من الحاجات المشكلة من سنين بالنسبة لى كونى بدقق فى طعم الاكل .. موضوع سكر القصب وسكر البنجر
للاسف الشديد سكر القصب زى بسكو مصر كده نادر الوجود .. متلاقيش سكر القصب الا فى الجمعيات الاستهلاكية او فى فروع شركة السكر والصناعات التكاملية نفسها
سكر القصب عادة بيكون لونه غامق خفيف مش بنى لكن اغمق من سكر البنجر حبة وريحته جميلة كده تشبه ريحة العسل الاسود مميزة جدا
بينما سكر البنجر غالبا بيكون لونه ابيض ناصع وريحته وحشة وحاليا اختفت الريحة دى بس ريحته مش ريحة عسل اسود خالص ..
سكر القصب ممتاز فى تحلية اللبن خصوصا كونى من عشاق شرب اللبن لكن سكر البنجر بيبوظ طعم اللبن بطعمه وريحته واللبن زى مانتم عارفين اقل حاجة تعكره .. اللبن نفسه عند بعض اليوبرماركتات بتبقى ريحته زفرة وسيئة اذا كان سايب يعنى وعشان كده لبن جهينة افضل وانضف رغم انه بقى غالى اوى دلوقتى
سكر القصب انا لاقيته فى سوبرماركتات فى الصعيد فى المنيا .. لكن فى القاهرة والاسكندرية مش هتلاقى الا سكر البنجر مرطرط عند كل السوبرماركتات مش هتلاقيه الا فى فروع الجمعيات الاستهلاكية اللى هو سكر التموين
للاسف الشديد من عشرين سنة واكتر والحكومة مستسهلة سكر البنجر وبتهاجم زراعة قصب السكر مع ان مناخنا وجونا مناسبين جدا ف الصعيد لمحصول قصب السكر فبيستسهلوا وبينشروا من سنين سكر البنجر تشبها ببريطانيا والدول الباردة اللى جوها لا يسمح بزراعة قصب السكر .. دلوقتى البرازيل هى الاولى فى قصب السكر هى والهند واحنا بنتراجع
