مكتملة فانتازيا وخيال رواية بيت الشيطان (1 مشاهد)

[𝙷𝚄𝙻𝙺 𝙼𝙸𝙻𝙵𝙰𝚃]

وفي الجزء الأول من رواية بيت الشيطان دعونا نبدأ بمعرفة كيف ستبدأ احداث الرواية وعن شخصيات ابطالها ؟ كل ذلك في السطور التالية ، نتمني لكم قراءة مشوقة سعيدة للأجزاء .

الجزء الأول من رواية بيت الشيطان​

_بسم ****!! مالك ي راجل؟ م يكون واجعك شيء!!
ولعت اللمبة وشافت الساعة لقتها تلاتة صباحآ!! وقعدت جمبو وهو مبوم!! وقبل م تقوم جارية تنادي ولدو قال ليها تعالي انا كويس!! لمن شالت نفسها بصعوبة! وقالت ليهو لو م قتلتني م بترتاح إنت! قام وإتجه نحوها ومسكها من يدها وقال سامحيني ي ام جمال! قلبها لمن عمل فححح! وقالت ليهو عملت شنو!؟ قال ليها تتزكري القرض الشلتو من البنك لمشروع الإستزراع السمكي!! قالت ليهو م تحرق دمي وريني الحصل شنو!؟ قال ليها زي م عارفة المشروع فشل والبنك طالب بقروشو وانا م عندي المبلغ! وحيحجزو ع البيت لاني راهنو ليهم!! ختت يدها ف خشمها!! وقالت رهنت البيت؟ إتنفس بصعوبة وقعد ف حافة السرير وقال ليها امس إستلمت إنزار بالإخلاء وإلا حيرمونا الشارع!! بكت وقالت كيف تخاطر بمستقبل اولادك!؟ نمشي وين نحنا!! جات قعدت جمبو وقالت إرتكبت غلطة عمرك ي محمود بس انا وعدتك من زمان ف الحارة والباردة مع بعض! وح نطلع من الازمة دي سوا!! ضغط ع يدها وقال انا واثق من فيك بس بناتي كيف حيتقبلو الكلام دا!! ربتت ع كتفو وقالت ليهو خليها علي! بحاول افهمهم بطريقتي وقالت ليهو نوم ليك شوية ي الغالي! اخد تنهيدة مسموعة وقال ليها من وين يجيني النوم!؟ اصلي لي ركعتين لحدي م الصبح يأذن وقام يتوضي..)
اسرة بتتكون من سبعة افراد الام حنان والاب محمود واولادهم جمال وكمال وداليا ودلال دنيا!! اعمارهم بتتراوح م بين30_19. اسرة متعلمة ومترابطة وملتزمة! عايشين ف احد احياء الخرطوم الراقية،وضعهم المادي كان تمام بس مع ضغوطات الشغل ومرض ابوهم تدهور وضهم لدرجة انو رهن بيتو الما بقل عن عشرين مليار للبنك!!
ف صباح اليوم التاني الابو طلع مع ولدو الكبير جمال ووراهو الحصل وبقو يفتشو لبيت مناسب يشترهو لانو البنك اداهم مهلة اسبوع بس! والسماسرة إستغلو حوجتهم الماسة للبيت وبدو يتمنو فيهم!! وف المناطق المشابهة لوضهم م قدرو يشترو كلو من عشرة مليون وفوق!! وتعبو من الجري ورا ناس العقارات والسامسرة! لحدي م اشار ليهو واحد قريبهم انو ف بيت ف المنطقة الفلانية وبسعر مناسب! ف مشو يشوفوهو!؟ من م وصلو المنطقة وقبل م يشوفو البيت كمال قال ليهم حنسكن هنا!!؟ ف حي زي دا!؟ جمال حمر ليهو بالمرايا وابوه سكت م إتكلم!؟ لحدي م وصلو البيت وكمال كان ممتعض الحكاية وشوفة البيت تمت الناقصة ! مع انو بيت مناسب وبتمانهو كل سوداني بسيط!؟ بيت عقد ب طابق بس فوق م مكتمل او بالاصح م مشكبنو لشه!! لكن تحت سمح تلاتة غرف وهول ومطبخ وحمام داخلي وخارجي وسايفون ومساحتو م بطالة!! كمال إتصرف زي البنات وشغال لابوه لا لا مستحيل نسكن هنا!! من فيلة حدادي مدادي نسكن ف الخرابة دي!! وتاني كيف اصحابي يجوني هنا! هو انا خجلان منو!؟ ابوهو نهرو وقال ليهو انا تعبت وشغيت وسكنتكم فاخر وخربت طبعكم! وابوي م خلا لي عمارات ولا شركات؟ كلو بضراعي!! يلا انت ابقى راجل وإشتغل وسوي الانا سويتو!! وإنفعل شديد لمن رجف!! جمال نهر كمال وقعد ابوه ف كرسي وقال للسمسار البيت كويس بس ظاهر عليهو طول م إتسكن!! السمسار قال ليهو و**** مقفل ليهو عشرة سنة!؟ سيادو إشتروه وم اتهنو بيهو..وسكت جمال قال ليهو الحصل ليهم شنو؟ السمسار م جاوب وغير الموضوع وقال ليهم المهم اصحابو عايزين فيهو خمسة مليار قابلة للتفاوض!؟ جمال شاور ابوهو ووافق!! جمال باع عربيتو والام فكت ليها كم دهبة كدا وتمت البيعة ع اربعة مليون ونص! البنات بكو وإتجرسو لانو ابوهم افلس!! بس داليا كانت متفهمة الوضع وم حسست اهلها بشيء بل بتحاول تقنع اخواتها بأنو م يحسسو اهلهم بالتقصير ولا عدم الرضا!! وف نفس يوم البيعة لانو م عندهم زمن جمال جاب عمال نضفو البيت وضربو بوماستك وجيهوه ليهم وإتعاقد معاهم إنو من الاسابيع الجاية حيبدو يكملو بناء الطابق الاول!! وبدو يرحلو ف العفش المهم بس لانو البيت م بشيل معاض الاثاث الكانت عندهم ف بيتهم الاول! وم عرفو يبيعو الباقي ولا يخلو لناس البنك ولا يأجرو ليهو مخازن!! المهم بعد يومين رحلو لبيتهم الجديد ومن هنا بدت القصة!!؟
ف صباح يوم مشمس إنتقلت الاسرة لبيتهم الجديد..البنات بقو يدارو دموعهم من اهلهم لانو داليا الكبيرة فهمتهم الحصل وانو اهلهم محتاجين الدعم النفسي قبل المادي!! بس لسوء حظهم لقو الكهرباء قاطعة ومعدات البناء مالية البيت والطوب المكسر!! فكان منظرو فظيع!؟ لانهم م اعتادو يشوفو بيوت بالمنظر دا؟ امهم زاتها إتأثرت وقلبها وجعها شدييييد وم قدرت تخبي دموعها من راجلها مسكها من يدها ودخل بيها اقرب غرفة ليهم!؟ وشال نفسو بصعوبة وقال ليها ي ام الغالين إنتي كان ضعفتي منو البسندني!؟ بكت ف كتفو وقالت انا م مغطس حجري إلا كلامك دا!! ضحك وقال ليها افوووو انا كضاب!؟ زحت منو وقالت حاشاك من الكذب!؟ إلا متهور ومستعد تجازف حتى بمستقبلنا!! صر جبينو وقال ليها معليش؟ العترة بتصلح المشي!! إبتسمت وقالت انا حفضل ماسكة إيدك لحدي م نكمل الطريق!! إبتسم وقبل م يرد!! داليا دقت الباب وجات داخلة!! قالت ليهم إخترتو الغرفة دي!! امها قالت ليها م مشكلة اي واحدة بتمشي انتو شوفو البتناسبكم!؟ البنات لانهم تلاتة شالو اكبر غرفة وبرضو دنيا زعلانة لانو ف بيتهم الاول نقت نقت ع اهلها لحدي م فصلو لدلال غرفة براها وهي انفردت بغرفتها اما هنا كل الاخوات ف نفس الغرفة!!

يتبع ………

الجزء الثاني من رواية بيت الشيطان​

بكت ورمت ليها مفرش ف الارض قالت م عايزه اي سرير!! داليا ضحكت وجات قعدت جمبها وقالت ليها اصبري ي سجمانة إنتي الصغيرة المدللة يعني م بتقدري تفتحي بوزك دا وتقولي ناقصك شيء!؟ وكل العايشنو دا ظرف وحيعدي ولا اعتبريهو حلم بشع!! وقريب حنصحى منو!! بس لازم ندعم بعض ونحاول نتأقلم مع الوضع لانو دا الخيار الوحيد؟ دنيا بكت وختت رأسها ف اختها الكبيرة وقالت ليها بحاول اقنع نفسي بل غصبتها انها تتأقلم بس م قدرت!؟ دلال قالت ليها خلاص ارقدي قبلك تكوني وفرتي لينا مساحة وممكن محل سريرك اخت مكتبتي!!؟ دنيا قامت متلبة من الارض للسرير وقالت ليها اوووقسم كتبك دي م تبارينا اصلا م جايبة لينا الفقر إلا هي!! وإتشتحت ف السرير خلت اخواتها بضحكو!! جمال جا شاغلهم وقال ليهم غرفتهم زابظة وبحاول يشجعهم ويخليهم يحبوها!! كمال مدا راسو وقال ليهم مقارنتآ بحقتنا بحقتنا دي قصر عدييييل..فبقو يضحكو بصوت عالي…والدينهم لم سمعو ضحكات اولادهم إرتاحو شوية والإبتسامة العريضة كانت فاضة نفسها!! لحدي م سمعو صوت إنفجار!!؟ إفتكروه ف المطبخ!! وكلهم جارين من غرفهم وبعاينو لبعض ومخلوعين!؟ جمال جرا ع المطبخ والابو جرا برا وم عرفو مصدر الإنفجار شنو!؟ ماف نار ولا دخان ولا حتى تراب يدل ع انو ف بيت وقع!! كمال بقى يتماسخ وقال لاخواتو الليلة البيت عايز يقع!! اصلا هو خرابة!!؟ دلال ودنيا جرو لامهم وقالو صحي حيقع ع رؤسنا!! ارح نأجر شقة ولا ننزل ف فندق عادي!! لحدي م اوضاعنا تتصلح!! جمال جا بيضحك ع كلامهم وقال ليهم م تخافو ماف شيء كمال موهم ساي!! بكون دا انفجار بعيد ولا حادث سير م معروف!! امو قالت ليهو بس الصوت السمعناهو زي القول طالع من البيت دا!!؟ الابو قال ليهم م مشكلة المهم نحنا بخييير وم نعمل موضوع!! وقال لمرتو حنان نحنا متنا من الجوع وين الفطور!! ضحكت وقالت ليو طلع من بالنا وقالت لبناتها ارح قدامي ع المطبخ!!؟ دلال قالت ليها تقصدي المخزن!؟ كمال ضحك وقال ليها مسكون كمان الليلة بتموتي!!؟ وقبل م يتم ضحكتو اللمبة وراهو مباشرتآ ف الحيطة ضربت ولا ترشقت ولإ إنضربت سلاح م معروف بس كان صوتها قوي ولمت كمال قام ناطي!! جمال ضحك وقال ليهو م كان تبقى راجل وتثبت للموت البتخوف بيهو اخواتك!؟ خلاهم بيضحكو وكمال بحاول يقنعهم انو م خاف بس إتخلع ولسسه ضحكاتهم عالية!! امو قالت ليهو اي اي صدقناك م بتخاف يلا امش جيب المكنسة ولم القزاز دا!! وقالت لجمال جيب كهربجي يراجع كهرباء البيت كلها لانو الظاهر إنها محملة شديييد ولا اللمبة دي م كانت إنفجرت كدا!! كمال سأل عن محل المكانس وادوات النضافة!؟ داليا قالت ليهو ف الطابق الفوق ي داخل الحمام ي ف الاكياس الجمب السجاد! فعلآ طلع بنشاط وشاف ناحية السجاد المطوي والعفش كتير يمكن يفتش ع الفاضي! فمشي الحمام اول يتأكد!! من دخل حسى بجازبية زي المغنطيس ساحباهو لقدام!! فقلبو ضرب وبلع ريقو وم قدر يتلفت بس بقى يرجع حركة خلف عشان يصل الباب وفجأة باب الحمام إتقفل عليهو.!؟
نواصل بعدين..

الجزء الثالث من رواية بيت الشيطان​

لمن الباب إتخبط كمال رجلو رجفو وحسى بخوفة غريبة وكأنو نبضات القلب بقى مصدرها بطن رجلينو! بصعوبة حتى بقى يرفع رجلو من الارض لحدي م وصل الباب بجر فيهو وبيدفر!؟ والباب م عايز يفتح وحسى بشيء وراهو حاجة ضلها غطى ع جسمو ولمن يجسمو بقى يطعنو من شدة م بكشش ودقات قلبو بتتسمع بأضانو…وجسمو برد بقى م قادر يمسك حتى المقبض بتاع الباب،وصوتو راح وحلقو إتربط عشان يكورك ولا ينادي زول؟ ولم الشيء الوراهو هبش كتفو جا واقع مغمى عليهو!! لم ناس البيت فقدوه بعد ما ختو الاكل رسلو دنيا تناديهو طلعت جري ع السلالم وقبل م تصل الطابق العلوي قالت كمال!! ف صوت قال ليها اممم ماإتكلم بس زي الزول البياكل وخشمو مليان؛إبتسمت وقالت بكون بتكلم مع حبيتو!! قالت ليهو ختينا الفطور ارح منتظرنك!!؟ ونزلت كلهم قعدو ف الصفرة إلا كمال م جا!! امو هرجت وقالت شنو الثقالة دي!! امش شوفيهو بسوى ف شنو ي دلال!! جمال قال ليها خليك؟ وقام هو ومن السلم بنادى ف اخوة لمن وصل فوق إتلفت يمين شمال م شافو شاف الحمام مقفول!! إبتسم لانو كمال متعود كل م يختو الاكل ي تلفونو ضرب ي ف الحمام ي بصلي! قرب عليهو وقال حركاتك دي م بتخليها!؟ اسرع منتظرنك بالاكل!؟ ونقر الباب باصابعو وسيييك الباب إتفتح ع هبشة جمال ليهو فشاف اخوة ممدد ع الارض ودمو كابي!؟ إتخلع وجر عليهو كمال؟ كمال فوق كمال!! فتح عيونك وكمال ف دنيا تانية رفعو من الارض وكان مجرد من ملابسو!! فتح اقرب شنطة ليهو ولقاها حقت المفارش وستائر!! جبد اول حاجة وقعت عينو فيها وبقى يلف ف اخوة ويدو بترجف وبتحسس ف النبض بس من الخوفة م عرف اي شيء!! جات داليا جايطة من السلالم مالكم قال وبتعملو ف شنو والاكل برد!! ومن شافت المنظر صرخت!؟ كلهم جو جارين جمال شايل اخوة وطالع بيهو ع العربية والبنات بيصرخو وامهم خشتها خلعة السنين وبقت تهضرب وتجري ع ابوه وتسأل فيهو ولدي مالو كيمو الحاصل عليهو شنو!؟ لحدى م داخت الابو خلها مع البنات وجرو يسعفو كمال!؟ الام لم فاقت اول زول سألت عنو كمال وانو وين! وروها إنهم ف المستشفى،وقالت لداليا اجري دوري العربية نحصلهم!؟ يس نست انهم باعو عربيتهم حقت البيت! ودلال قالت طلبت ترحال وف اقل من عشرة دقائق جاتهم وحصلوهم ع المستشفي والام كانت قلقانة شديد وجمال م شايل تلفونو وراجلها مره يرد يقول ليها الدكتور بيفحصو ومره بطنش الإتصال لانو ملخوم!؟ ومن دخلت لقت جمال طالع من الصيدلية الدكتور كاتب ليهو حقنة يجيبها!! لم شافهم جا عليهم وامو حضنتو وبتبكي وقالت ليهو كمال الحاصل عليهو شنو!؟قال ليها م تخافي حاجة بسيطة بس تقريبآ إتزلق ف الحمام وخبط رأسو بس خاشي ف حالة صدمة قوية وم عارفين السبب ولحدي م يقوم بالسلامة نعرف منو الحصل شنو!؟وطلعو ع غرفتو امو واختو كملو البكاء لم شافوهو ممدد قدامهم وعينو مغمضة!! بعد قرابة الساعتين حتى قدر يفتح عيونو وامو جات هابكة فيهو وبتبكي وحضنتو عليها ابوهو يزح فيها ويقول كفاية ولدك لسه تعبان هو بكاء وقال لابوة بصوت متعب خليها وانا كمان محتاج لضنها!! بعد الام هدت شوية ابوه قال ليهو حمدلله ع السلامة ي بطل!! سكاكاتك الطوال دل رموك!! جمال ضحك وقال لابوه اسسه يقول ليك السيراميك بزلق ودي صناعة بلدية وشنو م عارف!؟ كمال إبتسم وعاين لاخوة وقال ياريتو.لو كان السيراميك! امو قالت ليهو طيب الرماك شنو!؟ غمض عيونو وشاف سواد هبشو من كتفو فتح مخلوع ولمن قعد ف نص السرير..قالو ليو مالك حاسي بشيء بوجعك!! م ردا وبس هز رأسو بمعنى لا! جمال قال ليهم بما انكم إطمئنيتو عليه اطلعو خلوه ياخد راحتو وبعد الدكتور يفحصو تاني يمكن نرجع البيت!؟ الوالدين وبناتهم نزلو الإستراحة وخلو الاخوان الإتنين مع بعض! جمال صلح لاخوه السرير وقال ليهو اخد راحتك! كمال مسك يد اخوة وقال ليهو البيت م طبيعي فيهو شيء البيت مسكون ي جمال!! جمال اول صر حواجبو وبعداك ضحك قال ليهو الظاهر الخبطة اثرت شوية العقل العندك!؟ كمال يدو رجفت وقال ليهو دا منظر زول بهظر ولا م واعي بنفسو!؟ جمال قعد جنبو وقال ليهو احكي لي الحصل شنو بالضبط!؟ كمال شال نفسو بصعوبة وحكى ليهو من طلع يجيب المكنسة!؟جمال لمن ملامحو إتغيرت وقال ليهو بس لم دخلت عليك لقيت الحمام كلو دم وموية وإنت م لابس شيء!؟ كمال بقى يعاين لنفسو ولقى نفسو لابس المريلة حقت المستشفى ويهبش ف جسمو وقال لجمال م يكون الشيء داك اغتصبني!؟ جمال ضحك لمن رمى راسو ف السرير وقال ليهو بعدا بديت اصدق انو الخبطة اثرت ع دماغك يلا خلص دربك دا سريع ونرجع بيتنا المغرب قرب ونحنا فطور م فاطرين امي لمن جسمها بيرجف!؟ كمال لمن جسمو كشى لمن جابو ليهو سيرة البيت وشال نفسو وقال بينو وبين نفسو كنت واثق انو م حيصدقني!؟ اصلا لو زول قال لي الكلام دا م كنت بصدق؟ بعداك طلعو من المستشفى ومشو بيتهم وكمال كل م يقربو خطوة قلبو بيضرب اسرع ولمن جسمو عرق! امو تقول ليهو محموم حاسي بشيء!! وتهبش ف رقبتو وجسمو وقالت لجمال يزيد التكيف بتاع العربية اخوة مسخن!! وم كانت عارفة كمال المسخن بيهو شنو!؟ لم وصلو البيت وبيفتحو ف باب الشارع كمال م فضل ليهو إلا يقوم جاري وكل غرائزو إتحركت وبتقول ليهو اهرب!؟ وع رفعتو لراسو شاف الشباك بتاع غرفة فوق فاتح بسيييط وإتهيأ ليهو كأنو ف زول واقف وراهو وكان امو بتتكلم معاهو ولمن م انتبه ليها جمال عايز يلفتو وشافو بعاين فوق!! ومركز شديييد لم جمال رفع راسو عايز يشوف اخوه بعاين لشنو!؟ الشباك زاتو إترصع بصورة غريبة لمن كمال قام ناطي!! جمال مسكو من كتفو وقال ليهو م تركز شديد ف الموضوع ودا مجرد هواء م اكتر!! كمال شال نفسو بصوت مسموع واختو دنيا مسكتو من يدو ودخلو البيت مع بعض..ولعو الانوار ولقو اي شي ف محلو وحتى الاكل!! الابو مشى غرفتو والام دخلت مع اولادها غرفتهم والبنات تعبانات وجيعانات جرجرو رجولهم ودخلو غرفتهم عشان يغيرو ملابسهم ويشوفو ليهم طريقة اكل!! الام طلعت من عند اولادها وهي ماشة ع غرفتها قالت للبنات تعالو لمو الاكل دا بكون اتسمم لانو كاشف! وحنطلب دليفري…ومن وصلت غرفتها الكهرباء قطعت!! داليا شالت تلفون دلال شغلت المصباح وقالت انا حلم ليكم الاكل من الصفرة وقبل م تطلع من الغرفة سمعو صوت الصحون بتتكسر وكأنو زول رفع الطاولة فوق وقلب الصحون باكلهم ع الارض!! كلهم جو جارين لم جمال جا طالع كمال ميكو من يدو وقال ليهو م تخليني براي حيقتلوني!!؟ جمال قال ليهو ارجل ياخ ماف شيء بجيك اشوف الحاصل شنو وبجيك!؟ وطلع خلاهو براهو ف الغرفة…!؟

نواصل بعدين………..

الجزء الرابع من رواية بيت الشيطان​

جمال طلع ع ناس البيت وكان مشغل فلاش تلفونو!! وشاف كل الصحون مرمية ع الارض وقال لاخواتو الحاصل شنو!؟ داليا قالت م بعرف سمعنا كسير الصحون وجينا!! امهم قالت ليهم بكون كدايس إتشاكلو وجرو مفرش الطاولة!!جمال قال لامو تحليل منطقي بس دا كديس ولا اسد البجر المفرش ويرمي كل الصحون دي!!؟ ابوهم قال قدر **** وقفلو ع السيرة برانا تعبانين ونسى قال لولدو شغل المولد!! جمال سكت م ردا والمرا مسكت راجلها من يدو وقالت إنت نسيت إنو نحنا غيرنا بيتنا!! شال نفسو بصعوبة وقبل م يدخلو ع غرفتهم سمعو صراخ كمال!؟ قامو جارين واولهم جمال لقوهو واقع ف الارض!؟ ودخلتهم خوفة عجيبة! جمال وبمساعدة اختو رفعوه ف السرير وكان بيرجف وعيونو كأنها حتطلع من مكانها من شدة م منطرهم!! امو حضنتو وبتبكي وقالت مالك ي ودامي الحاصل عليك شنو! جمال اطلب إسعاف ولا اعمل شيء!! ابوهو قعد قدام راسو ورقاهاو حتى راق شوية والكهرباء جات واي واحد رجع ع غرفتو وخلوه نايم ومعاه جمال بفكر ف كلام اخوة بتاع المستشفى إنو البيت م طبيعي!؟ البنات رقدو ف غرفتهم وقبل م ينومو داليا قالت الليلة اليوم دا سيء خلاص **** لا عادو علينا! دلال قالت امين وقالت ليهم تصبحو ع خير داليا قالت ليها امشي المطبخ اكلي اي حاجة م تنومي جيعانة!!؟ قالت ليها جيعانة بس م قادرة امش و**** تعبانة ونعسانا وكمال خوفني شديد اول مره اشوفو خايف كدا! دنيا قالت ليهم وشفتو عينو منظرها كان كيف!؟ و**** انا خفتا منو عديل! داليا قالت ليهم غيرو السيرة خلاص و**** يواليهو بالعافية وقامت ع حيلها ماشة المطبخ تدي ناس امها حليب وكيك لانهم بكونو جيعانين برضو!! وقبل م تطلع دنيا قالت ليهم بس ف شيء محيرني! قبيل لم طلعت انادي ع كمال متأكدة قال لي اممممم ووريتو انو منتظرنو بالاكل!؟ لشنو يخش يستحم وبعد تلاتة دقائق من مناداتي ليهو طلع ليهو جمال ولقاهو مغمى عليهو والدكتور قال فاقد الوعي ليهو اكتر من ساعة ولا قريب الساعتين!؟ ديتتفسر كيف! م قادرة استوعب الحصل شنو بالضبط؟ داليا شالت نفس عميق وقالت ليها ي إنتي بتتوهمي وم ردا عليك كمال ي الدكتور ماسورة وم شايف شغلو ونظرآ لانو اخصائي معروف والمستشفى زاتو سمعتو طيبة يبقى إنتي المخبولة!؟ وحللنا اللغز!! دلال وداليا ضحكو ودنيا جدعت اختها الكبيرة بالمخدة وقالت ليها غياظة!؟ وقبلت ع الحيطة ومقتنعة انو ف زول ردا عليها!! وداليا مشت المطبخ! مرقت الحليب من التلاجة وسخنتو وبقت تفتش ف الادراج لحدي م لقت بسكوت الشاي! وف اثناء م بتخت ف الصحون لوالدينها وحتى اخوانها حست بحركة وراها وكأنو ف زول جاي عليها متخبي!؟ إبتسمت وقالت ف سرها بتكون دي دنيا عايزه تنتقم!؟وقالت لازم تخلعها هي قبل م دنيا تصل ليهت فإلتفتت بسرعة ومعاها كلمة وووواه نظام قبضتك بس م كان ف زول وإتجمدت إبتسامتها بل حست بخشمها عايز يتعوج! رجعت حركة خلف وقلبها بيضرب بصورة خيالية وجسمها لمن مشوك!! حاولت ترفع كاسة الحليب من المسطبة وتختها ف الصينينة بس م قدرت ويدها رجفت والكباية بقت تقيلة شديد!! وقربت تكورك!؟ والشيء الرعبها اكتر إنها لمحت ظل زول مرا بسرعة البرق قدام عيونها وإنهارت كليآ وجات واقعة من طولها!! جمال طالع من الغرفة ماشي ع الحمام لمح اختو ف الارض جا جاري عليها وقال دي مصيبة شنو الوقعنا فيها الليلة دي!؟ حصلها وبقول ليها بصوت خافض عشان م يسمع البقية ويخلعهم الحاصل شنو ورفعها ع طولها وهي متجمدة من شدة الخوف!! إتلفت يمين شمال م شاف شيء اشرت ليهو ع سلة الوساخة إنتبه إنها بتتحرك قرب عليها براحة وهي ملزوقة ف ضهرو ورفسها برجلو الكديسة كوركت وقامت جارية من المطبخ!؟ إتأفف بسوت عالي وقال ليها كل الخوف دا من كديسة!؟ مالكم انتو!؟ قالت ليهو م كديسة متأكدة انو كان ف زول وراي!؟ مسكها من كتفها وقال ليها دي تهيؤات منك بسبب الإرهاق والجوع!؟ قال ليها شيلي صينيتك وامشي!! قشت دموعها ولسه قلبها بيضرب بقوة وقالت ليهو دا حقك انت وكمال قال ليها كمال نايم وانا م عندي نفس اكل!! اشر ليها ع الصينية التانية وقال دا لناس امي!! اؤمأت ليهو براسها شالو وقال انا بوديهو امشي ع غرفتكم إنتي!؟ فعلا شالو الصواني وكل واحد مشى لوجهتو بس هي كانت مرعوبة وماشة وخايفة وحاسة كأنو ف سكين جايها من الخلف وحتخترق قلبها ومن شدة الخوفة م قدرت تلتفت بس سريع سريع دخلت غرفتهم ودفرت الباب ورجلها وختت الصينية وهي بتناهج دنيا ضحكت وقالت ليها كنتي جارية ولا شنو!؟ م ردت عليهم وم حكت ليهم الحصل لانو اخواتها خوافات وحيعيشو فلم رعب الليل كلو وم حيخلو زول ينوم!؟ قالت ليهم ماف شيء! رقدت وإتغطت قالو ليها قومي اشربي الحليب قالت م عايزه!؟ دنيا قالت ليها وفرتي اصلا انا لسه م شبعت!! وخلت اخواتها بنسو وهي كل م تتزكر الموقف جسمها يرجف اكتر واطرافها يبردو!! قريب الصباح كمال صحى ولقى جمال ف الصلاية قال ليهو صباح الخير ي جبان!؟ كمال ضحك وقال ليهو طيب نشوفك حتعمل شنو ف المستقبل القرييييب إن شاءالله ترجل بس!؟ جمال ضحك وقام ورفع الصلاية قال ليهو حيحصل شنو ف المستقبل القريب؟ كمال شال نفسو بصعوبة وإتلفت ع الباب وكان مركز فيهو مسافة جمال قال الووو! كمال قال ليهو يستحسن نبدأ نفتش ف بيت جديد عشان نضمن سلامة البقية!؟ جمال صر حواجبو وقال وضح اكتر!! م تكون لسه واهم نفسك بموضوع انو البيت م طبيعي!! كمال قال ليهو لو حكيت ليك م حتصدق بس لازم تشوف بعينك!؟ والخوف يكون فات الاوان للزمن داك!؟ جمال إبتسم وقال ليهو لمن الزمن داك يجي حكون ف كامل إستعدادي لاي شيء ومش كان بقي جان إن بقى إبليس زاتو م حيقدر يردعني عن حماية اسرتي! كمال إبتسم وقال كأنك بتحكي عن زميلك ف الاساس!! وم عارف إنت حتتعامل مع شنو!؟ جمال قال ليهو م وريتني امس كوركت مالك المسكك شنو تاني!! ومسكك من وين!؟ وبقي يضحك وقبل م يتم ضحكتو الإضائة بقت تزبزب وكأنو حاصل شورت ف احد الاسلاك!! كمال رقد وغطي وشو جمال ضحك وقال ليهو اقسم ب**** إنت جبان!؟ وطاخ الكهرباء ضربت وقال ليهو عداد البيت ف الطابق الفوق ولا ف غرفة ناس ابوي يمكن يكون الفيوز ضرب!! كمال قال ليهو اعمل حسابك دي إشارات ليك إتحصن،جمال إبتسم وقال ليهو م بيحصل لي شيء ولازم اثبت ليك انك موهوم يلا وصف لي الفيوزات وين!؟ كمال قال ليهو انا حذرتك وبدعى م يصيبك مكروة! الفيوزات ف الطابق الفوق بين الحمام والغرفة الماإتشطبت اما التأمين الرئيسي ف غرفة ناس امي!! جمال شال بطارية جا طالع كمال قال ليهو اعمل حسابك..جمال إبتسم وقال ليهو لو خايف علي ارح معاي!! طوالي كمال غطى راسو بالمخدة! جمال ضحك ومشي ع السلالم عشان يطلع يصلح الكهرباء وم عارف المنتظرو شنو!؟

نواصل بعدين………

الجزء الخامس من رواية بيت الشيطان​

بعد طلع فوق فعلا وجه البطارية ع حيطة الحمام وشاف الفيوز..لم قرب عليهو لقى التأمين كلو نازل فتح الصندوق ورفع التأمين البيت نور من زحة يدو تاني التأمين نزل! وكأنو ف شورت ف حتة معينة! إتلفت يمين شمال وكشف ع الارض عشان يشوف ليهو ورقة صغيرة ولا قششة يثبتو بيها عشان م ينزل لحدي م الواطا تتكشف ويشوف كهربجي!فعلا لقى ف العفش المردوم قدامو كراتين وتحف لافنها بورق عشان م تتكسر قطع ليهو واحدة وطبقها صغيرة وضبة البطارية برقبتو وختى الورقة حتى الفيوز ثبت بس اللمبة الفي الممر بتاع الحمام كانت بتربرب وتكنتك وإضائتها مزعجة قال شكلها ضربت! ومشى عليها عشان يحلها وكان ف شيء وراهو ولا براقبو من قريب!! وحسى بشيء م طبيعي وإتلفت بس م لقى شيء!! ولانو متوسط الطول م قدر يصل للمبة بالرغم من انو طلع ف شنطة!! وبرضو م لاحق!! ويئس منها وع لفتتو وراهو شاف اخوهو وراهو!! لمن شهق وجا ناطي!! قال ليهو خلعتني ي عارض!! يلا بركة الجيت اطلع حل اللمبة دي!؟ كمال خشمو م فتحو معاهو ورفع اخوهو من ركابينو وجمال بقى يضحك قال ليهو جايب الطاقة من وين م عامل لي فيها عيان وعايز تموت قبيل!! بس كمال م ردا وفضل ساكت جمال ختى البطارية ف خشمو وقال ليهو م تداغل لي وتحركني عارف انو عندي فوبيا من الكهرباء خليك ثابت! ومن قرب يدو ع اللمبة وقال بسم **** وقبل م يدو تصل اللمة وصل الارض ولانو المطارية كانت ف خشمو وقع ع وشو وعوق حنكو و**** ستر البطارية م وصلت الحنجرة وقبل م يقول اااه اغمى عليهو!! لم غيابو طال كمال كان قاعد مع ابوه ونصح فيهو الصلاة م يقطعها ويتحصن وكلام من دا بس قلبو اكلو ولانو عارف البيت م طبيعي قال لابوه انا ماشي اشوف جمال طول فوق!! ومن هو ف بداية السلم شاف جمال بيزحف ع الارض عايز ينزل ووشو كلو دم؟ كمال صرخ وجرا عليهو وبقول انا وريتك انا وريتك!! والابو جا جاري وناس البيت صحو..واسعفو جمال وعملو ليهو عملية وخيطو حنكو وعندو سن إتكسر نصها بس كويس حالتو م كانت خطيرة بس م قادر يتكلم حلقو واجعو! دلال قالت نحنا اصابتنا عين ولا دا إبتلاء!! شنو ي اصبحنا ف المستشفي ي امسينا فيها!! داليا مسكتا من كتفها وقالت ليها اصبري وقولي الحمد*** كان قدر خفيف!! دنيا قالت ليهم البيت دا شوم علينا وبالذات الطابق الفوق دا لانو اخواني الاتنين وقعو فيهو!؟ المهم الابو قال ليهم اسكتو اخوكم نايم والدكتور قال عايز راحة ارجعو البيت إنتو وبعدين نحنا حنجي!! اول ابو بس امهم اصرت عليهم برضو..كمال رجع البنات البيت ووصا داليا قال ليها م.تطلعو فوق وم تتشاكلو ولا تجوطو ولو الكهربا قطعت اطلعو الشجرة البرا وم تحاولو تصلحوها!! داليا قاطعتو بإبتسامة وقالت حسستني كأنك امي ولا كانو نحنا ***** ولا خايف علينا من شيء!! قال ليها المهم اسمعي الكلام انتي اكبر واحدة فيهم حافظي عليهم إستغربت منىكلامو وقبل م تحصل ع اجبوبة طلع دور العربية ورجع المستشفى!! قالت ليهم نضفو البيت انا حسوي الاكل وفعلا اي واحدة مسكت ليها شغلة لحدي م خلصو دنيا طالعة ع السلالم وداليا كانت ف المطبخ سمعت المشي ع الدرج طلعت سرعة وقالت ليها انزلي م تطلعي دنيا قالت ليها لشنو!؟ قالت ليها كمال قال كدا!! ختت يدها ف نصها وقالت كمال اسه معانا هنا!! ولو قال! شنو يعني لو طلعتا ممنوع كمان اطلع ف بيتنا! وإتلامضت مع داليا وطلعت قالت ماشة تنزل كيس تابع ليها فيهو شامبو الحمام وليفتها الخاصة وداليا م قدرت تمنعها! اصلا هي م عارفة لشنو كمال م عايزهم يطلعو فما كترت معاها الكلام!! مشت وقلبت الحاجات لحدي م لقت كيسها وطلعت حاجاتها وقبل م تقفل سستتو حست بظل مغطيها! رفعت راسها م شافت زول إبتسمت وقالت ف سرها مسرحيتك مكشوف!! وم تطلعي وكمال قال ودا كلو عشان تخوفيني!! شالت حاجاتها وبكل ثقة ماشة!! بس جسمها كشششي ولمن رجولها تقلو! خافت إتلفت م شافت زول بس حاسة بشي وراها!! قالت داليا ولا كان دلال م تهزرو معاي بحذركم!! حست ببخار سخن لامس رقبتها! والمرة دي م إتلفتت قامت جارية جري!! لمن عترت ف السلم داليا جات جارية من هناك وبتقول ليها مالك!! دنيا بأشر ع اختها وم قادرة تتكلم من شدة مبتتنفس بسرعة وبصعوبة حتى قدرت اقول ليها إذا انتي هنا الكان فوق منو!؟ بتكون دلال مش!! داليا قلبها عمل فححح وإتزكرت موقف المطبخ الامس بس م حبت تخوف اختها وقالت ليها دي تهيؤات حبيبتي ولا احتمال تكون دلال!! دنيا من الخوفة لمن كان رمت الشامبو حقها رفعتو وكانو ملابسها ف طرف الكنبة شالتهم ودخلت حمامهم الداخلي!! فتحت الدش ف رأسها والمشهد مسيطر ع تفكيرها وبتضرب بالموية ع وشها ولمن جاتها رجفة..إتسندت ع حيطة الحمام وقالت ي دنيا انتي كبيرة وف الجامعة م تخافي!! اصلا ف شنو بخوف!! م توهمي نفسك إستمي حمامك!! وفعلا كبت شامبو شعرها وبقت تغسل فيهم وبتستحمى لحدى م سمعت الباب فتح براحة وقالت دلال دي إنتي!! وسمعت نفس الصوت لم كان نادت كمال امممم يلا فوق انها مغطية بالصابون كان ف ستارة من الورق المقوى والبلاستك فاصلة بين حوض الإستحمام ومقعد المرحاض يعني عادي ممكت واحدة بتكون بتستحمي والتانية ف الحمام الجمها! فدنيا بتستحمي وبتغسل الصابون الفي شعرها حست بنفس سخن قريب منها ومتفرق ف جسمها وبقت تقول بطلو عوارة م تهزرو معاي ف الحمام و**** اوري ماما!! تاني م حست بشيء!بس دقات قلبها متسارعة وبقت تغسل سريع سريع عشان تفتح!! بس ف اثناء م بتغسل إتبدلت الريحة من ريحة الشامبو العطرية لريحة اقرب للمنهول المفتوح!! لمن كحت والريحة زايدة وم قدرت تتخلص من الصابون كأنها بتغسل ف وحل!! شمت يدها لقت الريحة فيهم وف جسمها كلو فتحت بخلعة وشافت جسمها كلو حاجة سودا م معروفة حبر ولا موية قزارة!! فصرخت ونططت وقامت جارية عريانة من الحمام!! داليا لم شافتها هي زاتها بقت تكورك وجات جارية عليها وحضنتها ودنيا غمرت ليها ف يدها!! دلال كانت برا ف الحوش جات جارية ورفعوها وبعد إستعادت وعيها بقت تشوف ف جسمها وشعرها بس م لقت اي لون اسود كان موية بس راشعة وبواقي صابون ف جسمها!! بقت تبكي داليا قالت ليها الحاصل شنو!؟ حكت ليهم الحصل!! دلال قالت ليهم م وريتكم لقيت شافعة برا ف الحوش بتلعب جمب الشجرة من قبيل بتونس معاها!؟ داليا قلبها عمل دددل وقالت شافعة!! وجرت ع الحوش وحصلتها دلال ودنيا بقت تكورك م تخلوني براي ي حيوانات!! لم م إشتغلو بيها لفحت الملاية المغطينها بيها وحصلتهم ولقت دلال بتقول اسسسه كانت هنا!؟ حتى اسمها ليا!! قالت ساكنين ف الشارع التاني بس جات تلعب مع الشفع ولقت الباب فاتح ودخلت!!؟ واخواتها بعاينو بدهشة وقالت ليهم و**** م بكذب دا الحصل م عارفاها مشت وين!؟ داليا مسكتها من كتفها وقالت ليها مصدقنك! و**** يستر…هناك جمال البنج فكى منو وحلقو وجعو شديد ولو عايز يفتح خشمو ساي بينزف! وبحمر لكمال ساي؟ وكمال محتار من انو اخوه مالو بعاين ليهو كدا!!؟ فجمال مفتكر كمال رماهو عن قصد ف حين إنو كمال لا طلع ولا شاف جمال!؟ يبقى الكان متغمس شخصية كمال داك منو!؟

نواصل بعدين……..

الجزء السادس من رواية بيت الشيطان​

طلعو من المستشفى وإتصلو ع البنات إذا جهزو اكل ولا يجيبو معاهم جاهز!! بس ماف زول ردا،لم وصلو البيت لقو الاخوات التلاتة ف الحوش! امهم اتخلعت وقالت مالكم!؟دنيا قبل م تحكي الحصل دلالقاطعتها وقالت لامها البيت سخن قلنا نشم هواء شوية!! امهم قالت والكهرباء قطعت ولا شنو!! داليا قالت ليها خليكم مننا اها جمال كيف اسسه!! ابوها قال ليهم زي م شايفين كويس! بس اكيد الحلق م حيبرا بين ليلة وضحاها! دخل ع غرفتو ووالدينهم مشو يغيرو ملابسهم…وداليا قالت لاخواتها م تجيبو لامي اي سيرة عن الموضوع كفاية التوتر الضغوطات المرت بيها!! وانا بحاول احكي مع ابوي!! اتفقو ع كدا واي واحدة شافت شغلها! كمال قال لاخوة شايفك مضايق مني؟ انا مزعلك ف شيء!! جمال إتلفت ع الحيطة! كمال مسكو من رجولو وقال ليهو معقولة للدرجة دي زعلان!! جمال بعد جهدآ جهيد حتى قدر يقول ليهو تعبان عايز انوم! كمال طلع من الغرفة وإتجه ع الكولر شرب وسمع كركبة ف المطبخ ومشى عليهو قايلها واحدة من البنات عايز ياكل!! بس لم دخل م لقى زول! بلع ريقو وجا راجع سمع ملعقة ولا غطاء حاجة وقع ع الارض إتجمد قبلو وقلبو بقي يضرب! حاول يتلفت بس رقبتو إتشنجت وم قدر يلفها ف إضطر يتلفت بجسمو كلو!! وانفاسو متسارعة من شدة الخوف بس اصر انو يشوف الشيء دا شنو!؟ وقبل م يشوف شيء امو جات داخلة بوراهو وقالت عايز شيء؟! اتخلع لمن الكباية وقعت منو إتلفت عليها وقال حاسي بشوية جوعة كدا!؟ قالت ليهو خلي ابوك يستحمى وناكل كلنا مع بعض!! لم رجع الغرفة شاف جمال برفس ف السرير ولمن لسانو طالع جا جاري عليهو!! جمال جمال قول بسم ****،لمن حصلو وقبل م يلمسو ف هواء زي العصار خبط كمال وفجأة باب الغرفة وشبابيكها بقو يضربو!! كمال حسى بسكاكين مخترقة جسمو وهبك ف اخوة وقال بصعوبة إنت كويس!! جمال كان نفسو خامي والدم سايل من خشمو…وبعد مسافة حتى قدر يتكلم وقال لكمال وري ابوي يفتش بيت!! وفقد وعيو!! الاهل جو لقو اولادهم ف حالة تانية كمال شبة مشلول وجمال ممدد ف السرير وم قادر يتكلم! البنات فكو ف البكاء والام إتبشتنت!؟ ف جار قريب منهم جا جاري وشاف محمود مخلوع وم قادر يتصرف ولا يساعد اولادو!! الجار اسمو حسن ساعد الابو وركبو جمال وكمال العربية وجري ع المستشفى!! الدكتور قال كمال جاتو مبادي زبحة و**** سترو م شلتو!! وجمال اظنو كحة شديييد والكحة اثرت ع العملية وبقى ينزف! طبعا دا تحليل الدكاترة!! كتبو ليهم علاجات ورجعوهم البيت حنان امهم إنهارت كليآ وقالت ليهو انا بخسر اولادي واولادي اصابتهم عين!! والبيت دا شؤم علينا!! وبقت تبكي وتشهق والجار بعاين ليها بالمرايا وساكت!! بعد م وصلو البيت، داليا قالت لابوها انا عايزه اقول ليك حاجة!! طلعو برا الحوش وخت امها واخواتها مع احوانها وحكت ليهو بالشيء البيحصل! وقالت انو ف شيء م طبيعي ف البيت دا وغالبآ م يكون مسكون ولياعوذبالله!! الابو إتخلع وقال كل دا بيحصل وانا م جايب خبر!؟ انا حسيت بأنو ف شيء م طبيعي وبنوم وانا مقلق وبصحى فجأة مخلوع بس قلتا لاني م اتعودتا ع البيت بس م كنت متخيل انو الاوضاع تصل للمرحلة دي!! خلاص انا بتصرف!! وسمعو دقة ف باب الشارع! داليا خافت ابوها قال ليها انا بفتح!! لم لفتح لقاهو جارو القبيل مشا معاهم المستشفى!! قال ليهو إتفضل ع الصالو بس الراجل رفض وقال ليهو يستحسن نحكي برا الشارع ممكن تتفضل وتشرب معاي شاي لبن ف بيتنا!! محمود شكرو وقال ليهو معليش و**** تعبان وبراك شايف الحاصل معانا شنو بس خليها مرة تانية…حسن شال نفس عميق وقال ليهو صدقني م حاخد من زمنك والموضوع مهم!!داليا كانت واقفة وبتسمع ف الراجل..ابوها قال ليها ادخلي ع البيت وانا ماشي لو حصل اي شيء ناديني!؟ وطلع مع جارو حسن..م دخل معاهو البيت بس حسن مطلع كرسين برا وقعدو هناك وولدو جاب ليهم الشاي!! وبعد صمت طويل محمود قال ليهو خير إن شاءالله الموضوع المهم شنو!! حسن ختى الكباية من يدو وقال ليهو و**** انا م بحب اتدخل ف الم بخصني بس خايف عليكم!! محمود قال ليهو من شنو!؟ حسن قال ليهومعقولة م ملاحظ اي شيء م طبيعي ف البيت دا!؟ محمود جسمو كششي وإتزكر كلام داليا!! قال ليهو انا م ملاحظ بس شايف اولادي حاصلة معاهم مواقف م طبيعية!! الجار قال ليهو م اكذب عليك البيت مسكون ي عوذبالله!! محمود لمن يدو رجفت وختا الكباية ع التربيزه وقال كيف يعني!! حسن قال ليهو بنصحك تطلع من البيت دا باسرع وقت عشان م تتأذى إنت ولا اولادك! محمود قال ليهو بس انا اشتريتو قريب وسيدو م وراني!؟ الجار قال ليهو ولو البضاعة مضروبة التاجر المحتال حيوريك بعيوبها!! وقال اصلا الراجل الباع ليكم دا م المالك الحقيقي سيدو مات ميتة شينة!! محمود قلبو رجف وقال ليهو لو عارف قصة البيت دا ممكن توريني البيحصل شنو بالضبط!!؟ الجار شرب ليهو كباية موية وإتلفت عاين للبيت!! وقال ليهو الحكاية دي من مية سنة وزيادة!! محمود نطط عيونو وقال كم!؟ حسن قال ليهو اهلنا قالو كان ف مرا راجلها رحلها من اهلها ومنطقتها الاتربت فيها وجابها الحتة دي كانت خلا!! وبيوتها بالعدد وبعاملها اسوأ معاملة وبجوعها وكلام كتير الناس بقولهو ولم مرضت وقربت تموت من الزل والإهانة طلقها ولا هجرها م معروف وخلاها ف راكوبتها ف محل بيتك دا!! وماف زول بخش عليها بس الناس بيسمعو كورايكها ومرات ضحك وتاني نار مشعللة وقاعدة ف راكوبتها دي وماف زول بيفدر يقرب عليها لانو ف رهبة كدا بتجي لاي زول بمر بنب راكوبتها وبعداك ظهرت ليها كديسة والناس بشوفوها من بعيد لبعيد بتتكلم معاها وبتضحك معاها وقالو جنت ولا جاتها نفسيات!! لحدي م يوم من الايام الناس شافو راكوبتها مولعة نار وهي بتكورك جوة وكل م الناس يطفو ف النار بتزيد زيادة قال ليك بدون مبالغة كملت موية البيوت كلها الوقت داك الحتة دي م فيها مواسير ولا توصيلات!! المهم بعد الناس قدرو يطفو الحريق كانت المرة إتفحمت حرفيآ عضامها خموها خم من المكان حتى دفنوهن!! محمود قاطعو وقال ليهو دي قصة حقيفية ولا خرافة ساي!! حسن قال ليهو ابوي كان شاب ف الوقت داك وشاهد ع الشيء دا!! محمود قال ليهو طيب نحنا دخلنا شنو بالحصل داك!! حسن قال ليهو انا جاري ليك بالكلام!! يلا الحتة دي بقت مهجورة واي زول بخاف يقرب عليها لانو ف ناس كتار قالو بيسمعو اصوات ومرات بشوفو نار وغيرو!! وم مرور الايام والسنين الحتة عمرت بس الناس عملو مكان بيتك دا والحوليهو كوشة وماف زول قرب عليها!! لحدي م جات الحكومة خططت المكان وملكتها للمواطنين!! وإشتراها راجل لولدو وبرضو م اتبنت لحدي م ولدو إشتغل وعمل ليهو قروش والناس زنو عليهو انو النمرة جايبة الحرامية وف ناس عاملنها كوشة وكلام من دا! لحدي م ةهج منهم وجاب العمال بدو البناء وعملوهو مسلح وخلصو الارضي بعد تعب ماف عمال تمو شهر كل مرة متعاقد مع ناس جداد!! جا سكن فيهو اسبوع بس ولدو وقع من فوق كسر رقبتو!! ومرتو جاتها نفسيات خسرت جناها وبسبب الصدمة اجهضت الفي بطنها!! شهر بالكتير الراجل طالع ع الشغل وانا كنت قاعد ف محلنا دا شوفة عيني!؟ طلع العربية ورجع قفل الباب ومن عايز يتحرك العربية إنفجرت تقول فيها قنبلة وقبل م نحصلو مات ميتة شينة م قدرو يعرفو الحديد من جسمو!! ومن الزمن داك البيت مقفل ليهو عشرة شنة ولا قريب الإتناشر عديل…والباعو ليكم دا اخوة مره المرحوم لم م لقى زول بأجرو وم لقى ليهو بيعة دبسكم فيهو إنتو فلسلامتك ولسلامة اولادك احسن ترحل!!؟ محمود قال لا حولا ولا قوة إلا ب****!! وقبل م يضيف كلمة داليا فتحت باب الشارع وقالت ابوي اجر!!

نواصل بعدين……..

الجزء السابع من رواية بيت الشيطان​

محمود وجارو قامو جارين ع البيت وقبل م يحصل بيسأل ف داليا ف شنو!!؟ قالت ليهو امي حصل امي!! جرو ع غرفتها ولقو كمال بهدي فيها وجمال حاضن رجلينها وم قادر يتكلم ودموعو نازلة وامو ترفس وتشهق وبقت زي الزول الخانقو اكل!! بتستنشق هواء بس م بتقدر تزفرو!! وعيونها منططة وبتأشر بيدها ع السرير ولا الدولاب م عارفين كانت خايفة شدييد..رفعوها ع السرير..وبناتها بيبكو!! ومحمود بقى يقرا ليها وهي تهيج اكتر وم قادرة تتنفس!! وجمال بعد صعوبة بقول ليهم الدكتور ودوها الدكتور والدم مارق من خشمو ومتألم بس خايف ع امي لانو منتظرها بالجد بخوف!! جارهم حسن قال ليهم دقيقة اجيب شيخ المسجد ولو ماف إستجابة نوديها المستشفي…حسن جاري جري عشان ينادي الشيخ وهنا حنان مكنكشة ف راجلها وخلاص عيونها طاحت وكل م ينزلو يدها تلقائيآ بتترفع فوق!! داليا إتلفت ع محل امها متأشر بس م شافت شيء وركزت كوييييس حست كأنو ف زول دفرها بإيدينو الاتنين ع صدرها لمن قنتت وجسمها رجف وقلبها عايز ينشق من شدة م بيضرب!! شالت عيونها عن الحيطة وبقت تعاين لامها،واخواتها دلال بتدعك لامها ف صدرها ودنيا ماسكة امها من نصها وبتبكي!! وف اللحظة ديك حسن دقة باب الغرفة وقال البنات يطلعو برا ويفضلو بس الاولاد ومحمود عشان الشيخ يخش!! اول دنيا ابت ومسكت ف امها بس ابوها طلعها بعد تعب وبقول ليها إنتي م عايزة مامتك تتحسن يلا حبيبة بابا اطلعي وادعي لماما!! طلعوهم برا والشيخ دخل وقفلو عليهم الباب!! شوية كدا سمعو كواريك امهم!! وهنا دنيا تصرخ معاها ودلال متجرسة وداليا م قادرة تهدي اخواتها ولا تصبر نفسها…وسمعو جوطة جوة امسك ي كمال والام تجعر والشيخ بيقرأ ليها!! وبرا البيت كلو بقي يتهز كأنو جا زلزال الاثاث والنجف والابواب وحتى الكهرباء بقت تزبزب وهنا البنات دخلتهم خوفة لا يعلم بيها إلا ****…وإتماسكو التلاتة داليا اي اية جاتها ف راسها قالتها ومن شدة م خايفة حاسة بنفسها بتداخل ف السور ولخبطت الايات ودنيا تصرخ لمن غمرت وجوه الام صرخت صرخة قوية لمن تحس عنها صدى!! وعم الهدوء المكان والكهرباء لمن قطعت!! وف اقل من تلاتة دقايق جات..الشيخ طلع عرقو بينتف وم عاين للبنات وطلع وحصلو حسن! والبنات جرو ع امهم..لقوها ممددة جثة بس ف السرير وكلهم بصوت واحد صرخو…وجرو عليها ماما ماما!! ابوهم قال ليهم اسه احسن خلوها ترتاح شوية!! والاولاد مرهقين من مجابدة امهم واظنها رافسة كمال ف وشو لمن عندو خدوش!! الظاهر إنو شافت شيطان واليعوذبالله…وبركة الم جنت! ابوهم خلى البنات راقدات مع امهم ف سرير واحد..واحدة حاضنة الرجول والتانية اليد! وكانت حالتهم يرثى لها!! الابو لقى حسن نفسو خامي ولمن ماسك ركبو إتخلع وجرا عليهو وبقول ي ساتر الحاصل عليك شنو!! حسن قال ليهو انا كويس م تخاف علي إتخلعت بس ولا شفت تهيؤات تقريبآ بس إنت حصل اولادك خليهم يبيتو معاي ف بيتي لانو م بعروف يحصل شنو تاني!! محمود مسك حسن من كتفو وقال ليهو كتر خيرك و**** نعم الجار!! بشاور الاولاد وإذا م حنسبب لناس بيتكم اي ضيق ولا إزعاج ممكن ابيتهم معاكم ومن باكر بإذن **** حنشوف لينا بيت للإيجار…حسن قال ليهو عيب ياخ م تقول كدا الجار قبل الدار! وانا م قمت غير بالواجب وحبابكم والف وإن م شالتهم الارض يشيلكم الرأس! محمود إبتسم وشكر جارو مره تانية..وحسن إستأذن انو ماشي ع بيتو تقريبآ عشان يهز ليهم غرفتين!! وقبل م يطلع إتزكر كلام الشيخ ووقف محمود قال ليهو نسيت اوريك؟ الشيخ قال بكرة حيجيب حفظة قرأن ومشايخ يقرو ف البيت وعسى يقدرو يطردو العوارض!!محمود قال ليهو خبر حلو! إن شاءالله يقدرو يحلو القصة دي!! وحسن طلع ع بيتو ومحمود رجع ع اولادو!! وراهم يمشو ع الجيران وحيفضل هو مع مرتو وواحد من الاولاد عشان م يتقلو ع الجماعة!! بس كلهم رفضو ي يمشو مع بعض ي يقعدو مع بعض!! فباتو كلهم ف نفس الغرفة وم قدرو ينومو لو كان من شدة التعب ولا الخوف!! والواطا زاتها صبحت سريع!! الصباح الام كان عندها صداع عايز يكسر راسها لمن وشها ورمان!! داليا جابت ليها حبوب الضغط والإسبرين ومسكن!! وحركتهم ف البيت قلت واي واحد وبتلفت زي المودر ليهو شيء وكانت الرهبة مسيطرة عليهم!! لحدي م جاهم جارهم وكان زعلان لانو م جو باتو معاهو وقال ليهم ارح البيت بهناك الشيوخ حيجو الساعة عشرة!؟ يعني بعد ساعة ونص!! فعلا البنات وامهم مشو ع الجيران والاولاد وابوهم فضلو ف البيت وم كان ف شيء غريب! لحدي م الشيوخ جو وبعدام تبدلت الاوضاع وبان المستخبي!!

جا شيخ الجامع وجاب معاهو خمسة تانين م شايلين معاهم اي شيء!! واحد فتح الوضاية عايز يتوضى واحد منهم وقفو وقال لو واحد عايز يتوضي يشيل موية من برا البيت؟ فعلا حسن مشي جاب اباريق من بيتو وإتوضو برا البيت ودخلو!! الشيوخ دخلو البيت كلو م خلو حته م شافوها وفرشو فرشة ف الهول وقعدو ف شكل دائرة وبدو يقرو!! من الفاتحة والبقرة وتاني ايات.قرأنية متفرقة واذكار وتلاوة ف الاول م كان ف شيء! والهدوء عامي المكان
نواصل بعدين

الجزء الثامن من رواية بيت الشيطان​

جا شيخ الجامع وجاب معاهو خمسة تانين م شايلين معاهم اي شيء!! واحد فتح الوضاية عايز يتوضى واحد منهم وقفو وقال لو واحد عايز يتوضي يشيل موية من برا البيت؟ فعلا حسن مشي جاب اباريق من بيتو وإتوضو برا البيت ودخلو!! الشيوخ دخلو البيت كلو م خلو حته م شافوها وفرشو فرشة ف الهول وقعدو ف شكل دائرة وبدو يقرو!! من الفاتحة والبقرة وتاني ايات.قرأنية متفرقة واذكار وتلاوة ف الاول م كان ف شيء! والهدوء عامي المكان لحدي م وصلو ايات السحر وماكفر سليمان ولكن الشياطين كفرو! وإنقسمو لمجوعتين مجموعة بتقرأ ومجموعة بتقول ف ادعية وأذكار وبقو يسمعو صوت هدير امواج وضجيج م معروف مصدرو! كمال وجمال طلعو برا وابوهم قاعد طرف وبحاول يحصن نفسو واولادو! وبعداك البيت ضلم والواطا صباح والساعة 11صباحآ بس الشاف البيت حيقول المغرب شوية كدا ويأذن!! والنجف يكشكش والكهربا تضرب يمين وشمال!! والشيوخ ولا كأنو حاصل شيء ومواصلين قرايا بل ومنفعلين كمان!!؟ لحدي م الارض بقت ترجف من تحتهم وسمعو صوت قريب لي خوار الثيران، والعفش بقى يطاقش وفجأة البيت بقى خارج نطاق الجاذبية وكل شيء ف البيت إتعلق ف الهواء حتى الشيوخ ب فرشتهم ودا خلو كان م.بين خمس لعشرة ثواني متزامن مع الصوت السمعوه!؟ وفجأة كل شيء وقع ع الارض حتى بعض من الشيوخ م إستوعب الحصل ومن الخلعة نسى كان بيقرا ف سورة شنو!؟ وم معروف الخوف دخل فيهم شنو!!؟ ولا شافو شنو؟ ف إتنين قامو جارين واحد **** مرقو والتاني قبل م يصل الباب سمعو صوت عضام بتطحن بس م معروف مصدرها السلسلة الفقرية ولا الرقبة والشيخ جا واقع جثة هامدة!! والبقية كانو مركزين ف التلاوة ويمكن خافو يوقفو ويحصل عليهم اسوأ من الحصل مع زميلهم بس محمود قام جاري عليهو وكورك لاولادو وجاهوه كمال وإتخلع من منظر الشيخ والبيتشاف وكأنو قطعة لحم خالية من العضام!! م ظاهر ليهو عضم شالوه لحم ساي وطلعو بيهو برا وكمال لمن داخ!! والشيوخ الجوه وضعهم إتأزم واحد دا بيقرا وحلقو مربوط وخانقنو والإتنين التانين ومن ضمنهم شيخ الجامع كانو تعبانين شديد ولمن حلقهم واجعاهم من القراية وبدون مبالغة صوت الشيء لمن اسمعوه لمن الحيطان بتتصدع وكأنها هزة ارضية مدمرة وفجأة سمعو كلمة حتموتو!! بعداك زول وقف ماف حتى شيخ المسجد قام كاتح!! بالجد الصوت كان مخيف وم من الاصوات البنسمعها كل يوم!! و**** يستر من الخوفة م يجنو!! لم وصلو برا البيت الشيخ بقى يناهج وقال لمحمود الشيء دا غلبنا و****…**** يحميكم بس ابعدو من البيت دا!! ومشو ع كدا وجثة الشيخ المعاهم اسعفوه بس كان ظاهر عليهو ميت!! ودا الخوف محمود اكتر وقال ليهم ماف زول حيعتب البيت دا تاني واتصل ع كم واحد من معارفو يشوفو ليهو بيت إجار ولا شقة مفروشة!! وفضلو اليوم داك مع جارهم حسن وباتو معاهو وف الليل شافو البيت بيضوي زي الفيهو كشافات وتاني نار مولعة ف الطابق الفوق وف اصوات كواريك عديييل وخوفو الحلة كلها من بيوتهم…لحدي م مرت حسن قالت لحنان انا بعرف لي مرة بتدق الظار وبتتعامل مع السحرة والناس المشعوذين ديل!! رايك شنو نكلمها تشوف لينا واحد يحاول يطلعهم بالتي هي احسن!! يمكن يستجيبو ليهو ولا يشوف طلباتهم!!؟ حنان قالت ليها مستحييييل **** بينا وبينهم ومالنا ومال المشاكل وراجلي زاتو م بيرضى كلام زي دا!؟ وهو القرأن م جاب نتيجة الدجال يجيبها!! قالت ليها يمكن يكون الشيء دا يحر عاملنو ف البيت دا وانتو م عتدكم فيهو ذنب والشيخ بتاع السفلي بيقدر يحلو!! وف حاجات م تتعالج إلا يكون العلاج من جنس المرض!! إنتي فهمتيني مشش؟ وكمان انتو بتمرو بضائقة مادية لازم تتصرفو وتعالجو القصة دي عشان تعيشو ف بيتكم مرتاحين!! حنان قالت ليها معليش لو ضايقناكم مره حسن اتخلعت وقالت ليها و**** دا ماكان قصدي بس م كنت عايزه ليكم الجهجهة!؟ وقالت ليها خلاص انسي الموضوع وطلعت ع المطبخ وفضلت حنان بتفكر ف كلامها وقالت يمكن الدجال يقدر يتواصل مع الجن ياعوذالله الساكن البيت!! وتاني إستبعدت الفكرة وراجلها طلع يفتش بيت هو وكمال بس رجعو خائبين!؟ وقال ليها م لقيت والشقق ضيقة شديد غرفة ومطبخ وهول قدر البلكونة بس!! وانا اشتغل عشان نطلع من الازمة دي ولا اقعد اكابس ف الإجارات والبيوت!! وطلع من عندها وتاني رجعت فكرت ف الموضوع بتاع شيخ السفلي وطلعت عشان تقنع راجلها بالموضوع!!
حنان طلعت برا عشان تكلم راجلها بفكرة الدجال!؟ وكانت مترددة شديد…لقتو قاعد مع بناتو وبفاكرهم ف البيحصل قالت ليهو تعال عايزاك!؟ قال لبناتو م قلت ليكم م بتقدر تقعد من دوني!! ضحكو رغم الحزن والخوف الجواتهم..مرتو قالت ليهو تعال ي راجل ي مخرف!؟ لم دخلو الغرفة قفلتها عليهم وقعد ف السرير منتظرها تحكي!؟ وهي بتقول ف سرها **** يستر و تبقي لي سبب طلاق!! قال ليها ناس البيت متحسسين من قعدتنا ولا حاجة!؟ قالت ليهو لا بسس ف موضوع تاني!! إبتسم وقال ليها بس م تقولي مشتاقة لي!! ضحكت وقالت اعقل؟ ف ظروفنا البنمر بيها دي لو فكرت ف…ياخ خلينا ف المهم!؟

نواصل بعدين..

الجزء التاسع من رواية بيت الشيطان​

حنان طلعت برا عشان تكلم راجلها بفكرة الدجال!؟ وكانت مترددة شديد…لقتو قاعد مع بناتو وبفاكرهم ف البيحصل قالت ليهو تعال عايزاك!؟ قال لبناتو م قلت ليكم م بتقدر تقعد من دوني!! ضحكو رغم الحزن والخوف الجواتهم..مرتو قالت ليهو تعال ي راجل ي مخرف!؟ لم دخلو الغرفة قفلتها عليهم وقعد ف السرير منتظرها تحكي!؟ وهي بتقول ف سرها **** يستر و تبقي لي سبب طلاق!! قال ليها ناس البيت متحسسين من قعدتنا ولا حاجة!؟ قالت ليهو لا بسس ف موضوع تاني!! إبتسم وقال ليها بس م تقولي مشتاقة لي!! ضحكت وقالت اعقل؟ ف ظروفنا البنمر بيها دي لو فكرت ف…ياخ خلينا ف المهم!؟ قرب عليها وقال اها وريني الاهم مني دا شنو!؟ شالت نفس عميق وحكت ليهو كل الكلام القالتو ليها مرت حسن!! ف إتحولت إبتسامتو لتكشيرة!!؟ وقال ليها معقولة إنتي تفكري بالطريقة دي!! قالت ليهو طيب نسوي شنو!؟ تاني بتقدر تشتري بيت!؟ قال ليها وعشان إبتلاء بسيييط ذي دا امشي لدجالين! وبتوع ظار وكلام فاضي؟ شيلي الفكرة من راسك يكون احسن!! وطلع خلاها!! إتاففت وبرضو م شالت الفكرة من راسها! ورت مرت حسن إنو راجلها رفض وإتفقو يجيبوه بالدس! وفعﻵ مرة حسن إتصلت ع المرة وديك ولا صدقت كلمت ناسها وحكت ليهو إنو البيت خطير وكلام من دا بس زولها الجايباهو متعود عليهم وعندو خدام منهم كمان!؟ وإتفقو يجو اليوم التاني من الصباح لانو محمود بكون بفتش ف بيت وبعداك بيمشي الشغل وحسن نفس الشيء يعني م حيكون ف راجل ف البيت!؟ فعلا اليوم التاني كلهم طلعو جمال سبق ابوه ع الشغل وكمال كان سايق لابوه وبدو رحلة البحث عن بيت؛والدجال جا وجو معاهو إتنين المرا البتدق الظار هي الوصفت ليهم البيت وواحد تاني بساعدو!! لم وصلو البنات سألو امهم ديل منو الواقفين جمب بيتنا ديل!؟ وحتى بنات حسن قالو م بعرفوهم بس الامهات طابخاتنها مع بعض!! وطلعو عليهم وبوراهم البنات!! الزول او الشيخ الدجال متلفي ب سبح وشايل عصاية فيها قرون وعامل إستعراض عجيب!؟ إتكلم مع حنان وقال ليها فلانة بتاعة الظار حكت ليهو الحصل وهو حيطردهم من البيت بس قروشو كدا!! وطلب اكتر من عشرين الف!! حنان قالت ليهو م مشكلة القروش بس انت خارجهم لينا من البيت!! وقالت ليهو م عندي قروش كاش بس بديك دهب بعادل قيمة القروش!! فواقق ع طول.. وشوش للمعاهو ف اضانو وطوالي داك مشى الركشة الجو بيها ونزل ليهو سخل اسود رضيع الدجال لبس السخل حاجات ف رقبتو وف قوائمو ورشاهو بحاجة كدا شايلها ف كرستالة وكل نسوان الاسرتين متابعين الحاصل وفجأة الدجال كسر للسخل رقبتو ورافعو فوق وببشر بيهو والبنات كوركن من بشاعة النظر ودنيا لمن غمرت..وبقى يهمهم بكلام م مفهوم وقبل م السخل روحو.تطلع اداهو.لمساعدو التاني وطوالي داك ختى طاسة كدا لقها للدم لحدي م بقى قريب ربعها! فمداهو للدجال وشال السخل وطلع بيهو.برا!! وداليا جاطت ف امها دا شنو التخلف دا وكيف تجيبي ناس زي ديل!! طيب اسسه فرقهم شنو من الساكنين بيتنا!! امها نهرتها وسكتتها وقالت ليها لو م عاجبك ادخلي جوة بس انا م ح اخلي اولادي وابوهم يعانو!!؟داليا شالت نفس سخخخن ودخلت بيت حسن ورزعت وراها الباب!! هناك الدجال قعد ف نص البيت ومسك طاسة الدم القبيل ديك وبيكتب ف السيراميك تخيلو بيكتب ف ايات قرأنية بس تقريبآ فيها إضافات وتعاويذ شيطانية ولمن الاحرف ف الارض بتطلع بخار ولا دخان!! والدجال شرب منو ومسح ع جبينو بباقي الدم داك ومساعدو المعاهو غطاهو بقطعة قماش!! وشوية كدا والبيت يتقير كركبة هنا وصوت هناك وضل يتخاتم ف المكان والدجال بقى يرجف زي الطاقاهو كهرباء ومتغطي وماف زول يقرب عليهو وبقى يهمهم ويغمغم؛والبنات وامهاتن خافو وجرو من البيت وفضلو ف الشارع!؟ وبقو يسمعو بردبة وهيجان كأنو البيت بقى زريبة ابقار وهائجة كمان بس البيقدر يخش منو ويشوف البيحصل جوة!!؟ كلهم خايفين؟ الدجال بعد قريب الساعة حتى طلع دائخ وعرقان وقال ليهم شغلتكم محلولة!! بيتكم دا م ساكنو جن عادي (يعوذبالله) بل ساكنو مارد!! شيطان عديييل ياعوذبالله!! واكعب نوع كمان وقال دا بيتو وم بيطلع بس انا اقنعتو بطريقتي!! بس بشرط تتنفذ طلباتو وكلها بسيطة وساهلة وخلوها علي دا شغلي!! حنان بخوف كدا قالت ليهو يعني حيطلع قال ليها اكيد!! خشت مرقت ليهو غويشة وقالت دي فيها اكتر من عشرين جرام يعني اضعاف المبلغ الإنت عايزو حلال عليك بس خليهم يطلعو!! مرت حسن بتقرص ليها ف عيونها بس حنان م فهمت شيء! والدجال م صدق لمن ضحك!؟ وقال ليها حنجي بعدين العصر نتم باقي الطقوس وترتاحو منو لﻷبد..قالت ليهو لا بعدين م تجي راجلي حيكون قاعد وحيعمل لينا مشكلة خليهو بكرة الصباح ف نفس الزمن!؟ قال ليها ماف طريقة يمكن يغير رايو الشيء دا لازم الليلة نتم الموضوع!! ومشو خلوهم محتارين!! مرت حسن اسمها عزيزه قالت ليها لشنو اديتيهو الدهب!؟ اسه لو طلع كضاب ولا م قدر يطلعهم قروشك بتروح عليك!!؟ حنان قالت ليها و**** م كنت مركزه بس عايزه الشيء دا يتخارج! وم مشكلة ضاع مننا الاكتر من الدهب!؟ عزيزه عوجت خشمها ودخلت!؟ والبقية وراها!! وبقت المصيبة بعدين الدجال جاي ورجال البيت حيكونو قاعدين كيف يقدرو يمررو الوضع بدون م تحصل مشكلة!! والرجال جو من الشغل ومحمود جاي فرحان قال ليهن لقينا بيت بسعر مناسب وحنرحل من بكرة ولا بعدو!؟ وومرتو خجلانة توريهو الحصل وداليا الموضوع قاعد ليها ف حلقها بس خايفة توري ابوها وتكون سبب خلاف بينو وبين امها!!!؟ وقبل يتكلمو الشيخ الدجال جا!؟

نواصل بعدين…

الجزء العاشر من رواية بيت الشيطان​

الشيخ المشعوذ جا وجاب معاهو نفرين زي المجانين عمالقة ووسخانين شديد ومنظرهم يقرف!! وهنا حنان بتحاول تفتح الموضوع مع راجلها جا كمال ملهوف وقال لابوه ف جماعة داخلين ع بيتنا!! عندك علم بيهم!!؟ ابوه قام ع حيلو وقال ليهو ابدآ م عارف…ارح نشوفهم!؟ حنان قالت ليهو ديل جو ينضفو البيت ويطلعو منو الشيطان (ياعوذبالله) جا عليها منفعل وكورك فيها عملتي الفي راسك!! عايزه تستخدمي وسيط روحي!؟ ولدو قال شنو!؟ قال ليهو اي امك مشت جابت دجال!؟ وهي بتحاول تبرر!؟ ومحمود قرب يفقد اعصابو ويسصرف معاها تصرف م تمام!؟ بس ولدو تدخل ووقف ف نصهم ومسك ابوه من يدو وطلع بيهو ولسسه الابو جايط! وطرد الشيخ والمعاهو!! وحسن حاول يهديهو!! وإعتذر وقال بتكون دي فكرة مرتي بس بتصرف مغاها بعدين!؟ وحصلت مشادة كلامية بينو وبين الدجال وحسن بهدئ فيهم ومسك محمود وطرف بيهو قال الحصل حصل وبما انهم جو خليهم يحاولو يمكن يقدرو يساعدونا!!؟ محمود صر حاجبو وقال حتى إنت ي حسن!! بتأيد شغل الدجل والشعوذة دا!! اولادو إتكلمو معاهو وقالو م بننكر امي غلطت بس بما انو بدو نشوف النهاية شنو وم حسرانين شيء لو م جابو نتيجة يمشو من هنا!! محمود ركب عربيتو وقال ليهم انا م بحضر مهزلة زي دي وبرئ امام **** إني اشهد ع معصية زي دي!! وإن شاءالله م يتأذي فيكم واحد!! ودور ومشى وجمال كان بنادي عليهو بس بدون فائدة؟ مشو ع الشيخ وقالو ليهو عندك فرصة واحدة إذا م قدرت شيل حاجاتك وامش من هنا؛عاين ليهم بإحتقار وقال لخدامو ارح شعلنا إبتدا وجمال وكمال جو تابعنهم الشيخ قال ليهم ماشين وين!؟ البيت خطر عليكم نحنا محجوبين منهم بس إنتو!؟ وقال ليهم احسن تقيفو برا…ودخلو عند رملة مرقها من جيبو ف كيس كبها ف يدو وبدا يحولها من يد للتانية ولمن لونها من اصفر بقى اسود زي السكن!! سفة منها حبة ورشة ف الإتنين المعاهو ورجع الكيس محلو ودخلو!! وقال لكمال مهما سمعتو ومهما حصل م تجو داخلين!! نص ساعة كان م طلعنا خشو إستلمو جثثنا!! وإبتسم ودخل…خلا البرا بتشاوفو وفعلا من دخل البيت ضلم قعدو ف نص البيت والمرة دي مرق مصحف!؟؟ ماف داعي تعرفو عمل بيهو شنو بس اكيد شيء محرم…ورجع تاني يقول كلامو الما مفهوم داك وبيرجف وبزبد والمعاهو شايلين صحون فيها شيء م معروف شنو بس بوخو طالع زي الاكل المنزل من النار؛وحايمين بيهو من زاوية للتانية كأنهم مقدمين غربان للشيطان!! والصحون إتنفضت من بين إيديهم والبيت كلو بقى دخان!!وماف زول شايف التاني وفجأة الشيخ الدجال بيجعر بطريقة غريبة لمن البرا خافو!! وبسمعو اصوات زي الرعد ف البيت والشيخ طاح ف الجو وفضل علق فوق وبخشمو بيتحرك كأنو بخاطب ف زول!!وهنا المعاهو هاجو واحد رأسو بيتهز والدم بمرق بالعيون والانف وماسك ليهو عضام مدخلة ف خيط زي العقد وبلف فيهو!! والتاني بارك ف الارض كأنو نايم ولا منوم مغنطيسيآ ولا ميت!!؟ والبيت شكلو إتغير كأنهم ف كهف ولا ع سطح كوكب تاني وفجأة طلعت حاجة من الارض شبيها بالدخان ف شكل ثعبان والدخان إتلفى ف المنوم دا!! وف صرخة قوية م معروف مصدرها شنو وطوالي الدخان دخل للراجل المع الشيخ بجبينو وفجأة ملامحو إتغيرت وعروقو وقفت ولونو إتغير وكأنو جثة منتشلنها من بحر وبدت تتحلل!!؟ وف اللحظة ديك كل شيء رجع طبيعي والراجل المنوم وقع ع وشو! والكان بسيل منو الدم لسسسه بيرجف ويدو لمن إتجرحتت بسبب لف عقد العظام داك!! والشيخ قام بيتدروخ ونفسو قايم وقال ليهم شغلنا إنتهى يلا تم الباقي!! وفعلا المساعد بتاعو لبس العقد وطلع كيس من جيبو وفتحو وبالحاجة الجواهو رشه بيها الغمران داك وغطاهو بقطعة سودا وبقى يقرأ قران بس بالعكس يعكس الايات وكلام كدا م مفهوم…إتضح إنهم بيتعاملو مع المخلوقات دي بالإتفاق..بنفذو للشيطان يعوذبالله طلباتو واكيد من ضمن الطلبات نجاسة كتاب **** وغيرو من التصرفات القزرة!! وبكدا بنفذ ليهم طلبهم وغالبآ م بيتحايل عليهم وف لحظة بيقتل الواحد ولا بجننو طالما عصو **** ونفذو ليهو طلباتو!!؟بعداك الكان منوم فتح مخلوع وجرا بكابس ف اكياسو مرق ليهو كرستالة شرب منها شيء بس م معروف شنو!! حتى بقى يعاين للشيخ وهو انفاسو متسارعة وعيونو منططة وقال ليهم مهمتي انتهت!! الدجال شال حاجتو وطلعو من البيت!؟ لقو دلاك منتظرين..وقالو اها حصل شنو!؟ الدجال قال ليهم ارجعو اسكنو ورونا إنتو!؟ كمال قال ليهو يعني إستجا ليك وطلعو!! الشيخ إبتسم وقال ليهو م إستجابو لي بس إتفقت معاهم!؟ جمال قال إتفقتو ع شنو!؟ الشيخ الدجال صرا وشو وقال ليهو حاجة م بتعنيك كتير!! وجو ماشين!! كمال قال ليهو والقروش!؟ واحد من خدام الشيخ قال ليهو المرا قامت بالواجب!! قصدحنان لانها ادتهم الغويشة!!؟

دخلو البيت وهم خايفين بيتلفتو ساي!! بس كان ف صنننة وهدوء مخيف وريحة كريها وكانهم ف قبر مفتوح!!؟ واي واحد بعلين للتاني وكمال بدون م يقصد هبش الصحن القبيل كان شايلو خادم الشيخ والصحن وقع ع الارض وكلهم ف لحظة واحدة قامو جارين..ولم وصلو الباب حتى قالو دا شنو!!؟ حسن جارهم قال ليهم شكلو صحن!! فضحكو وطلعو برا ورو ناس بيتهم إنهم يرجعو البيت وفعلا رجعو والابو جا متأخر البيت وكان زعلان منهم وتحديدآ من مرتو وقال ليهم إرتكبتو غلطة عمركم بس **** يستر من العواقب!؟ وكل واحد مشي ع محل نومو بس الرهبة لسسسة موجودة والقلق حاصل!! فكانا دي اول ليلة بعد ابعدو الشيطان يعوذبالله من البيت!؟ وزي م حزرهم ابوهم م عارفين عواقب التصرف دا حتكون شنو!؟ وايامهم بقت معدودة..
نواصل بعدين..

الجزء الحادي عشر من رواية بيت الشيطان​

من صباح اليوم التاني محمود طلع والشاي م شربو واولادو إلا حصلوه بالمواصلات لانو م عندهم عربية…وفضلو البنات وامهم بس ف البيت!؟ دنيا قالت ليهم انا ماشة لصحبتي م قادرة اقعد مقلقة!! امها قالت ليها عندك عربية ولا حتمشي بالمواصلات!! قالت ليها ح اطلب ترحال بس وصفو لي المنطقة دي كويس عشان بعدين م اضيع من البيت!! دلال ضحكت وقالت ليها خلاص سوقيني معاك!؟ دنيا ولا إشتغلت بيها مشت إستحمت وهي خايفة وبتتلفت لحدي م جهزت وطلعت!! امهم مشت ع مرت حسن تتونس معاها!! وفضلو دلال وداليا!! إتونسو شوية وبعداك اي واحدة إنشغلت بتلفونها وكانو مشغلين قرأن ف البيت والفي اخر الشارع بيسمع التلاوة!! بعداك داليا نامت ودلال كانت ماشة ع الحمام حست بظل ختم بالشباك!! قلبها ضرب ولمن رجلينها رجفو وجات براحة خاتمة عشان م يحسو عليها!! بس لم قربت ع الحمام سمعت باب الشارع ضرب لمن جات ناطة!! قالت يمكن يكون الهواء ولا الشيء داك لسسسه قاعد!! وقبل م تدخل قالت كدي اتأكد يمكن يكون حرامي!! م فتحت الباب الداخلي بس تاوقت بالشباك شافت **** قاعدة تحت الشجرة ومديها ضهرها!! قلبها لمن عمل فحححح!! وقالت معقولة تكون دي ليا!؟ طلعت سريع فتحت الباب وقالت ي اموره!! وفعلا طلعت ليا!! الشافتها المرة الفاتت بتلعب ف البيت؟ قالت ليها وين مشيتي المرة الفاتت!! وتاني م جيتي! وريتي ماما انك معانا!! وليا بتعاين لدلال جوووة عيونها وساكتة م بتتكلم!! دلال خافت قالت يمكن يكون حاصل عليها شيء!! قربت عليها وبركت ف الواطا ومسكتها من اكتافها وقالت ليها إنتي كويسة!؟ ف زول مشاكلك..حتى ليا هزت راسها بمعنى لا حتى دلال شالت نفسها وقالت ليها جيتي تلعبي معاي!! ليا برضو هزت راسها بمعني اااي!! دلال ضحكت وقالت ليها مالك حبيبة م بتتكلمي!؟ ف زول مزعلك!؟ ليا دنقرت راسها وم ردت!! دلال قرصتها من خدودها وقالت السكرة دي المزعلاها انا بقتلو!! وجرت ع البيت جابت شوكولاتة وعصير ل ليا بس لقتها ماف!؟ إتلفتت يمين شمال م لقتها!! طلعت برا الشارع لقتو فاضي م فيهو زول!؟ قالت البت دي بتمشي وين!؟ وقفلت الباب وشربت العصير ودخلت البيت…بعد العصر الابو جا سلم ودخل غرفتو!! ومرتو كبكبة وشفشفة وقايمة وقاعدة عشان يسامحها!! م معروف قالت ولا عملت شنو بس بعد المغرب طلعو من غرفتهم بيضحكو سااااي!! وإجتمعت الاسرة كلها ف العشى محمود قال لجمال بكرة عايزك تمشي لشركة فورتك قالو عايزين ماكينات حفر!! حاول اعرض ليهم آلياتنا وإن شاءالله تقدر تتعاقد معاهم!! وقال لكمال عملت شنو ف موضوع الحصادات الموسم الزراعي قرب والشركة الروسية م إتصلو ولا منهم خبر!! عايزك تسك الموضوع دا م ناقصين خسائر!! لازم نعوض الفات!! دنيا قالت ونرجع بيتنا!! امهم تدخلت وقالت هوووي م عايزه نقاشات ولا تفتحو مواضيع الشغل ف الصفرة!! عندكم مكتب مشو فيهو اشغالكم!! الاولاد ضحكو وقالو الايام الفاتت كانت سيئة بس حتعدي وشركة محمود التجارية حترجع زي اول وافضل بس دعواتك ي ام جمال!! دنيا قالت ام دنيا لو سمحت!! دلال قالت ليها ونحنا جايبننا من الشارع م كلنا اولادها!! وعمت الضحكات وياداب بدو يرجعو لوضعهم الطبيعي…لحدي م اليوم التاني كلهم طلعو وحتى داليا هي خريجة علوم كيمياء وقدمت ف شركة ادوية ومشت تشوف الحاصل شنو لانهم إتصلو عليها!! ودلال طلعت عندها خطوبة اخت صحبتها وداها كمال وقال ليها بعدين بجي بسوقك طلي معاك مزز إحتمال اعرس واحدة!! ضحكت وقالت لا ب**** وختت يدها ف نصها وقالت اها مواصفاتك شنو!؟ ضحك وخبطها بوكس ف كتفها لمن صرخت وقال ليها انزلي ي عارض! بجيك المساء!! خشت بيت صحبتها بتضحك وهو دور مشي ع شغلهم!! فضلت دنيا وامها!! الليلة جاتهم مرت حسن وبناتها إتونسو وقعدو قعدتهم ومشو منهم!! دنيا سمعت كركبة فوق!! قالت ماما دي انتي!؟ امها طلعت من غرفتها وقالت ليها ف شنو!؟ دنيا قالت ماف شيء بس سمعتا كركبة فوق!! امها قالت بتكون كديسة!! دنيا علت صوت المسجل طبعآ شغال قرأن 24ساعة! ومشت ع غرفتهم!! بس قلقت وإضايقت وجاتها خوفة بدون اي سبب ولا حتى شافت شيء! والكهرباء تمت الناقصة وقطعت!! امها قالت عندها الضغط والسخانة م بتنفع معاها طلعت البلكونة ودنيا قعاد البيت غلبها وخافت عديييل شالت طرحتها وطلعت ع الشارع قعدت ف المسطبة حقت البيت شوية وبعداك بنات حسن كانو فوق ف السطوح حقهم وشافوها قاعدة وشاغلوها وضحكت وطلعت ليهم والام فصلت براها ف البيت!! لم مرقت م لقت معاها زول!؟ خشت عملت الغداء وسمعت الباب فتح طلعت قالت دنيا دي إنتي!؟ ماف زول ردا عليها!! فمن الطبيعي قلبها ياكلها!! لانو كلنا عارفين البيت كان فيهو شنو؟ طلعت من المطبخ وجري ع غرفتها!! إتصلت ع دنيا م ردت لانها خلت التلفون ف البيت؛ القلب دقة والاطراف بردو! وبقت تسمع صوت مشي عديل وقربت ع الباب م سمعت شيء وفتحت الباب براحة وإتاوقت يمين شمال البيت فاضي! ومن جات مارقة اسمعت كلمة امي!! لمن كوركت وداليا لمن بركت ف الارض من شدة الضحك وقالت ليها دي انا!! امها صرت وشها وقالت كان م شليتوني م بترتاحو!! داليا حضنتها وباست راسها وقالت اعفي لي..امها ابتسمت وقالت اها إتوفقتي!! قالت ليها هاتي البشارة بتك إتعينت ف اكبر شركة ادوية ف البلد!! امها باركت ليها وقالت الخبر الحلو دا يستاهل طلعة!! إتصلت ع راجلها وورتو وقالت نحنا حنمشي نتعشي ف الحتة الفلانية! دائما بيمشو ليها!! وقالت ليهو نحنا حنطلب عربية وإنتو جيبو معاكم دلال وحصلونا!! دنيا جات وجهزو روحهم وامهم بالرغم من انو الكهرباء قاطعة بس امنت فيوز البيت وقالت يمكن تجي قوية وتخرب ليهم!! وطلعو!! قعدو احلا قعدة مشاوي ونسات وجبنات وسيلفهات وامورهم كانت ظابطة وللساعة واحدة صباحآ حتى رجعو البيت!! بس العكر مزاجهم لقو الكهرباء لسسه قاطعة الظاهر فيها عطل!! ف الاولاد طلعو برا الحوش والام والابو قالو غرفتهم مهوية وحيرقدو فيها كدا!! اما البنات وهم بالتكيف ناقين فما بالكم بقطعة الكهرباء!؟ وكلهم رقدو ف الهول دلال وداليا ف سرير ودنيا مستحيل تخلي زول يشاركها سريرها؟ رقدت وإتشتحت وخلت اخواتها الاكبر منها راقدين مع بعض!! وكلهم نايمين وماف صوت غير صوت الباعوض! لحدي م فجأة دنيا كوركت ولمت فيها ناس البيت!! مالك ي بت قالت حلمت ولا اتخيلت إنو ف زول طلع ليها من تحت السرير وحلفت كان تنوم براها وقالت ماما عايزه انوم معاك!! داليا قرصتها لمن تاني صرخت وقالت ليها انا بنوم معاك!! وكل واحد رجع لمكان نومو!! ودنيا كانت مكنكشة ف اختها لمن نامت بس داليا النومطار من عينها وكأنو كل الخوف الفي الدنيا إتكبى ف قلبها!! وتبلع ف ريقها وتحس كأنو السرير بهوي بيها ومرا تحس كأنو ف شيء بيطير ف الهول والستارة البتتحرك وكل شيء عينها تقع فيهو بيحسو بيتحرك ولا م طبيعي!! قطت وشها بالملاية رغم السخانة والاعراض زادت بقت تسمع صوت م مشي كانوف زول بيزحف ف الارض!! وجسمها مات وقلبها زي الدلوكة بيضرب لحدي م حست بشيء بجر منها غطاها من رجولها براااااحة وفجأة حست بشي متحرك من رجلينها وجاي عليها…

نواصل بعدين

الجزء الثاني عشر من رواية بيت الشيطان​

شهقت شهقة روح عايزه تطلع!؟ ونفسها كتم وم قدرت تكورك وجسمها مااات وكل شعرة فيهو قامت وحاولت تهبش دنيا بس م قدرت وإتشلت تمامآ!! وبتبكي وماف زول حاسي بيها والشيء قرب شدييييد من وشها والضلام حالك ونفس سخن وكرييييه ولمن بتحس بوشها بيتقطع حتت حتت وخشمها إتعوج ولم الشيء لامس وشها اغمى عليها!! م فتحت إلا الصباح لقتهم كلهم قامو طبيعي وكأنو م حصل معاهم شيء!! اما هي راسها م قادرة ترفعو من المخدة من شدة الالم! ولدرجة انها عملتها تحتها وقالت **** دنيا م تكون حست بالفرش ليين ولا حتمسكها ليها لجنا جناها!؟ ابوها قرب عليها لانها لسسسه راقدة ف الهول وهو ماشي الشغل قال بطلي كسل وصحي النوم مش الليلة اول ليك يوم ف الوظيفة!؟ يلا اجهزي عشان م تتأخري!؟ قالت ليهو بابا انا امس هلوستا ولا مسكني البيخنق الناس!!؟ إبتسم وقال ليها تقصدي اب كباس!! قالت بس هو بعينو!! قال ليها عادي بيحصل بتكوني م إتحصنتي ولا كترتي ف الاكل وهضربتي م تخافي غاليتي وقومي اجهزي الزمن!! إبتسمت وخلتو مشى قامت سريع قلبت المرتبة وشالت معاها المفرش وجري على الحمام،لسسه جسمها واجعها بش لانها صبورة إستحملت الالم وإتشجعت وخلت المفرش ف الغسالة وبلعت ليها بندول وطلعت على الوظيفة الجديدة،وبتفكر ف الحصل معاها وهي متأكدة إنها م كانت بتحلم!! دا يعني إنو الشيطان اعوذبالله لسسسه موجود!؟ اليوم كلو متنشنة وكل شوية تتصل تتكلم مع امها!وتسأل فيها إنتي كويسة حاصل معاك شيء جاكم زول!! وامها تضحك وقالت ليها محسساني كأنو انا مره كبيييرة عجوز وخايفة تخليني براي!! ي بتي ركزي ف شغلك انا م علي شيء…ف اثناء م حنان شغالة ف المطبخ جا كهربجي يشوف العطل وين!؟ فعلا صلح الفيوز كان ضارب ودلال طلعت معاهو لحدي الباب!! وقبل م تقفل باب الشارع شافت ليا!! جرت عليها ملهوفة وخلعتها بس ليا ولا رمشت ولا إبتسمت!؟ دلال إستغربت وقالت البت دي بتعاني من شنو!؟ مستحيل تكون شافعة طبيعية ياربي بكون بعاملوها معاملة سيئة!!؟ واسئلة كتيرة دارت ف راسها ف قعدت جمها وحضنتها عليها وقالت ليها مالك حبيبتي احكي لي!! بشاكلوك ف البيت؟ ولا ف زول بضايفك!! ليا إتلفت عاينت لدلال ودلال جسمها كششي واخيرآ ليا نطقت! قالت ليها امي قالت حتموتو!! اطلعو من هنا ولا حتموتو!! دلال قلبها بقى يضرب بسرعة وقالت ليها لا حبيبتي ماما بتهزر م بتقول ليك كدا!! ليا قامت ماشة قالت ليها وين ماشة!؟ ليا وقفت وم إتلفتت ع دلال وقالت البيت!! دلال قالت ليها ياتو بيت!! ليا قالت ليها هناك ورا البيت داك؟ دلال رفعت عيونها وشافت المبنى الوصفتو ليا!! قالت ليها خلاص اقعدي اللعب معاك وبعدين حوديك البيت!؟ ليا قالت ليها امي قالت م اجيك ولا حيقتلونا نحنا زاتنا!! دلال إستغربت كيف ام تقول لطفلة م إتجاوزت التلاتة ولا الاربعة سنة كلام زي دا!؟ وقالت بكون ناس الحلة عارفين قصة البيت عشان كدا محذرين اولادهم!! وكان بشاغلوها بنات حسن وحتى دنيا معاهم قالو ليها تعالي طلعت ليهم وبقو يضحكو فيها وبقولو ليها مالك بتتكلمي براك جنيتي!!؟ ضحكت وقالت إنتو متخلفات م شايفني بتكلم مع ليا!! تاني ضحكو فيها! ودنيا قالت ليها م تكون الكمفلة الحكيتي لينا عنها المرة الفاتت!! دلال بإنفعال كدا قالت ليها بس ياها **** يفتح عليك!! دنيا ضحكت وقالت ليها اسسسه تحت كنتي بتتكلمي معاها برضو!؟ دلال بإستغراب هزت راسها بمعني اي!؟ دنيا قالت ليها حصلي نفسك ي السمحة إنتي جنيتي!! نحنا تلاتة هدا شايفنك بتتكلمي براك!؟ مستحيل نكون عميانين التلاتة…ونادوهم فنزلو تحت وخلو دلال وراهم!؟ ختت يدها ف راسها وقالت مستحيل م يكون حقيقي انا إتكلمت معاها اسسسه! كيف م شايفنها!! نزلت تحت ورجعت بيتهم واخوانها وابوها جو وم اكلت معاهم كانا قلقانة لانو نلس دنيا شككوها ف نفسها!! داليا جات لقتها قاعدة ف غرفتها مسكتها من ورا وحضنتها عليها وقالت بتفكري ف شنو الشغل ولا العرس!؟ دلال إبتسمت وقالت ليها ولا واحد بس الليلة طلعوني مجنونة!! داليا صرت حواجبينها وقالت كيف يعني!! دلال حكت ليها الحصل!؟ داليا لمن قامت ع حيلها وختت يد ف نصها ويد ف خشمها وقالت ليها قومي ارح!! دلال قالت ليها ع وين!؟ داليا سايقاها وطلعو برا ودلال قالت بنهرة كدا ياخ وريني ماشين وين!؟ داليا قالت ليها مش قلتي ليا وصفت ليك بيتهم وقلتي ورا العمارة الكوبية!؟ يلا نمشي ونزورها ولو قاعدة معناها دنيا والمعاها عملو فيك مقلب!؟ دلال بصوت بيرجف قالت ليها ياخ و**** ليا قاعدة قبيل إتكلمت معاها مستحيل انسى نظرتها البريئة الحزينة!! داليا قالت ليها طيب لو كانت ماف!! دلال شالت نفس سخن وقالت ليها ارح!! وماشين وماشين لم وصلو نهاية الشارع وبقو قدام العمارة اللونها كوبي ومشو بوراها وكانت الصدمة!؟! كووووووشة ورا العمارة مكب نفايات ماف بيت نمرة فاااااضية وم فيها غير الوساخة!؟ ورررررب دلال جات واقعة!!

نواصل بعدين

الجزء الثالث عشر من رواية بيت الشيطان​

داليا حاولت تهديها بس بدون جدوة ودلال بتقول ليها انا جنيت انا جنيت!؟ خشاني شيء!! داليا مسكتها من اكتافها وقالت ليها إستهدي ب**** يمكن تكوتي م عرفتي الوصف ولا ليا وصفت ليك غلط!! م تعملي كدا ياخ إنتي بت واعية واعقل مني انا زاتي!! بعد تعب حتى دلال هدت شوية وقامت ع حيلها وقالت لداليا حنسأل الجيران!! ولاقو مرا ماشة داليا قالت ليها لو سمحتي ساكنة هنا قريب!! المرا إتوجست منهم وقالت مرحب عايزين منو بالضبط!!؟ دلال قالت ليها عن ليا شافعة اسمها ليا ساكنة ف الحي دا!! المرا قالت ليها ابدآ اظنك ملخبطة ماف بت بالاسم دا ف لينا وم شافعة بتىكبيرة ف الجامعة!! والاخوات بقو يعاينو لبعض شكرتها داليا والمرا مشت لحال سبيلها…دلال قالت ليها صدقتي إني جنيت!! والدموع عشرة عشرة؛داليا قالت كل شيء حيظهر مع الايام م تخافي إتحصني وم تقعدي براك نهائي وانا بحاول اتصرف!! رجعو البيت ودلال منهارة مشي م قادرة تمش! داليا بعد وصلت معاها الغرفة طلعت نادت جمال وحكت ليهو بالبيحصل مع دلال!! قال ليها ياخ م اظنها بتتوهم ولا ليا م ليها وجود بتكون بس م عرفت البيت!! داليا قالت ليهو طيب لشنو ناس دنيا م شافوها معاها! لشنو شافوها بتتكلم براها!! سكت مسافة وقال ليها بحاول اتكلم مع دكتورطارق!؟ صاحبو بس الاساس بس جمال قرا هندسة وداك قرا علم نفس!! قالت ليهو م اظنو حيفيدها بشي لانو اصلا دلال م بتشكي من شيء بس برضو نحاول!!
ودخلو ع البيت،لقو امهم وابوهم بيتونسو قعدو معاهم شوية بس م شاركوهم الكلام بعداك اي واحد مشي ع غرفتو!! كمال كان مع اصحابو وجا البيت متأخر وواحد منهم جا معاهو البيت ولانو الغرفة ضيقة كمال خلا صاحبو يرقد مع جمال وهو طلع برا ع الهول!! امو حست بيهو وطلعت قالت اخت ليك اكل!! باسها من جبينها وقال ليها مستف للحلق!! تسلمي ارجعي نومي!! وكان بنفض ف الفرش!! قالت ليهو لشنو عايز تنوم ف الهول؟ قال ليها معاي صاحبي وإنتي عارفة الباقي!! إبتسمت وربتت ع كتفو وقالت ليهو كل م ضاقت فرجت!! و**** بسهلها بس اصبرو..ورجعت ع غرفتها من ختى راسو ع المخدة نام!! دلال م جاها نوم وبتهلوس ب ليا وتبكي وتمسكها من يدها وتقول ليها اطلعي انتي طيبة م تموتي وتجر فيها وف شيء زي الطوفان وراهم وهم جارين بس الشيء خبطهم بقوة من وراهم لمن دلال قامت محلوعة وشهقت!! وقلبها لمن بيوجعها من شدة م بيضرب!! داليا حست بيها وقالت مالك!؟قولي بسم ****!! دلال بكت وقالت ليا م بتخليني حتى ف المنام بتجيني!! انا م قادرة انوم ي داليا!! داليا قامت من سريرها وجات رقدت جمها وبقت تمسح ع شعرها وقالت م تخافي كلنا معاك وإنتي بتحلمي بيها لانك م عايزه تطلعيها من راسك وطول الوقت بتفكري فيها!! ودلال ترجف من الخوف!! داليا إتلفتت م لقت موية قامت وقالت ليها ثواني اجيب ليك موية!! وطلعت ع المطبخ لم خشتو فتحت التلاجة ابت تفتح تجر فيها وكأنو ف زول جوه بجرها عليهو!! طوالي ولعت اللمبة وقالت بسم ****! جرتها بقوة بس الباب كان مرخي ولمن التلاجة إتزحت معاها!! بسبب الجرة القوية! كبت موية ف جك وقفلت التلاجة ومشت ع الماسورة بتاعة مغسلة العدة عشان تكسر الموية باردة شديد بس الماسورة كانت بتشخر!! يعني قاطعة قفلتها وطلعت ومن طفت اللمبة ف حاجة وقعت!! ولعتها تاني لقتها سكين وقعت من المسطبة!! رجعت رفعتها ودخلتها الدرج وطفت اللمبة وجات طالعة تاني ف حاجة وقعت قامت كاتحة كتح ولا إتلفتت!! كمال قام بخلوع سمع صوت الجري ولا طقشت الكرسي وهي جارية!! قالت ليهو دي انا!! وعرف من الصوت انو دي داليا!! دخلت لقت اختها نااااايمة إبتسمت وشربت ليها حبة موية وطفت النور ومشت ع سريرها!! وهنا كمال النوم طار من عينو!! حسى كأنو لمح شيء ختم قدامو ركز كويس م شاف شيء غطي جسمو كلو وخلا عين واحدة مفتحة وبقى يتواق!! برضو ماف شيء بس ف حركة الصفرة كراسيها بتتحرك وكأنو ف شافع بجر فيهم ع الارض!! والهواء يحرك النجف!! والكشكشة حقت النجف زادت وهو هنا قلبو زي الدلوكة!! وبدون مبالغة حتى صوت نقيط الموية ف المطبخ هو بيسمعو وكل م تنزل نقطة هو بتخلع وبيجي ناطي كان متوتر شديييد ولو كان شاف شيء موكد كان حيجن ولا حيموت!! إتكرفس ف السرير وبقول لنفسو كمال ارجل ماف شيء دي تهيؤات اثبت وهو لمن سنونو بقت تطاقش من الخوف وحسي بالسرير بيتهزا وم كان بيتهزا دا هو البيرجف!؟ وإتمنى الموت ف الحظة ديك!! وخلاص جسمو خدر وبدا يحس بشيء ساحبو من السرير لتحت!! وكأنو حيقددوه بالمرتبة!! وفجأة جمال فتح باب الصالون وكمال بعد صعوبة حتى قال جمال!! اخوه لمن جا ناطي وقال مالك ي….سبى ليهو طبعآ!! وجا عليهو قال مالك!؟ وكمال كان عرقو ينتف جمال حسى بيهو متغير وقال م يكون!!! وقصدو اليعوذبالله منو!؟ كمال قال ليهو إحتمال كبير!! جمال شال نفس عميييق ومشي الحمام ولم طلع كمال قال ليهو و**** م برقد هنا!! وشال غطاهو وجرا ع سرير جمال!! جمال ضحك وصلح المخدة ورقد بفكر ف البيحصل معاهم وربط كلام دلال بالحساهو كمال وشال نفس سخن ونام!! صباح اليوم التاني البيت شغلو واقف بسبب الموية لدرجة إنو موية شراب ماف!! تلج وم لاقين موية سخنة يحلوهو!! ابوهم قال ليهم واحد يمشي يجيب سباك م ممكن نقعد بدون موية م تنسو الليلة الجمعة كمان عندنا كم مشوار م بنقدر نأجلهم!!؟ فعلا طلع كمال وصحبو فتشو سباك رجعو البيت بس صاحبو م رجع معاهو!! بعد وصلو لقو ناس حسن موصلين خرطوش لناس بيتهن لانو الموية شغالة ف الحلة حكلها إلا حقتهم..المهم السباك راجع الموية وقال عايز البلف الرئيسي وفعلا ودوهو محل الموتور وقال ليهم ف حاجة قافله الموية بتكون رواسب إتراكمت والبيت لانو قديم بتكون اتقفلت عديييل!! وفعلا بدأ يفكك ف التوصيلة لحدي م فتحو وشاف كتلة شيء قافلة الخرطوش الكبيير وقال ليهم دا شنو!! شال حديدة وبدا ينكت ويجر ف الشيء وكانت الصدمة!؟

نواصل بعدين..

الجزء الرابع عشر من رواية بيت الشيطان​

السباك بدا يجر ف الشيء وبقول ليهم دا شنو!؟ لاحولا ولا قوة إلا ب**** الشيء دا شنو!!؟ كانت ملابس ملفوفة بجلد ويابشاعة منظرها وريحتها!! كمال قال ليهو دقيقة وإستلم من السباك الحديدة وبدا يقلب ف القطع يمين شمال وقال لجمال دي ملابسي!!؟ جمال قرب شديد ودتقر ف الملابس وقال بخلعة كدا شنو!؟ ملابسك ياتها!! وبفرفرو فيها وهي لمن ملبكة وكاسياها طحالب سوداء!! والريحة بتدوخ عديل من شدة م عفنة…إتضح دا الغيار الكان لابسو كمال يوم شاف شيء ف الحمام وجمال جا لقاهو واقع عريان!! يلا دا الغيار الكان لابسو بس وصل هنا كيف!؟ والصدمة لم فتحو البنطلون!! لقو راس بهيمة مكسر وكلو غازنو مسامير!! السباك لمن كورك!! وشال عدتو وقام جاري! قروشو م شالها! وجمال لمن قعد ف الواطا وم عرف يقول شنو!؟ كمال مدا يدو ع الشي الرأس الملفوف وكل م يقرب اكتر يدو بترجف!! لمسو بالحديدة وقال لجمال دا سخل مشش كيف وصل لهنا!! جمال قال ليهو ودي عايزه ليها سؤال!! اكيد دا العارض المسيطر ع البيت! نحنا لازم نطلع من البيت دا ف اسرع وقت!! جات دنيا وصرخت اولا حتى قالت دا شنو!؟ وكان وين!؟ كمال اشر ليها ع الماسورة!! بختت يدينها ف خشمها وقالت معقولة نحنا كنا بنشرب ف المية كدا!! كلهم بدو يتشاوفو..قربت ع الملابس وكانت مغطية نخرتها من الريحة وقالت دا السخل الكتلو الشيخ الجابو هنا شنو!؟ جمال قال ليها متين الكلام دا!! قالت ليهو الصباح لم انتو كنتو ف الشغل!! كتلو وعمل طقوس وقال العصر بتم الباقي وإنتو كنتو حاضرين لم جا تاني!!
وجرت تنادي ناس البيت يشوفو طلعو شنو من الماسورة!؟ جمال قال لاخوة نحنا غلطنا ياخ م كان ندخل دجال ف الموضوع!؟ م معروف تاني ح يحصل شنو؟ كمال قال ليهو رمش!! جدع الحديدة من يدو وبقول ليهو رمش!! جمال قال ليهو قول بسم ****!! هو قرب يتحلل يرمش كيف!! جمال هبشو بالحديدة الراس مهشم وم فيهو شيء ملفت! كمال قرب عليهو شديد وركز ف العيون وم لاحظ شيء وقرب يدو هبش المسمار الفي نص الراس لمن جسمو كششي وماف حركة حتى شال نفسو بصعوبة وختاهو!! واخواتو وامو وابوه جو والبنات وامهم إتجرسو! جمال قال لكمال لم الشي دا ياخ غطيهو مننا كمال دخل يدو ف كيس ودخل القميص ف كيس وبلم ف البنطلون وقلبو بدق ويدو بترجف وشينة قدام اخواتو يظهر إنو خايف!! رفعو سريييع وحشرو ف الكيس وقبل م يطلع يدو ف حاجة عضتو!! وتاني بيسكت فكى ف الكوارير وبقى ينطط وبقول عضاني واخواتو بكوركو معاهو! اغمى عليهم من شدة الخوف!؟ لم فتح لقاهم كلهم بعاينو ليهو وجمال بدس ف ضحكاتو وقال ليهو اها عضاك براحة ولا حار!! كمال وشو رجف وقال ليهم قايلني بكذب!! وحلف انو لو كان الراس ولا غيرو بس ف شيء عضاني!! ابوهم قال ليهم عشان كدا انا قلتا ليكم م تستعينو بدجالين إتحملو البيحصل! ودخل خلاهم…امهم قالت انا بتصل ع الشيخ واسألو دا شنو الدخلوه لينا ف الموية دا ودخلوه كيف!!؟ جمال قال ليها ي امي دجالين تاني!! الام سكتت والاولاد طلعو الكيس برا الشارع وحرقوه وياريتهم إن م حرقوه!! ومن دخلو البيت دخل معاهم اكعب مخلوقات ****!! والبيت صننننة بطريقة مخيفة وماف شيء بيتحرك كل شيء ف حالة سكون! وكأنو الهدوء م قبل الكارثة!! وكلهم حاسين برهبة عجيبة وكل زول ف غرفتو بس م قادر يتكلم ولا عارف يقول للتاني شنو!؟ لحدي م اذان الظهر اذن ورجال البيت مشو الجامع! دلال كانت قاعدة ف الهول واخواتها ف غرفتهم وقلقت شديييد وإتخنقت عشان كدا طلعت برا تشم هواء!! وراقدة ف السرير وماسكة تلفونها سمعت دلال!! إتلفتت م شافت زول! رجعت لتلفونها حست بحركة تحت سريرها وكأنو زول بيلعب بالبلاستك ولا بحاول يعزف ع الحبال!! بلعت ريقها وم قدرت تدنقر تشوف دا شنو!! وسمعت صوت دلال ساعديني انا لياااا قلبها عمل فحححح وقامت متلبة من السرير!! ودنقرت تحت شافت شيء متكرفس ومديها ضهرو بس كان كبير شوية م ف حجم ليا!؟ وقالت انت منو!؟ سمعت صوت ضحكات خبيثة وبطيئة ومتقطعة وقبل م تقوم جرية رجلها علقت!! إتشلت وم قدرت تتحرك وبقت تكورك وماف زول سامها وبتتجر تلقائيآ تحت السرير!! وكأنو الهواء هو البيسحب فيها وقربت تموت من شدة الخوف وبتنادي ف امها وماف زول جايب خبر!! لحدي م دخلوها تحت السرير وبدت ترفس وتجابد والشيء داك بقرب ليها اكتر وف حاجة بتنقط فيها كريها وعفنة وبتنزل ع جسمها زي موية النار!! وختا ليها شيء زي الاصبع ولا مخلب م معروف ف جبينها وهي بتشهق وقربت تغمر وقبل م يخترق جمجمتها انقذها تلفونها!! مثبتة التطبيق بتاع الصلاة ع الرسول!! ومن التلفون قال صلي على محمد!! الشيء طلع شرار وإختفى!! وهي شهقت شهقة طويلة واغمى عليها…

نواصل بعدين..

الجزء الخامس عشر من رواية بيت الشيطان​

ماف زول حاسي بيها ولا حتى فقدها لحدي م ابوها واخوانها جو من المسجد وجمال شاف تلفونها واقع!! دنقر يرفعو ليها كان يشوف طرف الاصابع بتوع يدها!!؟ بخلعة كدا قال دلال وجبد الملاية وشافها واقعة ممددة!! خشتهم خلعة م يعلم بيها إلا ****!! طلعها من تحت السرير وجمال بصحي فيها والابو بنادي ومن هناك امها جات جارية وبشتنتهم بشتنة!! م فتحت إلا ف المستشفى ومن شافت امها حضنتها بقوة وصرخت!! اخواتها بكو.معاها واخوانها كانو متأثرين شديييد…والدكتور جا طلعهم كلهم وقال المريضة محتاجة راحة!! بس هي بكت وقالت خلو معاي ماما م تطلعي ي امييي بيقتلوني!! امها ضمتها عليها شديييد وقالت انا جمبك دولييي حبيبتى إرتاحي بس إنتي!! بقت تتخلع وتتجافل ف السرير لمن الممرضة ادتها حقنة مهدئة حتى نامت!! بعد صحت طلعو من المستشفي وماف زول قادر يسألها الحصل معاها شنو!؟ خايفنها تتعب تاني ولا تهيج!! وهي م عايزه تفكر ف الموضوع لانو بمجرد م يخطر ع بالها قلبها بيوجعها وبتجيها اعراض لشيء م.طبيعي!! وصلو البيت وقبل م ينزلو قالت بابا البيت م تمام!! تاني بدت ترجع ظواهر غريبة واليوم انا نجوت بإعجوبة!؟ ابوها قال إن شاءالله من صباح بكرة ح افتش بيت!! ولو كان سمعتو كلامي ورحلنا من هنا دا كلو م كان حصل!! اسسسه ضيعتو مننا البيت وم معروف نلاقي واحد مناسب متين!! دخلو البيت وكمال كان اخر واحد لزا معاهو الباب والباب إترزع بقوة لمن جو ناطين!؟ ابوهو قال ليهو براحة م كدا لكن!! كمال قال ليهم دا م انا و**** بكون الهواء رزعو كدا!! ودخلو جوة البيت دلال قالت م حترقد مع اخواتها!! ومشت مع امها وابوها رقد برا ف الهول!! الام راقدة جمب بتها ودلال تتخلع وتجفل وهي نايمة وامها حاضناها وبتقرا ليها شوية كدا والام حست بلسانها تقيييل وم قادرة تقرأ بصوت!! بعداك اضنها صنو ونملو وحست بخدر ف رأسها وبقت تقرا ف سرها وقلبها بيضرب!! والمشكلة هي صاحية وواعية بالبيحصل حولها!! عايزه تنادي زول بس م قادرة وبعداك الرجلين ماتو وحاسة بشيء طالع فيها من رجولها وهي بتحاول تتحرك وم قادرة…واملها الوحيد بقى بس دلال حاولت تهبشها بس م قدرت جسمها مييت وقربت تتشلى!!ليا جات دلال ف الحلم وقالت ليها ساعدي امك! حيقلكم واحد ورا التاني مع السلامة انا ماشة وليا كانت بتغطس ف الارض ودلال بتجر فيها وبتكورك وم قادرة تطلعها لحدي م الشافعة الارض بلعتها ودلال بتصرخ لمن قامت مخلوعة وبتناهج إتلفتت ع امها لقت امها ف حالة تانية الخشم لافي والإيدين مشلولات!! ففكت ف الكواريك ثواني بس ابوها وناس البيت كلهم حضرو!! اسعفوها وهم بالبجامات وحفيانين!! ف الإسعاف حاولو ينعشوها بس م إستجابت!!! لحدي م وصلو المستشفى وتلاتة دكاترة واقفين ف راسها م خلو حقن م خلو دلك م خلو شحنات كهرباء وكلو النافع ****!! الام لسسه بتنازع!! الدكتور قال ليهم ف نوبة عصبية عالية وقد تتسبب ليها بشلل ولا سكتة دماغية!! وقال الحل الوحيد إنو يدوها صدمة كهربائية اعلا من الصدمة الهي خاشة فيها بس برضو ممكن تخش ف غيبوبة!!؟ وف كل الحالات النتيجة م مضمونة!! ف محمود خاطر ووافق بالرغم من إعتراض بعض اولادو!! وضربو الام كهرباء نطت من السرير وقعت جثة!! ف الاول إفتكروها ماتت وحاولو ينفسوها والقلب واقف بعد كذا محاولة حتى القلب رجع يشتغل وفعلا دخلت ف غيبوبة بس الدكتور قال ليهم ادعو تفوق منها سريع!! إحساس انهم كانو حيفقدو والدتهم كان ابشع من الف شيطان اعوذبالله وكلهم متجرسين حتى ابوهم..واليوم لانو سيء ابا يمشي نهائي وكان الاطول ع الإطلاق! وف صباح اليوم التاني قرابة الساعة1ظهر الام إستعادت وعيها!! وبدل م يجننهم الشيطان اعوذبالله كانو حتجننهم الفرحة! إحساس انو امهم رجعت ليهم من حافة الموت!! وحلفو تاني م يرجعو البيت!! من هناك ولبيت ناس حسن طوالي اصلا كان هو ومرتو بايتين معاهم ف المستشفى!! لم وصلو منطقتهم شافو المطافي والناس مجمهرة وسألو ف شنو!؟ قالو الكوشة الورا العمارة ديك شبت فيها نار مخيفة وم إنكمفت إلا بعد جو ناس المطافي!! دلال بكت وقالت ف سرها شكرآ ليا!! بتمنى م يكون اصابك مكروه بسببي وين م كنتي..داليا قشت ليها دمعتها وعرفت الشيء البكى اختها شنو!! وربتت ع كتفها ومشو بيت حسن!! بعداك الاولاد ماشين البيت يشيلو ملابس ليهم وحاجات اخواتهم قالو عايزنهم بس م قدرو يدخلو البيت!! القزاز بيتكسر وتجيهم حاجة زي الحجار! كأنو ف زول بشتر فيهم من جوا!! والشيء بقى علني ضرب زي النوبة والبيت يضوي مرا اخضر ومره احمر ومره يضلم!! وكأنو ف ناس جوة محتفلين!! جمال قال لابوه دا شنو!؟ ابوه قال دا الكنت خايف منو!! كلهم فضلو ف بيت جارهم وم قادرين يصلو لبيتهم!! وتاني إبتدت رحلة البحث عن بيت!! لحدي م **** لطف بيهم وجازاهم ع صبرهم وإتصل صاحب محمود برضو رجل اعمال كبير ومعروف! قال ليهو معليش إتلومنا معاك وانت م قصرت مع واحد فينا!! عشان كدا انا وعبدالعزيز ونجم الدين دفعنا اقصاد البنك ومن بكرة ممكن ترجع بيتك ولانك حساس وحتعمل لينا إنك م محتاج وحركاتك العارفنها ديك إعتبرهم ***!! وقت م تلقى قروش ردهم لينا!! بالجد محمود بكى!! شكر صاحبو وقال ليهو بلغ شكري وإمتناني للبقية ولحدي م نتلاقى!! من شدة الفرحة م قدر يكلم اولادو بس حضن بناتو شديييد وقال ليهم الإشتاقت ترجع للبيت القديم منو!؟ كلهم بقو يكوركو الام اتخلعت وقالت لعزيزه مرت حسن اجري شوفيهم مالهم م يكون الشيء داك اءذى فيهم واحد…ووصلو ليها البشارة وكل المرض الجواها زال وكأنو كان مرض نفسي!! وحتى حسن واسرتو فرحو ليهم!! وقرر يرجعو بيتهم وإفتكرو انو بيت الشيطان اعوذبالله كان فصل مظلم ف حياتهم وحيطوهو للابد وحيفضل زكرى بس م عارفين الايام مخبية ليهن شنو!؟

نواصل بعدين

الجزء السادس عشر من رواية بيت الشيطان​

رجعو بيتهم وم كانو مصدقين..اخيرآ حيرتاحو اخيرآ حترجع حياتهم لطبيعتها!! كان مقلوب قلبة شينة والبنك حاجز ع كم قطعة اثاث ولمن عارضها للبيع! وكان وسخان شدييد بس حيو براحة م طبيعية لانهم رجعو لبيتهم العاشو فيهو اجمل الاوقات وزكريات الطفولة!! جمال جاب شغالتين يساعدو البنات ف النضافة والترتيب وحتى جيرانهم الرحلو منهم عزيزه وبناتها م قصرو جو ساعدوهم..والامور ماشة كويس ف اول تلاتة ايام بعد محمود قال لاولادو انا عايز اهدم البيت داك ومكانو نعمل مسجد صغييير ولا خلوة تحفيظ قرأن!! اولادو وافقوه ع فكرتو بس قالو التنفيذ حيكون صعب لعدة اسباب!؟ اولا هم مارقين من خسارة مادية ضخمة يمعني الميزانية م حتكفي لمشاريع جديدة،وثانيآ البيت خطر ياخ ومستحيل يقدرو يهدموه بالساهل وم عايزين يعرضو حياة غيرهم للخطر!! الابو م شال الفكرة نهائيآ من راسو بس اجل تنفيذها شوية لحدي م وضعو يتصلح!! بعداك بدت تحصل حاجات غريبة مع كمال تحديدآ يسمع اصوات وهمسات ف بعض الاحيان!! بس قال دا بكون من جو الرعب الكان عايشنو ف البيت داك زائد ضغط الشغل والإرهاق…بس ناس بيتهم بدو يحسو بيهو م طبيعي!! م كمال ودالراحات داك!! بقى ساكت طول الوقت وسرحان بعيييد ولو ناس البيت مجتمعين وبتونسو بكون قاعد براهو ف الجنينة ولا ف غرفتو!! ابوه قال لامو ولدك دا بكون عايز العرس!! ضحكت وقالت ولدك الكبير م عرس يعرس هو!! ومرت الايام وحالتو تدهورت اكتر!! كوابيس وإنفعال من ابسط الامور ونكد ومشاكل مع اخواتو بدون سبب…لحدي م يوم كان قاعد ف غرفتو وجمال قال لازم يضع حد لتصرفات اخوة دقة ليهو الباب بس كمال لا ردا ولا قال إتفضل!! وجمال سامع الحركة وصوت خبطة كدا!! معناها صاحي!! لم فتح فيهو الباب لقاهو قاعد ف الواطا ومتكل ع زاوية السرير وبيخبط راسو فيهو!! قال بنهرة كدا كمال مالك ف شنو!؟ م إتلفت عليهو!! جمال قرب عليهو ومسكو من راسو وقال اهداء بتأذئ روحك!! وريني مالك ولو ف اي مشكلة نحلها مع بعض زي زمان!! كمال مسك اخوة من يدو وصغط عليها شديييد ولسسسه ضاعط وسخنت مع جمال بس م نتلها منو وحاول يفكها بهداوة وبقول احكي لي انا اخوك!! كمال عيونو بقت زي الدم وقال ليهو عايز تعرف شنو!! انهم ف راسي!؟ إني بسمعهم ب إستمرار!! ولا إنهم بيطلبو مني اقتلكم!!؟ جمال إنهار!! وقال ليهو بتحكي عن شنو!؟ كمال إبتسم وقال بخبث كدا بيت الشيطاااان (اعوذبالله) وضحك جمال قلبو رجف وجاتو خوفة مبالغ فيها وطلع من عندو مصدوم وخايف ع اخوة وم عرف يسوي شنو ولا يوري ابوهو كيف ولا حتى يحذر ناس البيت كيف من كمال واهم شيء كيف يقدر يساعد كمال ويتجاوز الازمة دي!؟
طلع برا بكى بحرقة وقال **** تنصرني **** تحفظ اخوي وتحميهو ياربي تقدرني ع مساعدو يااااارب كمال م يضيع من بين إيدينا…وإنفعل شدييد ف الدعاء…والوقت متأخر عشان يمشي يوري ابوهو اصلا بكون نايم!! وم بيقدر يبيت مع كمال لانو اي واحد غرفتو براها!! وخايف يمشي عليهو كمال يأذئ نفسو ولا يقنع نفسو بأنو م طبيعي!! ومن اليوم التاني جا لقاهو راقد قال كمال صباح الخير وهو ولا كأنو موجود…جا قعد جنبو وقال صحي النوم ابوي منتظرك للشغل!! رفع المخدة من راسو وقال م ماشي!! جمال قال ليهو منو إنت!؟ معقولة إستسلمت ليهم بالسهولة دي!؟ معقولة دا إنت كمال اللحوح!! كمال قال عشان قلت م ماشي الشغل عايز تعمل لي محاضرة!!؟ طلع ناسي كلام امس!! نسى هو قال لجمال شنو!؟ ودا الخوف جمال اكتر!! إتصل ع د/طارق وقال وحكي ليهو الحاصل وقال يستحسن تشرح الحالة لزميﻵ ليك لانو لو جيتنا إنت كمال بعرفك وقد م يتقبل الحكاية لانو م متزكر شيء ويمكن يتجنن فينا!! المهم إتفق انو يجيهم صاحبو ف البيت ومشى كلم ناس البيت والام فكت ف البكاء واصلا م كنت مطمنة وحاسة بيحصل شيء وكر علي منك ي كيمو ولدي!! محمود حاول يهديها بس النافع **** وحتى البنات م عارفة إلا داليا دلال ودنيا لو عرفو مشكلة براهم خوافات ولو عرفو حيجنو قبل كمال..وابوهم قال كمال بكون ممسوس نشوف ليهو شيوخ ولا محل رقية شرعية وحيتعالج بس م تحسسوه بشيء لانو بينسى مرات!! وفعلا اتصلو لمشايخ كبار وقالو يجيبوه الحتة الفلانية الابو وقف كل شغلهم وبقو ف موضوع كمال وفعلا ساقوه ومشي ع اساس انو جمال هو العيان وهو ماشي معاهو مرافق!! حتى وافق انو يمشي ومن مشو والشيوخ طلبو منهم يتوضو اول هو رفض بس جمال قال ليهو لو م إتوضيت م بخلوك تخش معاي!؟ وانا م عارف احتمال يعملو فيني شنو خليك معاي ي اهبل!! كمال صر وشو وجمال إنتظرو لمن إتوضى ودخلو غرفة الرقية وبدو يقرو ويقرو وكانو طبيعين الإتنين!! لحدي م وصلو جزئية معينة وبعداك كمال بقى يناهج ويتدروخ ويقرود عيونو!! ويمسك ف اخوه قوييي والشيوخ بيقرو وبعداك فكى ف الجعير والكواريك بقوم جاري وبقبضوه وبقرو ليهو وبعداك هاج وبدا يرفس ويضرب وماف زول قدر عليهو وبعداك فجر القنابل!؟ م بنطلع وم بنعمل ونحنا عملنا إتفاق وحنقتلو وم بنطلع!!؟ ولدرجة إنو بقى يتكلم بلغة م مفهومة!! وجمال حيموت من شدة م إترعب وخاف من منظر اخوة وحتى الشيوخ غلبهم!! وقالو ليهو م بنقدر نساعدكم اخوكم ولا إنتو م عارف بس عاملين إتفاق مع الشيطان اعوذبالله ودا يعني إنكم بتتعاملو دجالين ولا غيرو ف اعذرونا نحنا ناس قرأن بس م بنقدر نخدمكم ولا حيقتلو ليكم الولد!! جمال لمن قعد ف الواطا وإتزكر تحذيرات ابوهم من موضوع الدجال وقال بينو وبين نفسو ياربي بكون إتفق معاهم ع شنو!!؟ وإتلفت م لقى كمال سأل الشيخ قال وينو اخوي اسسسه كان هنا!! كل الحضور قالو م شافوه!!؟ وطلع جري برا المركز ماف ولا حتى ف العربية وخلاص قال اخوي ضاع ولا مشي يعمل حاجة ف نفسو!! دور العربية وبفتش ف الشوارع وإتصل كلم ابوه وحتى ناس البيت قال ليهم لو كمال رجع البيت كلموني وم تقربو عليهو!! وفضل يفتش من شارع لشارع لحدي م إتصل عليهو جارهم القديم حسن وقال ليهو اسمعني إنت كمال جا البيت المسكون عافية!!؟ شايفو منفعل وخشي سريع وقلت يمكن يكون حاصل شيء معاهو!! وم كان يجي ياخ انتو عارفين خطورة البيت!؟ جمال لم حكى فرملة وقال ليهو مسافة السكة واكون عندكم وم تخل عليهو ي عم حسن كمال إتمس!!

نواصل بعدين

الجزء السابع عشر من رواية بيت الشيطان​

جمال من محلتو ديك إتحرك ع بيتهم المسكون! وابوه إتصل عشان يطمئن ع كمال إتلقى ولا لا؟ وسمع الخبر الما بسر! وهو بدورو طلع جاري وملهوف عشان يصل لولدو!؟ جمال سايق وقلبو بيضرب وبقول **** احفظ اخوي لحدي م وصل لقى حسن منتظرو برا!! ونسي حتى يسلم عليهو وقال ليهو لسسه جوة ولا طلع!؟ وسامع اي حركة ف البيت!؟ عم حسن لم شاف خوف جمال حاول يهديهو وقال م تخاف دخل من قبيل وم سامع ليهو صوت!! وجمال قام جاري ع البيت وعم حسن بنادي فيهو ولا إتلفت! ولا حتى خاف من الممكن يواجهو جوه!؟ وبنادي كمال كمال وين إنت!! ويخش بهنا ويطلع بهناك!! والبيت زي المقبرة!! هدوء مخيييف سمع باب الغرفة الكان بنومو فيها البنات فتح براااااحة!! إتلفت وجرا ع الغرفة وقال كمال إنت هنا!؟ وسمع صوت كركبة ف المطبخ جرا عليهو وبقول انا اخوك!! انا اخوك ي كمال اطلع!! ماشي ع المطبخ وجسمو برد وكل شعرة فيهو قامت وحتى القلب دقاتو زادت…إتردد بين يخش وم يخش!! قلبو وعقلو مع اخوه وغرائزو بتمنعو!! بس قوى قلبو ولزا باب المطبخ!! جات كديسة ناطة لمن شهق من شدة الخلعة وركبو ساحت!! إتسند ع الحيطة لوهلة كدا ودخل م لقى زول!! م فضل ليهو ف البيت إلا الطابق العلوي!! طلع وهو قلبو ف يدو بس كلو يهون عشان اخوة الغالي…وكان نفس الشيء م لقاهو لحدي م سمع طوبة وقعت إتلفت بالشباك ع البلكونة!! كان يشوف كمال قاعد ف الحافة بتاعة الحيطة ماف زول نصيح بيقعد القعدة دي!! فضل ليهو سنتميتر واحد ويطيح!! جمال قلبو عايز يطير وعينو منطرة!! خايف يزكر اسمو ساي داك يتخلع ويجي ناطي!! وكمال مستكييين ومسترخي ع الاخر!! جمال جا من وراهو براحة براحة عشان يمسكو من ورا وم يقع!! ولمن عرق من شدة الخوفة!! لمن قرب اكتر! كمال قال ليهو تعال عديل شايفك!! ياخ جمال قربت تجيهو سكتة دماغية من شدة م إتوتر وفجأة اخوة يخلعو ويقول تعال!! لم وقف قدامو وبعد صعوبة حتى قدر يقول ليهو لشنو بتمل ف نفسك كدا!؟ وقبل م يقول الجابك هنا شنو!! كمال ضحك!! وقال ليهو انا بنتمى لهنا دا بيتي!! جمال قال ليهو ونحنا م اسرتك!!؟ كمال عيونو إتغيرو وسوادهم وسع وقرب يملا العين وصوتو بقى خشن ومخيييف وقال لجمال م بسمح ليكم تسوقوة من هنا ولا لقتلو!! جمال جسمو يعمل كبكبكب من شدة م بيرجف!! قال ليهو بس انا م بخليك هنا وحسوقك معاي!! كمال ضحك وعاين لجمال بالجنبة وقال ليهو يعني إنت مفكر تطلع من هنا!! لمن تسوقني كمان!؟ ونظر لاخوة نظرة لئيمة كلها خبث!! وبعاين لجمال من راسو لرجلينو!! وجمال بدا يحس كانو جاذبية الارض زادت ورجولو حيغطسو ف الارض وم قادر يتحرك وبقى كأنو مقيد!!وراسو لفة وقرب يغمى عليهو!! لحدي م سمع ابوه بنادي كمال جمال وين إنتو!؟ جمال قال ابوي م تخي ابوي اطلع من هنا!! والابو إترعب اكتر وبدل انو كان ماشي قام جاري جري عشان يحصل اولادو!! كمال ضحك وقال ليهو الظاهر حتموتو مع بعض!! بس ح ابدا بيهو هو وحجيك!! وضحك!! جمال صرخ وبقول كمال!! كمال استعيذ ب**** دا ابونا ي كمال الشيطان م يعمي ع عيونك!! م اخليهو يسيطر عليك!! وكمال ولا كأنو هنا إتلفت ع جمال وإبتسم بخبث ونزل يتلقى ابوه عشان يقتلو!!
جمال بكورك كمال لا!!؟ لا ي كمال! ابوي اعمل حسابك وخشي ف حالة هستيريا وقدر حاول يرفع رجلو من الارض م قدر!! كانو صابنو فيها!! ابوه جاري ف السلالم ومتألم بسبب الرطبوبة والعمر كمان م بيسمح ليهو بس من شدة خوفو ع اولادو إتغلب ع الآلم!! ومن وصل اخر سلمة!! كمال دفرو بيديهو الإتنين ف صدرو!! الابو شهق شهقة واحدة وإترتع لورا ووقع إتشقلب ف السلم لمن وصل الارض وإتخبط مع البلاط لمن نزف!! وكمال بقى يضحك!! جمال بقول ابووووووي وبيجعر زي النسوان!! كمال رجع ليهو عضبان وخنقو بيدو الشمال!! وجمال خشمو م فتحو بس بعاين لاخوة ودمعتو جات نازلة!! وهناك كمال محكم قبضتو ع رقبة جمال لمن بقى يفرفر ولسانو طلع!! وهو إتعفرت وهاج ولمن الزبد بيطلع من خشمو وبقول موت موتو كلكم!! وفجأة فكى جمال وخلاهو وقع يرفس ويكح!! وكأنو شم حاجة ولا حسى بشيء م طبيعي!!؟ وف لحظة البيت ضلم وف اصوات بدت تطلع وصوت خفافيش ولا شنو م معروف بس ضجة مبالغ فيها!! وكمال م نزل بالسلم!! تلب من فوق للطابق الارضي!! وجمال بعاين ليهو وعيونو بشوفو طشاش ولم كمال تلب كأنو ف سكاكين اخترقت جسمو وخاف يحصل ليهو شيء!! وحتى ابوهو م عارف كمال عمل فيهو شنو؟ بس كان متأكد إنو اذاهو!! وفقد الوعي!! هناك كمال نزل لانو الشيطان الإتلبسو اعوذبالله حسى بأنو ف زول غير مرغوب فيهو جا!! وفعلا إتضح انو حسن لم شاف الابو واولادو دخلو البيت م قدر يتبعهم بس عرف انهم حيواجهو مشاكل عشان كدا جرا الجامع وم لقى الشيخ زاتو بس كان ف شيخ تاني بيدي ف الناس محاضرة!! وساقو من يدو وقال ليهو اسرع!! وف الطريق حكي ليهو البيحصل!! الشيخ قال ليهو انا متحصن برب العالمين بس م بقدر عليهم!! بس يمكن **** رايد لي اجي اليوم للسبب دا!! ووصلو البيت!! الشيخ من خشم الباب اعوذبالله من همزات الشياطين وبسم **** الرحمن الرحيم!! وتوكلنا ع **** ولا حولا ولاقوة إلا ب**** وكلام كتييير!!

نواصل بعدين…….

الجزء الثامن عشر من رواية بيت الشيطان​

وهناك كمال هاج!! وبقى يشوفهم رهاب رهاب وم قدر يقرب عليهم!! بس بيتحكم ف البيت!! قفل عليهم الباب يرجف الترابيز ويحرك كل قطعة اثاث ف البيت بس م قدر يواجهم!! والشيخ بيقرأ منفعل شوية تجيهو طوبة ومره كرسي وهو بيتزاوغ منهم وحسن بفتش ف ناس البيت!! وشاف محمود مرمي جمب السلم ودمو كابي!! جرا عليهو وقاس نبضو لقاهو شغال بس بطيء!! جراهو لبرا!! والشيخ بيقرا وهناك حسن جسمو كاشي شدييييد ولمن شنونو بتطاقش من شدة الخوف!! والبيت زاتو ضربتو موجة برد!! بقى زي التلج بالرغم من انهم ف عز الصيف!؟ وإتردد ف انو يطلع فوق بس طلع مع الشيخ!! والشيخ خاهو كرسي ف ضهرو لمن برك ف السلالم وقنت!! بس قام وواصل قراية وحسن مضاري بيهو!! لحدي م شاف جمال إستعاد وعيو بس م قادر يقوم!! جرا عليهو وبعد صعوبة حتى قدرو يطلعوهم برا!! وحسن قال للشبخ إنت زول م ساهل ومبروك كمان…كيف م قدرو يأذوك!! قال ليهو لانهم متلبسين جسد كمال والجن والياعوذبالله لم يكون ف شكل غير شكلو بكون ضعيف!! صح بيأذي بس ممكن عادي يتأذي برضو!! لانو لو كان ف هيئة إنسان ولا حيوان م بكون بنفس قدراتو!! واكتر شيء فادنا إنو م عايز يطلع من جسد كمال ولا كان قتلنا قبيييل!! وانا لحدي هنا دوري إنتهى معليش إذا عايزين مساعدتي ممكن اجيكم بس م بقدر اطلعو منو!! ومشى!! حسن اسعف جمال وابوه!! وجمال طول الطريق بيسأل عن ابوه لمن وصلو المستشفى!! الابو نزيف حاد ف الدماغ!! بس دفره ولدو عملت ليهو زمة صدر دائمة!! وكأنو عندو ازمة ولا مرض من امراض الصدر!! وبقى يتنفس بصعوبة!! لكن جمال كويس جاهو إننهيار عصبي حاد بس!! حنان عايزه تجن!! كواريك وسكلبة وبتنادي ف كمال!! لدرجة انهم طلعوها من المستشفى بسبب الإزعاج!! بعد طلعوهم جمال قال اخوى لسسه ف البيت داك!؟ حسن قال ليهو للاسف م قدرنا نطلعو!! جمال شال نفس عميق وقال لحسن جيب لي رقم الدجالين!! حسن عاين ليهو بإستغراب وقال إنت جادي!!؟ قال ليهو مضطر ي عمي لازم نعرف إتفقو مع الشيطان ع شنو!؟ وكيف نقدر نساعد اخوي!! انا م عندي حل غير كدا!! وفعلا إتصلو عليهم ودلاك عملو فيها مخلوعين وم مصدقين الحصل ف البيت!! وجمال زفاها معاهن فوق وقال ليهم ح اشتكيكم!!؟ ولو اخوي حصل ليهو شيء ح اكتلكم بيدي!! حسن مسك منو التلفون لانو إنفعل شديد!! وقال ليهم بكرة تجو البيت وترونا عملتو شنو ف البيت!؟ وإتفقو يتلاقو بكرة ف البيت!! والام قالت إلا تمش تبيت مع كمال وم بتخليهو يبيت براهو ف البيت داك!! حسن قال ليها كمال م بجيهو شيء اكتر من كدا!! خافي ع البقية واصبري بيتعالج!! ف النهاية بكت وصبرت وباتت مع بناتها وجمال بات مع حسن عشان يون قريب من كمال.. وف اليوم التاني من الصباح الدجالين جو!!؟
جمال حاول يدخل البيت بس م قدر خوفة مبالغ فيها وغرائزو منعتو حتى يفتح الباب؟ كل م يمد يدو ترجف ويتراجع! واهلو جو بالتزامن مع الشيوخ الدجالين،وقبل م يدخلو معاهم ف نقاش حنان مسكتو من رقبتو وقالت ليهو عملتو شنو ف ولدي ودا م كان إتفاقنا!! وخليتك ل ****…والشيخ بقول ليها اهدي كلو بيتصلح!! بس انا مستغرب كيف الإتفاق إتلغى!! جمال مسكو من رقبتو وقال ليهو إتفقتا معاهم ع شنو إنت!؟ حسن مسكهم وقال ي جماعة إستهدو ب****!! الدجال جاط وقال غلطان انا زاتي الجيتكم تاني يلا ارح لجماعتو!! حسن حاول يوقفهم بس جمال وقف قداو وقال ليهو لو راجل صاح مر قدامي!! وكان عيونو حمر وهاج!! الدجال قال ليهو زح ي ولييد من قدامي!! هو الشيطان م خوفني تخوفني إنت!؟ حسن ادخل ووقف بيناتهم وقال يلا خلونا ف المهم!! وورينا عملت شنو!؟ قال ليهم كان إتفاقنا كالاتي نقدم قربان بطريقة معينة وننفذ طلبات شيطانية وهم حيسكنو تحت الارض يعني تحت الببت!! مع القربان القدمناهو!! والإتفاق بيتلقى إذا ف زول طلع القربان من تحت الارض!! واول زول بيلمسو ولا هم اختاروه حيتلبسوه!!؟ جمال ختى يدو ف راسو وقال يعني اخوي ضحية الاعيب شيطانية!؟ عشان تعرفو الشبطان يعوذبالله مراوغ وبيحتال كيف ظاهريآ كدا كان الإتفاق مقبول وماف زول يححفر تحت البيت عشان يلقى القربان!! يس الملعون الرجيم ختى القربان ف ماسورة الموية!! يعني يعطل انسيابها ف البيت واكيد حيحاولو يصلحوها!! وبكدا حيقدرو يتحررو من إتفاقهم وهنا الشيخ الدجال وامثالو نجسو المصحف ولعبو بالايات القرأنية وغيرو من امور الشرك ع الفاضي!! والشيطان هو المسيطر او سيد اللعبة!! وبقو امام خيارين!! ي يعقدو إتفاق جدييد ي يحاولو يطلعوهم بالقوة والطريقتين م مضمونات!! ف الحالة الاولى قد يرفضو يتفقو وف الحالة التانية قد يحاولو يقتلو كمال!!؟ جمال قال ليهم من سابع المستحيلات ننصاع لمتطلباتهم تاني!؟ بس لازم يطلعو وكدي وريهم إنو حنخلي ليهم البيت وماف زول حيجي عليهم ولا يزعجهم وهم يتركو جسد كمال ودار النقاش وطال بين اهل كمال والدجال!! لحدي م الدجال قال ح يحاول يتواصل معاهم!! واكيد إلا بنجاسة!! طلعو عملو طلاسيم ودخلو وبدقو ف حاجات كدا وبقولو كلام زي الإنشاد بس م مفهوم وماف إستجابة!! لحدي م طلع كيس من جيبو وبدا يشيل منو ويرش ف البيت وبيتكم احضرو ي سيادي احضرو واطلبو وكلام فاضي كتيييير وف وسطو لغة م مفهومة!! لحدي م ظهر كمال كان طالع ف حافة السلم فوق وجا متزحلق!! لحدي م إستقر قدامهم!! وبقى يعاين ليهم واحد واحد وبيضحك!! والدجال برك لكمال ف الواطا ومدنقر وبيتكلم براحة بيهمس ليهو همسس!! وكمال إتجنن ونطط عيونو وبقى يتنفس بسرعة وبصوت مسموع! وفجأة بقى يطلع اصوات لاهي محسوبة للحيوان ولا وهو صوت إنسان!! الهول ضلممم وناس جمال وابوه برا!! والشيخ جوة بكةرك!! الشيء طلعة من كمال زي السراب!! ولا هو دا قرين كمال م معروف بس بيشبهو!!وبقى يتلف ف الدجال زي العصار!! والبيت كلو إتملى دخان وضلام…وبعد مسافة حتى الشيخ قدر يتجاوب معاهم!! وقال قالو ليهو ف كل الحالات البيت حقهم وم بيطلعو منو!! اما كمال حيطلعو منو بس بشرط يقتلو واحد!! لو كان من الاسرة ولا اي زول تاني!! بس لازم يتم اختيارو!! ف الوقت داك كمال فاقد الوعي وم حاسي بشيء!! وإتقفلت ع ناس البيت ف وشهم وم عرفو يتصرفو كيف!؟ ومستحيل يضحو بأي كان عشان سلامة ولدهم وراسهم كبس!! واي واحد بدا يخطط ويفكر يطلعو بأقل الخسائر كيف”!؟ لحدي م داليا خطرت ليها فكرة جهنمية…!!

نواصل بعدين

الجزء التاسع عشر من رواية بيت الشيطان​

الحياة مليانة مصائب مرات بتقدر نتعامل معاها ونضع ليها حد!! بس لم يكون التعامل مع شيء بفوق قدارتك العقلية والجسدية صعب إنك تتغلب عليه! ودا الشيء الحصل مع محمود واسرتو لقو نفسهم ف مواجه مع عدو البشرية!! وماف زول حيقدر يساعدهم!؟ وكل الفضل انهم يدعو **** ينصرهم ويرفع عنهم البلاء!! محمود كان فكرتو يودو كمال مصح عقلي ويعالجوه هناك وإن اضطرو لمساعدة شيوخ..بس كانت المشكلة كيف يطلعوه من البيت!! الدجال قال ليهم بقيتو ع شنو!! حتخاطرو بحياة زول!؟؟ جمال نهرو وقال ليهو دي عايزه ليها سؤال!! اكيد لا بس و**** من المفترض نضحي بيك لانك دخلتا ف متاهاتهم وإتفقت معاهم!! الدجال قال ليهو قدم ليهم والدتك!!؟ هي الطلبت حضوري! جمال جا هاجم ع الدجال بس حسن وابوه وحتى خدام الدجال تدخلو وبعد تعب حتى ابعدو جمال عنو!! داليا قالت ليهم يلا ممكن تسمعو فكرتي!! حنستعين بشيوخ القرأن وإنت كمان!! وكانت بتقصد الدجال!! جمال صر حواجبو وقال ليها كيف يعني وضحي!! شالت نفس عميييق وقالت مش هو عامل فيها محتال وعايز يلعب علينا!! نحنا نلعب معاهو نفس اللعبة!! ابوها قال كيف!؟ قالت ليهم حنخلي الشبخ يجي ويجيب معاهو البيقدرو يساندوه وقلبهم قوي!! ويكونو معانا برا! وف نفس الوقت الدجال يخش عليهو!! الشيخ الدجال حمر ليها وقاطعها وقال حسني الفاظك!! منو الدجال!! حسن قال ليهو معليش بس دا شغلك!! الراجل هاج وقال ليهم انا م جيت من نفسي؟؟ إنتو طلبتوني ونفذتو معاي كل الطلبات!! فما تطلعوني مسخ لعين وإنتو الشرفاء!! وهاج فوق وقال انا عادي ممكن امش م فارقة معاي بشيء بس انتو حتنقذو ولدكم كيف!؟ فعاين لمحمود وقال ليهو لو عايز ولدك يرجع ليك سكت اولادك وخليهم يتكلمو بإحترام!! جمال قال ليهو نحنا بنعامل اي زول ع حسب مكانتو!! ومحمود تدخل وسكت ولدو!! وقال لداليا واصلي! قالت يلا يخش شيخكم دا ويحاول بشعوذتو يتخاطب معاهم ويخليهم بعد م يتجاوبو معاهو ويطلعو من جسد كمال وف اللحظة دي الشيوخ يتدخلو ويرقو لكمال ويحجبوه منهم!! الدجال ضحك وقال ليها إنتي عايزه تطلعي تلاميذ من فصل!؟ ولا عايزه تطلعي شيطان! ياعوذبالله…مع احترامي ليك ي بتنا بس فكرتك غبية! وم حيطلعو كدا ولو طلعو وإتكلمو معاي وشيوخك القلتيهم ديل دخلو ممكن يقتلونا كلنا!! وكمان نحنا م بنلعب سك سك عشان هم يطلعو والشبوخ يجو جارين لكمال ياخي ف القرأن م قريتي الاية حقت ملك بلقيس!! ف رمشة عين بس إتنقل من مكان لمكان!! فمعقولة يغلبهم يرجعو لجسد كمال!!؟ وحتى ولو طلعو واتكلمو معاي!! كدا حتتسببو بمقتلنا كلنا وخدوها نصيحة مني..محمود شال نفس عميق وقال باي طريقة لازم نساعد ولدي…الدجال قال انا بسوي البقدر عليهو بس م بوعدك بشيء!! حنان إنهارت ويئست منهم كلهم وبعد تعب حتى مسكوها قالت خاشة ليهم يقتلوها هي ويخلو ولدها!! وبناتها بيبكو وبثبتو فيها!! وكان الوقت داك المغرب قرب يأذن!! حسن قال لمحمود الشيوخ قالو بعد الصلاة حيجو!! وحنحاول نخش البيت!! وكلهم طلعو ع الجامع والبنات كانو مع امهم لحدي م عزيزه جارتهم قالت ليهم قومو صلو وادعو لاخوكم **** يرجعو ليكم ويصرف عنو العوارض!! وفعلا قامو وإتوضو وصلو جماعة بس من دون دلال لانها إتأخرت ف الحمام…لم جات صلت براها وهي ف السجود مغمضة وبتدعي لاخوها!! وفجأة شافت ضل وهي مغمضة فتحت مخلوعة وم عرفت نفسها ف سجدة عادية ولا ف تشهود من شدة الخوفة!! وقلبها بقى يضرب!! قامت واصلت صلاتها وتاني لم سجدت حست بنفس الشيء!! فالخوف زاد وقالت خلاص الشيء حيتملك جسدها برضو!! وجسمها كلو بيرتعش!! لحدي حست بشي واقف قدامها مباشرتآ ضلام ولا هو ظل! بس م ظل بشر!! م قدرت تتخيل الشكل يكون كيف لانو الخوفة إتملكتها!! وحلقها إتربط وم قدرت تكورك…وبصعوبة حتى قدرت تقول دا منو!! ماف زول ردا بس الشيء قدام عيونها وثابت وم بيتحرك!! اعصابها باظت وبركت ف الواطا ورجولها بيرجفو!! وقربت تدوخ بس سمعت صوتها بيتكلم معاها وكأنها مسجلة كلام وبتسمع فيهو!! وبقول ليها م تخافي مني!! م بأذيك!؟ والخوفة زادت والقلب لمن بقى يطعنها وماف زول جايب ليها خبر وكأنها قاعدة ف الصلاية وبتدعي ولا بتسبح!! وهي ف دنيا تانية! وقالت ف سرها إنت منو!؟ لانو لسانها إتربط وم بتقدر تنطق!! بدون م تشعر لقت عيونها غمضو!! وشافت صورة ليا قدامها!! فتحت مخلوعة لمن شهقت وقالت ليا!! إنتي شنو بالضبط…ونفس الصوت قال ليها ليك إنتي ليا بس إذا عرفت اسمي حتتمسي!! وإذا شفتيني حتموتي!! انا منهم بس م مؤذي!! زي م عندكم الطيبين نحنا كمان!! وف الاخر كلنا عباد ****…إتخلعت وقالت ف سرها **** ولا ***** ولا شنو بالضبط وعايز مني شنو!؟ م جاها جواب!! ولسسسه برتعش بس قلبها هدأ شوية ووقعت ع المصلاية وتاني م حست بشيء!! لم فتحت لقت نفسها راقدة ف محلها!! وناس ابوها مشو ع البيت المسكون!! اول دخل الدجال!! وتقريآ قابلوه بالرفض وم إستجابو ليهو!! م قدر حتى يسيطر ع كمال!! ولانهم عارفين طبيعة الشي البيتعاملو معاهو طلعو جري!! الشيوخ قالو ليهم انا معندنا شي بيحجبنا منهم غير إنو متوكلين ع **** إذا عايزين تدخلو نحنا م بنضمن النتائج بس خليكم متحصنين!!

فعلا دخلو البيت وشايلين بطاطير لانو كهرباء البيت فاصلة!! الشيوخ بدو يحصنو ف البيت وبقولو ف اذكار وادعية بس لسسه م قرو قرأن..والبيت بدت تظهر فيهو الاعراض القديمة! سامعين الحركة ف كل حته ف البيت جوطة وكركبة والابواب والشبابيك تضرب!! وكأنو الارض بترجف من تحتهم!! ومحمود قال ليهم ياجماعة انا م عايز اعرض حياتكم للخطر!! ممكن تطلعو واحد قال ليهو إن كيد الشيطان ضعييف!! ومهما كان مارد ومتمرد م حيقدر يقاوم كلام ****…اثبتو وثبتو قلوبكم وخلو ثقتكم بربنا كبيرة واكيد حينصرنا!! وفجأة ف عز الكلام دا وقعت حاجة زي الصاعقة! وكلهم بقو م بيسمعو وكأنو كل واحد منهم ف جزيرة معزولة وم فيها غيرو!! بس م وقفو قراية وبدأو من سورة البقرة وصاح دخلتهم خوفة لانو المشهد مخيف!! بس إيمانهم كان اقوى بكتييير وواصلو ف تلاوتهم وادعيتهم…وفجأة سمعو صوت كمال بيجعر! الصوت لكمال بس الشكل نسأل **** السلامة تحسو وكأنو ثورين بيتصارعو ولا متحاضنين بقوة منظر تقشعر له الابدان!! وماف زول قدر يقرب عليهو بس وقفو حولينو وعملو دائرة!! وهو ف نصهم وبيقرو وبرشو فيهو بموية زمزم وهو يصرخ!! وبقول بصوت مرعب بقتلو بقتلكم كلكم!! وم بنطلع!! وكمال بيجعر!!والشيوخ شي ضرب وشي رش وتلاوة مستمرة…بس ابوه تعب واظنو الضغط إرتفع ف حسن طلعو برا بس م قدر يدخل تاني!! الابواب إتقفلت والبيت كلو مشتعل نار!! وحنان عايزه تجن!! وكبير ع صغير ف الحي مخلوع! والكواريك م ليها حد..تخيلو بشاعة المنظر خمس شيوخ واخوين ف بيت مشتعل من برا!! وكأنهم بيتشو جوة!! صاح درجة الحرارة كانت عالية وغير محتملة!! بس صبرو!! وف شيخ حاول يخنق كمال عشان يحاةل يسيطر ع الشيطان الجواهو اعوذبالله بس قبل م يدو تصل إتشنجت وكأنو دخلوها ف مفرمة والحوليهو سمعوها بتتكسر!! الشيخ كورك لمن اغمى عليهو والبقية خافو بس لو وقفو قراية حيواجهم نفس المصير…وغلبهم اليسوه والشيء الجوة كمال م عايز يطلع وكمال روحو عايزه تطلع من شدة م إتعذب!! لحدي م ظهرت ليا!! هي زاتها زات الاربعة سنوات مسكت دلال من يدها وقالت انا بقدر احميك إنتي بس!! وم بقدر عليهو براي!! مدت لدلال حاجة زي العقد وقالت لدلال لبسيها لاخوك حتساعدكم…فكت دلال وقالت ليها اتبعيني…وم توقفي حتى ولو انا اختفيت…دلال خافت بس خوفها ع الجوة البيت اكتر…وجات ماشة تابعة ليا وكل الوافقين بيتفرجو ف البيت المشتعل بكوركو وبوقفو فيها!! وامها لمن غمرت!! والغريبة إنهم م شايفين ليا..والمطافي م عايزه تجي وماف زول قادر يخش البيت! اصلا حتكون عملية إنتحارية إذا واحد حاول يتجاوز النار!! بس دلال جات ماشة عادي وفعلا ليا إختفت ودلال خافت بس ابت تقيف!! لحدي م دخلت البيت!! ولقت حالتهم مستعصية، وكمال كان بيضحك وبقول دا كل العندكم!حتموتو كلكم..لحدي م دلال قربت وجمال بقري وإتخلع لم شافها ونظرو كانت مبعنى جيتي كيف والجابك شنو!؟ وهي الخوفة عايزه تقتلها ولمن بدت تفقد السيطرة ع نفسها!! وقربت ع كمال وهو شلع عينو وحمر ليها وهاج فجأة وبقى يترفع فوق من الارض! وبقول كلام م مفهوم وكأنو بيتخاطب مع زول!! ودلال زي الطاقاها كهرباء!! بس حست كأنو يدها ف زول بيتحكم فيها ورفعها ع كمال!! وإستجمعت قواها وقربت عليهو وجمال بوقف فيها وبكورك ليها وخايف يحصل ليها نفس الحصل للشيخ!! وكمال قرب يفترسها بس الغريبة يدها وصلت عادي لكمال وم قدر الشيطان اعوذبالله انو يأذيها!! ومن لبست كمال العقد هي وقعت غمرانة وكمال زي الحرقوه بموية نار جسمو دا لمن بطلع دخان وبتململ وبرفس وبيصرخ!! والعقد احكم عليهو الخناق ولمن بيسمعو زي صوت التششة ف رقبتو!! وهنا الشيوخ إنفعلو وحسو بالشيطان اعوذبالله ضعف!! وإنفعلو ف القراية وبرشو فيهو وياداب حتى قدرو يصلو لجسمو ويمسكوهو!! وف كل طرف من اطرافو ماسكو شيخ …وكمال بكورك وبطلع حاجة سودا زي السكن بخشمو!! وبيرجف!! وبقول ح اقتلو وم بطلع!! لحدي م اضعفوة شديييد!! وبدو يرجمو فيهو وكل حصى بينزل ع جسم كمال بيعمل تششش ف جسمو وكأنو بيحرق فيهو!! وفجأة كمال إتمدد ع الارض وطلعت منو نار ولا كهرباء م معروف بس شيء بيضوي ولمن بيجهر العيون!! والشيوخ وسعو دائرتهم!! وحاصرو الشيء ف النص!! وسمعو صرخة مخيييييفة والبيت ف لحظة كلو ولع شرار!! وكأنو شفع بيلعبو بلماع!! وف لمحة بصر إختفي وكل الموجودين ف البيت اغمى عليهم!! بعد مسافة حتى الشرطة والمطافي حتى وصلو المكان ولقو بقاية نار بسس ودخلو البيت واسعفوهم واكتر واحد متأذى وظنو انهم حيفقدوه كمال!كان منتهي رسمي ومافيهو اثر حياة غير نبض قلبو…كل المعاهو إتحسنو إلا هو بين الحياة والموت!! والدكاترة منتظرين متين جهاز القلب يقيف عشان يقولو ليهم مات. وكلهم معاهو ف المستشفى وخايفين! إلا دلال جاتها ليا!! ف الحلم وقالت ليها اسرتك رجعت ليك حافظي عليها!وودعتها وجرت!دلال بتنادي عليها وجارية وراها بس م وقفت إتلفتت إبتسمت ليها!! ودلال صحت!! ع كواريك اخواتها انو كمال!! إستعاد وعيو…وكلهم جرو عليهو!فتح عيونو بصعوبة وم كان قادر يحرك اصبعو!! بس إبتسم وقال ليهم انا جيت هنا كييف!؟ ضحكو عليهو لانو طلع ناسي كل الحصل معاهو..وبعد كم يوم خرجوة من المستشفى ورجعو بيتهم وحاولو يبدو صفحة جديدة وينسو الحصل معاهم!وعملو جلسة قرأن ثابتة كل جمعة ف البيت وبنادو الشيوخ يقرو ليهم اما بيت الشيطان الحكومة هدمتو وبنت مكانو مركز تحفيظ للقرأن وعلاج بالرقية الشرعية!! والحياة رجعت لطبيعتها وماف زول عارف إذا كان الشيطان اعوذبالله إتحرق ولا إنتقل لمكان تاني!

فمهما كان إبليس اللعين مترصدنا وقدر يستحوذ ع بعض مننا إلا إنو **** موجود وهو القادر على كل شيء..وقد يسخر لينا بعض من عبادو عشان يساعدونا وينصرنا عليهو ف اسأل **** يحمينا واياكم من همزات الشياطين وان يصرفهم عننا.

النهاية ………………