ثقافة على عبد الستار وعاطف هلال - الحب فوق هضبة الهرم (1 مشاهد)

[جدو سامى 🕊️ 𓁈]

- مساء الخير يا فندم،
مش برضو سيادتك الأستاذ عاطف هلال؟
= أيوة
- أنا سألت علي سيادتك لحد ما عرفت انك بتيجي في المعاد ده... اا، ممكن تسمحلي بخمس دقايق من وقتك!
= اتفضل
- متشكر
= خير !؟
- الحقيقة يا فندم انا... انا واقع في أزمة شديدة أوي
= أزمة اي؟
- أزمة جنـ سية
= !!، يظهر انك غلطت في الراجل المناسب
- للأسف الراجل المناسب مبقاش يناسب اللي زي حالاتي، فقولت بقي اجي.. اجي لراجل الفكر يعني
= باين عليك مريت بتجربة عاطفية قاسية شويه
- ياريت يا فندم..، دانا كل يوم بدور علي أي تجربة من النوع ده ومش لاقي
= في الحقيقة يا أستاذ....
- على عبد الستار يا فندم
= أهلا وسهلا
- أهلا بيك
= تشرب اي الأول
- لا ***** يا فندم لسه شارب متشكر أوي
= خد شاي... هات شاي هنا يا زكي، في الحقيقة اللي بتقوله ده يا أستاذ على يعتبر منتهي الصراحة!
- أعمل اي! المسألة بكل بساطة ان الجواز بقي شئ مستحيل، وسيادتك طبعا سيد العارفين، والطريق التاني تكاليفه ميقدرش عليها موظف زي حالاتي...!!،
سيادتك تصدق ان واحد زيي عنده... عنده 28 سنة معندوش اي تجربة من النوع ده !!!
= فاهم فاهم..
- زمان.. كانت المذاكرة وأحلام الشباب بينسوني الرغبات الطبيعية، لحد لما اتخرجت واتوظفت وبقيت من غير شغل... بقي مخي كله محصور دلوقتي في... في الجنـ س !
= حاجة غريبة، مع ان شكلك مقبول
- ايوة يا فندم بس مرفوض موضوعيا، عشان كدة قولت أقابل سيادتك، يمكن الاقي عندك حل يعني..
= في الحقيقة يا أستاذ على دي مأساة، وانت مش ضحيتها لوحدك.. في آلاف من الشباب زيك
- والـ... والحل اي يا فندم؟!
= ده موضوع مش بسيط، ده موضوع كبير ومحتاج لتفكير أكبر، يعني.. ممكن نرفض تقاليد الزواج السخيفة، ممكن نطالب وزارة الإسكان انها تساهم في حل المشكلة... وممكن..
- وانا هس... وانا هستني يا فندم لغاية لما الكون ينصلح حاله ؟!!
= لو قريت في تاريخ البشرية هتلاقي أجيال كتير كانت هي الضحية لغاية ما الظروف اتصلحت
- يعني كدة... مفيش أمل؟
= انت برضو مطالب بالتفكير بصفتك صاحب المشكلة.. ولازم تسأل نفسك اي أفضل وسيلة تتغلب بيها علي الظروف الصعبة دي
- طب و... وجيل الأستاذة مالقيش عندهم رأي مفيد؟
= من ناحيتنا ادي احنا بنكتب كل يوم، وبنشارك في البحث عن حلول للمشاكل، لكن جيلكم للأسف مش مؤمن بأي جيل سابق
- محدش ممكن.. حاول يلاقي حلول حقيقية لمشاكلنا الواقعية، انا آسف إذا كنت بقول الكلام ده..
= شوف يا أستاذ على.. انا في رأيي ان الحل في ايديكم انتم.. انت مثلا ليه ما تحاولش تدور علي قدوة حسنة تساعدك في أزمتك؟
- القدوة اللي قدامي.. عيلة حلت مشكلتها بالدعـ ارة
= ده حل مرفوض طبعا
- أعرف زميل ليا اشتغل حـ رامي في اجازة الصيف، وقريت في الجرايد عن الواحد اللي اغتـ صب واحدة وبعدين قتـ لها عشان يخفي جريمـ ته
= تقصد الشاب اللي شيخ الأزهر طالب بشنـ قه قدام الناس؟
- مش فاكر يا فندم،.. بس مش كان أولي ان شيخ الأزهر يشوف حل للشبان اللي مش قادرين يتجوزوا !!
= قولي.. مفكرتش في الهجرة؟
- فكرت.. لكن شهادتي مش مطلوبة
= انت مؤهلك اي؟
- ليسانس حقوق
= الصراحة انت مشكلتك صعبة، لكن أرجع وأقول ان الشباب اللي زيك عليه معظم العبء في تغيير المجتمع حسب الظروف الجديدة
- أستاذ عاطف... أنا قصدتك عشان تلاقي حل سريع لأزمتي، مش عشان تنصحني وابقي مصلح اجتماعي، واستني مية سنة عقبال ما الدنيا تتغير !!
= ايوة انا جاي يسطا إبراهيم، لا مؤاخذة يا أستاذ على، كان بودي أقعد معاك اكتر من كدة، عندي اجتماع مهم، فرصة سعيدة.
- كلهم كدابين، وعارفين انهم كدابين، وعارفين ان احنا عارفين انهم كدابين، وبرضوا مستمرين في الكدب، وبيلاقوا اللي بيسقفلهم.

الحب فوق هضبة الهرم (1986)

إخراج: عاطف الطيب

قصة وسيناريو وحوار: نجيب محفوظ


View: https://www.facebook.com/photo/?fbid=351708130917006&amp%3Bset=gm.3302275933249481&amp%3Bidorvanity=104287949714978&amp%3B__cft__%5B0%5D=AZW2vvOk5XHkhgR2zxlfqvtADQt0mWXsBYvLU-hbFVyAnSTVwTu7yjcZcYS-L9SHbxX4czZl_uxoru7dvK9QZ_1FpcMV-_9rZ8sEx6JODiyqUrGMG-pZKW2frjoO2zgm6p-ObBaAWK7AzfJQ1soFC1h7AEwHNK-UYXb3gYbMehxdvu7sGmezhl-OlXUaDZp1DCo&amp%3B__tn__=EH-R