كلو خايفة ع ردة فعل امي!! والممكن يحصل ليها اذا شافت حسام معاي!!؟ مسك يدي وضغط عليها شدييييد وقال لي انا معاك!! م اطمئنيت!! لانو كان معاي قبل المره وخذلني!! بس طردت الافكار البشعة دي من راسي وقلت احسن ابدا صفحة جديدة!! خالد شاغلنا بالمرايا!! وقال لي لو مترددة اكسري حنكو واهم شيء سعادتك!! حساام ضحك وقرب الركازة بتاعتو ع راس خالد!! وقال لو م اخوي الكبير كان فرقشت دماغك!! وبقينا نضحك!! ريم كل شوية تتلفت تعاين لينا وتتبسم وكأنها انجزت!! بس بالجد دا انجاز لانها رجعت لي حياتي!! وهمست ليه وقلت اهلك موافقين!! حمر لي وقال خلي زول يفتح خشمو!! ابتسمت وقلت حتعمل ليهم شنو؟! قال لي ح ابكي ليهم!! وبقينا نضحك!! يااااه زمن من الضحكة دي!! وصلنا البيت!! وانا خايفة من المواجهة!! وكنت لابدة وراهم!! وم فتحت الباب!! دقيتو ومنتظرة زول يجي يفتح!!؟ وجات امل!!؟ اتصدمت لم شافتهم معاي!! وم عرفت تتصرف ولا قالت اتفضلو!!؟ ريم زحتها من الباب وقالت ليها الحر فسختنا وسعي!! وسلمت عليها!! دخلنا ع البيت وهم مشو ع ابوي ف الصالون وانا سقت ريم ومشينا ع امي!! كانت حزينة!! بس م قالت شيء!! الصراحة م كنت متوقعة ردة فعلها دي!! سلمت علي ريم عادي!! وشوية كدا وجاها حساام متركز ع عصايتو!! سلم عليها ف راسها!! وقعد وخالد وراهو!! وبرضو م بدر منها شيء يدل ع غضبها!!واعتذر من امي!! وقال ليها بتك دي بتخصني انا وم بخلي زول يمسك يدها غيري!! واعفي عننا وادينا رضاك وكلام كتييير وحتى خالد م قصر اتكلم مع امي بإسلوب جميل خلاص!! وابوي برضو م قصر!! وقال ليها سعادة اولادنا اهم شيء!! ونحنا دايمين ليهم!! لازم نرحل من الدنيا ونحنا مطمنين عليهم!! المهم م اقتنعت بس شكلها بدت تقتنع!! واظنو لم انا قلت ليها موافقة!! ارتاحت مني شديد وعرفت اني م عايزة مصعب بس علشان راحتها هي ورضاها انا وافقت!! وفعلا دا كان هدفي!! ف اتراجعت!! وقالت سعادتكم اهم!! بس بعدين م تزعلها وتجيببها لي ندمانة ع الفرصة الحتديك ليها دي!! قام ملهوف وعصايتو نساها! وقعد جنبها ف السرير وعيونو بيلمعو! من الفرحة!! واتعهد لامي انو يحافظ علي وم يغلط علي ف يوم!! ومبدئيا كدا وافقت!! بس قالت ليه العرس م بتم الا بعد خمسة سنة!! كلنا استغربنا!! قالت لينا مالكم!! مش انتي قلتي م بتعرسي الا بعد خمس سنة!! وبقينا نضحك!!؟ الحمد*** الذي بنعمتة تتم الصالحات الحمد*** حمداً كثيراً طيباً مباركاً فيه…اهلي وافقو ع رجعتنا لبعض وحسام كان مستعجل سرييع للعرس!! واتحدد بعد شهرين يعني ف العيد!! بعد احمد اخوي م يجي!! بس اصر انو نلبس دبل عقد م خطوبة!! وبعد تحانيس امي وافقت!! وف الايام ديك عقدو لينا!! خلاص بقيت مرتو!! انتو قادرين تتخيلو!! حسام وهيام **** جمعهم بالحلال!! وكتب ليهم يعيشو مع بعض!! وانا الكنت فاكرة الدنيا جايرة علي!! وبديني بالشلوت!!؟ شوفو **** كاتب لي شنو؟ والفرحة الكانت منتظراني!! بالجد قلبي م بيسعها كلها!! منو عايز حبة سعاده اتشاركها معاه!!؟ اما ماسورتي م مصدق!! وكل شوية بيتصل علي بذكرني اني بقيت مرتو!! فيارب تتم لي فرحتي!! ويسعدكم زي م اسعدني بسيد ريدي!! رمضان جا وانا اتحبست للعرس!! ومعزومين مقدماً عرسي خامسة العيد بعد ابوحميد اخوي يجي!! ومع الترتيبات والتجهيزات م حسينا بالزمن!! وفضل لينا القلييييل ونكون تحت سقف واحد!! انتو قادرين تتخيلو السعادة الانا فيها!! واكتملت لم حسام قطع علاقتو مع اباذر الخبيث داك!! وعامل ليه لسسسته وعرضها علي!! وقال لي دي بتحتوي ع كل اعمالي وهواياتي واصداقائي!! اطلعي عليها ونصلي اي حاجة م عجبتك وانا اوعدك انفذها ليك!! المجنون م قادر يقنع انو غيرو م عايزة شنو!! قربو بغنيني عن اي شيء!! والعجب الابتسامة!! كفيله بأنها تأثرني الف عام ف قلبو!! لفترة مؤقتة وقفت شغل الجريدة!! واخدت اجازة مفتوووحة للعرس!! بس متواصلة معاهم!! وع حد علمي انو عبدالله ترك الشغل فيها واختفي!! بسمع انو طلع برا السودان!! وف ناس بقولو مشى ع الاقاليم واستغر هناك!! والصرحة راح واستراح!! طالما انو اتخارج من طريقي م بهمني مكانو كتير ولا الحاصل عليه شنو؟!! خلونا ف المهم!! عرسي ي جماعة بقيت عروس باركو لي!! وان شاءالله عقبالكم!!؟ وزي م **** يجمعني مع تؤام روحي رغم الصعوبات الواجهتنا بس صدقوني وكأنو م زعلنا ف يوم!! بل العكس!! حبنا زاد اكتر!! وبتمنى م تصيبنا عين…و**** يبعد عننا شياطين الانس ويحفظنا ويسعدنا وانتو كمان!! وكل السعادة لقلوبكم وم تشوفو شر ****!! ويجمعكم مع الناس البتحبوهم ويكلل المحبة بالبيت الحلاااال!! وم تنسوو معزومين العرس خامسة العيد

النهاية ………….